| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၂. ပဒုမင္ဂပဉ္ဟော
2. Padumaṅgapañho
၂. ‘‘ဘန္တေ နာဂသေန, ‘ပဒုမသ္သ တီဏိ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ တီဏိ အင္ဂာနိ ဂဟေတဗ္ဗာနီ’’တိ ? ‘‘ယထာ, မဟာရာဇ, ပဒုမံ ဥဒကေ ဇာတံ ဥဒကေ သံဝဒ္ဓံ အနုပလိတ္တံ ဥဒကေန, ဧဝမေဝ ခော, မဟာရာဇ, ယောဂိနာ ယောဂာဝစရေန ကုလေ ဂဏေ လာဘေ ယသေ သက္ကာရေ သမ္မာနနာယ ပရိဘောဂပစ္စယေသု စ သဗ္ဗတ္ထ အနုပလိတ္တေန ဘဝိတဗ္ဗံ။ ဣဒံ, မဟာရာဇ, ပဒုမသ္သ ပဌမံ အင္ဂံ ဂဟေတဗ္ဗံ။
2. ‘‘Bhante nāgasena, ‘padumassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti ? ‘‘Yathā, mahārāja, padumaṃ udake jātaṃ udake saṃvaddhaṃ anupalittaṃ udakena, evameva kho, mahārāja, yoginā yogāvacarena kule gaṇe lābhe yase sakkāre sammānanāya paribhogapaccayesu ca sabbattha anupalittena bhavitabbaṃ. Idaṃ, mahārāja, padumassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, ပဒုမံ ဥဒကာ အစ္စုဂ္ဂမ္မ ဌာတိ။ ဧဝမေဝ ခော, မဟာရာဇ, ယောဂိနာ ယောဂာဝစရေန သဗ္ဗလောကံ အဘိဘဝိတ္ဝာ အစ္စုဂ္ဂမ္မ လောကုတ္တရဓမ္မေ ဌာတဗ္ဗံ။ ဣဒံ, မဟာရာဇ, ပဒုမသ္သ ဒုတိယံ အင္ဂံ ဂဟေတဗ္ဗံ။
‘‘Puna caparaṃ, mahārāja, padumaṃ udakā accuggamma ṭhāti. Evameva kho, mahārāja, yoginā yogāvacarena sabbalokaṃ abhibhavitvā accuggamma lokuttaradhamme ṭhātabbaṃ. Idaṃ, mahārāja, padumassa dutiyaṃ aṅgaṃ gahetabbaṃ.
‘‘ပုန စပရံ, မဟာရာဇ, ပဒုမံ အပ္ပမတ္တကေနပိ အနိလေန ဧရိတံ စလတိ။ ဧဝမေဝ ခော, မဟာရာဇ, ယောဂိနာ ယောဂာဝစရေန အပ္ပမတ္တကေသုပိ ကိလေသေသု သံယမော ကရဏီယော, ဘယဒသ္သာဝိနာ ဝိဟရိတဗ္ဗံ။ ဣဒံ, မဟာရာဇ, ပဒုမသ္သ တတိယံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝာတိဒေဝေန ‘အဏုမတ္တေသု ဝဇ္ဇေသု ဘယဒသ္သာဝီ သမာဒာယ သိက္ခတိ သိက္ခာပဒေသူ’တိ။
‘‘Puna caparaṃ, mahārāja, padumaṃ appamattakenapi anilena eritaṃ calati. Evameva kho, mahārāja, yoginā yogāvacarena appamattakesupi kilesesu saṃyamo karaṇīyo, bhayadassāvinā viharitabbaṃ. Idaṃ, mahārāja, padumassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena ‘aṇumattesu vajjesu bhayadassāvī samādāya sikkhati sikkhāpadesū’ti.
ပဒုမင္ဂပဉ္ဟော ဒုတိယော။
Padumaṅgapañho dutiyo.
