| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೬. ಪಜ್ಜೋತಸುತ್ತವಣ್ಣನಾ
6. Pajjotasuttavaṇṇanā
೨೬. ದಿವಾರತ್ತಿನ್ತಿ ನ ಆದಿಚ್ಚೋ ವಿಯ ದಿವಾ ಏವ, ನ ಚನ್ದಿಮಾ ವಿಯ ರತ್ತಿಂ ಏವ, ಅಥ ಖೋ ದಿವಾ ಚ ರತ್ತಿಞ್ಚ। ತತ್ಥ ತತ್ಥಾತಿ ಯತ್ಥ ಯತ್ಥ ಸಮ್ಪಜ್ಜಲಿತೋ, ತತ್ಥ ತತ್ಥೇವ ಪದೇಸೇ, ನ ಆದಿಚ್ಚೋ ವಿಯ ಚನ್ದಿಮಾ ವಿಯ ಸಕಲಂ ಮಹಾದಿಸಂ ದಿಸನ್ತರಾಳಞ್ಚ। ಞಾಣಾನುಭಾವೇನ ಉಪ್ಪನ್ನಾಲೋಕೋ ಞಾಣಾಲೋಕೋತಿ ವದನ್ತಿ। ‘‘ಇದಂ ದುಕ್ಖಂ ಅರಿಯಸಚ್ಚನ್ತಿ ಪುಬ್ಬೇ ಮೇ, ಭಿಕ್ಖವೇ, ಅನನುಸ್ಸುತೇಸು ಧಮ್ಮೇಸು ಚಕ್ಖುಂ ಉದಪಾದಿ ಞಾಣಂ ಉದಪಾದಿ ಪಞ್ಞಾ ಉದಪಾದಿ ವಿಜ್ಜಾ ಉದಪಾದಿ ಆಲೋಕೋ ಉದಪಾದೀ’’ತಿ (ಸಂ॰ ನಿ॰ ೫.೧೦೮೧; ಮಹಾವ॰ ೧೫; ಪಟಿ॰ ಮ॰ ೨.೩೦) ಪನ ವಚನತೋ ಮಗ್ಗೋ ಞಾಣಾಲೋಕೋ। ‘‘ತಮೋ ವಿಹತೋ, ಆಲೋಕೋ ಉಪ್ಪನ್ನೋ’’ತಿ (ಮ॰ ನಿ॰ ೧.೩೮೬; ಪಾರಾ॰ ೧೨) ವಾ ವಚನತೋ ವಿಜ್ಜತ್ತಯಾಲೋಕೋ ಞಾಣಾಲೋಕೋ। ಪಠಮಾಭಿಸಮ್ಬೋಧಿಯಂ ವಿಯ ಸಞ್ಜಾತಪೀತಿವಿಪ್ಫಾರೋ, ವಿಸೇಸತೋ ರತನಘರೇ ಸಮನ್ತಪಟ್ಠಾನವಿಚಿನನೇ ಸಞ್ಜಾತಪೀತಿವಸೇನ ಉಪ್ಪನ್ನಸರೀರೋಭಾಸೋ ವಾ ಪೀತಿಆಲೋಕೋ। ತತ್ಥೇವ ಉಪ್ಪನ್ನಪಸಾದವಸೇನ ಸಞ್ಜಾತಆಲೋಕೋವ ಪಸಾದಾಲೋಕೋ। ಧಮ್ಮಚಕ್ಕಪವತ್ತನೇ ‘‘ಅಞ್ಞಾಸಿ ವತ, ಭೋ, ಕೋಣ್ಡಞ್ಞೋ’’ತಿ ಉಪ್ಪನ್ನಪಸಾದಾಲೋಕೋತಿ ಚ ವದನ್ತಿ। ಸಬ್ಬತ್ಥೇವ ಸತ್ಥು ಧಮ್ಮದೇಸನಾ ಸತ್ತಾನಂ ಹದಯತಮಂ ವಿಧಮನ್ತೀ ಧಮ್ಮಕಥಾಆಲೋಕೋ। ಸಬ್ಬೋಪಿ ಬುದ್ಧಾನಂ ಪಾತುಭಾವಾ ಉಪ್ಪನ್ನೋ ಆಲೋಕೋತಿ ಇಮಿನಾ ಸಾವಕಾನಂ ದೇಸನಾಯ ಸಞ್ಜಾತಧಮ್ಮಾಲೋಕೋಪಿ ಬುದ್ಧಾನುಭಾವೋತಿ ದಸ್ಸೇತಿ।
26.Divārattinti na ādicco viya divā eva, na candimā viya rattiṃ eva, atha kho divā ca rattiñca. Tattha tatthāti yattha yattha sampajjalito, tattha tattheva padese, na ādicco viya candimā viya sakalaṃ mahādisaṃ disantarāḷañca. Ñāṇānubhāvena uppannāloko ñāṇālokoti vadanti. ‘‘Idaṃ dukkhaṃ ariyasaccanti pubbe me, bhikkhave, ananussutesu dhammesu cakkhuṃ udapādi ñāṇaṃ udapādi paññā udapādi vijjā udapādi āloko udapādī’’ti (saṃ. ni. 5.1081; mahāva. 15; paṭi. ma. 2.30) pana vacanato maggo ñāṇāloko. ‘‘Tamo vihato, āloko uppanno’’ti (ma. ni. 1.386; pārā. 12) vā vacanato vijjattayāloko ñāṇāloko. Paṭhamābhisambodhiyaṃ viya sañjātapītivipphāro, visesato ratanaghare samantapaṭṭhānavicinane sañjātapītivasena uppannasarīrobhāso vā pītiāloko. Tattheva uppannapasādavasena sañjātaālokova pasādāloko. Dhammacakkapavattane ‘‘aññāsi vata, bho, koṇḍañño’’ti uppannapasādālokoti ca vadanti. Sabbattheva satthu dhammadesanā sattānaṃ hadayatamaṃ vidhamantī dhammakathāāloko. Sabbopi buddhānaṃ pātubhāvā uppanno ālokoti iminā sāvakānaṃ desanāya sañjātadhammālokopi buddhānubhāvoti dasseti.
ಪಜ್ಜೋತಸುತ್ತವಣ್ಣನಾ ನಿಟ್ಠಿತಾ।
Pajjotasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೬. ಪಜ್ಜೋತಸುತ್ತಂ • 6. Pajjotasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೬. ಪಜ್ಜೋತಸುತ್ತವಣ್ಣನಾ • 6. Pajjotasuttavaṇṇanā
