| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
16. සොළසමවග්‌ගො
16. Soḷasamavaggo
(157) 2. පග්‌ගහකථා
(157) 2. Paggahakathā
745. පරො පරස්‌ස චිත්‌තං පග්‌ගණ්‌හාතීති? ආමන්‌තා. පරො පරස්‌ස චිත්‌තං ‘‘මා රජ්‌ජි,’’‘‘මා දුස්‌සි,’’‘‘මා මුය්‌හි,’’‘‘මා කිලිස්‌සී’’ති පග්‌ගණ්‌හාතීති? න හෙවං වත්‌තබ්‌බෙ…පෙ.… පරො පරස්‌ස චිත්‌තං පග්‌ගණ්‌හාතීති? ආමන්‌තා. පරො පරස්‌ස අලොභං කුසලමූලං ජනෙති… අදොසං කුසලමූලං ජනෙති… අමොහං කුසලමූලං ජනෙති… සද්‌ධං ජනෙති… වීරියං ජනෙති… සතිං ජනෙති… සමාධිං ජනෙති… පඤ්‌ඤං ජනෙතීති? න හෙවං වත්‌තබ්‌බෙ…පෙ.… පරො පරස්‌ස චිත්‌තං පග්‌ගණ්‌හාතීති? ආමන්‌තා. පරො පරස්‌ස උප්‌පන්‌නො ඵස්‌සො ‘‘මා නිරුජ්‌ඣී’’ති පග්‌ගණ්‌හාතීති? න හෙවං වත්‌තබ්‌බෙ…පෙ.… පරො පරස්‌ස උප්‌පන්‌නා වෙදනා…පෙ.… උප්‌පන්‌නා පඤ්‌ඤා ‘‘මා නිරුජ්‌ඣී’’ති පග්‌ගණ්‌හාතීති? න හෙවං වත්‌තබ්‌බෙ…පෙ.….
745. Paro parassa cittaṃ paggaṇhātīti? Āmantā. Paro parassa cittaṃ ‘‘mā rajji,’’‘‘mā dussi,’’‘‘mā muyhi,’’‘‘mā kilissī’’ti paggaṇhātīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa alobhaṃ kusalamūlaṃ janeti… adosaṃ kusalamūlaṃ janeti… amohaṃ kusalamūlaṃ janeti… saddhaṃ janeti… vīriyaṃ janeti… satiṃ janeti… samādhiṃ janeti… paññaṃ janetīti? Na hevaṃ vattabbe…pe… paro parassa cittaṃ paggaṇhātīti? Āmantā. Paro parassa uppanno phasso ‘‘mā nirujjhī’’ti paggaṇhātīti? Na hevaṃ vattabbe…pe… paro parassa uppannā vedanā…pe… uppannā paññā ‘‘mā nirujjhī’’ti paggaṇhātīti? Na hevaṃ vattabbe…pe….
පරො පරස්‌ස චිත්‌තං පග්‌ගණ්‌හාතීති? ආමන්‌තා. පරො පරස්‌ස අත්‌ථාය රාගං පජහති… දොසං පජහති… මොහං පජහති…පෙ.… අනොත්‌තප්‌පං පජහතීති? න හෙවං වත්‌තබ්‌බෙ…පෙ.….
Paro parassa cittaṃ paggaṇhātīti? Āmantā. Paro parassa atthāya rāgaṃ pajahati… dosaṃ pajahati… mohaṃ pajahati…pe… anottappaṃ pajahatīti? Na hevaṃ vattabbe…pe….
පරො පරස්‌ස චිත්‌තං පග්‌ගණ්‌හාතීති? ආමන්‌තා. පරො පරස්‌ස අත්‌ථාය මග්‌ගං භාවෙති… සතිපට්‌ඨානං භාවෙති…පෙ.… බොජ්‌ඣඞ්‌ගං භාවෙතීති? න හෙවං වත්‌තබ්‌බෙ…පෙ.….
Paro parassa cittaṃ paggaṇhātīti? Āmantā. Paro parassa atthāya maggaṃ bhāveti… satipaṭṭhānaṃ bhāveti…pe… bojjhaṅgaṃ bhāvetīti? Na hevaṃ vattabbe…pe….
පරො පරස්‌ස චිත්‌තං පග්‌ගණ්‌හාතීති? ආමන්‌තා. පරො පරස්‌ස අත්‌ථාය දුක්‌ඛං පරිජානාති…පෙ.… මග්‌ගං භාවෙතීති? න හෙවං වත්‌තබ්‌බෙ…පෙ.….
Paro parassa cittaṃ paggaṇhātīti? Āmantā. Paro parassa atthāya dukkhaṃ parijānāti…pe… maggaṃ bhāvetīti? Na hevaṃ vattabbe…pe….
පරො පරස්‌ස චිත්‌තං පග්‌ගණ්‌හාතීති? ආමන්‌තා. අඤ්‌ඤො අඤ්‌ඤස්‌ස කාරකො, පරඞ්‌කතං සුඛං දුක්‌ඛං අඤ්‌ඤො කරොති අඤ්‌ඤො පටිසංවෙදෙතීති? න හෙවං වත්‌තබ්‌බෙ…පෙ.….
Paro parassa cittaṃ paggaṇhātīti? Āmantā. Añño aññassa kārako, paraṅkataṃ sukhaṃ dukkhaṃ añño karoti añño paṭisaṃvedetīti? Na hevaṃ vattabbe…pe….
පරො පරස්‌ස චිත්‌තං පග්‌ගණ්‌හාතීති? ආමන්‌තා. නනු වුත්‌තං භගවතා – ‘‘අත්‌තනාව කතං පාපං…පෙ.… නාඤ්‌ඤො අඤ්‌ඤං විසොධයෙ’’ති. අත්‌ථෙව සුත්‌තන්‌තොති? ආමන්‌තා. තෙන හි න වත්‌තබ්‌බං – ‘‘පරො පරස්‌ස චිත්‌තං පග්‌ගණ්‌හාතී’’ති.
Paro parassa cittaṃ paggaṇhātīti? Āmantā. Nanu vuttaṃ bhagavatā – ‘‘attanāva kataṃ pāpaṃ…pe… nāñño aññaṃ visodhaye’’ti. Attheva suttantoti? Āmantā. Tena hi na vattabbaṃ – ‘‘paro parassa cittaṃ paggaṇhātī’’ti.
746. න වත්‌තබ්‌බං – ‘‘පරො පරස්‌ස චිත්‌තං පග්‌ගණ්‌හාතී’’ති? ආමන්‌තා. නනු අත්‌ථි බලප්‌පත්‌තා, අත්‌ථි වසීභූතාති? ආමන්‌තා. හඤ්‌චි අත්‌ථි බලප්‌පත්‌තා, අත්‌ථි වසීභූතා, තෙන වත රෙ වත්‌තබ්‌බෙ – ‘‘පරො පරස්‌ස චිත්‌තං පග්‌ගණ්‌හාතී’’ති.
746. Na vattabbaṃ – ‘‘paro parassa cittaṃ paggaṇhātī’’ti? Āmantā. Nanu atthi balappattā, atthi vasībhūtāti? Āmantā. Hañci atthi balappattā, atthi vasībhūtā, tena vata re vattabbe – ‘‘paro parassa cittaṃ paggaṇhātī’’ti.
පග්‌ගහකථා නිට්‌ඨිතා.
Paggahakathā niṭṭhitā.
