| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১০. পদুমপুপ্ফিযত্থেরঅপদানৰণ্ণনা
10. Padumapupphiyattheraapadānavaṇṇanā
পোক্খরৰনং পৰিট্ঠোতিআদিকং আযস্মতো পদুমপুপ্ফিযত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ফুস্সস্স ভগৰতো কালে একস্মিং কুলগেহে নিব্বত্তো ৰুদ্ধিমন্ৰায পদুমসম্পন্নং একং পোক্খরণিং পৰিসিত্ৰা ভিসমুল়ালে খাদন্তো পোক্খরণিযা অৰিদূরে গচ্ছমানং ফুস্সং ভগৰন্তং দিস্ৰা পসন্নমানসো ততো পদুমানি ওচিনিত্ৰা আকাসে উক্খিপিত্ৰা ভগৰন্তং পূজেসি, তানি পুপ্ফানি আকাসে ৰিতানং হুত্ৰা অট্ঠংসু। সো ভিয্যোসোমত্তায পসন্নমানসো পব্বজিত্ৰা ৰত্তপটিপত্তিসারো সমণধম্মং পূরেত্ৰা ততো চুতো তুসিতভৰনমলং কুরুমানো ৰিয তত্থ উপ্পজ্জিত্ৰা কমেন ছ কামাৰচরসম্পত্তিযো চ মনুস্সসম্পত্তিযো চ অনুভৰিত্ৰা ইমস্মিং বুদ্ধুপ্পাদে কুলগেহে নিব্বত্তো ৰুদ্ধিপ্পত্তো সদ্ধাজাতো পব্বজিত্ৰা নচিরস্সেৰ অরহা অহোসি।
Pokkharavanaṃpaviṭṭhotiādikaṃ āyasmato padumapupphiyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto phussassa bhagavato kāle ekasmiṃ kulagehe nibbatto vuddhimanvāya padumasampannaṃ ekaṃ pokkharaṇiṃ pavisitvā bhisamuḷāle khādanto pokkharaṇiyā avidūre gacchamānaṃ phussaṃ bhagavantaṃ disvā pasannamānaso tato padumāni ocinitvā ākāse ukkhipitvā bhagavantaṃ pūjesi, tāni pupphāni ākāse vitānaṃ hutvā aṭṭhaṃsu. So bhiyyosomattāya pasannamānaso pabbajitvā vattapaṭipattisāro samaṇadhammaṃ pūretvā tato cuto tusitabhavanamalaṃ kurumāno viya tattha uppajjitvā kamena cha kāmāvacarasampattiyo ca manussasampattiyo ca anubhavitvā imasmiṃ buddhuppāde kulagehe nibbatto vuddhippatto saddhājāto pabbajitvā nacirasseva arahā ahosi.
৫১. সো অপরভাগে অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো পোক্খরৰনং পৰিট্ঠোতিআদিমাহ। তত্থ পকারেন নল়দণ্ডপত্তাদীহি খরন্তীতি পোক্খরা, পোক্খরানং সমুট্ঠিতট্ঠেন সমূহন্তি পোক্খরৰনং, পদুমগচ্ছসণ্ডেহি মণ্ডিতং মজ্ঝং পৰিট্ঠো অহন্তি অত্থো। সেসং সব্বত্থ উত্তানমেৰাতি।
51. So aparabhāge attano pubbakammaṃ saritvā somanassajāto pubbacaritāpadānaṃ pakāsento pokkharavanaṃ paviṭṭhotiādimāha. Tattha pakārena naḷadaṇḍapattādīhi kharantīti pokkharā, pokkharānaṃ samuṭṭhitaṭṭhena samūhanti pokkharavanaṃ, padumagacchasaṇḍehi maṇḍitaṃ majjhaṃ paviṭṭho ahanti attho. Sesaṃ sabbattha uttānamevāti.
পদুমপুপ্ফিযত্থেরঅপদানৰণ্ণনা সমত্তা।
Padumapupphiyattheraapadānavaṇṇanā samattā.
নৰমৰগ্গৰণ্ণনা সমত্তা।
Navamavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ১০. পদুমপুপ্ফিযত্থেরঅপদানং • 10. Padumapupphiyattheraapadānaṃ
