| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
41. பகிண்ணகனித்³தே³ஸவண்ணனா
41. Pakiṇṇakaniddesavaṇṇanā
335-6. ஸத்³வாரப³ந்த⁴னே டா²னே…பே॰… ஸயந்தோ து³க்கடங் பு²ஸேதி ஏவரூபே டா²னே தி³வா ஸயந்தேனாதி ஸம்ப³ந்தோ⁴. ஸத்³வாரப³ந்த⁴னே (பாரா॰ 77; பாரா॰ அட்ட²॰ 1.77) பன டா²னே யேன கேனசி பரிக்கி²த்தே அப்³போ⁴காஸேபி ருக்க²மூலேபி அந்தமஸோ இமினா லக்க²ணேன யுத்தே ஆகாஸங்க³ணேபி ஸயந்தேன த்³வாரங் ப³ந்தி⁴தப்³ப³மேவ. விஞ்ஞும்ஹி புரிஸேதி பி⁴க்கு²ம்ஹி வா ஸாமணேரே வா அந்தமஸோ உபாஸகஆராமிகேஸுபி அஞ்ஞதரஸ்மிங் ஸதீதி அத்தோ². ‘‘ஏஸ ஜக்³கி³ஸ்ஸதீ’’தி ஆபோ⁴கோ³ சாபி கப்பதீதி கேவலங் பி⁴க்கு²னிங் வா மாதுகா³மங் வா ஆபுச்சி²துங் ந வட்டதி. ஸவஸேதி அத்தனோ வஸே, அப³ஹுஸாதா⁴ரணட்டா²னேதி அத்தோ². தங் வினாகாரந்தி தங் புப்³பே³ வுத்தப்பகாரங் த்³வாரத²கனஆபோ⁴க³கரணஸங்கா²தங் ஆகாரங் வினாதி அத்தோ². அசித்தகாபத்திகிரியாயங் ஸங்கே²போ.
335-6.Sadvārabandhane ṭhāne…pe… sayanto dukkaṭaṃ phuseti evarūpe ṭhāne divā sayantenāti sambandho. Sadvārabandhane (pārā. 77; pārā. aṭṭha. 1.77) pana ṭhāne yena kenaci parikkhitte abbhokāsepi rukkhamūlepi antamaso iminā lakkhaṇena yutte ākāsaṅgaṇepi sayantena dvāraṃ bandhitabbameva. Viññumhi puriseti bhikkhumhi vā sāmaṇere vā antamaso upāsakaārāmikesupi aññatarasmiṃ satīti attho. ‘‘Esa jaggissatī’’ti ābhogo cāpi kappatīti kevalaṃ bhikkhuniṃ vā mātugāmaṃ vā āpucchituṃ na vaṭṭati. Savaseti attano vase, abahusādhāraṇaṭṭhāneti attho. Taṃ vinākāranti taṃ pubbe vuttappakāraṃ dvārathakanaābhogakaraṇasaṅkhātaṃ ākāraṃ vināti attho. Acittakāpattikiriyāyaṃ saṅkhepo.
337. ரதனானீதி முத்தாதி³த³ஸவித⁴ரதனானி. த⁴ஞ்ஞந்தி ஸத்தவித⁴ங் த⁴ஞ்ஞங்.
337.Ratanānīti muttādidasavidharatanāni. Dhaññanti sattavidhaṃ dhaññaṃ.
338. ஸித்த²தேலோத³தேலேஹீதி எத்த² (சூளவ॰ 246; சூளவ॰ அட்ட²॰ 246) பன யோ மது⁴ஸித்த²கதேலேன வா உத³கமிஸ்ஸகதேலேன வா அஞ்ஞேன கேனசி விகாரேன வா கேஸே ஓஸண்டே²தி, த³ந்தமயாதீ³ஸு யேன கேனசி ப²ணேன வா கொச்சே²ன வா ஹத்தே²ன வா ப²ணகிச்சங் கரொந்தோ அங்கு³லீஹி வா ஓஸண்டே²தி, தஸ்ஸ து³க்கடங் ஹோதீதி அத்தோ².
338.Sitthatelodatelehīti ettha (cūḷava. 246; cūḷava. aṭṭha. 246) pana yo madhusitthakatelena vā udakamissakatelena vā aññena kenaci vikārena vā kese osaṇṭheti, dantamayādīsu yena kenaci phaṇena vā kocchena vā hatthena vā phaṇakiccaṃ karonto aṅgulīhi vā osaṇṭheti, tassa dukkaṭaṃ hotīti attho.
339. நேகபாவுரணாதி (சூளவ॰ 264) ந ஏகபாவுரணா. துவட்டயுந்தி நிபஜ்ஜெய்யுங். கிங் வுத்தங் ஹோதி? யதி³ ஏகபாவுரணா வா ஏகத்த²ரணா வா ஏகமஞ்சே வா துவட்டெய்யுங், ந வட்டதி, து³க்கடங் ஹோதீதி வுத்தங் ஹோதி. ஏகம்ஹி (சூளவ॰ அட்ட²॰ 264) வா பா⁴ஜனே ந பு⁴ஞ்ஜெய்யுந்தி ஸம்ப³ந்தோ⁴.
339.Nekapāvuraṇāti (cūḷava. 264) na ekapāvuraṇā. Tuvaṭṭayunti nipajjeyyuṃ. Kiṃ vuttaṃ hoti? Yadi ekapāvuraṇā vā ekattharaṇā vā ekamañce vā tuvaṭṭeyyuṃ, na vaṭṭati, dukkaṭaṃ hotīti vuttaṃ hoti. Ekamhi (cūḷava. aṭṭha. 264) vā bhājane na bhuñjeyyunti sambandho.
340. சதுரங்கு³லதோ (சூளவ॰ 282; சூளவ॰ அட்ட²॰ 282) ஊனங் த³ந்தகட்ட²ங் ந கா²தெ³ய்யாதி ஸம்ப³ந்தோ⁴. அதி⁴கட்ட²ங்கு³லந்தி அட்ட²ங்கு³லதோ அதி⁴கங். ததா²தி ந கா²தெ³ய்யாதி அத்தோ². அகல்லகோ (சூளவ॰ 289) லஸுணங் ந கா²தெ³ய்ய.
340. Caturaṅgulato (cūḷava. 282; cūḷava. aṭṭha. 282) ūnaṃ dantakaṭṭhaṃ na khādeyyāti sambandho. Adhikaṭṭhaṅgulanti aṭṭhaṅgulato adhikaṃ. Tathāti na khādeyyāti attho. Akallako (cūḷava. 289) lasuṇaṃ na khādeyya.
341. ஹீனேஹி (பாசி॰ 31 ஆத³யோ) வா உக்கட்டே²ஹி வா ஜாதிஆதீ³ஹி ஏவ உக்கட்ட²ங் வா ஹீனங் வா ‘‘சண்டா³லோஸீ’’திஆதி³னா நயேன உஜுங் வா ‘‘ஸந்தி வா இதே⁴கச்சே சண்டா³லா, வேனா, நேஸாதா³’’திஆதி³னா நயேன அஞ்ஞாபதே³ஸேன வா உபஸம்பன்னங் வா அனுபஸம்பன்னங் வா அக்கோஸாதி⁴ப்பாயங் வினா கேவலங் த³வாதி⁴ப்பாயேன வதே³, து³ப்³பா⁴ஸிதந்தி அத்தோ².
341. Hīnehi (pāci. 31 ādayo) vā ukkaṭṭhehi vā jātiādīhi eva ukkaṭṭhaṃ vā hīnaṃ vā ‘‘caṇḍālosī’’tiādinā nayena ujuṃ vā ‘‘santi vā idhekacce caṇḍālā, venā, nesādā’’tiādinā nayena aññāpadesena vā upasampannaṃ vā anupasampannaṃ vā akkosādhippāyaṃ vinā kevalaṃ davādhippāyena vade, dubbhāsitanti attho.
342. நகே² வா கேஸே வா நாஸலோமே (சூளவ॰ 275) வா தீ³கே⁴ ந தா⁴ரயேதி ஸம்ப³ந்தோ⁴. ‘‘அனுஜானாமி, பி⁴க்க²வே, மங்ஸப்பமாணேன நகே² சி²ந்தி³து’’ந்தி (சூளவ॰ 274) ச ‘‘அனுஜானாமி, பி⁴க்க²வே, து³மாஸிகங் வா து³வங்கு³லங் வா’’தி (சூளவ॰ 246) ச வுத்தங். ந லப்³ப⁴ங் வீஸதிமட்ட²ந்தி எத்த² ஏகனக²ம்பி மட்ட²ங் காதுங் ந வட்டதி ஏவ. ‘‘ந பி⁴க்க²வே வீஸதிமட்ட²ங் காராபேதப்³ப³ங். யோ காராபெய்ய, ஆபத்தி து³க்கடஸ்ஸ (சூளவ॰ 274). அனுஜானாமி, பி⁴க்க²வே, மலமத்தங் அபகட்³டி⁴து’’ந்தி (சூளவ॰ 274) ஹி வுத்தங். தஸ்மா நக²தோ மலமத்தங் அபகட்³டி⁴துங் வட்டதி. ஸம்பா³தே⁴ லோமஹாரணந்தி எத்த² ஸம்பா³தோ⁴ நாம உபோ⁴ உபகச்ச²கா முத்தகரணஞ்ச. ‘‘அனுஜானாமி, பி⁴க்க²வே, ஆபா³த⁴பச்சயா ஸம்பா³தே⁴ லோமங் ஸங்ஹராபேது’’ந்தி (சூளவ॰ 275) ஹி வுத்தங்.
342. Nakhe vā kese vā nāsalome (cūḷava. 275) vā dīghe na dhārayeti sambandho. ‘‘Anujānāmi, bhikkhave, maṃsappamāṇena nakhe chinditu’’nti (cūḷava. 274) ca ‘‘anujānāmi, bhikkhave, dumāsikaṃ vā duvaṅgulaṃ vā’’ti (cūḷava. 246) ca vuttaṃ. Na labbhaṃ vīsatimaṭṭhanti ettha ekanakhampi maṭṭhaṃ kātuṃ na vaṭṭati eva. ‘‘Na bhikkhave vīsatimaṭṭhaṃ kārāpetabbaṃ. Yo kārāpeyya, āpatti dukkaṭassa (cūḷava. 274). Anujānāmi, bhikkhave, malamattaṃ apakaḍḍhitu’’nti (cūḷava. 274) hi vuttaṃ. Tasmā nakhato malamattaṃ apakaḍḍhituṃ vaṭṭati. Sambādhe lomahāraṇanti ettha sambādho nāma ubho upakacchakā muttakaraṇañca. ‘‘Anujānāmi, bhikkhave, ābādhapaccayā sambādhe lomaṃ saṃharāpetu’’nti (cūḷava. 275) hi vuttaṃ.
