| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
31. பது³மகேஸரவக்³கோ³
31. Padumakesaravaggo
1-10. பது³மகேஸரியத்தே²ரஅபதா³னாதி³வண்ணனா
1-10. Padumakesariyattheraapadānādivaṇṇanā
1-2. ஏகதிங்ஸதிமே வக்³கே³ பட²மாபதா³னே இஸிஸங்கே⁴ அஹங் புப்³பே³தி அஹங் புப்³பே³ போ³தி⁴ஸம்பா⁴ரபூரணகாலே இஸிஸங்கே⁴ பச்சேகபு³த்³த⁴இஸிஸமூஹே தேஸங் ஸமீபே ஹிமவந்தபப்³ப³தே மாதங்க³ஹத்தி²குலே வாரணோ சண்ட³ஹத்தீ² அஹோஸிந்தி ஸம்ப³ந்தோ⁴. மனுஸ்ஸாத³யோ வாரேதீதி வாரணோ, அத² வா வாசாய ரவதி கோஞ்சனாத³ங் நத³தீதி வாரணோ. மஹேஸீனங் பஸாதே³னாதி பச்சேகபு³த்³த⁴மஹேஸீனங் பஸாதே³ன. பச்சேகஜினஸெட்டே²ஸு, து⁴தராகே³ஸு தாதி³ஸூதி லோகத⁴ம்மேஹி நிச்சலேஸு பச்சேகபு³த்³தே⁴ஸு பத்³மகேஸரங் பது³மரேணுங் ஓகிரிங் அவஸிஞ்சிந்தி ஸம்ப³ந்தோ⁴.
1-2. Ekatiṃsatime vagge paṭhamāpadāne isisaṅghe ahaṃ pubbeti ahaṃ pubbe bodhisambhārapūraṇakāle isisaṅghe paccekabuddhaisisamūhe tesaṃ samīpe himavantapabbate mātaṅgahatthikule vāraṇo caṇḍahatthī ahosinti sambandho. Manussādayo vāretīti vāraṇo, atha vā vācāya ravati koñcanādaṃ nadatīti vāraṇo. Mahesīnaṃ pasādenāti paccekabuddhamahesīnaṃ pasādena. Paccekajinaseṭṭhesu, dhutarāgesu tādisūti lokadhammehi niccalesu paccekabuddhesu padmakesaraṃ padumareṇuṃ okiriṃ avasiñcinti sambandho.
து³தியததியாபதா³னானி உத்தானானி.
Dutiyatatiyāpadānāni uttānāni.
13-16. சதுத்தா²பதா³னே மஹாபோ³தி⁴மஹோ அஹூதி விபஸ்ஸிஸ்ஸ ப⁴க³வதோ சதுமக்³க³ஞாணாதா⁴ரபா⁴வதோ ‘‘போ³தீ⁴’’தி லத்³த⁴னாமஸ்ஸ ருக்க²ஸ்ஸ பூஜா அஹோஸீதி அத்தோ². ருக்க²ட்ட²ஸ்ஸேவ ஸம்பு³த்³தோ⁴தி அஸ்ஸ போ³தி⁴பூஜாஸமயே ஸன்னிபதிதஸ்ஸ மஹாஜனஸ்ஸ ஸம்பு³த்³தோ⁴ லோகஜெட்டோ² நராஸபோ⁴ ருக்க²ட்டோ² இவ ருக்கே² டி²தோ விய பஞ்ஞாயதீதி அத்தோ². ப⁴க³வா தம்ஹி ஸமயேதி தஸ்மிங் போ³தி⁴பூஜாகரணகாலே ப⁴க³வா பி⁴க்கு²ஸங்க⁴புரக்க²தோ பி⁴க்கு²ஸங்கே⁴ன பரிவுதோ. வாசாஸபி⁴முதீ³ரயந்தி முது³ஸிலிட்ட²மது⁴ரஉத்தமகோ⁴ஸங் உதீ³ரயங் கத²யந்தோ நிச்சா²ரெந்தோ சதுஸச்சங் பகாஸேஸி, தே³ஸேஸீதி அத்தோ². ஸங்கி²த்தேன ச தே³ஸெந்தோதி வேனெய்யபுக்³க³லஜ்ஜா²ஸயானுரூபேன தே³ஸெந்தோ ஸங்கி²த்தேன ச வித்தா²ரேன ச தே³ஸயீதி அத்தோ². விவட்டச்ச²தோ³தி ராகோ³ ச²த³னங், தோ³ஸோ ச²த³னங், மோஹோ ச²த³னங், ஸப்³ப³கிலேஸா ச²த³னா’’தி ஏவங் வுத்தா ச²த³னா விவடா உக்³கா⁴டிதா வித்³த⁴ங்ஸிதா அனேனாதி விவட்டச்ச²தோ³, ஸம்பு³த்³தோ⁴. தங் மஹாஜனங் தே³ஸனாவஸேன நிப்³பா³பேஸி பரிளாஹங் வூபஸமேஸீதி அத்தோ². தஸ்ஸாஹங் த⁴ம்மங் ஸுத்வானாதி தஸ்ஸ ப⁴க³வதோ தே³ஸெந்தஸ்ஸ த⁴ம்மங் ஸுத்வா.
