| Library / Tipiṭaka / তিপিটক • Tipiṭaka / কঙ্খাৰিতরণী-অভিনৰ-টীকা • Kaṅkhāvitaraṇī-abhinava-ṭīkā |
৪. পহারসিক্খাপদৰণ্ণনা
4. Pahārasikkhāpadavaṇṇanā
পহারং দদেয্যাতি অন্তমসো উপ্পলপত্তং উপাদায কাযকাযপ্পটিবদ্ধনিস্সগ্গিযানং অঞ্ঞতরেন পহারং দদেয্য। এৰং পন পহারে দিন্নে হত্থো ৰা ভিজ্জতু, পাদো ৰা সীসং ৰা, মরতু ৰা, পাচিত্তিযমেৰ। তেনাহ ‘‘পহরিতুকামতাযা’’তিআদি।
Pahāraṃ dadeyyāti antamaso uppalapattaṃ upādāya kāyakāyappaṭibaddhanissaggiyānaṃ aññatarena pahāraṃ dadeyya. Evaṃ pana pahāre dinne hattho vā bhijjatu, pādo vā sīsaṃ vā, maratu vā, pācittiyameva. Tenāha ‘‘paharitukāmatāyā’’tiādi.
অনুপসম্পন্নেতি গহট্ঠে ৰা পব্বজিতে ৰা ইত্থিযা ৰা পুরিসে ৰা অন্তমসো তিরচ্ছানগতেপি। সচে পন রত্তচিত্তো ইত্থিং পহরতি, সঙ্ঘাদিসেসো। কেনচি ৰিহেঠিযমানস্সাতি মনুস্সেন ৰা তিরচ্ছানগতেন ৰা ৰিহেঠিযমানস্স। মোক্খাধিপ্পাযস্সাতি ততো অত্তনো মোক্খং পত্থযমানস্স। সচেপি অন্তরামগ্গে (পাচি॰ অট্ঠ॰ ৪৫৩) চোরং ৰা পচ্চত্থিকং ৰা ৰিহেঠেতুকামং দিস্ৰা ‘‘উপাসক, এত্থেৰ তিট্ঠ, মা আগমিত্থা’’তি ৰত্ৰা ৰচনং অনাদিযিত্ৰা আগচ্ছন্তং ‘‘গচ্ছ রে’’তি মুগ্গরেন ৰা সত্থকেন ৰা পহরিত্ৰা যাতি, সো চে তেন পহারেন মরতি, অনাপত্তিযেৰ। ৰাল়মিগেসুপি এসেৰ নযো।
Anupasampanneti gahaṭṭhe vā pabbajite vā itthiyā vā purise vā antamaso tiracchānagatepi. Sace pana rattacitto itthiṃ paharati, saṅghādiseso. Kenaci viheṭhiyamānassāti manussena vā tiracchānagatena vā viheṭhiyamānassa. Mokkhādhippāyassāti tato attano mokkhaṃ patthayamānassa. Sacepi antarāmagge (pāci. aṭṭha. 453) coraṃ vā paccatthikaṃ vā viheṭhetukāmaṃ disvā ‘‘upāsaka, ettheva tiṭṭha, mā āgamitthā’’ti vatvā vacanaṃ anādiyitvā āgacchantaṃ ‘‘gaccha re’’ti muggarena vā satthakena vā paharitvā yāti, so ce tena pahārena marati, anāpattiyeva. Vāḷamigesupi eseva nayo.
পহারসিক্খাপদৰণ্ণনা নিট্ঠিতা।
Pahārasikkhāpadavaṇṇanā niṭṭhitā.
