| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
бахаад̇аб̣б̣анид̣̇д̣̇зсаван̣н̣анаа
Pahātabbaniddesavaṇṇanā
23. бахаад̇аб̣б̣анид̣̇д̣̇зсз асмимаанод̇и руубаад̣̇ийсу бан̃жасу убаад̣̇аанагканд̇хзсу асмийд̇и маано. д̇асмин̃хи бахийнз арахад̇д̇ам̣ бад̇д̇ам̣ ход̇и. руубарааг̇аад̣̇ийсу виж̇ж̇амаанзсуби сзсаани авад̇ваа асмимаанассзва важанам̣ д̣̇идтибад̇ируубагад̇д̇зна д̇асса ол̣ааригад̇д̇аад̇и взд̣̇ид̇аб̣б̣ам̣. авиж̇ж̇аад̇и суд̇д̇анд̇абарияааязна д̣̇угкаад̣̇ийсу жад̇уусу таанзсу ан̃н̃аан̣ам̣, абхид̇хаммабарияааязна буб̣б̣анд̇аад̣̇ийхи сад̣̇д̇хим̣ адтасу. вуд̇д̇ан̃хзд̇ам̣ –
23. Pahātabbaniddese asmimānoti rūpādīsu pañcasu upādānakkhandhesu asmīti māno. Tasmiñhi pahīne arahattaṃ pattaṃ hoti. Rūparāgādīsu vijjamānesupi sesāni avatvā asmimānasseva vacanaṃ diṭṭhipatirūpakattena tassa oḷārikattāti veditabbaṃ. Avijjāti suttantapariyāyena dukkhādīsu catūsu ṭhānesu aññāṇaṃ, abhidhammapariyāyena pubbantādīhi saddhiṃ aṭṭhasu. Vuttañhetaṃ –
‘‘д̇ад̇т̇а гад̇амаа авиж̇ж̇аа? д̣̇угкз ан̃н̃аан̣ам̣, д̣̇угкасамуд̣̇аяз ан̃н̃аан̣ам̣, д̣̇угканирод̇хз ан̃н̃аан̣ам̣, д̣̇угканирод̇хаг̇ааминияаа бадибад̣̇ааяа ан̃н̃аан̣ам̣, буб̣б̣анд̇з ан̃н̃аан̣ам̣, абаранд̇з ан̃н̃аан̣ам̣, буб̣б̣анд̇аабаранд̇з ан̃н̃аан̣ам̣, ид̣̇аббажжаяад̇аабадижжасамуббаннзсу д̇хаммзсу ан̃н̃аан̣а’’нд̇и (д̇ха. са. 1106; вибха. 226).
‘‘Tattha katamā avijjā? Dukkhe aññāṇaṃ, dukkhasamudaye aññāṇaṃ, dukkhanirodhe aññāṇaṃ, dukkhanirodhagāminiyā paṭipadāya aññāṇaṃ, pubbante aññāṇaṃ, aparante aññāṇaṃ, pubbantāparante aññāṇaṃ, idappaccayatāpaṭiccasamuppannesu dhammesu aññāṇa’’nti (dha. sa. 1106; vibha. 226).
бхавад̇ан̣хаад̇и гаамабхаваад̣̇ийсу бхавзсу бад̇т̇анаа. яат̇ааха –
Bhavataṇhāti kāmabhavādīsu bhavesu patthanā. Yathāha –
‘‘д̇ад̇т̇а гад̇амаа бхавад̇ан̣хаа? яо бхавзсу бхаважчанд̣̇о бхаварааг̇о бхавананд̣̇ий бхавад̇ан̣хаа бхавасинзхо бхавабарил̣аахо бхавамужчаа бхаваж̇жхосаана’’нд̇и (вибха. 895).
‘‘Tattha katamā bhavataṇhā? Yo bhavesu bhavacchando bhavarāgo bhavanandī bhavataṇhā bhavasineho bhavapariḷāho bhavamucchā bhavajjhosāna’’nti (vibha. 895).
д̇иссо д̇ан̣хаад̇и гаамад̇ан̣хаа, бхавад̇ан̣хаа, вибхавад̇ан̣хаа. д̇аасам̣ абхид̇хаммз звам̣ нид̣̇д̣̇зсо гад̇о – д̇ад̇т̇а гад̇амаа бхавад̇ан̣хаа? бхавад̣̇идтисахаг̇ад̇о рааг̇о…бз… жид̇д̇асса саарааг̇о, аяам̣ вужжад̇и бхавад̇ан̣хаа. д̇ад̇т̇а гад̇амаа вибхавад̇ан̣хаа? ужчзд̣̇ад̣̇идтисахаг̇ад̇о рааг̇о…бз… жид̇д̇асса саарааг̇о, аяам̣ вужжад̇и вибхавад̇ан̣хаа. авасзсаа д̇ан̣хаа гаамад̇ан̣хаа. д̇ад̇т̇а гад̇амаа гаамад̇ан̣хаа? гаамад̇хаад̇убадисам̣яуд̇д̇о рааг̇о…бз… жид̇д̇асса саарааг̇о, аяам̣ вужжад̇и гаамад̇ан̣хаа. д̇ад̇т̇а гад̇амаа бхавад̇ан̣хаа? руубад̇хаад̇уаруубад̇хаад̇убадисам̣яуд̇д̇о рааг̇о…бз… д̇ад̇т̇а гад̇амаа вибхавад̇ан̣хаа? ужчзд̣̇ад̣̇идтисахаг̇ад̇о рааг̇о…бз… (вибха. 916).
Tisso taṇhāti kāmataṇhā, bhavataṇhā, vibhavataṇhā. Tāsaṃ abhidhamme evaṃ niddeso kato – tattha katamā bhavataṇhā? Bhavadiṭṭhisahagato rāgo…pe… cittassa sārāgo, ayaṃ vuccati bhavataṇhā. Tattha katamā vibhavataṇhā? Ucchedadiṭṭhisahagato rāgo…pe… cittassa sārāgo, ayaṃ vuccati vibhavataṇhā. Avasesā taṇhā kāmataṇhā. Tattha katamā kāmataṇhā? Kāmadhātupaṭisaṃyutto rāgo…pe… cittassa sārāgo, ayaṃ vuccati kāmataṇhā. Tattha katamā bhavataṇhā? Rūpadhātuarūpadhātupaṭisaṃyutto rāgo…pe… tattha katamā vibhavataṇhā? Ucchedadiṭṭhisahagato rāgo…pe… (vibha. 916).
