| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
பகிண்ணககதா²வண்ணனா
Pakiṇṇakakathāvaṇṇanā
பகிண்ணகந்தி வோமிஸ்ஸகனயங். ஸமுட்டா²னந்தி உப்பத்திகாரணங். கிரியாதிஆதி³ நித³ஸ்ஸனமத்தங், அகிரியாதீ³னம்பி ஸங்க³ஹோ த³ட்ட²ப்³போ³. வேத³னாயாதி ஸஹயோகே³ கரணவசனங், வேத³னாய ஸஹ குஸலஞ்சாதி வுத்தங் ஹோதி. ஸப்³ப³ஸங்கா³ஹகவஸேனாதி ஸப்³பே³ஸங் ஸிக்கா²பதா³னங் ஸங்கா³ஹகவஸேன. ச² ஸிக்கா²பத³ஸமுட்டா²னானீதி காயோ வாசா காயவாசா காயசித்தங் வாசாசித்தங் காயவாசாசித்தந்தி ஏவங் வுத்தானி ச² ஆபத்திஸமுட்டா²னானி. ஆபத்தியேவ ஹி ஸிக்கா²பத³ஸீஸேன வுத்தா. ஸமுட்டா²னாத³யோ ஹி ஆபத்தியா ஹொந்தி, ந ஸிக்கா²பத³ஸ்ஸ, இமேஸு பன ச²ஸு ஸமுட்டா²னேஸு புரிமானி தீணி அசித்தகானி, பச்சி²மானி ஸசித்தகானி. தேஸு ஏகேன வா த்³வீஹி வா தீஹி வா சதூஹி வா ச²ஹி வா ஸமுட்டா²னேஹி ஆபத்தியோ ஸமுட்ட²ஹந்தி, பஞ்சஸமுட்டா²னா ஆபத்தி நாம நத்தி². தத்த² ஏகஸமுட்டா²னா சதுத்தே²ன ச பஞ்சமேன ச ச²ட்டே²ன ச ஸமுட்டா²னேன ஸமுட்டா²தி, ந அஞ்ஞேன. த்³விஸமுட்டா²னா பட²மசதுத்தே²ஹி ச து³தியபஞ்சமேஹி ச ததியச²ட்டே²ஹி ச சதுத்த²ச²ட்டே²ஹி ச பஞ்சமச²ட்டே²ஹி ச ஸமுட்டா²னேஹி ஸமுட்டா²தி, ந அஞ்ஞேஹி. திஸமுட்டா²னா பட²மேஹி ச தீஹி, பச்சி²மேஹி ச தீஹி ஸமுட்டா²னேஹி ஸமுட்டா²தி, ந அஞ்ஞேஹி. சதுஸமுட்டா²னா பட²மததியசதுத்த²ச²ட்டே²ஹி ச து³தியததியபஞ்சமச²ட்டே²ஹி ச ஸமுட்டா²னேஹி ஸமுட்டா²தி, ந அஞ்ஞேஹி. ச²ஸமுட்டா²னா ச²ஹிபி ஸமுட்டா²தி.
Pakiṇṇakanti vomissakanayaṃ. Samuṭṭhānanti uppattikāraṇaṃ. Kiriyātiādi nidassanamattaṃ, akiriyādīnampi saṅgaho daṭṭhabbo. Vedanāyāti sahayoge karaṇavacanaṃ, vedanāya saha kusalañcāti vuttaṃ hoti. Sabbasaṅgāhakavasenāti sabbesaṃ sikkhāpadānaṃ saṅgāhakavasena. Cha sikkhāpadasamuṭṭhānānīti kāyo vācā kāyavācā kāyacittaṃ vācācittaṃ kāyavācācittanti evaṃ vuttāni cha āpattisamuṭṭhānāni. Āpattiyeva hi sikkhāpadasīsena vuttā. Samuṭṭhānādayo hi āpattiyā honti, na sikkhāpadassa, imesu pana chasu samuṭṭhānesu purimāni tīṇi acittakāni, pacchimāni sacittakāni. Tesu ekena vā dvīhi vā tīhi vā catūhi vā chahi vā samuṭṭhānehi āpattiyo samuṭṭhahanti, pañcasamuṭṭhānā āpatti nāma natthi. Tattha ekasamuṭṭhānā catutthena ca pañcamena ca chaṭṭhena ca samuṭṭhānena samuṭṭhāti, na aññena. Dvisamuṭṭhānā paṭhamacatutthehi ca dutiyapañcamehi ca tatiyachaṭṭhehi ca catutthachaṭṭhehi ca pañcamachaṭṭhehi ca samuṭṭhānehi samuṭṭhāti, na aññehi. Tisamuṭṭhānā paṭhamehi ca tīhi, pacchimehi ca tīhi samuṭṭhānehi samuṭṭhāti, na aññehi. Catusamuṭṭhānā paṭhamatatiyacatutthachaṭṭhehi ca dutiyatatiyapañcamachaṭṭhehi ca samuṭṭhānehi samuṭṭhāti, na aññehi. Chasamuṭṭhānā chahipi samuṭṭhāti.