343. யதா²வுட்³ட⁴ந்தி வுட்³ட⁴படிபாடியா லத்³த⁴ப்³ப³ங். ந பா³தெ⁴ய்யாதி ந வாரெய்ய. ஸங்கு⁴த்³தி³ட்ட²ங்வாதி உபாஸகாதீ³ஹி யதா²வுட்³ட⁴ங் ‘‘அய்யா பரிபு⁴ஞ்ஜந்தூ’’தி நிஸ்ஸஜ்ஜித்வாவ தி³ன்னங் ஸேனாஸனாதி³. ‘‘ந பி⁴க்க²வே உத்³தி³ஸ்ஸகதம்பி யதா²வுட்³ட⁴ங் படிபா³ஹிதப்³ப³ங். யோ படிபா³ஹெய்ய, ஆபத்தி து³க்கடஸ்ஸா’’தி (சூளவ॰ 313) ஹி வுத்தங். அதோ⁴தபாதே³ஹி (சூளவ॰ அட்ட²॰ 324) வா அல்லபாதே³ஹி வா நக்கமேதி ஸம்ப³ந்தோ⁴. ஸுதோ⁴தபாத³கங் வாபீதி தோ⁴தபாதே³ஹேவ அக்கமிதப்³ப³ட்டா²னங். ததே²வாதி நக்கமெய்ய ஸஉபாஹனோதி அத்தோ². ‘‘ந பி⁴க்க²வே அதோ⁴தேஹி பாதே³ஹி, அல்லேஹி பாதே³ஹி, ஸஉபாஹனேன ஸேனாஸனங் அக்கமிதப்³ப³ங். யோ அக்கமெய்ய, ஆபத்தி து³க்கடஸ்ஸா’’தி (சூளவ॰ 324), ஹி வுத்தங். ‘‘அனுஜானாமி, பி⁴க்க²வே, பச்சத்த²ரித்வா நிபஜ்ஜிது’’ந்தி (சூளவ॰ 324) வுத்தத்தா பரிப⁴ண்ட³கதங் பூ⁴மிங் வா பூ⁴மத்த²ரணஸேனாஸனங் வா ஸங்கி⁴கங் மஞ்சபீட²ங் வா அத்தனோ ஸந்தகேன பச்சத்த²ரணேன பச்சத்த²ரித்வாவ நிபஜ்ஜிதப்³ப³ங்.
343.Yathāvuḍḍhanti vuḍḍhapaṭipāṭiyā laddhabbaṃ. Na bādheyyāti na vāreyya. Saṅghuddiṭṭhaṃvāti upāsakādīhi yathāvuḍḍhaṃ ‘‘ayyā paribhuñjantū’’ti nissajjitvāva dinnaṃ senāsanādi. ‘‘Na bhikkhave uddissakatampi yathāvuḍḍhaṃ paṭibāhitabbaṃ. Yo paṭibāheyya, āpatti dukkaṭassā’’ti (cūḷava. 313) hi vuttaṃ. Adhotapādehi (cūḷava. aṭṭha. 324) vā allapādehi vā nakkameti sambandho. Sudhotapādakaṃ vāpīti dhotapādeheva akkamitabbaṭṭhānaṃ. Tathevāti nakkameyya saupāhanoti attho. ‘‘Na bhikkhave adhotehi pādehi, allehi pādehi, saupāhanena senāsanaṃ akkamitabbaṃ. Yo akkameyya, āpatti dukkaṭassā’’ti (cūḷava. 324), hi vuttaṃ. ‘‘Anujānāmi, bhikkhave, paccattharitvā nipajjitu’’nti (cūḷava. 324) vuttattā paribhaṇḍakataṃ bhūmiṃ vā bhūmattharaṇasenāsanaṃ vā saṅghikaṃ mañcapīṭhaṃ vā attano santakena paccattharaṇena paccattharitvāva nipajjitabbaṃ.
344. ஸங்கா⁴டியா ந பல்லத்தே²தி அதி⁴ட்டி²தசீவரேன விஹாரே வா அந்தரக⁴ரே வா பல்லத்தி²கா ந காதப்³பா³தி அத்தோ². பரிகம்மகதங் (சூளவ॰ அட்ட²॰ 324) பி⁴த்திஆதி³ங் ந அபஸ்ஸயே. ‘‘ந பி⁴க்க²வே பரிகம்மகதா பி⁴த்தி அபஸ்ஸேதப்³பா³. யோ அபஸ்ஸெய்ய, ஆபத்தி து³க்கடஸ்ஸா’’தி (சூளவ॰ 324) ஹி வுத்தங். தஸ்மா ஸேதபி⁴த்தி வா சித்தகம்மகதா வா பி⁴த்தி ந அபஸ்ஸயிதப்³பா³. ந கேவலங் பி⁴த்தியேவ, பரிகம்மகதா த்³வாரகவாடவாதபானத்த²ம்பா⁴த³யோபி ந அபஸ்ஸயிதப்³பா³. எத்த²பி லோமக³ணனாய ஏவ ஆபத்தியோ வேதி³தப்³பா³. ஸந்தே உத³கே நோ ந ஆசமேதி (சூளவ॰ 373; சூளவ॰ அட்ட²॰ 373) நோ ந ஆசமேதுங், உத³கஸுத்³தி⁴ங் அகாதுங் ந வட்டதீதி அத்தோ². ஸந்தேதி வசனேன அஸந்தே அனாபத்தீதி தீ³பேதி.
344.Saṅghāṭiyāna pallattheti adhiṭṭhitacīvarena vihāre vā antaraghare vā pallatthikā na kātabbāti attho. Parikammakataṃ (cūḷava. aṭṭha. 324) bhittiādiṃ na apassaye. ‘‘Na bhikkhave parikammakatā bhitti apassetabbā. Yo apasseyya, āpatti dukkaṭassā’’ti (cūḷava. 324) hi vuttaṃ. Tasmā setabhitti vā cittakammakatā vā bhitti na apassayitabbā. Na kevalaṃ bhittiyeva, parikammakatā dvārakavāṭavātapānatthambhādayopi na apassayitabbā. Etthapi lomagaṇanāya eva āpattiyo veditabbā. Sante udake no na ācameti (cūḷava. 373; cūḷava. aṭṭha. 373) no na ācametuṃ, udakasuddhiṃ akātuṃ na vaṭṭatīti attho. Santeti vacanena asante anāpattīti dīpeti.
345. அகப்பியஸமாதா³னேதி பி⁴க்கு²ங் வா ஸாமணேராதி³கே ஸேஸஸஹத⁴ம்மிகே வா அகப்பியே நியோஜெந்தஸ்ஸ து³க்கடமேவ. ‘‘ந, பி⁴க்க²வே, பப்³ப³ஜிதேன அகப்பியே ஸமாத³பேதப்³ப³ங். யோ ஸமாத³பெய்ய, ஆபத்தி து³க்கடஸ்ஸா’’தி (மஹாவ॰ 303) ஹி வுத்தங். ஸபா⁴கா³ய (மஹாவ॰ அட்ட²॰ 169) ஆபத்தியா தே³ஸனாயாதி அத்தோ². வத்து²ஸபா⁴க³தா இத⁴ அதி⁴ப்பேதா, ந ஆபத்திஸபா⁴க³தா. ‘‘ந பி⁴க்க²வே ஸபா⁴கா³ ஆபத்தி தே³ஸேதப்³பா³. யோ தே³ஸெய்ய, ஆபத்தி து³க்கடஸ்ஸா’’தி (மஹாவ॰ 169) ச ‘‘ந பி⁴க்க²வே ஸபா⁴கா³ ஆபத்தி படிக்³க³ஹேதப்³பா³. யோ படிக்³க³ண்ஹெய்ய, ஆபத்தி து³க்கடஸ்ஸா’’தி (மஹாவ॰ 169) ச வுத்தங். வத்து²ஸபா⁴க³ங் ஆபத்திங் ஆவி காதும்பி ந வட்டதி, தேன வுத்தங் ‘‘ஆவிகம்மே ச து³க்கட’’ந்தி. ‘‘அஹங், ஆவுஸோ, இத்த²ன்னாமங் ஆபத்திங் ஆபஜ்ஜிங், தங் இதோ வுட்ட²ஹித்வா படிகரிஸ்ஸாமீ’’தி அஞ்ஞஸ்ஸ வசனங் ஆவிகம்மங்னாம.
345.Akappiyasamādāneti bhikkhuṃ vā sāmaṇerādike sesasahadhammike vā akappiye niyojentassa dukkaṭameva. ‘‘Na, bhikkhave, pabbajitena akappiye samādapetabbaṃ. Yo samādapeyya, āpatti dukkaṭassā’’ti (mahāva. 303) hi vuttaṃ. Sabhāgāya (mahāva. aṭṭha. 169) āpattiyā desanāyāti attho. Vatthusabhāgatā idha adhippetā, na āpattisabhāgatā. ‘‘Na bhikkhave sabhāgā āpatti desetabbā. Yo deseyya, āpatti dukkaṭassā’’ti (mahāva. 169) ca ‘‘na bhikkhave sabhāgā āpatti paṭiggahetabbā. Yo paṭiggaṇheyya, āpatti dukkaṭassā’’ti (mahāva. 169) ca vuttaṃ. Vatthusabhāgaṃ āpattiṃ āvi kātumpi na vaṭṭati, tena vuttaṃ ‘‘āvikamme ca dukkaṭa’’nti. ‘‘Ahaṃ, āvuso, itthannāmaṃ āpattiṃ āpajjiṃ, taṃ ito vuṭṭhahitvā paṭikarissāmī’’ti aññassa vacanaṃ āvikammaṃnāma.
346. இதரஸ்ஸ தூதி அஸுத்³த⁴சித்தஸ்ஸ.
346.Itarassatūti asuddhacittassa.
347. போரிஸந்தி (சூளவ॰ அட்ட²॰ 284) புரிஸப்பமாணங் அபி⁴ருஹிதுங் வட்டதீதி அத்தோ². ‘‘அனுஜானாமி, பி⁴க்க²வே, ஸதி கரணீயே போரிஸங் ருக்க²ங் அபி⁴ருஹிதுங், ஆபதா³ஸு யாவத³த்த²’’ந்தி (சூளவ॰ 284) ஹி வுத்தங்.
347.Porisanti (cūḷava. aṭṭha. 284) purisappamāṇaṃ abhiruhituṃ vaṭṭatīti attho. ‘‘Anujānāmi, bhikkhave, sati karaṇīye porisaṃ rukkhaṃ abhiruhituṃ, āpadāsu yāvadattha’’nti (cūḷava. 284) hi vuttaṃ.
