| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பஹிதேயேவஅனுஜானநகதா²வண்ணனா
Pahiteyevaanujānanakathāvaṇṇanā
199. பி⁴க்கூ²ஹி ஸத்³தி⁴ங் வஸனகபுரிஸோதி அனஞ்ஞக³திகோதி த³ஸ்ஸேதி. க³ந்தப்³ப³ந்தி ஸங்க⁴கரணீயேன அப்பஹிதேபி க³ந்தப்³ப³ங். எத்த² ச அனுபாஸகேஹிபி ஸாஸனபா⁴வங் ஞாதுகாமேஹி பஹிதே தேஸங் பஸாத³வட்³டி⁴ங் ஸம்பஸ்ஸந்தேஹிபி ஸத்தாஹகரணீயேன க³ந்துங் வட்டதீதி க³ஹேதப்³ப³ங்.
199.Bhikkhūhi saddhiṃ vasanakapurisoti anaññagatikoti dasseti. Gantabbanti saṅghakaraṇīyena appahitepi gantabbaṃ. Ettha ca anupāsakehipi sāsanabhāvaṃ ñātukāmehi pahite tesaṃ pasādavaḍḍhiṃ sampassantehipi sattāhakaraṇīyena gantuṃ vaṭṭatīti gahetabbaṃ.
ரத்திச்சே²த³வினிச்ச²யோதி ஸத்தாஹகரணீயேன க³ந்த்வா ப³ஹித்³தா⁴ அருணுட்டா²பனஸங்கா²தஸ்ஸ ரத்திச்சே²த³ஸ்ஸ வினிச்ச²யோ. க³ந்துங் வட்டதீதி அந்தோஉபசாரஸீமாயங் டி²தேனேவ ஸத்தாஹகரணீயனிமித்தங் ஸல்லக்கெ²த்வா இமினா நிமித்தேன க³ந்த்வா ‘‘அந்தோஸத்தாஹே ஆக³ச்சி²ஸ்ஸாமீ’’தி ஆபோ⁴க³ங் கத்வா க³ந்துங் வட்டதி. புரிமக்க²ணே ஆபோ⁴க³ங் கத்வா க³மனக்க²ணே விஸ்ஸரித்வா க³தேபி தோ³ஸோ நத்தி² ‘‘ஸகரணீயோ பக்கமதீ’’தி (மஹாவ॰ 207) வுத்தத்தா. ஸப்³ப³தா² பன ஆபோ⁴க³ங் அகத்வா க³தஸ்ஸ வஸ்ஸச்சே²தோ³தி வத³ந்தி. யோ பன ஸத்தாஹகரணீயனிமித்தாபா⁴வேபி ‘‘ஸத்தாஹப்³ப⁴ந்தரே ஆக³மிஸ்ஸாமீ’’தி ஆபோ⁴க³ங் கத்வா க³ந்த்வா ஸத்தாஹப்³ப⁴ந்தரே ஆக³ச்ச²தி, தஸ்ஸ ஆபத்தியேவ, வஸ்ஸச்சே²தோ³ நத்தி² ஸத்தாஹஸ்ஸ ஸன்னிவத்தத்தாதி வத³ந்தி. வீமங்ஸித்வா க³ஹேதப்³ப³ங். ப⁴ண்ட³கந்தி சீவரப⁴ண்ட³ங். ஸம்பாபுணிதுங் ந ஸக்கோதி, வட்டதீதி தத³ஹேவ ஆக³மனே ஸஉஸ்ஸாஹத்தா வஸ்ஸச்சே²தோ³ வா ஆபத்தி வா ந ஹோதீதி அதி⁴ப்பாயோ. ஆசரியந்தி அகி³லானம்பி நிஸ்ஸயாசரியஞ்ச த⁴ம்மாசரியஞ்ச, பகே³வ உபஸம்பதா³சரியஉபஜ்ஜா²யேஸு. வத³தி, வட்டதீதி ஸத்தாஹாதிக்கமே ஆபத்திஅபா⁴வங் ஸந்தா⁴ய வுத்தங், வஸ்ஸச்சே²தோ³ பன ஹோதி ஏவ.
Ratticchedavinicchayoti sattāhakaraṇīyena gantvā bahiddhā aruṇuṭṭhāpanasaṅkhātassa ratticchedassa vinicchayo. Gantuṃ vaṭṭatīti antoupacārasīmāyaṃ ṭhiteneva sattāhakaraṇīyanimittaṃ sallakkhetvā iminā nimittena gantvā ‘‘antosattāhe āgacchissāmī’’ti ābhogaṃ katvā gantuṃ vaṭṭati. Purimakkhaṇe ābhogaṃ katvā gamanakkhaṇe vissaritvā gatepi doso natthi ‘‘sakaraṇīyo pakkamatī’’ti (mahāva. 207) vuttattā. Sabbathā pana ābhogaṃ akatvā gatassa vassacchedoti vadanti. Yo pana sattāhakaraṇīyanimittābhāvepi ‘‘sattāhabbhantare āgamissāmī’’ti ābhogaṃ katvā gantvā sattāhabbhantare āgacchati, tassa āpattiyeva, vassacchedo natthi sattāhassa sannivattattāti vadanti. Vīmaṃsitvā gahetabbaṃ. Bhaṇḍakanti cīvarabhaṇḍaṃ. Sampāpuṇituṃ na sakkoti, vaṭṭatīti tadaheva āgamane saussāhattā vassacchedo vā āpatti vā na hotīti adhippāyo. Ācariyanti agilānampi nissayācariyañca dhammācariyañca, pageva upasampadācariyaupajjhāyesu. Vadati, vaṭṭatīti sattāhātikkame āpattiabhāvaṃ sandhāya vuttaṃ, vassacchedo pana hoti eva.
பஹிதேயேவஅனுஜானநகதா²வண்ணனா நிட்டி²தா.
Pahiteyevaanujānanakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 112. பஹிதேயேவ அனுஜானநா • 112. Pahiteyeva anujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / பஹிதேயேவஅனுஜானநகதா² • Pahiteyevaanujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பஹிதேயேவ அனுஜானநகதா²வண்ணனா • Pahiteyeva anujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பஹிதேயேவஅனுஜானநகதா²வண்ணனா • Pahiteyevaanujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 112. பஹிதேயேவஅனுஜானநகதா² • 112. Pahiteyevaanujānanakathā
