| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
багин̣н̣агагат̇ааван̣н̣анаа
Pakiṇṇakakathāvaṇṇanā
багин̣н̣аганд̇и вомиссаганаяам̣. самудтаананд̇и уббад̇д̇игааран̣ам̣. гирияаад̇иаад̣̇и нид̣̇ассанамад̇д̇ам̣ агирияаад̣̇ийнамби сан̇г̇ахад̇о. взд̣̇анааяа саха гусалан̃жа взд̣̇ид̇аб̣б̣анд̇и яож̇зд̇аб̣б̣ам̣. саб̣б̣асан̇г̇аахагавасзнаад̇и саб̣б̣зсам̣ сигкаабад̣̇аанам̣ сан̇г̇аахагавасзна ‘‘гааяо ваажаа гааяаваажаа гааяажид̇д̇ам̣ ваажаажид̇д̇ам̣ гааяаваажаажид̇д̇а’’нд̇и звам̣ вуд̇д̇аани ча аабад̇д̇исамудтаанаани. самудтаанаад̣̇аяо хи аабад̇д̇ияаа зва хонд̇и, на сигкаабад̣̇асса. д̇ам̣д̇ам̣сигкаабад̣̇асса нияад̇ааабад̇д̇ияаа зва г̇ахан̣ад̇т̇ам̣ бана сигкаабад̣̇асийсзна самудтаанаад̣̇ийнам̣ гат̇анам̣. зван̃хи аабад̇д̇ивисзсо бан̃н̃ааяад̇и аабад̇д̇и-сад̣̇д̣̇асса саб̣б̣аабад̇д̇исаад̇хааран̣ад̇д̇аа, имзсу бана часу самудтаанзсу буримаани д̇ийн̣и ажид̇д̇агаани, бажчимаани сажид̇д̇агаани. самаасад̇о д̇ам̣ имам̣ багин̣н̣агам̣ вид̣̇ид̇ваа взд̣̇ид̇аб̣б̣анд̇и самб̣анд̇хо. ча самудтаанаани зд̇ассаад̇и часамудтаанам̣. звам̣ сзсзсуби.
Pakiṇṇakanti vomissakanayaṃ. Samuṭṭhānanti uppattikāraṇaṃ. Kiriyātiādi nidassanamattaṃ akiriyādīnampi saṅgahato. Vedanāya saha kusalañca veditabbanti yojetabbaṃ. Sabbasaṅgāhakavasenāti sabbesaṃ sikkhāpadānaṃ saṅgāhakavasena ‘‘kāyo vācā kāyavācā kāyacittaṃ vācācittaṃ kāyavācācitta’’nti evaṃ vuttāni cha āpattisamuṭṭhānāni. Samuṭṭhānādayo hi āpattiyā eva honti, na sikkhāpadassa. Taṃtaṃsikkhāpadassa niyataāpattiyā eva gahaṇatthaṃ pana sikkhāpadasīsena samuṭṭhānādīnaṃ kathanaṃ. Evañhi āpattiviseso paññāyati āpatti-saddassa sabbāpattisādhāraṇattā, imesu pana chasu samuṭṭhānesu purimāni tīṇi acittakāni, pacchimāni sacittakāni. Samāsato taṃ imaṃ pakiṇṇakaṃ viditvā veditabbanti sambandho. Cha samuṭṭhānāni etassāti chasamuṭṭhānaṃ. Evaṃ sesesupi.
ад̇т̇и гат̇инасамудтаананд̇иаад̣̇и самудтаанасийсавасзна д̣̇висамудтааназгасамудтаанаанам̣ д̣̇ассанам̣. д̇зраса хи самудтаанасийсаани батамабаарааж̇игасамудтаанам̣ ад̣̇иннаад̣̇аанасамудтаанам̣ сан̃жарид̇д̇асамудтаанам̣ саманубхаасанасамудтаанам̣ гат̇инасамудтаанам̣ зл̣агаломасамудтаанам̣ бад̣̇асод̇хаммасамудтаанам̣ ад̣̇д̇хаанасамудтаанам̣ т̇зяяасад̇т̇асамудтаанам̣ д̇хаммад̣̇зсанаасамудтаанам̣ бхууд̇аарожанасамудтаанам̣ жорийвудтаабанасамудтаанам̣ ананун̃н̃аад̇асамаудтаананд̇и. д̇ад̇т̇а ад̇т̇и часамудтаананд̇и иминаа сан̃жарид̇д̇асамудтаанам̣ вуд̇д̇ам̣, бан̃жасамудтаанасса абхаавад̇о ‘‘ад̇т̇и бан̃жасамудтаана’’нд̇и авад̇ваа ‘‘ад̇т̇и жад̇усамудтаана’’нд̇и вуд̇д̇ам̣, иминаа жа ад̣̇д̇хаанасамудтаанам̣ ананун̃н̃аад̇асамудтаанан̃жа сан̇г̇ахид̇ам̣. яан̃хи батамад̇ад̇ияажад̇уд̇т̇ачадтзхи самудтаанзхи самудтаад̇и , ид̣̇ам̣ ад̣̇д̇хаанасамудтаанам̣. яам̣ бана д̣̇уд̇ияад̇ад̇ияабан̃жамачадтзхи самудтаад̇и, ид̣̇ам̣ ананун̃н̃аад̇асамудтаанам̣. ад̇т̇и д̇исамудтаананд̇и иминаа ад̣̇иннаад̣̇аанасамудтаанам̣ бхууд̇аарожанасамудтаанан̃жа сан̇г̇ахид̇ам̣. яан̃хи сажид̇д̇агзхи д̇ийхи самудтаад̇и, ид̣̇ам̣ ад̣̇иннаад̣̇аанасамудтаанам̣. яам̣ бана ажид̇д̇агзхи д̇ийхи самудтаад̇и, ид̣̇ам̣ бхууд̇аарожанасамудтаанам̣. ад̇т̇и гат̇инасамудтаананд̇иаад̣̇инаа бана авасзсасамаудтаанасийсавасзна д̣̇висамудтаанам̣ згасамудтаанан̃жа сан̇г̇ан̣хаад̇и. д̇ад̇т̇а хи яам̣ д̇ад̇ияачадтзхи самудтаад̇и, ид̣̇ам̣ гат̇инасамудтаанам̣ наама. яам̣ бана батамажад̇уд̇т̇зхи