| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
41. பகிண்ணகனித்³தே³ஸவண்ணனா
41. Pakiṇṇakaniddesavaṇṇanā
335. ஸத்³வாரப³ந்த⁴னே ஸோது³க்க²லகபாஸகே டா²னே தி³வா ஸயந்தேன பரிவத்தகங் த்³வாரங் ப³ந்தெ⁴ய்யாதி ஸம்ப³ந்தோ⁴. த்³வாரஞ்ச த்³வாரப³ந்த⁴னஞ்ச த்³வாரப³ந்த⁴னானி மஜ்ஜே²பத³லோபவஸேன, ப³ந்த⁴ன-ஸத்³தே³னேவ வா த்³வாரபா³ஹா வுச்சந்தி, ஸஹ த்³வாரப³ந்த⁴னேஹீதி ஸத்³வாரப³ந்த⁴னங், டா²னங். ஹெட்டா² உது³க்க²லகஞ்ச உபரி பாஸகோ ச, ஸஹ உது³க்க²லபாஸகேஹீதி ஸமாஸோ. தாதி³ஸே டா²னே பாகாராதி³பரிக்கே²பேன ப⁴விதப்³ப³ந்தி பரிக்கி²த்தேதி விஞ்ஞாயதி. ஸோ ச உச்சதோ ஸஹஸெய்யப்பஹோனகே வுத்தனயோதி வத³ந்தி . ஸயந்தேனாதி பாதே³ பூ⁴மிதோ மோசெத்வா நிபஜ்ஜந்தேன. பரிவத்தகந்தி ஸங்வரணவிவரணவஸேன இதோ சிதோ ச பரிவத்தனயொக்³க³ங். த்³வாரந்தி அந்தமஸோ து³ஸ்ஸஸாணித்³வாரம்பி. ப³ந்தெ⁴ய்யாதி ஸப்³ப³ந்திமேன விதி⁴னா யாவதா ஸீஸங் ந பவிஸதி, தாவதாபி ப³ந்தெ⁴ய்ய, ஸங்வரெய்யாதி வுத்தங் ஹோதி.
335. Sadvārabandhane sodukkhalakapāsake ṭhāne divā sayantena parivattakaṃ dvāraṃ bandheyyāti sambandho. Dvārañca dvārabandhanañca dvārabandhanāni majjhepadalopavasena, bandhana-saddeneva vā dvārabāhā vuccanti, saha dvārabandhanehīti sadvārabandhanaṃ, ṭhānaṃ. Heṭṭhā udukkhalakañca upari pāsako ca, saha udukkhalapāsakehīti samāso. Tādise ṭhāne pākārādiparikkhepena bhavitabbanti parikkhitteti viññāyati. So ca uccato sahaseyyappahonake vuttanayoti vadanti . Sayantenāti pāde bhūmito mocetvā nipajjantena. Parivattakanti saṃvaraṇavivaraṇavasena ito cito ca parivattanayoggaṃ. Dvāranti antamaso dussasāṇidvārampi. Bandheyyāti sabbantimena vidhinā yāvatā sīsaṃ na pavisati, tāvatāpi bandheyya, saṃvareyyāti vuttaṃ hoti.
336. ஆபோ⁴கோ³ சாபீதி ‘‘ஏஸ ஜக்³கி³ஸ்ஸதீ’’தி ஆபோ⁴கோ³ சாபி. ச-ஸத்³தே³ன ‘‘த்³வாரங் ஜக்³கா³ஹீ’’தி வசனம்பி ஸமுச்சினோதி. ஸவஸே தங் ஆகாரங் வினாதி ஸஸ்ஸ அத்தனோ வஸே ஆயத்தே டா²னே, யத்த² பன ப³ஹூனங் ஸஞ்சரணத்தா த்³வாரங் ஸங்வுதம்பி ஸங்வுதட்டா²னே ந திட்ட²தி, த்³வாரங் அலப⁴ந்தா பாகாரங் அபி⁴ருஹித்வாபி விசரந்தி, தாதி³ஸே பரிவேணே ஸங்வரணகிச்சங் நத்தி². அத² வா ஸஸ்ஸ வஸோ ஆயத்தோ, ந யக்கா²தீ³னங் தேஹி க³ஹிதகத்தஸ்ஸ, ப³ந்தி⁴த்வா நிபஜ்ஜாபிதத்தஸ்ஸ ச அபா⁴வேனாதி ஸவஸோ. தஸ்மிங் ஸதி புப்³பே³ வுத்தத்³வாரங் ஸங்வரணஆபோ⁴க³கரணவசனஸங்கா²தங் ஆகாரந்தி அத்தோ².