348. பரிஸ்ஸாவனங் (சூளவ॰ 259; சூளவ॰ அட்ட²॰ 259) வினா அட்³ட⁴யோஜனங் க³ச்ச²ந்தஸ்ஸ து³க்கடந்தி ஸம்ப³ந்தோ⁴. ‘‘அத்³தா⁴னக³மனஸமயோ நாம அட்³ட⁴யோஜனங் க³ச்சி²ஸ்ஸாமீதி பு⁴ஞ்ஜிதப்³ப³’’ந்தி (பாசி॰ 218) வுத்தங், தஸ்மா அட்³ட⁴யோஜனமேவ அந்திமங் அத்³தா⁴னந்தி வேதி³தப்³ப³ங். பி⁴க்கு²னியா ச மாதுகா³மேன ச ஸங்விதா⁴னஸிக்கா²பதே³ ‘‘ஏகத்³தா⁴னமக்³க³ங் படிபஜ்ஜெய்ய, அந்தமஸோ கா³மந்தரம்பீ’’தி (பாசி॰ 182, 413) ஏவங் விஸேஸெத்வா வுத்தத்தா ‘‘குக்குடஸம்பாதே கா³மே கா³மந்தரே கா³மந்தரே ஆபத்தி பாசித்தியஸ்ஸா’’தி (பாசி॰ 183, 414) வுத்தங், ந அத்³தா⁴னலக்க²ணேன. யதி³ கா³மந்தரபரிச்சே²தே³ன அத்³தா⁴னங் வுச்சதி, க³ணபோ⁴ஜனஸிக்கா²பதே³பி ‘‘அத்³தா⁴னக³மனஸமயோ நாம கா³மந்தரம்பி க³ச்சி²ஸ்ஸாமீதி பு⁴ஞ்ஜிதப்³ப³’’ந்தி வதெ³ய்ய, ந ச வுத்தங். தஸ்மா ‘‘ந பி⁴க்க²வே அபரிஸ்ஸாவனகேன அத்³தா⁴னோ படிபஜ்ஜிதப்³போ³. யோ படிபஜ்ஜெய்ய, ஆபத்தி து³க்கடஸ்ஸ. ஸசே ந ஹோதி பரிஸ்ஸாவனங் வா த⁴ம்மகரணோ வா, ஸங்கா⁴டிகண்ணோபி அதி⁴ட்டா²தப்³போ³ இமினா பரிஸ்ஸாவெத்வா பிவிஸ்ஸாமீ’’தி வுத்தட்டா²னேபி அட்³ட⁴யோஜனவஸேனேவ அத்³தா⁴னபரிச்சே²தோ³ வேதி³தப்³போ³. அப⁴யகி³ரிவாஸீனங் பன ‘‘த்³விகா³வுதவஸேன அத்³தா⁴னபரிச்சே²தோ³’’தி பாளியங் ஏவ அத்தி². யாசமானஸ்ஸாதி யாசந்தஸ்ஸ. ‘‘ந ச பி⁴க்க²வே அத்³தா⁴னப்படிபன்னேன பி⁴க்கு²னா பரிஸ்ஸாவனங் யாசியமானேன ந தா³தப்³ப³ங். யோ ந த³தெ³ய்ய, ஆபத்தி து³க்கடஸ்ஸா’’தி ஹி வுத்தங்.
348. Parissāvanaṃ (cūḷava. 259; cūḷava. aṭṭha. 259) vinā aḍḍhayojanaṃ gacchantassa dukkaṭanti sambandho. ‘‘Addhānagamanasamayo nāma aḍḍhayojanaṃ gacchissāmīti bhuñjitabba’’nti (pāci. 218) vuttaṃ, tasmā aḍḍhayojanameva antimaṃ addhānanti veditabbaṃ. Bhikkhuniyā ca mātugāmena ca saṃvidhānasikkhāpade ‘‘ekaddhānamaggaṃ paṭipajjeyya, antamaso gāmantarampī’’ti (pāci. 182, 413) evaṃ visesetvā vuttattā ‘‘kukkuṭasampāte gāme gāmantare gāmantare āpatti pācittiyassā’’ti (pāci. 183, 414) vuttaṃ, na addhānalakkhaṇena. Yadi gāmantaraparicchedena addhānaṃ vuccati, gaṇabhojanasikkhāpadepi ‘‘addhānagamanasamayo nāma gāmantarampi gacchissāmīti bhuñjitabba’’nti vadeyya, na ca vuttaṃ. Tasmā ‘‘na bhikkhave aparissāvanakena addhāno paṭipajjitabbo. Yo paṭipajjeyya, āpatti dukkaṭassa. Sace na hoti parissāvanaṃ vā dhammakaraṇo vā, saṅghāṭikaṇṇopi adhiṭṭhātabbo iminā parissāvetvā pivissāmī’’ti vuttaṭṭhānepi aḍḍhayojanavaseneva addhānaparicchedo veditabbo. Abhayagirivāsīnaṃ pana ‘‘dvigāvutavasena addhānaparicchedo’’ti pāḷiyaṃ eva atthi. Yācamānassāti yācantassa. ‘‘Na ca bhikkhave addhānappaṭipannena bhikkhunā parissāvanaṃ yāciyamānena na dātabbaṃ. Yo na dadeyya, āpatti dukkaṭassā’’ti hi vuttaṃ.
349. அஞ்ஞத்ர ஆபா³த⁴ப்பச்சயா கண்ணனாஸாதி³கே ஸேஸங்கே³ து³க்கடந்தி ஸம்ப³ந்தோ⁴. ஆபா³தே⁴ ஸதி அங்கு³லிஆதீ³னி சி²ந்தி³துங் வட்டதி. அங்க³ஜாதங் வா பீ³ஜானி வா சி²ந்தி³துங் ந வட்டதி ஏவ. அத்தகா⁴தனே ச து³க்கடந்தி ஸம்ப³ந்தோ⁴. ‘‘ந ச பி⁴க்க²வே அத்தானங் கா⁴தேதப்³ப³ங். யோ கா⁴தெய்ய, ஆபத்தி து³க்கடஸ்ஸா’’தி ஹி வுத்தங்.
349. Aññatra ābādhappaccayā kaṇṇanāsādike sesaṅge dukkaṭanti sambandho. Ābādhe sati aṅguliādīni chindituṃ vaṭṭati. Aṅgajātaṃ vā bījāni vā chindituṃ na vaṭṭati eva. Attaghātane ca dukkaṭanti sambandho. ‘‘Na ca bhikkhave attānaṃ ghātetabbaṃ. Yo ghāteyya, āpatti dukkaṭassā’’ti hi vuttaṃ.
350. ‘‘ந ச பி⁴க்க²வே படிபா⁴னசித்தங் காராபேதப்³ப³ங் இத்தி²ரூபகங் புரிஸரூபகங். யோ காராபெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, மாலாகம்மங் லதாகம்மங் மகரத³ந்தகங் பஞ்சபடிக’’ந்தி (சூளவ॰ 299) வுத்தத்தா ‘‘சித்தபொத்த²கரூபானி, ந கரே ந ச காரயே’’தி வுத்தங். பு⁴ஞ்ஜந்தந்தி (சூளவ॰ அட்ட²॰ 316) விப்பகதபோ⁴ஜனங். ‘‘ந பி⁴க்க²வே விப்பகதபோ⁴ஜனோ பி⁴க்கு² வுட்டா²பேதப்³போ³. யோ வுட்டா²பெய்ய, ஆபத்தி து³க்கடஸ்ஸா’’தி (சூளவ॰ 316) ஹி வுத்தங்.
350. ‘‘Na ca bhikkhave paṭibhānacittaṃ kārāpetabbaṃ itthirūpakaṃ purisarūpakaṃ. Yo kārāpeyya, āpatti dukkaṭassa. Anujānāmi, bhikkhave, mālākammaṃ latākammaṃ makaradantakaṃ pañcapaṭika’’nti (cūḷava. 299) vuttattā ‘‘cittapotthakarūpāni, na kare na ca kāraye’’ti vuttaṃ. Bhuñjantanti (cūḷava. aṭṭha. 316) vippakatabhojanaṃ. ‘‘Na bhikkhave vippakatabhojano bhikkhu vuṭṭhāpetabbo. Yo vuṭṭhāpeyya, āpatti dukkaṭassā’’ti (cūḷava. 316) hi vuttaṃ.
351. யானானீதி வய்ஹங் ரதோ² ஸகடங் ஸந்த³மானிகாதீ³னி கி³லானஸ்ஸ அபி⁴ருஹிதுங் கப்பந்தி, ஸிவிகோ ச கப்பதி. ஏவங் ஸப்³ப³த்த². ‘‘அனுஜானாமி, பி⁴க்க²வே, கி³லானஸ்ஸ யானங், புரிஸயுத்தங் ஹத்த²வட்டகங், ஸிவிகங் பாடங்கி’’ந்தி (மஹாவ॰ 253) ஹி வுத்தங்.
351.Yānānīti vayhaṃ ratho sakaṭaṃ sandamānikādīni gilānassa abhiruhituṃ kappanti, siviko ca kappati. Evaṃ sabbattha. ‘‘Anujānāmi, bhikkhave, gilānassa yānaṃ, purisayuttaṃ hatthavaṭṭakaṃ, sivikaṃ pāṭaṅki’’nti (mahāva. 253) hi vuttaṃ.
352. த³வந்தி கேளிங். ‘‘ந பி⁴க்க²வே பு³த்³த⁴ங் வா த⁴ம்மங் வா ஸங்க⁴ங் வா ஆரப்³ப⁴ த³வோ காதப்³போ³. யோ கரெய்ய, ஆபத்தி து³க்கடஸ்ஸா’’தி (பாசி॰ 627) ஹி வுத்தங். தஸ்மா ‘‘கிங் பு³த்³தோ⁴ ஸிலகபு³த்³தோ⁴, உதா³ஹு படிபு³த்³தோ⁴’’தி வா ‘‘கிங் த⁴ம்மோ கோ³த⁴ம்மோ அஜத⁴ம்மோ’’தி வா ‘‘கிங் ஸங்கோ⁴ அஜஸங்கோ⁴ மிக³ஸங்கோ⁴’’தி வா ஏவமாதி³னா நயேன யோ த³வங் கரோதி, தஸ்ஸ து³க்கடந்தி வேதி³தப்³ப³ங். ‘‘தும்ஹாகங் சீவரங் த³ஸ்ஸாம, பத்தங் த³ஸ்ஸாமா’’திஆதி³னா நயேன ஸாமணேரங் வா உபஸம்பன்னங் வா அஞ்ஞஸ்ஸ அந்தமஸோ து³ஸ்ஸீலஸ்ஸாபி பரிஸபூ⁴தங் அத்தனோ உபட்டா²ககரணத்த²ங் உபலாளனே து³க்கடந்தி அத்தோ². ‘‘ந பி⁴க்க²வே அஞ்ஞஸ்ஸ பரிஸா அபலாளேதப்³பா³. யோ அபலாளெய்ய, ஆபத்தி து³க்கடஸ்ஸா’’தி ஹி வுத்தங்.
