| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
112. පහිතෙයෙව අනුජානනා
112. Pahiteyeva anujānanā
199 . ඉධ පන, භික්‌ඛවෙ, භික්‌ඛුස්‌ස භාතා ගිලානො හොති. සො චෙ භාතුනො සන්‌තිකෙ දූතං පහිණෙය්‍ය – ‘‘අහඤ්‌හි ගිලානො, ආගච්‌ඡතු මෙ භාතා, ඉච්‌ඡාමි භාතුනො ආගත’’න්‌ති, ගන්‌තබ්‌බං, භික්‌ඛවෙ , සත්‌තාහකරණීයෙන, පහිතෙ, න ත්‌වෙව අප්‌පහිතෙ. සත්‌තාහං සන්‌නිවත්‌තො කාතබ්‌බො.
199. Idha pana, bhikkhave, bhikkhussa bhātā gilāno hoti. So ce bhātuno santike dūtaṃ pahiṇeyya – ‘‘ahañhi gilāno, āgacchatu me bhātā, icchāmi bhātuno āgata’’nti, gantabbaṃ, bhikkhave , sattāhakaraṇīyena, pahite, na tveva appahite. Sattāhaṃ sannivatto kātabbo.
ඉධ පන, භික්‌ඛවෙ, භික්‌ඛුස්‌ස භගිනී ගිලානා හොති. සා චෙ භාතුනො සන්‌තිකෙ දූතං පහිණෙය්‍ය – ‘‘අහඤ්‌හි ගිලානා, ආගච්‌ඡතු මෙ භාතා, ඉච්‌ඡාමි භාතුනො ආගත’’න්‌ති, ගන්‌තබ්‌බං, භික්‌ඛවෙ, සත්‌තාහකරණීයෙන, පහිතෙ, න ත්‌වෙව අප්‌පහිතෙ. සත්‌තාහං සන්‌නිවත්‌තො කාතබ්‌බො.
Idha pana, bhikkhave, bhikkhussa bhaginī gilānā hoti. Sā ce bhātuno santike dūtaṃ pahiṇeyya – ‘‘ahañhi gilānā, āgacchatu me bhātā, icchāmi bhātuno āgata’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ඉධ පන, භික්‌ඛවෙ, භික්‌ඛුස්‌ස ඤාතකො ගිලානො හොති. සො චෙ භික්‌ඛුස්‌ස සන්‌තිකෙ දූතං පහිණෙය්‍ය – ‘‘අහඤ්‌හි ගිලානො, ආගච්‌ඡතු භදන්‌තො, ඉච්‌ඡාමි භදන්‌තස්‌ස ආගත’’න්‌ති, ගන්‌තබ්‌බං, භික්‌ඛවෙ, සත්‌තාහකරණීයෙන, පහිතෙ, න ත්‌වෙව අප්‌පහිතෙ. සත්‌තාහං සන්‌නිවත්‌තො කාතබ්‌බො.
Idha pana, bhikkhave, bhikkhussa ñātako gilāno hoti. So ce bhikkhussa santike dūtaṃ pahiṇeyya – ‘‘ahañhi gilāno, āgacchatu bhadanto, icchāmi bhadantassa āgata’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
ඉධ පන, භික්‌ඛවෙ, භික්‌ඛුගතිකො ගිලානො හොති. සො චෙ භික්‌ඛූනං සන්‌තිකෙ දූතං පහිණෙය්‍ය – ‘‘අහඤ්‌හි ගිලානො, ආගච්‌ඡන්‌තු භදන්‌තා, ඉච්‌ඡාමි භදන්‌තානං ආගත’’න්‌ති, ගන්‌තබ්‌බං, භික්‌ඛවෙ, සත්‌තාහකරණීයෙන, පහිතෙ, න ත්‌වෙව අප්‌පහිතෙ. සත්‌තාහං සන්‌නිවත්‌තො කාතබ්‌බො.
Idha pana, bhikkhave, bhikkhugatiko gilāno hoti. So ce bhikkhūnaṃ santike dūtaṃ pahiṇeyya – ‘‘ahañhi gilāno, āgacchantu bhadantā, icchāmi bhadantānaṃ āgata’’nti, gantabbaṃ, bhikkhave, sattāhakaraṇīyena, pahite, na tveva appahite. Sattāhaṃ sannivatto kātabbo.
තෙන ඛො පන සමයෙන සඞ්‌ඝස්‌ස විහාරො උන්‌ද්‍රියති. අඤ්‌ඤතරෙන උපාසකෙන අරඤ්‌ඤෙ භණ්‌ඩං ඡෙදාපිතං හොති. සො භික්‌ඛූනං සන්‌තිකෙ දූතං පාහෙසි – ‘‘සචෙ භදන්‌තා තං භණ්‌ඩං ආවහාපෙය්‍යුං, දජ්‌ජාහං තං භණ්‌ඩ’’න්‌ති. භගවතො එතමත්‌ථං ආරොචෙසුං. අනුජානාමි, භික්‌ඛවෙ, සඞ්‌ඝකරණීයෙන ගන්‌තුං. සත්‌තාහං සන්‌නිවත්‌තො කාතබ්‌බොති.
Tena kho pana samayena saṅghassa vihāro undriyati. Aññatarena upāsakena araññe bhaṇḍaṃ chedāpitaṃ hoti. So bhikkhūnaṃ santike dūtaṃ pāhesi – ‘‘sace bhadantā taṃ bhaṇḍaṃ āvahāpeyyuṃ, dajjāhaṃ taṃ bhaṇḍa’’nti. Bhagavato etamatthaṃ ārocesuṃ. Anujānāmi, bhikkhave, saṅghakaraṇīyena gantuṃ. Sattāhaṃ sannivatto kātabboti.
පහිතෙයෙව අනුජානනා නිට්‌ඨිතා.
Pahiteyeva anujānanā niṭṭhitā.
වස්‌සාවාසභාණවාරො නිට්‌ඨිතො.
Vassāvāsabhāṇavāro niṭṭhito.
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවග්‌ග-අට්‌ඨකථා • Mahāvagga-aṭṭhakathā / පහිතෙයෙවඅනුජානනකථා • Pahiteyevaanujānanakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / පහිතෙයෙව අනුජානනකථාවණ්‌ණනා • Pahiteyeva anujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / පහිතෙයෙවඅනුජානනකථාවණ්‌ණනා • Pahiteyevaanujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / පහිතෙයෙවඅනුජානනකථාවණ්‌ණනා • Pahiteyevaanujānanakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 112. පහිතෙයෙවඅනුජානනකථා • 112. Pahiteyevaanujānanakathā
