| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
१६. सोळसमवग्गो
16. Soḷasamavaggo
(१५७) २. पग्गहकथा
(157) 2. Paggahakathā
७४५. परो परस्स चित्तं पग्गण्हातीति? आमन्ता। परो परस्स चित्तं ‘‘मा रज्जि,’’‘‘मा दुस्सि,’’‘‘मा मुय्हि,’’‘‘मा किलिस्सी’’ति पग्गण्हातीति? न हेवं वत्तब्बे…पे॰… परो परस्स चित्तं पग्गण्हातीति? आमन्ता। परो परस्स अलोभं कुसलमूलं जनेति… अदोसं कुसलमूलं जनेति… अमोहं कुसलमूलं जनेति… सद्धं जनेति… वीरियं जनेति… सतिं जनेति… समाधिं जनेति… पञ्ञं जनेतीति? न हेवं वत्तब्बे…पे॰… परो परस्स चित्तं पग्गण्हातीति? आमन्ता। परो परस्स उप्पन्नो फस्सो ‘‘मा निरुज्झी’’ति पग्गण्हातीति? न हेवं वत्तब्बे…पे॰… परो परस्स उप्पन्ना वेदना…पे॰… उप्पन्ना पञ्ञा ‘‘मा निरुज्झी’’ति पग्गण्हातीति? न हेवं वत्तब्बे…पे॰…।
745. Paro parassa cittaṃ paggaṇhātīti? Āmantā. Paro parassa cittaṃ ‘‘mā rajji,’’‘‘mā dussi,’’‘‘mā muyhi,’’‘‘mā kilissī’’ti paggaṇhātīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa alobhaṃ kusalamūlaṃ janeti… adosaṃ kusalamūlaṃ janeti… amohaṃ kusalamūlaṃ janeti… saddhaṃ janeti… vīriyaṃ janeti… satiṃ janeti… samādhiṃ janeti… paññaṃ janetīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa uppanno phasso ‘‘mā nirujjhī’’ti paggaṇhātīti? Na hevaṃ vattabbe…pe… paro parassa uppannā vedanā…pe… uppannā paññā ‘‘mā nirujjhī’’ti paggaṇhātīti? Na hevaṃ vattabbe…pe….
परो परस्स चित्तं पग्गण्हातीति? आमन्ता। परो परस्स अत्थाय रागं पजहति… दोसं पजहति… मोहं पजहति…पे॰… अनोत्तप्पं पजहतीति? न हेवं वत्तब्बे…पे॰…।
Paro parassa cittaṃ paggaṇhātīti? Āmantā. Paro parassa atthāya rāgaṃ pajahati… dosaṃ pajahati… mohaṃ pajahati…pe… anottappaṃ pajahatīti? Na hevaṃ vattabbe…pe….
परो परस्स चित्तं पग्गण्हातीति? आमन्ता। परो परस्स अत्थाय मग्गं भावेति… सतिपट्ठानं भावेति…पे॰… बोज्झङ्गं भावेतीति? न हेवं वत्तब्बे…पे॰…।
Paro parassa cittaṃ paggaṇhātīti? Āmantā. Paro parassa atthāya maggaṃ bhāveti… satipaṭṭhānaṃ bhāveti…pe… bojjhaṅgaṃ bhāvetīti? Na hevaṃ vattabbe…pe….
परो परस्स चित्तं पग्गण्हातीति? आमन्ता। परो परस्स अत्थाय दुक्खं परिजानाति…पे॰… मग्गं भावेतीति? न हेवं वत्तब्बे…पे॰…।
Paro parassa cittaṃ paggaṇhātīti? Āmantā. Paro parassa atthāya dukkhaṃ parijānāti…pe… maggaṃ bhāvetīti? Na hevaṃ vattabbe…pe….
परो परस्स चित्तं पग्गण्हातीति? आमन्ता। अञ्ञो अञ्ञस्स कारको, परङ्कतं सुखं दुक्खं अञ्ञो करोति अञ्ञो पटिसंवेदेतीति? न हेवं वत्तब्बे…पे॰…।
Paro parassa cittaṃ paggaṇhātīti? Āmantā. Añño aññassa kārako, paraṅkataṃ sukhaṃ dukkhaṃ añño karoti añño paṭisaṃvedetīti? Na hevaṃ vattabbe…pe….
परो परस्स चित्तं पग्गण्हातीति? आमन्ता। ननु वुत्तं भगवता – ‘‘अत्तनाव कतं पापं…पे॰… नाञ्ञो अञ्ञं विसोधये’’ति। अत्थेव सुत्तन्तोति? आमन्ता। तेन हि न वत्तब्बं – ‘‘परो परस्स चित्तं पग्गण्हाती’’ति।
Paro parassa cittaṃ paggaṇhātīti? Āmantā. Nanu vuttaṃ bhagavatā – ‘‘attanāva kataṃ pāpaṃ…pe… nāñño aññaṃ visodhaye’’ti. Attheva suttantoti? Āmantā. Tena hi na vattabbaṃ – ‘‘paro parassa cittaṃ paggaṇhātī’’ti.
७४६. न वत्तब्बं – ‘‘परो परस्स चित्तं पग्गण्हाती’’ति? आमन्ता। ननु अत्थि बलप्पत्ता, अत्थि वसीभूताति? आमन्ता। हञ्चि अत्थि बलप्पत्ता, अत्थि वसीभूता, तेन वत रे वत्तब्बे – ‘‘परो परस्स चित्तं पग्गण्हाती’’ति।
746. Na vattabbaṃ – ‘‘paro parassa cittaṃ paggaṇhātī’’ti? Āmantā. Nanu atthi balappattā, atthi vasībhūtāti? Āmantā. Hañci atthi balappattā, atthi vasībhūtā, tena vata re vattabbe – ‘‘paro parassa cittaṃ paggaṇhātī’’ti.
पग्गहकथा निट्ठिता।
Paggahakathā niṭṭhitā.
