| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
པཀིཎྞཀཀཐཱཝཎྞནཱ
Pakiṇṇakakathāvaṇṇanā
པཀིཎྞཀནྟི ཝོམིསྶཀནཡཾ། སམུཊྛཱནནྟི ཨུཔྤཏྟིཀཱརཎཾ། ཀིརིཡཱཏིཨཱདི ནིདསྶནམཏྟཾ, ཨཀིརིཡཱདཱིནམྤི སངྒཧོ དཊྛབྦོ། ཝེདནཱཡཱཏི སཧཡོགེ ཀརཎཝཙནཾ, ཝེདནཱཡ སཧ ཀུསལཉྩཱཏི ཝུཏྟཾ ཧོཏི། སབྦསངྒཱཧཀཝསེནཱཏི སབྦེསཾ སིཀྑཱཔདཱནཾ སངྒཱཧཀཝསེན། ཚ སིཀྑཱཔདསམུཊྛཱནཱནཱིཏི ཀཱཡོ ཝཱཙཱ ཀཱཡཝཱཙཱ ཀཱཡཙིཏྟཾ ཝཱཙཱཙིཏྟཾ ཀཱཡཝཱཙཱཙིཏྟནྟི ཨེཝཾ ཝུཏྟཱནི ཚ ཨཱཔཏྟིསམུཊྛཱནཱནི། ཨཱཔཏྟིཡེཝ ཧི སིཀྑཱཔདསཱིསེན ཝུཏྟཱ། སམུཊྛཱནཱདཡོ ཧི ཨཱཔཏྟིཡཱ ཧོནྟི, ན སིཀྑཱཔདསྶ, ཨིམེསུ པན ཚསུ སམུཊྛཱནེསུ པུརིམཱནི ཏཱིཎི ཨཙིཏྟཀཱནི, པཙྪིམཱནི སཙིཏྟཀཱནི། ཏེསུ ཨེཀེན ཝཱ དྭཱིཧི ཝཱ ཏཱིཧི ཝཱ ཙཏཱུཧི ཝཱ ཚཧི ཝཱ སམུཊྛཱནེཧི ཨཱཔཏྟིཡོ སམུཊྛཧནྟི, པཉྩསམུཊྛཱནཱ ཨཱཔཏྟི ནཱམ ནཏྠི། ཏཏྠ ཨེཀསམུཊྛཱནཱ ཙཏུཏྠེན ཙ པཉྩམེན ཙ ཚཊྛེན ཙ སམུཊྛཱནེན སམུཊྛཱཏི, ན ཨཉྙེན། དྭིསམུཊྛཱནཱ པཋམཙཏུཏྠེཧི ཙ དུཏིཡཔཉྩམེཧི ཙ ཏཏིཡཚཊྛེཧི ཙ ཙཏུཏྠཚཊྛེཧི ཙ པཉྩམཚཊྛེཧི ཙ སམུཊྛཱནེཧི སམུཊྛཱཏི, ན ཨཉྙེཧི། ཏིསམུཊྛཱནཱ པཋམེཧི ཙ ཏཱིཧི, པཙྪིམེཧི ཙ ཏཱིཧི སམུཊྛཱནེཧི སམུཊྛཱཏི, ན ཨཉྙེཧི། ཙཏུསམུཊྛཱནཱ པཋམཏཏིཡཙཏུཏྠཚཊྛེཧི ཙ དུཏིཡཏཏིཡཔཉྩམཚཊྛེཧི ཙ སམུཊྛཱནེཧི སམུཊྛཱཏི, ན ཨཉྙེཧི། ཚསམུཊྛཱནཱ ཚཧིཔི སམུཊྛཱཏི།
Pakiṇṇakanti vomissakanayaṃ. Samuṭṭhānanti uppattikāraṇaṃ. Kiriyātiādi nidassanamattaṃ, akiriyādīnampi saṅgaho daṭṭhabbo. Vedanāyāti sahayoge karaṇavacanaṃ, vedanāya saha kusalañcāti vuttaṃ hoti. Sabbasaṅgāhakavasenāti sabbesaṃ sikkhāpadānaṃ saṅgāhakavasena. Cha sikkhāpadasamuṭṭhānānīti kāyo vācā kāyavācā kāyacittaṃ vācācittaṃ kāyavācācittanti evaṃ vuttāni cha āpattisamuṭṭhānāni. Āpattiyeva hi sikkhāpadasīsena vuttā. Samuṭṭhānādayo hi āpattiyā honti, na sikkhāpadassa, imesu pana chasu samuṭṭhānesu purimāni tīṇi acittakāni, pacchimāni sacittakāni. Tesu ekena vā dvīhi vā tīhi vā catūhi vā chahi vā samuṭṭhānehi āpattiyo samuṭṭhahanti, pañcasamuṭṭhānā āpatti nāma natthi. Tattha ekasamuṭṭhānā catutthena ca pañcamena ca chaṭṭhena ca samuṭṭhānena samuṭṭhāti, na aññena. Dvisamuṭṭhānā paṭhamacatutthehi ca dutiyapañcamehi ca tatiyachaṭṭhehi ca catutthachaṭṭhehi ca pañcamachaṭṭhehi ca samuṭṭhānehi samuṭṭhāti, na aññehi. Tisamuṭṭhānā paṭhamehi ca tīhi, pacchimehi ca tīhi samuṭṭhānehi samuṭṭhāti, na aññehi. Catusamuṭṭhānā paṭhamatatiyacatutthachaṭṭhehi ca dutiyatatiyapañcamachaṭṭhehi ca samuṭṭhānehi samuṭṭhāti, na aññehi. Chasamuṭṭhānā chahipi samuṭṭhāti.
