| Library / Tipiṭaka / তিপিটক • Tipiṭaka / বুদ্ধৰংসপাল়ি • Buddhavaṃsapāḷi |
১২. পদুমুত্তরবুদ্ধৰংসো
12. Padumuttarabuddhavaṃso
১.
1.
নারদস্স অপরেন, সম্বুদ্ধো দ্ৰিপদুত্তমো।
Nāradassa aparena, sambuddho dvipaduttamo;
পদুমুত্তরো নাম জিনো, অক্খোভো সাগরূপমো॥
Padumuttaro nāma jino, akkhobho sāgarūpamo.
২.
2.
মণ্ডকপ্পোৰ সো আসি, যম্হি বুদ্ধো অজাযথ।
Maṇḍakappova so āsi, yamhi buddho ajāyatha;
উস্সন্নকুসলা জনতা, তম্হি কপ্পে অজাযথ॥
Ussannakusalā janatā, tamhi kappe ajāyatha.
৩.
3.
পদুমুত্তরস্স ভগৰতো, পঠমে ধম্মদেসনে।
Padumuttarassa bhagavato, paṭhame dhammadesane;
কোটিসতসহস্সানং, ধম্মাভিসমযো অহু॥
Koṭisatasahassānaṃ, dhammābhisamayo ahu.
৪.
4.
ততো পরম্পি ৰস্সন্তে, তপ্পযন্তে চ পাণিনে।
Tato parampi vassante, tappayante ca pāṇine;
সত্ততিংসসতসহস্সানং, দুতিযাভিসমযো অহু॥
Sattatiṃsasatasahassānaṃ, dutiyābhisamayo ahu.
৫.
5.
যম্হি কালে মহাৰীরো, আনন্দং উপসঙ্কমি।
Yamhi kāle mahāvīro, ānandaṃ upasaṅkami;
পিতুসন্তিকং উপগন্ত্ৰা, আহনী অমতদুন্দুভিং॥
Pitusantikaṃ upagantvā, āhanī amatadundubhiṃ.
৬.
6.
আহতে অমতভেরিম্হি, ৰস্সন্তে ধম্মৰুট্ঠিযা।
Āhate amatabherimhi, vassante dhammavuṭṭhiyā;
পঞ্ঞাসসতসহস্সানং, ততিযাভিসমযো অহু॥
Paññāsasatasahassānaṃ, tatiyābhisamayo ahu.
৭.
7.
ওৰাদকো ৰিঞ্ঞাপকো, তারকো সব্বপাণিনং।
Ovādako viññāpako, tārako sabbapāṇinaṃ;
দেসনাকুসলো বুদ্ধো, তারেসি জনতং বহুং॥
Desanākusalo buddho, tāresi janataṃ bahuṃ.
৮.
8.
সন্নিপাতা তযো আসুং, পদুমুত্তরস্স সত্থুনো।
Sannipātā tayo āsuṃ, padumuttarassa satthuno;
কোটিসতসহস্সানং, পঠমো আসি সমাগমো॥
Koṭisatasahassānaṃ, paṭhamo āsi samāgamo.
৯.
9.
যদা বুদ্ধো অসমসমো, ৰসি ৰেভারপব্বতে।
Yadā buddho asamasamo, vasi vebhārapabbate;
নৰুতিকোটিসহস্সানং, দুতিযো আসি সমাগমো॥
Navutikoṭisahassānaṃ, dutiyo āsi samāgamo.
১০.
10.
পুন চারিকং পক্কন্তে, গামনিগমরট্ঠতো।
Puna cārikaṃ pakkante, gāmanigamaraṭṭhato;
অসীতিকোটিসহস্সানং, ততিযো আসি সমাগমো॥
Asītikoṭisahassānaṃ, tatiyo āsi samāgamo.
১১.
11.