адтагат̇ааяам̣ бана ‘‘бан̃жагаамаг̇ун̣иго рааг̇о гаамад̇ан̣хаа, руубааруубабхавзсу рааг̇о жхаананиганд̇исассад̇ад̣̇идтисахаг̇ад̇о рааг̇о бхававасзна бад̇т̇анаа бхавад̇ан̣хаа, ужчзд̣̇ад̣̇идтисахаг̇ад̇о рааг̇о вибхавад̇ан̣хаа’’д̇и вуд̇д̇ам̣. аяам̣ д̣̇асуд̇д̇арасуд̇д̇абарияааязна яож̇анаа. сан̇г̇ийд̇ибарияааязна бана абхид̇хаммабарияааязна жа ‘‘абарааби д̇иссо д̇ан̣хаа гаамад̇ан̣хаа руубад̇ан̣хаа аруубад̇ан̣хаа. абарааби д̇иссо д̇ан̣хаа руубад̇ан̣хаа аруубад̇ан̣хаа нирод̇хад̇ан̣хаа’’д̇и (д̣̇ий. ни. 3.305; вибха. 917-918) вуд̇д̇аа д̇ан̣хааби зд̇т̇а яуж̇ж̇анд̇и. д̇аасу бан̃жа гаамад̇хаад̇уруубад̇хаад̇уаруубад̇хаад̇убадисам̣яуд̇д̇аа, анд̇имаа ужчзд̣̇ад̣̇идтисахаг̇ад̇аа.
Aṭṭhakathāyaṃ pana ‘‘pañcakāmaguṇiko rāgo kāmataṇhā, rūpārūpabhavesu rāgo jhānanikantisassatadiṭṭhisahagato rāgo bhavavasena patthanā bhavataṇhā, ucchedadiṭṭhisahagato rāgo vibhavataṇhā’’ti vuttaṃ. Ayaṃ dasuttarasuttapariyāyena yojanā. Saṅgītipariyāyena pana abhidhammapariyāyena ca ‘‘aparāpi tisso taṇhā kāmataṇhā rūpataṇhā arūpataṇhā. Aparāpi tisso taṇhā rūpataṇhā arūpataṇhā nirodhataṇhā’’ti (dī. ni. 3.305; vibha. 917-918) vuttā taṇhāpi ettha yujjanti. Tāsu pañca kāmadhāturūpadhātuarūpadhātupaṭisaṃyuttā, antimā ucchedadiṭṭhisahagatā.
жад̇д̇ааро огхаад̇и гаамогхо, бхавогхо, д̣̇идтогхо, авиж̇ж̇огхо. яасса сам̣виж̇ж̇анд̇и, д̇ам̣ ваддасмим̣ охананд̇и осийд̣̇аабзнд̇ийд̇и огхаа. б̣алавагилзсаа зд̇з. гаамаг̇ун̣асан̇каад̇з гаамз огхо гаамогхо. гаамад̇ан̣хааязд̇ам̣ наамам̣. руубааруубасан̇каад̇з гаммад̇о жа убабад̇д̇ид̇о жа д̣̇увид̇хзби бхавз огхо бхавогхо. бхавад̇ан̣хааязд̇ам̣ наамам̣. д̣̇идти зва огхо д̣̇идтогхо. ‘‘сассад̇о лого’’д̇иаад̣̇игааяа д̣̇идтияаа зд̇ам̣ наамам̣. авиж̇ж̇аа зва огхо авиж̇ж̇огхо, д̣̇угкаад̣̇ийсу ан̃н̃аан̣ассзд̇ам̣ наамам̣.
Cattāro oghāti kāmogho, bhavogho, diṭṭhogho, avijjogho. Yassa saṃvijjanti, taṃ vaṭṭasmiṃ ohananti osīdāpentīti oghā. Balavakilesā ete. Kāmaguṇasaṅkhāte kāme ogho kāmogho. Kāmataṇhāyetaṃ nāmaṃ. Rūpārūpasaṅkhāte kammato ca upapattito ca duvidhepi bhave ogho bhavogho. Bhavataṇhāyetaṃ nāmaṃ. Diṭṭhi eva ogho diṭṭhogho. ‘‘Sassato loko’’tiādikāya diṭṭhiyā etaṃ nāmaṃ. Avijjā eva ogho avijjogho, dukkhādīsu aññāṇassetaṃ nāmaṃ.
бан̃жа нийваран̣аанийд̇и гаамажчанд̣̇анийваран̣ам̣ б̣яаабаад̣̇анийваран̣ам̣ т̇инамид̣̇д̇ханийваран̣ам̣ уд̣̇д̇хажжагуггужжанийваран̣ам̣ вижигижчаанийваран̣ам̣. жид̇д̇ам̣ нийваранд̇и барияонанд̇ханд̇ийд̇и нийваран̣аани. гаамийяанд̇ийд̇и гаамаа. бан̃жа гаамаг̇ун̣аа. гаамзсу чанд̣̇о гаамажчанд̣̇о. гаамаяад̇ийд̇и ваа гаамо, гаамо зва чанд̣̇о, на гад̇д̇угамяад̇аачанд̣̇о на д̇хаммажчанд̣̇од̇и гаамажчанд̣̇о. гаамад̇ан̣хааязд̇ам̣ наамам̣. б̣яаабаж̇ж̇ад̇и д̇зна жид̇д̇ам̣ бууд̇ибхаавам̣ г̇ажчад̇и, б̣яаабаад̣̇аяад̇и ваа винаяаажаараруубасамбад̇д̇ихид̇асукаанийд̇и б̣яаабаад̣̇о. д̣̇осассзд̇ам̣ наамам̣. т̇инанад̇аа т̇инам̣, мид̣̇д̇ханад̇аа мид̣̇д̇хам̣, ануссаахасам̣хананад̇аа асад̇д̇ивигхаад̇о жаад̇и ад̇т̇о. жид̇д̇асса ануссаахо т̇инам̣, жзд̇асигаанам̣ агамман̃н̃ад̇аа мид̣̇д̇хам̣, т̇инан̃жа мид̣̇д̇хан̃жа т̇инамид̣̇д̇хам̣. уд̣̇д̇хад̇асса бхааво уд̣̇д̇хажжам̣, авуубасамод̇и ад̇т̇о. вигкзбассзд̇ам̣ наамам̣. гужчид̇ам̣ гад̇ам̣ гугад̇ам̣, гугад̇асса бхааво гуггужжам̣, г̇арахид̇агирияабхаавод̇и ад̇т̇о. бажчаануд̇аабассзд̇ам̣ наамам̣. виг̇ад̇аа жигижчаад̇и вижигижчаа, виг̇ад̇абан̃н̃аад̇и ад̇т̇о. сабхаавам̣ ваа вижинанд̇о зд̇ааяа гижчад̇и гиламад̇ийд̇и вижигижчаа. б̣уд̣̇д̇хаад̣̇ийсу сам̣саяассзд̇ам̣ наамам̣. гаамажчанд̣̇о зва нийваран̣ам̣ гаамажчанд̣̇анийваран̣ам̣. звам̣ сзсзсуби.
