| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
পকিণ্ণককথাৰণ্ণনা
Pakiṇṇakakathāvaṇṇanā
পকিণ্ণকন্তি ৰোমিস্সকনযং। সমুট্ঠানন্তি উপ্পত্তিকারণং। কিরিযাতিআদি নিদস্সনমত্তং, অকিরিযাদীনম্পি সঙ্গহো দট্ঠব্বো। ৰেদনাযাতি সহযোগে করণৰচনং, ৰেদনায সহ কুসলঞ্চাতি ৰুত্তং হোতি। সব্বসঙ্গাহকৰসেনাতি সব্বেসং সিক্খাপদানং সঙ্গাহকৰসেন। ছ সিক্খাপদসমুট্ঠানানীতি কাযো ৰাচা কাযৰাচা কাযচিত্তং ৰাচাচিত্তং কাযৰাচাচিত্তন্তি এৰং ৰুত্তানি ছ আপত্তিসমুট্ঠানানি। আপত্তিযেৰ হি সিক্খাপদসীসেন ৰুত্তা। সমুট্ঠানাদযো হি আপত্তিযা হোন্তি, ন সিক্খাপদস্স, ইমেসু পন ছসু সমুট্ঠানেসু পুরিমানি তীণি অচিত্তকানি, পচ্ছিমানি সচিত্তকানি। তেসু একেন ৰা দ্ৰীহি ৰা তীহি ৰা চতূহি ৰা ছহি ৰা সমুট্ঠানেহি আপত্তিযো সমুট্ঠহন্তি, পঞ্চসমুট্ঠানা আপত্তি নাম নত্থি। তত্থ একসমুট্ঠানা চতুত্থেন চ পঞ্চমেন চ ছট্ঠেন চ সমুট্ঠানেন সমুট্ঠাতি, ন অঞ্ঞেন। দ্ৰিসমুট্ঠানা পঠমচতুত্থেহি চ দুতিযপঞ্চমেহি চ ততিযছট্ঠেহি চ চতুত্থছট্ঠেহি চ পঞ্চমছট্ঠেহি চ সমুট্ঠানেহি সমুট্ঠাতি, ন অঞ্ঞেহি। তিসমুট্ঠানা পঠমেহি চ তীহি, পচ্ছিমেহি চ তীহি সমুট্ঠানেহি সমুট্ঠাতি, ন অঞ্ঞেহি। চতুসমুট্ঠানা পঠমততিযচতুত্থছট্ঠেহি চ দুতিযততিযপঞ্চমছট্ঠেহি চ সমুট্ঠানেহি সমুট্ঠাতি, ন অঞ্ঞেহি। ছসমুট্ঠানা ছহিপি সমুট্ঠাতি।
Pakiṇṇakanti vomissakanayaṃ. Samuṭṭhānanti uppattikāraṇaṃ. Kiriyātiādi nidassanamattaṃ, akiriyādīnampi saṅgaho daṭṭhabbo. Vedanāyāti sahayoge karaṇavacanaṃ, vedanāya saha kusalañcāti vuttaṃ hoti. Sabbasaṅgāhakavasenāti sabbesaṃ sikkhāpadānaṃ saṅgāhakavasena. Cha sikkhāpadasamuṭṭhānānīti kāyo vācā kāyavācā kāyacittaṃ vācācittaṃ kāyavācācittanti evaṃ vuttāni cha āpattisamuṭṭhānāni. Āpattiyeva hi sikkhāpadasīsena vuttā. Samuṭṭhānādayo hi āpattiyā honti, na sikkhāpadassa, imesu pana chasu samuṭṭhānesu purimāni tīṇi acittakāni, pacchimāni sacittakāni. Tesu ekena vā dvīhi vā tīhi vā catūhi vā chahi vā samuṭṭhānehi āpattiyo samuṭṭhahanti, pañcasamuṭṭhānā āpatti nāma natthi. Tattha ekasamuṭṭhānā catutthena ca pañcamena ca chaṭṭhena ca samuṭṭhānena samuṭṭhāti, na aññena. Dvisamuṭṭhānā paṭhamacatutthehi ca dutiyapañcamehi ca tatiyachaṭṭhehi ca catutthachaṭṭhehi ca pañcamachaṭṭhehi ca samuṭṭhānehi samuṭṭhāti, na aññehi. Tisamuṭṭhānā paṭhamehi ca tīhi, pacchimehi ca tīhi samuṭṭhānehi samuṭṭhāti, na aññehi. Catusamuṭṭhānā paṭhamatatiyacatutthachaṭṭhehi ca dutiyatatiyapañcamachaṭṭhehi ca samuṭṭhānehi samuṭṭhāti, na aññehi. Chasamuṭṭhānā chahipi samuṭṭhāti.
