| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. பஹாராத³ஸுத்தவண்ணனா
9. Pahārādasuttavaṇṇanā
19. நவமே (உதா³॰ அட்ட²॰ 45; ஸாரத்த²॰ டீ॰ சூளவக்³க³ 3.384) அஸுராதி தே³வா விய ந ஸுரந்தி ந கீளந்தி ந விரோசந்தீதி அஸுரா. ஸுரா நாம தே³வா, தேஸங் படிபக்கா²தி வா அஸுரா, வேபசித்திபஹாராதா³த³யோ . தேஸங் ப⁴வனங் ஸினேருஸ்ஸ ஹெட்டா²பா⁴கே³. தே தத்த² பவிஸந்தா நிக்க²மந்தா ஸினேருபாதே³ மண்ட³பாதீ³னி நிம்மினித்வா கீளந்தா அபி⁴ரமந்தி. ஸா தத்த² தேஸங் அபி⁴ரதி. இமே கு³ணே தி³ஸ்வாதி ஆஹ ‘‘யே தி³ஸ்வா தி³ஸ்வா அஸுரா மஹாஸமுத்³தே³ அபி⁴ரமந்தீ’’தி.
19. Navame (udā. aṭṭha. 45; sārattha. ṭī. cūḷavagga 3.384) asurāti devā viya na suranti na kīḷanti na virocantīti asurā. Surā nāma devā, tesaṃ paṭipakkhāti vā asurā, vepacittipahārādādayo . Tesaṃ bhavanaṃ sinerussa heṭṭhābhāge. Te tattha pavisantā nikkhamantā sinerupāde maṇḍapādīni nimminitvā kīḷantā abhiramanti. Sā tattha tesaṃ abhirati. Ime guṇe disvāti āha ‘‘ye disvā disvā asurā mahāsamudde abhiramantī’’ti.
யஸ்மா லோகியா ஜம்பு³தீ³போ, ஹிமவா தத்த² பதிட்டி²தஸமுத்³த³த³ஹபப்³ப³தா தப்பப⁴வா நதி³யோதி ஏதேஸு யங் யங் ந மனுஸ்ஸகோ³சரங், தத்த² ஸயங் ஸம்மூள்ஹா அஞ்ஞேபி ஸம்மோஹயந்தி, தஸ்மா தத்த² ஸம்மோஹவித⁴மனத்த²ங் ‘‘அயங் தாவ ஜம்பு³தீ³போ’’திஆதி³ ஆரத்³த⁴ங். த³ஸஸஹஸ்ஸயோஜனபரிமாணோ ஆயாமதோ வித்தா²ரதோ சாதி அதி⁴ப்பாயோ. தேனாஹ ‘‘தத்தா²’’திஆதி³. உத³கேன அஜ்ஜொ²த்த²டோ தது³பபோ⁴கி³ஸத்தானங் புஞ்ஞக்க²யேன. ஸுந்த³ரத³ஸ்ஸனங் கூடந்தி ஸுத³ஸ்ஸனகூடங், யங் லோகே ‘‘ஹேமகூட’’ந்தி வுச்சதி. மூலக³ந்தோ⁴ காலானுஸாரியாதி³. ஸாரக³ந்தோ⁴ சந்த³னாதி³. பெ²க்³கு³க³ந்தோ⁴ ஸலலாதி³. தசக³ந்தோ⁴ லவங்கா³தி³. பபடிகாக³ந்தோ⁴ கபித்தா²தி³. ரஸக³ந்தோ⁴ ஸஜ்ஜுலஸாதி³. பத்தக³ந்தோ⁴ தமாலஹிரிவேராதி³. புப்ப²க³ந்தோ⁴ நாக³குஸுமாதி³. ப²லக³ந்தோ⁴ ஜாதிப²லாதி³. க³ந்த⁴க³ந்தோ⁴ ஸப்³பே³ஸங் க³ந்தா⁴னங் க³ந்தோ⁴. ‘‘ஸப்³பா³னி புது²லதோ பஞ்ஞாஸ யோஜனானி, ஆயாமதோ பன உப்³பே³த⁴தோ விய த்³வியோஜனஸதானேவா’’தி வத³ந்தி.