352.Davanti keḷiṃ. ‘‘Na bhikkhave buddhaṃ vā dhammaṃ vā saṅghaṃ vā ārabbha davo kātabbo. Yo kareyya, āpatti dukkaṭassā’’ti (pāci. 627) hi vuttaṃ. Tasmā ‘‘kiṃ buddho silakabuddho, udāhu paṭibuddho’’ti vā ‘‘kiṃ dhammo godhammo ajadhammo’’ti vā ‘‘kiṃ saṅgho ajasaṅgho migasaṅgho’’ti vā evamādinā nayena yo davaṃ karoti, tassa dukkaṭanti veditabbaṃ. ‘‘Tumhākaṃ cīvaraṃ dassāma, pattaṃ dassāmā’’tiādinā nayena sāmaṇeraṃ vā upasampannaṃ vā aññassa antamaso dussīlassāpi parisabhūtaṃ attano upaṭṭhākakaraṇatthaṃ upalāḷane dukkaṭanti attho. ‘‘Na bhikkhave aññassa parisā apalāḷetabbā. Yo apalāḷeyya, āpatti dukkaṭassā’’ti hi vuttaṃ.
353. காயங் (சூளவ॰ 411) வா ஊருங் வா நிமித்தங் வா விவரித்வா பி⁴க்கு²னீனங் ந த³ஸ்ஸயேதி ஸம்ப³ந்தோ⁴. கத்³த³முத³காதி³னா தா பி⁴க்கு²னியோ ந ஸிஞ்செய்யாதி அத்தோ². ந கேவலங் கத்³த³முத³காதி³கேனேவ, விப்பஸன்னஉத³கரஜனகத்³த³மாதீ³ஸுபி யேன கேனசி ஓஸிஞ்சந்தஸ்ஸ து³க்கடமேவ.
353. Kāyaṃ (cūḷava. 411) vā ūruṃ vā nimittaṃ vā vivaritvā bhikkhunīnaṃ na dassayeti sambandho. Kaddamudakādinā tā bhikkhuniyo na siñceyyāti attho. Na kevalaṃ kaddamudakādikeneva, vippasannaudakarajanakaddamādīsupi yena kenaci osiñcantassa dukkaṭameva.
354. பா³லந்தி எத்த² பா³லோ நாம யோ ஓவாத³ங் க³ஹெத்வா பாதிமொக்கு²த்³தே³ஸகஸ்ஸ ஆரோசெத்வா பாடிபதே³ பச்சாஹரிதப்³ப³ந்தி ந ஜானாதி. கி³லானோ நாம யோ ஓவாத³ங் க³ஹெத்வா உபோஸத²க்³க³ங் க³ந்த்வா ஆரோசேதுஞ்ச பச்சாஹரிதுஞ்ச ந ஸக்கோதி. க³மியோ நாம யோ படிதே³ஸங் க³ந்துகாமோ.
354.Bālanti ettha bālo nāma yo ovādaṃ gahetvā pātimokkhuddesakassa ārocetvā pāṭipade paccāharitabbanti na jānāti. Gilāno nāma yo ovādaṃ gahetvā uposathaggaṃ gantvā ārocetuñca paccāharituñca na sakkoti. Gamiyo nāma yo paṭidesaṃ gantukāmo.
‘‘ந பி⁴க்க²வே ஓவாதோ³ ந க³ஹேதப்³போ³. யோ ந க³ண்ஹெய்ய, ஆபத்தி து³க்கடஸ்ஸா’’தி (சூளவ॰ 414) ச ‘‘அனுஜானாமி, பி⁴க்க²வே, ட²பெத்வா பா³லங், ட²பெத்வா கி³லானங், ட²பெத்வா க³மிகங், அவஸேஸேஹி ஓவாத³ங் க³ஹேது’’ந்தி (சூளவ॰ 414) ச ‘‘ந பி⁴க்க²வே ஓவாதோ³ ந பச்சாஹரிதப்³போ³. யோ ந பச்சாஹரெய்ய, ஆபத்தி து³க்கடஸ்ஸா’’தி (பாசி॰ 415) ச வுத்தத்தா பி⁴க்கு²னீஹி தேரஸியங் வா சாதுத்³த³ஸியங் வா ஆக³ந்த்வா ‘‘அயங் உபோஸதோ² சாதுத்³த³ஸோ’’தி வா ‘‘பன்னரஸோ’’தி வா ‘‘கதா³ அய்ய உபோஸதோ²’’தி வா புச்சி²தே ‘‘சாதுத்³த³ஸோ’’தி வா ‘‘பன்னரஸோ’’தி வா ‘‘ஸ்வே ப⁴கி³னி உபோஸதோ²’’தி வா ஆசிக்கி²தப்³ப³ங். தாஹி பி⁴க்கு²னீஹி உபோஸத²தி³வஸே ஆக³ந்த்வா ‘‘பி⁴க்கு²னிஸங்கோ⁴ அய்ய பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர அய்ய பி⁴க்கு²னிஸங்கோ⁴ ஓவாதூ³பஸங்கமன’’ந்தி ஏவங் யாசிதப்³ப³ங், தங் வசனங் படிக்³க³ஹெத்வா உபோஸத²க்³கே³ பாதிமொக்கு²த்³தே³ஸகஸ்ஸ ‘‘பி⁴க்கு²னிஸங்கோ⁴, ப⁴ந்தே, பி⁴க்கு²ஸங்க⁴ஸ்ஸ பாதே³ வந்த³தி, ஓவாதூ³பஸங்கமனஞ்ச யாசதி, லப⁴து கிர, ப⁴ந்தே, பி⁴க்கு²னிஸங்கோ⁴ ஓவாதூ³பஸங்கமன’’ந்தி ஆசிக்கி²தப்³ப³ங். பாதிமொக்கு²த்³தே³ஸகேனாபி ஸசே தத்த² பி⁴க்கு²னோவாத³கோ அத்தி², ‘‘இத்த²ன்னாமோ பி⁴க்கு² பி⁴க்கு²னோவாத³கோ ஸம்மதோ, தங் பி⁴க்கு²னிஸங்கோ⁴ உபஸங்கமதூ’’தி வத்தப்³ப³ங். ஸசே நத்தி², ‘‘கோ ஆயஸ்மா உஸ்ஸஹதி பி⁴க்கு²னியோ ஓவதி³து’’ந்தி புச்சி²த்வா ஸசே அத்தி² அட்ட²ஹங்கே³ஹி ஸமன்னாக³தோ பி⁴க்கு², தங் தத்தே²வ ஸம்மன்னித்வா வுத்தனயேனேவ ஓவாத³ப்படிக்³கா³ஹகஸ்ஸ ஆரோசேதப்³ப³ங். யதி³ நத்தி² கோசி பி⁴க்கு² பி⁴க்கு²னோவாத³கோ ஸம்மதோ, ‘‘பாஸாதி³கேன பி⁴க்கு²னிஸங்கோ⁴ ஸம்பாதே³தூ’’தி வத்தப்³ப³ங். தேன பி⁴க்கு²னா ‘‘ஸாதூ⁴’’தி ஸம்படிச்சி²த்வா பாடிபதே³ பி⁴க்கு²னீனங் ‘‘நத்தி² கோசி பி⁴க்கு² பி⁴க்கு²னோவாத³கோ ஸம்மதோ, பாஸாதி³கேன பி⁴க்கு²னிஸங்கோ⁴ ஸம்பாதே³தூ’’தி வத்தப்³ப³ங். தாஹிபி ‘‘ஸாது⁴ அய்யா’’தி ஸம்படிச்சி²தப்³ப³ங். இமினா நயேன க³ணபுக்³க³லேஸுபி வசனபே⁴தோ³ வேதி³தப்³போ³.
‘‘Na bhikkhave ovādo na gahetabbo. Yo na gaṇheyya, āpatti dukkaṭassā’’ti (cūḷava. 414) ca ‘‘anujānāmi, bhikkhave, ṭhapetvā bālaṃ, ṭhapetvā gilānaṃ, ṭhapetvā gamikaṃ, avasesehi ovādaṃ gahetu’’nti (cūḷava. 414) ca ‘‘na bhikkhave ovādo na paccāharitabbo. Yo na paccāhareyya, āpatti dukkaṭassā’’ti (pāci. 415) ca vuttattā bhikkhunīhi terasiyaṃ vā cātuddasiyaṃ vā āgantvā ‘‘ayaṃ uposatho cātuddaso’’ti vā ‘‘pannaraso’’ti vā ‘‘kadā ayya uposatho’’ti vā pucchite ‘‘cātuddaso’’ti vā ‘‘pannaraso’’ti vā ‘‘sve bhagini uposatho’’ti vā ācikkhitabbaṃ. Tāhi bhikkhunīhi uposathadivase āgantvā ‘‘bhikkhunisaṅgho ayya bhikkhusaṅghassa pāde vandati, ovādūpasaṅkamanañca yācati, labhatu kira ayya bhikkhunisaṅgho ovādūpasaṅkamana’’nti evaṃ yācitabbaṃ, taṃ vacanaṃ paṭiggahetvā uposathagge pātimokkhuddesakassa ‘‘bhikkhunisaṅgho, bhante, bhikkhusaṅghassa pāde vandati, ovādūpasaṅkamanañca yācati, labhatu kira, bhante, bhikkhunisaṅgho ovādūpasaṅkamana’’nti ācikkhitabbaṃ. Pātimokkhuddesakenāpi sace tattha bhikkhunovādako atthi, ‘‘itthannāmo bhikkhu bhikkhunovādako sammato, taṃ bhikkhunisaṅgho upasaṅkamatū’’ti vattabbaṃ. Sace natthi, ‘‘ko āyasmā ussahati bhikkhuniyo ovaditu’’nti pucchitvā sace atthi aṭṭhahaṅgehi samannāgato bhikkhu, taṃ tattheva sammannitvā vuttanayeneva ovādappaṭiggāhakassa ārocetabbaṃ. Yadi natthi koci bhikkhu bhikkhunovādako sammato, ‘‘pāsādikena bhikkhunisaṅgho sampādetū’’ti vattabbaṃ. Tena bhikkhunā ‘‘sādhū’’ti sampaṭicchitvā pāṭipade bhikkhunīnaṃ ‘‘natthi koci bhikkhu bhikkhunovādako sammato, pāsādikena bhikkhunisaṅgho sampādetū’’ti vattabbaṃ. Tāhipi ‘‘sādhu ayyā’’ti sampaṭicchitabbaṃ. Iminā nayena gaṇapuggalesupi vacanabhedo veditabbo.