সিক্খাপদং নাম অত্থি ছসমুট্ঠানন্তি এত্থাপি সিক্খাপদসীসেন আপত্তি ৰুত্তাতি ৰেদিতব্বা। তেনেৰ ৰক্খতি ‘‘সব্বঞ্চেতং আপত্তিযং যুজ্জতি, সিক্খাপদসীসেন পন সব্বঅট্ঠকথাসু দেসনা আরুল়্হা’’তি। কাযাদীহি ছহি সমুট্ঠানং উপ্পত্তি, ছ ৰা সমুট্ঠানানি এতস্সাতি ছসমুট্ঠানং। অত্থি চতুসমুট্ঠানন্তি কাযো কাযৰাচা কাযচিত্তং কাযৰাচাচিত্তন্তি ইমানি চত্তারি, ৰাচা কাযৰাচা ৰাচাচিত্তং কাযৰাচাচিত্তন্তি ইমানি ৰা চত্তারি সমুট্ঠানানি এতস্সাতি চতুসমুট্ঠানং। অত্থি তিসমুট্ঠানন্তি কাযো ৰাচা কাযৰাচাতি ইমানি তীণি, কাযচিত্তং ৰাচাচিত্তং কাযৰাচাচিত্তন্তি ইমানি ৰা তীণি সমুট্ঠানানি এতস্সাতি তিসমুট্ঠানং। দ্ৰিসমুট্ঠানং একসমুট্ঠানঞ্চ সমুট্ঠানসীসৰসেন দস্সেন্তো ‘‘অত্থি কথিনসমুট্ঠান’’ন্তিআদিমাহ। তেরস হি সমুট্ঠানসীসানি পঠমপারাজিকসমুট্ঠানং অদিন্নাদানসমুট্ঠানং সঞ্চরিত্তসমুট্ঠানং সমনুভাসনসমুট্ঠানং কথিনসমুট্ঠানং এল়কলোমসমুট্ঠানং পদসোধম্মসমুট্ঠানং অদ্ধানসমুট্ঠানং থেয্যসত্থসমুট্ঠানং ধম্মদেসনাসমুট্ঠানং ভূতারোচনসমুট্ঠানং চোরিৰুট্ঠাপনসমুট্ঠানং অননুঞ্ঞাতসমুট্ঠানন্তি।
Sikkhāpadaṃ nāma atthi chasamuṭṭhānanti etthāpi sikkhāpadasīsena āpatti vuttāti veditabbā. Teneva vakkhati ‘‘sabbañcetaṃ āpattiyaṃ yujjati, sikkhāpadasīsena pana sabbaaṭṭhakathāsu desanā āruḷhā’’ti. Kāyādīhi chahi samuṭṭhānaṃ uppatti, cha vā samuṭṭhānāni etassāti chasamuṭṭhānaṃ. Atthi catusamuṭṭhānanti kāyo kāyavācā kāyacittaṃ kāyavācācittanti imāni cattāri, vācā kāyavācā vācācittaṃ kāyavācācittanti imāni vā cattāri samuṭṭhānāni etassāti catusamuṭṭhānaṃ. Atthi tisamuṭṭhānanti kāyo vācā kāyavācāti imāni tīṇi, kāyacittaṃ vācācittaṃ kāyavācācittanti imāni vā tīṇi samuṭṭhānāni etassāti tisamuṭṭhānaṃ. Dvisamuṭṭhānaṃ ekasamuṭṭhānañca samuṭṭhānasīsavasena dassento ‘‘atthi kathinasamuṭṭhāna’’ntiādimāha. Terasa hi samuṭṭhānasīsāni paṭhamapārājikasamuṭṭhānaṃ adinnādānasamuṭṭhānaṃ sañcarittasamuṭṭhānaṃ samanubhāsanasamuṭṭhānaṃ kathinasamuṭṭhānaṃ eḷakalomasamuṭṭhānaṃ padasodhammasamuṭṭhānaṃ addhānasamuṭṭhānaṃ theyyasatthasamuṭṭhānaṃ dhammadesanāsamuṭṭhānaṃ bhūtārocanasamuṭṭhānaṃ corivuṭṭhāpanasamuṭṭhānaṃ ananuññātasamuṭṭhānanti.
