| Library / Tipiṭaka / তিপিটক • Tipiṭaka / ধম্মসঙ্গণী-অনুটীকা • Dhammasaṅgaṇī-anuṭīkā |
লোকুত্তরকুসলং
Lokuttarakusalaṃ
পকিণ্ণককথাৰণ্ণনা
Pakiṇṇakakathāvaṇṇanā
পঞ্চধা উদ্দিসতি পঞ্চুপাদানক্খন্ধে অজ্ঝত্তদুকৰসেন রূপদুকৰসেন চ ভিন্দিত্ৰা অভিন্দিত্ৰা চ নিমিত্তৰচনেনেৰ উদ্দিসতি পৰত্তস্সপি সঙ্খারনিমিত্তভাৰানতিৰত্তনতো ৰুট্ঠাতব্বতাসামঞ্ঞতো চ। তেনেৰ উপাদিন্নানুপাদিন্নৰসেন পৰত্তং দ্ৰিধা কত্ৰা নিদ্দিসিত্ৰাপি ‘‘অযং তাৰ নিমিত্তে ৰিনিচ্ছযো’’তি নিমিত্তৰসেনেৰ নিগমেতি। এত্থ চ নিমিত্তং অজ্ঝত্তবহিদ্ধা, পৰত্তং পন অজ্ঝত্তমেৰাতি অযমেতেসং ৰিসেসো। বোজ্ঝঙ্গাদিৰিসেসন্তি বোজ্ঝঙ্গঝানঙ্গমগ্গঙ্গানং অসদিসতং। অসমাপজ্জিতুকামতাসঙ্খাতা ৰিতক্কাদিৰিরাগভাৰনা অসমাপজ্জিতুকামতাৰিরাগভাৰনা। ইতরস্সাতি পাদকজ্ঝানাদিকস্স। অতব্ভাৰতোতি যথাৰুত্তৰিরাগভাৰনাভাৰস্স অভাৰতো। ইদং ৰুত্তং হোতি – যথা মগ্গাসন্নায ৰিপস্সনায সোমনস্সসহগতত্তে মগ্গস্স পঠমাদিজ্ঝানিকতা চ উপেক্খাসহগতত্তে পঞ্চমজ্ঝানিকতা এৰ চ তব্বসেন চ বোজ্ঝঙ্গাদীনং ৰিসেসোতি তেসং নিযমে আসন্নকারণং পধানকারণঞ্চ ৰুট্ঠানগামিনিৰিপস্সনা, ন এৰং পাদকজ্ঝানাদযোতি।
Pañcadhāuddisati pañcupādānakkhandhe ajjhattadukavasena rūpadukavasena ca bhinditvā abhinditvā ca nimittavacaneneva uddisati pavattassapi saṅkhāranimittabhāvānativattanato vuṭṭhātabbatāsāmaññato ca. Teneva upādinnānupādinnavasena pavattaṃ dvidhā katvā niddisitvāpi ‘‘ayaṃ tāva nimitte vinicchayo’’ti nimittavaseneva nigameti. Ettha ca nimittaṃ ajjhattabahiddhā, pavattaṃ pana ajjhattamevāti ayametesaṃ viseso. Bojjhaṅgādivisesanti bojjhaṅgajhānaṅgamaggaṅgānaṃ asadisataṃ. Asamāpajjitukāmatāsaṅkhātā vitakkādivirāgabhāvanā asamāpajjitukāmatāvirāgabhāvanā. Itarassāti pādakajjhānādikassa. Atabbhāvatoti yathāvuttavirāgabhāvanābhāvassa abhāvato. Idaṃ vuttaṃ hoti – yathā maggāsannāya vipassanāya somanassasahagatatte maggassa paṭhamādijjhānikatā ca upekkhāsahagatatte pañcamajjhānikatā eva ca tabbasena ca bojjhaṅgādīnaṃ visesoti tesaṃ niyame āsannakāraṇaṃ padhānakāraṇañca vuṭṭhānagāminivipassanā, na evaṃ pādakajjhānādayoti.
