| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೩೧. ಪದುಮಕೇಸರವಗ್ಗೋ
31. Padumakesaravaggo
೧-೧೦. ಪದುಮಕೇಸರಿಯತ್ಥೇರಅಪದಾನಾದಿವಣ್ಣನಾ
1-10. Padumakesariyattheraapadānādivaṇṇanā
೧-೨. ಏಕತಿಂಸತಿಮೇ ವಗ್ಗೇ ಪಠಮಾಪದಾನೇ ಇಸಿಸಙ್ಘೇ ಅಹಂ ಪುಬ್ಬೇತಿ ಅಹಂ ಪುಬ್ಬೇ ಬೋಧಿಸಮ್ಭಾರಪೂರಣಕಾಲೇ ಇಸಿಸಙ್ಘೇ ಪಚ್ಚೇಕಬುದ್ಧಇಸಿಸಮೂಹೇ ತೇಸಂ ಸಮೀಪೇ ಹಿಮವನ್ತಪಬ್ಬತೇ ಮಾತಙ್ಗಹತ್ಥಿಕುಲೇ ವಾರಣೋ ಚಣ್ಡಹತ್ಥೀ ಅಹೋಸಿನ್ತಿ ಸಮ್ಬನ್ಧೋ। ಮನುಸ್ಸಾದಯೋ ವಾರೇತೀತಿ ವಾರಣೋ, ಅಥ ವಾ ವಾಚಾಯ ರವತಿ ಕೋಞ್ಚನಾದಂ ನದತೀತಿ ವಾರಣೋ। ಮಹೇಸೀನಂ ಪಸಾದೇನಾತಿ ಪಚ್ಚೇಕಬುದ್ಧಮಹೇಸೀನಂ ಪಸಾದೇನ। ಪಚ್ಚೇಕಜಿನಸೇಟ್ಠೇಸು, ಧುತರಾಗೇಸು ತಾದಿಸೂತಿ ಲೋಕಧಮ್ಮೇಹಿ ನಿಚ್ಚಲೇಸು ಪಚ್ಚೇಕಬುದ್ಧೇಸು ಪದ್ಮಕೇಸರಂ ಪದುಮರೇಣುಂ ಓಕಿರಿಂ ಅವಸಿಞ್ಚಿನ್ತಿ ಸಮ್ಬನ್ಧೋ।
1-2. Ekatiṃsatime vagge paṭhamāpadāne isisaṅghe ahaṃ pubbeti ahaṃ pubbe bodhisambhārapūraṇakāle isisaṅghe paccekabuddhaisisamūhe tesaṃ samīpe himavantapabbate mātaṅgahatthikule vāraṇo caṇḍahatthī ahosinti sambandho. Manussādayo vāretīti vāraṇo, atha vā vācāya ravati koñcanādaṃ nadatīti vāraṇo. Mahesīnaṃ pasādenāti paccekabuddhamahesīnaṃ pasādena. Paccekajinaseṭṭhesu, dhutarāgesu tādisūti lokadhammehi niccalesu paccekabuddhesu padmakesaraṃ padumareṇuṃ okiriṃ avasiñcinti sambandho.
ದುತಿಯತತಿಯಾಪದಾನಾನಿ ಉತ್ತಾನಾನಿ।
Dutiyatatiyāpadānāni uttānāni.
೧೩-೧೬. ಚತುತ್ಥಾಪದಾನೇ ಮಹಾಬೋಧಿಮಹೋ ಅಹೂತಿ ವಿಪಸ್ಸಿಸ್ಸ ಭಗವತೋ ಚತುಮಗ್ಗಞಾಣಾಧಾರಭಾವತೋ ‘‘ಬೋಧೀ’’ತಿ ಲದ್ಧನಾಮಸ್ಸ ರುಕ್ಖಸ್ಸ ಪೂಜಾ ಅಹೋಸೀತಿ ಅತ್ಥೋ। ರುಕ್ಖಟ್ಠಸ್ಸೇವ ಸಮ್ಬುದ್ಧೋತಿ ಅಸ್ಸ ಬೋಧಿಪೂಜಾಸಮಯೇ ಸನ್ನಿಪತಿತಸ್ಸ ಮಹಾಜನಸ್ಸ ಸಮ್ಬುದ್ಧೋ ಲೋಕಜೇಟ್ಠೋ ನರಾಸಭೋ ರುಕ್ಖಟ್ಠೋ ಇವ ರುಕ್ಖೇ ಠಿತೋ ವಿಯ ಪಞ್ಞಾಯತೀತಿ ಅತ್ಥೋ। ಭಗವಾ ತಮ್ಹಿ ಸಮಯೇತಿ ತಸ್ಮಿಂ ಬೋಧಿಪೂಜಾಕರಣಕಾಲೇ ಭಗವಾ ಭಿಕ್ಖುಸಙ್ಘಪುರಕ್ಖತೋ ಭಿಕ್ಖುಸಙ್ಘೇನ ಪರಿವುತೋ। ವಾಚಾಸಭಿಮುದೀರಯನ್ತಿ ಮುದುಸಿಲಿಟ್ಠಮಧುರಉತ್ತಮಘೋಸಂ ಉದೀರಯಂ ಕಥಯನ್ತೋ ನಿಚ್ಛಾರೇನ್ತೋ ಚತುಸಚ್ಚಂ ಪಕಾಸೇಸಿ, ದೇಸೇಸೀತಿ ಅತ್ಥೋ। ಸಂಖಿತ್ತೇನ ಚ ದೇಸೇನ್ತೋತಿ ವೇನೇಯ್ಯಪುಗ್ಗಲಜ್ಝಾಸಯಾನುರೂಪೇನ ದೇಸೇನ್ತೋ ಸಂಖಿತ್ತೇನ ಚ ವಿತ್ಥಾರೇನ ಚ ದೇಸಯೀತಿ ಅತ್ಥೋ। ವಿವಟ್ಟಚ್ಛದೋತಿ ರಾಗೋ ಛದನಂ, ದೋಸೋ ಛದನಂ, ಮೋಹೋ ಛದನಂ, ಸಬ್ಬಕಿಲೇಸಾ ಛದನಾ’’ತಿ ಏವಂ ವುತ್ತಾ ಛದನಾ ವಿವಟಾ ಉಗ್ಘಾಟಿತಾ ವಿದ್ಧಂಸಿತಾ ಅನೇನಾತಿ ವಿವಟ್ಟಚ್ಛದೋ, ಸಮ್ಬುದ್ಧೋ। ತಂ ಮಹಾಜನಂ ದೇಸನಾವಸೇನ ನಿಬ್ಬಾಪೇಸಿ ಪರಿಳಾಹಂ ವೂಪಸಮೇಸೀತಿ ಅತ್ಥೋ। ತಸ್ಸಾಹಂ ಧಮ್ಮಂ ಸುತ್ವಾನಾತಿ ತಸ್ಸ ಭಗವತೋ ದೇಸೇನ್ತಸ್ಸ ಧಮ್ಮಂ ಸುತ್ವಾ।
