| Library / Tipiṭaka / ತಿಪಿಟಕ • Tipiṭaka / ಬುದ್ಧವಂಸಪಾಳಿ • Buddhavaṃsapāḷi |
೧೨. ಪದುಮುತ್ತರಬುದ್ಧವಂಸೋ
12. Padumuttarabuddhavaṃso
೧.
1.
ನಾರದಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ।
Nāradassa aparena, sambuddho dvipaduttamo;
ಪದುಮುತ್ತರೋ ನಾಮ ಜಿನೋ, ಅಕ್ಖೋಭೋ ಸಾಗರೂಪಮೋ॥
Padumuttaro nāma jino, akkhobho sāgarūpamo.
೨.
2.
ಮಣ್ಡಕಪ್ಪೋವ ಸೋ ಆಸಿ, ಯಮ್ಹಿ ಬುದ್ಧೋ ಅಜಾಯಥ।
Maṇḍakappova so āsi, yamhi buddho ajāyatha;
ಉಸ್ಸನ್ನಕುಸಲಾ ಜನತಾ, ತಮ್ಹಿ ಕಪ್ಪೇ ಅಜಾಯಥ॥
Ussannakusalā janatā, tamhi kappe ajāyatha.
೩.
3.
ಪದುಮುತ್ತರಸ್ಸ ಭಗವತೋ, ಪಠಮೇ ಧಮ್ಮದೇಸನೇ।
Padumuttarassa bhagavato, paṭhame dhammadesane;
ಕೋಟಿಸತಸಹಸ್ಸಾನಂ, ಧಮ್ಮಾಭಿಸಮಯೋ ಅಹು॥
Koṭisatasahassānaṃ, dhammābhisamayo ahu.
೪.
4.
ತತೋ ಪರಮ್ಪಿ ವಸ್ಸನ್ತೇ, ತಪ್ಪಯನ್ತೇ ಚ ಪಾಣಿನೇ।
Tato parampi vassante, tappayante ca pāṇine;
ಸತ್ತತಿಂಸಸತಸಹಸ್ಸಾನಂ, ದುತಿಯಾಭಿಸಮಯೋ ಅಹು॥
Sattatiṃsasatasahassānaṃ, dutiyābhisamayo ahu.
೫.
5.
ಯಮ್ಹಿ ಕಾಲೇ ಮಹಾವೀರೋ, ಆನನ್ದಂ ಉಪಸಙ್ಕಮಿ।
Yamhi kāle mahāvīro, ānandaṃ upasaṅkami;
ಪಿತುಸನ್ತಿಕಂ ಉಪಗನ್ತ್ವಾ, ಆಹನೀ ಅಮತದುನ್ದುಭಿಂ॥
Pitusantikaṃ upagantvā, āhanī amatadundubhiṃ.
೬.
6.
ಆಹತೇ ಅಮತಭೇರಿಮ್ಹಿ, ವಸ್ಸನ್ತೇ ಧಮ್ಮವುಟ್ಠಿಯಾ।
Āhate amatabherimhi, vassante dhammavuṭṭhiyā;
ಪಞ್ಞಾಸಸತಸಹಸ್ಸಾನಂ, ತತಿಯಾಭಿಸಮಯೋ ಅಹು॥
Paññāsasatasahassānaṃ, tatiyābhisamayo ahu.
೭.
7.
ಓವಾದಕೋ ವಿಞ್ಞಾಪಕೋ, ತಾರಕೋ ಸಬ್ಬಪಾಣಿನಂ।
Ovādako viññāpako, tārako sabbapāṇinaṃ;
ದೇಸನಾಕುಸಲೋ ಬುದ್ಧೋ, ತಾರೇಸಿ ಜನತಂ ಬಹುಂ॥
Desanākusalo buddho, tāresi janataṃ bahuṃ.
೮.
8.
ಸನ್ನಿಪಾತಾ ತಯೋ ಆಸುಂ, ಪದುಮುತ್ತರಸ್ಸ ಸತ್ಥುನೋ।
Sannipātā tayo āsuṃ, padumuttarassa satthuno;
ಕೋಟಿಸತಸಹಸ್ಸಾನಂ, ಪಠಮೋ ಆಸಿ ಸಮಾಗಮೋ॥
Koṭisatasahassānaṃ, paṭhamo āsi samāgamo.