ইদানি অপাদকপঠমজ্ঝানপাদকানং পকিণ্ণকসঙ্খারপঠমজ্ঝানানি সম্মসিত্ৰা নিব্বত্তিতানঞ্চ মগ্গানং একন্তেন পঠমজ্ঝানিকভাৰতো ৰিপস্সনানিযমোযেৰেত্থ একন্তিকো পধানঞ্চাতি ইমমত্থং ৰিভাৰেন্তো ‘‘ৰিপস্সনানিযমেনেৰা’’তিআদিমাহ। তত্থ ইতরেতি দুতিযজ্ঝানিকাদিমগ্গা। পাদকজ্ঝানাতিক্কন্তানং অঙ্গানং অসমাপজ্জিতুকামতাৰিরাগভাৰনাভূতা ৰুট্ঠানগামিনিৰিপস্সনা অধিট্ঠানভূতেন পাদকজ্ঝানেন আহিতৰিসেসা মগ্গস্স ঝানঙ্গাদিৰিসেসনিযামিকা হোতীতি ‘‘পাদকজ্ঝানৰিপস্সনানিযমেহী’’তি ৰুত্তং। যথা চ অধিট্ঠানভূতেন পাদকজ্ঝানেন, এৰং আরম্মণভূতেন সম্মসিতজ্ঝানেন উভযসব্ভাৰে অজ্ঝাসযৰসেন আহিতৰিসেসা ৰিপস্সনা নিযমেতীতি আহ ‘‘এৰং সেসৰাদেসুপি…পে॰… যোজেতব্বো’’তি।
Idāni apādakapaṭhamajjhānapādakānaṃ pakiṇṇakasaṅkhārapaṭhamajjhānāni sammasitvā nibbattitānañca maggānaṃ ekantena paṭhamajjhānikabhāvato vipassanāniyamoyevettha ekantiko padhānañcāti imamatthaṃ vibhāvento ‘‘vipassanāniyamenevā’’tiādimāha. Tattha itareti dutiyajjhānikādimaggā. Pādakajjhānātikkantānaṃ aṅgānaṃ asamāpajjitukāmatāvirāgabhāvanābhūtā vuṭṭhānagāminivipassanā adhiṭṭhānabhūtena pādakajjhānena āhitavisesā maggassa jhānaṅgādivisesaniyāmikā hotīti ‘‘pādakajjhānavipassanāniyamehī’’ti vuttaṃ. Yathā ca adhiṭṭhānabhūtena pādakajjhānena, evaṃ ārammaṇabhūtena sammasitajjhānena ubhayasabbhāve ajjhāsayavasena āhitavisesā vipassanā niyametīti āha ‘‘evaṃ sesavādesupi…pe… yojetabbo’’ti.
পাদকজ্ঝানসঙ্খারেসূতি পঠমজ্ঝানসঙ্খারেসু। ‘‘পঠমজ্ঝানং পাদকং কত্ৰা’’তি (ধ॰ স॰ অট্ঠ॰ ৩৫০) হি ৰুত্তং। তংতংৰিরাগাৰিরাগভাৰনাভাৰেনাতি ৰিতক্কাদীনং ৰিরজ্জনাৰিরজ্জনভাৰনাভাৰেন। তেন আরম্মণজ্ঝানস্সপি ৰিপস্সনায ৰিসেসাধানং উপনিস্সযতমাহ।
Pādakajjhānasaṅkhāresūti paṭhamajjhānasaṅkhāresu. ‘‘Paṭhamajjhānaṃ pādakaṃ katvā’’ti (dha. sa. aṭṭha. 350) hi vuttaṃ. Taṃtaṃvirāgāvirāgabhāvanābhāvenāti vitakkādīnaṃ virajjanāvirajjanabhāvanābhāvena. Tena ārammaṇajjhānassapi vipassanāya visesādhānaṃ upanissayatamāha.