অহং তেন সমযেন, জটিলো নাম রট্ঠিকো।
Ahaṃ tena samayena, jaṭilo nāma raṭṭhiko;
সম্বুদ্ধপ্পমুখং সঙ্ঘং, সভত্তং দুস্সমদাসহং॥
Sambuddhappamukhaṃ saṅghaṃ, sabhattaṃ dussamadāsahaṃ.
১২.
12.
সোপি মং বুদ্ধো ব্যাকাসি, সঙ্ঘমজ্ঝে নিসীদিয।
Sopi maṃ buddho byākāsi, saṅghamajjhe nisīdiya;
‘‘সতসহস্সিতো কপ্পে, অযং বুদ্ধো ভৰিস্সতি॥
‘‘Satasahassito kappe, ayaṃ buddho bhavissati.
১৩.
13.
‘‘পধানং পদহিত্ৰান…পে॰… হেস্সাম সম্মুখা ইমং’’॥
‘‘Padhānaṃ padahitvāna…pe… hessāma sammukhā imaṃ’’.
১৪.
14.
তস্সাপি ৰচনং সুত্ৰা, উত্তরিং ৰতমধিট্ঠহিং।
Tassāpi vacanaṃ sutvā, uttariṃ vatamadhiṭṭhahiṃ;
অকাসিং উগ্গদল়্হং ধিতিং, দসপারমিপূরিযা॥
Akāsiṃ uggadaḷhaṃ dhitiṃ, dasapāramipūriyā.
১৫.
15.
ব্যাহতা তিত্থিযা সব্বে, ৰিমনা দুম্মনা তদা।
Byāhatā titthiyā sabbe, vimanā dummanā tadā;
ন তেসং কেচি পরিচরন্তি, রট্ঠতো নিচ্ছুভন্তি তে॥
Na tesaṃ keci paricaranti, raṭṭhato nicchubhanti te.
১৬.
16.
সব্বে তত্থ সমাগন্ত্ৰা, উপগচ্ছুং বুদ্ধসন্তিকে।
Sabbe tattha samāgantvā, upagacchuṃ buddhasantike;
তুৰং নাথো মহাৰীর, সরণং হোহি চক্খুম॥
Tuvaṃ nātho mahāvīra, saraṇaṃ hohi cakkhuma.
১৭.
17.
অনুকম্পকো কারুণিকো, হিতেসী সব্বপাণিনং।
Anukampako kāruṇiko, hitesī sabbapāṇinaṃ;
সম্পত্তে তিত্থিযে সব্বে, পঞ্চসীলে পতিট্ঠপি॥
Sampatte titthiye sabbe, pañcasīle patiṭṭhapi.
১৮.
18.
এৰং নিরাকুলং আসি, সুঞ্ঞতং তিত্থিযেহি তং।
Evaṃ nirākulaṃ āsi, suññataṃ titthiyehi taṃ;
ৰিচিত্তং অরহন্তেহি, ৰসীভূতেহি তাদিহি॥
Vicittaṃ arahantehi, vasībhūtehi tādihi.
১৯.
19.
নগরং হংসৰতী নাম, আনন্দো নাম খত্তিযো।
Nagaraṃ haṃsavatī nāma, ānando nāma khattiyo;
সুজাতা নাম জনিকা, পদুমুত্তরস্স সত্থুনো॥
Sujātā nāma janikā, padumuttarassa satthuno.
২০.
20.
দসৰস্সসহস্সানি, অগারং অজ্ঝ সো ৰসি।
Dasavassasahassāni, agāraṃ ajjha so vasi;
২১.
21.
তিচত্তারীসসহস্সানি, নারিযো সমলঙ্কতা।
Ticattārīsasahassāni, nāriyo samalaṅkatā;
ৰসুদত্তা নাম নারী, উত্তমো নাম অত্রজো॥
Vasudattā nāma nārī, uttamo nāma atrajo.
২২.
22.