336.Ābhogo cāpīti ‘‘esa jaggissatī’’ti ābhogo cāpi. Ca-saddena ‘‘dvāraṃ jaggāhī’’ti vacanampi samuccinoti. Savase taṃ ākāraṃ vināti sassa attano vase āyatte ṭhāne, yattha pana bahūnaṃ sañcaraṇattā dvāraṃ saṃvutampi saṃvutaṭṭhāne na tiṭṭhati, dvāraṃ alabhantā pākāraṃ abhiruhitvāpi vicaranti, tādise pariveṇe saṃvaraṇakiccaṃ natthi. Atha vā sassa vaso āyatto, na yakkhādīnaṃ tehi gahitakattassa, bandhitvā nipajjāpitattassa ca abhāvenāti savaso. Tasmiṃ sati pubbe vuttadvāraṃ saṃvaraṇaābhogakaraṇavacanasaṅkhātaṃ ākāranti attho.
337. ரதனானீதி முத்தாதீ³னி த³ஸவிதா⁴னி. தத்த² பன ஜாதிப²லிகங் உபாதா³ய ஸப்³போ³பி மணி வேளுரியோபி லோஹிதங்கோ மஸாரக³ல்லோ ச தோ⁴தாபி அதோ⁴தவித்³தா⁴பி அனாமாஸா, காசமணி ச பானீயஸங்கோ² தோ⁴தோ அதோ⁴தோபி ஆமாஸா, ஸிலா தோ⁴தவித்³தா⁴ ஸுவண்ணேன ஸத்³தி⁴ங் பசிதா முக்³க³வண்ணா ச அனாமாஸா. சேதியக⁴ரகோ³பகானங் ஸுவண்ணசேதியே கசவரமேவ ஹரிதுங் வட்டதி. ஆரகூடலோஹம்பி ஜாதரூபக³திகமேவ. இத்தி²ரூபானீதி அந்தமஸோ பிட்ட²மயஇத்தி²ரூபானிபி. த⁴ஞ்ஞந்தி அந்தமஸோ தத்த²ஜாதகம்பி மக்³கே³ பஸாரிதம்பி ஸத்தவித⁴ங் த⁴ஞ்ஞங். கீளாவஸேன அபரண்ணானி தாலப²லாதீ³னிபி அனாமாஸானி, பஸாரிதம்பி ந மத்³த³ந்தேன க³ந்தப்³ப³ங், அஸதி மக்³கே³ மக்³க³ங் அதி⁴ட்டா²ய க³ந்தப்³ப³ங். இத்தி²பஸாத⁴னந்தி அந்தமஸோ பிளந்த⁴னத்தா²ய ட²பிதங் நிவாஸனதாலபண்ணமுத்³தி³கம்பி.
337.Ratanānīti muttādīni dasavidhāni. Tattha pana jātiphalikaṃ upādāya sabbopi maṇi veḷuriyopi lohitaṅko masāragallo ca dhotāpi adhotaviddhāpi anāmāsā, kācamaṇi ca pānīyasaṅkho dhoto adhotopi āmāsā, silā dhotaviddhā suvaṇṇena saddhiṃ pacitā muggavaṇṇā ca anāmāsā. Cetiyagharagopakānaṃ suvaṇṇacetiye kacavarameva harituṃ vaṭṭati. Ārakūṭalohampi jātarūpagatikameva. Itthirūpānīti antamaso piṭṭhamayaitthirūpānipi. Dhaññanti antamaso tatthajātakampi magge pasāritampi sattavidhaṃ dhaññaṃ. Kīḷāvasena aparaṇṇāni tālaphalādīnipi anāmāsāni, pasāritampi na maddantena gantabbaṃ, asati magge maggaṃ adhiṭṭhāya gantabbaṃ. Itthipasādhananti antamaso piḷandhanatthāya ṭhapitaṃ nivāsanatālapaṇṇamuddikampi.
