| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
6. පදුමච්‌ඡදනියත්‌ථෙරඅපදානවණ්‌ණනා
6. Padumacchadaniyattheraapadānavaṇṇanā
නිබ්‌බුතෙ ලොකනාථම්‌හීතිආදිකං ආයස්‌මතො පදුමච්‌ඡදනියත්‌ථෙරස්‌ස අපදානං. අයම්‌පි පුරිමබුද්‌ධෙසු කතපුඤ්‌ඤසම්‌භාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ එකස්‌මිං කුලගෙහෙ නිබ්‌බත්‌තො විඤ්‌ඤුතං පත්‌තො රතනත්‌තයෙ පසන්‌නො පරිනිබ්‌බුතස්‌ස විපස්‌සිස්‌ස භගවතො චිතකං පදුමපුප්‌ඵෙහි පූජෙසි. සො තෙනෙව චිත්‌තප්‌පසාදෙන යාවතායුකං ඨත්‌වා තතො සුගතීසුයෙව සංසරන්‌තො දිබ්‌බසම්‌පත්‌තිං මනුස්‌සසම්‌පත්‌තිඤ්‌චාති ද්‌වෙ සම්‌පත්‌තියො අනෙකක්‌ඛත්‌තුං අනුභවිත්‌වා ඉමස්‌මිං අම්‌හාකං සම්‌මාසම්‌බුද්‌ධකාලෙ එකස්‌මිං කුලගෙහෙ නිබ්‌බත්‌තො විඤ්‌ඤුතං පත්‌තො සත්‌ථරි පසීදිත්‌වා සාසනෙ පබ්‌බජිතො ඝටෙන්‌තො වායමන්‌තො නචිරස්‌සෙව අරහා අහොසි. තස්‌ස රත්‌තිට්‌ඨානදිවාට්‌ඨානාදීසු තත්‌ථ තත්‌ථ විහරන්‌තස්‌ස විහාරො පදුමපුප්‌ඵෙහි ඡාදීයති, තෙන සො පදුමච්‌ඡදනියත්‌ථෙරොති පාකටො.
Nibbutelokanāthamhītiādikaṃ āyasmato padumacchadaniyattherassa apadānaṃ. Ayampi purimabuddhesu katapuññasambhāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto viññutaṃ patto ratanattaye pasanno parinibbutassa vipassissa bhagavato citakaṃ padumapupphehi pūjesi. So teneva cittappasādena yāvatāyukaṃ ṭhatvā tato sugatīsuyeva saṃsaranto dibbasampattiṃ manussasampattiñcāti dve sampattiyo anekakkhattuṃ anubhavitvā imasmiṃ amhākaṃ sammāsambuddhakāle ekasmiṃ kulagehe nibbatto viññutaṃ patto satthari pasīditvā sāsane pabbajito ghaṭento vāyamanto nacirasseva arahā ahosi. Tassa rattiṭṭhānadivāṭṭhānādīsu tattha tattha viharantassa vihāro padumapupphehi chādīyati, tena so padumacchadaniyattheroti pākaṭo.
83. අත්‌තනො පුබ්‌බකම්‌මං සරිත්‌වා සොමනස්‌සවසෙන පුබ්‌බචරිතාපදානං පකාසෙන්‌තො නිබ්‌බුතෙ ලොකනාථම්‌හීතිආදිමාහ. තත්‌ථ නිබ්‌බුතෙති ඛන්‌ධපරිනිබ්‌බානෙන පරිනිබ්‌බුතෙ සත්‌ථරි, විපස්‌සිස්‌ස සම්‌මාසම්‌බුද්‌ධස්‌ස සරීරෙ චිතමානියමානෙ චිතකෙ ආරොපිතෙ සුඵුල්‌ලං පදුමකලාපං අහං ගහෙත්‌වා චිතකං ආරොපයිං පූජෙසින්‌ති අත්‌ථො. සෙසගාථාසු හෙට්‌ඨා වුත්‌තනයත්‌තා උත්‌තානත්‌ථමෙවාති.
83. Attano pubbakammaṃ saritvā somanassavasena pubbacaritāpadānaṃ pakāsento nibbute lokanāthamhītiādimāha. Tattha nibbuteti khandhaparinibbānena parinibbute satthari, vipassissa sammāsambuddhassa sarīre citamāniyamāne citake āropite suphullaṃ padumakalāpaṃ ahaṃ gahetvā citakaṃ āropayiṃ pūjesinti attho. Sesagāthāsu heṭṭhā vuttanayattā uttānatthamevāti.
පදුමච්‌ඡදනියත්‌ථෙරඅපදානවණ්‌ණනා සමත්‌තා.
Padumacchadaniyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 6. පදුමච්‌ඡදනියත්‌ථෙරඅපදානං • 6. Padumacchadaniyattheraapadānaṃ