355. லோகாயதங் (சூளவ॰ 286; சூளவ॰ அட்ட²॰ 286) நாம விதண்ட³ஸத்த²ங். ‘‘ந பி⁴க்க²வே ஆஸித்தகூபதா⁴னே பு⁴ஞ்ஜிதப்³ப³ங். யோ பு⁴ஞ்ஜெய்ய, ஆபத்தி து³க்கடஸ்ஸா’’தி (சூளவ॰ 264) வுத்தத்தா ‘‘பேளாயபி ந பு⁴ஞ்ஜெய்யா’’தி வுத்தங்.
355.Lokāyataṃ (cūḷava. 286; cūḷava. aṭṭha. 286) nāma vitaṇḍasatthaṃ. ‘‘Na bhikkhave āsittakūpadhāne bhuñjitabbaṃ. Yo bhuñjeyya, āpatti dukkaṭassā’’ti (cūḷava. 264) vuttattā ‘‘peḷāyapi na bhuñjeyyā’’ti vuttaṃ.
356. கி³ஹிபாருதங் ந பாருபெய்ய, கி³ஹினிவாஸனங் ந நிவாஸெய்யாதி அத்தோ². ‘‘ந பி⁴க்க²வே கி³ஹினிவத்த²ங் நிவாஸேதப்³ப³ங் ஹத்தி²ஸொண்ட³கங் மச்ச²வாளகங் சதுகண்ணகங் தாலவண்டகங் ஸதவலிகங். யோ நிவாஸெய்ய, ஆபத்தி து³க்கடஸ்ஸா’’தி (சூளவ॰ 280) ஹி வுத்தங். பரிமண்ட³லதோ அஞ்ஞதா² பாருபனங், ஸப்³ப³மேதங் கி³ஹிபாருதங் நாம. தங் பன ந பாருபேதப்³ப³ந்தி அத்தோ². ஸங்வேல்லியந்தி எத்த² கச்ச²ங் ப³ந்தி⁴த்வா ந நிவாஸெய்யாதி அத்தோ². தா³யந்தி (சூளவ॰ 283; சூளவ॰ அட்ட²॰ 283) அரஞ்ஞங். நாலிம்பயெய்யாதி ஸம்ப³ந்தோ⁴.
356. Gihipārutaṃ na pārupeyya, gihinivāsanaṃ na nivāseyyāti attho. ‘‘Na bhikkhave gihinivatthaṃ nivāsetabbaṃ hatthisoṇḍakaṃ macchavāḷakaṃ catukaṇṇakaṃ tālavaṇṭakaṃ satavalikaṃ. Yo nivāseyya, āpatti dukkaṭassā’’ti (cūḷava. 280) hi vuttaṃ. Parimaṇḍalato aññathā pārupanaṃ, sabbametaṃ gihipārutaṃ nāma. Taṃ pana na pārupetabbanti attho. Saṃvelliyanti ettha kacchaṃ bandhitvā na nivāseyyāti attho. Dāyanti (cūḷava. 283; cūḷava. aṭṭha. 283) araññaṃ. Nālimpayeyyāti sambandho.
357. வட்³டி⁴ஞ்ச ந பயோஜயே, நோஞாதகே நப்பவாரிதே ந யாசேதி அத்தோ². அஞ்ஞஸ்ஸாதி எத்த² (சூளவ॰ 420; சூளவ॰ அட்ட²॰ 420) ‘‘தும்ஹே பரிபு⁴ஞ்ஜதா²’’தி நியமெத்வா தி³ன்னங் ஸஹத⁴ம்மிகானம்பி தா³துங் ந வட்டதி. அக்³க³ங் க³ஹெத்வா வா கதிபாஹங் பு⁴த்வா வா புன த³தெ³ய்யாதி அத்தோ².
357. Vaḍḍhiñca na payojaye, noñātake nappavārite na yāceti attho. Aññassāti ettha (cūḷava. 420; cūḷava. aṭṭha. 420) ‘‘tumhe paribhuñjathā’’ti niyametvā dinnaṃ sahadhammikānampi dātuṃ na vaṭṭati. Aggaṃ gahetvā vā katipāhaṃ bhutvā vā puna dadeyyāti attho.
358. உத்³தி³ஸ்ஸ யாசனேதி எத்த² (பாசி॰ அட்ட²॰ 679) ‘‘அம்ஹாகங் விஹாரே இத்த²ன்னாமேன இத³ஞ்சித³ஞ்ச கத’’ந்தி வா ‘‘கரிஸ்ஸந்தீ’’தி வா ஏவங் உத்³தி³ஸ்ஸ ரக்க²ங் யாசனேதி அத்தோ². ஞத்வாஞத்வா வாதி ஏவங் ‘‘அம்ஹேஹி யாசியமானா இமேஸங் த³ண்டெ³ஸ்ஸந்தீ’’தி தேஸங் த³ண்டி³னங் ஞத்வா வா அஞத்வா வாதி அத்தோ². தேஹி பன த³ண்டி³தே ஸோ த³ண்டோ³ உத்³தி³ஸ்ஸ யாசந்தானங் கீ³வாவ ப⁴ண்ட³தெ³ய்யங் ஹோதி ஏவாதி அத்தோ². ‘‘இமினா ச இமினா ச இத³ஞ்ச இத³ஞ்ச கதங், எத்தகங் த³ண்ட³ங் க³ண்ஹதா²’’தி ஸயங் த³ண்டா³பனே பன அஸ்ஸ த³ண்ட³ஸ்ஸ அக்³க⁴பே⁴தே³ன பாராஜிகது²ல்லச்சயது³க்கடா ஞெய்யாதி அத்தோ².
358.Uddissa yācaneti ettha (pāci. aṭṭha. 679) ‘‘amhākaṃ vihāre itthannāmena idañcidañca kata’’nti vā ‘‘karissantī’’ti vā evaṃ uddissa rakkhaṃ yācaneti attho. Ñatvāñatvā vāti evaṃ ‘‘amhehi yāciyamānā imesaṃ daṇḍessantī’’ti tesaṃ daṇḍinaṃ ñatvā vā añatvā vāti attho. Tehi pana daṇḍite so daṇḍo uddissa yācantānaṃ gīvāva bhaṇḍadeyyaṃ hoti evāti attho. ‘‘Iminā ca iminā ca idañca idañca kataṃ, ettakaṃ daṇḍaṃ gaṇhathā’’ti sayaṃ daṇḍāpane pana assa daṇḍassa agghabhedena pārājikathullaccayadukkaṭā ñeyyāti attho.
359. அனத்தா²ய அஸ்ஸ சோரஸ்ஸ பா⁴ஸிதேதி ஸம்ப³ந்தோ⁴. ராஜராஜமஹாமத்தாதீ³ஹி தஸ்ஸ சோரஸ்ஸ த³ண்ட³ங் க³ண்ஹந்தே அஸ்ஸ பி⁴க்கு²ஸ்ஸ தத்தகங் கீ³வாதி அத்தோ².
359. Anatthāya assa corassa bhāsiteti sambandho. Rājarājamahāmattādīhi tassa corassa daṇḍaṃ gaṇhante assa bhikkhussa tattakaṃ gīvāti attho.
360. விகா⁴ஸங் (பாசி॰ 825-826) வா உச்சாரங் வா ஸங்காரங் வா முத்தங் வா பாகாரகுட்டானங் ப³ஹி ச²ட்³டெ³ய்ய, து³க்கடந்தி அத்தோ². வளஞ்ஜே நாவலோகியாதி இமினாவ அவளஞ்ஜனகாலே நாவலோகெத்வா ச²ட்³டே³துங் வட்டதீதி தீ³பேதி. ந கேவலங் தத்தே²வ, அத² கோ² ஹரிதே வாபி வீஹாதி³னாளிகேராதி³ரோபிமே ச²ட்³டெ³ந்தஸ்ஸ து³க்கடமேவாதி அத்தோ².
360. Vighāsaṃ (pāci. 825-826) vā uccāraṃ vā saṅkāraṃ vā muttaṃ vā pākārakuṭṭānaṃ bahi chaḍḍeyya, dukkaṭanti attho. Vaḷañje nāvalokiyāti imināva avaḷañjanakāle nāvaloketvā chaḍḍetuṃ vaṭṭatīti dīpeti. Na kevalaṃ tattheva, atha kho harite vāpi vīhādināḷikerādiropime chaḍḍentassa dukkaṭamevāti attho.
361. ‘‘உபஹாரங் கரோமா’’தி வுத்தேதி புச்சி²தேதி அதி⁴ப்பாயோ.
361.‘‘Upahāraṃ karomā’’ti vutteti pucchiteti adhippāyo.
362. கீளத்த²ங் (பாசி॰ 979; பாசி॰ அட்ட²॰ 978) கதங் ராஜாகா³ரங் வா பொக்க²ரணிங் வா உய்யானங் வா சித்தாகா³ரங் வா ஆராமங் வா த³ட்டு²ங் க³ச்ச²தோ பதே³ பதே³ து³க்கடந்தி அத்தோ².
362. Kīḷatthaṃ (pāci. 979; pāci. aṭṭha. 978) kataṃ rājāgāraṃ vā pokkharaṇiṃ vā uyyānaṃ vā cittāgāraṃ vā ārāmaṃ vā daṭṭhuṃ gacchato pade pade dukkaṭanti attho.
363. ஆஸனேன (சூளவ॰ 364) நவே ந படிபா³ஹெய்ய, உண்ஹே (மஹாவ॰ 67, 78, 79; சூளவ॰ 376, 378, 380, 382) சீவரங் ந நித³ஹெய்ய. கு³ருனாதி ஆசரியாதி³னா பணாமிதோ க²மாபெய்யாதி ஸம்ப³ந்தோ⁴.
363. Āsanena (cūḷava. 364) nave na paṭibāheyya, uṇhe (mahāva. 67, 78, 79; cūḷava. 376, 378, 380, 382) cīvaraṃ na nidaheyya. Gurunāti ācariyādinā paṇāmito khamāpeyyāti sambandho.
364. ஆபத்தீஹி ச ஸத்தஹீதி (வஜிர॰ டீ॰ பாசித்திய 26) ஸத்தஹி ஆபத்தீஹி பி⁴க்கு²ங் பரம்முகா² அக்கோஸனேன ச ‘‘அஸ்ஸத்³தோ⁴ அப்பஸன்னோ பீ³ஜபோ⁴ஜீ’’திஆதி³னா அஞ்ஞேனேவ வா அக்கோஸனேன ச து³க்கடந்தி அதி⁴ப்பாயோ.