སིཀྑཱཔདཾ ནཱམ ཨཏྠི ཚསམུཊྛཱནནྟི ཨེཏྠཱཔི སིཀྑཱཔདསཱིསེན ཨཱཔཏྟི ཝུཏྟཱཏི ཝེདིཏབྦཱ། ཏེནེཝ ཝཀྑཏི ‘‘སབྦཉྩེཏཾ ཨཱཔཏྟིཡཾ ཡུཛྫཏི, སིཀྑཱཔདསཱིསེན པན སབྦཨཊྛཀཐཱསུ དེསནཱ ཨཱརུལ༹ྷཱ’’ཏི། ཀཱཡཱདཱིཧི ཚཧི སམུཊྛཱནཾ ཨུཔྤཏྟི, ཚ ཝཱ སམུཊྛཱནཱནི ཨེཏསྶཱཏི ཚསམུཊྛཱནཾ། ཨཏྠི ཙཏུསམུཊྛཱནནྟི ཀཱཡོ ཀཱཡཝཱཙཱ ཀཱཡཙིཏྟཾ ཀཱཡཝཱཙཱཙིཏྟནྟི ཨིམཱནི ཙཏྟཱརི, ཝཱཙཱ ཀཱཡཝཱཙཱ ཝཱཙཱཙིཏྟཾ ཀཱཡཝཱཙཱཙིཏྟནྟི ཨིམཱནི ཝཱ ཙཏྟཱརི སམུཊྛཱནཱནི ཨེཏསྶཱཏི ཙཏུསམུཊྛཱནཾ། ཨཏྠི ཏིསམུཊྛཱནནྟི ཀཱཡོ ཝཱཙཱ ཀཱཡཝཱཙཱཏི ཨིམཱནི ཏཱིཎི, ཀཱཡཙིཏྟཾ ཝཱཙཱཙིཏྟཾ ཀཱཡཝཱཙཱཙིཏྟནྟི ཨིམཱནི ཝཱ ཏཱིཎི སམུཊྛཱནཱནི ཨེཏསྶཱཏི ཏིསམུཊྛཱནཾ། དྭིསམུཊྛཱནཾ ཨེཀསམུཊྛཱནཉྩ སམུཊྛཱནསཱིསཝསེན དསྶེནྟོ ‘‘ཨཏྠི ཀཐིནསམུཊྛཱན’’ནྟིཨཱདིམཱཧ། ཏེརས ཧི སམུཊྛཱནསཱིསཱནི པཋམཔཱརཱཛིཀསམུཊྛཱནཾ ཨདིནྣཱདཱནསམུཊྛཱནཾ སཉྩརིཏྟསམུཊྛཱནཾ སམནུབྷཱསནསམུཊྛཱནཾ ཀཐིནསམུཊྛཱནཾ ཨེལ༹ཀལོམསམུཊྛཱནཾ པདསོདྷམྨསམུཊྛཱནཾ ཨདྡྷཱནསམུཊྛཱནཾ ཐེཡྻསཏྠསམུཊྛཱནཾ དྷམྨདེསནཱསམུཊྛཱནཾ བྷཱུཏཱརོཙནསམུཊྛཱནཾ ཙོརིཝུཊྛཱཔནསམུཊྛཱནཾ ཨནནུཉྙཱཏསམུཊྛཱནནྟི།
Sikkhāpadaṃ nāma atthi chasamuṭṭhānanti etthāpi sikkhāpadasīsena āpatti vuttāti veditabbā. Teneva vakkhati ‘‘sabbañcetaṃ āpattiyaṃ yujjati, sikkhāpadasīsena pana sabbaaṭṭhakathāsu desanā āruḷhā’’ti. Kāyādīhi chahi samuṭṭhānaṃ uppatti, cha vā samuṭṭhānāni etassāti chasamuṭṭhānaṃ. Atthi catusamuṭṭhānanti kāyo kāyavācā kāyacittaṃ kāyavācācittanti imāni cattāri, vācā kāyavācā vācācittaṃ kāyavācācittanti imāni vā cattāri samuṭṭhānāni etassāti catusamuṭṭhānaṃ. Atthi tisamuṭṭhānanti kāyo vācā kāyavācāti imāni tīṇi, kāyacittaṃ vācācittaṃ kāyavācācittanti imāni vā tīṇi samuṭṭhānāni etassāti tisamuṭṭhānaṃ. Dvisamuṭṭhānaṃ ekasamuṭṭhānañca samuṭṭhānasīsavasena dassento ‘‘atthi kathinasamuṭṭhāna’’ntiādimāha. Terasa hi samuṭṭhānasīsāni paṭhamapārājikasamuṭṭhānaṃ adinnādānasamuṭṭhānaṃ sañcarittasamuṭṭhānaṃ samanubhāsanasamuṭṭhānaṃ kathinasamuṭṭhānaṃ eḷakalomasamuṭṭhānaṃ padasodhammasamuṭṭhānaṃ addhānasamuṭṭhānaṃ theyyasatthasamuṭṭhānaṃ dhammadesanāsamuṭṭhānaṃ bhūtārocanasamuṭṭhānaṃ corivuṭṭhāpanasamuṭṭhānaṃ ananuññātasamuṭṭhānanti.