೯.
9.
ಯದಾ ಬುದ್ಧೋ ಅಸಮಸಮೋ, ವಸಿ ವೇಭಾರಪಬ್ಬತೇ।
Yadā buddho asamasamo, vasi vebhārapabbate;
ನವುತಿಕೋಟಿಸಹಸ್ಸಾನಂ, ದುತಿಯೋ ಆಸಿ ಸಮಾಗಮೋ॥
Navutikoṭisahassānaṃ, dutiyo āsi samāgamo.
೧೦.
10.
ಪುನ ಚಾರಿಕಂ ಪಕ್ಕನ್ತೇ, ಗಾಮನಿಗಮರಟ್ಠತೋ।
Puna cārikaṃ pakkante, gāmanigamaraṭṭhato;
ಅಸೀತಿಕೋಟಿಸಹಸ್ಸಾನಂ, ತತಿಯೋ ಆಸಿ ಸಮಾಗಮೋ॥
Asītikoṭisahassānaṃ, tatiyo āsi samāgamo.
೧೧.
11.
ಅಹಂ ತೇನ ಸಮಯೇನ, ಜಟಿಲೋ ನಾಮ ರಟ್ಠಿಕೋ।
Ahaṃ tena samayena, jaṭilo nāma raṭṭhiko;
ಸಮ್ಬುದ್ಧಪ್ಪಮುಖಂ ಸಙ್ಘಂ, ಸಭತ್ತಂ ದುಸ್ಸಮದಾಸಹಂ॥
Sambuddhappamukhaṃ saṅghaṃ, sabhattaṃ dussamadāsahaṃ.
೧೨.
12.
ಸೋಪಿ ಮಂ ಬುದ್ಧೋ ಬ್ಯಾಕಾಸಿ, ಸಙ್ಘಮಜ್ಝೇ ನಿಸೀದಿಯ।
Sopi maṃ buddho byākāsi, saṅghamajjhe nisīdiya;
‘‘ಸತಸಹಸ್ಸಿತೋ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ॥
‘‘Satasahassito kappe, ayaṃ buddho bhavissati.
೧೩.
13.
‘‘ಪಧಾನಂ ಪದಹಿತ್ವಾನ…ಪೇ॰… ಹೇಸ್ಸಾಮ ಸಮ್ಮುಖಾ ಇಮಂ’’॥
‘‘Padhānaṃ padahitvāna…pe… hessāma sammukhā imaṃ’’.
೧೪.
14.
ತಸ್ಸಾಪಿ ವಚನಂ ಸುತ್ವಾ, ಉತ್ತರಿಂ ವತಮಧಿಟ್ಠಹಿಂ।
Tassāpi vacanaṃ sutvā, uttariṃ vatamadhiṭṭhahiṃ;
ಅಕಾಸಿಂ ಉಗ್ಗದಳ್ಹಂ ಧಿತಿಂ, ದಸಪಾರಮಿಪೂರಿಯಾ॥
Akāsiṃ uggadaḷhaṃ dhitiṃ, dasapāramipūriyā.
೧೫.
15.
ಬ್ಯಾಹತಾ ತಿತ್ಥಿಯಾ ಸಬ್ಬೇ, ವಿಮನಾ ದುಮ್ಮನಾ ತದಾ।
Byāhatā titthiyā sabbe, vimanā dummanā tadā;
ನ ತೇಸಂ ಕೇಚಿ ಪರಿಚರನ್ತಿ, ರಟ್ಠತೋ ನಿಚ್ಛುಭನ್ತಿ ತೇ॥
Na tesaṃ keci paricaranti, raṭṭhato nicchubhanti te.
೧೬.
16.