ஸிக்கா²பத³ங் நாம அத்தி² ச²ஸமுட்டா²னந்தி எத்தா²பி ஸிக்கா²பத³ஸீஸேன ஆபத்தி வுத்தாதி வேதி³தப்³பா³. தேனேவ வக்க²தி ‘‘ஸப்³ப³ஞ்சேதங் ஆபத்தியங் யுஜ்ஜதி, ஸிக்கா²பத³ஸீஸேன பன ஸப்³ப³அட்ட²கதா²ஸு தே³ஸனா ஆருள்ஹா’’தி. காயாதீ³ஹி ச²ஹி ஸமுட்டா²னங் உப்பத்தி, ச² வா ஸமுட்டா²னானி ஏதஸ்ஸாதி ச²ஸமுட்டா²னங். அத்தி² சதுஸமுட்டா²னந்தி காயோ காயவாசா காயசித்தங் காயவாசாசித்தந்தி இமானி சத்தாரி, வாசா காயவாசா வாசாசித்தங் காயவாசாசித்தந்தி இமானி வா சத்தாரி ஸமுட்டா²னானி ஏதஸ்ஸாதி சதுஸமுட்டா²னங். அத்தி² திஸமுட்டா²னந்தி காயோ வாசா காயவாசாதி இமானி தீணி, காயசித்தங் வாசாசித்தங் காயவாசாசித்தந்தி இமானி வா தீணி ஸமுட்டா²னானி ஏதஸ்ஸாதி திஸமுட்டா²னங். த்³விஸமுட்டா²னங் ஏகஸமுட்டா²னஞ்ச ஸமுட்டா²னஸீஸவஸேன த³ஸ்ஸெந்தோ ‘‘அத்தி² கதி²னஸமுட்டா²ன’’ந்திஆதி³மாஹ. தேரஸ ஹி ஸமுட்டா²னஸீஸானி பட²மபாராஜிகஸமுட்டா²னங் அதி³ன்னாதா³னஸமுட்டா²னங் ஸஞ்சரித்தஸமுட்டா²னங் ஸமனுபா⁴ஸனஸமுட்டா²னங் கதி²னஸமுட்டா²னங் ஏளகலோமஸமுட்டா²னங் பத³ஸோத⁴ம்மஸமுட்டா²னங் அத்³தா⁴னஸமுட்டா²னங் தெ²ய்யஸத்த²ஸமுட்டா²னங் த⁴ம்மதே³ஸனாஸமுட்டா²னங் பூ⁴தாரோசனஸமுட்டா²னங் சோரிவுட்டா²பனஸமுட்டா²னங் அனநுஞ்ஞாதஸமுட்டா²னந்தி.
Sikkhāpadaṃ nāma atthi chasamuṭṭhānanti etthāpi sikkhāpadasīsena āpatti vuttāti veditabbā. Teneva vakkhati ‘‘sabbañcetaṃ āpattiyaṃ yujjati, sikkhāpadasīsena pana sabbaaṭṭhakathāsu desanā āruḷhā’’ti. Kāyādīhi chahi samuṭṭhānaṃ uppatti, cha vā samuṭṭhānāni etassāti chasamuṭṭhānaṃ. Atthi catusamuṭṭhānanti kāyo kāyavācā kāyacittaṃ kāyavācācittanti imāni cattāri, vācā kāyavācā vācācittaṃ kāyavācācittanti imāni vā cattāri samuṭṭhānāni etassāti catusamuṭṭhānaṃ. Atthi tisamuṭṭhānanti kāyo vācā kāyavācāti imāni tīṇi, kāyacittaṃ vācācittaṃ kāyavācācittanti imāni vā tīṇi samuṭṭhānāni etassāti tisamuṭṭhānaṃ. Dvisamuṭṭhānaṃ ekasamuṭṭhānañca samuṭṭhānasīsavasena dassento ‘‘atthi kathinasamuṭṭhāna’’ntiādimāha. Terasa hi samuṭṭhānasīsāni paṭhamapārājikasamuṭṭhānaṃ adinnādānasamuṭṭhānaṃ sañcarittasamuṭṭhānaṃ samanubhāsanasamuṭṭhānaṃ kathinasamuṭṭhānaṃ eḷakalomasamuṭṭhānaṃ padasodhammasamuṭṭhānaṃ addhānasamuṭṭhānaṃ theyyasatthasamuṭṭhānaṃ dhammadesanāsamuṭṭhānaṃ bhūtārocanasamuṭṭhānaṃ corivuṭṭhāpanasamuṭṭhānaṃ ananuññātasamuṭṭhānanti.
