| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. பஹாராத³ஸுத்தவண்ணனா
9. Pahārādasuttavaṇṇanā
19. நவமே பஹாராதோ³தி ஏவங்னாமகோ. அஸுரிந்தோ³தி அஸுரஜெட்ட²கோ. அஸுரேஸு ஹி வேபசித்தி ராஹு பஹாராதோ³தி இமே தயோ ஜெட்ட²கா. யேன ப⁴க³வா தேனுபஸங்கமீதி த³ஸப³லஸ்ஸ அபி⁴ஸம்பு³த்³த⁴தி³வஸதோ பட்டா²ய ‘‘அஜ்ஜ க³மிஸ்ஸாமி ஸ்வே க³மிஸ்ஸாமீ’’தி ஏகாத³ஸ வஸ்ஸானி அதிக்கமித்வா த்³வாத³ஸமே வஸ்ஸே ஸத்து² வேரஞ்ஜாயங் வஸனகாலே ‘‘ஸம்மாஸம்பு³த்³த⁴ஸ்ஸ ஸந்திகங் க³மிஸ்ஸாமீ’’தி சித்தங் உப்பாதெ³த்வா ‘‘மம ‘அஜ்ஜ ஸ்வே’தி த்³வாத³ஸ வஸ்ஸானி ஜாதானி, ஹந்தா³ஹங் இதா³னேவ க³ச்சா²மீ’’தி தங்க²ணங்யேவ அஸுரக³ணபரிவுதோ அஸுரப⁴வனா நிக்க²மித்வா தி³வா தி³வஸ்ஸ யேன ப⁴க³வா தேனுபஸங்கமி, ஏகமந்தங் அட்டா²ஸீதி ஸோ கிர ‘‘ததா²க³தங் பஞ்ஹங் புச்சி²த்வா ஏவ த⁴ம்மங் ஸுணிஸ்ஸாமீ’’தி ஆக³தோ, ததா²க³தஸ்ஸ பன தி³ட்ட²காலதோ பட்டா²ய பு³த்³த⁴கா³ரவேன புச்சி²துங் அஸக்கொந்தோ அபி ஸத்தா²ரங் வந்தி³த்வா ஏகமந்தங் அட்டா²ஸி. ததோ ஸத்தா² சிந்தேஸி – ‘‘அயங் பஹாராதோ³ மயி அகதெ²ந்தே பட²மதரங் கதே²துங் ந ஸக்கி²ஸ்ஸதி, சிண்ணவஸிட்டா²னேயேவ நங் கதா²ஸமுட்டா²பனத்த²ங் ஏகங் பஞ்ஹங் புச்சி²ஸ்ஸாமீ’’தி .
19. Navame pahārādoti evaṃnāmako. Asurindoti asurajeṭṭhako. Asuresu hi vepacitti rāhu pahārādoti ime tayo jeṭṭhakā. Yena bhagavā tenupasaṅkamīti dasabalassa abhisambuddhadivasato paṭṭhāya ‘‘ajja gamissāmi sve gamissāmī’’ti ekādasa vassāni atikkamitvā dvādasame vasse satthu verañjāyaṃ vasanakāle ‘‘sammāsambuddhassa santikaṃ gamissāmī’’ti cittaṃ uppādetvā ‘‘mama ‘ajja sve’ti dvādasa vassāni jātāni, handāhaṃ idāneva gacchāmī’’ti taṅkhaṇaṃyeva asuragaṇaparivuto asurabhavanā nikkhamitvā divā divassa yena bhagavā tenupasaṅkami, ekamantaṃ aṭṭhāsīti so kira ‘‘tathāgataṃ pañhaṃ pucchitvā eva dhammaṃ suṇissāmī’’ti āgato, tathāgatassa pana diṭṭhakālato paṭṭhāya buddhagāravena pucchituṃ asakkonto api satthāraṃ vanditvā ekamantaṃ aṭṭhāsi. Tato satthā cintesi – ‘‘ayaṃ pahārādo mayi akathente paṭhamataraṃ kathetuṃ na sakkhissati, ciṇṇavasiṭṭhāneyeva naṃ kathāsamuṭṭhāpanatthaṃ ekaṃ pañhaṃ pucchissāmī’’ti .