ಸಬ್ಬೇ ತತ್ಥ ಸಮಾಗನ್ತ್ವಾ, ಉಪಗಚ್ಛುಂ ಬುದ್ಧಸನ್ತಿಕೇ।
Sabbe tattha samāgantvā, upagacchuṃ buddhasantike;
ತುವಂ ನಾಥೋ ಮಹಾವೀರ, ಸರಣಂ ಹೋಹಿ ಚಕ್ಖುಮ॥
Tuvaṃ nātho mahāvīra, saraṇaṃ hohi cakkhuma.
೧೭.
17.
ಅನುಕಮ್ಪಕೋ ಕಾರುಣಿಕೋ, ಹಿತೇಸೀ ಸಬ್ಬಪಾಣಿನಂ।
Anukampako kāruṇiko, hitesī sabbapāṇinaṃ;
ಸಮ್ಪತ್ತೇ ತಿತ್ಥಿಯೇ ಸಬ್ಬೇ, ಪಞ್ಚಸೀಲೇ ಪತಿಟ್ಠಪಿ॥
Sampatte titthiye sabbe, pañcasīle patiṭṭhapi.
೧೮.
18.
ಏವಂ ನಿರಾಕುಲಂ ಆಸಿ, ಸುಞ್ಞತಂ ತಿತ್ಥಿಯೇಹಿ ತಂ।
Evaṃ nirākulaṃ āsi, suññataṃ titthiyehi taṃ;
ವಿಚಿತ್ತಂ ಅರಹನ್ತೇಹಿ, ವಸೀಭೂತೇಹಿ ತಾದಿಹಿ॥
Vicittaṃ arahantehi, vasībhūtehi tādihi.
೧೯.
19.
ನಗರಂ ಹಂಸವತೀ ನಾಮ, ಆನನ್ದೋ ನಾಮ ಖತ್ತಿಯೋ।
Nagaraṃ haṃsavatī nāma, ānando nāma khattiyo;
ಸುಜಾತಾ ನಾಮ ಜನಿಕಾ, ಪದುಮುತ್ತರಸ್ಸ ಸತ್ಥುನೋ॥
Sujātā nāma janikā, padumuttarassa satthuno.
೨೦.
20.
ದಸವಸ್ಸಸಹಸ್ಸಾನಿ, ಅಗಾರಂ ಅಜ್ಝ ಸೋ ವಸಿ।
Dasavassasahassāni, agāraṃ ajjha so vasi;
೨೧.
21.
ತಿಚತ್ತಾರೀಸಸಹಸ್ಸಾನಿ, ನಾರಿಯೋ ಸಮಲಙ್ಕತಾ।
Ticattārīsasahassāni, nāriyo samalaṅkatā;
ವಸುದತ್ತಾ ನಾಮ ನಾರೀ, ಉತ್ತಮೋ ನಾಮ ಅತ್ರಜೋ॥
Vasudattā nāma nārī, uttamo nāma atrajo.
೨೨.
22.
ನಿಮಿತ್ತೇ ಚತುರೋ ದಿಸ್ವಾ, ಪಾಸಾದೇನಾಭಿನಿಕ್ಖಮಿ।
Nimitte caturo disvā, pāsādenābhinikkhami;
ಸತ್ತಾಹಂ ಪಧಾನಚಾರಂ, ಅಚರೀ ಪುರಿಸುತ್ತಮೋ॥
Sattāhaṃ padhānacāraṃ, acarī purisuttamo.
೨೩.
23.
ಬ್ರಹ್ಮುನಾ ಯಾಚಿತೋ ಸನ್ತೋ, ಪದುಮುತ್ತರೋ ವಿನಾಯಕೋ।
Brahmunā yācito santo, padumuttaro vināyako;
ವತ್ತಿ ಚಕ್ಕಂ ಮಹಾವೀರೋ, ಮಿಥಿಲುಯ್ಯಾನಮುತ್ತಮೇ॥
Vatti cakkaṃ mahāvīro, mithiluyyānamuttame.
೨೪.
24.
ದೇವಲೋ ಚ ಸುಜಾತೋ ಚ, ಅಹೇಸುಂ ಅಗ್ಗಸಾವಕಾ।
Devalo ca sujāto ca, ahesuṃ aggasāvakā;
ಸುಮನೋ ನಾಮುಪಟ್ಠಾಕೋ, ಪದುಮುತ್ತರಸ್ಸ ಮಹೇಸಿನೋ॥
Sumano nāmupaṭṭhāko, padumuttarassa mahesino.