ཏཏྠ ‘‘ཨཏྠི ཚསམུཊྛཱན’’ནྟི ཨིམིནཱ སཉྩརིཏྟསམུཊྛཱནཾ ཝུཏྟཾ། ‘‘ཨཏྠི ཙཏུསམུཊྛཱན’’ནྟི ཨིམིནཱ པན ཨདྡྷཱནསམུཊྛཱནཾ ཨནནུཉྙཱཏསམུཊྛཱནཉྩ སངྒཧིཏཾ། ཡཉྷི པཋམཏཏིཡཙཏུཏྠཚཊྛེཧི སམུཊྛཱཏི, ཨིདཾ ཨདྡྷཱནསམུཊྛཱནཾ། ཡཾ པན དུཏིཡཏཏིཡཔཉྩམཚཊྛེཧི སམུཊྛཱཏི, ཨིདཾ ཨནནུཉྙཱཏསམུཊྛཱནཾ། ‘‘ཨཏྠི ཏིསམུཊྛཱན’’ནྟི ཨིམིནཱ ཨདིནྣཱདཱནསམུཊྛཱནཾ བྷཱུཏཱརོཙནསམུཊྛཱནཉྩ སངྒཧིཏཾ། ཡཉྷི སཙིཏྟཀེཧི ཏཱིཧི སམུཊྛཱནེཧི སམུཊྛཱཏི, ཨིདཾ ཨདིནྣཱདཱནསམུཊྛཱནཾ། ཡཾ པན ཨཙིཏྟཀེཧི ཏཱིཧི སམུཊྛཱཏི, ཨིདཾ བྷཱུཏཱརོཙནསམུཊྛཱནཾ། ‘‘ཨཏྠི ཀཐིནསམུཊྛཱན’’ནྟིཨཱདིནཱ པན ཨཝསེསསམུཊྛཱནསཱིསེན དྭིསམུཊྛཱནཾ ཨེཀསམུཊྛཱནཉྩ སངྒཎྷཱཏི། ཏཐཱ ཧི ཡཾ ཏཏིཡཚཊྛེཧི སམུཊྛཱཏི, ཨིདཾ ཀཐིནསམུཊྛཱནནྟི ཝུཙྩཏི། ཡཾ པཋམཙཏུཏྠེཧི སམུཊྛཱཏི, ཨིདཾ ཨེལ༹ཀལོམསམུཊྛཱནཾ། ཡཾ ཚཊྛེནེཝ སམུཊྛཱཏི, ཨིདཾ དྷུརནིཀྑེཔསམུཊྛཱནཾ, སམནུབྷཱསནསམུཊྛཱནནྟིཔི ཏསྶེཝ ནཱམཾ། ཨཱདི-སདྡསངྒཧིཏེསུ པན པཋམཔཱརཱཛིཀསམུཊྛཱནཔདསོདྷམྨཐེཡྻསཏྠདྷམྨདེསནཱཙོརིཝུཊྛཱཔནསམུཊྛཱནེསུ ཡཾ ཀཱཡཙིཏྟཏོ སམུཊྛཱཏི, ཨིདཾ པཋམཔཱརཱཛིཀསམུཊྛཱནཾ། ཡཾ དུཏིཡཔཉྩམེཧི སམུཊྛཱཏི, ཨིདཾ པདསོདྷམྨསམུཊྛཱནཾ། ཡཾ ཙཏུཏྠཚཊྛེཧི སམུཊྛཱཏི, ཨིདཾ ཐེཡྻསཏྠསམུཊྛཱནཾ། ཡཾ པཉྩམེནེཝ སམུཊྛཱཏི, ཨིདཾ དྷམྨདེསནཱསམུཊྛཱནཾ། ཡཾ པཉྩམཚཊྛེཧི སམུཊྛཱཏི, ཨིདཾ ཙོརིཝུཊྛཱཔནསམུཊྛཱནནྟི ཝེདིཏབྦཾ།
Tattha ‘‘atthi chasamuṭṭhāna’’nti iminā sañcarittasamuṭṭhānaṃ vuttaṃ. ‘‘Atthi catusamuṭṭhāna’’nti iminā pana addhānasamuṭṭhānaṃ ananuññātasamuṭṭhānañca saṅgahitaṃ. Yañhi paṭhamatatiyacatutthachaṭṭhehi samuṭṭhāti, idaṃ addhānasamuṭṭhānaṃ. Yaṃ pana dutiyatatiyapañcamachaṭṭhehi samuṭṭhāti, idaṃ ananuññātasamuṭṭhānaṃ. ‘‘Atthi tisamuṭṭhāna’’nti iminā adinnādānasamuṭṭhānaṃ bhūtārocanasamuṭṭhānañca saṅgahitaṃ. Yañhi sacittakehi tīhi samuṭṭhānehi samuṭṭhāti, idaṃ adinnādānasamuṭṭhānaṃ. Yaṃ pana acittakehi tīhi samuṭṭhāti, idaṃ bhūtārocanasamuṭṭhānaṃ. ‘‘Atthi kathinasamuṭṭhāna’’ntiādinā pana avasesasamuṭṭhānasīsena dvisamuṭṭhānaṃ ekasamuṭṭhānañca saṅgaṇhāti. Tathā hi yaṃ tatiyachaṭṭhehi samuṭṭhāti, idaṃ kathinasamuṭṭhānanti vuccati. Yaṃ paṭhamacatutthehi samuṭṭhāti, idaṃ eḷakalomasamuṭṭhānaṃ. Yaṃ chaṭṭheneva samuṭṭhāti, idaṃ dhuranikkhepasamuṭṭhānaṃ, samanubhāsanasamuṭṭhānantipi