| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๑๑๒. ปหิเตเยวอนุชานนกถา
112. Pahiteyevaanujānanakathā
๑๙๙. ภิกฺขุคติโกติ ภิกฺขุ เอว คติ ปติฎฺฐา เอตสฺสาติ ภิกฺขุคติโกติ วุเตฺต ภิกฺขุนิสฺสิตโก ปุริโสติ อาห ‘‘ภิกฺขูหิ สทฺธิํ วสนกปุริโส’’ติฯ ปลุชฺชตีติ วินสฺสติฯ ภณฺฑํ เฉทาปิตนฺติ เอตฺถ ภณฺฑสโทฺท ปริกฺขารโตฺถ เอว, น มูลธนโตฺถติ อาห ‘‘ทพฺพสมฺภารภณฺฑ’’นฺติฯ เฉทาปิตนฺติ จุราทิคณิกธาตุํ ‘‘ฉินฺทาปิต’’นฺติ รุธาทิคณิกธาตุยา วเณฺณติฯ ทชฺชาหนฺติ เอการโลปสนฺธีติ อาห ‘‘ทเชฺช อห’’นฺติฯ ‘‘ทเชฺชห’’นฺติปิ ปาโฐฯ เอวญฺหิ สติ อการโลปสนฺธิฯ ทเชฺชติ ทเทยฺยํ, ททามิ วาฯ สงฺฆกรณีเยนาติ สงฺฆสฺส กาตเพฺพน กิเจฺจนฯ ตมตฺถํ ทเสฺสโนฺต อาห ‘‘ยํกิญฺจี’’ติอาทิฯ ตตฺถ ยํกิญฺจิ กาตพฺพนฺติ โยชนาฯ เจติยฉตฺตเวทิกาทีสูติ เจติยสฺส ฉเตฺต จ เวทิกาย จฯ อาทิสเทฺทน สุธาลิมฺปาทโย สงฺคณฺหาติฯ ตสฺสาติ สงฺฆกรณียสฺสฯ นิปฺผาทนตฺถํ คนฺตพฺพนฺติ สมฺพโนฺธฯ
199.Bhikkhugatikoti bhikkhu eva gati patiṭṭhā etassāti bhikkhugatikoti vutte bhikkhunissitako purisoti āha ‘‘bhikkhūhi saddhiṃ vasanakapuriso’’ti. Palujjatīti vinassati. Bhaṇḍaṃ chedāpitanti ettha bhaṇḍasaddo parikkhārattho eva, na mūladhanatthoti āha ‘‘dabbasambhārabhaṇḍa’’nti. Chedāpitanti curādigaṇikadhātuṃ ‘‘chindāpita’’nti rudhādigaṇikadhātuyā vaṇṇeti. Dajjāhanti ekāralopasandhīti āha ‘‘dajje aha’’nti. ‘‘Dajjeha’’ntipi pāṭho. Evañhi sati akāralopasandhi. Dajjeti dadeyyaṃ, dadāmi vā. Saṅghakaraṇīyenāti saṅghassa kātabbena kiccena. Tamatthaṃ dassento āha ‘‘yaṃkiñcī’’tiādi. Tattha yaṃkiñci kātabbanti yojanā. Cetiyachattavedikādīsūti cetiyassa chatte ca vedikāya ca. Ādisaddena sudhālimpādayo saṅgaṇhāti. Tassāti saṅghakaraṇīyassa. Nipphādanatthaṃ gantabbanti sambandho.
เอตฺถาติ วสฺสูปนายิกกฺขนฺธเกฯ ‘‘อนิมนฺติเตนา’’ติ ปทํ ‘‘คนฺตุ’’นฺติ ปเท ภาวกตฺตาฯ คนฺตุนฺติ คมิตุํ, คมนํ วา ‘‘น วฎฺฎตี’’ติ ปเท กตฺตาฯ ปฐมํเยวาติ ธมฺมสฺสวนโต ปฐมเมวฯ สนฺนิปติตพฺพํ อิติ กติกา กตา โหตีติ โยชนาฯ ภณฺฑกนฺติ จีวราทิภณฺฑกํฯ คนฺตุํ น วฎฺฎตีติ สยเมว คนฺตุํ น วฎฺฎตีติ อโตฺถ ทฎฺฐโพฺพฯ เตน วุตฺตํ ‘‘สเจ ปนา’’ติอาทิฯ ตตฺถาติ ตํ วิหารํฯ ‘‘วฎฺฎตี’’ติ อิมินา วสฺสเจฺฉโท จ อาปตฺติ จ น โหตีติ ทเสฺสติฯ อตฺถายปีติ ปิสเทฺทน ‘‘ภณฺฑกํ โธวิสฺสามี’’ติ อตฺถํ อเปกฺขติฯ นนฺติ อเนฺตวาสิกํฯ วฎฺฎตีติ อาจริยสฺส อาณาย สตฺตาเห อนติกฺกเนฺต วฎฺฎติ, วสฺสเจฺฉโท จ อาปตฺติ จ น โหติฯ สตฺตาเห อติกฺกเนฺต วสฺสเจฺฉโทว โหติ, น อาปตฺตีติ อธิปฺปาโยฯ
Etthāti vassūpanāyikakkhandhake. ‘‘Animantitenā’’ti padaṃ ‘‘gantu’’nti pade bhāvakattā. Gantunti gamituṃ, gamanaṃ vā ‘‘na vaṭṭatī’’ti pade kattā. Paṭhamaṃyevāti dhammassavanato paṭhamameva. Sannipatitabbaṃ iti katikā katā hotīti yojanā. Bhaṇḍakanti cīvarādibhaṇḍakaṃ. Gantuṃ na vaṭṭatīti sayameva gantuṃ na vaṭṭatīti attho daṭṭhabbo. Tena vuttaṃ ‘‘sace panā’’tiādi. Tatthāti taṃ vihāraṃ. ‘‘Vaṭṭatī’’ti iminā vassacchedo ca āpatti ca na hotīti dasseti. Atthāyapīti pisaddena ‘‘bhaṇḍakaṃ dhovissāmī’’ti atthaṃ apekkhati. Nanti antevāsikaṃ. Vaṭṭatīti ācariyassa āṇāya sattāhe anatikkante vaṭṭati, vassacchedo ca āpatti ca na hoti. Sattāhe atikkante vassacchedova hoti, na āpattīti adhippāyo.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi / ๑๑๒. ปหิเตเยว อนุชานนา • 112. Pahiteyeva anujānanā
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / ปหิเตเยวอนุชานนกถา • Pahiteyevaanujānanakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ปหิเตเยว อนุชานนกถาวณฺณนา • Pahiteyeva anujānanakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ปหิเตเยวอนุชานนกถาวณฺณนา • Pahiteyevaanujānanakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ปหิเตเยวอนุชานนกถาวณฺณนา • Pahiteyevaanujānanakathāvaṇṇanā