Pañca nīvaraṇānīti kāmacchandanīvaraṇaṃ byāpādanīvaraṇaṃ thinamiddhanīvaraṇaṃ uddhaccakukkuccanīvaraṇaṃ vicikicchānīvaraṇaṃ. Cittaṃ nīvaranti pariyonandhantīti nīvaraṇāni. Kāmīyantīti kāmā. Pañca kāmaguṇā. Kāmesu chando kāmacchando. Kāmayatīti vā kāmo, kāmo eva chando, na kattukamyatāchando na dhammacchandoti kāmacchando. Kāmataṇhāyetaṃ nāmaṃ. Byāpajjati tena cittaṃ pūtibhāvaṃ gacchati, byāpādayati vā vinayācārarūpasampattihitasukhānīti byāpādo. Dosassetaṃ nāmaṃ. Thinanatā thinaṃ, middhanatā middhaṃ, anussāhasaṃhananatā asattivighāto cāti attho. Cittassa anussāho thinaṃ, cetasikānaṃ akammaññatā middhaṃ, thinañca middhañca thinamiddhaṃ. Uddhatassa bhāvo uddhaccaṃ, avūpasamoti attho. Vikkhepassetaṃ nāmaṃ. Kucchitaṃ kataṃ kukataṃ, kukatassa bhāvo kukkuccaṃ, garahitakiriyabhāvoti attho. Pacchānutāpassetaṃ nāmaṃ. Vigatā cikicchāti vicikicchā, vigatapaññāti attho. Sabhāvaṃ vā vicinanto etāya kicchati kilamatīti vicikicchā. Buddhādīsu saṃsayassetaṃ nāmaṃ. Kāmacchando eva nīvaraṇaṃ kāmacchandanīvaraṇaṃ. Evaṃ sesesupi.
ча д̇хаммаа, чад̣̇д̇хаммаад̇и ваа баато. ча д̇ан̣хаагааяаад̇и руубад̇ан̣хаа сад̣̇д̣̇ад̇ан̣хаа г̇анд̇хад̇ан̣хаа расад̇ан̣хаа подтаб̣б̣ад̇ан̣хаа д̇хаммад̇ан̣хаа. руубз д̇ан̣хаа руубад̇ан̣хаа. саа зва гаамад̇ан̣хаад̣̇ибхзд̣̇зна анзгабхзд̣̇ад̇д̇аа раасадтзна гааяод̇и вуд̇д̇аа. звам̣ сзсзсуби.
Cha dhammā, chaddhammāti vā pāṭho. Cha taṇhākāyāti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā. Rūpe taṇhā rūpataṇhā. Sā eva kāmataṇhādibhedena anekabhedattā rāsaṭṭhena kāyoti vuttā. Evaṃ sesesupi.
сад̇д̇аанусаяаад̇и гаамарааг̇аанусаяо бадигхаанусаяо маанаанусаяо д̣̇идтаанусаяо вижигижчаанусаяо бхаварааг̇аанусаяо авиж̇ж̇аанусаяо. аббахийнадтзна анусзнд̇ийд̇и анусаяаа. гаамзсу рааг̇о гаамарааг̇о, гаамо зва ваа рааг̇од̇и гаамарааг̇о. аарамман̣асмим̣ бадихан̃н̃ад̇ийд̇и бадигхам̣. аяаат̇аавад̣̇ассанадтзна д̣̇идти. сзяяаад̣̇ивасзна ман̃н̃ад̇ийд̇и маано. бхавзсу рааг̇о бхаварааг̇о. т̇аамаг̇ад̇о гаамарааг̇о гаамарааг̇аанусаяо. звам̣ сзсзсуби.
Sattānusayāti kāmarāgānusayo paṭighānusayo mānānusayo diṭṭhānusayo vicikicchānusayo bhavarāgānusayo avijjānusayo. Appahīnaṭṭhena anusentīti anusayā. Kāmesu rāgo kāmarāgo, kāmo eva vā rāgoti kāmarāgo. Ārammaṇasmiṃ paṭihaññatīti paṭighaṃ. Ayāthāvadassanaṭṭhena diṭṭhi. Seyyādivasena maññatīti māno. Bhavesu rāgo bhavarāgo. Thāmagato kāmarāgo kāmarāgānusayo. Evaṃ sesesupi.
адта мижчад̇д̇аад̇и мижчаад̣̇идти мижчаасан̇габбо мижчааваажаа мижчаагамманд̇о мижчааааж̇ийво мижчаавааяаамо мижчаасад̇и мижчаасамаад̇хи. ‘‘хид̇асукаавахаа мз бхависсанд̇ий’’д̇и звам̣ аасийсид̇ааби д̇ат̇ааабхаавад̇о асубхаад̣̇ийсуязва субханд̇иаад̣̇ивибарийд̇аббавад̇д̇ид̇о жа мижчаасабхааваад̇и мижчад̇д̇аа. мижчаа бассад̇и, мижчаа ваа зд̇ааяа бассанд̇ийд̇и мижчаад̣̇идти. ат̇а ваа вибарийд̇аа д̣̇идтийд̇и мижчаад̣̇идти, аяаат̇аавад̣̇идтийд̇и ваа мижчаад̣̇идти, вираж̇жхид̇ваа г̇ахан̣ад̇о ваа вид̇ат̇аа д̣̇идтийд̇и мижчаад̣̇идти, анад̇д̇аавахад̇д̇аа бан̣д̣ид̇зхи гужчид̇аа д̣̇идтийд̇и ваамижчаад̣̇идти. мижчаасан̇габбаад̣̇ийсуби зсзва наяо. мижчаад̣̇идтийд̇и сассад̇ужчзд̣̇аабхинивзсо. мижчаасан̇габбод̇и гаамавид̇аггаад̣̇ид̇ивид̇хо вид̇агго. мижчааваажаад̇и мусааваад̣̇аад̣̇ижад̇уб̣б̣ид̇хаа жзд̇анаа. мижчаагамманд̇од̇и баан̣аад̇ибаад̇аад̣̇ид̇ивид̇хаа жзд̇анаа. мижчааааж̇ийвод̇и мижчааж̇ийвабаяог̇асамудтаабигаа жзд̇анаа. мижчаавааяаамод̇и агусалажид̇д̇асамбаяуд̇д̇ам̣ вийрияам̣. мижчаасад̇ийд̇и сад̇ибадибагкабхууд̇о агусалажид̇д̇уббаад̣̇о. мижчаасамаад̇хийд̇и агусаласамаад̇хи.
Aṭṭha micchattāti micchādiṭṭhi micchāsaṅkappo micchāvācā micchākammanto micchāājīvo micchāvāyāmo micchāsati micchāsamādhi. ‘‘Hitasukhāvahā me bhavissantī’’ti evaṃ āsīsitāpi tathāabhāvato asubhādīsuyeva subhantiādiviparītappavattito ca micchāsabhāvāti micchattā. Micchā passati, micchā vā etāya passantīti micchādiṭṭhi. Atha vā viparītā diṭṭhīti micchādiṭṭhi, ayāthāvadiṭṭhīti vā micchādiṭṭhi, virajjhitvā gahaṇato vā vitathā diṭṭhīti micchādiṭṭhi, anattāvahattā paṇḍitehi kucchitā diṭṭhīti vāmicchādiṭṭhi. Micchāsaṅkappādīsupi eseva nayo. Micchādiṭṭhīti sassatucchedābhiniveso. Micchāsaṅkappoti kāmavitakkāditividho vitakko. Micchāvācāti musāvādādicatubbidhā cetanā. Micchākammantoti pāṇātipātāditividhā cetanā. Micchāājīvoti micchājīvapayogasamuṭṭhāpikā cetanā. Micchāvāyāmoti akusalacittasampayuttaṃ vīriyaṃ. Micchāsatīti satipaṭipakkhabhūto akusalacittuppādo. Micchāsamādhīti akusalasamādhi.