tasseva nāmaṃ. Ādi-saddasaṅgahitesu pana paṭhamapārājikasamuṭṭhānapadasodhammatheyyasatthadhammadesanācorivuṭṭhāpanasamuṭṭhānesu yaṃ kāyacittato samuṭṭhāti, idaṃ paṭhamapārājikasamuṭṭhānaṃ. Yaṃ dutiyapañcamehi samuṭṭhāti, idaṃ padasodhammasamuṭṭhānaṃ. Yaṃ catutthachaṭṭhehi samuṭṭhāti, idaṃ theyyasatthasamuṭṭhānaṃ. Yaṃ pañcameneva samuṭṭhāti, idaṃ dhammadesanāsamuṭṭhānaṃ. Yaṃ pañcamachaṭṭhehi samuṭṭhāti, idaṃ corivuṭṭhāpanasamuṭṭhānanti veditabbaṃ.
ཨེཝཾ སམུཊྛཱནསཱིསེན སབྦསིཀྑཱཔདཱནི ཏེརསདྷཱ དསྶེཏྭཱ ཨིདཱནི ཀིརིཡཱཝསེན པཉྩདྷཱ དསྶེནྟོ ‘‘ཏཏྲཱཔི ཀིཉྩི ཀིརིཡཏོ སམུཊྛཱཏཱི’’ཏིཨཱདིམཱཧ། ཏཏྠ ཀིཉྩཱིཏི སིཀྑཱཔདསཱིསེན ཨཱཔཏྟིཾ ཝདཏི། ཏསྨཱ ཡཱ ཀཱཡེན ཝཱ ཝཱཙཱཡ ཝཱ པཐཝཱིཁཎནཱདཱིསུ ཝིཡ ཝཱིཏིཀྐམཾ ཀརོནྟསྶ ཧོཏི, ཨཡཾ ཀིརིཡཏོ སམུཊྛཱཏི ནཱམ། ཡཱ ཀཱཡཝཱཙཱཡ ཀཏྟབྦཾ ཨཀརོནྟསྶ ཧོཏི པཋམཀཐིནཱཔཏྟི ཝིཡ, ཨཡཾ ཨཀིརིཡཏོ སམུཊྛཱཏི ནཱམ། ཡཱ ཀརོནྟསྶ ཙ ཨཀརོནྟསྶ ཙ ཧོཏི ཨཉྙཱཏིཀཱཡ བྷིཀྑུནིཡཱ ཧཏྠཏོ ཙཱིཝརཔཊིགྒཧཎཱཔཏྟི ཝིཡ, ཨཡཾ ཀིརིཡཱཀིརིཡཏོ སམུཊྛཱཏི ནཱམ། ཡཱ སིཡཱ ཀརོནྟསྶ ཙ སིཡཱ ཨཀརོནྟསྶ ཙ ཧོཏི རཱུཔིཡཔཊིགྒཧཎཱཔཏྟི ཝིཡ, ཨཡཾ སིཡཱ ཀིརིཡཏོ སིཡཱ ཨཀིརིཡཏོ སམུཊྛཱཏི ནཱམ། ཡཱ སིཡཱ ཀརོནྟསྶ ཙ སིཡཱ ཀརོནྟསྶ ཙ ཨཀརོནྟསྶ ཙ ཧོཏི ཀུཊིཀཱརཱཔཏྟི ཝིཡ, ཨཡཾ སིཡཱ ཀིརིཡཏོ སིཡཱ ཀིརིཡཱཀིརིཡཏོ སམུཊྛཱཏི ནཱམ།
Evaṃ samuṭṭhānasīsena sabbasikkhāpadāni terasadhā dassetvā idāni kiriyāvasena pañcadhā dassento ‘‘tatrāpi kiñci kiriyato samuṭṭhātī’’tiādimāha. Tattha kiñcīti sikkhāpadasīsena āpattiṃ vadati. Tasmā yā kāyena vā vācāya vā pathavīkhaṇanādīsu viya vītikkamaṃ karontassa hoti, ayaṃ kiriyato samuṭṭhāti nāma. Yā kāyavācāya kattabbaṃ akarontassa hoti paṭhamakathināpatti viya, ayaṃ akiriyato samuṭṭhāti nāma. Yā karontassa ca akarontassa ca hoti aññātikāya bhikkhuniyā hatthato cīvarapaṭiggahaṇāpatti viya, ayaṃ kiriyākiriyato samuṭṭhāti nāma. Yā siyā karontassa ca siyā akarontassa ca hoti rūpiyapaṭiggahaṇāpatti viya, ayaṃ siyā kiriyato siyā akiriyato samuṭṭhāti nāma. Yā siyā karontassa ca siyā karontassa ca akarontassa ca hoti kuṭikārāpatti viya, ayaṃ siyā kiriyato siyā kiriyākiriyato samuṭṭhāti nāma.
