| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༢. པདུམངྒཔཉྷོ
2. Padumaṅgapañho
༢. ‘‘བྷནྟེ ནཱགསེན, ‘པདུམསྶ ཏཱིཎི ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི ཏཱིཎི ཨངྒཱནི གཧེཏབྦཱནཱི’’ཏི ? ‘‘ཡཐཱ, མཧཱརཱཛ, པདུམཾ ཨུདཀེ ཛཱཏཾ ཨུདཀེ སཾཝདྡྷཾ ཨནུཔལིཏྟཾ ཨུདཀེན, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཀུལེ གཎེ ལཱབྷེ ཡསེ སཀྐཱརེ སམྨཱནནཱཡ པརིབྷོགཔཙྩཡེསུ ཙ སབྦཏྠ ཨནུཔལིཏྟེན བྷཝིཏབྦཾ། ཨིདཾ, མཧཱརཱཛ, པདུམསྶ པཋམཾ ཨངྒཾ གཧེཏབྦཾ།
2. ‘‘Bhante nāgasena, ‘padumassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti ? ‘‘Yathā, mahārāja, padumaṃ udake jātaṃ udake saṃvaddhaṃ anupalittaṃ udakena, evameva kho, mahārāja, yoginā yogāvacarena kule gaṇe lābhe yase sakkāre sammānanāya paribhogapaccayesu ca sabbattha anupalittena bhavitabbaṃ. Idaṃ, mahārāja, padumassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, པདུམཾ ཨུདཀཱ ཨཙྩུགྒམྨ ཋཱཏི། ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སབྦལོཀཾ ཨབྷིབྷཝིཏྭཱ ཨཙྩུགྒམྨ ལོཀུཏྟརདྷམྨེ ཋཱཏབྦཾ། ཨིདཾ, མཧཱརཱཛ, པདུམསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, padumaṃ udakā accuggamma ṭhāti. Evameva kho, mahārāja, yoginā yogāvacarena sabbalokaṃ abhibhavitvā accuggamma lokuttaradhamme ṭhātabbaṃ. Idaṃ, mahārāja, padumassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, པདུམཾ ཨཔྤམཏྟཀེནཔི ཨནིལེན ཨེརིཏཾ ཙལཏི། ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨཔྤམཏྟཀེསུཔི ཀིལེསེསུ སཾཡམོ ཀརཎཱིཡོ, བྷཡདསྶཱཝིནཱ ཝིཧརིཏབྦཾ། ཨིདཾ, མཧཱརཱཛ, པདུམསྶ ཏཏིཡཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, བྷགཝཏཱ དེཝཱཏིདེཝེན ‘ཨཎུམཏྟེསུ ཝཛྫེསུ བྷཡདསྶཱཝཱི སམཱདཱཡ སིཀྑཏི སིཀྑཱཔདེསཱུ’ཏི།
‘‘Puna caparaṃ, mahārāja, padumaṃ appamattakenapi anilena eritaṃ calati. Evameva kho, mahārāja, yoginā yogāvacarena appamattakesupi kilesesu saṃyamo karaṇīyo, bhayadassāvinā viharitabbaṃ. Idaṃ, mahārāja, padumassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena ‘aṇumattesu vajjesu bhayadassāvī samādāya sikkhati sikkhāpadesū’ti.
པདུམངྒཔཉྷོ དུཏིཡོ།
Padumaṅgapañho dutiyo.