அத² நங் புச்ச²ந்தோ அபி பன பஹாராதா³திஆதி³மாஹ. தத்த² அபி⁴ரமந்தீதி ரதிங் விந்த³ந்தி, அனுக்கண்ட²மானா வஸந்தீதி அத்தோ². ஸோ ‘‘பரிசிண்ணட்டா²னேயேவ மங் ப⁴க³வா புச்ச²தீ’’தி அத்தமனோ ஹுத்வா அபி⁴ரமந்தி, ப⁴ந்தேதி ஆஹ. அனுபுப்³ப³னின்னோதிஆதீ³னி ஸப்³பா³னி அனுபடிபாடியா நின்னபா⁴வஸ்ஸ வேவசனானி. ந ஆயதகேனேவ பபாதோதி ந சி²ன்னதடமஹாஸொப்³போ⁴ விய ஆதி³தோவ பபாதோ . ஸோ ஹி தீரதோ பட்டா²ய ஏகங்கு³லத்³வங்கு³லவித³த்தி²ரதனயட்டி²உஸப⁴அட்³ட⁴கா³வுதகா³வுதஅட்³ட⁴யோஜனாதி³வஸேன க³ம்பீ⁴ரோ ஹுத்வா க³ச்ச²ந்தோ ஸினேருபாத³மூலே சதுராஸீதியோஜனஸஹஸ்ஸக³ம்பீ⁴ரோ ஹுத்வா டி²தோதி த³ஸ்ஸேதி.
Atha naṃ pucchanto api pana pahārādātiādimāha. Tattha abhiramantīti ratiṃ vindanti, anukkaṇṭhamānā vasantīti attho. So ‘‘pariciṇṇaṭṭhāneyeva maṃ bhagavā pucchatī’’ti attamano hutvā abhiramanti, bhanteti āha. Anupubbaninnotiādīni sabbāni anupaṭipāṭiyā ninnabhāvassa vevacanāni. Na āyatakeneva papātoti na chinnataṭamahāsobbho viya āditova papāto . So hi tīrato paṭṭhāya ekaṅguladvaṅgulavidatthiratanayaṭṭhiusabhaaḍḍhagāvutagāvutaaḍḍhayojanādivasena gambhīro hutvā gacchanto sinerupādamūle caturāsītiyojanasahassagambhīro hutvā ṭhitoti dasseti.
டி²தத⁴ம்மோதி டி²தஸபா⁴வோ. குணபேனாதி யேன கேனசி ஹத்தி²அஸ்ஸாதீ³னங் களேவரேன. த²லங் உஸ்ஸாரேதீதி ஹத்தே²ன க³ஹெத்வா விய வீசிபஹாரேனேவ த²லங் கி²பதி.
Ṭhitadhammoti ṭhitasabhāvo. Kuṇapenāti yena kenaci hatthiassādīnaṃ kaḷevarena. Thalaṃ ussāretīti hatthena gahetvā viya vīcipahāreneva thalaṃ khipati.
க³ங்கா³யமுனாதி இத⁴ ட²த்வா இமாஸங் நதீ³னங் உப்பத்திகத²ங் கதே²துங் வட்டதி. அயங் தாவ ஜம்பு³தீ³போ த³ஸஸஹஸ்ஸயோஜனபரிமாணோ, தத்த² சதுஸஹஸ்ஸயோஜனபரிமாணோ பதே³ஸோ உத³கேன அஜ்ஜொ²த்த²டோ மஹாஸமுத்³தோ³தி ஸங்க²ங் க³தோ, திஸஹஸ்ஸயோஜனப்பமாணே மனுஸ்ஸா வஸந்தி, திஸஹஸ்ஸயோஜனப்பமாணே ஹிமவா பதிட்டி²தோ உப்³பே³தே⁴ன பஞ்சயோஜனஸதிகோ சதுராஸீதிகூடஸஹஸ்ஸபடிமண்டி³தோ ஸமந்ததோ ஸந்த³மானபஞ்சஸதனதீ³விசித்தோ, யத்த² ஆயாமவித்தா²ரேன ச க³ம்பீ⁴ரதோ ச பண்ணாஸபண்ணாஸயோஜனா தி³யட்³ட⁴யோஜனஸதபரிமண்ட³லா அனோதத்தத³ஹோ கண்ணமுண்ட³த³ஹோ ரத²காரத³ஹோ ச²த்³த³ந்தத³ஹோ குணாலத³ஹோ மந்தா³கினித³ஹோ ஸீஹப்பபாதத³ஹோதி ஸத்த மஹாஸரா பதிட்ட²ஹந்தி.