೨೫.
25.
ಅಮಿತಾ ಚ ಅಸಮಾ ಚ, ಅಹೇಸುಂ ಅಗ್ಗಸಾವಿಕಾ।
Amitā ca asamā ca, ahesuṃ aggasāvikā;
ಬೋಧಿ ತಸ್ಸ ಭಗವತೋ, ಸಲಲೋತಿ ಪವುಚ್ಚತಿ॥
Bodhi tassa bhagavato, salaloti pavuccati.
೨೬.
26.
ಹಟ್ಠಾ ಚೇವ ವಿಚಿತ್ತಾ ಚ, ಅಹೇಸುಂ ಅಗ್ಗುಪಟ್ಠಿಕಾ॥
Haṭṭhā ceva vicittā ca, ahesuṃ aggupaṭṭhikā.
೨೭.
27.
ಅಟ್ಠಪಣ್ಣಾಸರತನಂ, ಅಚ್ಚುಗ್ಗತೋ ಮಹಾಮುನಿ।
Aṭṭhapaṇṇāsaratanaṃ, accuggato mahāmuni;
ಕಞ್ಚನಗ್ಘಿಯಸಙ್ಕಾಸೋ, ದ್ವತ್ತಿಂಸವರಲಕ್ಖಣೋ॥
Kañcanagghiyasaṅkāso, dvattiṃsavaralakkhaṇo.
೨೮.
28.
ಕುಟ್ಟಾ ಕವಾಟಾ ಭಿತ್ತೀ ಚ, ರುಕ್ಖಾ ನಗಸಿಲುಚ್ಚಯಾ।
Kuṭṭā kavāṭā bhittī ca, rukkhā nagasiluccayā;
ನ ತಸ್ಸಾವರಣಂ ಅತ್ಥಿ, ಸಮನ್ತಾ ದ್ವಾದಸಯೋಜನೇ॥
Na tassāvaraṇaṃ atthi, samantā dvādasayojane.
೨೯.
29.
ವಸ್ಸಸತಸಹಸ್ಸಾನಿ, ಆಯು ವಿಜ್ಜತಿ ತಾವದೇ।
Vassasatasahassāni, āyu vijjati tāvade;
ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ॥
Tāvatā tiṭṭhamāno so, tāresi janataṃ bahuṃ.
೩೦.
30.
ಸನ್ತಾರೇತ್ವಾ ಬಹುಜನಂ, ಛಿನ್ದಿತ್ವಾ ಸಬ್ಬಸಂಸಯಂ।
Santāretvā bahujanaṃ, chinditvā sabbasaṃsayaṃ;
ಜಲಿತ್ವಾ ಅಗ್ಗಿಕ್ಖನ್ಧೋವ ನಿಬ್ಬುತೋ ಸೋ ಸಸಾವಕೋ॥
Jalitvā aggikkhandhova nibbuto so sasāvako.
೩೧.
31.
ಪದುಮುತ್ತರೋ ಜಿನೋ ಬುದ್ಧೋ, ನನ್ದಾರಾಮಮ್ಹಿ ನಿಬ್ಬುತೋ।
Padumuttaro jino buddho, nandārāmamhi nibbuto;
ತತ್ಥೇವಸ್ಸ ಥೂಪವರೋ, ದ್ವಾದಸುಬ್ಬೇಧಯೋಜನೋತಿ॥
Tatthevassa thūpavaro, dvādasubbedhayojanoti.
ಪದುಮುತ್ತರಸ್ಸ ಭಗವತೋ ವಂಸೋ ದಸಮೋ।
Padumuttarassa bhagavato vaṃso dasamo.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಬುದ್ಧವಂಸ-ಅಟ್ಠಕಥಾ • Buddhavaṃsa-aṭṭhakathā / ೧೨. ಪದುಮುತ್ತರಬುದ್ಧವಂಸವಣ್ಣನಾ • 12. Padumuttarabuddhavaṃsavaṇṇanā