13-16. Catutthāpadāne mahābodhimaho ahūti vipassissa bhagavato catumaggañāṇādhārabhāvato ‘‘bodhī’’ti laddhanāmassa rukkhassa pūjā ahosīti attho. Rukkhaṭṭhasseva sambuddhoti assa bodhipūjāsamaye sannipatitassa mahājanassa sambuddho lokajeṭṭho narāsabho rukkhaṭṭho iva rukkhe ṭhito viya paññāyatīti attho. Bhagavā tamhi samayeti tasmiṃ bodhipūjākaraṇakāle bhagavā bhikkhusaṅghapurakkhato bhikkhusaṅghena parivuto. Vācāsabhimudīrayanti mudusiliṭṭhamadhurauttamaghosaṃ udīrayaṃ kathayanto nicchārento catusaccaṃ pakāsesi, desesīti attho. Saṃkhittenaca desentoti veneyyapuggalajjhāsayānurūpena desento saṃkhittena ca vitthārena ca desayīti attho. Vivaṭṭacchadoti rāgo chadanaṃ, doso chadanaṃ, moho chadanaṃ, sabbakilesā chadanā’’ti evaṃ vuttā chadanā vivaṭā ugghāṭitā viddhaṃsitā anenāti vivaṭṭacchado, sambuddho. Taṃ mahājanaṃ desanāvasena nibbāpesi pariḷāhaṃ vūpasamesīti attho. Tassāhaṃ dhammaṃ sutvānāti tassa bhagavato desentassa dhammaṃ sutvā.
೨೦. ಪಞ್ಚಮಾಪದಾನೇ ಫಲಹತ್ಥೋ ಅಪೇಕ್ಖವಾತಿ ವಿಪಸ್ಸಿಂ ಭಗವನ್ತಂ ದಿಸ್ವಾ ಮಧುರಾನಿ ಫಲಾನಿ ಗಹೇತ್ವಾ ಅಪೇಕ್ಖವಾ ಅತುರಿತೋ ಸಣಿಕಂ ಅಸ್ಸಮಂ ಗಞ್ಛಿನ್ತಿ ಅತ್ಥೋ।
20. Pañcamāpadāne phalahattho apekkhavāti vipassiṃ bhagavantaṃ disvā madhurāni phalāni gahetvā apekkhavā aturito saṇikaṃ assamaṃ gañchinti attho.
ಛಟ್ಠಸತ್ತಮಾಪದಾನಾನಿ ಉತ್ತಾನಾನೇವ।
Chaṭṭhasattamāpadānāni uttānāneva.
೪೦. ಅಟ್ಠಮಾಪದಾನೇ ನಿಟ್ಠಿತೇ ನವಕಮ್ಮೇ ಚಾತಿ ಸೀಮಾಯ ನವಕಮ್ಮೇ ನಿಟ್ಠಂ ಗತೇ ಸತಿ। ಅನುಲೇಪಮದಾಸಹನ್ತಿ ಅನುಪಚ್ಛಾ ಸುಧಾಲೇಪಂ ಅದಾಸಿಂ, ಸುಧಾಯ ಲೇಪಾಪೇಸಿನ್ತಿ ಅತ್ಥೋ।
40. Aṭṭhamāpadāne niṭṭhite navakamme cāti sīmāya navakamme niṭṭhaṃ gate sati. Anulepamadāsahanti anupacchā sudhālepaṃ adāsiṃ, sudhāya lepāpesinti attho.
ನವಮದಸಮಾಪದಾನಾನಿ ಉತ್ತಾನಾನಿಯೇವಾತಿ।
Navamadasamāpadānāni uttānāniyevāti.
ಏಕತಿಂಸಮವಗ್ಗವಣ್ಣನಾ ಸಮತ್ತಾ।
Ekatiṃsamavaggavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi
೧. ಪದುಮಕೇಸರಿಯತ್ಥೇರಅಪದಾನಂ • 1. Padumakesariyattheraapadānaṃ
೪. ಧಮ್ಮಸಞ್ಞಕತ್ಥೇರಅಪದಾನಂ • 4. Dhammasaññakattheraapadānaṃ
೫. ಫಲದಾಯಕತ್ಥೇರಅಪದಾನಂ • 5. Phaladāyakattheraapadānaṃ
೮. ಅನುಲೇಪದಾಯಕತ್ಥೇರಅಪದಾನಂ • 8. Anulepadāyakattheraapadānaṃ
