| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৪. পহারসিক্খাপদৰণ্ণনা
4. Pahārasikkhāpadavaṇṇanā
৪৪৯. চতুত্থে – পহারং দেন্তীতি ‘‘আৰুসো পীঠকং পঞ্ঞপেথ, পাদধোৰনং আহরথা’’তিআদীনি ৰত্ৰা তথা অকরোন্তানং পহারং দেন্তি।
449. Catutthe – pahāraṃ dentīti ‘‘āvuso pīṭhakaṃ paññapetha, pādadhovanaṃ āharathā’’tiādīni vatvā tathā akarontānaṃ pahāraṃ denti.
৪৫১. পহারং দেতি আপত্তি পাচিত্তিযস্সাতি এত্থ পহরিতুকামতায পহারে দিন্নে সচেপি মরতি পাচিত্তিযমেৰ। পহারেন হত্থো ৰা পাদো ৰা ভিজ্জতি, সীসং ৰা ভিন্নং হোতি, পাচিত্তিযমেৰ। ‘‘যথাযং সঙ্ঘমজ্ঝে ন ৰিরোচতি, তথা নং করোমী’’তি এৰং ৰিরূপকরণাধিপ্পাযেন কণ্ণং ৰা নাসং ৰা ছিন্দতি, দুক্কটং।
451.Pahāraṃ deti āpatti pācittiyassāti ettha paharitukāmatāya pahāre dinne sacepi marati pācittiyameva. Pahārena hattho vā pādo vā bhijjati, sīsaṃ vā bhinnaṃ hoti, pācittiyameva. ‘‘Yathāyaṃ saṅghamajjhe na virocati, tathā naṃ karomī’’ti evaṃ virūpakaraṇādhippāyena kaṇṇaṃ vā nāsaṃ vā chindati, dukkaṭaṃ.
৪৫২. অনুপসম্পন্নস্সাতি গহট্ঠস্স ৰা পব্বজিতস্স ৰা ইত্থিযা ৰা পুরিসস্স ৰা অন্তমসো তিরচ্ছানগতস্সাপি পহারং দেতি, দুক্কটং। সচে পন রত্তচিত্তো ইত্থিং পহরতি, সঙ্ঘাদিসেসো।
452.Anupasampannassāti gahaṭṭhassa vā pabbajitassa vā itthiyā vā purisassa vā antamaso tiracchānagatassāpi pahāraṃ deti, dukkaṭaṃ. Sace pana rattacitto itthiṃ paharati, saṅghādiseso.
৪৫৩. কেনচি ৰিহেঠিযমানোতি মনুস্সেন ৰা তিরচ্ছানগতেন ৰা ৰিহেঠিযমানো। মোক্খাধিপ্পাযোতি ততো অত্তনো মোক্খং পত্থযমানো। পহারং দেতীতি কাযকাযপটিবদ্ধনিস্সগ্গিযানং অঞ্ঞতরেন পহারং দেতি, অনাপত্তি। সচেপি অন্তরামগ্গে চোরং ৰা পচ্চত্থিকং ৰা ৰিহেঠেতুকামং দিস্ৰা ‘‘উপাসক, এত্থেৰ তিট্ঠ, মা আগমী’’তি ৰত্ৰা ৰচনং অনাদিযিত্ৰা আগচ্ছন্তং ‘‘গচ্ছ রে’’তি মুগ্গরেন ৰা সত্থকেন ৰা পহরিত্ৰা যাতি, সো চে তেন পহারেন মরতি, অনাপত্তিযেৰ। ৰাল়মিগেসুপি এসেৰ নযো। সেসমেত্থ উত্তানমেৰ। সমুট্ঠানাদীনি পনস্স পঠমপারাজিকসদিসানি, ইদং পন দুক্খৰেদনন্তি।
453.Kenaciviheṭhiyamānoti manussena vā tiracchānagatena vā viheṭhiyamāno. Mokkhādhippāyoti tato attano mokkhaṃ patthayamāno. Pahāraṃ detīti kāyakāyapaṭibaddhanissaggiyānaṃ aññatarena pahāraṃ deti, anāpatti. Sacepi antarāmagge coraṃ vā paccatthikaṃ vā viheṭhetukāmaṃ disvā ‘‘upāsaka, ettheva tiṭṭha, mā āgamī’’ti vatvā vacanaṃ anādiyitvā āgacchantaṃ ‘‘gaccha re’’ti muggarena vā satthakena vā paharitvā yāti, so ce tena pahārena marati, anāpattiyeva. Vāḷamigesupi eseva nayo. Sesamettha uttānameva. Samuṭṭhānādīni panassa paṭhamapārājikasadisāni, idaṃ pana dukkhavedananti.
পহারসিক্খাপদং চতুত্থং।
Pahārasikkhāpadaṃ catutthaṃ.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৮. সহধম্মিকৰগ্গো • 8. Sahadhammikavaggo
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৪. পহারসিক্খাপদৰণ্ণনা • 4. Pahārasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৪. পহারসিক্খাপদৰণ্ণনা • 4. Pahārasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৪. পহারসিক্খাপদৰণ্ণনা • 4. Pahārasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪. পহারসিক্খাপদং • 4. Pahārasikkhāpadaṃ