தத்த² ‘‘அத்தி² ச²ஸமுட்டா²ன’’ந்தி இமினா ஸஞ்சரித்தஸமுட்டா²னங் வுத்தங். ‘‘அத்தி² சதுஸமுட்டா²ன’’ந்தி இமினா பன அத்³தா⁴னஸமுட்டா²னங் அனநுஞ்ஞாதஸமுட்டா²னஞ்ச ஸங்க³ஹிதங். யஞ்ஹி பட²மததியசதுத்த²ச²ட்டே²ஹி ஸமுட்டா²தி, இத³ங் அத்³தா⁴னஸமுட்டா²னங். யங் பன து³தியததியபஞ்சமச²ட்டே²ஹி ஸமுட்டா²தி, இத³ங் அனநுஞ்ஞாதஸமுட்டா²னங். ‘‘அத்தி² திஸமுட்டா²ன’’ந்தி இமினா அதி³ன்னாதா³னஸமுட்டா²னங் பூ⁴தாரோசனஸமுட்டா²னஞ்ச ஸங்க³ஹிதங். யஞ்ஹி ஸசித்தகேஹி தீஹி ஸமுட்டா²னேஹி ஸமுட்டா²தி, இத³ங் அதி³ன்னாதா³னஸமுட்டா²னங். யங் பன அசித்தகேஹி தீஹி ஸமுட்டா²தி, இத³ங் பூ⁴தாரோசனஸமுட்டா²னங். ‘‘அத்தி² கதி²னஸமுட்டா²ன’’ந்திஆதி³னா பன அவஸேஸஸமுட்டா²னஸீஸேன த்³விஸமுட்டா²னங் ஏகஸமுட்டா²னஞ்ச ஸங்க³ண்ஹாதி. ததா² ஹி யங் ததியச²ட்டே²ஹி ஸமுட்டா²தி, இத³ங் கதி²னஸமுட்டா²னந்தி வுச்சதி. யங் பட²மசதுத்தே²ஹி ஸமுட்டா²தி, இத³ங் ஏளகலோமஸமுட்டா²னங். யங் ச²ட்டே²னேவ ஸமுட்டா²தி, இத³ங் து⁴ரனிக்கே²பஸமுட்டா²னங், ஸமனுபா⁴ஸனஸமுட்டா²னந்திபி தஸ்ஸேவ நாமங். ஆதி³-ஸத்³த³ஸங்க³ஹிதேஸு பன பட²மபாராஜிகஸமுட்டா²னபத³ஸோத⁴ம்மதெ²ய்யஸத்த²த⁴ம்மதே³ஸனாசோரிவுட்டா²பனஸமுட்டா²னேஸு யங் காயசித்ததோ ஸமுட்டா²தி, இத³ங் பட²மபாராஜிகஸமுட்டா²னங். யங் து³தியபஞ்சமேஹி ஸமுட்டா²தி, இத³ங் பத³ஸோத⁴ம்மஸமுட்டா²னங். யங் சதுத்த²ச²ட்டே²ஹி ஸமுட்டா²தி, இத³ங் தெ²ய்யஸத்த²ஸமுட்டா²னங். யங் பஞ்சமேனேவ ஸமுட்டா²தி, இத³ங் த⁴ம்மதே³ஸனாஸமுட்டா²னங். யங் பஞ்சமச²ட்டே²ஹி ஸமுட்டா²தி, இத³ங் சோரிவுட்டா²பனஸமுட்டா²னந்தி வேதி³தப்³ப³ங்.
