| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
பஹிதேயேவஅனுஜானநகதா²வண்ணனா
Pahiteyevaanujānanakathāvaṇṇanā
199. ‘‘அனுஜானாமி பி⁴க்க²வே, ஸங்க⁴கரணீயேன க³ந்துங், ஸத்தாஹங் ஸன்னிவத்தோ காதப்³போ³’’தி வசனதோ அந்தோவஸ்ஸே ஸங்ஹாரிகபா⁴வேன க³ந்துங் வட்டதி. தத்த² த⁴ம்மச²ந்த³வஸேனபி ஆக³தே ஸங்க⁴ஸ்ஸ ஆயமுக²ங் வினஸ்ஸதி. ததோ ‘‘ஸேனாஸனானி கத்வா’’தி ச வுத்தங். ஆக³தந்தி ஆக³மனங். பா⁴வெத்த² தபச்சயோயங். ஸங்க⁴கரணீயேன க³ந்துந்தி எத்த² ‘‘ஸேனாஸனபடிஸங்யுத்தேஸு ஏவ ஸங்க⁴கரணீயேஸு, ந அஞ்ஞேஸூ’’தி த⁴ம்மஸிரித்தே²ரோ வத³தி கிர. அட்ட²கதா²யம்பி தங் பத³ங் உத்³த⁴ரித்வா ‘‘யங் கிஞ்சி உபோஸதா²கா³ராதீ³ஸு ஸேனாஸனேஸூ’’திஆதி³னா ஸேனாஸனமேவ த³ஸ்ஸிதங், தஸ்மா உபபரிக்கி²தப்³ப³ங்.
199. ‘‘Anujānāmi bhikkhave, saṅghakaraṇīyena gantuṃ, sattāhaṃ sannivatto kātabbo’’ti vacanato antovasse saṃhārikabhāvena gantuṃ vaṭṭati. Tattha dhammachandavasenapi āgate saṅghassa āyamukhaṃ vinassati. Tato ‘‘senāsanāni katvā’’ti ca vuttaṃ. Āgatanti āgamanaṃ. Bhāvettha tapaccayoyaṃ. Saṅghakaraṇīyena gantunti ettha ‘‘senāsanapaṭisaṃyuttesu eva saṅghakaraṇīyesu, na aññesū’’ti dhammasiritthero vadati kira. Aṭṭhakathāyampi taṃ padaṃ uddharitvā ‘‘yaṃ kiñci uposathāgārādīsu senāsanesū’’tiādinā senāsanameva dassitaṃ, tasmā upaparikkhitabbaṃ.
அனிமந்திதேன க³ந்துங் ந வட்டதீதி தஸ்ஸ ரத்திச்சே²தோ³ ச து³க்கடாபத்தி ச ஹோதி, தங் ‘‘வஸ்ஸச்சே²தோ³’’தி ச வத³ந்தி. நிமந்திதோயேவ நாம ஹோதீதி எத்த² உபாஸகேஹி ‘‘இமஸ்மிங் நாம தி³வஸே தா³னாதீ³னி கரோம, ஸப்³பே³ ஸன்னிபதந்தூ’’தி கதாயபி கதிகாய க³ந்துங் வட்டதி. பவாரணாய நவமிதோ பட்டா²ய பங்ஸுகூலிகசீவரங் பரியேஸிதுங் காவீரபட்டனே விய ஸப்³பே³ஸங் க³ந்துங் வட்டதி அனுஸங்வச்ச²ரங் நியமதோ உபாஸகேஹி ஸஜ்ஜித்வா ட²பனதோ. வுத்தம்பி சேதங் அந்த⁴கட்ட²கதா²யங் ‘‘பி⁴க்கு²ஸங்கே⁴ன வா கதிகா கதா ‘ஸமந்தா பி⁴க்கூ² க³ச்ச²ந்தூ’தி, கோ⁴ஸனங் வா கதங் உபாஸகேஹி, தத்த² க³ச்ச²ந்தஸ்ஸ ரத்திச்சே²தோ³ நத்தீ²தி ததா² ‘அனுஸங்வச்ச²ரங் ஆக³ச்ச²ந்தூ’தி ஸகிங் நிமந்திதேபி வட்டதீ’’தி ச ‘‘சீவரகாலதோ பட்டா²ய நியமங் கத்வா ஸமந்ததோ ஆக³தானங் ஸஜ்ஜெத்வா தா³னதோ காவீரபட்டனே கோ⁴ஸெத்வா கரணாகாரோ பஞ்ஞாயதீதி அபரே’’தி ச. ஆசரியா பன ஏவங் ந வத³ந்தி.
Animantitena gantuṃ na vaṭṭatīti tassa ratticchedo ca dukkaṭāpatti ca hoti, taṃ ‘‘vassacchedo’’ti ca vadanti. Nimantitoyeva nāma hotīti ettha upāsakehi ‘‘imasmiṃ nāma divase dānādīni karoma, sabbe sannipatantū’’ti katāyapi katikāya gantuṃ vaṭṭati. Pavāraṇāya navamito paṭṭhāya paṃsukūlikacīvaraṃ pariyesituṃ kāvīrapaṭṭane viya sabbesaṃ gantuṃ vaṭṭati anusaṃvaccharaṃ niyamato upāsakehi sajjitvā ṭhapanato. Vuttampi cetaṃ andhakaṭṭhakathāyaṃ ‘‘bhikkhusaṅghena vā katikā katā ‘samantā bhikkhū gacchantū’ti, ghosanaṃ vā kataṃ upāsakehi, tattha gacchantassa ratticchedo natthīti tathā ‘anusaṃvaccharaṃ āgacchantū’ti sakiṃ nimantitepi vaṭṭatī’’ti ca ‘‘cīvarakālato paṭṭhāya niyamaṃ katvā samantato āgatānaṃ sajjetvā dānato kāvīrapaṭṭane ghosetvā karaṇākāro paññāyatīti apare’’ti ca. Ācariyā pana evaṃ na vadanti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 112. பஹிதேயேவ அனுஜானநா • 112. Pahiteyeva anujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பஹிதேயேவஅனுஜானநகதா² • Pahiteyevaanujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பஹிதேயேவ அனுஜானநகதா²வண்ணனா • Pahiteyeva anujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பஹிதேயேவஅனுஜானநகதா²வண்ணனா • Pahiteyevaanujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 112. பஹிதேயேவஅனுஜானநகதா² • 112. Pahiteyevaanujānanakathā
