| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๔. ปหารสิกฺขาปทํ
4. Pahārasikkhāpadaṃ
๔๔๙. จตุเตฺถ กสฺมา ฉพฺพคฺคิยา สตฺตรสวคฺคิยานํ ปหารํ เทนฺติ, นนุ อการเณน ปหารํ เทนฺตีติ อาห ‘‘อาวุโส’’ติอาทิฯ อิมินา ยถา วทนฺติ, ตถา อกตตฺตา ปหารํ เทนฺตีติ ทเสฺสติฯ
449. Catutthe kasmā chabbaggiyā sattarasavaggiyānaṃ pahāraṃ denti, nanu akāraṇena pahāraṃ dentīti āha ‘‘āvuso’’tiādi. Iminā yathā vadanti, tathā akatattā pahāraṃ dentīti dasseti.
๔๕๑. สเจปีติ เอตฺถ ปิสเทฺทน สเจ อมรติ, กา นาม กถา, ปาจิตฺติยเมวาติ ทเสฺสติฯ ปหาเรนาติ ปหารเหตุนาฯ ยถาติ เยนากาเรนฯ อยนฺติ ภิกฺขุฯ น วิโรจตีติ น โสภติฯ
451.Sacepīti ettha pisaddena sace amarati, kā nāma kathā, pācittiyamevāti dasseti. Pahārenāti pahārahetunā. Yathāti yenākārena. Ayanti bhikkhu. Na virocatīti na sobhati.
๔๕๒. ‘‘อนุปสมฺปนฺนสฺสา’’ติ เอตฺถ อการสฺส อญฺญตฺถํ ทเสฺสตุํ วุตฺตํ ‘‘คหฎฺฐสฺส วา’’ติอาทิฯ ปพฺพชิตสฺส วาติ ปริพฺพาชกสฺส วา สามเณรสฺส วาฯ
452. ‘‘Anupasampannassā’’ti ettha akārassa aññatthaṃ dassetuṃ vuttaṃ ‘‘gahaṭṭhassa vā’’tiādi. Pabbajitassa vāti paribbājakassa vā sāmaṇerassa vā.
๔๕๓. ‘‘เกนจี’’ติ ปทสฺส อตฺถํ ทเสฺสตุํ วุตฺตํ ‘‘มนุเสฺสน วา’’ติอาทิฯ ตโตติ วิเหฐนโต, อิมินา โมกฺขสฺส อปาทานํ ทเสฺสติ, ‘‘อตฺตโน’’ติ อิมินา สมฺพนฺธํ ทเสฺสติฯ ‘‘ปตฺถยมาโน’’ติ อิมินา ‘‘อธิปฺปาโย’’ติ ปทสฺสตฺถํ ทเสฺสติฯ มุคฺคเรน วาติ จตุหตฺถทณฺฑสฺส อเทฺธน ทเณฺฑน วาฯ โสติ โจราทิโกติฯ จตุตฺถํฯ
453. ‘‘Kenacī’’ti padassa atthaṃ dassetuṃ vuttaṃ ‘‘manussena vā’’tiādi. Tatoti viheṭhanato, iminā mokkhassa apādānaṃ dasseti, ‘‘attano’’ti iminā sambandhaṃ dasseti. ‘‘Patthayamāno’’ti iminā ‘‘adhippāyo’’ti padassatthaṃ dasseti. Muggarena vāti catuhatthadaṇḍassa addhena daṇḍena vā. Soti corādikoti. Catutthaṃ.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวิภงฺค • Mahāvibhaṅga / ๘. สหธมฺมิกวโคฺค • 8. Sahadhammikavaggo
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวิภงฺค-อฎฺฐกถา • Mahāvibhaṅga-aṭṭhakathā / ๔. ปหารสิกฺขาปทวณฺณนา • 4. Pahārasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ๔. ปหารสิกฺขาปทวณฺณนา • 4. Pahārasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ๔. ปหารสิกฺขาปทวณฺณนา • 4. Pahārasikkhāpadavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ๔. ปหารสิกฺขาปทวณฺณนา • 4. Pahārasikkhāpadavaṇṇanā