Tattha ‘‘atthi chasamuṭṭhāna’’nti iminā sañcarittasamuṭṭhānaṃ vuttaṃ. ‘‘Atthi catusamuṭṭhāna’’nti iminā pana addhānasamuṭṭhānaṃ ananuññātasamuṭṭhānañca saṅgahitaṃ. Yañhi paṭhamatatiyacatutthachaṭṭhehi samuṭṭhāti, idaṃ addhānasamuṭṭhānaṃ. Yaṃ pana dutiyatatiyapañcamachaṭṭhehi samuṭṭhāti, idaṃ ananuññātasamuṭṭhānaṃ. ‘‘Atthi tisamuṭṭhāna’’nti iminā adinnādānasamuṭṭhānaṃ bhūtārocanasamuṭṭhānañca saṅgahitaṃ. Yañhi sacittakehi tīhi samuṭṭhānehi samuṭṭhāti, idaṃ adinnādānasamuṭṭhānaṃ. Yaṃ pana acittakehi tīhi samuṭṭhāti, idaṃ bhūtārocanasamuṭṭhānaṃ. ‘‘Atthi kathinasamuṭṭhāna’’ntiādinā pana avasesasamuṭṭhānasīsena dvisamuṭṭhānaṃ ekasamuṭṭhānañca saṅgaṇhāti. Tathā hi yaṃ tatiyachaṭṭhehi samuṭṭhāti, idaṃ kathinasamuṭṭhānanti vuccati. Yaṃ paṭhamacatutthehi samuṭṭhāti, idaṃ eḷakalomasamuṭṭhānaṃ. Yaṃ chaṭṭheneva samuṭṭhāti, idaṃ dhuranikkhepasamuṭṭhānaṃ, samanubhāsanasamuṭṭhānantipi tasseva nāmaṃ. Ādi-saddasaṅgahitesu pana paṭhamapārājikasamuṭṭhānapadasodhammatheyyasatthadhammadesanācorivuṭṭhāpanasamuṭṭhānesu yaṃ kāyacittato samuṭṭhāti, idaṃ paṭhamapārājikasamuṭṭhānaṃ. Yaṃ dutiyapañcamehi samuṭṭhāti, idaṃ padasodhammasamuṭṭhānaṃ. Yaṃ catutthachaṭṭhehi samuṭṭhāti, idaṃ theyyasatthasamuṭṭhānaṃ. Yaṃ pañcameneva samuṭṭhāti, idaṃ dhammadesanāsamuṭṭhānaṃ. Yaṃ pañcamachaṭṭhehi samuṭṭhāti, idaṃ corivuṭṭhāpanasamuṭṭhānanti veditabbaṃ.
ஏவங் ஸமுட்டா²னஸீஸேன ஸப்³ப³ஸிக்கா²பதா³னி தேரஸதா⁴ த³ஸ்ஸெத்வா இதா³னி கிரியாவஸேன பஞ்சதா⁴ த³ஸ்ஸெந்தோ ‘‘தத்ராபி கிஞ்சி கிரியதோ ஸமுட்டா²தீ’’திஆதி³மாஹ. தத்த² கிஞ்சீதி ஸிக்கா²பத³ஸீஸேன ஆபத்திங் வத³தி. தஸ்மா யா காயேன வா வாசாய வா பத²வீக²ணனாதீ³ஸு விய வீதிக்கமங் கரொந்தஸ்ஸ ஹோதி, அயங் கிரியதோ ஸமுட்டா²தி நாம. யா காயவாசாய கத்தப்³ப³ங் அகரொந்தஸ்ஸ ஹோதி பட²மகதி²னாபத்தி விய, அயங் அகிரியதோ ஸமுட்டா²தி நாம. யா கரொந்தஸ்ஸ ச அகரொந்தஸ்ஸ ச ஹோதி அஞ்ஞாதிகாய பி⁴க்கு²னியா ஹத்த²தோ சீவரபடிக்³க³ஹணாபத்தி விய, அயங் கிரியாகிரியதோ ஸமுட்டா²தி நாம. யா ஸியா கரொந்தஸ்ஸ ச ஸியா அகரொந்தஸ்ஸ ச ஹோதி ரூபியபடிக்³க³ஹணாபத்தி விய, அயங் ஸியா கிரியதோ ஸியா அகிரியதோ ஸமுட்டா²தி நாம. யா ஸியா கரொந்தஸ்ஸ ச ஸியா கரொந்தஸ்ஸ ச அகரொந்தஸ்ஸ ச ஹோதி குடிகாராபத்தி விய, அயங் ஸியா கிரியதோ ஸியா கிரியாகிரியதோ ஸமுட்டா²தி நாம.
Evaṃ samuṭṭhānasīsena sabbasikkhāpadāni terasadhā dassetvā idāni kiriyāvasena pañcadhā dassento ‘‘tatrāpi kiñci kiriyato samuṭṭhātī’’tiādimāha. Tattha kiñcīti sikkhāpadasīsena āpattiṃ vadati. Tasmā yā kāyena vā vācāya vā pathavīkhaṇanādīsu viya vītikkamaṃ karontassa hoti, ayaṃ kiriyato samuṭṭhāti nāma. Yā kāyavācāya kattabbaṃ akarontassa hoti paṭhamakathināpatti viya, ayaṃ akiriyato samuṭṭhāti nāma. Yā karontassa ca akarontassa ca hoti aññātikāya bhikkhuniyā hatthato cīvarapaṭiggahaṇāpatti viya, ayaṃ kiriyākiriyato samuṭṭhāti nāma. Yā siyā karontassa ca siyā akarontassa ca hoti rūpiyapaṭiggahaṇāpatti viya, ayaṃ siyā kiriyato siyā akiriyato samuṭṭhāti nāma. Yā siyā karontassa ca siyā karontassa ca akarontassa ca hoti kuṭikārāpatti viya, ayaṃ siyā kiriyato siyā kiriyākiriyato samuṭṭhāti nāma.
