| Library / Tipiṭaka / ติปิฎก • Tipiṭaka / จูฬวคฺค-อฎฺฐกถา • Cūḷavagga-aṭṭhakathā |
ปกาสนียกมฺมาทิกถา
Pakāsanīyakammādikathā
๓๓๖. เขฬาสกสฺสาติ เอตฺถ มิจฺฉาชีเวน อุปฺปนฺนปจฺจยา อริเยหิ วนฺตพฺพา เขฬสทิสา, ตถารูเป ปจฺจเย อยํ อโชฺฌหรตีติ กตฺวา เขฬาสโกติ ภควตา วุโตฺตฯ
336.Kheḷāsakassāti ettha micchājīvena uppannapaccayā ariyehi vantabbā kheḷasadisā, tathārūpe paccaye ayaṃ ajjhoharatīti katvā kheḷāsakoti bhagavatā vutto.
๓๔๐. ปตฺถเทฺธน กาเยนาติ โปตฺถกรูปสทิเสน นิจฺจเลน กาเยนฯ
340.Patthaddhena kāyenāti potthakarūpasadisena niccalena kāyena.
๓๔๒. มยํ โข ภเณ ราชญาตกา นามาติ ราชา อเมฺห ชานาตีติ ราชญาตกสฺส ภาเวน อตฺตานํ อุกฺกํสโนฺต อาหฯ ปหฎฺฐกณฺณวาโลติ พนฺธเน นิจฺจเล กตฺวาฯ
342.Mayaṃ kho bhaṇe rājañātakā nāmāti rājā amhe jānātīti rājañātakassa bhāvena attānaṃ ukkaṃsanto āha. Pahaṭṭhakaṇṇavāloti bandhane niccale katvā.
ทุกฺขญฺหิ กุญฺชร นาคมาสโทติ โภ กุญฺชร พุทฺธนาคํ อาสาทนํ วธกจิเตฺตน อุปคมนํ นาม ทุกฺขํฯ นาคหตสฺสาติ พุทฺธนาคํ ฆาตกสฺสฯ
Dukkhañhi kuñjara nāgamāsadoti bho kuñjara buddhanāgaṃ āsādanaṃ vadhakacittena upagamanaṃ nāma dukkhaṃ. Nāgahatassāti buddhanāgaṃ ghātakassa.
ปฎิกุฎิโยว โอสกฺกีติ ตถาคตาภิมุโขเยว ปิฎฺฐิเมหิ ปาเทหิ อวสกฺกิฯ อลกฺขิโกติ เอตฺถ น ลเกฺขตีติ อลกฺขิโก; น ชานาตีติ อโตฺถ , อหํ ปาปกมฺมํ กโรมีติ น ชานาติฯ น ลกฺขิตโพฺพติ วา อลกฺขิโก; น ปสฺสิตโพฺพติ อโตฺถฯ
Paṭikuṭiyova osakkīti tathāgatābhimukhoyeva piṭṭhimehi pādehi avasakki. Alakkhikoti ettha na lakkhetīti alakkhiko; na jānātīti attho , ahaṃ pāpakammaṃ karomīti na jānāti. Na lakkhitabboti vā alakkhiko; na passitabboti attho.
๓๔๓. ติกโภชนนฺติ เอตฺถ ตีหิ ชเนหิ ภุญฺชิตพฺพโภชนํฯ ตํ ปญฺญาเปสฺสามีติ ตํ อนุชานิสฺสามิ ฯ คณโภชเน ปน ยถาธโมฺม กาเรตโพฺพติฯ ปญฺจวตฺถุยาจนกถา สงฺฆาทิเสสวณฺณนายํ วุตฺตาฯ กปฺปนฺติ อายุกปฺปํฯ พฺรหฺมํ ปุญฺญนฺติ เสฎฺฐํ ปุญฺญํฯ กปฺปํ สคฺคมฺหีติ อายุกปฺปเมวฯ
343.Tikabhojananti ettha tīhi janehi bhuñjitabbabhojanaṃ. Taṃ paññāpessāmīti taṃ anujānissāmi . Gaṇabhojane pana yathādhammo kāretabboti. Pañcavatthuyācanakathā saṅghādisesavaṇṇanāyaṃ vuttā. Kappanti āyukappaṃ. Brahmaṃ puññanti seṭṭhaṃ puññaṃ. Kappaṃ saggamhīti āyukappameva.
ปกาสนียกมฺมาทิกถา นิฎฺฐิตาฯ
Pakāsanīyakammādikathā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / จูฬวคฺคปาฬิ • Cūḷavaggapāḷi
ปกาสนียกมฺมํ • Pakāsanīyakammaṃ
อภิมารเปสนํ • Abhimārapesanaṃ
นาฬาคิริเปสนํ • Nāḷāgiripesanaṃ
ปญฺจวตฺถุยาจนกถา • Pañcavatthuyācanakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā
นาฬาคิริเปสนกถาวณฺณนา • Nāḷāgiripesanakathāvaṇṇanā
ปญฺจวตฺถุยาจนกถาวณฺณนา • Pañcavatthuyācanakathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วชิรพุทฺธิ-ฎีกา • Vajirabuddhi-ṭīkā / ฉสกฺยปพฺพชฺชากถาวณฺณนา • Chasakyapabbajjākathāvaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / ฉสกฺยปพฺพชฺชากถาทิวณฺณนา • Chasakyapabbajjākathādivaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ปกาสนียกมฺมาทิกถา • Pakāsanīyakammādikathā