Gaṅgāyamunāti idha ṭhatvā imāsaṃ nadīnaṃ uppattikathaṃ kathetuṃ vaṭṭati. Ayaṃ tāva jambudīpo dasasahassayojanaparimāṇo, tattha catusahassayojanaparimāṇo padeso udakena ajjhotthaṭo mahāsamuddoti saṅkhaṃ gato, tisahassayojanappamāṇe manussā vasanti, tisahassayojanappamāṇe himavā patiṭṭhito ubbedhena pañcayojanasatiko caturāsītikūṭasahassapaṭimaṇḍito samantato sandamānapañcasatanadīvicitto, yattha āyāmavitthārena ca gambhīrato ca paṇṇāsapaṇṇāsayojanā diyaḍḍhayojanasataparimaṇḍalā anotattadaho kaṇṇamuṇḍadaho rathakāradaho chaddantadaho kuṇāladaho mandākinidaho sīhappapātadahoti satta mahāsarā patiṭṭhahanti.
தேஸு அனோதத்தோ ஸுத³ஸ்ஸனகூடங் சித்தகூடங் காளகூடங் க³ந்த⁴மாத³னகூடங் கேலாஸகூடந்தி இமேஹி பஞ்சஹி பப்³ப³தேஹி பரிக்கி²த்தோ. தத்த² ஸுத³ஸ்ஸனகூடங் ஸோவண்ணமயங் த்³வியோஜனஸதுப்³பே³த⁴ங் அந்தோவங்கங் காகமுக²ஸண்டா²னங் தமேவ ஸரங் படிச்சா²தெ³த்வா திட்ட²தி, சித்தகூடங் ஸப்³ப³ரதனமயங், காளகூடங் அஞ்ஜனமயங், க³ந்த⁴மாத³னகூடங் ஸானுமயங் அப்³ப⁴ந்தரே முக்³க³வண்ணங், மூலக³ந்தோ⁴ ஸாரக³ந்தோ⁴ பெ²க்³கு³க³ந்தோ⁴ தசக³ந்தோ⁴ பபடிகாக³ந்தோ⁴ ரஸக³ந்தோ⁴ பத்தக³ந்தோ⁴ புப்ப²க³ந்தோ⁴ ப²லக³ந்தோ⁴ க³ந்த⁴க³ந்தோ⁴தி இமேஹி த³ஸஹி க³ந்தே⁴ஹி உஸ்ஸன்னங், நானப்பகாரஓஸத⁴ஸஞ்ச²ன்னங் காளபக்க²உபோஸத²தி³வஸே ஆதி³த்தமிவ அங்கா³ரங் ஜலந்தங் திட்ட²தி, கேலாஸகூடங் ரஜதமயங். ஸப்³பா³னி ஸுத³ஸ்ஸனேன ஸமானுப்³பே³த⁴ஸண்டா²னானி தமேவ ஸரங் படிச்சா²தெ³த்வா டி²தானி. தானி ஸப்³பா³னி தே³வானுபா⁴வேன நாகா³னுபா⁴வேன ச வஸ்ஸந்தி, நதி³யோ சேதேஸு ஸந்த³ந்தி. தங் ஸப்³ப³ம்பி உத³கங் அனோதத்தமேவ பவிஸதி. சந்தி³மஸூரியா த³க்கி²ணேன வா உத்தரேன வா க³ச்ச²ந்தா பப்³ப³தந்தரேன தத்த² ஓபா⁴ஸங் கரொந்தி, உஜுங் க³ச்ச²ந்தா ந கரொந்தி. தேனேவஸ்ஸ அனோதத்தோ திஸங்கா² உத³பாதி³.