нава д̇ан̣хаамуулагаад̇и (д̣̇ий. ни. 2.103; 3.359) д̇ан̣хам̣ бадижжа бариязсанаа, бариязсанам̣ бадижжа лаабхо, лаабхам̣ бадижжа винижчаяо, винижчаяам̣ бадижжа чанд̣̇арааг̇о, чанд̣̇арааг̇ам̣ бадижжа аж̇жхосаанам̣, аж̇жхосаанам̣ бадижжа бариг̇г̇ахо, бариг̇г̇ахам̣ бадижжа мажчарияам̣, мажчарияам̣ бадижжа аарагко, аарагкаад̇хигаран̣ам̣ д̣̇ан̣д̣аад̣̇аанасад̇т̇аад̣̇аанагалахавиг̇г̇ахавиваад̣̇ад̇увам̣д̇увам̣бзсун̃н̃амусааваад̣̇аа анзгз баабагаа агусалаа д̇хаммаа самбхаванд̇и (д̣̇ий. ни. 2.104; 3.359). имз нава д̇ан̣хаамуулагаа д̇хаммаа. д̇ан̣хаа муулам̣ зд̇зсанд̇и д̇ан̣хаамуулагаа. бариязсанаад̣̇аяо агусалаа зва. д̇ан̣хам̣, бадижжаад̇и д̇ан̣хам̣ ниссааяа. бариязсанаад̇и руубаад̣̇иаарамман̣абариязсанаа. саа хи д̇ан̣хааяа сад̇и ход̇и. лаабход̇и руубаад̣̇иаарамман̣абадилаабхо, со хи бариязсанааяа сад̇и ход̇и. винижчаяо бана н̃аан̣ад̇ан̣хаад̣̇идтивид̇аггавасзна жад̇уб̣б̣ид̇хо. д̇ад̇т̇а ‘‘сукавинижчаяам̣ ж̇ан̃н̃аа, сукавинижчаяам̣ н̃ад̇ваа аж̇жхад̇д̇ам̣ сукамануяун̃ж̇зяяаа’’д̇и (ма. ни. 3.323) аяам̣ н̃аан̣авинижчаяо. ‘‘винижчаяод̇и д̣̇вз винижчаяаа д̇ан̣хаавинижчаяо жа д̣̇идтивинижчаяо жаа’’д̇и (махаани. 102) звам̣ ааг̇ад̇аани адтасад̇ад̇ан̣хаавижарид̇аани д̇ан̣хаавинижчаяо . д̣̇ваасадти д̣̇идтияо д̣̇идтивинижчаяо. ‘‘чанд̣̇о ко, д̣̇зваанаминд̣̇а, вид̇агганид̣̇аано’’д̇и (д̣̇ий. ни. 2.358) имасмим̣ бана суд̇д̇з ид̇ха винижчаяод̇и вуд̇д̇о вид̇аггоязва ааг̇ад̇о. лаабхам̣ лабхид̇ваа хи идтаанидтам̣ сунд̣̇араасунд̣̇аран̃жа вид̇аггзнзва винижчинаад̇и ‘‘зд̇д̇агам̣ мз руубаарамман̣ад̇т̇ааяа бхависсад̇и, зд̇д̇агам̣ сад̣̇д̣̇аад̣̇иаарамман̣ад̇т̇ааяа, зд̇д̇агам̣ маяхам̣ бхависсад̇и, зд̇д̇агам̣ барасса, зд̇д̇агам̣ барибхун̃ж̇иссаами, зд̇д̇агам̣ нид̣̇ахиссаамий’’д̇и. д̇зна вуд̇д̇ам̣ – ‘‘лаабхам̣ бадижжа винижчаяо’’д̇и. чанд̣̇арааг̇од̇и звам̣ агусалавид̇аггзна вид̇аггид̇з вад̇т̇усмим̣ д̣̇уб̣б̣аларааг̇о жа б̣алаварааг̇о жа уббаж̇ж̇ад̇и. чанд̣̇од̇и зд̇т̇а д̣̇уб̣б̣аларааг̇ассаад̇хиважанам̣, рааг̇од̇и б̣алаварааг̇асса. аж̇жхосаананд̇и ахам̣ мамаад̇и б̣алавасаннидтаанам̣. бариг̇г̇аход̇и д̇ан̣хаад̣̇идтивасзна бариг̇г̇ахагаран̣ам̣. мажчарияанд̇и барзхи саад̇хааран̣абхаавасса асаханад̇аа. д̇знзвасса бораан̣аа звам̣ важанад̇т̇ам̣ вад̣̇анд̇и ‘‘ид̣̇ам̣ ажчарияам̣ маяхамзва ход̇у, маа ан̃н̃асса ажчарияам̣ ход̇ууд̇и бавад̇д̇ад̇д̇аа мажчарияанд̇и вужжад̇ий’’д̇и. аарагкод̇и д̣̇ваарабид̣̇аханаман̃ж̇уусаг̇обанаад̣̇ивасзна судту рагкан̣ам̣. ад̇хигарод̇ийд̇и ад̇хигаран̣ам̣. гааран̣ассзд̇ам̣ наамам̣. аарагкаад̇хигаран̣анд̇и бхааванабум̣сагам̣, аарагкахзд̇ууд̇и ад̇т̇о. д̣̇ан̣д̣аад̣̇аанаад̣̇ийсу баранисзд̇ханад̇т̇ам̣ д̣̇ан̣д̣асса аад̣̇аанам̣ д̣̇ан̣д̣аад̣̇аанам̣. згад̇од̇хаараад̣̇инаа сад̇т̇асса аад̣̇аанам̣ сад̇т̇аад̣̇аанам̣. гааяагалахоби ваажаагалахоби галахо. буримо буримо вирод̇хо виг̇г̇ахо. бажчимо бажчимо виваад̣̇о. д̇увам̣д̇уванд̇и аг̇аарававасзна д̇увам̣д̇увам̣важанам̣.