তত্থ ‘‘অত্থি ছসমুট্ঠান’’ন্তি ইমিনা সঞ্চরিত্তসমুট্ঠানং ৰুত্তং। ‘‘অত্থি চতুসমুট্ঠান’’ন্তি ইমিনা পন অদ্ধানসমুট্ঠানং অননুঞ্ঞাতসমুট্ঠানঞ্চ সঙ্গহিতং। যঞ্হি পঠমততিযচতুত্থছট্ঠেহি সমুট্ঠাতি, ইদং অদ্ধানসমুট্ঠানং। যং পন দুতিযততিযপঞ্চমছট্ঠেহি সমুট্ঠাতি, ইদং অননুঞ্ঞাতসমুট্ঠানং। ‘‘অত্থি তিসমুট্ঠান’’ন্তি ইমিনা অদিন্নাদানসমুট্ঠানং ভূতারোচনসমুট্ঠানঞ্চ সঙ্গহিতং। যঞ্হি সচিত্তকেহি তীহি সমুট্ঠানেহি সমুট্ঠাতি, ইদং অদিন্নাদানসমুট্ঠানং। যং পন অচিত্তকেহি তীহি সমুট্ঠাতি, ইদং ভূতারোচনসমুট্ঠানং। ‘‘অত্থি কথিনসমুট্ঠান’’ন্তিআদিনা পন অৰসেসসমুট্ঠানসীসেন দ্ৰিসমুট্ঠানং একসমুট্ঠানঞ্চ সঙ্গণ্হাতি। তথা হি যং ততিযছট্ঠেহি সমুট্ঠাতি, ইদং কথিনসমুট্ঠানন্তি ৰুচ্চতি। যং পঠমচতুত্থেহি সমুট্ঠাতি, ইদং এল়কলোমসমুট্ঠানং। যং ছট্ঠেনেৰ সমুট্ঠাতি, ইদং ধুরনিক্খেপসমুট্ঠানং, সমনুভাসনসমুট্ঠানন্তিপি তস্সেৰ নামং। আদি-সদ্দসঙ্গহিতেসু পন পঠমপারাজিকসমুট্ঠানপদসোধম্মথেয্যসত্থধম্মদেসনাচোরিৰুট্ঠাপনসমুট্ঠানেসু যং কাযচিত্ততো সমুট্ঠাতি, ইদং পঠমপারাজিকসমুট্ঠানং। যং দুতিযপঞ্চমেহি সমুট্ঠাতি, ইদং পদসোধম্মসমুট্ঠানং। যং চতুত্থছট্ঠেহি সমুট্ঠাতি, ইদং থেয্যসত্থসমুট্ঠানং। যং পঞ্চমেনেৰ সমুট্ঠাতি, ইদং ধম্মদেসনাসমুট্ঠানং। যং পঞ্চমছট্ঠেহি সমুট্ঠাতি, ইদং চোরিৰুট্ঠাপনসমুট্ঠানন্তি ৰেদিতব্বং।
Tattha ‘‘atthi chasamuṭṭhāna’’nti iminā sañcarittasamuṭṭhānaṃ vuttaṃ. ‘‘Atthi catusamuṭṭhāna’’nti iminā pana addhānasamuṭṭhānaṃ ananuññātasamuṭṭhānañca saṅgahitaṃ. Yañhi paṭhamatatiyacatutthachaṭṭhehi samuṭṭhāti, idaṃ addhānasamuṭṭhānaṃ. Yaṃ pana dutiyatatiyapañcamachaṭṭhehi samuṭṭhāti, idaṃ ananuññātasamuṭṭhānaṃ. ‘‘Atthi tisamuṭṭhāna’’nti iminā adinnādānasamuṭṭhānaṃ bhūtārocanasamuṭṭhānañca saṅgahitaṃ. Yañhi sacittakehi tīhi samuṭṭhānehi samuṭṭhāti, idaṃ adinnādānasamuṭṭhānaṃ. Yaṃ pana acittakehi tīhi samuṭṭhāti, idaṃ bhūtārocanasamuṭṭhānaṃ. ‘‘Atthi kathinasamuṭṭhāna’’ntiādinā pana avasesasamuṭṭhānasīsena dvisamuṭṭhānaṃ ekasamuṭṭhānañca saṅgaṇhāti. Tathā hi yaṃ tatiyachaṭṭhehi samuṭṭhāti, idaṃ kathinasamuṭṭhānanti vuccati. Yaṃ paṭhamacatutthehi samuṭṭhāti, idaṃ eḷakalomasamuṭṭhānaṃ. Yaṃ chaṭṭheneva samuṭṭhāti, idaṃ dhuranikkhepasamuṭṭhānaṃ, samanubhāsanasamuṭṭhānantipi