ཨིདཱནི སབྦསིཀྑཱཔདཱནི སཉྙཱཝསེན དྭིདྷཱ ཀཏྭཱ དསྶེནྟོ ‘‘ཏཏྲཱཔི ཨཏྠི སཉྙཱཝིམོཀྑ’’ནྟིཨཱདིམཱཧ། སཉྙཱཡ ཨབྷཱཝེན ཝིམོཀྑོ ཨསྶཱཏི སཉྙཱཝིམོཀྑནྟི མཛ྄ཛྷེཔདལོཔསམཱསོ དཊྛབྦོ། ཡཏོ ཧི ཝཱིཏིཀྐམསཉྙཱཨབྷཱཝེན མུཙྩཏི, ཨིདཾ སཉྙཱཝིམོཀྑནྟི ཝུཙྩཏི། ཙིཏྟངྒཾ ལབྷཏིཡེཝཱཏི ཀཱཡཙིཏྟཱདིསཙིཏྟཀསམུཊྛཱནེཧེཝ སམུཊྛཧནཏོ ། ‘‘ལབྷཏིཡེཝཱ’’ཏི ཨཝདྷཱརཎེན ནོ ན ལབྷཏཱིཏི དསྶེཏི། ཏསྨཱ ཡཾ ཙིཏྟངྒཾ ལབྷཏི, ན ལབྷཏི ཙ, ཏཾ ‘‘ཨིཏར’’ནྟི ཝུཏྟཾ ཨིཏར-སདྡསྶ ཝུཏྟཔཊིཡོགཝིསཡཏྟཱ།
Idāni sabbasikkhāpadāni saññāvasena dvidhā katvā dassento ‘‘tatrāpi atthi saññāvimokkha’’ntiādimāha. Saññāya abhāvena vimokkho assāti saññāvimokkhanti majjhepadalopasamāso daṭṭhabbo. Yato hi vītikkamasaññāabhāvena muccati, idaṃ saññāvimokkhanti vuccati. Cittaṅgaṃ labhatiyevāti kāyacittādisacittakasamuṭṭhāneheva samuṭṭhahanato . ‘‘Labhatiyevā’’ti avadhāraṇena no na labhatīti dasseti. Tasmā yaṃ cittaṅgaṃ labhati, na labhati ca, taṃ ‘‘itara’’nti vuttaṃ itara-saddassa vuttapaṭiyogavisayattā.
པུན སབྦསིཀྑཱཔདཱནི ཙིཏྟཝསེན དྭིདྷཱ དསྶེནྟོ ‘‘པུན ཨཏྠི སཙིཏྟཀ’’ནྟིཨཱདིམཱཧ། ཡཾ སཧེཝ ཙིཏྟེན ཨཱཔཛྫཏཱིཏི ཡཾ སཙིཏྟཀེནེཝ སམུཊྛཱནེན ཨཱཔཛྫཏི, ནོ ཨཙིཏྟཀེན། ཝིནཱཔཱིཏི ཨཔི-སདྡེན སཧཱཔི ཙིཏྟེན ཨཱཔཛྫཏཱིཏི དསྶེཏི། ཡཉྷི ཀདཱཙི ཨཙིཏྟཀེན, ཀདཱཙི སཙིཏྟཀེན སམུཊྛཱནེན སམུཊྛཱཏི, ཏཾ ཨཙིཏྟཀནྟི ཝུཙྩཏི། ཨེཏྠ ཙ སཉྙཱདུཀཾ ཨནཱཔཏྟིམུཁེན, སཙིཏྟཀདུཀཾ ཨཱཔཏྟིམུཁེན ཝུཏྟནྟི ཨིདམེཏེསཾ ནཱནཱཀརཎནྟི ཝེདིཏབྦཾ།
Puna sabbasikkhāpadāni cittavasena dvidhā dassento ‘‘puna atthi sacittaka’’ntiādimāha. Yaṃ saheva cittena āpajjatīti yaṃ sacittakeneva samuṭṭhānena āpajjati, no acittakena. Vināpīti api-saddena sahāpi cittena āpajjatīti dasseti. Yañhi kadāci acittakena, kadāci sacittakena samuṭṭhānena samuṭṭhāti, taṃ acittakanti vuccati. Ettha ca saññādukaṃ anāpattimukhena, sacittakadukaṃ āpattimukhena vuttanti idametesaṃ nānākaraṇanti veditabbaṃ.
