| Library / Tipiṭaka / తిపిటక • Tipiṭaka / సారత్థదీపనీ-టీకా • Sāratthadīpanī-ṭīkā |
పకిణ్ణకకథావణ్ణనా
Pakiṇṇakakathāvaṇṇanā
దోమనస్సచిత్తేనేవ భణతీతి ఇమినా సన్నిట్ఠాపకచేతనా దుక్ఖవేదనాయ సమ్పయుత్తా ఏవాతి దస్సేతి. సుఖబహులతాయ హి రాజానో హసమానాపి ‘‘ఘాతేథా’’తి వదన్తి, హాసో పన నేసం అనత్థవూపసమాదిఅఞ్ఞవిసయోతి సన్నిట్ఠాపకచేతనా దుక్ఖవేదనాయ సమ్పయుత్తా ఏవ. సతి పన దోమనస్సే కథం తం నప్పకాసతీతి ఆహ ‘‘సుఖవోకిణ్ణత్తా’’తిఆది, పుబ్బాపరియవసేన ఉభోసు పస్సేసు ఉప్పజ్జనకసుఖేహి ఆకిణ్ణత్తా ఉప్పన్నస్స చ దోమనస్సస్స అనుప్పబన్ధనేన పవత్తియా అభావతో తదా ఉప్పన్నమ్పి దోమనస్సం నప్పకాసతీతి అత్థో.
Domanassacittenevabhaṇatīti iminā sanniṭṭhāpakacetanā dukkhavedanāya sampayuttā evāti dasseti. Sukhabahulatāya hi rājāno hasamānāpi ‘‘ghātethā’’ti vadanti, hāso pana nesaṃ anatthavūpasamādiaññavisayoti sanniṭṭhāpakacetanā dukkhavedanāya sampayuttā eva. Sati pana domanasse kathaṃ taṃ nappakāsatīti āha ‘‘sukhavokiṇṇattā’’tiādi, pubbāpariyavasena ubhosu passesu uppajjanakasukhehi ākiṇṇattā uppannassa ca domanassassa anuppabandhanena pavattiyā abhāvato tadā uppannampi domanassaṃ nappakāsatīti attho.
