| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
9. පදුමත්‌ථෙරඅපදානවණ්‌ණනා
9. Padumattheraapadānavaṇṇanā
චතුසච්‌චං පකාසෙන්‌තොතිආදිකං ආයස්‌මතො පදුමත්‌ථෙරස්‌ස අපදානං. අයම්‌පි පුරිමබුද්‌ධෙසු කතකුසලසම්‌භාරො පදුමුත්‌තරමුනිනා ධම්‌මපජ්‌ජොතෙ ජොතමානෙ එකස්‌මිං කුලගෙහෙ නිබ්‌බත්‌තො ඝරාවාසං සණ්‌ඨපෙත්‌වා භොගසම්‌පන්‌නොති පාකටො. සො සත්‌ථරි පසීදිත්‌වා මහාජනෙන සද්‌ධිං ධම්‌මං සුණන්‌තො ධජෙන සහ පදුමකලාපං ගහෙත්‌වා අට්‌ඨාසි, සධජං තං පදුමකලාපං ආකාසමුක්‌ඛිපිං, තං අච්‌ඡරියං දිස්‌වා අතිවිය සොමනස්‌සජාතො අහොසි. සො යාවජීවං කුසලං කත්‌වා ජීවිතපරියොසානෙ සග්‌ගෙ නිබ්‌බත්‌තො ධජමිව ඡකාමාවචරෙ පාකටො පූජිතො ච දිබ්‌බසම්‌පත්‌තිමනුභවිත්‌වා මනුස්‌සෙසු ච චක්‌කවත්‌තිසම්‌පත්‌තිමනුභවිත්‌වා ඉමස්‌මිං බුද්‌ධුප්‌පාදෙ විභවසම්‌පන්‌නෙ සද්‌ධාසම්‌පන්‌නෙ එකස්‌මිං කුලගෙහෙ නිබ්‌බත්‌තො වුද්‌ධිමන්‌වාය සද්‌ධාජාතො පඤ්‌චවස්‌සිකොව පබ්‌බජිත්‌වා නචිරස්‌සෙව අරහා හුත්‌වා කතපුඤ්‌ඤනාමෙන පදුමත්‌ථෙරොති පාකටො.
Catusaccaṃ pakāsentotiādikaṃ āyasmato padumattherassa apadānaṃ. Ayampi purimabuddhesu katakusalasambhāro padumuttaramuninā dhammapajjote jotamāne ekasmiṃ kulagehe nibbatto gharāvāsaṃ saṇṭhapetvā bhogasampannoti pākaṭo. So satthari pasīditvā mahājanena saddhiṃ dhammaṃ suṇanto dhajena saha padumakalāpaṃ gahetvā aṭṭhāsi, sadhajaṃ taṃ padumakalāpaṃ ākāsamukkhipiṃ, taṃ acchariyaṃ disvā ativiya somanassajāto ahosi. So yāvajīvaṃ kusalaṃ katvā jīvitapariyosāne sagge nibbatto dhajamiva chakāmāvacare pākaṭo pūjito ca dibbasampattimanubhavitvā manussesu ca cakkavattisampattimanubhavitvā imasmiṃ buddhuppāde vibhavasampanne saddhāsampanne ekasmiṃ kulagehe nibbatto vuddhimanvāya saddhājāto pañcavassikova pabbajitvā nacirasseva arahā hutvā katapuññanāmena padumattheroti pākaṭo.
67. අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො චතුසච්‌චං පකාසෙන්‌තොතිආදිමාහ. තත්‌ථ සච්‌චන්‌ති තථං අවිතථං අවිපරීතං සච්‌චං, දුක්‌ඛසමුදයනිරොධමග්‌ගවසෙන චත්‌තාරි සච්‌චානි සමාහටානීති චතුසච්‌චං, තං චතුසච්‌චං පකාසෙන්‌තො ලොකෙ පාකටං කරොන්‌තොති අත්‌ථො. වරධම්‌මප්‌පවත්‌තකොති උත්‌තමධම්‌මප්‌පවත්‌තකො පකාසකොති අත්‌ථො. අමතං වුට්‌ඨින්‌ති අමතමහානිබ්‌බානවුට්‌ඨිධාරං පවස්‌සන්‌තො පග්‌ඝරන්‌තො සදෙවකං ලොකං තෙමෙන්‌තො සබ්‌බකිලෙසපරිළාහං නිබ්‌බාපෙන්‌තො ධම්‌මවස්‌සං වස්‌සතීති අත්‌ථො.
67. Attano pubbakammaṃ saritvā somanassajāto pubbacaritāpadānaṃ pakāsento catusaccaṃ pakāsentotiādimāha. Tattha saccanti tathaṃ avitathaṃ aviparītaṃ saccaṃ, dukkhasamudayanirodhamaggavasena cattāri saccāni samāhaṭānīti catusaccaṃ, taṃ catusaccaṃ pakāsento loke pākaṭaṃ karontoti attho. Varadhammappavattakoti uttamadhammappavattako pakāsakoti attho. Amataṃ vuṭṭhinti amatamahānibbānavuṭṭhidhāraṃ pavassanto paggharanto sadevakaṃ lokaṃ temento sabbakilesapariḷāhaṃ nibbāpento dhammavassaṃ vassatīti attho.
68. සධජං පදුමං ගය්‌හාති ධජෙන සහ එකතො කත්‌වා පදුමං පදුමකලාපං ගහෙත්‌වාති අත්‌ථො. අඩ්‌ඪකොසෙ ඨිතො අහන්‌ති උභො උක්‌ඛිපිත්‌වා ඨිතො අහන්‌ති අත්‌ථො. සෙසං සබ්‌බත්‌ථ උත්‌තානත්‌ථමෙවාති.
68.Sadhajaṃ padumaṃ gayhāti dhajena saha ekato katvā padumaṃ padumakalāpaṃ gahetvāti attho. Aḍḍhakose ṭhito ahanti ubho ukkhipitvā ṭhito ahanti attho. Sesaṃ sabbattha uttānatthamevāti.
පදුමත්‌ථෙරඅපදානවණ්‌ණනා සමත්‌තා.
Padumattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 9. පදුමත්‌ථෙරඅපදානං • 9. Padumattheraapadānaṃ