13-16. Catutthāpadāne mahābodhimaho ahūti vipassissa bhagavato catumaggañāṇādhārabhāvato ‘‘bodhī’’ti laddhanāmassa rukkhassa pūjā ahosīti attho. Rukkhaṭṭhasseva sambuddhoti assa bodhipūjāsamaye sannipatitassa mahājanassa sambuddho lokajeṭṭho narāsabho rukkhaṭṭho iva rukkhe ṭhito viya paññāyatīti attho. Bhagavā tamhi samayeti tasmiṃ bodhipūjākaraṇakāle bhagavā bhikkhusaṅghapurakkhato bhikkhusaṅghena parivuto. Vācāsabhimudīrayanti mudusiliṭṭhamadhurauttamaghosaṃ udīrayaṃ kathayanto nicchārento catusaccaṃ pakāsesi, desesīti attho. Saṃkhittenaca desentoti veneyyapuggalajjhāsayānurūpena desento saṃkhittena ca vitthārena ca desayīti attho. Vivaṭṭacchadoti rāgo chadanaṃ, doso chadanaṃ, moho chadanaṃ, sabbakilesā chadanā’’ti evaṃ vuttā chadanā vivaṭā ugghāṭitā viddhaṃsitā anenāti vivaṭṭacchado, sambuddho. Taṃ mahājanaṃ desanāvasena nibbāpesi pariḷāhaṃ vūpasamesīti attho. Tassāhaṃ dhammaṃ sutvānāti tassa bhagavato desentassa dhammaṃ sutvā.
20. பஞ்சமாபதா³னே ப²லஹத்தோ² அபெக்க²வாதி விபஸ்ஸிங் ப⁴க³வந்தங் தி³ஸ்வா மது⁴ரானி ப²லானி க³ஹெத்வா அபெக்க²வா அதுரிதோ ஸணிகங் அஸ்ஸமங் க³ஞ்சி²ந்தி அத்தோ².
20. Pañcamāpadāne phalahattho apekkhavāti vipassiṃ bhagavantaṃ disvā madhurāni phalāni gahetvā apekkhavā aturito saṇikaṃ assamaṃ gañchinti attho.
ச²ட்ட²ஸத்தமாபதா³னானி உத்தானானேவ.
Chaṭṭhasattamāpadānāni uttānāneva.
40. அட்ட²மாபதா³னே நிட்டி²தே நவகம்மே சாதி ஸீமாய நவகம்மே நிட்ட²ங் க³தே ஸதி. அனுலேபமதா³ஸஹந்தி அனுபச்சா² ஸுதா⁴லேபங் அதா³ஸிங், ஸுதா⁴ய லேபாபேஸிந்தி அத்தோ².
40. Aṭṭhamāpadāne niṭṭhite navakamme cāti sīmāya navakamme niṭṭhaṃ gate sati. Anulepamadāsahanti anupacchā sudhālepaṃ adāsiṃ, sudhāya lepāpesinti attho.
நவமத³ஸமாபதா³னானி உத்தானானியேவாதி.
Navamadasamāpadānāni uttānāniyevāti.
ஏகதிங்ஸமவக்³க³வண்ணனா ஸமத்தா.
Ekatiṃsamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi
1. பது³மகேஸரியத்தே²ரஅபதா³னங் • 1. Padumakesariyattheraapadānaṃ
4. த⁴ம்மஸஞ்ஞகத்தே²ரஅபதா³னங் • 4. Dhammasaññakattheraapadānaṃ
5. ப²லதா³யகத்தே²ரஅபதா³னங் • 5. Phaladāyakattheraapadānaṃ
8. அனுலேபதா³யகத்தே²ரஅபதா³னங் • 8. Anulepadāyakattheraapadānaṃ