самудтаад̇и, ид̣̇ам̣ зл̣агаломасамудтаанам̣. яам̣ чадтзнзва самудтаад̇и, ид̣̇ам̣ д̇хуранигкзбасамудтаанам̣, ‘‘саманубхаасанасамаудтаана’’нд̇иби д̇ассзва наамам̣. ид̇и саруубзна адта аабад̇д̇исийсаани д̣̇ассид̇аани. аад̣̇исад̣̇д̣̇зна банзд̇т̇а авасзсаани батамабаарааж̇игасамудтаанабад̣̇асод̇хаммат̇зяяасад̇т̇ад̇хаммад̣̇зсанаажорийвудтаабанасамудтаанаани бан̃жаби самудтаанасийсаани сан̇г̇ахид̇аани. д̇ад̇т̇а яам̣ гааяажид̇д̇ад̇о самудтаад̇и, ид̣̇ам̣ батамабаарааж̇игасамудтаанам̣. яам̣ д̣̇уд̇ияабан̃жамзхи самудтаад̇и, ид̣̇ам̣ бад̣̇асод̇хаммасамудтаанам̣. яам̣ жад̇уд̇т̇ачадтзхи самудтаад̇и, ид̣̇ам̣ т̇зяяасад̇т̇асамудтаанам̣. яам̣ бан̃жамзнзва самудтаад̇и, ид̣̇ам̣ д̇хаммад̣̇зсанаасамаудтаанам̣. яам̣ бан̃жамачадтзхи самудтаад̇и, ид̣̇ам̣ жорийвудтаабанасамудтаанам̣. зд̇т̇а жа бажчимзсу д̇ийсу сажид̇д̇агасамудтаанзсу згзгасамудтаанавасзна згасамудтаанаани д̇ивид̇хаани. д̣̇висамудтаанаани бана батамажад̇уд̇т̇зхи ваа д̣̇уд̇ияабан̃жамзхи ваа д̇ад̇ияачадтзхи ваа жад̇уд̇т̇ачадтзхи ваа бан̃жамачадтзхи ваа самудтаанавасзна бан̃жавид̇хаанийд̇и взд̣̇ид̇аб̣б̣аани.
Atthi kathinasamuṭṭhānantiādi samuṭṭhānasīsavasena dvisamuṭṭhānaekasamuṭṭhānānaṃ dassanaṃ. Terasa hi samuṭṭhānasīsāni paṭhamapārājikasamuṭṭhānaṃ adinnādānasamuṭṭhānaṃ sañcarittasamuṭṭhānaṃ samanubhāsanasamuṭṭhānaṃ kathinasamuṭṭhānaṃ eḷakalomasamuṭṭhānaṃ padasodhammasamuṭṭhānaṃ addhānasamuṭṭhānaṃ theyyasatthasamuṭṭhānaṃ dhammadesanāsamuṭṭhānaṃ bhūtārocanasamuṭṭhānaṃ corīvuṭṭhāpanasamuṭṭhānaṃ ananuññātasamauṭṭhānanti. Tattha atthi chasamuṭṭhānanti iminā sañcarittasamuṭṭhānaṃ vuttaṃ, pañcasamuṭṭhānassa abhāvato ‘‘atthi pañcasamuṭṭhāna’’nti avatvā ‘‘atthi catusamuṭṭhāna’’nti vuttaṃ, iminā ca addhānasamuṭṭhānaṃ ananuññātasamuṭṭhānañca saṅgahitaṃ. Yañhi paṭhamatatiyacatutthachaṭṭhehi samuṭṭhānehi samuṭṭhāti , idaṃ addhānasamuṭṭhānaṃ. Yaṃ pana dutiyatatiyapañcamachaṭṭhehi samuṭṭhāti, idaṃ ananuññātasamuṭṭhānaṃ. Atthi tisamuṭṭhānanti iminā adinnādānasamuṭṭhānaṃ bhūtārocanasamuṭṭhānañca saṅgahitaṃ. Yañhi sacittakehi tīhi samuṭṭhāti, idaṃ adinnādānasamuṭṭhānaṃ. Yaṃ pana acittakehi tīhi samuṭṭhāti, idaṃ bhūtārocanasamuṭṭhānaṃ. Atthi kathinasamuṭṭhānantiādinā pana avasesasamauṭṭhānasīsavasena dvisamuṭṭhānaṃ ekasamuṭṭhānañca saṅgaṇhāti. Tattha hi yaṃ tatiyachaṭṭhehi samuṭṭhāti, idaṃ kathinasamuṭṭhānaṃ nāma. Yaṃ pana paṭhamacatutthehi samuṭṭhāti, idaṃ eḷakalomasamuṭṭhānaṃ. Yaṃ chaṭṭheneva samuṭṭhāti, idaṃ dhuranikkhepasamuṭṭhānaṃ, ‘‘samanubhāsanasamauṭṭhāna’’ntipi tasseva nāmaṃ. Iti sarūpena aṭṭha āpattisīsāni dassitāni. Ādisaddena panettha avasesāni paṭhamapārājikasamuṭṭhānapadasodhammatheyyasatthadhammadesanācorīvuṭṭhāpanasamuṭṭhānāni pañcapi samuṭṭhānasīsāni saṅgahitāni. Tattha yaṃ kāyacittato samuṭṭhāti, idaṃ paṭhamapārājikasamuṭṭhānaṃ. Yaṃ dutiyapañcamehi samuṭṭhāti, idaṃ padasodhammasamuṭṭhānaṃ. Yaṃ catutthachaṭṭhehi samuṭṭhāti, idaṃ theyyasatthasamuṭṭhānaṃ. Yaṃ pañcameneva samuṭṭhāti, idaṃ dhammadesanāsamauṭṭhānaṃ. Yaṃ pañcamachaṭṭhehi samuṭṭhāti, idaṃ corīvuṭṭhāpanasamuṭṭhānaṃ. Ettha ca pacchimesu tīsu sacittakasamuṭṭhānesu ekekasamuṭṭhānavasena ekasamuṭṭhānāni tividhāni. Dvisamuṭṭhānāni pana paṭhamacatutthehi vā dutiyapañcamehi vā tatiyachaṭṭhehi vā catutthachaṭṭhehi vā pañcamachaṭṭhehi vā samuṭṭhānavasena pañcavidhānīti veditabbāni.