Yasmā lokiyā jambudīpo, himavā tattha patiṭṭhitasamuddadahapabbatā tappabhavā nadiyoti etesu yaṃ yaṃ na manussagocaraṃ, tattha sayaṃ sammūḷhā aññepi sammohayanti, tasmā tattha sammohavidhamanatthaṃ ‘‘ayaṃ tāva jambudīpo’’tiādi āraddhaṃ. Dasasahassayojanaparimāṇo āyāmato vitthārato cāti adhippāyo. Tenāha ‘‘tatthā’’tiādi. Udakena ajjhotthaṭo tadupabhogisattānaṃ puññakkhayena. Sundaradassanaṃ kūṭanti sudassanakūṭaṃ, yaṃ loke ‘‘hemakūṭa’’nti vuccati. Mūlagandho kālānusāriyādi. Sāragandho candanādi. Pheggugandho salalādi. Tacagandho lavaṅgādi. Papaṭikāgandho kapitthādi. Rasagandho sajjulasādi. Pattagandho tamālahiriverādi. Pupphagandho nāgakusumādi. Phalagandho jātiphalādi. Gandhagandho sabbesaṃ gandhānaṃ gandho. ‘‘Sabbāni puthulato paññāsa yojanāni, āyāmato pana ubbedhato viya dviyojanasatānevā’’ti vadanti.
மனோஹரஸிலாதலானீதி ரதனமயத்தா மனுஞ்ஞஸோபானஸிலாதலானி. ஸுபடியத்தானீதி தது³பபோ⁴கி³ஸத்தானங் ஸாதா⁴ரணகம்முனாவ ஸுட்டு² படியத்தானி ஸுஸண்டி²தானி ஹொந்தி. மச்ச²கச்ச²பாதீ³னி உத³கங் மலங் கரொந்தி, தத³பா⁴வதோ ப²லிகஸதி³ஸனிம்மலோத³கானி. திரியதோ தீ³க⁴ங் உக்³க³தகூடந்தி ‘‘திரச்சா²னபப்³ப³த’’ந்தி ஆஹ. புரிமானி நாமகொ³த்தானீதி எத்த² நதீ³ நின்னகா³திஆதி³கங் கொ³த்தங், க³ங்கா³ யமுனாதிஆதி³கங் நாமங்.
Manoharasilātalānīti ratanamayattā manuññasopānasilātalāni. Supaṭiyattānīti tadupabhogisattānaṃ sādhāraṇakammunāva suṭṭhu paṭiyattāni susaṇṭhitāni honti. Macchakacchapādīni udakaṃ malaṃ karonti, tadabhāvato phalikasadisanimmalodakāni. Tiriyato dīghaṃ uggatakūṭanti ‘‘tiracchānapabbata’’nti āha. Purimāni nāmagottānīti ettha nadī ninnagātiādikaṃ gottaṃ, gaṅgā yamunātiādikaṃ nāmaṃ.
ஸவமானாதி ஸந்த³மானா. பூரத்தந்தி புண்ணபா⁴வோ. மஸாரக³ல்லங் ‘‘சித்தப²லிக’’ந்திபி வத³ந்தி. மஹதங் பூ⁴தானந்தி மஹந்தானங் ஸத்தானங். திமீ திமிங்க³லா திமிதிமிங்க³லாதி திஸ்ஸோ மச்ச²ஜாதியோ. திமிங் கி³லனஸமத்தா² திமிங்க³லா. திமிஞ்ச திமிங்க³லஞ்ச கி³லனஸமத்தா² திமிதிமிங்க³லாதி வத³ந்தி.
Savamānāti sandamānā. Pūrattanti puṇṇabhāvo. Masāragallaṃ ‘‘cittaphalika’’ntipi vadanti. Mahataṃ bhūtānanti mahantānaṃ sattānaṃ. Timī timiṅgalā timitimiṅgalāti tisso macchajātiyo. Timiṃ gilanasamatthā timiṅgalā. Timiñca timiṅgalañca gilanasamatthā timitimiṅgalāti vadanti.