tasseva nāmaṃ. Ādi-saddasaṅgahitesu pana paṭhamapārājikasamuṭṭhānapadasodhammatheyyasatthadhammadesanācorivuṭṭhāpanasamuṭṭhānesu yaṃ kāyacittato samuṭṭhāti, idaṃ paṭhamapārājikasamuṭṭhānaṃ. Yaṃ dutiyapañcamehi samuṭṭhāti, idaṃ padasodhammasamuṭṭhānaṃ. Yaṃ catutthachaṭṭhehi samuṭṭhāti, idaṃ theyyasatthasamuṭṭhānaṃ. Yaṃ pañcameneva samuṭṭhāti, idaṃ dhammadesanāsamuṭṭhānaṃ. Yaṃ pañcamachaṭṭhehi samuṭṭhāti, idaṃ corivuṭṭhāpanasamuṭṭhānanti veditabbaṃ.
এৰং সমুট্ঠানসীসেন সব্বসিক্খাপদানি তেরসধা দস্সেত্ৰা ইদানি কিরিযাৰসেন পঞ্চধা দস্সেন্তো ‘‘তত্রাপি কিঞ্চি কিরিযতো সমুট্ঠাতী’’তিআদিমাহ। তত্থ কিঞ্চীতি সিক্খাপদসীসেন আপত্তিং ৰদতি। তস্মা যা কাযেন ৰা ৰাচায ৰা পথৰীখণনাদীসু ৰিয ৰীতিক্কমং করোন্তস্স হোতি, অযং কিরিযতো সমুট্ঠাতি নাম। যা কাযৰাচায কত্তব্বং অকরোন্তস্স হোতি পঠমকথিনাপত্তি ৰিয, অযং অকিরিযতো সমুট্ঠাতি নাম। যা করোন্তস্স চ অকরোন্তস্স চ হোতি অঞ্ঞাতিকায ভিক্খুনিযা হত্থতো চীৰরপটিগ্গহণাপত্তি ৰিয, অযং কিরিযাকিরিযতো সমুট্ঠাতি নাম। যা সিযা করোন্তস্স চ সিযা অকরোন্তস্স চ হোতি রূপিযপটিগ্গহণাপত্তি ৰিয, অযং সিযা কিরিযতো সিযা অকিরিযতো সমুট্ঠাতি নাম। যা সিযা করোন্তস্স চ সিযা করোন্তস্স চ অকরোন্তস্স চ হোতি কুটিকারাপত্তি ৰিয, অযং সিযা কিরিযতো সিযা কিরিযাকিরিযতো সমুট্ঠাতি নাম।
Evaṃ samuṭṭhānasīsena sabbasikkhāpadāni terasadhā dassetvā idāni kiriyāvasena pañcadhā dassento ‘‘tatrāpi kiñci kiriyato samuṭṭhātī’’tiādimāha. Tattha kiñcīti sikkhāpadasīsena āpattiṃ vadati. Tasmā yā kāyena vā vācāya vā pathavīkhaṇanādīsu viya vītikkamaṃ karontassa hoti, ayaṃ kiriyato samuṭṭhāti nāma. Yā kāyavācāya kattabbaṃ akarontassa hoti paṭhamakathināpatti viya, ayaṃ akiriyato samuṭṭhāti nāma. Yā karontassa ca akarontassa ca hoti aññātikāya bhikkhuniyā hatthato cīvarapaṭiggahaṇāpatti viya, ayaṃ kiriyākiriyato samuṭṭhāti nāma. Yā siyā karontassa ca siyā akarontassa ca hoti rūpiyapaṭiggahaṇāpatti viya, ayaṃ siyā kiriyato siyā akiriyato samuṭṭhāti nāma. Yā siyā karontassa ca siyā karontassa ca akarontassa ca hoti kuṭikārāpatti viya, ayaṃ siyā kiriyato siyā kiriyākiriyato samuṭṭhāti nāma.