364.Āpattīhi ca sattahīti (vajira. ṭī. pācittiya 26) sattahi āpattīhi bhikkhuṃ parammukhā akkosanena ca ‘‘assaddho appasanno bījabhojī’’tiādinā aññeneva vā akkosanena ca dukkaṭanti adhippāyo.
365. ஸத்³தா⁴தெ³ய்யங் (மஹாவ॰ அட்ட²॰ 361) சீவரங் வா பிண்ட³பாதங் வாதி அத்தோ². ‘‘ந பி⁴க்க²வே ஸத்³தா⁴தெ³ய்யங் வினிபாதேதப்³ப³ங். யோ வினிபாதெய்ய, ஆபத்தி து³க்கடஸ்ஸா’’தி (மஹாவ॰ 361) ஹி வுத்தங். ‘‘அனுஜானாமி, பி⁴க்க²வே, மாதாபிதூனங் தா³து’’ந்தி (மஹாவ॰ 361) வுத்தத்தா ‘‘லப்³ப⁴ங் பிதூன’’ந்தி வுத்தங்.
365. Saddhādeyyaṃ (mahāva. aṭṭha. 361) cīvaraṃ vā piṇḍapātaṃ vāti attho. ‘‘Na bhikkhave saddhādeyyaṃ vinipātetabbaṃ. Yo vinipāteyya, āpatti dukkaṭassā’’ti (mahāva. 361) hi vuttaṃ. ‘‘Anujānāmi, bhikkhave, mātāpitūnaṃ dātu’’nti (mahāva. 361) vuttattā ‘‘labbhaṃ pitūna’’nti vuttaṃ.
366. வஸ்ஸங்வுத்தோ² அஞ்ஞத்ராதி ஸம்ப³ந்தோ⁴, அஞ்ஞஸ்மிங் விஹாரேதி அத்தோ². அஞ்ஞதோதி அஞ்ஞவிஹாரதோ. ‘‘ந பி⁴க்க²வே அஞ்ஞத்ர வஸ்ஸங்வுத்தே²ன அஞ்ஞத்ர சீவரபா⁴கோ³ ஸாதி³தப்³போ³. யோ ஸாதி³யெய்ய, ஆபத்தி து³க்கடஸ்ஸா’’தி (மஹாவ॰ 364) ஹி வுத்தங். தேஸந்தி தஸ்மிங் விஹாரே தங் சீவரங் பா⁴ஜெத்வா க³ண்ஹிதுங் யுத்தானங் பி⁴க்கூ²னங் து⁴ரனிக்கே²பதோ ஹோதி ப⁴ண்ட³க்³கே⁴ன காரியோதி அத்தோ².
366. Vassaṃvuttho aññatrāti sambandho, aññasmiṃ vihāreti attho. Aññatoti aññavihārato. ‘‘Na bhikkhave aññatra vassaṃvutthena aññatra cīvarabhāgo sāditabbo. Yo sādiyeyya, āpatti dukkaṭassā’’ti (mahāva. 364) hi vuttaṃ. Tesanti tasmiṃ vihāre taṃ cīvaraṃ bhājetvā gaṇhituṃ yuttānaṃ bhikkhūnaṃ dhuranikkhepato hoti bhaṇḍagghena kāriyoti attho.
367. ஸஹ அந்தரேன உத்தரோதி ஸந்தருத்தரோ, கா³மங் ந பவிஸெய்யாதி அத்தோ². ‘‘ந பி⁴க்க²வே ஸந்தருத்தரேன கா³மோ பவிஸிதப்³போ³. யோ பவிஸெய்ய, ஆபத்தி து³க்கடஸ்ஸா’’தி (மஹாவ॰ 362) ஹி வுத்தங். கல்லோ வாதி அகி³லானோ. ஸஉபாஹனோ கா³மங் ந பவிஸெய்யாதி ஸம்ப³ந்தோ⁴. ‘‘ந பி⁴க்க²வே சாமரிபீ³ஜனீ தா⁴ரேதப்³பா³. யோ தா⁴ரெய்ய, ஆபத்தி து³க்கடஸ்ஸா’’தி (சூளவ॰ 269), ‘‘அனுஜானாமி, பி⁴க்க²வே, திஸ்ஸோ பீ³ஜனியோ வாகமயங் உஸீரமயங் மோரபிஞ்ச²மய’’ந்தி (சூளவ॰ 269) ச வுத்தத்தா ‘‘ந தா⁴ரெய்ய சாமரீமகஸபீ³ஜனி’’ந்தி வுத்தங். மகஸபீ³ஜனீ பன த³ந்தவிஸாணதா³ருத³ண்ட³காபி வட்டதி.
367. Saha antarena uttaroti santaruttaro, gāmaṃ na paviseyyāti attho. ‘‘Na bhikkhave santaruttarena gāmo pavisitabbo. Yo paviseyya, āpatti dukkaṭassā’’ti (mahāva. 362) hi vuttaṃ. Kallo vāti agilāno. Saupāhano gāmaṃ na paviseyyāti sambandho. ‘‘Na bhikkhave cāmaribījanī dhāretabbā. Yo dhāreyya, āpatti dukkaṭassā’’ti (cūḷava. 269), ‘‘anujānāmi, bhikkhave, tisso bījaniyo vākamayaṃ usīramayaṃ morapiñchamaya’’nti (cūḷava. 269) ca vuttattā ‘‘na dhāreyya cāmarīmakasabījani’’nti vuttaṃ. Makasabījanī pana dantavisāṇadārudaṇḍakāpi vaṭṭati.
368. ஆராமதோ ப³ஹீதி ஸம்ப³ந்தோ⁴. ‘‘ந பி⁴க்க²வே ச²த்தங் தா⁴ரேதப்³ப³ங். யோ தா⁴ரெய்ய, ஆபத்தி து³க்கடஸ்ஸா’’தி, ‘‘அனுஜானாமி, பி⁴க்க²வே, கி³லானஸ்ஸ ச²த்த’’ந்தி ச வுத்தத்தா அகி³லானோ ஆராமதோ ப³ஹி ந லப⁴தி, சீவரகு³த்தியாதி³அத்தா²ய அகி³லானோபி லப⁴தீதி அத்தோ².
368. Ārāmato bahīti sambandho. ‘‘Na bhikkhave chattaṃ dhāretabbaṃ. Yo dhāreyya, āpatti dukkaṭassā’’ti, ‘‘anujānāmi, bhikkhave, gilānassa chatta’’nti ca vuttattā agilāno ārāmato bahi na labhati, cīvaraguttiyādiatthāya agilānopi labhatīti attho.
369. கா³ஹெய்ய நுப⁴தோகாஜந்தி ந கா³ஹெய்ய உப⁴தோகாஜங். ஏகந்தரிககாஜகந்தி ஏகதோகாஜஞ்ச அந்தரகாஜஞ்ச . ஸீஸபா⁴ரோ ச க²ந்த⁴பா⁴ரோ ச கடிபா⁴ரோ ச ஸீஸக்க²ந்த⁴கடிபா⁴ரா. ‘‘ந பி⁴க்க²வே உப⁴தோகாஜங் ஹரிதப்³ப³ங். யோ ஹரெய்ய, ஆபத்தி து³க்கடஸ்ஸா’’தி (சூளவ॰ 281), ‘‘அனுஜானாமி, பி⁴க்க²வே, ஏகதோகாஜங் அந்தரகாஜங் ஸீஸபா⁴ரங் க²ந்த⁴பா⁴ரங் கடிபா⁴ரங் ஓலம்ப³க’’ந்தி (சூளவ॰ 281) ச வுத்தத்தா உப⁴தோகாஜமேவ ந வட்டதி, ஸேஸானி வட்டந்தீதி வேதி³தப்³பா³.
369.Gāheyya nubhatokājanti na gāheyya ubhatokājaṃ. Ekantarikakājakanti ekatokājañca antarakājañca . Sīsabhāro ca khandhabhāro ca kaṭibhāro ca sīsakkhandhakaṭibhārā. ‘‘Na bhikkhave ubhatokājaṃ haritabbaṃ. Yo hareyya, āpatti dukkaṭassā’’ti (cūḷava. 281), ‘‘anujānāmi, bhikkhave, ekatokājaṃ antarakājaṃ sīsabhāraṃ khandhabhāraṃ kaṭibhāraṃ olambaka’’nti (cūḷava. 281) ca vuttattā ubhatokājameva na vaṭṭati, sesāni vaṭṭantīti veditabbā.
370. அனோகாஸகதந்தி (மஹாவ॰ 153) யோ பட²மமேவ ‘‘கரோஹி மே ஆவுஸோ ஓகாஸங், அஹங் தங் வத்துகாமோ’’தி ஏவங் அகதோகாஸங் ஆபத்தியா சோதெ³ய்ய, தஸ்ஸ து³க்கடங் ஹோதீதி அத்தோ². ததா²தி து³க்கடமேவாதி அத்தோ².
370.Anokāsakatanti (mahāva. 153) yo paṭhamameva ‘‘karohi me āvuso okāsaṃ, ahaṃ taṃ vattukāmo’’ti evaṃ akatokāsaṃ āpattiyā codeyya, tassa dukkaṭaṃ hotīti attho. Tathāti dukkaṭamevāti attho.
371. பகதங்கு³லேன, ந ஸுக³தங்கு³லேனாதி அத்தோ².
371.Pakataṅgulena, na sugataṅgulenāti attho.
372. மூக³ப்³ப³தாதி³ங் (மஹாவ॰ 209; மஹாவ॰ அட்ட²॰ 209) தித்தி²யப்³ப³தங் யதி³ க³ண்ஹெய்ய, து³க்கடந்தி அத்தோ². ஆதி³-ஸத்³தே³ன கோ³வதகுக்குரவதாத³யோ ஸங்க³ஹிதா. ததா²தி (மஹாவ॰ 303; மஹாவ॰ அட்ட²॰ 303) ந்ஹாபிதபுப்³ப³கோ கு²ரப⁴ண்ட³ங் யதி³ பரிஹரெய்ய, து³க்கடமேவாதி அத்தோ².
372. Mūgabbatādiṃ (mahāva. 209; mahāva. aṭṭha. 209) titthiyabbataṃ yadi gaṇheyya, dukkaṭanti attho. Ādi-saddena govatakukkuravatādayo saṅgahitā. Tathāti (mahāva. 303; mahāva. aṭṭha. 303) nhāpitapubbako khurabhaṇḍaṃ yadi parihareyya, dukkaṭamevāti attho.