இதா³னி ஸப்³ப³ஸிக்கா²பதா³னி ஸஞ்ஞாவஸேன த்³விதா⁴ கத்வா த³ஸ்ஸெந்தோ ‘‘தத்ராபி அத்தி² ஸஞ்ஞாவிமொக்க²’’ந்திஆதி³மாஹ. ஸஞ்ஞாய அபா⁴வேன விமொக்கோ² அஸ்ஸாதி ஸஞ்ஞாவிமொக்க²ந்தி மஜ்ஜே²பத³லோபஸமாஸோ த³ட்ட²ப்³போ³. யதோ ஹி வீதிக்கமஸஞ்ஞாஅபா⁴வேன முச்சதி, இத³ங் ஸஞ்ஞாவிமொக்க²ந்தி வுச்சதி. சித்தங்க³ங் லப⁴தியேவாதி காயசித்தாதி³ஸசித்தகஸமுட்டா²னேஹேவ ஸமுட்ட²ஹனதோ . ‘‘லப⁴தியேவா’’தி அவதா⁴ரணேன நோ ந லப⁴தீதி த³ஸ்ஸேதி. தஸ்மா யங் சித்தங்க³ங் லப⁴தி, ந லப⁴தி ச, தங் ‘‘இதர’’ந்தி வுத்தங் இதர-ஸத்³த³ஸ்ஸ வுத்தபடியோக³விஸயத்தா.
Idāni sabbasikkhāpadāni saññāvasena dvidhā katvā dassento ‘‘tatrāpi atthi saññāvimokkha’’ntiādimāha. Saññāya abhāvena vimokkho assāti saññāvimokkhanti majjhepadalopasamāso daṭṭhabbo. Yato hi vītikkamasaññāabhāvena muccati, idaṃ saññāvimokkhanti vuccati. Cittaṅgaṃ labhatiyevāti kāyacittādisacittakasamuṭṭhāneheva samuṭṭhahanato . ‘‘Labhatiyevā’’ti avadhāraṇena no na labhatīti dasseti. Tasmā yaṃ cittaṅgaṃ labhati, na labhati ca, taṃ ‘‘itara’’nti vuttaṃ itara-saddassa vuttapaṭiyogavisayattā.
புன ஸப்³ப³ஸிக்கா²பதா³னி சித்தவஸேன த்³விதா⁴ த³ஸ்ஸெந்தோ ‘‘புன அத்தி² ஸசித்தக’’ந்திஆதி³மாஹ. யங் ஸஹேவ சித்தேன ஆபஜ்ஜதீதி யங் ஸசித்தகேனேவ ஸமுட்டா²னேன ஆபஜ்ஜதி, நோ அசித்தகேன. வினாபீதி அபி-ஸத்³தே³ன ஸஹாபி சித்தேன ஆபஜ்ஜதீதி த³ஸ்ஸேதி. யஞ்ஹி கதா³சி அசித்தகேன, கதா³சி ஸசித்தகேன ஸமுட்டா²னேன ஸமுட்டா²தி, தங் அசித்தகந்தி வுச்சதி. எத்த² ச ஸஞ்ஞாது³கங் அனாபத்திமுகே²ன, ஸசித்தகது³கங் ஆபத்திமுகே²ன வுத்தந்தி இத³மேதேஸங் நானாகரணந்தி வேதி³தப்³ப³ங்.
Puna sabbasikkhāpadāni cittavasena dvidhā dassento ‘‘puna atthi sacittaka’’ntiādimāha. Yaṃ saheva cittena āpajjatīti yaṃ sacittakeneva samuṭṭhānena āpajjati, no acittakena. Vināpīti api-saddena sahāpi cittena āpajjatīti dasseti. Yañhi kadāci acittakena, kadāci sacittakena samuṭṭhānena samuṭṭhāti, taṃ acittakanti vuccati. Ettha ca saññādukaṃ anāpattimukhena, sacittakadukaṃ āpattimukhena vuttanti idametesaṃ nānākaraṇanti veditabbaṃ.