ইদানি সব্বসিক্খাপদানি সঞ্ঞাৰসেন দ্ৰিধা কত্ৰা দস্সেন্তো ‘‘তত্রাপি অত্থি সঞ্ঞাৰিমোক্খ’’ন্তিআদিমাহ। সঞ্ঞায অভাৰেন ৰিমোক্খো অস্সাতি সঞ্ঞাৰিমোক্খন্তি মজ্ঝেপদলোপসমাসো দট্ঠব্বো। যতো হি ৰীতিক্কমসঞ্ঞাঅভাৰেন মুচ্চতি, ইদং সঞ্ঞাৰিমোক্খন্তি ৰুচ্চতি। চিত্তঙ্গং লভতিযেৰাতি কাযচিত্তাদিসচিত্তকসমুট্ঠানেহেৰ সমুট্ঠহনতো । ‘‘লভতিযেৰা’’তি অৰধারণেন নো ন লভতীতি দস্সেতি। তস্মা যং চিত্তঙ্গং লভতি, ন লভতি চ, তং ‘‘ইতর’’ন্তি ৰুত্তং ইতর-সদ্দস্স ৰুত্তপটিযোগৰিসযত্তা।
Idāni sabbasikkhāpadāni saññāvasena dvidhā katvā dassento ‘‘tatrāpi atthi saññāvimokkha’’ntiādimāha. Saññāya abhāvena vimokkho assāti saññāvimokkhanti majjhepadalopasamāso daṭṭhabbo. Yato hi vītikkamasaññāabhāvena muccati, idaṃ saññāvimokkhanti vuccati. Cittaṅgaṃ labhatiyevāti kāyacittādisacittakasamuṭṭhāneheva samuṭṭhahanato . ‘‘Labhatiyevā’’ti avadhāraṇena no na labhatīti dasseti. Tasmā yaṃ cittaṅgaṃ labhati, na labhati ca, taṃ ‘‘itara’’nti vuttaṃ itara-saddassa vuttapaṭiyogavisayattā.
পুন সব্বসিক্খাপদানি চিত্তৰসেন দ্ৰিধা দস্সেন্তো ‘‘পুন অত্থি সচিত্তক’’ন্তিআদিমাহ। যং সহেৰ চিত্তেন আপজ্জতীতি যং সচিত্তকেনেৰ সমুট্ঠানেন আপজ্জতি, নো অচিত্তকেন। ৰিনাপীতি অপি-সদ্দেন সহাপি চিত্তেন আপজ্জতীতি দস্সেতি। যঞ্হি কদাচি অচিত্তকেন, কদাচি সচিত্তকেন সমুট্ঠানেন সমুট্ঠাতি, তং অচিত্তকন্তি ৰুচ্চতি। এত্থ চ সঞ্ঞাদুকং অনাপত্তিমুখেন, সচিত্তকদুকং আপত্তিমুখেন ৰুত্তন্তি ইদমেতেসং নানাকরণন্তি ৰেদিতব্বং।
Puna sabbasikkhāpadāni cittavasena dvidhā dassento ‘‘puna atthi sacittaka’’ntiādimāha. Yaṃ saheva cittena āpajjatīti yaṃ sacittakeneva samuṭṭhānena āpajjati, no acittakena. Vināpīti api-saddena sahāpi cittena āpajjatīti dasseti. Yañhi kadāci acittakena, kadāci sacittakena samuṭṭhānena samuṭṭhāti, taṃ acittakanti vuccati. Ettha ca saññādukaṃ anāpattimukhena, sacittakadukaṃ āpattimukhena vuttanti idametesaṃ nānākaraṇanti veditabbaṃ.