338. ஸித்த²தேலோத³தேலேஹீதி மது⁴ஸித்த²கனிய்யாஸாதீ³ஸு யேன கேனசி தேலமிஸ்ஸகஸிலேஸேன ச உத³கமிஸ்ஸகதேலேன ச. ப²ணஹத்த²ப²ணேஹீதி ப²ணமிவ ப²ணங், அங்கு³லீஹி ப²ணகிச்சகரணேன ஹத்தோ²யேவ ப²ணங் ஹத்த²ப²ணங், த³ந்தமயாதி³ யங் கிஞ்சி ப²ணஞ்சேவ ஹத்த²ப²ணஞ்சாதி த்³வந்தோ³. ஓஸண்டெ²ய்யாதி ஓலிகி²த்வா ஸன்னிஸீதா³பெய்ய.
338.Sitthatelodatelehīti madhusitthakaniyyāsādīsu yena kenaci telamissakasilesena ca udakamissakatelena ca. Phaṇahatthaphaṇehīti phaṇamiva phaṇaṃ, aṅgulīhi phaṇakiccakaraṇena hatthoyeva phaṇaṃ hatthaphaṇaṃ, dantamayādi yaṃ kiñci phaṇañceva hatthaphaṇañcāti dvando. Osaṇṭheyyāti olikhitvā sannisīdāpeyya.
339. ஏகபாவுரணா வா ஏகத்த²ரணா வா ந துவட்டயுங், ஏகமஞ்சே ந துவட்டயுந்தி யோஜனா. ஏகங் பாவுரணங் ஏகங் அத்த²ரணங் ஏதேஸந்தி விக்³க³ஹோ. ந துவட்டயுந்தி ந நிபஜ்ஜெய்யுங். ஏகஸ்மிங் பா⁴ஜனே வாபி ந பு⁴ஞ்ஜெய்யுந்தி யோஜேதப்³ப³ங்.
339. Ekapāvuraṇā vā ekattharaṇā vā na tuvaṭṭayuṃ, ekamañce na tuvaṭṭayunti yojanā. Ekaṃ pāvuraṇaṃ ekaṃ attharaṇaṃ etesanti viggaho. Na tuvaṭṭayunti na nipajjeyyuṃ. Ekasmiṃ bhājane vāpi na bhuñjeyyunti yojetabbaṃ.
340. மனுஸ்ஸானங் பமாணங்கு³லேன அட்ட² அங்கு³லானி யஸ்ஸ, அதி⁴கேன ஸஹிதங் அட்ட²ங்கு³லந்தி ஸமாஸோ. லஸுணங் மக³தே⁴ஸு ஜாதங் ஆமலகப⁴ண்டி³கங் லஸுணங் ந கா²தெ³ய்யாதி ஸம்ப³ந்தோ⁴. ந அகல்லகோதி அகி³லானோ.
340. Manussānaṃ pamāṇaṅgulena aṭṭha aṅgulāni yassa, adhikena sahitaṃ aṭṭhaṅgulanti samāso. Lasuṇaṃ magadhesu jātaṃ āmalakabhaṇḍikaṃ lasuṇaṃ na khādeyyāti sambandho. Na akallakoti agilāno.
341. ஹீனுக்கட்டே²ஹி ஜாதிஆதீ³ஹி உக்கட்ட²ங் வா ஹீனங் வா உஜுங் வா அஞ்ஞாபதே³ஸேன வா த³வா வதே³, து³ப்³பா⁴ஸிதந்தி ஸம்ப³ந்தோ⁴. ஜாதிஆதீ³ஹீதி ஜாதினாமகொ³த்தகம்மஸிப்பஆபா³த⁴லிங்க³கிலேஸஆபத்திஅக்கோஸேஹி . உக்கட்ட²ந்தி ஜாத்யாதீ³ஹியேவ உக்கட்ட²ங் உபஸம்பன்னங் அனுபஸம்பன்னங் வா. த³வாதி கேளிஹஸாதி⁴ப்பாயதாய. உஜுங் வாதி ‘‘சண்டா³லோஸீ’’திஆதி³னா நயேன. அஞ்ஞாபதே³ஸேன வாதி ‘‘ஸந்தி இதே⁴கச்சே சண்டா³லா’’திஆதி³னா நயேன.
341. Hīnukkaṭṭhehi jātiādīhi ukkaṭṭhaṃ vā hīnaṃ vā ujuṃ vā aññāpadesena vā davā vade, dubbhāsitanti sambandho. Jātiādīhīti jātināmagottakammasippaābādhaliṅgakilesaāpattiakkosehi . Ukkaṭṭhanti jātyādīhiyeva ukkaṭṭhaṃ upasampannaṃ anupasampannaṃ vā. Davāti keḷihasādhippāyatāya. Ujuṃ vāti ‘‘caṇḍālosī’’tiādinā nayena. Aññāpadesena vāti ‘‘santi idhekacce caṇḍālā’’tiādinā nayena.