звам̣ самудтаанавасзна саб̣б̣асигкаабад̣̇аани д̇зрасад̇хаа д̣̇ассзд̇ваа ид̣̇аани гирияаавасзна бан̃жад̇хаа д̣̇ассзд̇ум̣ д̇ад̇раабийд̇иаад̣̇и вуд̇д̇ам̣. гин̃жийд̇и сигкаабад̣̇ам̣. гирияад̇од̇и бат̇авийкан̣анаад̣̇и (баажи. 84-85) вияа гааяаважийвин̃н̃ад̇д̇иж̇анид̇агаммад̇о. агирияад̇од̇и батамагат̇инаад̣̇и (баараа. 459 аад̣̇аяо) вияа гад̇д̇аб̣б̣асса агаран̣знзва. гирияаагирияад̇од̇и ан̃н̃аад̇игааяа бхигкунияаа хад̇т̇ад̇о жийварабадиг̇г̇ахан̣аад̣̇и (баараа. 508 аад̣̇аяо) вияа. сияаа гирияад̇о, сияаа агирияад̇о руубияабадиг̇г̇ахан̣аад̣̇и (баараа. 582 аад̣̇аяо) вияа, сияаа гирияад̇о, сияаа гирияаагирияад̇о гудигаараад̣̇и (баараа. 342) вияа. вийд̇иггамасан̃н̃ааяа абхаавзна вимогко ассаад̇и сан̃н̃аавимогканд̇и маж̇жхзбад̣̇алобийсамаасо д̣̇адтаб̣б̣о. жид̇д̇ан̇г̇ам̣ лабхад̇и сажид̇д̇агасамудтаанзхзва самудтаханад̇о. ид̇аранд̇и яасса жид̇д̇ан̇г̇анияамо над̇т̇и, д̇ам̣, анаабад̇д̇имукзна жзд̇ам̣ сан̃н̃аад̣̇угам̣ вуд̇д̇ам̣, аабад̇д̇имукзна сажид̇д̇агад̣̇уганд̇и зд̇д̇агамзва висзсо, ад̇т̇ад̇о самаанаава.
Evaṃ samuṭṭhānavasena sabbasikkhāpadāni terasadhā dassetvā idāni kiriyāvasena pañcadhā dassetuṃ tatrāpītiādi vuttaṃ. Kiñcīti sikkhāpadaṃ. Kiriyatoti pathavīkhaṇanādi (pāci. 84-85) viya kāyavacīviññattijanitakammato. Akiriyatoti paṭhamakathinādi (pārā. 459 ādayo) viya kattabbassa akaraṇeneva. Kiriyākiriyatoti aññātikāya bhikkhuniyā hatthato cīvarapaṭiggahaṇādi (pārā. 508 ādayo) viya. Siyā kiriyato, siyā akiriyato rūpiyapaṭiggahaṇādi (pārā. 582 ādayo) viya, siyā kiriyato, siyā kiriyākiriyato kuṭikārādi (pārā. 342) viya. Vītikkamasaññāya abhāvena vimokkho assāti saññāvimokkhanti majjhepadalopīsamāso daṭṭhabbo. Cittaṅgaṃ labhati sacittakasamuṭṭhāneheva samuṭṭhahanato. Itaranti yassa cittaṅganiyamo natthi, taṃ, anāpattimukhena cetaṃ saññādukaṃ vuttaṃ, āpattimukhena sacittakadukanti ettakameva viseso, atthato samānāva.
