| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೯. ಪದುಮತ್ಥೇರಅಪದಾನವಣ್ಣನಾ
9. Padumattheraapadānavaṇṇanā
ಚತುಸಚ್ಚಂ ಪಕಾಸೇನ್ತೋತಿಆದಿಕಂ ಆಯಸ್ಮತೋ ಪದುಮತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಕುಸಲಸಮ್ಭಾರೋ ಪದುಮುತ್ತರಮುನಿನಾ ಧಮ್ಮಪಜ್ಜೋತೇ ಜೋತಮಾನೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ಘರಾವಾಸಂ ಸಣ್ಠಪೇತ್ವಾ ಭೋಗಸಮ್ಪನ್ನೋತಿ ಪಾಕಟೋ। ಸೋ ಸತ್ಥರಿ ಪಸೀದಿತ್ವಾ ಮಹಾಜನೇನ ಸದ್ಧಿಂ ಧಮ್ಮಂ ಸುಣನ್ತೋ ಧಜೇನ ಸಹ ಪದುಮಕಲಾಪಂ ಗಹೇತ್ವಾ ಅಟ್ಠಾಸಿ, ಸಧಜಂ ತಂ ಪದುಮಕಲಾಪಂ ಆಕಾಸಮುಕ್ಖಿಪಿಂ, ತಂ ಅಚ್ಛರಿಯಂ ದಿಸ್ವಾ ಅತಿವಿಯ ಸೋಮನಸ್ಸಜಾತೋ ಅಹೋಸಿ। ಸೋ ಯಾವಜೀವಂ ಕುಸಲಂ ಕತ್ವಾ ಜೀವಿತಪರಿಯೋಸಾನೇ ಸಗ್ಗೇ ನಿಬ್ಬತ್ತೋ ಧಜಮಿವ ಛಕಾಮಾವಚರೇ ಪಾಕಟೋ ಪೂಜಿತೋ ಚ ದಿಬ್ಬಸಮ್ಪತ್ತಿಮನುಭವಿತ್ವಾ ಮನುಸ್ಸೇಸು ಚ ಚಕ್ಕವತ್ತಿಸಮ್ಪತ್ತಿಮನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ವಿಭವಸಮ್ಪನ್ನೇ ಸದ್ಧಾಸಮ್ಪನ್ನೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಸದ್ಧಾಜಾತೋ ಪಞ್ಚವಸ್ಸಿಕೋವ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಹುತ್ವಾ ಕತಪುಞ್ಞನಾಮೇನ ಪದುಮತ್ಥೇರೋತಿ ಪಾಕಟೋ।
Catusaccaṃ pakāsentotiādikaṃ āyasmato padumattherassa apadānaṃ. Ayampi purimabuddhesu katakusalasambhāro padumuttaramuninā dhammapajjote jotamāne ekasmiṃ kulagehe nibbatto gharāvāsaṃ saṇṭhapetvā bhogasampannoti pākaṭo. So satthari pasīditvā mahājanena saddhiṃ dhammaṃ suṇanto dhajena saha padumakalāpaṃ gahetvā aṭṭhāsi, sadhajaṃ taṃ padumakalāpaṃ ākāsamukkhipiṃ, taṃ acchariyaṃ disvā ativiya somanassajāto ahosi. So yāvajīvaṃ kusalaṃ katvā jīvitapariyosāne sagge nibbatto dhajamiva chakāmāvacare pākaṭo pūjito ca dibbasampattimanubhavitvā manussesu ca cakkavattisampattimanubhavitvā imasmiṃ buddhuppāde vibhavasampanne saddhāsampanne ekasmiṃ kulagehe nibbatto vuddhimanvāya saddhājāto pañcavassikova pabbajitvā nacirasseva arahā hutvā katapuññanāmena padumattheroti pākaṭo.
೬೭. ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಚತುಸಚ್ಚಂ ಪಕಾಸೇನ್ತೋತಿಆದಿಮಾಹ। ತತ್ಥ ಸಚ್ಚನ್ತಿ ತಥಂ ಅವಿತಥಂ ಅವಿಪರೀತಂ ಸಚ್ಚಂ, ದುಕ್ಖಸಮುದಯನಿರೋಧಮಗ್ಗವಸೇನ ಚತ್ತಾರಿ ಸಚ್ಚಾನಿ ಸಮಾಹಟಾನೀತಿ ಚತುಸಚ್ಚಂ, ತಂ ಚತುಸಚ್ಚಂ ಪಕಾಸೇನ್ತೋ ಲೋಕೇ ಪಾಕಟಂ ಕರೋನ್ತೋತಿ ಅತ್ಥೋ। ವರಧಮ್ಮಪ್ಪವತ್ತಕೋತಿ ಉತ್ತಮಧಮ್ಮಪ್ಪವತ್ತಕೋ ಪಕಾಸಕೋತಿ ಅತ್ಥೋ। ಅಮತಂ ವುಟ್ಠಿನ್ತಿ ಅಮತಮಹಾನಿಬ್ಬಾನವುಟ್ಠಿಧಾರಂ ಪವಸ್ಸನ್ತೋ ಪಗ್ಘರನ್ತೋ ಸದೇವಕಂ ಲೋಕಂ ತೇಮೇನ್ತೋ ಸಬ್ಬಕಿಲೇಸಪರಿಳಾಹಂ ನಿಬ್ಬಾಪೇನ್ತೋ ಧಮ್ಮವಸ್ಸಂ ವಸ್ಸತೀತಿ ಅತ್ಥೋ।
67. Attano pubbakammaṃ saritvā somanassajāto pubbacaritāpadānaṃ pakāsento catusaccaṃ pakāsentotiādimāha. Tattha saccanti tathaṃ avitathaṃ aviparītaṃ saccaṃ, dukkhasamudayanirodhamaggavasena cattāri saccāni samāhaṭānīti catusaccaṃ, taṃ catusaccaṃ pakāsento loke pākaṭaṃ karontoti attho. Varadhammappavattakoti uttamadhammappavattako pakāsakoti attho. Amataṃ vuṭṭhinti amatamahānibbānavuṭṭhidhāraṃ pavassanto paggharanto sadevakaṃ lokaṃ temento sabbakilesapariḷāhaṃ nibbāpento dhammavassaṃ vassatīti attho.
೬೮. ಸಧಜಂ ಪದುಮಂ ಗಯ್ಹಾತಿ ಧಜೇನ ಸಹ ಏಕತೋ ಕತ್ವಾ ಪದುಮಂ ಪದುಮಕಲಾಪಂ ಗಹೇತ್ವಾತಿ ಅತ್ಥೋ। ಅಡ್ಢಕೋಸೇ ಠಿತೋ ಅಹನ್ತಿ ಉಭೋ ಉಕ್ಖಿಪಿತ್ವಾ ಠಿತೋ ಅಹನ್ತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ।
68.Sadhajaṃ padumaṃ gayhāti dhajena saha ekato katvā padumaṃ padumakalāpaṃ gahetvāti attho. Aḍḍhakose ṭhito ahanti ubho ukkhipitvā ṭhito ahanti attho. Sesaṃ sabbattha uttānatthamevāti.
ಪದುಮತ್ಥೇರಅಪದಾನವಣ್ಣನಾ ಸಮತ್ತಾ।
Padumattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೯. ಪದುಮತ್ಥೇರಅಪದಾನಂ • 9. Padumattheraapadānaṃ