নিমিত্তে চতুরো দিস্ৰা, পাসাদেনাভিনিক্খমি।
Nimitte caturo disvā, pāsādenābhinikkhami;
সত্তাহং পধানচারং, অচরী পুরিসুত্তমো॥
Sattāhaṃ padhānacāraṃ, acarī purisuttamo.
২৩.
23.
ব্রহ্মুনা যাচিতো সন্তো, পদুমুত্তরো ৰিনাযকো।
Brahmunā yācito santo, padumuttaro vināyako;
ৰত্তি চক্কং মহাৰীরো, মিথিলুয্যানমুত্তমে॥
Vatti cakkaṃ mahāvīro, mithiluyyānamuttame.
২৪.
24.
দেৰলো চ সুজাতো চ, অহেসুং অগ্গসাৰকা।
Devalo ca sujāto ca, ahesuṃ aggasāvakā;
সুমনো নামুপট্ঠাকো, পদুমুত্তরস্স মহেসিনো॥
Sumano nāmupaṭṭhāko, padumuttarassa mahesino.
২৫.
25.
অমিতা চ অসমা চ, অহেসুং অগ্গসাৰিকা।
Amitā ca asamā ca, ahesuṃ aggasāvikā;
বোধি তস্স ভগৰতো, সললোতি পৰুচ্চতি॥
Bodhi tassa bhagavato, salaloti pavuccati.
২৬.
26.
হট্ঠা চেৰ ৰিচিত্তা চ, অহেসুং অগ্গুপট্ঠিকা॥
Haṭṭhā ceva vicittā ca, ahesuṃ aggupaṭṭhikā.
২৭.
27.
অট্ঠপণ্ণাসরতনং, অচ্চুগ্গতো মহামুনি।
Aṭṭhapaṇṇāsaratanaṃ, accuggato mahāmuni;
কঞ্চনগ্ঘিযসঙ্কাসো, দ্ৰত্তিংসৰরলক্খণো॥
Kañcanagghiyasaṅkāso, dvattiṃsavaralakkhaṇo.
২৮.
28.
কুট্টা কৰাটা ভিত্তী চ, রুক্খা নগসিলুচ্চযা।
Kuṭṭā kavāṭā bhittī ca, rukkhā nagasiluccayā;
ন তস্সাৰরণং অত্থি, সমন্তা দ্ৰাদসযোজনে॥
Na tassāvaraṇaṃ atthi, samantā dvādasayojane.
২৯.
29.
ৰস্সসতসহস্সানি, আযু ৰিজ্জতি তাৰদে।
Vassasatasahassāni, āyu vijjati tāvade;
তাৰতা তিট্ঠমানো সো, তারেসি জনতং বহুং॥
Tāvatā tiṭṭhamāno so, tāresi janataṃ bahuṃ.
৩০.
30.
সন্তারেত্ৰা বহুজনং, ছিন্দিত্ৰা সব্বসংসযং।
Santāretvā bahujanaṃ, chinditvā sabbasaṃsayaṃ;
জলিত্ৰা অগ্গিক্খন্ধোৰ নিব্বুতো সো সসাৰকো॥
Jalitvā aggikkhandhova nibbuto so sasāvako.
৩১.
31.
পদুমুত্তরো জিনো বুদ্ধো, নন্দারামম্হি নিব্বুতো।
Padumuttaro jino buddho, nandārāmamhi nibbuto;
তত্থেৰস্স থূপৰরো, দ্ৰাদসুব্বেধযোজনোতি॥
Tatthevassa thūpavaro, dvādasubbedhayojanoti.
পদুমুত্তরস্স ভগৰতো ৰংসো দসমো।
Padumuttarassa bhagavato vaṃso dasamo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / বুদ্ধৰংস-অট্ঠকথা • Buddhavaṃsa-aṭṭhakathā / ১২. পদুমুত্তরবুদ্ধৰংসৰণ্ণনা • 12. Padumuttarabuddhavaṃsavaṇṇanā