மம ஸாவகாதி ஸோதாபன்னாதி³கே அரியபுக்³க³லே ஸந்தா⁴ய வத³தி. ந ஸங்வஸதீதி உபோஸத²கம்மாதி³வஸேன ஸங்வாஸங் ந கரோதி. உக்கி²பதீதி அபனேதி. விமுத்திரஸோதி கிலேஸேஹி விமுச்சனரஸோ. ஸப்³பா³ ஹி ஸாஸனஸம்பத்தி யாவதே³வ அனுபாதா³ய ஆஸவேஹி சித்தஸ்ஸ விமுத்திஅத்தா².
Mamasāvakāti sotāpannādike ariyapuggale sandhāya vadati. Na saṃvasatīti uposathakammādivasena saṃvāsaṃ na karoti. Ukkhipatīti apaneti. Vimuttirasoti kilesehi vimuccanaraso. Sabbā hi sāsanasampatti yāvadeva anupādāya āsavehi cittassa vimuttiatthā.
ரதனானீதி ரதிஜனநட்டே²ன ரதனானி. ஸதிபட்டா²னாத³யோ ஹி பா⁴வியமானா புப்³ப³பா⁴கே³பி அனப்பகங் பீதிபாமோஜ்ஜங் நிப்³ப³த்தெந்தி, பகே³வ அபரபா⁴கே³. வுத்தஞ்ஹேதங் –
Ratanānīti ratijananaṭṭhena ratanāni. Satipaṭṭhānādayo hi bhāviyamānā pubbabhāgepi anappakaṃ pītipāmojjaṃ nibbattenti, pageva aparabhāge. Vuttañhetaṃ –
‘‘யதோ யதோ ஸம்மஸதி, க²ந்தா⁴னங் உத³யப்³ப³யங்;
‘‘Yato yato sammasati, khandhānaṃ udayabbayaṃ;
லப⁴தீ பீதிபாமோஜ்ஜங், அமதங் தங் விஜானத’’ந்தி. (த⁴॰ ப॰ 374) –
Labhatī pītipāmojjaṃ, amataṃ taṃ vijānata’’nti. (dha. pa. 374) –
லோகியரதனநிப்³ப³த்தங் பன பீதிபாமோஜ்ஜங் ந தஸ்ஸ கலபா⁴க³ம்பி அக்³க⁴தி. அபிச –
Lokiyaratananibbattaṃ pana pītipāmojjaṃ na tassa kalabhāgampi agghati. Apica –
‘‘சித்தீகதங் மஹக்³க⁴ஞ்ச, அதுலங் து³ல்லப⁴த³ஸ்ஸனங்;
‘‘Cittīkataṃ mahagghañca, atulaṃ dullabhadassanaṃ;
அனோமஸத்தபரிபோ⁴க³ங், ரதனந்தி பவுச்சதி’’. (தீ³॰ நி॰ அட்ட²॰ 2.33; ஸங்॰ நி॰ அட்ட²॰ 3.5.223; கு²॰ பா॰ அட்ட²॰ 6.3; ஸு॰ நி॰ அட்ட²॰ 1.226; மஹானி॰ அட்ட²॰ 50);
Anomasattaparibhogaṃ, ratananti pavuccati’’. (dī. ni. aṭṭha. 2.33; saṃ. ni. aṭṭha. 3.5.223; khu. pā. aṭṭha. 6.3; su. ni. aṭṭha. 1.226; mahāni. aṭṭha. 50);
யதி³ ச சித்தீகதாதி³பா⁴வேன ரதனங் நாம ஹோதி, ஸதிபட்டா²னாதீ³னங்யேவ பூ⁴ததோ ரதனபா⁴வோ. போ³தி⁴பக்கி²யத⁴ம்மானஞ்ஹி ஸோ ஆனுபா⁴வோ, யங் ஸாவகா ஸாவகபாரமிஞாணங், பச்சேகபு³த்³தா⁴ பச்சேகபோ³தி⁴ஞாணங், ஸம்மாஸம்பு³த்³தா⁴ ஸம்மாஸம்போ³தி⁴ங் அதி⁴க³ச்ச²ந்தி ஆஸன்னகாரணத்தா. ஆஸன்னகாரணஞ்ஹி தா³னாதி³உபனிஸ்ஸயோதி ஏவங் ரதிஜனநட்டே²ன சித்தீகதாதி³அத்தே²ன ச ரதனபா⁴வோ போ³தி⁴பக்கி²யத⁴ம்மானங் ஸாதிஸயோ. தேன வுத்தங் ‘‘தத்ரிமானி ரதனானி, ஸெய்யதி²த³ங். சத்தாரோ ஸதிபட்டா²னா’’திஆதி³.