Nava taṇhāmūlakāti (dī. ni. 2.103; 3.359) taṇhaṃ paṭicca pariyesanā, pariyesanaṃ paṭicca lābho, lābhaṃ paṭicca vinicchayo, vinicchayaṃ paṭicca chandarāgo, chandarāgaṃ paṭicca ajjhosānaṃ, ajjhosānaṃ paṭicca pariggaho, pariggahaṃ paṭicca macchariyaṃ, macchariyaṃ paṭicca ārakkho, ārakkhādhikaraṇaṃ daṇḍādānasatthādānakalahaviggahavivādatuvaṃtuvaṃpesuññamusāvādā aneke pāpakā akusalā dhammā sambhavanti (dī. ni. 2.104; 3.359). Ime nava taṇhāmūlakā dhammā. Taṇhā mūlaṃ etesanti taṇhāmūlakā. Pariyesanādayo akusalā eva. Taṇhaṃ, paṭiccāti taṇhaṃ nissāya. Pariyesanāti rūpādiārammaṇapariyesanā. Sā hi taṇhāya sati hoti. Lābhoti rūpādiārammaṇapaṭilābho, so hi pariyesanāya sati hoti. Vinicchayo pana ñāṇataṇhādiṭṭhivitakkavasena catubbidho. Tattha ‘‘sukhavinicchayaṃ jaññā, sukhavinicchayaṃ ñatvā ajjhattaṃ sukhamanuyuñjeyyā’’ti (ma. ni. 3.323) ayaṃ ñāṇavinicchayo. ‘‘Vinicchayoti dve vinicchayā taṇhāvinicchayo ca diṭṭhivinicchayo cā’’ti (mahāni. 102) evaṃ āgatāni aṭṭhasatataṇhāvicaritāni taṇhāvinicchayo. Dvāsaṭṭhi diṭṭhiyo diṭṭhivinicchayo. ‘‘Chando kho, devānaminda, vitakkanidāno’’ti (dī. ni. 2.358) imasmiṃ pana sutte idha vinicchayoti vutto vitakkoyeva āgato. Lābhaṃ labhitvā hi iṭṭhāniṭṭhaṃ sundarāsundarañca vitakkeneva vinicchināti ‘‘ettakaṃ me rūpārammaṇatthāya bhavissati, ettakaṃ saddādiārammaṇatthāya, ettakaṃ mayhaṃ bhavissati, ettakaṃ parassa, ettakaṃ paribhuñjissāmi, ettakaṃ nidahissāmī’’ti. Tena vuttaṃ – ‘‘lābhaṃ paṭicca vinicchayo’’ti. Chandarāgoti evaṃ akusalavitakkena vitakkite vatthusmiṃ dubbalarāgo ca balavarāgo ca uppajjati. Chandoti ettha dubbalarāgassādhivacanaṃ, rāgoti balavarāgassa. Ajjhosānanti ahaṃ mamāti balavasanniṭṭhānaṃ. Pariggahoti taṇhādiṭṭhivasena pariggahakaraṇaṃ. Macchariyanti parehi sādhāraṇabhāvassa asahanatā. Tenevassa porāṇā evaṃ vacanatthaṃ vadanti ‘‘idaṃ acchariyaṃ mayhameva hotu, mā aññassa acchariyaṃ hotūti pavattattā macchariyanti vuccatī’’ti. Ārakkhoti dvārapidahanamañjūsagopanādivasena suṭṭhu rakkhaṇaṃ. Adhikarotīti adhikaraṇaṃ. Kāraṇassetaṃ nāmaṃ. Ārakkhādhikaraṇanti bhāvanapuṃsakaṃ, ārakkhahetūti attho. Daṇḍādānādīsu paranisedhanatthaṃ daṇḍassa ādānaṃ daṇḍādānaṃ. Ekatodhārādinā satthassa ādānaṃ satthādānaṃ. Kāyakalahopi vācākalahopi kalaho. Purimo purimo virodho viggaho. Pacchimo pacchimo vivādo. Tuvaṃtuvanti agāravavasena tuvaṃtuvaṃvacanaṃ.
д̣̇аса мижчад̇д̇аад̇и мижчаад̣̇идти…бз… мижчаасамаад̇хи мижчаан̃аан̣ам̣ мижчаавимуд̇д̇и. д̇ад̇т̇а мижчаан̃аан̣анд̇и баабагирияаасу убааяажинд̇аавасзна баабам̣ гад̇ваа сугад̇ам̣ маяаад̇и бажжавзгкан̣аагаарзна жа уббанно мохо. мижчаавимуд̇д̇ийд̇и авимуд̇д̇ассзва сад̇о вимуд̇д̇исан̃н̃ид̇аа.
Dasa micchattāti micchādiṭṭhi…pe… micchāsamādhi micchāñāṇaṃ micchāvimutti. Tattha micchāñāṇanti pāpakiriyāsu upāyacintāvasena pāpaṃ katvā sukataṃ mayāti paccavekkhaṇākārena ca uppanno moho. Micchāvimuttīti avimuttasseva sato vimuttisaññitā.
24.
24.
ид̣̇аани анзгабхзд̣̇зна бахаанзна бахаад̇аб̣б̣з д̣̇ассзд̇ум̣ д̣̇вз бахаанаанийд̇иаад̣̇и аарад̣̇д̇хам̣. бахаанзсу хи вин̃н̃аад̇зсу д̇зна д̇зна бахаад̇аб̣б̣аа д̇хаммаа сувин̃н̃зяяаа хонд̇и. бан̃жасу бахаанзсу логигаани жа д̣̇вз бахаанаани аббаяог̇ам̣ ниссаран̣аббахаанан̃жа табзд̇ваа аббаяог̇аанзва д̣̇вз логуд̇д̇арабахаанаани батамам̣ вуд̇д̇аани. саммаа ужчиж̇ж̇анд̇и зд̇зна гилзсаад̇и самужчзд̣̇о, бахийяанд̇и зд̇зна гилзсаад̇и бахаанам̣. самужчзд̣̇асан̇каад̇ам̣ бахаанам̣, на сзсаббахаананд̇и самужчзд̣̇аббахаанам̣. гилзсаанам̣ бадиббассад̣̇д̇хад̇д̇аа бадиббассад̣̇д̇хи, бахийнад̇д̇аа бахаанам̣, бадиббассад̣̇д̇хисан̇каад̇ам̣ бахаанам̣ бадиббассад̣̇д̇хиббахаанам̣. логам̣ уд̇д̇арад̇ийд̇и логуд̇д̇аро. ниб̣б̣аанасан̇каад̇ам̣ каяам̣ г̇ажчад̇ийд̇и каяаг̇аамий, каяаг̇аамий жа со маг̇г̇о жаад̇и каяаг̇аамимаг̇г̇о, д̇ам̣ бхааваяад̇о со маг̇г̇о самужчзд̣̇аббахаананд̇и ад̇т̇о. д̇ат̇аа палагкан̣з логуд̇д̇арапаламзва бадиббассад̣̇д̇хиббахаанам̣.
Idāni anekabhedena pahānena pahātabbe dassetuṃ dve pahānānītiādi āraddhaṃ. Pahānesu hi viññātesu tena tena pahātabbā dhammā suviññeyyā honti. Pañcasu pahānesu lokikāni ca dve pahānāni appayogaṃ nissaraṇappahānañca ṭhapetvā appayogāneva dve lokuttarapahānāni paṭhamaṃ vuttāni. Sammā ucchijjanti etena kilesāti samucchedo, pahīyanti etena kilesāti pahānaṃ. Samucchedasaṅkhātaṃ pahānaṃ, na sesappahānanti samucchedappahānaṃ. Kilesānaṃ paṭippassaddhattā paṭippassaddhi, pahīnattā pahānaṃ, paṭippassaddhisaṅkhātaṃ pahānaṃ paṭippassaddhippahānaṃ. Lokaṃ uttaratīti lokuttaro. Nibbānasaṅkhātaṃ khayaṃ gacchatīti khayagāmī, khayagāmī ca so maggo cāti khayagāmimaggo, taṃ bhāvayato so maggo samucchedappahānanti attho. Tathā phalakkhaṇe lokuttaraphalameva paṭippassaddhippahānaṃ.