гааяаважийд̣̇ваарзхи аабаж̇ж̇ид̇аб̣б̣амби гааяагаммз ваа важийгаммз ваа сан̇г̇аяхад̇и. д̇ад̇т̇а б̣аахуллавуд̇д̇ид̇о ад̣̇иннаад̣̇аанамусааваад̣̇аад̣̇аяо вияаад̇и ад̇т̇и сигкаабад̣̇ам̣ гааяагамманд̇иаад̣̇инаа гааяагаммам̣ важийгамман̃жаад̇и д̣̇угамзва вуд̇д̇ам̣, вибхааг̇ад̇о бана гааяаважийгаммзна сад̣̇д̇хим̣ д̇игамзва ход̇и. д̇знзва маад̇игаадтагат̇ааяам̣ (ган̇каа. адта. батамабаарааж̇игаван̣н̣анаа) вуд̇д̇ам̣ ‘‘саб̣б̣аа жа гааяагаммаважийгаммад̇ад̣̇убхаяавасзна д̇ивид̇хаа хонд̇ий’’д̇и. д̇ад̇оязва ид̇хааби ад̣̇иннаад̣̇аанаад̣̇ийсу (баараа. 89) гааяагаммаважийгамманд̇и д̇ад̣̇убхаяавасзна д̣̇ассид̇ам̣. ад̇т̇и бана сигкаабад̣̇ам̣ гусаланд̇иаад̣̇и аабад̇д̇исамудтаабагажид̇д̇авасзна гаарияз гааран̣обажаарзна вуд̇д̇ам̣, на бана аабад̇д̇ияаа гусалаад̣̇ибарамад̇т̇ад̇хаммад̇аавасзна аабад̇д̇ияаа саммуд̇исабхаавад̇д̇аа. гусалаагусалаад̣̇ибарамад̇т̇ад̇хаммз убаад̣̇ааяа хи бхаг̇авад̇аа аабад̇д̇исаммуд̇и бан̃н̃ад̇д̇аа. вагкад̇и хи ‘‘яам̣ гусалажид̇д̇зна аабаж̇ж̇ад̇и, д̇ам̣ гусала’’нд̇иаад̣̇и (баараа. адта. 1.66 баган̣н̣агагат̇аа). на хи бхаг̇авад̇о аан̣ааяад̇д̇аа аабад̇д̇и гусалаад̣̇ибарамад̇т̇асабхааваа ход̇и анубасамбаннаанам̣ аад̣̇игаммигаанан̃жа аабад̇д̇иббасан̇г̇ад̇о, д̇ассаа д̣̇зсанаад̣̇ийхи висуд̣̇д̇хиабхааваббасан̇г̇ад̇о жа. на хи гааран̣аб̣алзна уббаж̇ж̇амаанаа гусалаад̣̇исабхааваа аабад̇д̇и анубасамбаннаад̣̇ийсу нивад̇д̇ад̇и, уббаннааяа жа д̇ассаа гзнажи винаасо на самбхавад̇и. сарасавинаасад̇о д̣̇зсанаад̣̇инаа жа аабад̇д̇и виг̇ажчад̇ийд̇и важанамад̇т̇и, на бана д̇зна агусалаад̣̇и виг̇ажчад̇и. бид̇угхаад̇аад̣̇игаммзна хи баарааж̇игам̣ аабаннасса бхигкуно г̇ихилин̇г̇ам̣ г̇ахзд̇ваа бхигкубхаавабарижжааг̇зна баарааж̇игаабад̇д̇и виг̇ажчад̇и, на баан̣аад̇ибаад̇аад̣̇иагусалам̣ аананд̇арияаад̣̇ибхаавад̇о. д̇асмаа д̣̇умман̇гуунам̣ ниг̇г̇ахаад̣̇ид̣̇асаад̇т̇авасз (баараа. 39; бари. 2) бадижжа бхаг̇авад̇аа яат̇аабажжаяам̣ самуббаж̇ж̇амаанз гусалаагусалаад̣̇инаамаруубад̇хаммз убаад̣̇ааяа бан̃н̃ад̇д̇аа саммуд̇иязва аабад̇д̇и, саа жа яат̇аавид̇хибадигаммагаран̣зна виг̇ад̇аа наама ход̇ийд̇и взд̣̇ид̇аб̣б̣ам̣, д̇знааха д̣̇вад̇д̇им̣сзва хи аабад̇д̇исамудтаабагажид̇д̇аанийд̇иаад̣̇и. аабад̇д̇исамудтаабагад̇д̇знзва хзд̇т̇а гусалаад̣̇ийнам̣ аабад̇д̇ид̇о бхзд̣̇о сид̣̇д̇хо. на хи д̇ам̣самудтид̇асса д̇ад̇о абхзд̣̇о яуд̇д̇о самудтаанасамудтид̇абхзд̣̇аб̣яавахаарубажчзд̣̇аббасан̇г̇ад̇о. саарад̇т̇ад̣̇ийбанияам̣ (саарад̇т̇а. дий. баарааж̇игаган̣д̣а 2.66 багин̣н̣агагат̇ааван̣н̣анаа) бана аабад̇д̇ияаа барамад̇т̇ад̇о гусалад̇д̇амзва на самбхавад̇и ‘‘аабад̇д̇аад̇хигаран̣ам̣ сияаа агусалам̣, сияаа аб̣яаагад̇ам̣, над̇т̇и аабад̇д̇аад̇хигаран̣ам̣ гусала’’нд̇и важанад̇о, ‘‘агусалад̇д̇ам̣ бана аб̣яаагад̇ад̇д̇ан̃жа аабад̇д̇ияаа самбхавад̇ий’’д̇и сан̃н̃ааяа гусалажид̇д̇асамудтаанагкан̣зби руубааб̣яаагад̇ад̇д̇ам̣ аабад̇д̇ияаа самад̇т̇зд̇ум̣ яам̣ гусалажид̇д̇зна аабаж̇ж̇ад̇и, д̇ам̣ гусалам̣, ид̇арзхи ид̇аранд̇и (баараа. адта. 1.66 багин̣н̣агагат̇аа) имам̣ адтагат̇ааважанам̣ ниссааяа вуд̇д̇ам̣ ‘‘яам̣ гусалажид̇д̇зна аабаж̇ж̇ад̇ийд̇и яам̣ сигкаабад̣̇асийсз г̇ахид̇ам̣ аабад̇д̇им̣ гусалажид̇д̇асаман̇г̇ий аабаж̇ж̇ад̇и, иминаа бана важанзна д̇ам̣ гусаланд̇и аабад̇д̇ияаа вужжамаано гусалабхааво барияааяад̇о, на барамад̇т̇ад̇од̇и д̣̇ассзд̇и. гусалажид̇д̇зна хи аабад̇д̇им̣ аабаж̇ж̇анд̇о савин̃н̃ад̇д̇игам̣ авин̃н̃ад̇д̇игам̣ ваа сигкаабад̣̇авийд̇иггамаагаараббавад̇д̇ам̣ руубагканд̇хасан̇каад̇ам̣ аб̣яаагад̇аабад̇д̇им̣ аабаж̇ж̇ад̇ий’’д̇и. д̇ад̇т̇а яам̣ гусалажид̇д̇зна аабаж̇ж̇ад̇ийд̇и имам̣ важанам̣ уд̣̇д̣̇исса ‘‘иминаа бана важанзна д̇ам̣ гусаланд̇и аабад̇д̇ияаа вужжамаано гусалабхааво барияааяад̇о, на барамад̇т̇ад̇од̇и д̣̇ассзд̇ий’’д̇и вуд̇д̇ам̣, звам̣ ид̇арзхи ид̇аранд̇и важанзна ‘‘яам̣ агусалажид̇д̇зна аабаж̇ж̇ахи, д̇ам̣ агусалам̣, яам̣ аб̣яаагад̇ажид̇д̇зна аабаж̇ж̇ад̇и, д̇ам̣ аб̣яаагад̇а’’нд̇и имасса ад̇т̇асса вуд̇д̇ад̇д̇аа ид̇арзхийд̇и важанам̣ уд̣̇д̣̇исса ‘‘иминааби важанзна ид̇аранд̇и аабад̇д̇ияаа вужжамаано агусалабхааво аб̣яаагад̇абхааво жа барияааяад̇о д̣̇ассзд̇ий’’д̇и вад̇д̇аб̣б̣ам̣. звам̣ авад̇ваа гусалабагкз зва гат̇анасса гааран̣ам̣ на бассаама. яам̣ бана аабад̇д̇аад̇хигаран̣ам̣ сияаа агусаланд̇иаад̣̇иважанам̣ гааран̣ад̇д̇зна вуд̇д̇ам̣, д̇амби агааран̣ам̣ яам̣ агусалажид̇д̇зна аабаж̇ж̇ад̇и, д̇ам̣ агусаланд̇иаад̣̇инаа хздтаа вуд̇д̇анаязна агусалаад̣̇ибхаавасса барияааяад̣̇зсид̇ад̇д̇аа, аабад̇д̇ияаа гусалавохаарасса аяуд̇д̇ад̇ааяа над̇т̇и аабад̇д̇аад̇хигаран̣ам̣ гусаланд̇и вуд̇д̇ад̇д̇аа жа. аабад̇д̇ияаа хи гусалажид̇д̇асамудтид̇ад̇д̇зби бхаг̇авад̇аа бадигкид̇д̇абхаавзна сааваж̇ж̇ад̇хаммад̇д̇аа гааран̣уубажаарзнааби анаваж̇ж̇агусалавохааро на яуд̇д̇о сааваж̇ж̇аанаваж̇ж̇аанам̣ ан̃н̃аман̃н̃авируд̣̇д̇хад̇д̇аа. яат̇аа аагаасаад̣̇исаммуд̇исажжаанам̣ уббаннад̇аад̣̇ивохааро вияа ж̇аад̇иж̇араабхан̇г̇аанам̣ уббаннад̇аад̣̇ивохааро анавадтаанаад̣̇ид̣̇зсад̇о аяуд̇д̇о, звамид̇хааби гусалавохааро аяуд̇д̇о вируд̣̇д̇хад̇д̇аа. агусалаад̣̇ивохааро бана яуд̇д̇о , гааран̣уубажаарзна бана агусалаад̣̇исабхаавад̇аа яат̇аавуд̇д̇ад̣̇осаанад̇ивад̇д̇анад̇о. суд̇д̇ассааби хи яат̇аа суд̇д̇асуд̇д̇аануломаад̣̇ийхи вирод̇хо на ход̇и, д̇ат̇зва ад̇т̇о г̇ахзд̇аб̣б̣о.
Kāyavacīdvārehi āpajjitabbampi kāyakamme vā vacīkamme vā saṅgayhati. Tattha bāhullavuttito adinnādānamusāvādādayo viyāti atthi sikkhāpadaṃ kāyakammantiādinā kāyakammaṃ vacīkammañcāti dukameva vuttaṃ, vibhāgato pana kāyavacīkammena saddhiṃ tikameva hoti. Teneva mātikāṭṭhakathāyaṃ (kaṅkhā. aṭṭha. paṭhamapārājikavaṇṇanā) vuttaṃ ‘‘sabbā ca kāyakammavacīkammatadubhayavasena tividhā hontī’’ti. Tatoyeva idhāpi adinnādānādīsu (pārā. 89) kāyakammavacīkammanti tadubhayavasena dassitaṃ. Atthi pana sikkhāpadaṃ kusalantiādi āpattisamuṭṭhāpakacittavasena kāriye kāraṇopacārena vuttaṃ, na pana āpattiyā kusalādiparamatthadhammatāvasena āpattiyā sammutisabhāvattā. Kusalākusalādiparamatthadhamme upādāya hi bhagavatā āpattisammuti paññattā. Vakkhati hi ‘‘yaṃ kusalacittena āpajjati, taṃ kusala’’ntiādi (pārā. aṭṭha. 1.66 pakaṇṇakakathā). Na hi bhagavato āṇāyattā āpatti kusalādiparamatthasabhāvā hoti anupasampannānaṃ ādikammikānañca āpattippasaṅgato, tassā desanādīhi visuddhiabhāvappasaṅgato ca. Na hi kāraṇabalena uppajjamānā kusalādisabhāvā āpatti anupasampannādīsu nivattati, uppannāya ca tassā kenaci vināso na sambhavati. Sarasavināsato desanādinā ca āpatti vigacchatīti vacanamatthi, na pana tena akusalādi vigacchati. Pitughātādikammena hi pārājikaṃ āpannassa bhikkhuno gihiliṅgaṃ gahetvā bhikkhubhāvapariccāgena pārājikāpatti vigacchati, na pāṇātipātādiakusalaṃ ānantariyādibhāvato. Tasmā dummaṅkūnaṃ niggahādidasaatthavase (pārā. 39; pari. 2) paṭicca bhagavatā yathāpaccayaṃ samuppajjamāne kusalākusalādināmarūpadhamme upādāya paññattā sammutiyeva āpatti, sā ca yathāvidhipaṭikammakaraṇena vigatā nāma hotīti veditabbaṃ, tenāha dvattiṃseva hi