| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੨. ਪਦੁਮਙ੍ਗਪਞ੍ਹੋ
2. Padumaṅgapañho
੨. ‘‘ਭਨ੍ਤੇ ਨਾਗਸੇਨ, ‘ਪਦੁਮਸ੍ਸ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ વਦੇਸਿ, ਕਤਮਾਨਿ ਤਾਨਿ ਤੀਣਿ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ ? ‘‘ਯਥਾ, ਮਹਾਰਾਜ, ਪਦੁਮਂ ਉਦਕੇ ਜਾਤਂ ਉਦਕੇ ਸਂવਦ੍ਧਂ ਅਨੁਪਲਿਤ੍ਤਂ ਉਦਕੇਨ, ਏવਮੇવ ਖੋ, ਮਹਾਰਾਜ, ਯੋਗਿਨਾ ਯੋਗਾવਚਰੇਨ ਕੁਲੇ ਗਣੇ ਲਾਭੇ ਯਸੇ ਸਕ੍ਕਾਰੇ ਸਮ੍ਮਾਨਨਾਯ ਪਰਿਭੋਗਪਚ੍ਚਯੇਸੁ ਚ ਸਬ੍ਬਤ੍ਥ ਅਨੁਪਲਿਤ੍ਤੇਨ ਭવਿਤਬ੍ਬਂ। ਇਦਂ, ਮਹਾਰਾਜ, ਪਦੁਮਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ।
2. ‘‘Bhante nāgasena, ‘padumassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti ? ‘‘Yathā, mahārāja, padumaṃ udake jātaṃ udake saṃvaddhaṃ anupalittaṃ udakena, evameva kho, mahārāja, yoginā yogāvacarena kule gaṇe lābhe yase sakkāre sammānanāya paribhogapaccayesu ca sabbattha anupalittena bhavitabbaṃ. Idaṃ, mahārāja, padumassa paṭhamaṃ aṅgaṃ gahetabbaṃ.
‘‘ਪੁਨ ਚਪਰਂ, ਮਹਾਰਾਜ, ਪਦੁਮਂ ਉਦਕਾ ਅਚ੍ਚੁਗ੍ਗਮ੍ਮ ਠਾਤਿ। ਏવਮੇવ ਖੋ, ਮਹਾਰਾਜ, ਯੋਗਿਨਾ ਯੋਗਾવਚਰੇਨ ਸਬ੍ਬਲੋਕਂ ਅਭਿਭવਿਤ੍વਾ ਅਚ੍ਚੁਗ੍ਗਮ੍ਮ ਲੋਕੁਤ੍ਤਰਧਮ੍ਮੇ ਠਾਤਬ੍ਬਂ। ਇਦਂ, ਮਹਾਰਾਜ, ਪਦੁਮਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ।
‘‘Puna caparaṃ, mahārāja, padumaṃ udakā accuggamma ṭhāti. Evameva kho, mahārāja, yoginā yogāvacarena sabbalokaṃ abhibhavitvā accuggamma lokuttaradhamme ṭhātabbaṃ. Idaṃ, mahārāja, padumassa dutiyaṃ aṅgaṃ gahetabbaṃ.
‘‘ਪੁਨ ਚਪਰਂ, ਮਹਾਰਾਜ, ਪਦੁਮਂ ਅਪ੍ਪਮਤ੍ਤਕੇਨਪਿ ਅਨਿਲੇਨ ਏਰਿਤਂ ਚਲਤਿ। ਏવਮੇવ ਖੋ, ਮਹਾਰਾਜ, ਯੋਗਿਨਾ ਯੋਗਾવਚਰੇਨ ਅਪ੍ਪਮਤ੍ਤਕੇਸੁਪਿ ਕਿਲੇਸੇਸੁ ਸਂਯਮੋ ਕਰਣੀਯੋ, ਭਯਦਸ੍ਸਾવਿਨਾ વਿਹਰਿਤਬ੍ਬਂ। ਇਦਂ, ਮਹਾਰਾਜ, ਪਦੁਮਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ। ਭਾਸਿਤਮ੍ਪੇਤਂ, ਮਹਾਰਾਜ, ਭਗવਤਾ ਦੇવਾਤਿਦੇવੇਨ ‘ਅਣੁਮਤ੍ਤੇਸੁ વਜ੍ਜੇਸੁ ਭਯਦਸ੍ਸਾવੀ ਸਮਾਦਾਯ ਸਿਕ੍ਖਤਿ ਸਿਕ੍ਖਾਪਦੇਸੂ’ਤਿ।
‘‘Puna caparaṃ, mahārāja, padumaṃ appamattakenapi anilena eritaṃ calati. Evameva kho, mahārāja, yoginā yogāvacarena appamattakesupi kilesesu saṃyamo karaṇīyo, bhayadassāvinā viharitabbaṃ. Idaṃ, mahārāja, padumassa tatiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena ‘aṇumattesu vajjesu bhayadassāvī samādāya sikkhati sikkhāpadesū’ti.
ਪਦੁਮਙ੍ਗਪਞ੍ਹੋ ਦੁਤਿਯੋ।
Padumaṅgapañho dutiyo.
