| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
পজ্জোতরাজৰত্থুকথা
Pajjotarājavatthukathā
৩৩৪. জেগুচ্ছং মে সপ্পীতি অযং কির রাজা ৰিচ্ছিকস্স জাতো, ৰিচ্ছিকৰিসপটিঘাতায চ সপ্পি ভেসজ্জং হোতি ৰিচ্ছিকানং পটিকূলং, তস্মা এৰমাহ। উদ্দেকং দস্সতীতি উগ্গারং দস্সতি। পঞ্ঞাস যোজনিকা হোতীতি পঞ্ঞাস যোজনানি গন্তুং সমত্থা হোতি। ন কেৰলঞ্চস্স রঞ্ঞো হত্থিনীযেৰ, নাল়াগিরি নাম হত্থী যোজনসতং গচ্ছতি, চেলকণ্ণো চ মুঞ্চকেসো চাতি দ্ৰে অস্সা ৰীসযোজনসতং গচ্ছন্তি, কাকো দাসো সট্ঠিযোজনানি গচ্ছতি।
334.Jegucchaṃ me sappīti ayaṃ kira rājā vicchikassa jāto, vicchikavisapaṭighātāya ca sappi bhesajjaṃ hoti vicchikānaṃ paṭikūlaṃ, tasmā evamāha. Uddekaṃ dassatīti uggāraṃ dassati. Paññāsa yojanikā hotīti paññāsa yojanāni gantuṃ samatthā hoti. Na kevalañcassa rañño hatthinīyeva, nāḷāgiri nāma hatthī yojanasataṃ gacchati, celakaṇṇo ca muñcakeso cāti dve assā vīsayojanasataṃ gacchanti, kāko dāso saṭṭhiyojanāni gacchati.
একস্স কির কুলপুত্তস্স অনুপ্পন্নে বুদ্ধে একদিৰসং ভুঞ্জিতুং নিসিন্নস্স পচ্চেকবুদ্ধো দ্ৰারে ঠত্ৰা অগমাসি, তস্সেকো পুরিসো ‘‘পচ্চেকবুদ্ধো আগন্ত্ৰা গতো’’তি আরোচেসি। সো সুত্ৰা ‘‘গচ্ছ, ৰেগেন পত্তং আহরা’’তি আহরাপেত্ৰা অত্তনো সজ্জিতং ভত্তং সব্বং দত্ৰা পেসেসি। ইতরো তং আহরিত্ৰা পচ্চেকবুদ্ধস্স হত্থে ঠপেত্ৰা ‘‘অহং ভন্তে তুম্হাকং কতেন ইমিনা কাযৰেয্যাৰতিকেন যত্থ যত্থ নিব্বত্তোপি ৰাহনসম্পন্নো হোমী’’তি পত্থনং অকাসি। সো অযং এতরহি পজ্জোতো নাম রাজা জাতো, তায পত্থনায অযং ৰাহনসম্পত্তি।
Ekassa kira kulaputtassa anuppanne buddhe ekadivasaṃ bhuñjituṃ nisinnassa paccekabuddho dvāre ṭhatvā agamāsi, tasseko puriso ‘‘paccekabuddho āgantvā gato’’ti ārocesi. So sutvā ‘‘gaccha, vegena pattaṃ āharā’’ti āharāpetvā attano sajjitaṃ bhattaṃ sabbaṃ datvā pesesi. Itaro taṃ āharitvā paccekabuddhassa hatthe ṭhapetvā ‘‘ahaṃ bhante tumhākaṃ katena iminā kāyaveyyāvatikena yattha yattha nibbattopi vāhanasampanno homī’’ti patthanaṃ akāsi. So ayaṃ etarahi pajjoto nāma rājā jāto, tāya patthanāya ayaṃ vāhanasampatti.
সপ্পিং পাযেত্ৰাতি সপ্পিঞ্চ পাযেত্ৰা; পরিচারিকানঞ্চ আহারাচারে ৰিধিং আচিক্খিত্ৰা। নখেন ভেসজ্জং ওলুম্পেত্ৰাতি নখেন ভেসজ্জং ওদহিত্ৰা; পক্খিপিত্ৰাতি অত্থো। নিচ্ছারেসীতি ৰিরেচেসি।
Sappiṃ pāyetvāti sappiñca pāyetvā; paricārikānañca āhārācāre vidhiṃ ācikkhitvā. Nakhena bhesajjaṃ olumpetvāti nakhena bhesajjaṃ odahitvā; pakkhipitvāti attho. Nicchāresīti virecesi.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ২০৭. পজ্জোতরাজৰত্থু • 207. Pajjotarājavatthu
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / পজ্জোতরাজৰত্থুকথাদিৰণ্ণনা • Pajjotarājavatthukathādivaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / পজ্জোতরাজৰত্থুকথাৰণ্ণনা • Pajjotarājavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ২০৭. পজ্জোতরাজৰত্থুকথা • 207. Pajjotarājavatthukathā
