| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
112. பஹிதேயேவஅனுஜானநகதா²
112. Pahiteyevaanujānanakathā
199. பி⁴க்கு²க³திகோதி பி⁴க்கு² ஏவ க³தி பதிட்டா² ஏதஸ்ஸாதி பி⁴க்கு²க³திகோதி வுத்தே பி⁴க்கு²னிஸ்ஸிதகோ புரிஸோதி ஆஹ ‘‘பி⁴க்கூ²ஹி ஸத்³தி⁴ங் வஸனகபுரிஸோ’’தி. பலுஜ்ஜதீதி வினஸ்ஸதி. ப⁴ண்ட³ங் சே²தா³பிதந்தி எத்த² ப⁴ண்ட³ஸத்³தோ³ பரிக்கா²ரத்தோ² ஏவ, ந மூலத⁴னத்தோ²தி ஆஹ ‘‘த³ப்³ப³ஸம்பா⁴ரப⁴ண்ட³’’ந்தி. சே²தா³பிதந்தி சுராதி³க³ணிகதா⁴துங் ‘‘சி²ந்தா³பித’’ந்தி ருதா⁴தி³க³ணிகதா⁴துயா வண்ணேதி. த³ஜ்ஜாஹந்தி ஏகாரலோபஸந்தீ⁴தி ஆஹ ‘‘த³ஜ்ஜே அஹ’’ந்தி. ‘‘த³ஜ்ஜேஹ’’ந்திபி பாடோ². ஏவஞ்ஹி ஸதி அகாரலோபஸந்தி⁴. த³ஜ்ஜேதி த³தெ³ய்யங், த³தா³மி வா. ஸங்க⁴கரணீயேனாதி ஸங்க⁴ஸ்ஸ காதப்³பே³ன கிச்சேன. தமத்த²ங் த³ஸ்ஸெந்தோ ஆஹ ‘‘யங்கிஞ்சீ’’திஆதி³. தத்த² யங்கிஞ்சி காதப்³ப³ந்தி யோஜனா. சேதியச²த்தவேதி³காதீ³ஸூதி சேதியஸ்ஸ ச²த்தே ச வேதி³காய ச. ஆதி³ஸத்³தே³ன ஸுதா⁴லிம்பாத³யோ ஸங்க³ண்ஹாதி. தஸ்ஸாதி ஸங்க⁴கரணீயஸ்ஸ. நிப்பா²த³னத்த²ங் க³ந்தப்³ப³ந்தி ஸம்ப³ந்தோ⁴.
199.Bhikkhugatikoti bhikkhu eva gati patiṭṭhā etassāti bhikkhugatikoti vutte bhikkhunissitako purisoti āha ‘‘bhikkhūhi saddhiṃ vasanakapuriso’’ti. Palujjatīti vinassati. Bhaṇḍaṃ chedāpitanti ettha bhaṇḍasaddo parikkhārattho eva, na mūladhanatthoti āha ‘‘dabbasambhārabhaṇḍa’’nti. Chedāpitanti curādigaṇikadhātuṃ ‘‘chindāpita’’nti rudhādigaṇikadhātuyā vaṇṇeti. Dajjāhanti ekāralopasandhīti āha ‘‘dajje aha’’nti. ‘‘Dajjeha’’ntipi pāṭho. Evañhi sati akāralopasandhi. Dajjeti dadeyyaṃ, dadāmi vā. Saṅghakaraṇīyenāti saṅghassa kātabbena kiccena. Tamatthaṃ dassento āha ‘‘yaṃkiñcī’’tiādi. Tattha yaṃkiñci kātabbanti yojanā. Cetiyachattavedikādīsūti cetiyassa chatte ca vedikāya ca. Ādisaddena sudhālimpādayo saṅgaṇhāti. Tassāti saṅghakaraṇīyassa. Nipphādanatthaṃ gantabbanti sambandho.
எத்தா²தி வஸ்ஸூபனாயிகக்க²ந்த⁴கே. ‘‘அனிமந்திதேனா’’தி பத³ங் ‘‘க³ந்து’’ந்தி பதே³ பா⁴வகத்தா. க³ந்துந்தி க³மிதுங், க³மனங் வா ‘‘ந வட்டதீ’’தி பதே³ கத்தா. பட²மங்யேவாதி த⁴ம்மஸ்ஸவனதோ பட²மமேவ. ஸன்னிபதிதப்³ப³ங் இதி கதிகா கதா ஹோதீதி யோஜனா. ப⁴ண்ட³கந்தி சீவராதி³ப⁴ண்ட³கங். க³ந்துங் ந வட்டதீதி ஸயமேவ க³ந்துங் ந வட்டதீதி அத்தோ² த³ட்ட²ப்³போ³. தேன வுத்தங் ‘‘ஸசே பனா’’திஆதி³. தத்தா²தி தங் விஹாரங். ‘‘வட்டதீ’’தி இமினா வஸ்ஸச்சே²தோ³ ச ஆபத்தி ச ந ஹோதீதி த³ஸ்ஸேதி. அத்தா²யபீதி பிஸத்³தே³ன ‘‘ப⁴ண்ட³கங் தோ⁴விஸ்ஸாமீ’’தி அத்த²ங் அபெக்க²தி. நந்தி அந்தேவாஸிகங். வட்டதீதி ஆசரியஸ்ஸ ஆணாய ஸத்தாஹே அனதிக்கந்தே வட்டதி, வஸ்ஸச்சே²தோ³ ச ஆபத்தி ச ந ஹோதி. ஸத்தாஹே அதிக்கந்தே வஸ்ஸச்சே²தோ³வ ஹோதி, ந ஆபத்தீதி அதி⁴ப்பாயோ.
Etthāti vassūpanāyikakkhandhake. ‘‘Animantitenā’’ti padaṃ ‘‘gantu’’nti pade bhāvakattā. Gantunti gamituṃ, gamanaṃ vā ‘‘na vaṭṭatī’’ti pade kattā. Paṭhamaṃyevāti dhammassavanato paṭhamameva. Sannipatitabbaṃ iti katikā katā hotīti yojanā. Bhaṇḍakanti cīvarādibhaṇḍakaṃ. Gantuṃ na vaṭṭatīti sayameva gantuṃ na vaṭṭatīti attho daṭṭhabbo. Tena vuttaṃ ‘‘sace panā’’tiādi. Tatthāti taṃ vihāraṃ. ‘‘Vaṭṭatī’’ti iminā vassacchedo ca āpatti ca na hotīti dasseti. Atthāyapīti pisaddena ‘‘bhaṇḍakaṃ dhovissāmī’’ti atthaṃ apekkhati. Nanti antevāsikaṃ. Vaṭṭatīti ācariyassa āṇāya sattāhe anatikkante vaṭṭati, vassacchedo ca āpatti ca na hoti. Sattāhe atikkante vassacchedova hoti, na āpattīti adhippāyo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 112. பஹிதேயேவ அனுஜானநா • 112. Pahiteyeva anujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பஹிதேயேவஅனுஜானநகதா² • Pahiteyevaanujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பஹிதேயேவ அனுஜானநகதா²வண்ணனா • Pahiteyeva anujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பஹிதேயேவஅனுஜானநகதா²வண்ணனா • Pahiteyevaanujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பஹிதேயேவஅனுஜானநகதா²வண்ணனா • Pahiteyevaanujānanakathāvaṇṇanā