ལོཀཝཛྫདུཀསྶ ཧེཊྛཱ ཝུཏྟལཀྑཎཏྟཱ ཏཾ ཨཝིབྷཛིཏྭཱ ཨིདཱནི སབྦསིཀྑཱཔདཱནི ཀམྨཝསེན དུཝིདྷཱནི, ཀུསལཱདིཝསེན ཝེདནཱཝསེན ཙ ཏིཝིདྷཱནི ཧོནྟཱིཏི དསྶེནྟོ ‘‘ཀམྨཀུསལཝེདནཱཝསེནཱ’’ཏིཨཱདིམཱཧ། ཨེཏྠ པན ཀིཉྩཱཔི ཨཊྛཀཐཱསུ ཨཱགཏནཡེན ཀཱཡཀམྨཾ ཝཙཱིཀམྨནྟི ཀམྨཝསེན དུཀཾ ཝུཏྟཾ, ཏིཀམེཝ པན དསྶེཏུཾ ཝཊྚཏི། སབྦམེཝ ཧི སིཀྑཱཔདཾ ཀཱཡདྭཱརེ ཨཱཔཛྫིཏབྦཏོ ཝཙཱིདྭཱརེ ཨཱཔཛྫིཏབྦཏོ ཀཱཡཝཙཱིདྭཱརེ ཨཱཔཛྫིཏབྦཏོ ཙ ཏིཝིདྷཾ ཧོཏི། ཏེནེཝ མཱཏིཀཱཊྛཀཐཱཡཾ (ཀངྑཱ॰ ཨཊྛ॰ པཋམཔཱརཱཛིཀཝཎྞནཱ) ཝུཏྟཾ ‘‘སབྦཱཝ ཀཱཡཀམྨཝཙཱིཀམྨཏདུབྷཡཝསེན ཏིཝིདྷཱ ཧོནྟི། ཏཏྠ ཀཱཡདྭཱརེ ཨཱཔཛྫིཏབྦཱ ཀཱཡཀམྨནྟི ཝུཙྩཏི, ཝཙཱིདྭཱརེ ཨཱཔཛྫིཏབྦཱ ཝཙཱིཀམྨནྟི ཝུཙྩཏི, ཨུབྷཡཏྠ ཨཱཔཛྫིཏབྦཱ ཀཱཡཀམྨཝཙཱིཀམྨ’’ནྟི། ཏཏོཡེཝ ཙ ཨདིནྣཱདཱནསིཀྑཱཔདཱདཱིསུ ཀཱཡཀམྨཝཙཱིཀམྨནྟི ཏདུབྷཡཝསེན དསྶིཏཾ།
Lokavajjadukassa heṭṭhā vuttalakkhaṇattā taṃ avibhajitvā idāni sabbasikkhāpadāni kammavasena duvidhāni, kusalādivasena vedanāvasena ca tividhāni hontīti dassento ‘‘kammakusalavedanāvasenā’’tiādimāha. Ettha pana kiñcāpi aṭṭhakathāsu āgatanayena kāyakammaṃ vacīkammanti kammavasena dukaṃ vuttaṃ, tikameva pana dassetuṃ vaṭṭati. Sabbameva hi sikkhāpadaṃ kāyadvāre āpajjitabbato vacīdvāre āpajjitabbato kāyavacīdvāre āpajjitabbato ca tividhaṃ hoti. Teneva mātikāṭṭhakathāyaṃ (kaṅkhā. aṭṭha. paṭhamapārājikavaṇṇanā) vuttaṃ ‘‘sabbāva kāyakammavacīkammatadubhayavasena tividhā honti. Tattha kāyadvāre āpajjitabbā kāyakammanti vuccati, vacīdvāre āpajjitabbā vacīkammanti vuccati, ubhayattha āpajjitabbā kāyakammavacīkamma’’nti. Tatoyeva ca adinnādānasikkhāpadādīsu kāyakammavacīkammanti tadubhayavasena dassitaṃ.