পাদকজ্ঝানসম্মসিতজ্ঝানানিযেৰ বোজ্ঝঙ্গাদিৰিসেসানং উপনিস্সযো কারণন্তি পাদকজ্ঝানসম্মসিতজ্ঝানুপনিস্সযো , তস্স সব্ভাৰে। তদভাৰাভাৰতোতি তস্স অজ্ঝাসযস্স অভাৰাভাৰতো।
Pādakajjhānasammasitajjhānāniyeva bojjhaṅgādivisesānaṃ upanissayo kāraṇanti pādakajjhānasammasitajjhānupanissayo, tassa sabbhāve. Tadabhāvābhāvatoti tassa ajjhāsayassa abhāvābhāvato.
চতুত্থজ্ঝানিকস্স মগ্গস্স আরুপ্পে অরূপজ্ঝানমেৰ পাদকং সিযাতি আহ ‘‘চতুত্থজ্ঝানিকৰজ্জান’’ন্তি। অরিযমগ্গস্স ওল়ারিকঙ্গাতিক্কমনূপনিস্সযা ৰিপস্সনায অধিট্ঠানারম্মণভূতা দুতিযজ্ঝানাদযো। পঞ্চহি অঙ্গেহীতি পঞ্চহি ঝানঙ্গেহি। ‘‘তংতংৰাদেহি পঞ্ঞাপিযমানানি পাদকজ্ঝানাদীনি ৰাদসহচারিতায ‘ৰাদা’তি ৰুচ্চন্তী’’তি অধিপ্পাযেন ‘‘তযোপেতে ৰাদে’’তি আহ। ৰদন্তি এতেহীতি ৰা ৰাদকরণভূতানি পাদকজ্ঝানাদীনি ৰাদা।
Catutthajjhānikassa maggassa āruppe arūpajjhānameva pādakaṃ siyāti āha ‘‘catutthajjhānikavajjāna’’nti. Ariyamaggassa oḷārikaṅgātikkamanūpanissayā vipassanāya adhiṭṭhānārammaṇabhūtā dutiyajjhānādayo. Pañcahi aṅgehīti pañcahi jhānaṅgehi. ‘‘Taṃtaṃvādehi paññāpiyamānāni pādakajjhānādīni vādasahacāritāya ‘vādā’ti vuccantī’’ti adhippāyena ‘‘tayopete vāde’’ti āha. Vadanti etehīti vā vādakaraṇabhūtāni pādakajjhānādīni vādā.
ৰিপাকসন্তানস্স…পে॰… সুসঙ্খতত্তাতি এতেন যস্মিং সন্তানে কম্মং উপ্পজ্জতি, তত্থ উপ্পজ্জমানমেৰ কিঞ্চি ৰিসেসাধানং করোতীতি দীপেতি। যতো তস্মিংযেৰ সন্তানে তস্স ৰিপাকো, নাঞ্ঞত্থ।
Vipākasantānassa…pe…susaṅkhatattāti etena yasmiṃ santāne kammaṃ uppajjati, tattha uppajjamānameva kiñci visesādhānaṃ karotīti dīpeti. Yato tasmiṃyeva santāne tassa vipāko, nāññattha.
পুরিমানুলোমং ৰিয তন্তি যথা গোত্রভুট্ঠানে উপ্পন্নানুলোমতো পুরিমঅনুলোমঞাণং তং গোত্রভুট্ঠানে উপ্পন্নানুলোমং অনুবন্ধতি, এৰং। তদপীতি গোত্রভুট্ঠানে উপ্পন্নানুলোমঞাণম্পি অঞ্ঞং অনুলোমঞাণমেৰ অনুবন্ধেয্য, তস্স অনন্তরং উপ্পজ্জেয্য। সা ভূমীতি সা পঞ্চুপাদানক্খন্ধসঙ্খাতা কিলেসানং উপ্পত্তিট্ঠানতায ভূমি। একো ভৰোতি গহেত্ৰা ৰুত্তন্তি এতেন সত্ত ভৰে দ্ৰে ভৰেতি ইদম্পি অধিপ্পাযৰসেন নেতব্বত্থং, ন যথারুতৰসেনাতি দস্সেতি। তত্থাযং অধিপ্পাযো – একৰারং কামাৰচরদেৰেসু একৰারং মনুস্সেসূতি এৰম্পি মিস্সিতূপপত্তিৰসেন তেসু একিস্সা এৰ উপপত্তিযা অযং পরিচ্ছেদো। যং পন ‘‘ন তে ভৰং অট্ঠমমাদিযন্তী’’তি (খু॰ পা॰ ৬.