Tesu anotatto sudassanakūṭaṃ cittakūṭaṃ kāḷakūṭaṃ gandhamādanakūṭaṃ kelāsakūṭanti imehi pañcahi pabbatehi parikkhitto. Tattha sudassanakūṭaṃ sovaṇṇamayaṃ dviyojanasatubbedhaṃ antovaṅkaṃ kākamukhasaṇṭhānaṃ tameva saraṃ paṭicchādetvā tiṭṭhati, cittakūṭaṃ sabbaratanamayaṃ, kāḷakūṭaṃ añjanamayaṃ, gandhamādanakūṭaṃ sānumayaṃ abbhantare muggavaṇṇaṃ, mūlagandho sāragandho pheggugandho tacagandho papaṭikāgandho rasagandho pattagandho pupphagandho phalagandho gandhagandhoti imehi dasahi gandhehi ussannaṃ, nānappakāraosadhasañchannaṃ kāḷapakkhauposathadivase ādittamiva aṅgāraṃ jalantaṃ tiṭṭhati, kelāsakūṭaṃ rajatamayaṃ. Sabbāni sudassanena samānubbedhasaṇṭhānāni tameva saraṃ paṭicchādetvā ṭhitāni. Tāni sabbāni devānubhāvena nāgānubhāvena ca vassanti, nadiyo cetesu sandanti. Taṃ sabbampi udakaṃ anotattameva pavisati. Candimasūriyā dakkhiṇena vā uttarena vā gacchantā pabbatantarena tattha obhāsaṃ karonti, ujuṃ gacchantā na karonti. Tenevassa anotatto tisaṅkhā udapādi.
தத்த² மனோஹரஸிலாதலானி நிம்மச்ச²கச்ச²பானி ப²லிகஸதி³ஸனிம்மலோத³கானி ந்ஹானதித்தா²னி ஸுபடியத்தானி ஹொந்தி , யேஸு பு³த்³தா⁴ கீ²ணாஸவா ச பச்சேகபு³த்³தா⁴ ச இத்³தி⁴மந்தா ச இஸயோ ந்ஹாயந்தி, தே³வயக்கா²த³யோ உத³ககீளங் கீளந்தி.
Tattha manoharasilātalāni nimmacchakacchapāni phalikasadisanimmalodakāni nhānatitthāni supaṭiyattāni honti , yesu buddhā khīṇāsavā ca paccekabuddhā ca iddhimantā ca isayo nhāyanti, devayakkhādayo udakakīḷaṃ kīḷanti.
தஸ்ஸ சதூஸு பஸ்ஸேஸு ஸீஹமுக²ங், ஹத்தி²முக²ங், அஸ்ஸமுக²ங், உஸப⁴முக²ந்தி சத்தாரி முகா²னி ஹொந்தி, யேஹி சதஸ்ஸோ நதி³யோ ஸந்த³ந்தி. ஸீஹமுகே²ன நிக்க²ந்தனதீ³தீரே ஸீஹா ப³ஹுதரா ஹொந்தி, ஹத்தி²முகா²தீ³ஹி ஹத்தி²அஸ்ஸஉஸபா⁴. புரத்தி²மதி³ஸதோ நிக்க²ந்தனதீ³ அனோதத்தங் திக்க²த்துங் பத³க்கி²ணங் கத்வா இதரா திஸ்ஸோ நதி³யோ அனுபக³ம்ம பாசீனஹிமவந்தேனேவ அமனுஸ்ஸபத²ங் க³ந்த்வா மஹாஸமுத்³த³ங் பவிஸதி. பச்சி²மதி³ஸதோ ச உத்தரதி³ஸதோ ச நிக்க²ந்தனதி³யோபி ததே²வ பத³க்கி²ணங் கத்வா பச்சி²மஹிமவந்தேனேவ உத்தரஹிமவந்தேனேவ ச அமனுஸ்ஸபத²ங் க³ந்த்வா மஹாஸமுத்³த³ங் பவிஸந்தி. த³க்கி²ணமுக²தோ நிக்க²ந்தனதீ³ பன தங் திக்க²த்துங் பத³க்கி²ணங் கத்வா உத்தரேன உஜுகங் பாஸாணபிட்டே²னேவ ஸட்டி² யோஜனானி க³ந்த்வா பப்³ப³தங் பஹரித்வா உட்டா²ய பரிக்கே²பேன திகா³வுதப்பமாணா உத³கதா⁴ரா ஹுத்வா ஆகாஸேன ஸட்டி² யோஜனானி க³ந்த்வா தியக்³க³ளே நாம பாஸாணே பதிதா, பாஸாணோ உத³கதா⁴ராவேகே³ன பி⁴ன்னோ. தத்த² பஞ்ஞாஸயோஜனப்பமாணா தியக்³க³ளா நாம மஹாபொக்க²ரணீ ஜாதா, பொக்க²ரணியா கூலங் பி⁴ந்தி³த்வா பாஸாணங் பவிஸித்வா ஸட்டி² யோஜனானி க³தா. ததோ க⁴னபத²விங் பி⁴ந்தி³த்வா உம்மங்கே³ன ஸட்டி² யோஜனானி