| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
১১২. পহিতেযেৰঅনুজাননকথা
112. Pahiteyevaanujānanakathā
১৯৯. ভিক্খুগতিকোতি ভিক্খু এৰ গতি পতিট্ঠা এতস্সাতি ভিক্খুগতিকোতি ৰুত্তে ভিক্খুনিস্সিতকো পুরিসোতি আহ ‘‘ভিক্খূহি সদ্ধিং ৰসনকপুরিসো’’তি। পলুজ্জতীতি ৰিনস্সতি। ভণ্ডং ছেদাপিতন্তি এত্থ ভণ্ডসদ্দো পরিক্খারত্থো এৰ, ন মূলধনত্থোতি আহ ‘‘দব্বসম্ভারভণ্ড’’ন্তি। ছেদাপিতন্তি চুরাদিগণিকধাতুং ‘‘ছিন্দাপিত’’ন্তি রুধাদিগণিকধাতুযা ৰণ্ণেতি। দজ্জাহন্তি একারলোপসন্ধীতি আহ ‘‘দজ্জে অহ’’ন্তি। ‘‘দজ্জেহ’’ন্তিপি পাঠো। এৰঞ্হি সতি অকারলোপসন্ধি। দজ্জেতি দদেয্যং, দদামি ৰা। সঙ্ঘকরণীযেনাতি সঙ্ঘস্স কাতব্বেন কিচ্চেন। তমত্থং দস্সেন্তো আহ ‘‘যংকিঞ্চী’’তিআদি। তত্থ যংকিঞ্চি কাতব্বন্তি যোজনা। চেতিযছত্তৰেদিকাদীসূতি চেতিযস্স ছত্তে চ ৰেদিকায চ। আদিসদ্দেন সুধালিম্পাদযো সঙ্গণ্হাতি। তস্সাতি সঙ্ঘকরণীযস্স। নিপ্ফাদনত্থং গন্তব্বন্তি সম্বন্ধো।
199.Bhikkhugatikoti bhikkhu eva gati patiṭṭhā etassāti bhikkhugatikoti vutte bhikkhunissitako purisoti āha ‘‘bhikkhūhi saddhiṃ vasanakapuriso’’ti. Palujjatīti vinassati. Bhaṇḍaṃ chedāpitanti ettha bhaṇḍasaddo parikkhārattho eva, na mūladhanatthoti āha ‘‘dabbasambhārabhaṇḍa’’nti. Chedāpitanti curādigaṇikadhātuṃ ‘‘chindāpita’’nti rudhādigaṇikadhātuyā vaṇṇeti. Dajjāhanti ekāralopasandhīti āha ‘‘dajje aha’’nti. ‘‘Dajjeha’’ntipi pāṭho. Evañhi sati akāralopasandhi. Dajjeti dadeyyaṃ, dadāmi vā. Saṅghakaraṇīyenāti saṅghassa kātabbena kiccena. Tamatthaṃ dassento āha ‘‘yaṃkiñcī’’tiādi. Tattha yaṃkiñci kātabbanti yojanā. Cetiyachattavedikādīsūti cetiyassa chatte ca vedikāya ca. Ādisaddena sudhālimpādayo saṅgaṇhāti. Tassāti saṅghakaraṇīyassa. Nipphādanatthaṃ gantabbanti sambandho.
এত্থাতি ৰস্সূপনাযিকক্খন্ধকে। ‘‘অনিমন্তিতেনা’’তি পদং ‘‘গন্তু’’ন্তি পদে ভাৰকত্তা। গন্তুন্তি গমিতুং, গমনং ৰা ‘‘ন ৰট্টতী’’তি পদে কত্তা। পঠমংযেৰাতি ধম্মস্সৰনতো পঠমমেৰ। সন্নিপতিতব্বং ইতি কতিকা কতা হোতীতি যোজনা। ভণ্ডকন্তি চীৰরাদিভণ্ডকং। গন্তুং ন ৰট্টতীতি সযমেৰ গন্তুং ন ৰট্টতীতি অত্থো দট্ঠব্বো। তেন ৰুত্তং ‘‘সচে পনা’’তিআদি। তত্থাতি তং ৰিহারং। ‘‘ৰট্টতী’’তি ইমিনা ৰস্সচ্ছেদো চ আপত্তি চ ন হোতীতি দস্সেতি। অত্থাযপীতি পিসদ্দেন ‘‘ভণ্ডকং ধোৰিস্সামী’’তি অত্থং অপেক্খতি। নন্তি অন্তেৰাসিকং। ৰট্টতীতি আচরিযস্স আণায সত্তাহে অনতিক্কন্তে ৰট্টতি, ৰস্সচ্ছেদো চ আপত্তি চ ন হোতি। সত্তাহে অতিক্কন্তে ৰস্সচ্ছেদোৰ হোতি, ন আপত্তীতি অধিপ্পাযো।
Etthāti vassūpanāyikakkhandhake. ‘‘Animantitenā’’ti padaṃ ‘‘gantu’’nti pade bhāvakattā. Gantunti gamituṃ, gamanaṃ vā ‘‘na vaṭṭatī’’ti pade kattā. Paṭhamaṃyevāti dhammassavanato paṭhamameva. Sannipatitabbaṃ iti katikā katā hotīti yojanā. Bhaṇḍakanti cīvarādibhaṇḍakaṃ. Gantuṃ na vaṭṭatīti sayameva gantuṃ na vaṭṭatīti attho daṭṭhabbo. Tena vuttaṃ ‘‘sace panā’’tiādi. Tatthāti taṃ vihāraṃ. ‘‘Vaṭṭatī’’ti iminā vassacchedo ca āpatti ca na hotīti dasseti. Atthāyapīti pisaddena ‘‘bhaṇḍakaṃ dhovissāmī’’ti atthaṃ apekkhati. Nanti antevāsikaṃ. Vaṭṭatīti ācariyassa āṇāya sattāhe anatikkante vaṭṭati, vassacchedo ca āpatti ca na hoti. Sattāhe atikkante vassacchedova hoti, na āpattīti adhippāyo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ১১২. পহিতেযেৰ অনুজাননা • 112. Pahiteyeva anujānanā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / পহিতেযেৰঅনুজাননকথা • Pahiteyevaanujānanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পহিতেযেৰ অনুজাননকথাৰণ্ণনা • Pahiteyeva anujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পহিতেযেৰঅনুজাননকথাৰণ্ণনা • Pahiteyevaanujānanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / পহিতেযেৰঅনুজাননকথাৰণ্ণনা • Pahiteyevaanujānanakathāvaṇṇanā