āpattisamuṭṭhāpakacittānītiādi. Āpattisamuṭṭhāpakatteneva hettha kusalādīnaṃ āpattito bhedo siddho. Na hi taṃsamuṭṭhitassa tato abhedo yutto samuṭṭhānasamuṭṭhitabhedabyavahārupacchedappasaṅgato. Sāratthadīpaniyaṃ (sārattha. ṭī. pārājikakaṇḍa 2.66 pakiṇṇakakathāvaṇṇanā) pana āpattiyā paramatthato kusalattameva na sambhavati ‘‘āpattādhikaraṇaṃ siyā akusalaṃ, siyā abyākataṃ, natthi āpattādhikaraṇaṃ kusala’’nti vacanato, ‘‘akusalattaṃ pana abyākatattañca āpattiyā sambhavatī’’ti saññāya kusalacittasamuṭṭhānakkhaṇepi rūpābyākatattaṃ āpattiyā samatthetuṃ yaṃ kusalacittena āpajjati, taṃ kusalaṃ, itarehi itaranti (pārā. aṭṭha. 1.66 pakiṇṇakakathā) imaṃ aṭṭhakathāvacanaṃ nissāya vuttaṃ ‘‘yaṃ kusalacittena āpajjatīti yaṃ sikkhāpadasīse gahitaṃ āpattiṃ kusalacittasamaṅgī āpajjati, iminā pana vacanena taṃ kusalanti āpattiyā vuccamāno kusalabhāvo pariyāyato, na paramatthatoti dasseti. Kusalacittena hi āpattiṃ āpajjanto saviññattikaṃ aviññattikaṃ vā sikkhāpadavītikkamākārappavattaṃ rūpakkhandhasaṅkhātaṃ abyākatāpattiṃ āpajjatī’’ti. Tattha yaṃ kusalacittena āpajjatīti imaṃ vacanaṃ uddissa ‘‘iminā pana vacanena taṃ kusalanti āpattiyā vuccamāno kusalabhāvo pariyāyato, na paramatthatoti dassetī’’ti vuttaṃ, evaṃ itarehi itaranti vacanena ‘‘yaṃ akusalacittena āpajjahi, taṃ akusalaṃ, yaṃ abyākatacittena āpajjati, taṃ abyākata’’nti imassa atthassa vuttattā itarehīti vacanaṃ uddissa ‘‘imināpi vacanena itaranti āpattiyā vuccamāno akusalabhāvo abyākatabhāvo ca pariyāyato dassetī’’ti vattabbaṃ. Evaṃ avatvā kusalapakkhe eva kathanassa kāraṇaṃ na passāma. Yaṃ pana āpattādhikaraṇaṃ siyā akusalantiādivacanaṃ kāraṇattena vuttaṃ, tampi akāraṇaṃ yaṃ akusalacittena āpajjati, taṃ akusalantiādinā heṭṭhā vuttanayena akusalādibhāvassa pariyāyadesitattā, āpattiyā kusalavohārassa ayuttatāya natthi āpattādhikaraṇaṃ kusalanti vuttattā ca. Āpattiyā hi kusalacittasamuṭṭhitattepi bhagavatā paṭikkhittabhāvena sāvajjadhammattā kāraṇūpacārenāpi anavajjakusalavohāro na yutto sāvajjānavajjānaṃ aññamaññaviruddhattā. Yathā ākāsādisammutisaccānaṃ uppannatādivohāro viya jātijarābhaṅgānaṃ uppannatādivohāro anavaṭṭhānādidesato ayutto, evamidhāpi kusalavohāro ayutto viruddhattā. Akusalādivohāro pana yutto , kāraṇūpacārena pana akusalādisabhāvatā yathāvuttadosānativattanato. Suttassāpi hi yathā suttasuttānulomādīhi virodho na hoti, tatheva attho gahetabbo.
яам̣ бана вуд̇д̇ам̣ ‘‘гусалажид̇д̇зна хи аабад̇д̇им̣ аабаж̇ж̇анд̇о…бз… руубагканд̇хасан̇каад̇ам̣ аб̣яаагад̇аабад̇д̇им̣ аабаж̇ж̇ад̇ий’’д̇и, д̇ам̣ аяуд̇д̇амзва руубагканд̇хасса кан̣игад̇ааяа аабад̇д̇ияааби д̣̇зсанаад̣̇ибадигаммам̣ винаава бадибассад̣̇д̇хиббасан̇г̇ад̇о. руубабарамбараа аабад̇д̇ийд̇и жз? д̇анна, бадигаммзнааби авиг̇амаббасан̇г̇ад̇о. на хи руубасанд̇ад̇ид̣̇зсанаад̣̇ийхи виг̇ажчад̇и сагааран̣ааяад̇д̇ад̇д̇аа, ид̇и саб̣б̣ат̇аа аабад̇д̇ияаа барамад̇т̇ад̇аа аяуд̇д̇аа, зд̇знзва яам̣ вуд̇д̇ам̣ ‘‘нибаж̇ж̇ид̇ваа нирод̇хасамаабаннасса сахасзяяавасзна д̇ат̇аагаараббавад̇д̇аруубад̇хаммассзва аабад̇д̇ибхаавад̇о’’д̇иаад̣̇и, д̇амби бадисид̣̇д̇ханд̇и взд̣̇ид̇аб̣б̣ам̣. ид̇ха бана нирод̇хасамаабаннаанам̣ руубад̇хаммамзва бадижжа уббаннад̇д̇аа аабад̇д̇и ажид̇д̇аа авзд̣̇анаа, ан̃н̃ад̇т̇а бана сажид̇д̇аа савзд̣̇анаава, саб̣б̣ад̇т̇ааби бан̃н̃ад̇д̇исабхааваад̇и взд̣̇ид̇аб̣б̣аа. д̇знзва д̣̇удтад̣̇осасигкаабад̣̇адтагат̇ааяам̣ аабад̇д̇ияаа агусалаад̣̇исабхаавам̣ барабаригаббид̇ам̣ нисзд̇хзд̇ум̣ ‘‘аад̣̇игаммигасса