৯; সু॰ নি॰ ২৩২) ৰুত্তং, তম্পি কামাৰচরভৰংযেৰ সন্ধাযাহ। মহগ্গতভৰানং পরিচ্ছেদো নত্থীতি ৰদন্তি। তথা ‘‘ঠপেত্ৰা দ্ৰে ভৰে’’তি এত্থাপি কামাৰচরদেৰমনুস্সভৰানং মিস্সকৰসেনেৰ, তস্মা কামধাতুযং যে দ্ৰে ভৰাতি কামাৰচরদেৰমনুস্সৰসেন যে দ্ৰে ভৰাতি অত্থো। পুরিমৰিকপ্পেসু পুগ্গলভেদেন পটিপদা ভিন্দিত্ৰা কস্সচি চলতীতি, কস্সচি ন চলতীতি কত্ৰা ‘‘চলতি এৰা’’তি অৰধারণমন্তরেন অত্থো ৰুত্তো। যস্মা পন অট্ঠকথাযং (ধ॰ স॰ অট্ঠ॰ ৩৫০ লোকুত্তরকুসলপকিণ্ণককথা) ‘‘যথা চ পটিপদা, এৰং অধিপতিপি চলতি এৰা’’তি ৰুত্তং, তস্মা সব্বেসম্পি পটিপদাসু অভেদেন গহিতাসু একন্তেন চলনং সম্ভৰতীতি ‘‘চলতিচ্চেৰ ৰুত্তং, ন ন চলতী’’তি ততিযৰিকপ্পো চলনাৰধারণো ৰুত্তো।
Purimānulomaṃ viya tanti yathā gotrabhuṭṭhāne uppannānulomato purimaanulomañāṇaṃ taṃ gotrabhuṭṭhāne uppannānulomaṃ anubandhati, evaṃ. Tadapīti gotrabhuṭṭhāne uppannānulomañāṇampi aññaṃ anulomañāṇameva anubandheyya, tassa anantaraṃ uppajjeyya. Sā bhūmīti sā pañcupādānakkhandhasaṅkhātā kilesānaṃ uppattiṭṭhānatāya bhūmi. Eko bhavoti gahetvā vuttanti etena satta bhave dve bhaveti idampi adhippāyavasena netabbatthaṃ, na yathārutavasenāti dasseti. Tatthāyaṃ adhippāyo – ekavāraṃ kāmāvacaradevesu ekavāraṃ manussesūti evampi missitūpapattivasena tesu ekissā eva upapattiyā ayaṃ paricchedo. Yaṃ pana ‘‘na te bhavaṃ aṭṭhamamādiyantī’’ti (khu. pā. 6.9; su. ni. 232) vuttaṃ, tampi kāmāvacarabhavaṃyeva sandhāyāha. Mahaggatabhavānaṃ paricchedo natthīti vadanti. Tathā ‘‘ṭhapetvā dve bhave’’ti etthāpi kāmāvacaradevamanussabhavānaṃ missakavaseneva, tasmā kāmadhātuyaṃ ye dve bhavāti kāmāvacaradevamanussavasena ye dve bhavāti attho. Purimavikappesu puggalabhedena paṭipadā bhinditvā kassaci calatīti, kassaci na calatīti katvā ‘‘calati evā’’ti avadhāraṇamantarena attho vutto. Yasmā pana aṭṭhakathāyaṃ (dha. sa. aṭṭha. 350 lokuttarakusalapakiṇṇakakathā) ‘‘yathā ca paṭipadā, evaṃ adhipatipi calati evā’’ti vuttaṃ, tasmā sabbesampi paṭipadāsu abhedena gahitāsu ekantena calanaṃ sambhavatīti ‘‘calaticceva vuttaṃ, na na calatī’’ti tatiyavikappo calanāvadhāraṇo vutto.
লোকুত্তরকুসলপকিণ্ণককথাৰণ্ণনা নিট্ঠিতা।
Lokuttarakusalapakiṇṇakakathāvaṇṇanā niṭṭhitā.
