| Library / Tipiṭaka / ཏིཔིཊཀ • Tipiṭaka / ཝིམཏིཝིནོདནཱི-ཊཱིཀཱ • Vimativinodanī-ṭīkā |
པཧིཏེཡེཝཨནུཛཱནནཀཐཱཝཎྞནཱ
Pahiteyevaanujānanakathāvaṇṇanā
༡༩༩. བྷིཀྑཱུཧི སདྡྷིཾ ཝསནཀཔུརིསོཏི ཨནཉྙགཏིཀོཏི དསྶེཏི། གནྟབྦནྟི སངྒྷཀརཎཱིཡེན ཨཔྤཧིཏེཔི གནྟབྦཾ། ཨེཏྠ ཙ ཨནུཔཱསཀེཧིཔི སཱསནབྷཱཝཾ ཉཱཏུཀཱམེཧི པཧིཏེ ཏེསཾ པསཱདཝཌྜྷིཾ སམྤསྶནྟེཧིཔི སཏྟཱཧཀརཎཱིཡེན གནྟུཾ ཝཊྚཏཱིཏི གཧེཏབྦཾ།
199.Bhikkhūhi saddhiṃ vasanakapurisoti anaññagatikoti dasseti. Gantabbanti saṅghakaraṇīyena appahitepi gantabbaṃ. Ettha ca anupāsakehipi sāsanabhāvaṃ ñātukāmehi pahite tesaṃ pasādavaḍḍhiṃ sampassantehipi sattāhakaraṇīyena gantuṃ vaṭṭatīti gahetabbaṃ.
རཏྟིཙྪེདཝིནིཙྪཡོཏི སཏྟཱཧཀརཎཱིཡེན གནྟྭཱ བཧིདྡྷཱ ཨརུཎུཊྛཱཔནསངྑཱཏསྶ རཏྟིཙྪེདསྶ ཝིནིཙྪཡོ། གནྟུཾ ཝཊྚཏཱིཏི ཨནྟོཨུཔཙཱརསཱིམཱཡཾ ཋིཏེནེཝ སཏྟཱཧཀརཎཱིཡནིམིཏྟཾ སལླཀྑེཏྭཱ ཨིམིནཱ ནིམིཏྟེན གནྟྭཱ ‘‘ཨནྟོསཏྟཱཧེ ཨཱགཙྪིསྶཱམཱི’’ཏི ཨཱབྷོགཾ ཀཏྭཱ གནྟུཾ ཝཊྚཏི། པུརིམཀྑཎེ ཨཱབྷོགཾ ཀཏྭཱ གམནཀྑཎེ ཝིསྶརིཏྭཱ གཏེཔི དོསོ ནཏྠི ‘‘སཀརཎཱིཡོ པཀྐམཏཱི’’ཏི (མཧཱཝ॰ ༢༠༧) ཝུཏྟཏྟཱ། སབྦཐཱ པན ཨཱབྷོགཾ ཨཀཏྭཱ གཏསྶ ཝསྶཙྪེདོཏི ཝདནྟི། ཡོ པན སཏྟཱཧཀརཎཱིཡནིམིཏྟཱབྷཱཝེཔི ‘‘སཏྟཱཧབྦྷནྟརེ ཨཱགམིསྶཱམཱི’’ཏི ཨཱབྷོགཾ ཀཏྭཱ གནྟྭཱ སཏྟཱཧབྦྷནྟརེ ཨཱགཙྪཏི, ཏསྶ ཨཱཔཏྟིཡེཝ, ཝསྶཙྪེདོ ནཏྠི སཏྟཱཧསྶ སནྣིཝཏྟཏྟཱཏི ཝདནྟི། ཝཱིམཾསིཏྭཱ གཧེཏབྦཾ། བྷཎྜཀནྟི ཙཱིཝརབྷཎྜཾ། སམྤཱཔུཎིཏུཾ ན སཀྐོཏི, ཝཊྚཏཱིཏི ཏདཧེཝ ཨཱགམནེ སཨུསྶཱཧཏྟཱ ཝསྶཙྪེདོ ཝཱ ཨཱཔཏྟི ཝཱ ན ཧོཏཱིཏི ཨདྷིཔྤཱཡོ། ཨཱཙརིཡནྟི ཨགིལཱནམྤི ནིསྶཡཱཙརིཡཉྩ དྷམྨཱཙརིཡཉྩ, པགེཝ ཨུཔསམྤདཱཙརིཡཨུཔཛ྄ཛྷཱཡེསུ། ཝདཏི, ཝཊྚཏཱིཏི སཏྟཱཧཱཏིཀྐམེ ཨཱཔཏྟིཨབྷཱཝཾ སནྡྷཱཡ ཝུཏྟཾ, ཝསྶཙྪེདོ པན ཧོཏི ཨེཝ།
Ratticchedavinicchayoti sattāhakaraṇīyena gantvā bahiddhā aruṇuṭṭhāpanasaṅkhātassa ratticchedassa vinicchayo. Gantuṃ vaṭṭatīti antoupacārasīmāyaṃ ṭhiteneva sattāhakaraṇīyanimittaṃ sallakkhetvā iminā nimittena gantvā ‘‘antosattāhe āgacchissāmī’’ti ābhogaṃ katvā gantuṃ vaṭṭati. Purimakkhaṇe ābhogaṃ katvā gamanakkhaṇe vissaritvā gatepi doso natthi ‘‘sakaraṇīyo pakkamatī’’ti (mahāva. 207) vuttattā. Sabbathā pana ābhogaṃ akatvā gatassa vassacchedoti vadanti. Yo pana sattāhakaraṇīyanimittābhāvepi ‘‘sattāhabbhantare āgamissāmī’’ti ābhogaṃ katvā gantvā sattāhabbhantare āgacchati, tassa āpattiyeva, vassacchedo natthi sattāhassa sannivattattāti vadanti. Vīmaṃsitvā gahetabbaṃ. Bhaṇḍakanti cīvarabhaṇḍaṃ. Sampāpuṇituṃ na sakkoti, vaṭṭatīti tadaheva āgamane saussāhattā vassacchedo vā āpatti vā na hotīti adhippāyo. Ācariyanti agilānampi nissayācariyañca dhammācariyañca, pageva upasampadācariyaupajjhāyesu. Vadati, vaṭṭatīti sattāhātikkame āpattiabhāvaṃ sandhāya vuttaṃ, vassacchedo pana hoti eva.
པཧིཏེཡེཝཨནུཛཱནནཀཐཱཝཎྞནཱ ནིཊྛིཏཱ།
Pahiteyevaanujānanakathāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝགྒཔཱལི༹ • Mahāvaggapāḷi / ༡༡༢. པཧིཏེཡེཝ ཨནུཛཱནནཱ • 112. Pahiteyeva anujānanā
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝགྒ-ཨཊྛཀཐཱ • Mahāvagga-aṭṭhakathā / པཧིཏེཡེཝཨནུཛཱནནཀཐཱ • Pahiteyevaanujānanakathā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / པཧིཏེཡེཝ ཨནུཛཱནནཀཐཱཝཎྞནཱ • Pahiteyeva anujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / པཧིཏེཡེཝཨནུཛཱནནཀཐཱཝཎྞནཱ • Pahiteyevaanujānanakathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༡༡༢. པཧིཏེཡེཝཨནུཛཱནནཀཐཱ • 112. Pahiteyevaanujānanakathā