லோகவஜ்ஜது³கஸ்ஸ ஹெட்டா² வுத்தலக்க²ணத்தா தங் அவிப⁴ஜித்வா இதா³னி ஸப்³ப³ஸிக்கா²பதா³னி கம்மவஸேன து³விதா⁴னி, குஸலாதி³வஸேன வேத³னாவஸேன ச திவிதா⁴னி ஹொந்தீதி த³ஸ்ஸெந்தோ ‘‘கம்மகுஸலவேத³னாவஸேனா’’திஆதி³மாஹ. எத்த² பன கிஞ்சாபி அட்ட²கதா²ஸு ஆக³தனயேன காயகம்மங் வசீகம்மந்தி கம்மவஸேன து³கங் வுத்தங், திகமேவ பன த³ஸ்ஸேதுங் வட்டதி. ஸப்³ப³மேவ ஹி ஸிக்கா²பத³ங் காயத்³வாரே ஆபஜ்ஜிதப்³ப³தோ வசீத்³வாரே ஆபஜ்ஜிதப்³ப³தோ காயவசீத்³வாரே ஆபஜ்ஜிதப்³ப³தோ ச திவித⁴ங் ஹோதி. தேனேவ மாதிகாட்ட²கதா²யங் (கங்கா²॰ அட்ட²॰ பட²மபாராஜிகவண்ணனா) வுத்தங் ‘‘ஸப்³பா³வ காயகம்மவசீகம்மதது³ப⁴யவஸேன திவிதா⁴ ஹொந்தி. தத்த² காயத்³வாரே ஆபஜ்ஜிதப்³பா³ காயகம்மந்தி வுச்சதி, வசீத்³வாரே ஆபஜ்ஜிதப்³பா³ வசீகம்மந்தி வுச்சதி, உப⁴யத்த² ஆபஜ்ஜிதப்³பா³ காயகம்மவசீகம்ம’’ந்தி. ததோயேவ ச அதி³ன்னாதா³னஸிக்கா²பதா³தீ³ஸு காயகம்மவசீகம்மந்தி தது³ப⁴யவஸேன த³ஸ்ஸிதங்.
Lokavajjadukassa heṭṭhā vuttalakkhaṇattā taṃ avibhajitvā idāni sabbasikkhāpadāni kammavasena duvidhāni, kusalādivasena vedanāvasena ca tividhāni hontīti dassento ‘‘kammakusalavedanāvasenā’’tiādimāha. Ettha pana kiñcāpi aṭṭhakathāsu āgatanayena kāyakammaṃ vacīkammanti kammavasena dukaṃ vuttaṃ, tikameva pana dassetuṃ vaṭṭati. Sabbameva hi sikkhāpadaṃ kāyadvāre āpajjitabbato vacīdvāre āpajjitabbato kāyavacīdvāre āpajjitabbato ca tividhaṃ hoti. Teneva mātikāṭṭhakathāyaṃ (kaṅkhā. aṭṭha. paṭhamapārājikavaṇṇanā) vuttaṃ ‘‘sabbāva kāyakammavacīkammatadubhayavasena tividhā honti. Tattha kāyadvāre āpajjitabbā kāyakammanti vuccati, vacīdvāre āpajjitabbā vacīkammanti vuccati, ubhayattha āpajjitabbā kāyakammavacīkamma’’nti. Tatoyeva ca adinnādānasikkhāpadādīsu kāyakammavacīkammanti tadubhayavasena dassitaṃ.