Yadi ca cittīkatādibhāvena ratanaṃ nāma hoti, satipaṭṭhānādīnaṃyeva bhūtato ratanabhāvo. Bodhipakkhiyadhammānañhi so ānubhāvo, yaṃ sāvakā sāvakapāramiñāṇaṃ, paccekabuddhā paccekabodhiñāṇaṃ, sammāsambuddhā sammāsambodhiṃ adhigacchanti āsannakāraṇattā. Āsannakāraṇañhi dānādiupanissayoti evaṃ ratijananaṭṭhena cittīkatādiatthena ca ratanabhāvo bodhipakkhiyadhammānaṃ sātisayo. Tena vuttaṃ ‘‘tatrimāni ratanāni, seyyathidaṃ. Cattāro satipaṭṭhānā’’tiādi.
தத்த² ஆரம்மணே ஓக்கந்தித்வா உபட்டா²னட்டே²ன உபட்டா²னங், ஸதியேவ உபட்டா²னந்தி ஸதிபட்டா²னங். ஆரம்மணஸ்ஸ பன காயாதி³வஸேன சதுப்³பி³த⁴த்தா வுத்தங் ‘‘சத்தாரோ ஸதிபட்டா²னா’’தி. ததா² ஹி காயவேத³னாசித்தத⁴ம்மேஸு ஸுப⁴ஸுக²னிச்சஅத்தஸஞ்ஞானங் பஹானதோ அஸுப⁴து³க்கா²னிச்சானத்தபா⁴வக்³க³ஹணதோ ச நேஸங் காயானுபஸ்ஸனாதி³பா⁴வோ விப⁴த்தோ.
Tattha ārammaṇe okkantitvā upaṭṭhānaṭṭhena upaṭṭhānaṃ, satiyeva upaṭṭhānanti satipaṭṭhānaṃ. Ārammaṇassa pana kāyādivasena catubbidhattā vuttaṃ ‘‘cattāro satipaṭṭhānā’’ti. Tathā hi kāyavedanācittadhammesu subhasukhaniccaattasaññānaṃ pahānato asubhadukkhāniccānattabhāvaggahaṇato ca nesaṃ kāyānupassanādibhāvo vibhatto.
ஸம்மா பத³ஹந்தி ஏதேன, ஸயங் வா ஸம்மா பத³ஹதி, பஸத்த²ங் ஸுந்த³ரங் வா பத³ஹந்தீதி ஸம்மப்பதா⁴னங், புக்³க³லஸ்ஸ வா ஸம்மதே³வ பதா⁴னபா⁴வகரணதோ ஸம்மப்பதா⁴னங் வீரியஸ்ஸேதங் அதி⁴வசனங். தம்பி அனுப்பன்னுப்பன்னானங் அகுஸலானங் அனுப்பாத³னப்பஹானவஸேன அனுப்பன்னுப்பன்னானங் குஸலானங் த⁴ம்மானங் உப்பாத³னட்டா²பனவஸேன ச சதுகிச்சஸாத⁴கத்தா வுத்தங் ‘‘சத்தாரோ ஸம்மப்பதா⁴னா’’தி.
Sammā padahanti etena, sayaṃ vā sammā padahati, pasatthaṃ sundaraṃ vā padahantīti sammappadhānaṃ, puggalassa vā sammadeva padhānabhāvakaraṇato sammappadhānaṃ vīriyassetaṃ adhivacanaṃ. Tampi anuppannuppannānaṃ akusalānaṃ anuppādanappahānavasena anuppannuppannānaṃ kusalānaṃ dhammānaṃ uppādanaṭṭhāpanavasena ca catukiccasādhakattā vuttaṃ ‘‘cattāro sammappadhānā’’ti.