লোকৰজ্জদুকস্স হেট্ঠা ৰুত্তলক্খণত্তা তং অৰিভজিত্ৰা ইদানি সব্বসিক্খাপদানি কম্মৰসেন দুৰিধানি, কুসলাদিৰসেন ৰেদনাৰসেন চ তিৰিধানি হোন্তীতি দস্সেন্তো ‘‘কম্মকুসলৰেদনাৰসেনা’’তিআদিমাহ। এত্থ পন কিঞ্চাপি অট্ঠকথাসু আগতনযেন কাযকম্মং ৰচীকম্মন্তি কম্মৰসেন দুকং ৰুত্তং, তিকমেৰ পন দস্সেতুং ৰট্টতি। সব্বমেৰ হি সিক্খাপদং কাযদ্ৰারে আপজ্জিতব্বতো ৰচীদ্ৰারে আপজ্জিতব্বতো কাযৰচীদ্ৰারে আপজ্জিতব্বতো চ তিৰিধং হোতি। তেনেৰ মাতিকাট্ঠকথাযং (কঙ্খা॰ অট্ঠ॰ পঠমপারাজিকৰণ্ণনা) ৰুত্তং ‘‘সব্বাৰ কাযকম্মৰচীকম্মতদুভযৰসেন তিৰিধা হোন্তি। তত্থ কাযদ্ৰারে আপজ্জিতব্বা কাযকম্মন্তি ৰুচ্চতি, ৰচীদ্ৰারে আপজ্জিতব্বা ৰচীকম্মন্তি ৰুচ্চতি, উভযত্থ আপজ্জিতব্বা কাযকম্মৰচীকম্ম’’ন্তি। ততোযেৰ চ অদিন্নাদানসিক্খাপদাদীসু কাযকম্মৰচীকম্মন্তি তদুভযৰসেন দস্সিতং।
Lokavajjadukassa heṭṭhā vuttalakkhaṇattā taṃ avibhajitvā idāni sabbasikkhāpadāni kammavasena duvidhāni, kusalādivasena vedanāvasena ca tividhāni hontīti dassento ‘‘kammakusalavedanāvasenā’’tiādimāha. Ettha pana kiñcāpi aṭṭhakathāsu āgatanayena kāyakammaṃ vacīkammanti kammavasena dukaṃ vuttaṃ, tikameva pana dassetuṃ vaṭṭati. Sabbameva hi sikkhāpadaṃ kāyadvāre āpajjitabbato vacīdvāre āpajjitabbato kāyavacīdvāre āpajjitabbato ca tividhaṃ hoti. Teneva mātikāṭṭhakathāyaṃ (kaṅkhā. aṭṭha. paṭhamapārājikavaṇṇanā) vuttaṃ ‘‘sabbāva kāyakammavacīkammatadubhayavasena tividhā honti. Tattha kāyadvāre āpajjitabbā kāyakammanti vuccati, vacīdvāre āpajjitabbā vacīkammanti vuccati, ubhayattha āpajjitabbā kāyakammavacīkamma’’nti. Tatoyeva ca adinnādānasikkhāpadādīsu kāyakammavacīkammanti tadubhayavasena dassitaṃ.
