| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. பது³மபுப்பி²யத்தே²ரஅபதா³னவண்ணனா
10. Padumapupphiyattheraapadānavaṇṇanā
பொக்க²ரவனங் பவிட்டோ²திஆதி³கங் ஆயஸ்மதோ பது³மபுப்பி²யத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பு²ஸ்ஸஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ வுத்³தி⁴மன்வாய பது³மஸம்பன்னங் ஏகங் பொக்க²ரணிங் பவிஸித்வா பி⁴ஸமுளாலே கா²த³ந்தோ பொக்க²ரணியா அவிதூ³ரே க³ச்ச²மானங் பு²ஸ்ஸங் ப⁴க³வந்தங் தி³ஸ்வா பஸன்னமானஸோ ததோ பது³மானி ஓசினித்வா ஆகாஸே உக்கி²பித்வா ப⁴க³வந்தங் பூஜேஸி, தானி புப்பா²னி ஆகாஸே விதானங் ஹுத்வா அட்ட²ங்ஸு. ஸோ பி⁴ய்யோஸோமத்தாய பஸன்னமானஸோ பப்³ப³ஜித்வா வத்தபடிபத்திஸாரோ ஸமணத⁴ம்மங் பூரெத்வா ததோ சுதோ துஸிதப⁴வனமலங் குருமானோ விய தத்த² உப்பஜ்ஜித்வா கமேன ச² காமாவசரஸம்பத்தியோ ச மனுஸ்ஸஸம்பத்தியோ ச அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ வுத்³தி⁴ப்பத்தோ ஸத்³தா⁴ஜாதோ பப்³ப³ஜித்வா நசிரஸ்ஸேவ அரஹா அஹோஸி.
Pokkharavanaṃpaviṭṭhotiādikaṃ āyasmato padumapupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto phussassa bhagavato kāle ekasmiṃ kulagehe nibbatto vuddhimanvāya padumasampannaṃ ekaṃ pokkharaṇiṃ pavisitvā bhisamuḷāle khādanto pokkharaṇiyā avidūre gacchamānaṃ phussaṃ bhagavantaṃ disvā pasannamānaso tato padumāni ocinitvā ākāse ukkhipitvā bhagavantaṃ pūjesi, tāni pupphāni ākāse vitānaṃ hutvā aṭṭhaṃsu. So bhiyyosomattāya pasannamānaso pabbajitvā vattapaṭipattisāro samaṇadhammaṃ pūretvā tato cuto tusitabhavanamalaṃ kurumāno viya tattha uppajjitvā kamena cha kāmāvacarasampattiyo ca manussasampattiyo ca anubhavitvā imasmiṃ buddhuppāde kulagehe nibbatto vuddhippatto saddhājāto pabbajitvā nacirasseva arahā ahosi.
51. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பொக்க²ரவனங் பவிட்டோ²திஆதி³மாஹ. தத்த² பகாரேன நளத³ண்ட³பத்தாதீ³ஹி க²ரந்தீதி பொக்க²ரா, பொக்க²ரானங் ஸமுட்டி²தட்டே²ன ஸமூஹந்தி பொக்க²ரவனங், பது³மக³ச்ச²ஸண்டே³ஹி மண்டி³தங் மஜ்ஜ²ங் பவிட்டோ² அஹந்தி அத்தோ². ஸேஸங் ஸப்³ப³த்த² உத்தானமேவாதி.
51. So aparabhāge attano pubbakammaṃ saritvā somanassajāto pubbacaritāpadānaṃ pakāsento pokkharavanaṃ paviṭṭhotiādimāha. Tattha pakārena naḷadaṇḍapattādīhi kharantīti pokkharā, pokkharānaṃ samuṭṭhitaṭṭhena samūhanti pokkharavanaṃ, padumagacchasaṇḍehi maṇḍitaṃ majjhaṃ paviṭṭho ahanti attho. Sesaṃ sabbattha uttānamevāti.
பது³மபுப்பி²யத்தே²ரஅபதா³னவண்ணனா ஸமத்தா.
Padumapupphiyattheraapadānavaṇṇanā samattā.
நவமவக்³க³வண்ணனா ஸமத்தா.
Navamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. பது³மபுப்பி²யத்தே²ரஅபதா³னங் • 10. Padumapupphiyattheraapadānaṃ
