| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၆. သောဠသမဝဂ္ဂော
16. Soḷasamavaggo
(၁၅၇) ၂. ပဂ္ဂဟကထာ
(157) 2. Paggahakathā
၇၄၅. ပရော ပရသ္သ စိတ္တံ ပဂ္ဂဏ္ဟာတီတိ? အာမန္တာ။ ပရော ပရသ္သ စိတ္တံ ‘‘မာ ရဇ္ဇိ,’’‘‘မာ ဒုသ္သိ,’’‘‘မာ မုယ္ဟိ,’’‘‘မာ ကိလိသ္သီ’’တိ ပဂ္ဂဏ္ဟာတီတိ? န ဟေဝံ ဝတ္တဗ္ဗေ။ပေ.။ ပရော ပရသ္သ စိတ္တံ ပဂ္ဂဏ္ဟာတီတိ? အာမန္တာ။ ပရော ပရသ္သ အလောဘံ ကုသလမူလံ ဇနေတိ။ အဒောသံ ကုသလမူလံ ဇနေတိ။ အမောဟံ ကုသလမူလံ ဇနေတိ။ သဒ္ဓံ ဇနေတိ။ ဝီရိယံ ဇနေတိ။ သတိံ ဇနေတိ။ သမာဓိံ ဇနေတိ။ ပညံ ဇနေတီတိ? န ဟေဝံ ဝတ္တဗ္ဗေ။ပေ.။ ပရော ပရသ္သ စိတ္တံ ပဂ္ဂဏ္ဟာတီတိ? အာမန္တာ။ ပရော ပရသ္သ ဥပ္ပန္နော ဖသ္သော ‘‘မာ နိရုဇ္ဈီ’’တိ ပဂ္ဂဏ္ဟာတီတိ? န ဟေဝံ ဝတ္တဗ္ဗေ။ပေ.။ ပရော ပရသ္သ ဥပ္ပန္နာ ဝေဒနာ။ပေ.။ ဥပ္ပန္နာ ပညာ ‘‘မာ နိရုဇ္ဈီ’’တိ ပဂ္ဂဏ္ဟာတီတိ? န ဟေဝံ ဝတ္တဗ္ဗေ။ပေ.။။
745. Paro parassa cittaṃ paggaṇhātīti? Āmantā. Paro parassa cittaṃ ‘‘mā rajji,’’‘‘mā dussi,’’‘‘mā muyhi,’’‘‘mā kilissī’’ti paggaṇhātīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa alobhaṃ kusalamūlaṃ janeti… adosaṃ kusalamūlaṃ janeti… amohaṃ kusalamūlaṃ janeti… saddhaṃ janeti… vīriyaṃ janeti… satiṃ janeti… samādhiṃ janeti… paññaṃ janetīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa uppanno phasso ‘‘mā nirujjhī’’ti paggaṇhātīti? Na hevaṃ vattabbe…pe… paro parassa uppannā vedanā…pe… uppannā paññā ‘‘mā nirujjhī’’ti paggaṇhātīti? Na hevaṃ vattabbe…pe….
ပရော ပရသ္သ စိတ္တံ ပဂ္ဂဏ္ဟာတီတိ? အာမန္တာ။ ပရော ပရသ္သ အတ္ထာယ ရာဂံ ပဇဟတိ။ ဒောသံ ပဇဟတိ။ မောဟံ ပဇဟတိ။ပေ.။ အနောတ္တပ္ပံ ပဇဟတီတိ? န ဟေဝံ ဝတ္တဗ္ဗေ။ပေ.။။
Paro parassa cittaṃ paggaṇhātīti? Āmantā. Paro parassa atthāya rāgaṃ pajahati… dosaṃ pajahati… mohaṃ pajahati…pe… anottappaṃ pajahatīti? Na hevaṃ vattabbe…pe….