க³ந்த்வா கி³ஞ்ஜ²ங் நாம திரச்சா²னபப்³ப³தங் பஹரித்வா ஹத்த²தலே பஞ்சங்கு³லிஸதி³ஸா பஞ்ச தா⁴ரா ஹுத்வா பவத்ததி. ஸா திக்க²த்துங் அனோதத்தங் பத³க்கி²ணங் கத்வா க³தட்டா²னே ஆவத்தக³ங்கா³தி வுச்சதி . உஜுகங் பாஸாணபிட்டே²ன ஸட்டி² யோஜனானி க³தட்டா²னே கண்ஹக³ங்கா³, ஆகாஸேன ஸட்டி² யோஜனானி க³தட்டா²னே ஆகாஸக³ங்கா³, தியக்³க³ளபாஸாணே பஞ்ஞாஸயோஜனோகாஸே டி²தா தியக்³க³ளபொக்க²ரணீ, கூலங் பி⁴ந்தி³த்வா பாஸாணங் பவிஸித்வா ஸட்டி² யோஜனானி க³தட்டா²னே ப³ஹலக³ங்கா³தி, உமங்கே³ன ஸட்டி² யோஜனானி க³தட்டா²னே உமங்க³க³ங்கா³தி வுச்சதி. விஞ்ஜ²ங் நாம திரச்சா²னபப்³ப³தங் பஹரித்வா பஞ்ச தா⁴ரா ஹுத்வா பவத்தனட்டா²னே பன க³ங்கா³, யமுனா, அசிரவதீ, ஸரபூ⁴, மஹீதி பஞ்ச ஸங்க²ங் க³தா. ஏவமேதா பஞ்ச மஹானதி³யோ ஹிமவந்ததோ பவத்தந்தீதி வேதி³தப்³பா³.
Tassa catūsu passesu sīhamukhaṃ, hatthimukhaṃ, assamukhaṃ, usabhamukhanti cattāri mukhāni honti, yehi catasso nadiyo sandanti. Sīhamukhena nikkhantanadītīre sīhā bahutarā honti, hatthimukhādīhi hatthiassausabhā. Puratthimadisato nikkhantanadī anotattaṃ tikkhattuṃ padakkhiṇaṃ katvā itarā tisso nadiyo anupagamma pācīnahimavanteneva amanussapathaṃ gantvā mahāsamuddaṃ pavisati. Pacchimadisato ca uttaradisato ca nikkhantanadiyopi tatheva padakkhiṇaṃ katvā pacchimahimavanteneva uttarahimavanteneva ca amanussapathaṃ gantvā mahāsamuddaṃ pavisanti. Dakkhiṇamukhato nikkhantanadī pana taṃ tikkhattuṃ padakkhiṇaṃ katvā uttarena ujukaṃ pāsāṇapiṭṭheneva saṭṭhi yojanāni gantvā pabbataṃ paharitvā uṭṭhāya parikkhepena tigāvutappamāṇā udakadhārā hutvā ākāsena saṭṭhi yojanāni gantvā tiyaggaḷe nāma pāsāṇe patitā, pāsāṇo udakadhārāvegena bhinno. Tattha paññāsayojanappamāṇā tiyaggaḷā nāma mahāpokkharaṇī jātā, pokkharaṇiyā kūlaṃ bhinditvā pāsāṇaṃ pavisitvā saṭṭhi yojanāni gatā. Tato ghanapathaviṃ bhinditvā ummaṅgena saṭṭhi yojanāni gantvā giñjhaṃ nāma tiracchānapabbataṃ paharitvā hatthatale pañcaṅgulisadisā pañca dhārā hutvā pavattati. Sā tikkhattuṃ anotattaṃ padakkhiṇaṃ katvā gataṭṭhāne āvattagaṅgāti vuccati . Ujukaṃ pāsāṇapiṭṭhena saṭṭhi yojanāni gataṭṭhāne kaṇhagaṅgā, ākāsena saṭṭhi yojanāni gataṭṭhāne ākāsagaṅgā, tiyaggaḷapāsāṇe paññāsayojanokāse ṭhitā tiyaggaḷapokkharaṇī, kūlaṃ bhinditvā pāsāṇaṃ pavisitvā saṭṭhi yojanāni gataṭṭhāne bahalagaṅgāti, umaṅgena saṭṭhi yojanāni gataṭṭhāne umaṅgagaṅgāti vuccati. Viñjhaṃ nāma tiracchānapabbataṃ paharitvā pañca dhārā hutvā pavattanaṭṭhāne pana gaṅgā, yamunā, aciravatī, sarabhū, mahīti pañca saṅkhaṃ gatā. Evametā pañca mahānadiyo himavantato pavattantīti veditabbā.