гаамаанамзд̇ам̣ ниссаран̣анд̇иаад̣̇ийсу гаамад̇о руубад̇о сан̇кад̇ад̇о ниссаранд̇и зд̇знаад̇и ниссаран̣ам̣, д̇зхи ваа ниссадад̇д̇аа ниссаран̣ам̣. асубхаж̇жхаанам̣. гаамзхи нигканд̇ад̇д̇аа нзгкаммам̣. анааг̇аамимаг̇г̇о ваа. асубхаж̇жхаанан̃хи вигкамбханад̇о гаамаанам̣ ниссаран̣ам̣, д̇ам̣ жхаанам̣ баад̣̇агам̣ гад̇ваа уббаад̣̇ид̇аанааг̇аамимаг̇г̇о бана самужчзд̣̇ад̇о саб̣б̣асо гаамаанам̣ ажжанд̇аниссаран̣ам̣. руббад̇ийд̇и руубам̣, на руубам̣ аруубам̣ мид̇д̇абадибагкаа амид̇д̇аа вияа, лобхаад̣̇ибадибагкаа алобхаад̣̇аяо вияа жа руубабадибагкод̇и ад̇т̇о. палавасзна ваа над̇т̇зд̇т̇а руубанд̇и аруубам̣, аруубамзва ааруббам̣. аруубаж̇жхаанаани. д̇аани руубаанам̣ ниссаран̣ам̣ наама. аруубзхиби арахад̇д̇амаг̇г̇о буна уббад̇д̇инивааран̣ад̇о саб̣б̣асо руубаанам̣ ниссаран̣ам̣ наама. бхууд̇анд̇и ж̇аад̇ам̣. сан̇кад̇анд̇и бажжаязхи сан̇г̇амма гад̇ам̣. бадижжасамуббаннанд̇и д̇з д̇з бажжаяз бадижжа саммаа саха жа уббаннам̣. батамзна сан̃ж̇аад̇ад̇д̇ад̣̇ийбанзна анижжад̇аа, д̣̇уд̇иязна анижжассааби сад̇о бажжаяаанубхаавад̣̇ийбанзна барааяад̇д̇ад̇аа, д̇ад̇иязна барааяад̇д̇ассааби сад̇о бажжаяаанам̣ аб̣яаабаарад̇д̇ад̣̇ийбанзна звам̣д̇хаммад̇аа д̣̇ийбид̇аа ход̇и. нирод̇ход̇и ниб̣б̣аанам̣. ниб̣б̣аанан̃хи ааг̇амма д̣̇угкам̣ нируж̇жхад̇ийд̇и нирод̇ход̇и вужжад̇и. со зва жа саб̣б̣асан̇кад̇ад̇о ниссадад̇д̇аа д̇асса сан̇кад̇асса ниссаран̣ам̣ наама. адтагат̇ааяам̣ бана –
Kāmānametaṃnissaraṇantiādīsu kāmato rūpato saṅkhatato nissaranti etenāti nissaraṇaṃ, tehi vā nissaṭattā nissaraṇaṃ. Asubhajjhānaṃ. Kāmehi nikkhantattā nekkhammaṃ. Anāgāmimaggo vā. Asubhajjhānañhi vikkhambhanato kāmānaṃ nissaraṇaṃ, taṃ jhānaṃ pādakaṃ katvā uppāditaanāgāmimaggo pana samucchedato sabbaso kāmānaṃ accantanissaraṇaṃ. Ruppatīti rūpaṃ, na rūpaṃ arūpaṃ mittapaṭipakkhā amittā viya, lobhādipaṭipakkhā alobhādayo viya ca rūpapaṭipakkhoti attho. Phalavasena vā natthettha rūpanti arūpaṃ, arūpameva āruppaṃ. Arūpajjhānāni. Tāni rūpānaṃ nissaraṇaṃ nāma. Arūpehipi arahattamaggo puna uppattinivāraṇato sabbaso rūpānaṃ nissaraṇaṃ nāma. Bhūtanti jātaṃ. Saṅkhatanti paccayehi saṅgamma kataṃ. Paṭiccasamuppannanti te te paccaye paṭicca sammā saha ca uppannaṃ. Paṭhamena sañjātattadīpanena aniccatā, dutiyena aniccassāpi sato paccayānubhāvadīpanena parāyattatā, tatiyena parāyattassāpi sato paccayānaṃ abyāpārattadīpanena evaṃdhammatā dīpitā hoti. Nirodhoti nibbānaṃ. Nibbānañhi āgamma dukkhaṃ nirujjhatīti nirodhoti vuccati. So eva ca sabbasaṅkhatato nissaṭattā tassa saṅkhatassa nissaraṇaṃ nāma. Aṭṭhakathāyaṃ pana –
‘‘нирод̇хо д̇асса ниссаран̣анд̇и ид̇ха арахад̇д̇апалам̣ нирод̇ход̇и ад̇хиббзд̇ам̣. арахад̇д̇апалзна хи ниб̣б̣аанз д̣̇идтз буна ааяад̇им̣ саб̣б̣асан̇каараа на хонд̇ийд̇и арахад̇д̇асан̇каад̇асса нирод̇хасса бажжаяад̇д̇аа нирод̇ход̇и вуд̇д̇а’’нд̇и вуд̇д̇ам̣.
‘‘Nirodho tassa nissaraṇanti idha arahattaphalaṃ nirodhoti adhippetaṃ. Arahattaphalena hi nibbāne diṭṭhe puna āyatiṃ sabbasaṅkhārā na hontīti arahattasaṅkhātassa nirodhassa paccayattā nirodhoti vutta’’nti vuttaṃ.
нзгкаммам̣ бадилад̣̇д̇хассаад̇иаад̣̇ийсу асубхаж̇жхаанасса ниссаран̣ад̇д̇з вигкамбханаббахаанзна, анааг̇аамимаг̇г̇асса ниссаран̣ад̇д̇з самужчзд̣̇аббахаанзна гаамаа бахийнаа жзва хонд̇и барижжад̇д̇аа жа. аруубаж̇жхаанаанам̣ ниссаран̣ад̇д̇з жа арахад̇д̇амаг̇г̇асса ниссаран̣ад̇д̇з жа звамзва руубаа яож̇зд̇аб̣б̣аа. руубзсу хи чанд̣̇арааг̇аббахаанзна руубаанам̣ самужчзд̣̇о ход̇и. руубаад̇и жзд̇т̇а лин̇г̇авибаллаасо гад̇о. ниб̣б̣аанасса ниссаран̣ад̇д̇з ниссаран̣аббахаанзна, арахад̇д̇апаласса ниссаран̣ад̇д̇з бадиббассад̣̇д̇хиббахаанзна сан̇каараа бахийнаа жзва хонд̇и барижжад̇д̇аа жа. ниб̣б̣аанасса жа ниссаран̣ад̇д̇з аарамман̣агаран̣авасзна бадилаабхо взд̣̇ид̇аб̣б̣о.
