| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৬. সোল়সমৰগ্গো
16. Soḷasamavaggo
(১৫৭) ২. পগ্গহকথা
(157) 2. Paggahakathā
৭৪৫. পরো পরস্স চিত্তং পগ্গণ্হাতীতি? আমন্তা। পরো পরস্স চিত্তং ‘‘মা রজ্জি,’’‘‘মা দুস্সি,’’‘‘মা মুয্হি,’’‘‘মা কিলিস্সী’’তি পগ্গণ্হাতীতি? ন হেৰং ৰত্তব্বে…পে॰… পরো পরস্স চিত্তং পগ্গণ্হাতীতি? আমন্তা। পরো পরস্স অলোভং কুসলমূলং জনেতি… অদোসং কুসলমূলং জনেতি… অমোহং কুসলমূলং জনেতি… সদ্ধং জনেতি… ৰীরিযং জনেতি… সতিং জনেতি… সমাধিং জনেতি… পঞ্ঞং জনেতীতি? ন হেৰং ৰত্তব্বে…পে॰… পরো পরস্স চিত্তং পগ্গণ্হাতীতি? আমন্তা। পরো পরস্স উপ্পন্নো ফস্সো ‘‘মা নিরুজ্ঝী’’তি পগ্গণ্হাতীতি? ন হেৰং ৰত্তব্বে…পে॰… পরো পরস্স উপ্পন্না ৰেদনা…পে॰… উপ্পন্না পঞ্ঞা ‘‘মা নিরুজ্ঝী’’তি পগ্গণ্হাতীতি? ন হেৰং ৰত্তব্বে…পে॰…।
745. Paro parassa cittaṃ paggaṇhātīti? Āmantā. Paro parassa cittaṃ ‘‘mā rajji,’’‘‘mā dussi,’’‘‘mā muyhi,’’‘‘mā kilissī’’ti paggaṇhātīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa alobhaṃ kusalamūlaṃ janeti… adosaṃ kusalamūlaṃ janeti… amohaṃ kusalamūlaṃ janeti… saddhaṃ janeti… vīriyaṃ janeti… satiṃ janeti… samādhiṃ janeti… paññaṃ janetīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa uppanno phasso ‘‘mā nirujjhī’’ti paggaṇhātīti? Na hevaṃ vattabbe…pe… paro parassa uppannā vedanā…pe… uppannā paññā ‘‘mā nirujjhī’’ti paggaṇhātīti? Na hevaṃ vattabbe…pe….
পরো পরস্স চিত্তং পগ্গণ্হাতীতি? আমন্তা। পরো পরস্স অত্থায রাগং পজহতি… দোসং পজহতি… মোহং পজহতি…পে॰… অনোত্তপ্পং পজহতীতি? ন হেৰং ৰত্তব্বে…পে॰…।
Paro parassa cittaṃ paggaṇhātīti? Āmantā. Paro parassa atthāya rāgaṃ pajahati… dosaṃ pajahati… mohaṃ pajahati…pe… anottappaṃ pajahatīti? Na hevaṃ vattabbe…pe….
পরো পরস্স চিত্তং পগ্গণ্হাতীতি? আমন্তা। পরো পরস্স অত্থায মগ্গং ভাৰেতি… সতিপট্ঠানং ভাৰেতি…পে॰… বোজ্ঝঙ্গং ভাৰেতীতি? ন হেৰং ৰত্তব্বে…পে॰…।
Paro parassa cittaṃ paggaṇhātīti? Āmantā. Paro parassa atthāya maggaṃ bhāveti… satipaṭṭhānaṃ bhāveti…pe… bojjhaṅgaṃ bhāvetīti? Na hevaṃ vattabbe…pe….
পরো পরস্স চিত্তং পগ্গণ্হাতীতি? আমন্তা। পরো পরস্স অত্থায দুক্খং পরিজানাতি…পে॰… মগ্গং ভাৰেতীতি? ন হেৰং ৰত্তব্বে…পে॰…।
Paro parassa cittaṃ paggaṇhātīti? Āmantā. Paro parassa atthāya dukkhaṃ parijānāti…pe… maggaṃ bhāvetīti? Na hevaṃ vattabbe…pe….
পরো পরস্স চিত্তং পগ্গণ্হাতীতি? আমন্তা। অঞ্ঞো অঞ্ঞস্স কারকো, পরঙ্কতং সুখং দুক্খং অঞ্ঞো করোতি অঞ্ঞো পটিসংৰেদেতীতি? ন হেৰং ৰত্তব্বে…পে॰…।
Paro parassa cittaṃ paggaṇhātīti? Āmantā. Añño aññassa kārako, paraṅkataṃ sukhaṃ dukkhaṃ añño karoti añño paṭisaṃvedetīti? Na hevaṃ vattabbe…pe….
পরো পরস্স চিত্তং পগ্গণ্হাতীতি? আমন্তা। ননু ৰুত্তং ভগৰতা – ‘‘অত্তনাৰ কতং পাপং…পে॰… নাঞ্ঞো অঞ্ঞং ৰিসোধযে’’তি। অত্থেৰ সুত্তন্তোতি? আমন্তা। তেন হি ন ৰত্তব্বং – ‘‘পরো পরস্স চিত্তং পগ্গণ্হাতী’’তি।
Paro parassa cittaṃ paggaṇhātīti? Āmantā. Nanu vuttaṃ bhagavatā – ‘‘attanāva kataṃ pāpaṃ…pe… nāñño aññaṃ visodhaye’’ti. Attheva suttantoti? Āmantā. Tena hi na vattabbaṃ – ‘‘paro parassa cittaṃ paggaṇhātī’’ti.
৭৪৬. ন ৰত্তব্বং – ‘‘পরো পরস্স চিত্তং পগ্গণ্হাতী’’তি? আমন্তা। ননু অত্থি বলপ্পত্তা, অত্থি ৰসীভূতাতি? আমন্তা। হঞ্চি অত্থি বলপ্পত্তা, অত্থি ৰসীভূতা, তেন ৰত রে ৰত্তব্বে – ‘‘পরো পরস্স চিত্তং পগ্গণ্হাতী’’তি।
746. Na vattabbaṃ – ‘‘paro parassa cittaṃ paggaṇhātī’’ti? Āmantā. Nanu atthi balappattā, atthi vasībhūtāti? Āmantā. Hañci atthi balappattā, atthi vasībhūtā, tena vata re vattabbe – ‘‘paro parassa cittaṃ paggaṇhātī’’ti.
পগ্গহকথা নিট্ঠিতা।
Paggahakathā niṭṭhitā.