342. தீ³கே⁴ நகே²தி மங்ஸப்பமாணதோ. தீ³கே⁴ கேஸேதி த்³வங்கு³லதோ. ஸசேபி ந தீ³கா⁴, து³மாஸதோ ஏகதி³வஸம்பி அதிக்காமேதுங் ந லப⁴தி. தீ³கே⁴ நாஸலோமேதி நாஸதோ ப³ஹி நிக்க²ந்தே. வீஸதிமட்ட²ந்தி வீஸதியா நகா²னங் மட்ட²ஞ்ச. ஸம்பா³தே⁴தி உபோ⁴ஸு உபகச்ச²கேஸு, முத்தகரணே ச லோமஹாரணஞ்ச ந லப்³பா⁴தி ஸம்ப³ந்த⁴னீயங். ந லப்³பா⁴தி ஏதே மட்டா²த³யோ ந லப்³ப⁴ந்தீதி அத்தோ², நிபாதோ வா லப்³பா⁴தி. ஆபா³த⁴ப்பச்சயா பன ஸம்பா³தே⁴ லோமங் ஸங்ஹரிதுங் வட்டதி.
342.Dīghe nakheti maṃsappamāṇato. Dīghe keseti dvaṅgulato. Sacepi na dīghā, dumāsato ekadivasampi atikkāmetuṃ na labhati. Dīghe nāsalometi nāsato bahi nikkhante. Vīsatimaṭṭhanti vīsatiyā nakhānaṃ maṭṭhañca. Sambādheti ubhosu upakacchakesu, muttakaraṇe ca lomahāraṇañca na labbhāti sambandhanīyaṃ. Na labbhāti ete maṭṭhādayo na labbhantīti attho, nipāto vā labbhāti. Ābādhappaccayā pana sambādhe lomaṃ saṃharituṃ vaṭṭati.
343. ஸங்கு⁴த்³தி³ட்ட²ங் வா ஸங்கி⁴கங் வா ஸயனாஸனங் யதா²வுட்³ட⁴ங் ந பா³தெ⁴ய்யாதி யோஜனா. ஸங்க⁴ஸ்ஸ உத்³தி³ட்ட²ங் ஸங்கு⁴த்³தி³ட்ட²ங், ஸங்க⁴ங் உத்³தி³ஸ்ஸ கதந்தி அதி⁴ப்பாயோ. யோ யோ வுட்³டோ⁴ யதா²வுட்³ட⁴ங், வுட்³ட⁴ப்படிபாடியாதி அத்தோ². ந பா³தெ⁴ய்யாதி ந படிபா³ஹெய்ய. அல்லபாதா³ நாம யேஹி அக்கந்தட்டா²னே உத³கங் பஞ்ஞாயதி. ஸயனாஸனந்தி மஞ்சபீடா²தி³, இமினா பரிப⁴ண்ட³கதா பூ⁴மீதிபி உபலக்கி²தா. ஸுதோ⁴தபாத³கங் வாபி ஸஉபாஹனோ ததே²வாதி ஸம்ப³ந்தோ⁴. ஸுதோ⁴தபாத³கந்தி தோ⁴தபாதே³ஹேவ அக்கமிதப்³ப³ட்டா²னங். தோ⁴தா பாதா³ யஸ்ஸ அக்கமனஸ்ஸாதி கிரியாவிஸேஸனஸமாஸோ. யதி³ பன தத்த² நேவாஸிகா அதோ⁴தபாதே³ஹிபி வளஞ்ஜெந்தி, ததே²வ வளஞ்ஜேதுங் வட்டதி. ததே²வாதி பரிப⁴ண்ட³கதங் பூ⁴மிங் ஸேனாஸனங் வா நக்கமேதி அத்தோ².
343. Saṅghuddiṭṭhaṃ vā saṅghikaṃ vā sayanāsanaṃ yathāvuḍḍhaṃ na bādheyyāti yojanā. Saṅghassa uddiṭṭhaṃ saṅghuddiṭṭhaṃ, saṅghaṃ uddissa katanti adhippāyo. Yo yo vuḍḍho yathāvuḍḍhaṃ, vuḍḍhappaṭipāṭiyāti attho. Na bādheyyāti na paṭibāheyya. Allapādā nāma yehi akkantaṭṭhāne udakaṃ paññāyati. Sayanāsananti mañcapīṭhādi, iminā paribhaṇḍakatā bhūmītipi upalakkhitā. Sudhotapādakaṃ vāpi saupāhano tathevāti sambandho. Sudhotapādakanti dhotapādeheva akkamitabbaṭṭhānaṃ. Dhotā pādā yassa akkamanassāti kiriyāvisesanasamāso. Yadi pana tattha nevāsikā adhotapādehipi vaḷañjenti, tatheva vaḷañjetuṃ vaṭṭati. Tathevāti paribhaṇḍakataṃ bhūmiṃ senāsanaṃ vā nakkameti attho.
