| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
ပကိဏ္ဏကကထာဝဏ္ဏနာ
Pakiṇṇakakathāvaṇṇanā
ဒောမနသ္သစိတ္တေနေဝ ဘဏတီတိ ဣမိနာ သန္နိဋ္ဌာပကစေတနာ ဒုက္ခဝေဒနာယ သမ္ပယုတ္တာ ဧဝာတိ ဒသ္သေတိ။ သုခဗဟုလတာယ ဟိ ရာဇာနော ဟသမာနာပိ ‘‘ဃာတေထာ’’တိ ဝဒန္တိ, ဟာသော ပန နေသံ အနတ္ထဝူပသမာဒိအညဝိသယောတိ သန္နိဋ္ဌာပကစေတနာ ဒုက္ခဝေဒနာယ သမ္ပယုတ္တာ ဧဝ။ သတိ ပန ဒောမနသ္သေ ကထံ တံ နပ္ပကာသတီတိ အာဟ ‘‘သုခဝောကိဏ္ဏတ္တာ’’တိအာဒိ, ပုဗ္ဗာပရိယဝသေန ဥဘောသု ပသ္သေသု ဥပ္ပဇ္ဇနကသုခေဟိ အာကိဏ္ဏတ္တာ ဥပ္ပန္နသ္သ စ ဒောမနသ္သသ္သ အနုပ္ပဗန္ဓနေန ပဝတ္တိယာ အဘာဝတော တဒာ ဥပ္ပန္နမ္ပိ ဒောမနသ္သံ နပ္ပကာသတီတိ အတ္ထော။
Domanassacittenevabhaṇatīti iminā sanniṭṭhāpakacetanā dukkhavedanāya sampayuttā evāti dasseti. Sukhabahulatāya hi rājāno hasamānāpi ‘‘ghātethā’’ti vadanti, hāso pana nesaṃ anatthavūpasamādiaññavisayoti sanniṭṭhāpakacetanā dukkhavedanāya sampayuttā eva. Sati pana domanasse kathaṃ taṃ nappakāsatīti āha ‘‘sukhavokiṇṇattā’’tiādi, pubbāpariyavasena ubhosu passesu uppajjanakasukhehi ākiṇṇattā uppannassa ca domanassassa anuppabandhanena pavattiyā abhāvato tadā uppannampi domanassaṃ nappakāsatīti attho.