ཨཏྠི པན སིཀྑཱཔདཾ ཀུསལནྟིཨཱདིནཱ ཨཱཔཏྟིཾ ཨཱཔཛྫནྟོ ཀུསལཙིཏྟསམངྒཱི ཝཱ ཨཱཔཛྫཏི ཨཀུསལཙིཏྟསམངྒཱི ཝཱ ཨབྱཱཀཏཙིཏྟསམངྒཱི ཝཱཏི དསྶེཏི, ན པན ཀུསལཱཔི ཨཱཔཏྟི ཨཏྠཱིཏི། ན ཧི ཀུསལཱ ཨཱཔཏྟི ནཱམ ཨཏྠི ‘‘ཨཱཔཏྟཱདྷིཀརཎཾ སིཡཱ ཨཀུསལཾ སིཡཱ ཨབྱཱཀཏཾ, ནཏྠི ཨཱཔཏྟཱདྷིཀརཎཾ ཀུསལ’’ནྟི (པརི॰ ༣༠༣) ཝཙནཏོ། དས ཀཱམཱཝཙརཀིརིཡཙིཏྟཱནཱིཏི ཧསིཏུཔྤཱདཝོཊྛབྦནེཧི སདྡྷིཾ ཨཊྛ མཧཱཀིརིཡཙིཏྟཱནི། དྭིནྣཾ ཨབྷིཉྙཱཙིཏྟཱནཾ ཨཱཔཏྟིསམུཊྛཱཔཀཏྟཾ པཉྙཏྟིཾ ཨཛཱནནྟསྶ ཨིདྡྷིཝིཀུབྦནཱདཱིསུ དཊྛབྦཾ། ཡཾ ཀུསལཙིཏྟེན ཨཱཔཛྫཏཱིཏི ཡཾ སིཀྑཱཔདསཱིསེན གཧིཏཾ ཨཱཔཏྟིཾ ཀུསལཙིཏྟསམངྒཱི ཨཱཔཛྫཏི། ཨིམིནཱ པན ཝཙནེན ཏཾ ཀུསལནྟི ཨཱཔཏྟིཡཱ ཝུཙྩམཱནོ ཀུསལབྷཱཝོ པརིཡཱཡཏོཝ, ན པརམཏྠཏོཏི དསྶེཏི། ཀུསལཙིཏྟེན ཧི ཨཱཔཏྟིཾ ཨཱཔཛྫནྟོ སཝིཉྙཏྟིཀཾ ཨཝིཉྙཏྟིཀཾ ཝཱ སིཀྑཱཔདཝཱིཏིཀྐམཱཀཱརཔྤཝཏྟཾ རཱུཔཀྑནྡྷསངྑཱཏཾ ཨབྱཱཀཏཱཔཏྟིཾ ཨཱཔཛྫཏི། ཨིཏརེཧི ཨིཏརནྟི ཨིཏརེཧི ཨཀུསལཱབྱཱཀཏཙིཏྟེཧི ཡཾ ཨཱཔཛྫཏི, ཏཾ ཨིཏརཾ, ཨཀུསལཾ ཨབྱཱཀཏཉྩཱཏི ཨཏྠོ། ཨིདཉྩ ཨཱཔཏྟིཾ ཨཱཔཛྫནྟོ ཨཀུསལཙིཏྟསམངྒཱི ཝཱ ཨཱཔཛྫཏི ཀུསལཱབྱཱཀཏཙིཏྟསམངྒཱི ཝཱཏི དསྶནཏྠཾ ཝུཏྟཾ། ཨེཝཾ སནྟེཔི སབྦསིཀྑཱཔདེསུ ཀིཉྩི ཨཀུསལཙིཏྟམེཝ ཀིཉྩི ཀུསལཱབྱཱཀཏཝསེན དྭིཙིཏྟཾ, ཀིཉྩི སབྦེསཾ ཝསེན ཏིཙིཏྟནྟི ཨཡམེཝ པབྷེདོ ལབྦྷཏི, ན ཨཉྙོཏི ཝེདིཏབྦཾ།
Atthi pana sikkhāpadaṃ kusalantiādinā āpattiṃ āpajjanto kusalacittasamaṅgī vā āpajjati akusalacittasamaṅgī vā abyākatacittasamaṅgī vāti dasseti, na pana kusalāpi āpatti atthīti. Na hi kusalā āpatti nāma atthi ‘‘āpattādhikaraṇaṃ siyā akusalaṃ siyā abyākataṃ, natthi āpattādhikaraṇaṃ kusala’’nti (pari. 303) vacanato. Dasa kāmāvacarakiriyacittānīti hasituppādavoṭṭhabbanehi saddhiṃ aṭṭha mahākiriyacittāni. Dvinnaṃ abhiññācittānaṃ āpattisamuṭṭhāpakattaṃ paññattiṃ ajānantassa iddhivikubbanādīsu daṭṭhabbaṃ. Yaṃ kusalacittena āpajjatīti yaṃ sikkhāpadasīsena gahitaṃ āpattiṃ kusalacittasamaṅgī āpajjati. Iminā pana vacanena taṃ kusalanti āpattiyā vuccamāno kusalabhāvo pariyāyatova, na paramatthatoti dasseti. Kusalacittena hi āpattiṃ āpajjanto saviññattikaṃ aviññattikaṃ vā sikkhāpadavītikkamākārappavattaṃ rūpakkhandhasaṅkhātaṃ abyākatāpattiṃ āpajjati. Itarehi itaranti itarehi akusalābyākatacittehi yaṃ āpajjati, taṃ itaraṃ, akusalaṃ abyākatañcāti attho. Idañca āpattiṃ āpajjanto akusalacittasamaṅgī vā āpajjati kusalābyākatacittasamaṅgī vāti dassanatthaṃ vuttaṃ. Evaṃ santepi sabbasikkhāpadesu kiñci akusalacittameva kiñci kusalābyākatavasena dvicittaṃ, kiñci sabbesaṃ vasena ticittanti ayameva pabhedo labbhati, na aññoti veditabbaṃ.