373. யங் கிஞ்சீதி (கங்கா²॰ அட்ட²॰ குடிகாரஸிக்கா²பத³வண்ணனா) ந்ஹாபிததுண்ணகாரகம்மாதி³ யங் கிஞ்சி ஹத்த²கம்மந்தி அத்தோ². தத³னுஸாரதோதி ஹத்த²கம்மயாசனானுஸாரதோதி அத்தோ². ஸசே ஏவங் யாசதோ ஹத்த²கம்மமூலமேவ தே³தி, தங் அஞ்ஞஸ்ஸ தா³பெத்வா காரேதுங் வட்டதீதி அத்தோ². நிக்கம்மங் பன ஹத்த²கம்மவஸேன அயாசித்வாபி ‘‘ஏஹி இமங் கரோஹீ’’தி காரேதுங் கப்பதீதி அத்தோ². யங் கிஞ்சிபரஸந்தகந்தி யங் கிஞ்சி தா³ருதிணாதி³கங் அபரஸந்தகங் அபரிக்³க³ஹிதங் ஆஹராபேதுங் கப்பதீதி அதி⁴ப்பாயோ.
373.Yaṃ kiñcīti (kaṅkhā. aṭṭha. kuṭikārasikkhāpadavaṇṇanā) nhāpitatuṇṇakārakammādi yaṃ kiñci hatthakammanti attho. Tadanusāratoti hatthakammayācanānusāratoti attho. Sace evaṃ yācato hatthakammamūlameva deti, taṃ aññassa dāpetvā kāretuṃ vaṭṭatīti attho. Nikkammaṃ pana hatthakammavasena ayācitvāpi ‘‘ehi imaṃ karohī’’ti kāretuṃ kappatīti attho. Yaṃ kiñciparasantakanti yaṃ kiñci dārutiṇādikaṃ aparasantakaṃ apariggahitaṃ āharāpetuṃ kappatīti adhippāyo.
374. கி³ஹீனந்தி கி³ஹீனங் ஸந்தகங். கோ³பகேதி ரக்க²கே. யத்தகங் தே³தி, தத்தகங் க³ஹேதுங் கப்பதீதி அத்தோ². யதா²பரிச்சே²த³ந்தி ‘‘தி³வஸே தி³வஸே எத்தகங் உச்சு²னாளிகேரங் அம்ப³பக்கங் தும்ஹே கா²த³தா²’’தி பரிச்சி²ந்தி³த்வா தி³ன்னமேவ தேஸு தெ³ந்தேஸு லப்³ப⁴தீதி அத்தோ².
374.Gihīnanti gihīnaṃ santakaṃ. Gopaketi rakkhake. Yattakaṃ deti, tattakaṃ gahetuṃ kappatīti attho. Yathāparicchedanti ‘‘divase divase ettakaṃ ucchunāḷikeraṃ ambapakkaṃ tumhe khādathā’’ti paricchinditvā dinnameva tesu dentesu labbhatīti attho.
375. த்³விஹாபஜ்ஜெய்யாதி த்³வீஹி ஆபஜ்ஜெய்ய. கதமேஹி த்³வீஹீதி சே, தே த³ஸ்ஸேதுங் ‘‘காயவாசாஹீ’’தி வுத்தங், ‘‘த்³வீஹாகாரேஹி ஆபத்திங் ஆபஜ்ஜதி, காயேன ஆபஜ்ஜதி, வாசாய ஆபஜ்ஜதீ’’தி (பரி॰ 322) ஹி வுத்தங். காயவாசாஹி ஆபத்திங் ஆபஜ்ஜந்தோ ச ச²ஹி ஆகாரேஹி ஆபத்திங் ஆபஜ்ஜதி, தானி த³ஸ்ஸேதுங் ‘‘அலஜ்ஜிஞாணகுக்குச்சபகதத்தா’’திஆதி³மாஹ. எத்த² (பரி॰ 295) பன அகப்பியபா⁴வங் ஜானந்தோ ஏவ வீதிக்கமங் கரொந்தோ அலஜ்ஜிதாய ஆபஜ்ஜதி நாம. கப்பியாகப்பியங் அஜானித்வா ஆபஜ்ஜந்தோ அஞ்ஞாணதாய. கப்பியங் நு கோ², நோ நு கோ²’’தி ஸங்ஸயே உப்பன்னே தமபி⁴விதரித்வா வீதிக்கமங் கரொந்தோ குக்குச்சபகதத்தா ஆபஜ்ஜதி. ஸஹஸெய்யாதி³ங் ஆபஜ்ஜந்தோ ஸதிப்லவா, ஸதிஸம்மோஸாதி அத்தோ². அச்ச²மங்ஸங் ‘‘ஸூகரமங்ஸ’’ந்தி வா ஸூகரமங்ஸங் ‘‘அச்ச²மங்ஸ’’ந்தி வா கா²த³ந்தோ அகப்பியே கப்பியஸஞ்ஞிதாய ச கப்பியே அகப்பியஸஞ்ஞிதாய ச ஆபஜ்ஜதீதி வேதி³தப்³போ³.
375.Dvihāpajjeyyāti dvīhi āpajjeyya. Katamehi dvīhīti ce, te dassetuṃ ‘‘kāyavācāhī’’ti vuttaṃ, ‘‘dvīhākārehi āpattiṃ āpajjati, kāyena āpajjati, vācāya āpajjatī’’ti (pari. 322) hi vuttaṃ. Kāyavācāhi āpattiṃ āpajjanto ca chahi ākārehi āpattiṃ āpajjati, tāni dassetuṃ ‘‘alajjiñāṇakukkuccapakatattā’’tiādimāha. Ettha (pari. 295) pana akappiyabhāvaṃ jānanto eva vītikkamaṃ karonto alajjitāya āpajjati nāma. Kappiyākappiyaṃ ajānitvā āpajjanto aññāṇatāya. Kappiyaṃ nu kho, no nu kho’’ti saṃsaye uppanne tamabhivitaritvā vītikkamaṃ karonto kukkuccapakatattā āpajjati. Sahaseyyādiṃ āpajjanto satiplavā, satisammosāti attho. Acchamaṃsaṃ ‘‘sūkaramaṃsa’’nti vā sūkaramaṃsaṃ ‘‘acchamaṃsa’’nti vā khādanto akappiye kappiyasaññitāya ca kappiye akappiyasaññitāya ca āpajjatīti veditabbo.
376. அலஜ்ஜிதாய வா அஞ்ஞாணதாய வா ஆபத்திங் காயவாசாஹி சா²த³யேதி அத்தோ². ஏகே வா ஏகஸ்மிங் வா. லிங்கே³தி லிங்க³பரிவத்தனதோ. ஏவங் சதுதா⁴ ஆபத்திவுட்டா²னங் ஹோதீதி அத்தோ². திணவத்தா²ரகஸமத²அப்³பா⁴னாதீ³னங் வஸேன ஸங்கே⁴ ஆபத்தி வுட்டா²தீதி வேதி³தப்³ப³ங் நிஸ்ஸஜ்ஜனாதீ³ஸு க³ணே. ஏகஸ்ஸ ஸந்திகே வுட்டா²னங் பாகடமேவ. ‘‘யா ஆபத்தியோ பி⁴க்கூ²னங் பி⁴க்கு²னீஹி அஸாதா⁴ரணா, தாஹி ஆபத்தீஹி அனாபத்தீ’’தி (பாரா॰ 69) வசனதோ லிங்க³பரிவத்தனே ஆபத்திவுட்டா²னங் ஞாதப்³ப³ங்.
376. Alajjitāya vā aññāṇatāya vā āpattiṃ kāyavācāhi chādayeti attho. Eke vā ekasmiṃ vā. Liṅgeti liṅgaparivattanato. Evaṃ catudhā āpattivuṭṭhānaṃ hotīti attho. Tiṇavatthārakasamathaabbhānādīnaṃ vasena saṅghe āpatti vuṭṭhātīti veditabbaṃ nissajjanādīsu gaṇe. Ekassa santike vuṭṭhānaṃ pākaṭameva. ‘‘Yā āpattiyo bhikkhūnaṃ bhikkhunīhi asādhāraṇā, tāhi āpattīhi anāpattī’’ti (pārā. 69) vacanato liṅgaparivattane āpattivuṭṭhānaṃ ñātabbaṃ.
377. பச்சயத்³வயேதி சீவரே ச பிண்ட³பாதே ச. ந கேவலஞ்ச இமே ஏவ, நிமித்தகம்மம்பி ந லப்³ப⁴தேவ, கா³தா²ப³ந்த⁴ஸுக²த்த²ங் பன ந வுத்தங். தத்த² நிமித்தகம்மங் நாம யங் கிஞ்சி பரேஸங் பச்சயதா³னஸங்யோஜனகங் காயவசீகம்மங். கா²த³னீயங் க³ஹெத்வா க³ச்ச²ந்தே தி³ஸ்வா ‘‘கிங் கா²த³னீயங் லபி⁴த்தா²’’திஆதி³னா நயேன தஸ்ஸ பவத்தி வேதி³தப்³பா³. பரிகதா² நாம யதா² யதா² தங் லப⁴தி, ததா² ததா² பரிவத்தெத்வா கத²னங். ‘‘ஏதரஹி பி⁴க்கூ² பிண்ட³பாதேன கிலமந்தீ’’திஆதி³னா நயேன தஸ்ஸ பவத்தி வேதி³தப்³பா³. ஓபா⁴ஸோ நாம பச்சயப்படிஸங்யுத்தகதா². விஞ்ஞத்தி பன பாகடா ஏவ. ததியேதி ஸேனாஸனே. ஸேனாஸனே பன நிமித்தோபா⁴ஸபரிகதா² வட்டந்தி, விஞ்ஞத்தி ஏவ ஏகா ந வட்டதி. தத்த² நிமித்தகம்மங் நாம உபாஸகே தி³ஸ்வா ஸேனாஸனத்த²ங் பூ⁴மிபரிகம்மகரணாதி³. ஓபா⁴ஸோ நாம ‘‘உபாஸகா, தும்ஹே குஹிங் வஸதா²’’தி ‘‘பாஸாதே³, ப⁴ந்தே’’தி வுத்தே ‘‘கிங் பி⁴க்கூ²னங் பாஸாதோ³ ந வட்டதீ’’திஆதி³கங் வசனங். பரிகதா² நாம ‘‘பி⁴க்கூ²னங் ஸேனாஸனங் ஸம்பா³த⁴’’ந்தி வசனங். ஸேஸேதி கி³லானபச்சயே.
