| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
2. பது³மங்க³பஞ்ஹோ
2. Padumaṅgapañho
2. ‘‘ப⁴ந்தே நாக³ஸேன, ‘பது³மஸ்ஸ தீணி அங்கா³னி க³ஹேதப்³பா³னீ’தி யங் வதே³ஸி, கதமானி தானி தீணி அங்கா³னி க³ஹேதப்³பா³னீ’’தி ? ‘‘யதா², மஹாராஜ, பது³மங் உத³கே ஜாதங் உத³கே ஸங்வத்³த⁴ங் அனுபலித்தங் உத³கேன, ஏவமேவ கோ², மஹாராஜ, யோகி³னா யோகா³வசரேன குலே க³ணே லாபே⁴ யஸே ஸக்காரே ஸம்மானநாய பரிபோ⁴க³பச்சயேஸு ச ஸப்³ப³த்த² அனுபலித்தேன ப⁴விதப்³ப³ங். இத³ங், மஹாராஜ, பது³மஸ்ஸ பட²மங் அங்க³ங் க³ஹேதப்³ப³ங்.
2. ‘‘Bhante nāgasena, ‘padumassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti ? ‘‘Yathā, mahārāja, padumaṃ udake jātaṃ udake saṃvaddhaṃ anupalittaṃ udakena, evameva kho, mahārāja, yoginā yogāvacarena kule gaṇe lābhe yase sakkāre sammānanāya paribhogapaccayesu ca sabbattha anupalittena bhavitabbaṃ. Idaṃ, mahārāja, padumassa paṭhamaṃ aṅgaṃ gahetabbaṃ.
‘‘புன சபரங், மஹாராஜ, பது³மங் உத³கா அச்சுக்³க³ம்ம டா²தி. ஏவமேவ கோ², மஹாராஜ, யோகி³னா யோகா³வசரேன ஸப்³ப³லோகங் அபி⁴ப⁴வித்வா அச்சுக்³க³ம்ம லோகுத்தரத⁴ம்மே டா²தப்³ப³ங். இத³ங், மஹாராஜ, பது³மஸ்ஸ து³தியங் அங்க³ங் க³ஹேதப்³ப³ங்.
‘‘Puna caparaṃ, mahārāja, padumaṃ udakā accuggamma ṭhāti. Evameva kho, mahārāja, yoginā yogāvacarena sabbalokaṃ abhibhavitvā accuggamma lokuttaradhamme ṭhātabbaṃ. Idaṃ, mahārāja, padumassa dutiyaṃ aṅgaṃ gahetabbaṃ.
‘‘புன சபரங், மஹாராஜ, பது³மங் அப்பமத்தகேனபி அனிலேன ஏரிதங் சலதி. ஏவமேவ கோ², மஹாராஜ, யோகி³னா யோகா³வசரேன அப்பமத்தகேஸுபி கிலேஸேஸு ஸங்யமோ கரணீயோ, ப⁴யத³ஸ்ஸாவினா விஹரிதப்³ப³ங். இத³ங், மஹாராஜ, பது³மஸ்ஸ ததியங் அங்க³ங் க³ஹேதப்³ப³ங். பா⁴ஸிதம்பேதங், மஹாராஜ, ப⁴க³வதா தே³வாதிதே³வேன ‘அணுமத்தேஸு வஜ்ஜேஸு ப⁴யத³ஸ்ஸாவீ ஸமாதா³ய ஸிக்க²தி ஸிக்கா²பதே³ஸூ’தி.
‘‘Puna caparaṃ, mahārāja, padumaṃ appamattakenapi anilena eritaṃ calati. Evameva kho, mahārāja, yoginā yogāvacarena appamattakesupi kilesesu saṃyamo karaṇīyo, bhayadassāvinā viharitabbaṃ. Idaṃ, mahārāja, padumassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena ‘aṇumattesu vajjesu bhayadassāvī samādāya sikkhati sikkhāpadesū’ti.
பது³மங்க³பஞ்ஹோ து³தியோ.
Padumaṅgapañho dutiyo.
