| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. பஹானஸுத்தவண்ணனா
3. Pahānasuttavaṇṇanā
251. ததியே அச்செ²ச்சி² தண்ஹந்தி ஸப்³ப³ம்பி தண்ஹங் சி²ந்தி³ ஸமுச்சி²ந்தி³. விவத்தயி ஸங்யோஜனந்தி த³ஸவித⁴ம்பி ஸங்யோஜனங் பரிவத்தயி நிம்மூலகமகாஸி. ஸம்மாதி ஹேதுனா காரணேன. மானாபி⁴ஸமயாதி மானஸ்ஸ த³ஸ்ஸனாபி⁴ஸமயா, பஹானாபி⁴ஸமயா ச. அரஹத்தமக்³கோ³ ஹி கிச்சவஸேன மானங் ஸம்பஸ்ஸதி, அயமஸ்ஸ த³ஸ்ஸனாபி⁴ஸமயோ. தேன தி³ட்டோ² பன ஸோ தாவதே³வ பஹீயதி, தி³ட்ட²விஸேன தி³ட்ட²ஸத்தானங் ஜீவிதங் விய. அயமஸ்ஸ பஹானாபி⁴ஸமயோ.
251. Tatiye acchecchi taṇhanti sabbampi taṇhaṃ chindi samucchindi. Vivattayi saṃyojananti dasavidhampi saṃyojanaṃ parivattayi nimmūlakamakāsi. Sammāti hetunā kāraṇena. Mānābhisamayāti mānassa dassanābhisamayā, pahānābhisamayā ca. Arahattamaggo hi kiccavasena mānaṃ sampassati, ayamassa dassanābhisamayo. Tena diṭṭho pana so tāvadeva pahīyati, diṭṭhavisena diṭṭhasattānaṃ jīvitaṃ viya. Ayamassa pahānābhisamayo.
அந்தமகாஸி து³க்க²ஸ்ஸாதி ஏவங் அரஹத்தமக்³கே³ன மானஸ்ஸ தி³ட்ட²த்தா ச பஹீனத்தா ச யே இமே ‘‘காயப³ந்த⁴னஸ்ஸ அந்தோ ஜீரதி (சூளவ॰ 278) ஹரிதந்தங் வா’’தி (ம॰ நி॰ 1.304) ஏவங் வுத்தஅந்திமமரியாத³ந்தோ ச, ‘‘அந்தமித³ங், பி⁴க்க²வே, ஜீவிகான’’ந்தி (இதிவு॰ 91; ஸங்॰ நி॰ 3.80) ஏவங் வுத்தலாமகந்தோ ச, ‘‘ஸக்காயோ ஏகோ அந்தோ’’தி (அ॰ நி॰ 6.61; சூளனி॰ திஸ்ஸமெத்தெய்யமாணவபுச்சா²னித்³தே³ஸ 11) ஏவங் வுத்தகொட்டா²ஸந்தோ ச, ‘‘ஏஸேவந்தோ து³க்க²ஸ்ஸ ஸப்³ப³பச்சயஸங்க²யா’’தி (ஸங் நி॰ 2.51; 2.4.71; உதா³॰ 71) ஏவங் வுத்தகோடந்தோ சாதி சத்தாரோ அந்தா, தேஸு ஸப்³ப³ஸ்ஸேவ வட்டது³க்க²ஸ்ஸ அது³ங் சதுத்த²கோடிஸங்கா²தங் அந்தமகாஸி, பரிச்சே²த³ங் பரிவடுமங் அகாஸி, அந்திமஸமுஸ்ஸயமத்தாவஸேஸங் து³க்க²மகாஸீதி வுத்தங் ஹோதி.
Antamakāsi dukkhassāti evaṃ arahattamaggena mānassa diṭṭhattā ca pahīnattā ca ye ime ‘‘kāyabandhanassa anto jīrati (cūḷava. 278) haritantaṃ vā’’ti (ma. ni. 1.304) evaṃ vuttaantimamariyādanto ca, ‘‘antamidaṃ, bhikkhave, jīvikāna’’nti (itivu. 91; saṃ. ni. 3.80) evaṃ vuttalāmakanto ca, ‘‘sakkāyo eko anto’’ti (a. ni. 6.61; cūḷani. tissametteyyamāṇavapucchāniddesa 11) evaṃ vuttakoṭṭhāsanto ca, ‘‘esevanto dukkhassa sabbapaccayasaṅkhayā’’ti (saṃ ni. 2.51; 2.4.71; udā. 71) evaṃ vuttakoṭanto cāti cattāro antā, tesu sabbasseva vaṭṭadukkhassa aduṃ catutthakoṭisaṅkhātaṃ antamakāsi, paricchedaṃ parivaṭumaṃ akāsi, antimasamussayamattāvasesaṃ dukkhamakāsīti vuttaṃ hoti.
ஸம்பஜஞ்ஞங் ந ரிஞ்சதீதி ஸம்பஜஞ்ஞங் ந ஜஹதி. ஸங்க்²யங் நோபேதீதி ரத்தோ து³ட்டோ² மூள்ஹோதி பஞ்ஞத்திங் ந உபேதி, தங் பஞ்ஞத்திங் பஹாய கீ²ணாஸவோ நாம ஹோதீதி அத்தோ². இமஸ்மிங் ஸுத்தே ஆரம்மணானுஸயோ கதி²தோ.
Sampajaññaṃ na riñcatīti sampajaññaṃ na jahati. Saṅkhyaṃ nopetīti ratto duṭṭho mūḷhoti paññattiṃ na upeti, taṃ paññattiṃ pahāya khīṇāsavo nāma hotīti attho. Imasmiṃ sutte ārammaṇānusayo kathito.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. பஹானஸுத்தங் • 3. Pahānasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. பஹானஸுத்தவண்ணனா • 3. Pahānasuttavaṇṇanā