ཏིཝེདནཾ དྭིཝེདནཾ ཨེཀཝེདནནྟི ཨིདཉྩ ཡཐཱཝུཏྟཝེདནཱཝསེནེཝ ལབྦྷཏི, ནཱཉྙཐཱཏི དཊྛབྦཾ། ནིཔཛྫིཏྭཱ ནིརོདྷཾ སམཱཔནྣསྶ སཧསེཡྻཝསེན ཏདཱཀཱརཔྤཝཏྟརཱུཔཀྑནྡྷསྶེཝ ཨཱཔཏྟིབྷཱཝཏོ ‘‘ཨཏྠི ཨཝེདན’’ནྟིཔི ཝཏྟབྦམེཏཾ, ཀདཱཙི ཀརཧཙི ཡདིཙྪཀཾ སམྦྷཝཏཱིཏི ཨགྒཧེཏྭཱ ཡེབྷུཡྻཝསེན ལབྦྷམཱནཾཡེཝ གཧེཏྭཱ ཝུཏྟནྟི ཝེདིཏབྦཾ།
Tivedanaṃ dvivedanaṃ ekavedananti idañca yathāvuttavedanāvaseneva labbhati, nāññathāti daṭṭhabbaṃ. Nipajjitvā nirodhaṃ samāpannassa sahaseyyavasena tadākārappavattarūpakkhandhasseva āpattibhāvato ‘‘atthi avedana’’ntipi vattabbametaṃ, kadāci karahaci yadicchakaṃ sambhavatīti aggahetvā yebhuyyavasena labbhamānaṃyeva gahetvā vuttanti veditabbaṃ.
ཨིདཱནི ཡཐཱཝུཏྟསམུཊྛཱནཱདཱིནི ཨིམསྨིཾ སཾཝཎྞིཡམཱནསིཀྑཱཔདེ ཝིབྷཛིཏྭཱ དསྶེནྟོ ‘‘ཨིམཾ པཀིཎྞཀཾ ཝིདིཏྭཱ’’ཏིཨཱདིམཱཧ། ཏཏྠ ཝིདིཏྭཱཏི ཨིམསྶ ‘‘ཝེདིཏབྦ’’ནྟི ཨིམིནཱ ཨཔརཀཱལཀིརིཡཱཝཙནེན སམྦནྡྷོ ཝེདིཏབྦོ། ཀིརིཡསམུཊྛཱནནྟི ཨིདཾ ཡེབྷུཡྻཝསེན ཝུཏྟཾ པརཱུཔཀྐམེ སཏི སཱདིཡནྟསྶ ཨཀིརིཡསམུཊྛཱནབྷཱཝཏོ། ‘‘མནོདྭཱརེ ཨཱཔཏྟི ནཱམ ནཏྠཱིཏི ཨིདམྤི བཱཧུལླཝསེནེཝ ཝུཏྟ’’ནྟི ཝདནྟི། ཙིཏྟཾ པནེཏྠ ཨངྒམཏྟཾ ཧོཏཱིཏི པཋམཔཱརཱཛིཀཾ ཀཱཡཙིཏྟཏོ སམུཊྛཱཏཱིཏི ཙིཏྟམེཏྠ ཨཱཔཏྟིཡཱ ཨངྒམེཝ ཧོཏི། ན ཏསྶ ཝསེན ཀམྨབྷཱཝོ ལབྦྷཏཱིཏི ཝིཉྙཏྟིཛནཀཝསེན ཀཱཡདྭཱརེ པཝཏྟཏྟཱ ཏསྶ ཙིཏྟསྶ ཝསེན ཨིམསྶ སིཀྑཱཔདསྶ མནོཀམྨབྷཱཝོ ན ལབྦྷཏཱིཏི ཨཏྠོ། སིཀྑཱཔདསྶ ཧེཊྛཱ ཝུཏྟནཡེན པཉྙཏྟིབྷཱཝཏོ ‘‘སབྦཉྩེཏཾ ཨཱཔཏྟིཡཾ ཡུཛྫཏཱི’’ཏི ཝུཏྟཾ། ན ཧི ཡཐཱཝུཏྟསམུཊྛཱནཱདི པཉྙཏྟིཡཾ ཡུཛྫཏི།
Idāni yathāvuttasamuṭṭhānādīni imasmiṃ saṃvaṇṇiyamānasikkhāpade vibhajitvā dassento ‘‘imaṃ pakiṇṇakaṃ viditvā’’tiādimāha. Tattha viditvāti imassa ‘‘veditabba’’nti iminā aparakālakiriyāvacanena sambandho veditabbo. Kiriyasamuṭṭhānanti idaṃ yebhuyyavasena vuttaṃ parūpakkame sati sādiyantassa akiriyasamuṭṭhānabhāvato. ‘‘Manodvāre āpatti nāma natthīti idampi bāhullavaseneva vutta’’nti vadanti. Cittaṃ panettha aṅgamattaṃ hotīti paṭhamapārājikaṃ kāyacittato samuṭṭhātīti cittamettha āpattiyā aṅgameva hoti. Na tassa vasena kammabhāvo labbhatīti viññattijanakavasena kāyadvāre pavattattā tassa cittassa vasena imassa sikkhāpadassa manokammabhāvo na labbhatīti attho. Sikkhāpadassa heṭṭhā vuttanayena paññattibhāvato ‘‘sabbañcetaṃ āpattiyaṃ yujjatī’’ti vuttaṃ. Na hi yathāvuttasamuṭṭhānādi paññattiyaṃ yujjati.
པཀིཎྞཀཀཐཱཝཎྞནཱ ནིཊྛིཏཱ།
Pakiṇṇakakathāvaṇṇanā niṭṭhitā.