இஜ்ஜ²தீதி இத்³தி⁴, ஸமிஜ்ஜ²தி நிப்ப²ஜ்ஜதீதி அத்தோ². இஜ்ஜ²ந்தி வா தாய ஸத்தா இத்³தா⁴ வுத்³தா⁴ உக்கங்ஸக³தா ஹொந்தீதி இத்³தி⁴. இதி பட²மேன அத்தே²ன இத்³தி⁴ ஏவ பாதோ³தி இத்³தி⁴பாதோ³, இத்³தி⁴கொட்டா²ஸோதி அத்தோ². து³தியேன அத்தே²ன இத்³தி⁴யா பாதோ³ பதிட்டா² அதி⁴க³முபாயோதி இத்³தி⁴பாதோ³. தேன ஹி உபரூபரிவிஸேஸஸங்கா²தங் இத்³தி⁴ங் பஜ்ஜந்தி பாபுணந்தி. ஸ்வாயங் இத்³தி⁴பாதோ³ யஸ்மா ச²ந்தா³தி³கே சத்தாரோ அதி⁴பதித⁴ம்மே து⁴ரே ஜெட்ட²கே கத்வா நிப்³ப³த்தீயதி, தஸ்மா வுத்தங் ‘‘சத்தாரோ இத்³தி⁴பாதா³’’தி.
Ijjhatīti iddhi, samijjhati nipphajjatīti attho. Ijjhanti vā tāya sattā iddhā vuddhā ukkaṃsagatā hontīti iddhi. Iti paṭhamena atthena iddhi eva pādoti iddhipādo, iddhikoṭṭhāsoti attho. Dutiyena atthena iddhiyā pādo patiṭṭhā adhigamupāyoti iddhipādo. Tena hi uparūparivisesasaṅkhātaṃ iddhiṃ pajjanti pāpuṇanti. Svāyaṃ iddhipādo yasmā chandādike cattāro adhipatidhamme dhure jeṭṭhake katvā nibbattīyati, tasmā vuttaṃ ‘‘cattāro iddhipādā’’ti.
பஞ்சிந்த்³ரியானீதி ஸத்³தா⁴தீ³னி பஞ்ச இந்த்³ரியானி. தத்த² அஸ்ஸத்³தி⁴யங் அபி⁴ப⁴வித்வா அதி⁴மொக்க²லக்க²ணே இந்த³ட்ட²ங் காரேதீதி ஸத்³தி⁴ந்த்³ரியங். கோஸஜ்ஜங் அபி⁴ப⁴வித்வா பக்³க³ஹலக்க²ணே, பமாத³ங் அபி⁴ப⁴வித்வா உபட்டா²னலக்க²ணே, விக்கே²பங் அபி⁴ப⁴வித்வா அவிக்கே²பலக்க²ணே, அஞ்ஞாணங் அபி⁴ப⁴வித்வா த³ஸ்ஸனலக்க²ணே இந்த³ட்ட²ங் காரேதீதி பஞ்ஞிந்த்³ரியங்.
Pañcindriyānīti saddhādīni pañca indriyāni. Tattha assaddhiyaṃ abhibhavitvā adhimokkhalakkhaṇe indaṭṭhaṃ kāretīti saddhindriyaṃ. Kosajjaṃ abhibhavitvā paggahalakkhaṇe, pamādaṃ abhibhavitvā upaṭṭhānalakkhaṇe, vikkhepaṃ abhibhavitvā avikkhepalakkhaṇe, aññāṇaṃ abhibhavitvā dassanalakkhaṇe indaṭṭhaṃ kāretīti paññindriyaṃ.
தானியேவ அஸ்ஸத்³தி⁴யாதீ³ஹி அனபி⁴ப⁴வனீயதோ அகம்பியட்டே²ன ஸம்பயுத்தத⁴ம்மேஸு தி²ரபா⁴வேன ச ப³லானி வேதி³தப்³பா³னி.
Tāniyeva assaddhiyādīhi anabhibhavanīyato akampiyaṭṭhena sampayuttadhammesu thirabhāvena ca balāni veditabbāni.