ஸவந்தியோதி யா காசி ஸவமானா க³ச்ச²ந்தீ மஹானதி³யோ வா குன்னதி³யோ வா. அப்பெந்தீதி அல்லீயந்தி ஓஸரந்தி. தா⁴ராதி வுட்டி²தா⁴ரா. பூரத்தந்தி புண்ணபா⁴வோ. மஹாஸமுத்³த³ஸ்ஸ ஹி அயங் த⁴ம்மதா – ‘‘இமஸ்மிங் காலே தே³வோ மந்தோ³ ஜாதோ, ஜாலக்கி²பாதீ³னி ஆதா³ய மச்ச²கச்ச²பே க³ண்ஹிஸ்ஸாமா’’தி வா ‘‘இமஸ்மிங் காலே மஹந்தா வுட்டி², லபி⁴ஸ்ஸாம நு கோ² பிட்டி²பஸாரணட்டா²ன’’ந்தி வா வத்துங் ந ஸக்கா. பட²மகப்பிககாலதோ பட்டா²ய ஹி யங் ஸினேருமேக²லங் ஆஹச்ச உத³கங் டி²தங், ததோ ஏகங்கு³லமத்தம்பி உத³கங் நேவ ஹெட்டா² ஓஸீத³தி, ந உத்³த⁴ங் உத்தரதி. ஏகரஸோதி அஸம்பி⁴ன்னரஸோ.
Savantiyoti yā kāci savamānā gacchantī mahānadiyo vā kunnadiyo vā. Appentīti allīyanti osaranti. Dhārāti vuṭṭhidhārā. Pūrattanti puṇṇabhāvo. Mahāsamuddassa hi ayaṃ dhammatā – ‘‘imasmiṃ kāle devo mando jāto, jālakkhipādīni ādāya macchakacchape gaṇhissāmā’’ti vā ‘‘imasmiṃ kāle mahantā vuṭṭhi, labhissāma nu kho piṭṭhipasāraṇaṭṭhāna’’nti vā vattuṃ na sakkā. Paṭhamakappikakālato paṭṭhāya hi yaṃ sinerumekhalaṃ āhacca udakaṃ ṭhitaṃ, tato ekaṅgulamattampi udakaṃ neva heṭṭhā osīdati, na uddhaṃ uttarati. Ekarasoti asambhinnaraso.
முத்தாதி கு²த்³த³கமஹந்தவட்டதீ³கா⁴தி³பே⁴தா³ அனேகவிதா⁴ . மணீதி ரத்தனீலாதி³பே⁴தோ³ அனேகவிதோ⁴. வேளுரியோதி வங்ஸவண்ணஸிரீஸபுப்ப²வண்ணாதி³பே⁴தோ³ அனேகவிதோ⁴. ஸங்கோ²தி த³க்கி²ணாவட்டதம்ப³குச்சி²கத⁴மனஸங்கா²தி³பே⁴தோ³ அனேகவிதோ⁴. ஸிலாதி ஸேதகாளமுக்³க³வண்ணாதி³பே⁴தோ³ அனேகவிதா⁴. பவாளந்தி கு²த்³த³கமஹந்தரத்தக⁴னரத்தாதி³பே⁴த³ங் அனேகவித⁴ங். மஸாரக³ல்லந்தி கப³ரமணி. நாகா³தி ஊமிபிட்ட²வாஸினோபி விமானட்ட²கா நாகா³பி.
Muttāti khuddakamahantavaṭṭadīghādibhedā anekavidhā . Maṇīti rattanīlādibhedo anekavidho. Veḷuriyoti vaṃsavaṇṇasirīsapupphavaṇṇādibhedo anekavidho. Saṅkhoti dakkhiṇāvaṭṭatambakucchikadhamanasaṅkhādibhedo anekavidho. Silāti setakāḷamuggavaṇṇādibhedo anekavidhā. Pavāḷanti khuddakamahantarattaghanarattādibhedaṃ anekavidhaṃ. Masāragallanti kabaramaṇi. Nāgāti ūmipiṭṭhavāsinopi vimānaṭṭhakā nāgāpi.