அத்தி² பன ஸிக்கா²பத³ங் குஸலந்திஆதி³னா ஆபத்திங் ஆபஜ்ஜந்தோ குஸலசித்தஸமங்கீ³ வா ஆபஜ்ஜதி அகுஸலசித்தஸமங்கீ³ வா அப்³யாகதசித்தஸமங்கீ³ வாதி த³ஸ்ஸேதி, ந பன குஸலாபி ஆபத்தி அத்தீ²தி. ந ஹி குஸலா ஆபத்தி நாம அத்தி² ‘‘ஆபத்தாதி⁴கரணங் ஸியா அகுஸலங் ஸியா அப்³யாகதங், நத்தி² ஆபத்தாதி⁴கரணங் குஸல’’ந்தி (பரி॰ 303) வசனதோ. த³ஸ காமாவசரகிரியசித்தானீதி ஹஸிதுப்பாத³வொட்ட²ப்³ப³னேஹி ஸத்³தி⁴ங் அட்ட² மஹாகிரியசித்தானி. த்³வின்னங் அபி⁴ஞ்ஞாசித்தானங் ஆபத்திஸமுட்டா²பகத்தங் பஞ்ஞத்திங் அஜானந்தஸ்ஸ இத்³தி⁴விகுப்³ப³னாதீ³ஸு த³ட்ட²ப்³ப³ங். யங் குஸலசித்தேன ஆபஜ்ஜதீதி யங் ஸிக்கா²பத³ஸீஸேன க³ஹிதங் ஆபத்திங் குஸலசித்தஸமங்கீ³ ஆபஜ்ஜதி. இமினா பன வசனேன தங் குஸலந்தி ஆபத்தியா வுச்சமானோ குஸலபா⁴வோ பரியாயதோவ, ந பரமத்த²தோதி த³ஸ்ஸேதி. குஸலசித்தேன ஹி ஆபத்திங் ஆபஜ்ஜந்தோ ஸவிஞ்ஞத்திகங் அவிஞ்ஞத்திகங் வா ஸிக்கா²பத³வீதிக்கமாகாரப்பவத்தங் ரூபக்க²ந்த⁴ஸங்கா²தங் அப்³யாகதாபத்திங் ஆபஜ்ஜதி. இதரேஹி இதரந்தி இதரேஹி அகுஸலாப்³யாகதசித்தேஹி யங் ஆபஜ்ஜதி, தங் இதரங், அகுஸலங் அப்³யாகதஞ்சாதி அத்தோ². இத³ஞ்ச ஆபத்திங் ஆபஜ்ஜந்தோ அகுஸலசித்தஸமங்கீ³ வா ஆபஜ்ஜதி குஸலாப்³யாகதசித்தஸமங்கீ³ வாதி த³ஸ்ஸனத்த²ங் வுத்தங். ஏவங் ஸந்தேபி ஸப்³ப³ஸிக்கா²பதே³ஸு கிஞ்சி அகுஸலசித்தமேவ கிஞ்சி குஸலாப்³யாகதவஸேன த்³விசித்தங், கிஞ்சி ஸப்³பே³ஸங் வஸேன திசித்தந்தி அயமேவ பபே⁴தோ³ லப்³ப⁴தி, ந அஞ்ஞோதி வேதி³தப்³ப³ங்.
Atthi pana sikkhāpadaṃ kusalantiādinā āpattiṃ āpajjanto kusalacittasamaṅgī vā āpajjati akusalacittasamaṅgī vā abyākatacittasamaṅgī vāti dasseti, na pana kusalāpi āpatti atthīti. Na hi kusalā āpatti nāma atthi ‘‘āpattādhikaraṇaṃ siyā akusalaṃ siyā abyākataṃ, natthi āpattādhikaraṇaṃ kusala’’nti (pari. 303) vacanato. Dasa kāmāvacarakiriyacittānīti hasituppādavoṭṭhabbanehi saddhiṃ aṭṭha mahākiriyacittāni. Dvinnaṃ abhiññācittānaṃ āpattisamuṭṭhāpakattaṃ paññattiṃ ajānantassa iddhivikubbanādīsu daṭṭhabbaṃ. Yaṃ kusalacittena āpajjatīti yaṃ sikkhāpadasīsena gahitaṃ āpattiṃ kusalacittasamaṅgī āpajjati. Iminā pana vacanena taṃ kusalanti āpattiyā vuccamāno kusalabhāvo pariyāyatova, na paramatthatoti dasseti. Kusalacittena hi āpattiṃ āpajjanto saviññattikaṃ aviññattikaṃ vā sikkhāpadavītikkamākārappavattaṃ rūpakkhandhasaṅkhātaṃ abyākatāpattiṃ āpajjati. Itarehi itaranti itarehi akusalābyākatacittehi yaṃ āpajjati, taṃ itaraṃ, akusalaṃ abyākatañcāti attho. Idañca āpattiṃ āpajjanto akusalacittasamaṅgī vā āpajjati kusalābyākatacittasamaṅgī vāti dassanatthaṃ vuttaṃ. Evaṃ santepi sabbasikkhāpadesu kiñci akusalacittameva kiñci kusalābyākatavasena dvicittaṃ, kiñci sabbesaṃ vasena ticittanti ayameva pabhedo labbhati, na aññoti veditabbaṃ.
திவேத³னங் த்³விவேத³னங் ஏகவேத³னந்தி இத³ஞ்ச யதா²வுத்தவேத³னாவஸேனேவ லப்³ப⁴தி, நாஞ்ஞதா²தி த³ட்ட²ப்³ப³ங். நிபஜ்ஜித்வா நிரோத⁴ங் ஸமாபன்னஸ்ஸ ஸஹஸெய்யவஸேன ததா³காரப்பவத்தரூபக்க²ந்த⁴ஸ்ஸேவ ஆபத்திபா⁴வதோ ‘‘அத்தி² அவேத³ன’’ந்திபி வத்தப்³ப³மேதங், கதா³சி கரஹசி யதி³ச்ச²கங் ஸம்ப⁴வதீதி அக்³க³ஹெத்வா யேபு⁴ய்யவஸேன லப்³ப⁴மானங்யேவ க³ஹெத்வா வுத்தந்தி வேதி³தப்³ப³ங்.