377.Paccayadvayeti cīvare ca piṇḍapāte ca. Na kevalañca ime eva, nimittakammampi na labbhateva, gāthābandhasukhatthaṃ pana na vuttaṃ. Tattha nimittakammaṃ nāma yaṃ kiñci paresaṃ paccayadānasaṃyojanakaṃ kāyavacīkammaṃ. Khādanīyaṃ gahetvā gacchante disvā ‘‘kiṃ khādanīyaṃ labhitthā’’tiādinā nayena tassa pavatti veditabbā. Parikathā nāma yathā yathā taṃ labhati, tathā tathā parivattetvā kathanaṃ. ‘‘Etarahi bhikkhū piṇḍapātena kilamantī’’tiādinā nayena tassa pavatti veditabbā. Obhāso nāma paccayappaṭisaṃyuttakathā. Viññatti pana pākaṭā eva. Tatiyeti senāsane. Senāsane pana nimittobhāsaparikathā vaṭṭanti, viññatti eva ekā na vaṭṭati. Tattha nimittakammaṃ nāma upāsake disvā senāsanatthaṃ bhūmiparikammakaraṇādi. Obhāso nāma ‘‘upāsakā, tumhe kuhiṃ vasathā’’ti ‘‘pāsāde, bhante’’ti vutte ‘‘kiṃ bhikkhūnaṃ pāsādo na vaṭṭatī’’tiādikaṃ vacanaṃ. Parikathā nāma ‘‘bhikkhūnaṃ senāsanaṃ sambādha’’nti vacanaṃ. Seseti gilānapaccaye.
378. ந ருஹதீதி ந ஹோதி. அச்சயே தா³னந்தி அச்சயதா³னங். பஞ்சஸு ஸஹத⁴ம்மிகேஸு யேன கேனசி காலங் கரொந்தேன ‘‘மமச்சயேன மய்ஹங் பரிக்கா²ரோ உபஜ்ஜா²யஸ்ஸ ஹோது, ஆசரியஸ்ஸ ஹோது, அஞ்ஞஸ்ஸ வா கஸ்ஸசி ஹோதூ’’தி வுத்தே தேஸங் ந ஹோதி, தஸ்மா வுத்தங் ‘‘ந ருஹதீ’’தி. ஸங்க⁴ஸ்ஸேவ ச தங் ஹோதீதி யதி³ பி⁴க்கு²ஸாமணேரேஹி ஏவங் வுத்தங், தஸ்மிங் மதேபி பி⁴க்கு²ஸங்க⁴ஸ்ஸேவ ஹோதி, பி⁴க்கு²னிஸிக்க²மானஸாமணேரீஹி சே வுத்தங், தஸ்மிங் மதே பி⁴க்கு²னிஸங்க⁴ஸ்ஸ தங் ஹோதீதி அத்தோ². கி³ஹீனங் பன ரூஹதீதி கி³ஹீனங் பன அச்சயதா³னங் ஏவ ஸப்³பே³ஸங் ருஹதீதி வுத்தங் ஹோதி.
378.Na ruhatīti na hoti. Accaye dānanti accayadānaṃ. Pañcasu sahadhammikesu yena kenaci kālaṃ karontena ‘‘mamaccayena mayhaṃ parikkhāro upajjhāyassa hotu, ācariyassa hotu, aññassa vā kassaci hotū’’ti vutte tesaṃ na hoti, tasmā vuttaṃ ‘‘na ruhatī’’ti. Saṅghasseva ca taṃ hotīti yadi bhikkhusāmaṇerehi evaṃ vuttaṃ, tasmiṃ matepi bhikkhusaṅghasseva hoti, bhikkhunisikkhamānasāmaṇerīhi ce vuttaṃ, tasmiṃ mate bhikkhunisaṅghassa taṃ hotīti attho. Gihīnaṃ pana rūhatīti gihīnaṃ pana accayadānaṃ eva sabbesaṃ ruhatīti vuttaṃ hoti.
379. உபஸ்ஸயேதி பி⁴க்கு²னிவிஹாரே. தா³யஜ்ஜோதி தஸ்ஸ பரிக்கா²ரஸ்ஸ தா³யஜ்ஜோ. ஸேஸேபீதி ஸசே பி⁴க்கு²னிஸிக்க²மானஸாமணேரியோ பி⁴க்கு²விஹாரே காலங் கரொந்தி, தாஸங் பரிக்கா²ரானங் பி⁴க்கு²ஸங்கோ⁴வ தா³யஜ்ஜோதி அத்தோ².
379.Upassayeti bhikkhunivihāre. Dāyajjoti tassa parikkhārassa dāyajjo. Sesepīti sace bhikkhunisikkhamānasāmaṇeriyo bhikkhuvihāre kālaṃ karonti, tāsaṃ parikkhārānaṃ bhikkhusaṅghova dāyajjoti attho.
380. புரிமஸ்ஸேவாதி எத்த² ‘‘இமங் பரிக்கா²ரங் நெத்வா அஸுகஸ்ஸ தே³ஹீ’’தி தி³ன்னங் புரிமஸ்ஸேவ ஹோதீதி அத்தோ². ‘‘அஸுகஸ்ஸ த³ம்மீ’’தி தி³ன்னங் பன பச்சி²மஸ்ஸேவ ஹோதி பரிச்சஜித்வா தி³ன்னத்தா. இமங் விதி⁴ங் ஞத்வாவ விஸ்ஸாஸக்³கா³ஹங் வா க³ண்ஹெய்ய, மதகசீவரங் வா அதி⁴ட்டே²தி ஸம்ப³ந்தோ⁴. மதகசீவரஅதி⁴ட்டா²னங் நாம க⁴ண்டிங் பஹரித்வா காலங் கோ⁴ஸெத்வா தோ²கங் ஆக³மெத்வா ஸசே பி⁴க்கூ² ஆக³ச்ச²ந்தி, தேஹி ஸத்³தி⁴ங் பா⁴ஜேதப்³பா³னி, நோ சே ஆக³ச்ச²ந்தி, ‘‘மய்ஹிமானி சீவரானி பாபுணந்தீ’’தி அதி⁴ட்டா²தப்³பா³னி. ஏவங் அதி⁴ட்டி²தே ஸப்³பா³னி தஸ்ஸேவ ஹொந்தி, டி²திகா பன ந திட்ட²தி. ஸசே ஏகேகங் உத்³த⁴ரித்வா ‘‘அயங் பட²மபா⁴கோ³ மய்ஹங் பாபுணாதி, அயங் து³தியபா⁴கோ³’’தி ஏவங் க³ண்ஹாதி, க³ஹிதானி ச ஸுக³ஹிதானி ஹொந்தி, டி²திகா ச திட்ட²தி. ஏவங் பாபெத்வா க³ண்ஹந்தேனாபி அதி⁴ட்டி²தமேவ ஹோதி.
380.Purimassevāti ettha ‘‘imaṃ parikkhāraṃ netvā asukassa dehī’’ti dinnaṃ purimasseva hotīti attho. ‘‘Asukassa dammī’’ti dinnaṃ pana pacchimasseva hoti pariccajitvā dinnattā. Imaṃ vidhiṃ ñatvāva vissāsaggāhaṃ vā gaṇheyya, matakacīvaraṃ vā adhiṭṭheti sambandho. Matakacīvaraadhiṭṭhānaṃ nāma ghaṇṭiṃ paharitvā kālaṃ ghosetvā thokaṃ āgametvā sace bhikkhū āgacchanti, tehi saddhiṃ bhājetabbāni, no ce āgacchanti, ‘‘mayhimāni cīvarāni pāpuṇantī’’ti adhiṭṭhātabbāni. Evaṃ adhiṭṭhite sabbāni tasseva honti, ṭhitikā pana na tiṭṭhati. Sace ekekaṃ uddharitvā ‘‘ayaṃ paṭhamabhāgo mayhaṃ pāpuṇāti, ayaṃ dutiyabhāgo’’ti evaṃ gaṇhāti, gahitāni ca sugahitāni honti, ṭhitikā ca tiṭṭhati. Evaṃ pāpetvā gaṇhantenāpi adhiṭṭhitameva hoti.
381. லோஹப⁴ண்டே³ பஹரணிங் ட²பெத்வா ஸப்³ப³ங் கப்பதி, தா³ருப⁴ண்டே³ ச தா³ருஜங் பத்தஞ்ச பாது³கஞ்ச, பல்லங்கஞ்ச ஆஸந்தி³ஞ்ச ட²பெத்வா ஸப்³ப³ங் கப்பதி, மத்திகாமயே கதகஞ்ச கும்ப⁴காரிகஞ்ச ட²பெத்வா ஸப்³ப³ங் கப்பதீதி அத்தோ². ‘‘அனுஜானாமி, பி⁴க்க²வே, ட²பெத்வா பஹரணிங் ஸப்³ப³ங் லோஹப⁴ண்ட³ங், ட²பெத்வா ஆஸந்தி³ங் பல்லங்கங் தா³ருபத்தங் தா³ருபாது³கங் ஸப்³ப³ங் தா³ருப⁴ண்ட³ங், ட²பெத்வா கதகஞ்ச கும்ப⁴காரிகஞ்ச ஸப்³ப³ங் மத்திகாப⁴ண்ட³’’ந்தி (சூளவ॰ 293) ஹி வுத்தங். எத்த² கதகந்தி பது³மகண்ணிகாகாரேன கதமல்லகந்தி அதி⁴ப்பேதங். த⁴னியஸ்ஸேவ ஸப்³ப³மத்திகாமயா குடி கும்ப⁴காரிகந்தி. பகிண்ணகவினிச்ச²யோ.
381. Lohabhaṇḍe paharaṇiṃ ṭhapetvā sabbaṃ kappati, dārubhaṇḍe ca dārujaṃ pattañca pādukañca, pallaṅkañca āsandiñca ṭhapetvā sabbaṃ kappati, mattikāmaye katakañca kumbhakārikañca ṭhapetvā sabbaṃ kappatīti attho. ‘‘Anujānāmi, bhikkhave, ṭhapetvā paharaṇiṃ sabbaṃ lohabhaṇḍaṃ, ṭhapetvā āsandiṃ pallaṅkaṃ dārupattaṃ dārupādukaṃ sabbaṃ dārubhaṇḍaṃ, ṭhapetvā katakañca kumbhakārikañca sabbaṃ mattikābhaṇḍa’’nti (cūḷava. 293) hi vuttaṃ. Ettha katakanti padumakaṇṇikākārena katamallakanti adhippetaṃ. Dhaniyasseva sabbamattikāmayā kuṭi kumbhakārikanti. Pakiṇṇakavinicchayo.
பகிண்ணகனித்³தே³ஸவண்ணனா நிட்டி²தா.
Pakiṇṇakaniddesavaṇṇanā niṭṭhitā.