анаабад̇д̇иважанад̇о…бз… бан̣н̣ад̇д̇имад̇д̇амзва аабад̇д̇аад̇хигаран̣анд̇и взд̣̇ид̇аб̣б̣а’’нд̇и саяамзва вагкад̇и, д̇асмаа ‘‘д̇ам̣д̇ам̣гусалаад̣̇ид̇хаммасамуббад̇д̇ияаа бхаг̇авад̇аа бан̃н̃ад̇д̇аа аабад̇д̇исаммуд̇и самудтид̇аа’’д̇и жа, ‘‘яаава бадиббассад̣̇д̇хигааран̣аа д̇идтад̇ий’’д̇и жа, ‘‘бадиббассад̣̇д̇хигааран̣зхи винассад̇ий’’д̇и жа вохарийяад̇и. аабад̇д̇ияаа жа саммуд̇исабхаавад̇д̇зби хи сан̃жижжа д̇ам̣ аабаж̇ж̇анд̇асса, бадигирияам̣ агаронд̇асса жа анаад̣̇арз агусаларааси жзва саг̇г̇амаг̇г̇анд̇арааяо жа ход̇ийд̇и лаж̇ж̇ино яат̇аавид̇хим̣ наад̇иггаманд̇и, анад̇иггаманаббажжаяаа жа д̇зсам̣ ананд̇аббабхзд̣̇аа сийлаад̣̇аяо д̇хаммаа баривад̣дханд̇ийд̇и г̇ахзд̇аб̣б̣ам̣. д̣̇вад̇д̇им̣сзваад̇и нияамо аабад̇д̇инимид̇д̇аанам̣ гааяаважийвин̃н̃ад̇д̇ийнам̣ зд̇зхзва самуббаж̇ж̇анад̇о гад̇о, на бана саб̣б̣аабад̇д̇ийнамби зд̇зхзва самуббаж̇ж̇анад̇о. нибаж̇ж̇ид̇ваа нид̣̇д̣̇ааяанд̇аанан̃хи жхаананирод̇хасамаабаннаанан̃жа авин̃н̃ад̇д̇иж̇анагзхи вибаагааббанаажид̇д̇зхи жзва руубад̇хаммзхи жа сахасзяяаад̣̇иаабад̇д̇и самбхавад̇и.
Yaṃ pana vuttaṃ ‘‘kusalacittena hi āpattiṃ āpajjanto…pe… rūpakkhandhasaṅkhātaṃ abyākatāpattiṃ āpajjatī’’ti, taṃ ayuttameva rūpakkhandhassa khaṇikatāya āpattiyāpi desanādipaṭikammaṃ vināva paṭipassaddhippasaṅgato. Rūpaparamparā āpattīti ce? Tanna, paṭikammenāpi avigamappasaṅgato. Na hi rūpasantatidesanādīhi vigacchati sakāraṇāyattattā, iti sabbathā āpattiyā paramatthatā ayuttā, eteneva yaṃ vuttaṃ ‘‘nipajjitvā nirodhasamāpannassa sahaseyyavasena tathākārappavattarūpadhammasseva āpattibhāvato’’tiādi, tampi paṭisiddhanti veditabbaṃ. Idha pana nirodhasamāpannānaṃ rūpadhammameva paṭicca uppannattā āpatti acittā avedanā, aññattha pana sacittā savedanāva, sabbatthāpi paññattisabhāvāti veditabbā. Teneva duṭṭhadosasikkhāpadaṭṭhakathāyaṃ āpattiyā akusalādisabhāvaṃ paraparikappitaṃ nisedhetuṃ ‘‘ādikammikassa anāpattivacanato…pe… paṇṇattimattameva āpattādhikaraṇanti veditabba’’nti sayameva vakkhati, tasmā ‘‘taṃtaṃkusalādidhammasamuppattiyā bhagavatā paññattā āpattisammuti samuṭṭhitā’’ti ca, ‘‘yāva paṭippassaddhikāraṇā tiṭṭhatī’’ti ca, ‘‘paṭippassaddhikāraṇehi vinassatī’’ti ca voharīyati. Āpattiyā ca sammutisabhāvattepi hi sañcicca taṃ āpajjantassa, paṭikiriyaṃ akarontassa ca anādare akusalarāsi ceva saggamaggantarāyo ca hotīti lajjino yathāvidhiṃ nātikkamanti, anatikkamanappaccayā ca tesaṃ anantappabhedā sīlādayo dhammā parivaḍḍhantīti gahetabbaṃ. Dvattiṃsevāti niyamo āpattinimittānaṃ kāyavacīviññattīnaṃ eteheva samuppajjanato kato, na pana sabbāpattīnampi eteheva samuppajjanato. Nipajjitvā niddāyantānañhi jhānanirodhasamāpannānañca aviññattijanakehi vipākaappanācittehi ceva rūpadhammehi ca sahaseyyādiāpatti sambhavati.
д̣̇асаад̇и гирияаахзд̇угамановин̃н̃аан̣ад̇хаад̇уд̣̇ваязна саха адта махаагирияажид̇д̇аани. бан̃н̃ад̇д̇им̣ аж̇аанид̇ваа ид̣̇д̇хивигуб̣б̣анаад̣̇ийсу абхин̃н̃аанам̣ аабад̇д̇исамудтаабагад̇д̇ам̣ взд̣̇ид̇аб̣б̣ам̣. зд̇т̇а жа гин̃жи сигкаабад̣̇ам̣ агусалажид̇д̇амзва, гин̃жи гусалааб̣яаагад̇авасзна д̣̇вижид̇д̇ам̣, гин̃жи д̇ижид̇д̇анд̇и аяамзва бхзд̣̇о лаб̣бхад̇и, наан̃н̃од̇и взд̣̇ид̇аб̣б̣ам̣. гирияаасамудтаананд̇и баруубаггамзна ж̇ааяамаанам̣ ан̇г̇аж̇аад̇аад̣̇ижаланам̣ саад̣̇ияанажид̇д̇асан̇каад̇з сзванажид̇д̇з уббаннз д̇зна жид̇д̇зна самуббаад̣̇ид̇амзва ход̇ийд̇и вуд̇д̇ам̣ ид̇арат̇аа ‘‘сияаа гирияасамудтаанам̣, сияаа агирияасамудтаана’’нд̇и вад̇д̇аб̣б̣ад̇о.