Tivedanaṃ dvivedanaṃ ekavedananti idañca yathāvuttavedanāvaseneva labbhati, nāññathāti daṭṭhabbaṃ. Nipajjitvā nirodhaṃ samāpannassa sahaseyyavasena tadākārappavattarūpakkhandhasseva āpattibhāvato ‘‘atthi avedana’’ntipi vattabbametaṃ, kadāci karahaci yadicchakaṃ sambhavatīti aggahetvā yebhuyyavasena labbhamānaṃyeva gahetvā vuttanti veditabbaṃ.
இதா³னி யதா²வுத்தஸமுட்டா²னாதீ³னி இமஸ்மிங் ஸங்வண்ணியமானஸிக்கா²பதே³ விப⁴ஜித்வா த³ஸ்ஸெந்தோ ‘‘இமங் பகிண்ணகங் விதி³த்வா’’திஆதி³மாஹ. தத்த² விதி³த்வாதி இமஸ்ஸ ‘‘வேதி³தப்³ப³’’ந்தி இமினா அபரகாலகிரியாவசனேன ஸம்ப³ந்தோ⁴ வேதி³தப்³போ³. கிரியஸமுட்டா²னந்தி இத³ங் யேபு⁴ய்யவஸேன வுத்தங் பரூபக்கமே ஸதி ஸாதி³யந்தஸ்ஸ அகிரியஸமுட்டா²னபா⁴வதோ. ‘‘மனொத்³வாரே ஆபத்தி நாம நத்தீ²தி இத³ம்பி பா³ஹுல்லவஸேனேவ வுத்த’’ந்தி வத³ந்தி. சித்தங் பனெத்த² அங்க³மத்தங் ஹோதீதி பட²மபாராஜிகங் காயசித்ததோ ஸமுட்டா²தீதி சித்தமெத்த² ஆபத்தியா அங்க³மேவ ஹோதி. ந தஸ்ஸ வஸேன கம்மபா⁴வோ லப்³ப⁴தீதி விஞ்ஞத்திஜனகவஸேன காயத்³வாரே பவத்தத்தா தஸ்ஸ சித்தஸ்ஸ வஸேன இமஸ்ஸ ஸிக்கா²பத³ஸ்ஸ மனோகம்மபா⁴வோ ந லப்³ப⁴தீதி அத்தோ². ஸிக்கா²பத³ஸ்ஸ ஹெட்டா² வுத்தனயேன பஞ்ஞத்திபா⁴வதோ ‘‘ஸப்³ப³ஞ்சேதங் ஆபத்தியங் யுஜ்ஜதீ’’தி வுத்தங். ந ஹி யதா²வுத்தஸமுட்டா²னாதி³ பஞ்ஞத்தியங் யுஜ்ஜதி.
Idāni yathāvuttasamuṭṭhānādīni imasmiṃ saṃvaṇṇiyamānasikkhāpade vibhajitvā dassento ‘‘imaṃ pakiṇṇakaṃ viditvā’’tiādimāha. Tattha viditvāti imassa ‘‘veditabba’’nti iminā aparakālakiriyāvacanena sambandho veditabbo. Kiriyasamuṭṭhānanti idaṃ yebhuyyavasena vuttaṃ parūpakkame sati sādiyantassa akiriyasamuṭṭhānabhāvato. ‘‘Manodvāre āpatti nāma natthīti idampi bāhullavaseneva vutta’’nti vadanti. Cittaṃ panettha aṅgamattaṃ hotīti paṭhamapārājikaṃ kāyacittato samuṭṭhātīti cittamettha āpattiyā aṅgameva hoti. Na tassa vasena kammabhāvo labbhatīti viññattijanakavasena kāyadvāre pavattattā tassa cittassa vasena imassa sikkhāpadassa manokammabhāvo na labbhatīti attho. Sikkhāpadassa heṭṭhā vuttanayena paññattibhāvato ‘‘sabbañcetaṃ āpattiyaṃ yujjatī’’ti vuttaṃ. Na hi yathāvuttasamuṭṭhānādi paññattiyaṃ yujjati.
பகிண்ணககதா²வண்ணனா நிட்டி²தா.
Pakiṇṇakakathāvaṇṇanā niṭṭhitā.
