| Library / Tipiṭaka / তিপিটক • Tipiṭaka / মহাৰগ্গপাল়ি • Mahāvaggapāḷi |
১১২. পহিতেযেৰ অনুজাননা
112. Pahiteyeva anujānanā
১৯৯ . ইধ পন, ভিক্খৰে, ভিক্খুস্স ভাতা গিলানো হোতি। সো চে ভাতুনো সন্তিকে দূতং পহিণেয্য – ‘‘অহঞ্হি গিলানো, আগচ্ছতু মে ভাতা, ইচ্ছামি ভাতুনো আগত’’ন্তি, গন্তব্বং, ভিক্খৰে , সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো।
199. Idha pana, bhikkhave, bhikkhussa bhātā gilāno hoti. So ce bhātuno santike dūtaṃ pahiṇeyya – ‘‘ahañhi gilāno, āgacchatu me bhātā, icchāmi bhātuno āgata’’nti, gantabbaṃ, bhikkhave , sattāhakaraṇīyena, pahite, na tveva appahite. Sattāhaṃ sannivatto kātabbo.
ইধ পন, ভিক্খৰে, ভিক্খুস্স ভগিনী গিলানা হোতি। সা চে ভাতুনো সন্তিকে দূতং পহিণেয্য – ‘‘অহঞ্হি গিলানা, আগচ্ছতু মে ভাতা, ইচ্ছামি ভাতুনো আগত’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো।
Idha pana, bhikkhave, bhikkhussa bhaginī gilānā hoti. Sā ce bhātuno santike dūtaṃ pahiṇeyya – ‘‘ahañhi gilānā, āgacchatu me bhātā, icchāmi bhātuno āgata’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ইধ পন, ভিক্খৰে, ভিক্খুস্স ঞাতকো গিলানো হোতি। সো চে ভিক্খুস্স সন্তিকে দূতং পহিণেয্য – ‘‘অহঞ্হি গিলানো, আগচ্ছতু ভদন্তো, ইচ্ছামি ভদন্তস্স আগত’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো।
Idha pana, bhikkhave, bhikkhussa ñātako gilāno hoti. So ce bhikkhussa santike dūtaṃ pahiṇeyya – ‘‘ahañhi gilāno, āgacchatu bhadanto, icchāmi bhadantassa āgata’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ইধ পন, ভিক্খৰে, ভিক্খুগতিকো গিলানো হোতি। সো চে ভিক্খূনং সন্তিকে দূতং পহিণেয্য – ‘‘অহঞ্হি গিলানো, আগচ্ছন্তু ভদন্তা, ইচ্ছামি ভদন্তানং আগত’’ন্তি, গন্তব্বং, ভিক্খৰে, সত্তাহকরণীযেন, পহিতে, ন ত্ৰেৰ অপ্পহিতে। সত্তাহং সন্নিৰত্তো কাতব্বো।
Idha pana, bhikkhave, bhikkhugatiko gilāno hoti. So ce bhikkhūnaṃ santike dūtaṃ pahiṇeyya – ‘‘ahañhi gilāno, āgacchantu bhadantā, icchāmi bhadantānaṃ āgata’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
তেন খো পন সমযেন সঙ্ঘস্স ৰিহারো উন্দ্রিযতি। অঞ্ঞতরেন উপাসকেন অরঞ্ঞে ভণ্ডং ছেদাপিতং হোতি। সো ভিক্খূনং সন্তিকে দূতং পাহেসি – ‘‘সচে ভদন্তা তং ভণ্ডং আৰহাপেয্যুং, দজ্জাহং তং ভণ্ড’’ন্তি। ভগৰতো এতমত্থং আরোচেসুং। অনুজানামি, ভিক্খৰে, সঙ্ঘকরণীযেন গন্তুং। সত্তাহং সন্নিৰত্তো কাতব্বোতি।
Tena kho pana samayena saṅghassa vihāro undriyati. Aññatarena upāsakena araññe bhaṇḍaṃ chedāpitaṃ hoti. So bhikkhūnaṃ santike dūtaṃ pāhesi – ‘‘sace bhadantā taṃ bhaṇḍaṃ āvahāpeyyuṃ, dajjāhaṃ taṃ bhaṇḍa’’nti. Bhagavato etamatthaṃ ārocesuṃ. Anujānāmi, bhikkhave, saṅghakaraṇīyena gantuṃ. Sattāhaṃ sannivatto kātabboti.
পহিতেযেৰ অনুজাননা নিট্ঠিতা।
Pahiteyeva anujānanā niṭṭhitā.
ৰস্সাৰাসভাণৰারো নিট্ঠিতো।
Vassāvāsabhāṇavāro niṭṭhito.
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পহিতেযেৰঅনুজাননকথা • Pahiteyevaanujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পহিতেযেৰ অনুজাননকথাৰণ্ণনা • Pahiteyeva anujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পহিতেযেৰঅনুজাননকথাৰণ্ণনা • Pahiteyevaanujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পহিতেযেৰঅনুজাননকথাৰণ্ণনা • Pahiteyevaanujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১১২. পহিতেযেৰঅনুজাননকথা • 112. Pahiteyevaanujānanakathā