অত্থি পন সিক্খাপদং কুসলন্তিআদিনা আপত্তিং আপজ্জন্তো কুসলচিত্তসমঙ্গী ৰা আপজ্জতি অকুসলচিত্তসমঙ্গী ৰা অব্যাকতচিত্তসমঙ্গী ৰাতি দস্সেতি, ন পন কুসলাপি আপত্তি অত্থীতি। ন হি কুসলা আপত্তি নাম অত্থি ‘‘আপত্তাধিকরণং সিযা অকুসলং সিযা অব্যাকতং, নত্থি আপত্তাধিকরণং কুসল’’ন্তি (পরি॰ ৩০৩) ৰচনতো। দস কামাৰচরকিরিযচিত্তানীতি হসিতুপ্পাদৰোট্ঠব্বনেহি সদ্ধিং অট্ঠ মহাকিরিযচিত্তানি। দ্ৰিন্নং অভিঞ্ঞাচিত্তানং আপত্তিসমুট্ঠাপকত্তং পঞ্ঞত্তিং অজানন্তস্স ইদ্ধিৰিকুব্বনাদীসু দট্ঠব্বং। যং কুসলচিত্তেন আপজ্জতীতি যং সিক্খাপদসীসেন গহিতং আপত্তিং কুসলচিত্তসমঙ্গী আপজ্জতি। ইমিনা পন ৰচনেন তং কুসলন্তি আপত্তিযা ৰুচ্চমানো কুসলভাৰো পরিযাযতোৰ, ন পরমত্থতোতি দস্সেতি। কুসলচিত্তেন হি আপত্তিং আপজ্জন্তো সৰিঞ্ঞত্তিকং অৰিঞ্ঞত্তিকং ৰা সিক্খাপদৰীতিক্কমাকারপ্পৰত্তং রূপক্খন্ধসঙ্খাতং অব্যাকতাপত্তিং আপজ্জতি। ইতরেহি ইতরন্তি ইতরেহি অকুসলাব্যাকতচিত্তেহি যং আপজ্জতি, তং ইতরং, অকুসলং অব্যাকতঞ্চাতি অত্থো। ইদঞ্চ আপত্তিং আপজ্জন্তো অকুসলচিত্তসমঙ্গী ৰা আপজ্জতি কুসলাব্যাকতচিত্তসমঙ্গী ৰাতি দস্সনত্থং ৰুত্তং। এৰং সন্তেপি সব্বসিক্খাপদেসু কিঞ্চি অকুসলচিত্তমেৰ কিঞ্চি কুসলাব্যাকতৰসেন দ্ৰিচিত্তং, কিঞ্চি সব্বেসং ৰসেন তিচিত্তন্তি অযমেৰ পভেদো লব্ভতি, ন অঞ্ঞোতি ৰেদিতব্বং।
Atthi pana sikkhāpadaṃ kusalantiādinā āpattiṃ āpajjanto kusalacittasamaṅgī vā āpajjati akusalacittasamaṅgī vā abyākatacittasamaṅgī vāti dasseti, na pana kusalāpi āpatti atthīti. Na hi kusalā āpatti nāma atthi ‘‘āpattādhikaraṇaṃ siyā akusalaṃ siyā abyākataṃ, natthi āpattādhikaraṇaṃ kusala’’nti (pari. 303) vacanato. Dasa kāmāvacarakiriyacittānīti hasituppādavoṭṭhabbanehi saddhiṃ aṭṭha mahākiriyacittāni. Dvinnaṃ abhiññācittānaṃ āpattisamuṭṭhāpakattaṃ paññattiṃ ajānantassa iddhivikubbanādīsu daṭṭhabbaṃ. Yaṃ kusalacittena āpajjatīti yaṃ sikkhāpadasīsena gahitaṃ āpattiṃ kusalacittasamaṅgī āpajjati. Iminā pana vacanena taṃ kusalanti āpattiyā vuccamāno kusalabhāvo pariyāyatova, na paramatthatoti dasseti. Kusalacittena hi āpattiṃ āpajjanto saviññattikaṃ aviññattikaṃ vā sikkhāpadavītikkamākārappavattaṃ rūpakkhandhasaṅkhātaṃ abyākatāpattiṃ āpajjati. Itarehi itaranti itarehi akusalābyākatacittehi yaṃ āpajjati, taṃ itaraṃ, akusalaṃ abyākatañcāti attho. Idañca āpattiṃ āpajjanto akusalacittasamaṅgī vā āpajjati kusalābyākatacittasamaṅgī vāti dassanatthaṃ vuttaṃ. Evaṃ santepi sabbasikkhāpadesu kiñci akusalacittameva kiñci kusalābyākatavasena dvicittaṃ, kiñci sabbesaṃ vasena ticittanti ayameva pabhedo labbhati, na aññoti veditabbaṃ.