ஸத்த பொ³ஜ்ஜ²ங்கா³தி போ³தி⁴யா, போ³தி⁴ஸ்ஸ வா அங்கா³தி பொ³ஜ்ஜ²ங்கா³. யா ஹி ஏஸா த⁴ம்மஸாமக்³கீ³ யாய லோகுத்தரமக்³க³க்க²ணே உப்பஜ்ஜமானாய லீனுத்³த⁴ச்சபதிட்டா²னாயூஹனகாமஸுக²த்தகிலமதா²னுயோக³உச்சே²த³ஸஸ்ஸதாபி⁴னிவேஸாதீ³னங் அனேகேஸங் உபத்³த³வானங் படிபக்க²பூ⁴தாய ஸதித⁴ம்மவிசயவீரியபீதிபஸ்ஸத்³தி⁴ஸமாதி⁴உபெக்கா²ஸங்கா²தாய த⁴ம்மஸாமக்³கி³யா அரியஸாவகோ பு³ஜ்ஜ²தி, கிலேஸனித்³தா³ய வுட்ட²ஹதி, சத்தாரி அரியஸச்சானி படிவிஜ்ஜ²தி, நிப்³பா³னமேவ வா ஸச்சி²கரோதீதி ‘‘போ³தீ⁴’’தி வுச்சதி. தஸ்ஸா த⁴ம்மஸாமக்³கி³ஸங்கா²தாய போ³தி⁴யா அங்கா³திபி பொ³ஜ்ஜ²ங்கா³ ஜா²னங்க³மக்³க³ங்கா³த³யோ விய. யோபேஸ வுத்தப்பகாராய த⁴ம்மஸாமக்³கி³யா பு³ஜ்ஜ²தீதி கத்வா அரியஸாவகோ ‘‘போ³தீ⁴’’தி வுச்சதி. தஸ்ஸ போ³தி⁴ஸ்ஸ அங்கா³திபி பொ³ஜ்ஜ²ங்கா³ ஸேனங்க³ரத²ங்கா³த³யோ விய. தேனாஹு போராணா ‘‘பு³ஜ்ஜ²னகஸ்ஸ புக்³க³லஸ்ஸ அங்கா³தி பொ³ஜ்ஜ²ங்கா³’’தி (விப⁴॰ அட்ட²॰ 466; ஸங்॰ நி॰ அட்ட²॰ 3.5.182; படி॰ ம॰ அட்ட²॰ 2.2.17). ‘‘போ³தா⁴ய ஸங்வத்தந்தீதி பொ³ஜ்ஜ²ங்கா³’’திஆதி³னா (படி॰ ம॰ 2.17) நயேனபி பொ³ஜ்ஜ²ங்க³த்தோ² வேதி³தப்³போ³.
Satta bojjhaṅgāti bodhiyā, bodhissa vā aṅgāti bojjhaṅgā. Yā hi esā dhammasāmaggī yāya lokuttaramaggakkhaṇe uppajjamānāya līnuddhaccapatiṭṭhānāyūhanakāmasukhattakilamathānuyogaucchedasassatābhinivesādīnaṃ anekesaṃ upaddavānaṃ paṭipakkhabhūtāya satidhammavicayavīriyapītipassaddhisamādhiupekkhāsaṅkhātāya dhammasāmaggiyā ariyasāvako bujjhati, kilesaniddāya vuṭṭhahati, cattāri ariyasaccāni paṭivijjhati, nibbānameva vā sacchikarotīti ‘‘bodhī’’ti vuccati. Tassā dhammasāmaggisaṅkhātāya bodhiyā aṅgātipi bojjhaṅgā jhānaṅgamaggaṅgādayo viya. Yopesa vuttappakārāya dhammasāmaggiyā bujjhatīti katvā ariyasāvako ‘‘bodhī’’ti vuccati. Tassa bodhissa aṅgātipi bojjhaṅgā senaṅgarathaṅgādayo viya. Tenāhu porāṇā ‘‘bujjhanakassa puggalassa aṅgāti bojjhaṅgā’’ti (vibha. aṭṭha. 466; saṃ. ni. aṭṭha. 3.5.182; paṭi. ma. aṭṭha. 2.2.17). ‘‘Bodhāya saṃvattantīti bojjhaṅgā’’tiādinā (paṭi. ma. 2.17) nayenapi bojjhaṅgattho veditabbo.
