| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൬. പദുമച്ഛദനിയത്ഥേരഅപദാനവണ്ണനാ
6. Padumacchadaniyattheraapadānavaṇṇanā
നിബ്ബുതേ ലോകനാഥമ്ഹീതിആദികം ആയസ്മതോ പദുമച്ഛദനിയത്ഥേരസ്സ അപദാനം. അയമ്പി പുരിമബുദ്ധേസു കതപുഞ്ഞസമ്ഭാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ വിപസ്സിസ്സ ഭഗവതോ കാലേ ഏകസ്മിം കുലഗേഹേ നിബ്ബത്തോ വിഞ്ഞുതം പത്തോ രതനത്തയേ പസന്നോ പരിനിബ്ബുതസ്സ വിപസ്സിസ്സ ഭഗവതോ ചിതകം പദുമപുപ്ഫേഹി പൂജേസി. സോ തേനേവ ചിത്തപ്പസാദേന യാവതായുകം ഠത്വാ തതോ സുഗതീസുയേവ സംസരന്തോ ദിബ്ബസമ്പത്തിം മനുസ്സസമ്പത്തിഞ്ചാതി ദ്വേ സമ്പത്തിയോ അനേകക്ഖത്തും അനുഭവിത്വാ ഇമസ്മിം അമ്ഹാകം സമ്മാസമ്ബുദ്ധകാലേ ഏകസ്മിം കുലഗേഹേ നിബ്ബത്തോ വിഞ്ഞുതം പത്തോ സത്ഥരി പസീദിത്വാ സാസനേ പബ്ബജിതോ ഘടേന്തോ വായമന്തോ നചിരസ്സേവ അരഹാ അഹോസി. തസ്സ രത്തിട്ഠാനദിവാട്ഠാനാദീസു തത്ഥ തത്ഥ വിഹരന്തസ്സ വിഹാരോ പദുമപുപ്ഫേഹി ഛാദീയതി, തേന സോ പദുമച്ഛദനിയത്ഥേരോതി പാകടോ.
Nibbutelokanāthamhītiādikaṃ āyasmato padumacchadaniyattherassa apadānaṃ. Ayampi purimabuddhesu katapuññasambhāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto viññutaṃ patto ratanattaye pasanno parinibbutassa vipassissa bhagavato citakaṃ padumapupphehi pūjesi. So teneva cittappasādena yāvatāyukaṃ ṭhatvā tato sugatīsuyeva saṃsaranto dibbasampattiṃ manussasampattiñcāti dve sampattiyo anekakkhattuṃ anubhavitvā imasmiṃ amhākaṃ sammāsambuddhakāle ekasmiṃ kulagehe nibbatto viññutaṃ patto satthari pasīditvā sāsane pabbajito ghaṭento vāyamanto nacirasseva arahā ahosi. Tassa rattiṭṭhānadivāṭṭhānādīsu tattha tattha viharantassa vihāro padumapupphehi chādīyati, tena so padumacchadaniyattheroti pākaṭo.
൮൩. അത്തനോ പുബ്ബകമ്മം സരിത്വാ സോമനസ്സവസേന പുബ്ബചരിതാപദാനം പകാസേന്തോ നിബ്ബുതേ ലോകനാഥമ്ഹീതിആദിമാഹ. തത്ഥ നിബ്ബുതേതി ഖന്ധപരിനിബ്ബാനേന പരിനിബ്ബുതേ സത്ഥരി, വിപസ്സിസ്സ സമ്മാസമ്ബുദ്ധസ്സ സരീരേ ചിതമാനിയമാനേ ചിതകേ ആരോപിതേ സുഫുല്ലം പദുമകലാപം അഹം ഗഹേത്വാ ചിതകം ആരോപയിം പൂജേസിന്തി അത്ഥോ. സേസഗാഥാസു ഹേട്ഠാ വുത്തനയത്താ ഉത്താനത്ഥമേവാതി.
83. Attano pubbakammaṃ saritvā somanassavasena pubbacaritāpadānaṃ pakāsento nibbute lokanāthamhītiādimāha. Tattha nibbuteti khandhaparinibbānena parinibbute satthari, vipassissa sammāsambuddhassa sarīre citamāniyamāne citake āropite suphullaṃ padumakalāpaṃ ahaṃ gahetvā citakaṃ āropayiṃ pūjesinti attho. Sesagāthāsu heṭṭhā vuttanayattā uttānatthamevāti.
പദുമച്ഛദനിയത്ഥേരഅപദാനവണ്ണനാ സമത്താ.
Padumacchadaniyattheraapadānavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൬. പദുമച്ഛദനിയത്ഥേരഅപദാനം • 6. Padumacchadaniyattheraapadānaṃ