তিৰেদনং দ্ৰিৰেদনং একৰেদনন্তি ইদঞ্চ যথাৰুত্তৰেদনাৰসেনেৰ লব্ভতি, নাঞ্ঞথাতি দট্ঠব্বং। নিপজ্জিত্ৰা নিরোধং সমাপন্নস্স সহসেয্যৰসেন তদাকারপ্পৰত্তরূপক্খন্ধস্সেৰ আপত্তিভাৰতো ‘‘অত্থি অৰেদন’’ন্তিপি ৰত্তব্বমেতং, কদাচি করহচি যদিচ্ছকং সম্ভৰতীতি অগ্গহেত্ৰা যেভুয্যৰসেন লব্ভমানংযেৰ গহেত্ৰা ৰুত্তন্তি ৰেদিতব্বং।
Tivedanaṃ dvivedanaṃ ekavedananti idañca yathāvuttavedanāvaseneva labbhati, nāññathāti daṭṭhabbaṃ. Nipajjitvā nirodhaṃ samāpannassa sahaseyyavasena tadākārappavattarūpakkhandhasseva āpattibhāvato ‘‘atthi avedana’’ntipi vattabbametaṃ, kadāci karahaci yadicchakaṃ sambhavatīti aggahetvā yebhuyyavasena labbhamānaṃyeva gahetvā vuttanti veditabbaṃ.
ইদানি যথাৰুত্তসমুট্ঠানাদীনি ইমস্মিং সংৰণ্ণিযমানসিক্খাপদে ৰিভজিত্ৰা দস্সেন্তো ‘‘ইমং পকিণ্ণকং ৰিদিত্ৰা’’তিআদিমাহ। তত্থ ৰিদিত্ৰাতি ইমস্স ‘‘ৰেদিতব্ব’’ন্তি ইমিনা অপরকালকিরিযাৰচনেন সম্বন্ধো ৰেদিতব্বো। কিরিযসমুট্ঠানন্তি ইদং যেভুয্যৰসেন ৰুত্তং পরূপক্কমে সতি সাদিযন্তস্স অকিরিযসমুট্ঠানভাৰতো। ‘‘মনোদ্ৰারে আপত্তি নাম নত্থীতি ইদম্পি বাহুল্লৰসেনেৰ ৰুত্ত’’ন্তি ৰদন্তি। চিত্তং পনেত্থ অঙ্গমত্তং হোতীতি পঠমপারাজিকং কাযচিত্ততো সমুট্ঠাতীতি চিত্তমেত্থ আপত্তিযা অঙ্গমেৰ হোতি। ন তস্স ৰসেন কম্মভাৰো লব্ভতীতি ৰিঞ্ঞত্তিজনকৰসেন কাযদ্ৰারে পৰত্তত্তা তস্স চিত্তস্স ৰসেন ইমস্স সিক্খাপদস্স মনোকম্মভাৰো ন লব্ভতীতি অত্থো। সিক্খাপদস্স হেট্ঠা ৰুত্তনযেন পঞ্ঞত্তিভাৰতো ‘‘সব্বঞ্চেতং আপত্তিযং যুজ্জতী’’তি ৰুত্তং। ন হি যথাৰুত্তসমুট্ঠানাদি পঞ্ঞত্তিযং যুজ্জতি।
Idāni yathāvuttasamuṭṭhānādīni imasmiṃ saṃvaṇṇiyamānasikkhāpade vibhajitvā dassento ‘‘imaṃ pakiṇṇakaṃ viditvā’’tiādimāha. Tattha viditvāti imassa ‘‘veditabba’’nti iminā aparakālakiriyāvacanena sambandho veditabbo. Kiriyasamuṭṭhānanti idaṃ yebhuyyavasena vuttaṃ parūpakkame sati sādiyantassa akiriyasamuṭṭhānabhāvato. ‘‘Manodvāre āpatti nāma natthīti idampi bāhullavaseneva vutta’’nti vadanti. Cittaṃ panettha aṅgamattaṃ hotīti paṭhamapārājikaṃ kāyacittato samuṭṭhātīti cittamettha āpattiyā aṅgameva hoti. Na tassa vasena kammabhāvo labbhatīti viññattijanakavasena kāyadvāre pavattattā tassa cittassa vasena imassa sikkhāpadassa manokammabhāvo na labbhatīti attho. Sikkhāpadassa heṭṭhā vuttanayena paññattibhāvato ‘‘sabbañcetaṃ āpattiyaṃ yujjatī’’ti vuttaṃ. Na hi yathāvuttasamuṭṭhānādi paññattiyaṃ yujjati.
পকিণ্ণককথাৰণ্ণনা নিট্ঠিতা।
Pakiṇṇakakathāvaṇṇanā niṭṭhitā.