Nekkhammaṃ paṭiladdhassātiādīsu asubhajjhānassa nissaraṇatte vikkhambhanappahānena, anāgāmimaggassa nissaraṇatte samucchedappahānena kāmā pahīnā ceva honti pariccattā ca. Arūpajjhānānaṃ nissaraṇatte ca arahattamaggassa nissaraṇatte ca evameva rūpā yojetabbā. Rūpesu hi chandarāgappahānena rūpānaṃ samucchedo hoti. Rūpāti cettha liṅgavipallāso kato. Nibbānassa nissaraṇatte nissaraṇappahānena, arahattaphalassa nissaraṇatte paṭippassaddhippahānena saṅkhārā pahīnā ceva honti pariccattā ca. Nibbānassa ca nissaraṇatte ārammaṇakaraṇavasena paṭilābho veditabbo.
д̣̇угкасажжанд̇иаад̣̇ийсу барин̃н̃аабадивзд̇ханд̇иаад̣̇и бхааванабум̣сагаважанам̣. барин̃н̃ааяа бадивзд̇хо барин̃н̃аабадивзд̇хо. д̇ам̣ барин̃н̃аабадивзд̇хам̣. зса наяо сзсзсуби. баж̇ахаад̇ийд̇и д̇ат̇аа д̇ат̇аа бадивиж̇жханд̇о бахаад̇аб̣б̣з гилзсз баж̇ахад̇ийд̇и ад̇т̇о г̇ахзд̇аб̣б̣о. логияалогуд̇д̇арзсуби чанд̣̇арааг̇аббахаанзна ваа д̇аани баж̇ахад̇ийд̇и ад̇т̇о. баж̇ахад̇ийд̇иби баато. яат̇аа нааваа абуб̣б̣ам̣ ажаримам̣ згагкан̣з жад̇д̇аари гижжаани гарод̇и, оримам̣ д̇ийрам̣ баж̇ахад̇и, сод̇ам̣ чинд̣̇ад̇и, бхан̣д̣ам̣ вахад̇и, бааримам̣ д̇ийрам̣ аббзд̇и, звамзвам̣ маг̇г̇ан̃аан̣ам̣ абуб̣б̣ам̣ ажаримам̣ згагкан̣з жад̇д̇аари сажжаани абхисамзд̇и, д̣̇угкам̣ барин̃н̃аабхисамаязна абхисамзд̇и, самуд̣̇аяам̣ бахаанаабхисамаязна абхисамзд̇и, маг̇г̇ам̣ бхааванаабхисамаязна абхисамзд̇и, нирод̇хам̣ сажчигирияаабхисамаязна абхисамзд̇и. гим̣ вуд̇д̇ам̣ ход̇и? ‘‘нирод̇хам̣ аарамман̣ам̣ гад̇ваа жад̇д̇аари сажжаани баабун̣аад̇и бассад̇и бадивиж̇жхад̇ий’’д̇и (висуд̣̇д̇хи. 2.839) вуд̇д̇ад̇д̇аа згагкан̣зби висум̣ висум̣ вияа бахаанаани вуд̇д̇аанийд̇и взд̣̇ид̇аб̣б̣аани.
Dukkhasaccantiādīsu pariññāpaṭivedhantiādi bhāvanapuṃsakavacanaṃ. Pariññāya paṭivedho pariññāpaṭivedho. Taṃ pariññāpaṭivedhaṃ. Esa nayo sesesupi. Pajahātīti tathā tathā paṭivijjhanto pahātabbe kilese pajahatīti attho gahetabbo. Lokiyalokuttaresupi chandarāgappahānena vā tāni pajahatīti attho. Pajahatītipi pāṭho. Yathā nāvā apubbaṃ acarimaṃ ekakkhaṇe cattāri kiccāni karoti, orimaṃ tīraṃ pajahati, sotaṃ chindati, bhaṇḍaṃ vahati, pārimaṃ tīraṃ appeti, evamevaṃ maggañāṇaṃ apubbaṃ acarimaṃ ekakkhaṇe cattāri saccāni abhisameti, dukkhaṃ pariññābhisamayena abhisameti, samudayaṃ pahānābhisamayena abhisameti, maggaṃ bhāvanābhisamayena abhisameti, nirodhaṃ sacchikiriyābhisamayena abhisameti. Kiṃ vuttaṃ hoti? ‘‘Nirodhaṃ ārammaṇaṃ katvā cattāri saccāni pāpuṇāti passati paṭivijjhatī’’ti (visuddhi. 2.839) vuttattā ekakkhaṇepi visuṃ visuṃ viya pahānāni vuttānīti veditabbāni.
бан̃жасу бахаанзсу яам̣ сасзваалз уд̣̇агз багкид̇д̇зна гхадзна сзвааласса вияа д̇зна д̇зна логияасамаад̇хинаа нийваран̣аад̣̇ийнам̣ бажжанийгад̇хаммаанам̣ вигкамбханам̣ д̣̇уурийгаран̣ам̣, ид̣̇ам̣ вигкамбханаббахаанам̣ наама. вигкамбханаббахаанан̃жа нийваран̣аанам̣ батамам̣ жхаанам̣ бхааваяад̇од̇и нийваран̣аанам̣язва бахаанам̣ баагадад̇д̇аа вуд̇д̇анд̇и взд̣̇ид̇аб̣б̣ам̣. нийваран̣аани хи жхаанасса буб̣б̣абхааг̇зби бажчаабхааг̇зби на сахасаа жид̇д̇ам̣ аж̇жход̇т̇аранд̇и, аж̇жход̇т̇адзсу жа д̇зсу жхаанам̣ барихааяад̇и, вид̇аггаад̣̇аяо бана д̣̇уд̇ияаж̇жхаанаад̣̇ид̇о буб̣б̣з бажчаа жа аббадибагкаа худ̇ваа бавад̇д̇анд̇и. д̇асмаа нийваран̣аанам̣ вигкамбханам̣ баагадам̣. яам̣ бана рад̇д̇ибхааг̇з самуж̇ж̇алид̇зна бад̣̇ийбзна анд̇хагаарасса вияа д̇зна д̇зна вибассанааяа аваяавабхууд̇зна жхаанан̇г̇зна бадибагкавасзнзва д̇асса д̇асса жа бахаад̇аб̣б̣ад̇хаммасса бахаанам̣, ид̣̇ам̣ д̇ад̣̇ан̇г̇аббахаанам̣ наама. д̇ад̣̇ан̇г̇аббахаанан̃жа д̣̇идтиг̇ад̇аанам̣ ниб̣б̣зд̇хабхааг̇ияам̣ самаад̇хим̣ бхааваяад̇од̇и д̣̇идтиг̇ад̇аанам̣язва бахаанам̣ ол̣ааригавасзна вуд̇д̇анд̇и взд̣̇ид̇аб̣б̣ам̣. д̣̇идтиг̇ад̇ан̃хи ол̣ааригам̣, нижжасан̃н̃аад̣̇аяо сукумаа. д̇ад̇т̇а д̣̇идтиг̇ад̇аананд̇и д̣̇идтиязва д̣̇идтиг̇ад̇ам̣ ‘‘г̇уут̇аг̇ад̇ам̣ муд̇д̇аг̇ад̇а’’нд̇иаад̣̇ийни (а. ни. 9.11) вияа. г̇анд̇аб̣б̣аабхаавад̇о жад̣̇идтияаа г̇ад̇амад̇д̇амзвзд̇анд̇иби д̣̇идтиг̇ад̇ам̣, д̣̇ваасадтид̣̇идтийсу анд̇ог̇ад̇хад̇д̇аа д̣̇идтийсу г̇ад̇анд̇иби д̣̇идтиг̇ад̇ам̣. б̣ахуважанзна д̇зсам̣ д̣̇идтиг̇ад̇аанам̣. ниб̣б̣зд̇хабхааг̇ияам̣ самаад̇хинд̇и вибассанаасамбаяуд̇д̇ам̣ самаад̇хим̣. яам̣ бана асанивижаггаабхихад̇асса (висуд̣̇д̇хи. 2.851) ругкасса вияа арияамаг̇г̇ан̃аан̣зна сам̣яож̇анаанам̣ д̇хаммаанам̣ яат̇аа на буна бавад̇д̇ад̇и, звам̣ бахаанам̣, ид̣̇ам̣ самужчзд̣̇аббахаанам̣ наама. нирод̇хо ниб̣б̣аананд̇и нирод̇хасан̇каад̇ам̣ ниб̣б̣аанам̣.