ပရော ပရသ္သ စိတ္တံ ပဂ္ဂဏ္ဟာတီတိ? အာမန္တာ။ ပရော ပရသ္သ အတ္ထာယ မဂ္ဂံ ဘာဝေတိ။ သတိပဋ္ဌာနံ ဘာဝေတိ။ပေ.။ ဗောဇ္ဈင္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
Paro parassa cittaṃ paggaṇhātīti? Āmantā. Paro parassa atthāya maggaṃ bhāveti… satipaṭṭhānaṃ bhāveti…pe… bojjhaṅgaṃ bhāvetīti? Na hevaṃ vattabbe…pe….
ပရော ပရသ္သ စိတ္တံ ပဂ္ဂဏ္ဟာတီတိ? အာမန္တာ။ ပရော ပရသ္သ အတ္ထာယ ဒုက္ခံ ပရိဇာနာတိ။ပေ.။ မဂ္ဂံ ဘာဝေတီတိ? န ဟေဝံ ဝတ္တဗ္ဗေ။ပေ.။။
Paro parassa cittaṃ paggaṇhātīti? Āmantā. Paro parassa atthāya dukkhaṃ parijānāti…pe… maggaṃ bhāvetīti? Na hevaṃ vattabbe…pe….
ပရော ပရသ္သ စိတ္တံ ပဂ္ဂဏ္ဟာတီတိ? အာမန္တာ။ အညော အညသ္သ ကာရကော, ပရင္ကတံ သုခံ ဒုက္ခံ အညော ကရောတိ အညော ပဋိသံဝေဒေတီတိ? န ဟေဝံ ဝတ္တဗ္ဗေ။ပေ.။။
Paro parassa cittaṃ paggaṇhātīti? Āmantā. Añño aññassa kārako, paraṅkataṃ sukhaṃ dukkhaṃ añño karoti añño paṭisaṃvedetīti? Na hevaṃ vattabbe…pe….
ပရော ပရသ္သ စိတ္တံ ပဂ္ဂဏ္ဟာတီတိ? အာမန္တာ။ နနု ဝုတ္တံ ဘဂဝတာ – ‘‘အတ္တနာဝ ကတံ ပာပံ။ပေ.။ နာညော အညံ ဝိသောဓယေ’’တိ။ အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ပရော ပရသ္သ စိတ္တံ ပဂ္ဂဏ္ဟာတီ’’တိ။
Paro parassa cittaṃ paggaṇhātīti? Āmantā. Nanu vuttaṃ bhagavatā – ‘‘attanāva kataṃ pāpaṃ…pe… nāñño aññaṃ visodhaye’’ti. Attheva suttantoti? Āmantā. Tena hi na vattabbaṃ – ‘‘paro parassa cittaṃ paggaṇhātī’’ti.
၇၄၆. န ဝတ္တဗ္ဗံ – ‘‘ပရော ပရသ္သ စိတ္တံ ပဂ္ဂဏ္ဟာတီ’’တိ? အာမန္တာ။ နနု အတ္ထိ ဗလပ္ပတ္တာ, အတ္ထိ ဝသီဘူတာတိ? အာမန္တာ။ ဟဉ္စိ အတ္ထိ ဗလပ္ပတ္တာ, အတ္ထိ ဝသီဘူတာ, တေန ဝတ ရေ ဝတ္တဗ္ဗေ – ‘‘ပရော ပရသ္သ စိတ္တံ ပဂ္ဂဏ္ဟာတီ’’တိ။
746. Na vattabbaṃ – ‘‘paro parassa cittaṃ paggaṇhātī’’ti? Āmantā. Nanu atthi balappattā, atthi vasībhūtāti? Āmantā. Hañci atthi balappattā, atthi vasībhūtā, tena vata re vattabbe – ‘‘paro parassa cittaṃ paggaṇhātī’’ti.
ပဂ္ဂဟကထာ နိဋ္ဌိတာ။
Paggahakathā niṭṭhitā.