அட்ட² பஹாராதா³தி ஸத்தா² அட்ட²பி த⁴ம்மே வத்துங் ஸக்கோதி, ஸோளஸபி பா³த்திங்ஸபி சதுஸட்டி²பி ஸஹஸ்ஸம்பி, பஹாராதே³ன பன அட்ட² கதி²தா, அஹம்பி தேஹேவ ஸரிக்க²கே கத்வா கதெ²ஸ்ஸாமீதி சிந்தெத்வா ஏவமாஹ. அனுபுப்³ப³ஸிக்கா²திஆதீ³ஸு அனுபுப்³ப³ஸிக்கா²ய திஸ்ஸோ ஸிக்கா² க³ஹிதா, அனுபுப்³ப³கிரியாய தேரஸ து⁴தங்கா³னி, அனுபுப்³ப³படிபதா³ய ஸத்த அனுபஸ்ஸனா அட்டா²ரஸ மஹாவிபஸ்ஸனா அட்ட²திங்ஸ ஆரம்மணவிப⁴த்தியோ ஸத்ததிங்ஸ போ³த⁴பக்கி²யத⁴ம்மா . ந ஆயதகேனேவ அஞ்ஞாபடிவேதோ⁴தி மண்டூ³கஸ்ஸ உப்பதித்வா க³மனங் விய ஆதி³தோவ ஸீலபூரணாதி³ங் அகத்வா அரஹத்தப்படிவேதோ⁴ நாம நத்தி², படிபாடியா பன ஸீலஸமாதி⁴பஞ்ஞாயோ பூரெத்வாவ ஸக்கா அரஹத்தங் பத்துந்தி அத்தோ².
Aṭṭha pahārādāti satthā aṭṭhapi dhamme vattuṃ sakkoti, soḷasapi bāttiṃsapi catusaṭṭhipi sahassampi, pahārādena pana aṭṭha kathitā, ahampi teheva sarikkhake katvā kathessāmīti cintetvā evamāha. Anupubbasikkhātiādīsu anupubbasikkhāya tisso sikkhā gahitā, anupubbakiriyāya terasa dhutaṅgāni, anupubbapaṭipadāya satta anupassanā aṭṭhārasa mahāvipassanā aṭṭhatiṃsa ārammaṇavibhattiyo sattatiṃsa bodhapakkhiyadhammā . Na āyatakeneva aññāpaṭivedhoti maṇḍūkassa uppatitvā gamanaṃ viya āditova sīlapūraṇādiṃ akatvā arahattappaṭivedho nāma natthi, paṭipāṭiyā pana sīlasamādhipaññāyo pūretvāva sakkā arahattaṃ pattunti attho.
ஆரகாவாதி தூ³ரேயேவ. ந தேன நிப்³பா³னதா⁴துயா ஊனத்தங் வா பூரத்தங் வாதி அஸங்க்²யெய்யேபி கப்பே பு³த்³தே⁴ஸு அனுப்பன்னேஸு ஏகஸத்தோபி பரினிப்³பா³துங் ந ஸக்கோதி, ததா³பி ‘‘துச்சா² நிப்³பா³னதா⁴தூ’’தி ந ஸக்கா வத்துங். பு³த்³த⁴காலே ச பன ஏகேகஸ்மிங் ஸமாக³மே அஸங்க்²யெய்யாபி ஸத்தா அமதங் ஆராதெ⁴ந்தி, ததா³பி ந ஸக்கா வத்துங் – ‘‘பூரா நிப்³பா³னதா⁴தூ’’தி.
Ārakāvāti dūreyeva. Na tena nibbānadhātuyā ūnattaṃ vā pūrattaṃ vāti asaṅkhyeyyepi kappe buddhesu anuppannesu ekasattopi parinibbātuṃ na sakkoti, tadāpi ‘‘tucchā nibbānadhātū’’ti na sakkā vattuṃ. Buddhakāle ca pana ekekasmiṃ samāgame asaṅkhyeyyāpi sattā amataṃ ārādhenti, tadāpi na sakkā vattuṃ – ‘‘pūrā nibbānadhātū’’ti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. பஹாராத³ஸுத்தங் • 9. Pahārādasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. பஹாராத³ஸுத்தவண்ணனா • 9. Pahārādasuttavaṇṇanā