Dasāti kiriyāhetukamanoviññāṇadhātudvayena saha aṭṭha mahākiriyacittāni. Paññattiṃ ajānitvā iddhivikubbanādīsu abhiññānaṃ āpattisamuṭṭhāpakattaṃ veditabbaṃ. Ettha ca kiñci sikkhāpadaṃ akusalacittameva, kiñci kusalābyākatavasena dvicittaṃ, kiñci ticittanti ayameva bhedo labbhati, nāññoti veditabbaṃ. Kiriyāsamuṭṭhānanti parūpakkamena jāyamānaṃ aṅgajātādicalanaṃ sādiyanacittasaṅkhāte sevanacitte uppanne tena cittena samuppāditameva hotīti vuttaṃ itarathā ‘‘siyā kiriyasamuṭṭhānaṃ, siyā akiriyasamuṭṭhāna’’nti vattabbato.
яам̣ бана саарад̇т̇ад̣̇ийбанияам̣ (саарад̇т̇а. дий. баарааж̇игаган̣д̣а 2.66 багин̣н̣агагат̇ааван̣н̣анаа) вуд̇д̇ам̣ ‘‘гирияасамудтаананд̇и ид̣̇ам̣ язбхуяяавасзна вуд̇д̇ам̣ баруубаггамз сад̇и саад̣̇ияанд̇асса агирияасамудтаанабхаавад̇о’’д̇иаад̣̇и, д̇ам̣ на г̇ахзд̇аб̣б̣ам̣ батамабаарааж̇игасса агирияасамудтаанад̇ааяа баал̣иадтагат̇аасу авуд̇д̇ад̇д̇аа. ‘‘манод̣̇ваарз аабад̇д̇и наама над̇т̇ий’’д̇и (ган̇каа. адта. батамабаарааж̇игаван̣н̣анаа; баараа. адта. 2.583-4) хи вуд̇д̇ам̣. гат̇ан̃хи наама баруубаггамзна мзт̇унам̣ саад̣̇ияанд̇о ад̇д̇ано ан̇г̇аж̇аад̇аад̣̇игааяажаланам̣ на саад̣̇иязяяа, саад̣̇ияанажид̇д̇аануг̇ун̣амзва бана сагаласарийрз жид̇д̇аж̇аруубасамуббад̇д̇ияаа вин̃н̃ад̇д̇иби сукумаа самуббаннаа зва ход̇ийд̇и д̣̇адтаб̣б̣ам̣, д̇знааха гааяад̣̇ваарзнзва самудтаанад̇о гааяагамманд̇иаад̣̇и. жид̇д̇ам̣ банзд̇т̇а ан̇г̇амад̇д̇ам̣ ход̇ийд̇и гааяавин̃н̃ад̇д̇и зва гааяагаммабхаавз гааран̣ам̣, на жид̇д̇ам̣. д̇ам̣ банзд̇т̇а гааяасан̇каад̇ааяа вин̃н̃ад̇д̇ияааязва ан̇г̇амад̇д̇ам̣, на гааяагаммабхаавасса, ид̇арат̇аа мзт̇унасса ‘‘маногамма’’нд̇и вад̇д̇аб̣б̣ад̇о, д̇знааха ‘‘на д̇асса васзна гаммабхааво лаб̣бхад̇ий’’д̇и. гаммабхаавод̇и гааяагаммабхааво. саб̣б̣ан̃жзд̇анд̇и зд̇ам̣ самудтаанаад̣̇игам̣. сигкаабад̣̇асийсзнаад̇и д̇ам̣д̇ам̣сигкаабад̣̇анияад̇ааабад̇д̇ияаа зва г̇ахан̣ад̇т̇ам̣ сигкаабад̣̇амукзна.
Yaṃ pana sāratthadīpaniyaṃ (sārattha. ṭī. pārājikakaṇḍa 2.66 pakiṇṇakakathāvaṇṇanā) vuttaṃ ‘‘kiriyasamuṭṭhānanti idaṃ yebhuyyavasena vuttaṃ parūpakkame sati sādiyantassa akiriyasamuṭṭhānabhāvato’’tiādi, taṃ na gahetabbaṃ paṭhamapārājikassa akiriyasamuṭṭhānatāya pāḷiaṭṭhakathāsu avuttattā. ‘‘Manodvāre āpatti nāma natthī’’ti (kaṅkhā. aṭṭha. paṭhamapārājikavaṇṇanā; pārā. aṭṭha. 2.583-4) hi vuttaṃ. Kathañhi nāma parūpakkamena methunaṃ sādiyanto attano aṅgajātādikāyacalanaṃ na sādiyeyya, sādiyanacittānuguṇameva pana sakalasarīre cittajarūpasamuppattiyā viññattipi sukhumā samuppannā eva hotīti daṭṭhabbaṃ, tenāha kāyadvāreneva samuṭṭhānato kāyakammantiādi. Cittaṃ panettha aṅgamattaṃ hotīti kāyaviññatti eva kāyakammabhāve kāraṇaṃ, na cittaṃ. Taṃ panettha kāyasaṅkhātāya viññattiyāyeva aṅgamattaṃ, na kāyakammabhāvassa, itarathā methunassa ‘‘manokamma’’nti vattabbato, tenāha ‘‘na tassa vasena kammabhāvo labbhatī’’ti. Kammabhāvoti kāyakammabhāvo. Sabbañcetanti etaṃ samuṭṭhānādikaṃ. Sikkhāpadasīsenāti taṃtaṃsikkhāpadaniyataāpattiyā eva gahaṇatthaṃ sikkhāpadamukhena.
багин̣н̣агагат̇ааван̣н̣анаанаяо нидтид̇о.
Pakiṇṇakakathāvaṇṇanānayo niṭṭhito.
