| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๑๓. ปากตินฺทฺริยสุตฺตํ
13. Pākatindriyasuttaṃ
๒๓๓. เอกํ สมยํ สมฺพหุลา ภิกฺขู โกสเลสุ วิหรนฺติ อญฺญตรสฺมิํ วนสเณฺฑ อุทฺธตา อุนฺนฬา จปลา มุขรา วิกิณฺณวาจา มุฎฺฐสฺสติโน อสมฺปชานา อสมาหิตา วิพฺภนฺตจิตฺตา ปากตินฺทฺริยาฯ อถ โข ยา ตสฺมิํ วนสเณฺฑ อธิวตฺถา เทวตา เตสํ ภิกฺขูนํ อนุกมฺปิกา อตฺถกามา เต ภิกฺขู สํเวเชตุกามา เยน เต ภิกฺขู เตนุปสงฺกมิ; อุปสงฺกมิตฺวา เต ภิกฺขู คาถาหิ อชฺฌภาสิ –
233. Ekaṃ samayaṃ sambahulā bhikkhū kosalesu viharanti aññatarasmiṃ vanasaṇḍe uddhatā unnaḷā capalā mukharā vikiṇṇavācā muṭṭhassatino asampajānā asamāhitā vibbhantacittā pākatindriyā. Atha kho yā tasmiṃ vanasaṇḍe adhivatthā devatā tesaṃ bhikkhūnaṃ anukampikā atthakāmā te bhikkhū saṃvejetukāmā yena te bhikkhū tenupasaṅkami; upasaṅkamitvā te bhikkhū gāthāhi ajjhabhāsi –
‘‘สุขชีวิโน ปุเร อาสุํ, ภิกฺขู โคตมสาวกา;
‘‘Sukhajīvino pure āsuṃ, bhikkhū gotamasāvakā;
อนิจฺฉา ปิณฺฑเมสนา, อนิจฺฉา สยนาสนํ;
Anicchā piṇḍamesanā, anicchā sayanāsanaṃ;
โลเก อนิจฺจตํ ญตฺวา, ทุกฺขสฺสนฺตํ อกํสุ เตฯ
Loke aniccataṃ ñatvā, dukkhassantaṃ akaṃsu te.
‘‘ทุโปฺปสํ กตฺวา อตฺตานํ, คาเม คามณิกา วิย;
‘‘Dupposaṃ katvā attānaṃ, gāme gāmaṇikā viya;
ภุตฺวา ภุตฺวา นิปชฺชนฺติ, ปราคาเรสุ มุจฺฉิตาฯ
Bhutvā bhutvā nipajjanti, parāgāresu mucchitā.
‘‘สงฺฆสฺส อญฺชลิํ กตฺวา, อิเธกเจฺจ วทามหํ;
‘‘Saṅghassa añjaliṃ katvā, idhekacce vadāmahaṃ;
‘‘เย โข ปมตฺตา วิหรนฺติ, เต เม สนฺธาย ภาสิตํ;
‘‘Ye kho pamattā viharanti, te me sandhāya bhāsitaṃ;
เย อปฺปมตฺตา วิหรนฺติ, นโม เตสํ กโรมห’’นฺติฯ
Ye appamattā viharanti, namo tesaṃ karomaha’’nti.
อถ โข เต ภิกฺขู ตาย เทวตาย สํเวชิตา สํเวคมาปาทุนฺติฯ
Atha kho te bhikkhū tāya devatāya saṃvejitā saṃvegamāpādunti.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑๓. ปากตินฺทฺริยสุตฺตวณฺณนา • 13. Pākatindriyasuttavaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๑๓. ปากตินฺทฺริยสุตฺตวณฺณนา • 13. Pākatindriyasuttavaṇṇanā