அரியோ அட்ட²ங்கி³கோ மக்³கோ³தி தங்தங்மக்³க³வஜ்ஜே²ஹி கிலேஸேஹி ஆரகத்தா, அரியபா⁴வகரத்தா, அரியப²லப்படிலாப⁴கரத்தா ச அரியோ. ஸம்மாதி³ட்டி²ஆதீ³னி அட்ட²ங்கா³னி அஸ்ஸ அத்தி², அட்ட² அங்கா³னியேவ வா அட்ட²ங்கி³கோ. மாரெந்தோ கிலேஸே க³ச்ச²தி நிப்³பா³னத்தி²கேஹி வா மக்³கீ³யதி, ஸயங் வா நிப்³பா³னங் மக்³க³தீதி மக்³கோ³தி ஏவமேதேஸங் ஸதிபட்டா²னாதீ³னங் அத்த²விபா⁴கோ³ வேதி³தப்³போ³.
Ariyoaṭṭhaṅgiko maggoti taṃtaṃmaggavajjhehi kilesehi ārakattā, ariyabhāvakarattā, ariyaphalappaṭilābhakarattā ca ariyo. Sammādiṭṭhiādīni aṭṭhaṅgāni assa atthi, aṭṭha aṅgāniyeva vā aṭṭhaṅgiko. Mārento kilese gacchati nibbānatthikehi vā maggīyati, sayaṃ vā nibbānaṃ maggatīti maggoti evametesaṃ satipaṭṭhānādīnaṃ atthavibhāgo veditabbo.
ஸோதாபன்னோதி மக்³க³ஸங்கா²தங் ஸோதங் ஆபஜ்ஜித்வா பாபுணித்வா டி²தோ, ஸோதாபத்திப²லட்டோ²தி அத்தோ². ஸோதாபத்திப²லஸச்சி²கிரியாய படிபன்னோதி ஸோதாபத்திப²லஸ்ஸ அத்தபச்சக்க²கரணாய படிபஜ்ஜமானோ பட²மமக்³க³ட்டோ², யோ அட்ட²மகோதிபி வுச்சதி. ஸகதா³கா³மீதி ஸகிதே³வ இமங் லோகங் படிஸந்தி⁴க்³க³ஹணவஸேன ஆக³மனஸீலோ து³தியப²லட்டோ². அனாகா³மீதி படிஸந்தி⁴க்³க³ஹணவஸேன காமலோகங் அனாக³மனஸீலோ ததியப²லட்டோ². யோ பன ஸத்³தா⁴னுஸாரீ த⁴ம்மானுஸாரீ ஏகபீ³ஜீதிஏவமாதி³கோ அரியபுக்³க³லவிபா⁴கோ³, ஸோ ஏதேஸங்யேவ பபே⁴தோ³தி. ஸேஸங் வுத்தனயஸதி³ஸமேவ.
Sotāpannoti maggasaṅkhātaṃ sotaṃ āpajjitvā pāpuṇitvā ṭhito, sotāpattiphalaṭṭhoti attho. Sotāpattiphalasacchikiriyāya paṭipannoti sotāpattiphalassa attapaccakkhakaraṇāya paṭipajjamāno paṭhamamaggaṭṭho, yo aṭṭhamakotipi vuccati. Sakadāgāmīti sakideva imaṃ lokaṃ paṭisandhiggahaṇavasena āgamanasīlo dutiyaphalaṭṭho. Anāgāmīti paṭisandhiggahaṇavasena kāmalokaṃ anāgamanasīlo tatiyaphalaṭṭho. Yo pana saddhānusārī dhammānusārī ekabījītievamādiko ariyapuggalavibhāgo, so etesaṃyeva pabhedoti. Sesaṃ vuttanayasadisameva.
பஹாராத³ஸுத்தவண்ணனா நிட்டி²தா.
Pahārādasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. பஹாராத³ஸுத்தங் • 9. Pahārādasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. பஹாராத³ஸுத்தவண்ணனா • 9. Pahārādasuttavaṇṇanā
