| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
ပဟိတေယေဝအနုဇာနနကထာဝဏ္ဏနာ
Pahiteyevaanujānanakathāvaṇṇanā
၁၉၉. ဘိက္ခူဟိ သဒ္ဓိံ ဝသနကပုရိသောတိ အနညဂတိကောတိ ဒသ္သေတိ။ ဂန္တဗ္ဗန္တိ သင္ဃကရဏီယေန အပ္ပဟိတေပိ ဂန္တဗ္ဗံ။ ဧတ္ထ စ အနုပာသကေဟိပိ သာသနဘာဝံ ဉာတုကာမေဟိ ပဟိတေ တေသံ ပသာဒဝဍ္ဎိံ သမ္ပသ္သန္တေဟိပိ သတ္တာဟကရဏီယေန ဂန္တုံ ဝဋ္ဋတီတိ ဂဟေတဗ္ဗံ။
199.Bhikkhūhi saddhiṃ vasanakapurisoti anaññagatikoti dasseti. Gantabbanti saṅghakaraṇīyena appahitepi gantabbaṃ. Ettha ca anupāsakehipi sāsanabhāvaṃ ñātukāmehi pahite tesaṃ pasādavaḍḍhiṃ sampassantehipi sattāhakaraṇīyena gantuṃ vaṭṭatīti gahetabbaṃ.
ရတ္တိစ္ဆေဒဝိနိစ္ဆယောတိ သတ္တာဟကရဏီယေန ဂန္တ္ဝာ ဗဟိဒ္ဓာ အရုဏုဋ္ဌာပနသင္ခာတသ္သ ရတ္တိစ္ဆေဒသ္သ ဝိနိစ္ဆယော။ ဂန္တုံ ဝဋ္ဋတီတိ အန္တောဥပစာရသီမာယံ ဌိတေနေဝ သတ္တာဟကရဏီယနိမိတ္တံ သလ္လက္ခေတ္ဝာ ဣမိနာ နိမိတ္တေန ဂန္တ္ဝာ ‘‘အန္တောသတ္တာဟေ အာဂစ္ဆိသ္သာမီ’’တိ အာဘောဂံ ကတ္ဝာ ဂန္တုံ ဝဋ္ဋတိ။ ပုရိမက္ခဏေ အာဘောဂံ ကတ္ဝာ ဂမနက္ခဏေ ဝိသ္သရိတ္ဝာ ဂတေပိ ဒောသော နတ္ထိ ‘‘သကရဏီယော ပက္ကမတီ’’တိ (မဟာဝ. ၂၀၇) ဝုတ္တတ္တာ။ သဗ္ဗထာ ပန အာဘောဂံ အကတ္ဝာ ဂတသ္သ ဝသ္သစ္ဆေဒောတိ ဝဒန္တိ။ ယော ပန သတ္တာဟကရဏီယနိမိတ္တာဘာဝေပိ ‘‘သတ္တာဟဗ္ဘန္တရေ အာဂမိသ္သာမီ’’တိ အာဘောဂံ ကတ္ဝာ ဂန္တ္ဝာ သတ္တာဟဗ္ဘန္တရေ အာဂစ္ဆတိ, တသ္သ အာပတ္တိယေဝ, ဝသ္သစ္ဆေဒော နတ္ထိ သတ္တာဟသ္သ သန္နိဝတ္တတ္တာတိ ဝဒန္တိ။ ဝီမံသိတ္ဝာ ဂဟေတဗ္ဗံ။ ဘဏ္ဍကန္တိ စီဝရဘဏ္ဍံ။ သမ္ပာပုဏိတုံ န သက္ကောတိ, ဝဋ္ဋတီတိ တဒဟေဝ အာဂမနေ သဥသ္သာဟတ္တာ ဝသ္သစ္ဆေဒော ဝာ အာပတ္တိ ဝာ န ဟောတီတိ အဓိပ္ပာယော။ အာစရိယန္တိ အဂိလာနမ္ပိ နိသ္သယာစရိယဉ္စ ဓမ္မာစရိယဉ္စ, ပဂေဝ ဥပသမ္ပဒာစရိယဥပဇ္ဈာယေသု။ ဝဒတိ, ဝဋ္ဋတီတိ သတ္တာဟာတိက္ကမေ အာပတ္တိအဘာဝံ သန္ဓာယ ဝုတ္တံ, ဝသ္သစ္ဆေဒော ပန ဟောတိ ဧဝ။
Ratticchedavinicchayoti sattāhakaraṇīyena gantvā bahiddhā aruṇuṭṭhāpanasaṅkhātassa ratticchedassa vinicchayo. Gantuṃ vaṭṭatīti antoupacārasīmāyaṃ ṭhiteneva sattāhakaraṇīyanimittaṃ sallakkhetvā iminā nimittena gantvā ‘‘antosattāhe āgacchissāmī’’ti ābhogaṃ katvā gantuṃ vaṭṭati. Purimakkhaṇe ābhogaṃ katvā gamanakkhaṇe vissaritvā gatepi doso natthi ‘‘sakaraṇīyo pakkamatī’’ti (mahāva. 207) vuttattā. Sabbathā pana ābhogaṃ akatvā gatassa vassacchedoti vadanti. Yo pana sattāhakaraṇīyanimittābhāvepi ‘‘sattāhabbhantare āgamissāmī’’ti ābhogaṃ katvā gantvā sattāhabbhantare āgacchati, tassa āpattiyeva, vassacchedo natthi sattāhassa sannivattattāti vadanti. Vīmaṃsitvā gahetabbaṃ. Bhaṇḍakanti cīvarabhaṇḍaṃ. Sampāpuṇituṃ na sakkoti, vaṭṭatīti tadaheva āgamane saussāhattā vassacchedo vā āpatti vā na hotīti adhippāyo. Ācariyanti agilānampi nissayācariyañca dhammācariyañca, pageva upasampadācariyaupajjhāyesu. Vadati, vaṭṭatīti sattāhātikkame āpattiabhāvaṃ sandhāya vuttaṃ, vassacchedo pana hoti eva.
ပဟိတေယေဝအနုဇာနနကထာဝဏ္ဏနာ နိဋ္ဌိတာ။
Pahiteyevaanujānanakathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၁၁၂. ပဟိတေယေဝ အနုဇာနနာ • 112. Pahiteyeva anujānanā
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / ပဟိတေယေဝအနုဇာနနကထာ • Pahiteyevaanujānanakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ပဟိတေယေဝ အနုဇာနနကထာဝဏ္ဏနာ • Pahiteyeva anujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / ပဟိတေယေဝအနုဇာနနကထာဝဏ္ဏနာ • Pahiteyevaanujānanakathāvaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁၁၂. ပဟိတေယေဝအနုဇာနနကထာ • 112. Pahiteyevaanujānanakathā
