| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
१३. पाकतिन्द्रियसुत्तं
13. Pākatindriyasuttaṃ
२३३. एकं समयं सम्बहुला भिक्खू कोसलेसु विहरन्ति अञ्ञतरस्मिं वनसण्डे उद्धता उन्नळा चपला मुखरा विकिण्णवाचा मुट्ठस्सतिनो असम्पजाना असमाहिता विब्भन्तचित्ता पाकतिन्द्रिया। अथ खो या तस्मिं वनसण्डे अधिवत्था देवता तेसं भिक्खूनं अनुकम्पिका अत्थकामा ते भिक्खू संवेजेतुकामा येन ते भिक्खू तेनुपसङ्कमि; उपसङ्कमित्वा ते भिक्खू गाथाहि अज्झभासि –
233. Ekaṃ samayaṃ sambahulā bhikkhū kosalesu viharanti aññatarasmiṃ vanasaṇḍe uddhatā unnaḷā capalā mukharā vikiṇṇavācā muṭṭhassatino asampajānā asamāhitā vibbhantacittā pākatindriyā. Atha kho yā tasmiṃ vanasaṇḍe adhivatthā devatā tesaṃ bhikkhūnaṃ anukampikā atthakāmā te bhikkhū saṃvejetukāmā yena te bhikkhū tenupasaṅkami; upasaṅkamitvā te bhikkhū gāthāhi ajjhabhāsi –
‘‘सुखजीविनो पुरे आसुं, भिक्खू गोतमसावका।
‘‘Sukhajīvino pure āsuṃ, bhikkhū gotamasāvakā;
अनिच्छा पिण्डमेसना, अनिच्छा सयनासनं।
Anicchā piṇḍamesanā, anicchā sayanāsanaṃ;
लोके अनिच्चतं ञत्वा, दुक्खस्सन्तं अकंसु ते॥
Loke aniccataṃ ñatvā, dukkhassantaṃ akaṃsu te.
‘‘दुप्पोसं कत्वा अत्तानं, गामे गामणिका विय।
‘‘Dupposaṃ katvā attānaṃ, gāme gāmaṇikā viya;
भुत्वा भुत्वा निपज्जन्ति, परागारेसु मुच्छिता॥
Bhutvā bhutvā nipajjanti, parāgāresu mucchitā.
‘‘सङ्घस्स अञ्जलिं कत्वा, इधेकच्चे वदामहं।
‘‘Saṅghassa añjaliṃ katvā, idhekacce vadāmahaṃ;
‘‘ये खो पमत्ता विहरन्ति, ते मे सन्धाय भासितं।
‘‘Ye kho pamattā viharanti, te me sandhāya bhāsitaṃ;
ये अप्पमत्ता विहरन्ति, नमो तेसं करोमह’’न्ति॥
Ye appamattā viharanti, namo tesaṃ karomaha’’nti.
अथ खो ते भिक्खू ताय देवताय संवेजिता संवेगमापादुन्ति।
Atha kho te bhikkhū tāya devatāya saṃvejitā saṃvegamāpādunti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १३. पाकतिन्द्रियसुत्तवण्णना • 13. Pākatindriyasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / १३. पाकतिन्द्रियसुत्तवण्णना • 13. Pākatindriyasuttavaṇṇanā
