| Library / Tipiṭaka / තිපිටක • Tipiṭaka / මහාවිභඞ්‌ග-අට්‌ඨකථා • Mahāvibhaṅga-aṭṭhakathā |
4. පහාරසික්‌ඛාපදවණ්‌ණනා
4. Pahārasikkhāpadavaṇṇanā
449. චතුත්‌ථෙ – පහාරං දෙන්‌තීති ‘‘ආවුසො පීඨකං පඤ්‌ඤපෙථ, පාදධොවනං ආහරථා’’තිආදීනි වත්‌වා තථා අකරොන්‌තානං පහාරං දෙන්‌ති.
449. Catutthe – pahāraṃ dentīti ‘‘āvuso pīṭhakaṃ paññapetha, pādadhovanaṃ āharathā’’tiādīni vatvā tathā akarontānaṃ pahāraṃ denti.
451. පහාරං දෙති ආපත්‌ති පාචිත්‌තියස්‌සාති එත්‌ථ පහරිතුකාමතාය පහාරෙ දින්‌නෙ සචෙපි මරති පාචිත්‌තියමෙව. පහාරෙන හත්‌ථො වා පාදො වා භිජ්‌ජති, සීසං වා භින්‌නං හොති, පාචිත්‌තියමෙව. ‘‘යථායං සඞ්‌ඝමජ්‌ඣෙ න විරොචති, තථා නං කරොමී’’ති එවං විරූපකරණාධිප්‌පායෙන කණ්‌ණං වා නාසං වා ඡින්‌දති, දුක්‌කටං.
451.Pahāraṃ deti āpatti pācittiyassāti ettha paharitukāmatāya pahāre dinne sacepi marati pācittiyameva. Pahārena hattho vā pādo vā bhijjati, sīsaṃ vā bhinnaṃ hoti, pācittiyameva. ‘‘Yathāyaṃ saṅghamajjhe na virocati, tathā naṃ karomī’’ti evaṃ virūpakaraṇādhippāyena kaṇṇaṃ vā nāsaṃ vā chindati, dukkaṭaṃ.
452. අනුපසම්‌පන්‌නස්‌සාති ගහට්‌ඨස්‌ස වා පබ්‌බජිතස්‌ස වා ඉත්‌ථියා වා පුරිසස්‌ස වා අන්‌තමසො තිරච්‌ඡානගතස්‌සාපි පහාරං දෙති, දුක්‌කටං. සචෙ පන රත්‌තචිත්‌තො ඉත්‌ථිං පහරති, සඞ්‌ඝාදිසෙසො.
452.Anupasampannassāti gahaṭṭhassa vā pabbajitassa vā itthiyā vā purisassa vā antamaso tiracchānagatassāpi pahāraṃ deti, dukkaṭaṃ. Sace pana rattacitto itthiṃ paharati, saṅghādiseso.
453. කෙනචි විහෙඨියමානොති මනුස්‌සෙන වා තිරච්‌ඡානගතෙන වා විහෙඨියමානො. මොක්‌ඛාධිප්‌පායොති තතො අත්‌තනො මොක්‌ඛං පත්‌ථයමානො. පහාරං දෙතීති කායකායපටිබද්‌ධනිස්‌සග්‌ගියානං අඤ්‌ඤතරෙන පහාරං දෙති, අනාපත්‌ති. සචෙපි අන්‌තරාමග්‌ගෙ චොරං වා පච්‌චත්‌ථිකං වා විහෙඨෙතුකාමං දිස්‌වා ‘‘උපාසක, එත්‌ථෙව තිට්‌ඨ, මා ආගමී’’ති වත්‌වා වචනං අනාදියිත්‌වා ආගච්‌ඡන්‌තං ‘‘ගච්‌ඡ රෙ’’ති මුග්‌ගරෙන වා සත්‌ථකෙන වා පහරිත්‌වා යාති, සො චෙ තෙන පහාරෙන මරති, අනාපත්‌තියෙව. වාළමිගෙසුපි එසෙව නයො. සෙසමෙත්‌ථ උත්‌තානමෙව. සමුට්‌ඨානාදීනි පනස්‌ස පඨමපාරාජිකසදිසානි, ඉදං පන දුක්‌ඛවෙදනන්‌ති.
453.Kenaciviheṭhiyamānoti manussena vā tiracchānagatena vā viheṭhiyamāno. Mokkhādhippāyoti tato attano mokkhaṃ patthayamāno. Pahāraṃ detīti kāyakāyapaṭibaddhanissaggiyānaṃ aññatarena pahāraṃ deti, anāpatti. Sacepi antarāmagge coraṃ vā paccatthikaṃ vā viheṭhetukāmaṃ disvā ‘‘upāsaka, ettheva tiṭṭha, mā āgamī’’ti vatvā vacanaṃ anādiyitvā āgacchantaṃ ‘‘gaccha re’’ti muggarena vā satthakena vā paharitvā yāti, so ce tena pahārena marati, anāpattiyeva. Vāḷamigesupi eseva nayo. Sesamettha uttānameva. Samuṭṭhānādīni panassa paṭhamapārājikasadisāni, idaṃ pana dukkhavedananti.
පහාරසික්‌ඛාපදං චතුත්‌ථං.
Pahārasikkhāpadaṃ catutthaṃ.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 8. සහධම්‌මිකවග්‌ගො • 8. Sahadhammikavaggo
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 4. පහාරසික්‌ඛාපදවණ්‌ණනා • 4. Pahārasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 4. පහාරසික්‌ඛාපදවණ්‌ණනා • 4. Pahārasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / 4. පහාරසික්‌ඛාපදවණ්‌ණනා • 4. Pahārasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 4. පහාරසික්‌ඛාපදං • 4. Pahārasikkhāpadaṃ