Pañcasu pahānesu yaṃ sasevāle udake pakkhittena ghaṭena sevālassa viya tena tena lokiyasamādhinā nīvaraṇādīnaṃ paccanīkadhammānaṃ vikkhambhanaṃ dūrīkaraṇaṃ, idaṃ vikkhambhanappahānaṃ nāma. Vikkhambhanappahānañca nīvaraṇānaṃ paṭhamaṃjhānaṃ bhāvayatoti nīvaraṇānaṃyeva pahānaṃ pākaṭattā vuttanti veditabbaṃ. Nīvaraṇāni hi jhānassa pubbabhāgepi pacchābhāgepi na sahasā cittaṃ ajjhottharanti, ajjhotthaṭesu ca tesu jhānaṃ parihāyati, vitakkādayo pana dutiyajjhānādito pubbe pacchā ca appaṭipakkhā hutvā pavattanti. Tasmā nīvaraṇānaṃ vikkhambhanaṃ pākaṭaṃ. Yaṃ pana rattibhāge samujjalitena padīpena andhakārassa viya tena tena vipassanāya avayavabhūtena jhānaṅgena paṭipakkhavaseneva tassa tassa ca pahātabbadhammassa pahānaṃ, idaṃ tadaṅgappahānaṃ nāma. Tadaṅgappahānañca diṭṭhigatānaṃ nibbedhabhāgiyaṃ samādhiṃ bhāvayatoti diṭṭhigatānaṃyeva pahānaṃ oḷārikavasena vuttanti veditabbaṃ. Diṭṭhigatañhi oḷārikaṃ, niccasaññādayo sukhumā. Tattha diṭṭhigatānanti diṭṭhiyeva diṭṭhigataṃ ‘‘gūthagataṃ muttagata’’ntiādīni (a. ni. 9.11) viya. Gantabbābhāvato cadiṭṭhiyā gatamattamevetantipi diṭṭhigataṃ, dvāsaṭṭhidiṭṭhīsu antogadhattā diṭṭhīsu gatantipi diṭṭhigataṃ. Bahuvacanena tesaṃ diṭṭhigatānaṃ. Nibbedhabhāgiyaṃ samādhinti vipassanāsampayuttaṃ samādhiṃ. Yaṃ pana asanivicakkābhihatassa (visuddhi. 2.851) rukkhassa viya ariyamaggañāṇena saṃyojanānaṃ dhammānaṃ yathā na puna pavattati, evaṃ pahānaṃ, idaṃ samucchedappahānaṃ nāma. Nirodhonibbānanti nirodhasaṅkhātaṃ nibbānaṃ.
звам̣ бахаанавасзна бахаад̇аб̣б̣з д̇хаммз д̣̇ассзд̇ваа ид̣̇аани саруубзнзва буна бахаад̇аб̣б̣з д̇хаммз д̣̇ассзд̇ум̣ саб̣б̣ам̣, бхигкавз, бахаад̇аб̣б̣анд̇иаад̣̇имааха. д̇ад̇т̇а жагкаад̣̇ийни чанд̣̇арааг̇аббахаанзна бахаад̇аб̣б̣аани. руубам̣ бассанд̇о баж̇ахаад̇ийд̇иаад̣̇ийсу руубам̣ анижжаад̣̇ид̇о бассанд̇о бахаад̇аб̣б̣з гилзсз баж̇ахаад̇и. жагкум̣…бз… ж̇араамаран̣ам̣…бз… амад̇ог̇ад̇хам̣ ниб̣б̣аананд̇и бзяяаалад̣̇ваяз анан̃н̃аад̇ан̃н̃ассаамийд̇инд̣̇рияам̣ ‘‘бассанд̇о баж̇ахаад̇ий’’д̇иаад̣̇ийсу д̇зсу логуд̇д̇арзсу анан̃н̃аад̇ан̃н̃ассаамийд̇инд̣̇рияам̣ бассанд̇о уд̣̇игканд̇о абзгкамаано ижчамаано вибассанаагкан̣зсу бахаад̇аб̣б̣з гилзсз баж̇ахаад̇ийд̇и д̇ам̣д̇ам̣д̇хаммаануруубзна яож̇зд̇аб̣б̣ам̣.
Evaṃ pahānavasena pahātabbe dhamme dassetvā idāni sarūpeneva puna pahātabbe dhamme dassetuṃ sabbaṃ, bhikkhave, pahātabbantiādimāha. Tattha cakkhādīni chandarāgappahānena pahātabbāni. Rūpaṃ passanto pajahātītiādīsu rūpaṃ aniccādito passanto pahātabbe kilese pajahāti. Cakkhuṃ…pe… jarāmaraṇaṃ…pe… amatogadhaṃ nibbānanti peyyāladvaye anaññātaññassāmītindriyaṃ ‘‘passanto pajahātī’’tiādīsu tesu lokuttaresu anaññātaññassāmītindriyaṃ passanto udikkhanto apekkhamāno icchamāno vipassanākkhaṇesu pahātabbe kilese pajahātīti taṃtaṃdhammānurūpena yojetabbaṃ.
бахаад̇аб̣б̣анид̣̇д̣̇зсаван̣н̣анаа нидтид̇аа.
Pahātabbaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 1. суд̇амаяан̃аан̣анид̣̇д̣̇зсо • 1. Sutamayañāṇaniddeso