344. ஸங்கா⁴டியாதி அதி⁴ட்டி²தஸங்கா⁴டியா. பாதே³ பரிக்³க³ஹெத்வா ஆஸனங் பல்லத்தோ², பல்லத்த²ங் கரோதீதி பல்லத்தா²திதா⁴துஸ்ஸ பல்லத்தே²தி ரூபங். விஹாரேபி அந்தரக⁴ரேபி பல்லத்தி²காய ந நிஸீதெ³ய்யாதி அதி⁴ப்பாயோ, பரிகம்மகதங் பி⁴த்தாதி³ந்தி யோஜனா. பரிகம்மகதந்தி ஸேதவண்ணேன வா சித்தகம்மேன வா கதபரிகம்மங். ஆதி³-ஸத்³தோ³ த்³வாரவாதபானாதி³ங் ஸங்க³ண்ஹாதி. ந அபஸ்ஸயேதி சீவராதி³னா அப்படிச்சா²தெ³த்வா அபஸ்ஸயனங் ந கரெய்ய. நோ ந ஆசமேதி நேவ ந ஆசமே, ஆசமெய்யாதி அத்தோ². த்³வே படிஸேதா⁴ பகதியத்த²ங் க³மெந்தீதி. ஸந்தேதி இமினா உத³கே அஸந்தே அனாபத்தீதி தீ³பேதி.
344.Saṅghāṭiyāti adhiṭṭhitasaṅghāṭiyā. Pāde pariggahetvā āsanaṃ pallattho, pallatthaṃ karotīti pallatthātidhātussa pallattheti rūpaṃ. Vihārepi antaragharepi pallatthikāya na nisīdeyyāti adhippāyo, parikammakataṃ bhittādinti yojanā. Parikammakatanti setavaṇṇena vā cittakammena vā kataparikammaṃ. Ādi-saddo dvāravātapānādiṃ saṅgaṇhāti. Na apassayeti cīvarādinā appaṭicchādetvā apassayanaṃ na kareyya. No na ācameti neva na ācame, ācameyyāti attho. Dve paṭisedhā pakatiyatthaṃ gamentīti. Santeti iminā udake asante anāpattīti dīpeti.
345. அகப்பியஸமாதா³னேதி பி⁴க்கூ²னங் ஸாமணேரானங் அகப்பியே ஸமாதா³னே. த³வாதி நிபாதோ , கீளாதி⁴ப்பாயேனாதி அத்தோ². ஸிலாபவிஜ்ஜ²னேதி அந்தமஸோ ஹத்த²யந்தேனபி ஸக்க²ரிகாயபி கி²பனே. ஸபா⁴கா³ய தே³ஸனாய ஆவிகம்மே ச து³க்கடந்தி யோஜேதப்³ப³ங். ஸபா⁴கா³யாதி வத்து²வஸேன ஸமானோ பா⁴கோ³ ஏதிஸ்ஸா ஆபத்தியாதி விக்³க³ஹோ. ச-ஸத்³தோ³ தாதி³ஸியா படிக்³க³ஹணமத்தங் ஸமுச்சினோதி.
345.Akappiyasamādāneti bhikkhūnaṃ sāmaṇerānaṃ akappiye samādāne. Davāti nipāto , kīḷādhippāyenāti attho. Silāpavijjhaneti antamaso hatthayantenapi sakkharikāyapi khipane. Sabhāgāya desanāya āvikamme ca dukkaṭanti yojetabbaṃ. Sabhāgāyāti vatthuvasena samāno bhāgo etissā āpattiyāti viggaho. Ca-saddo tādisiyā paṭiggahaṇamattaṃ samuccinoti.
346. படிஸ்ஸவோ நாம ‘‘உபோ⁴பி மயங் இத⁴ வஸ்ஸங் வஸிஸ்ஸாம, ஏகதோ உத்³தி³ஸாபேமா’’திஆதி³படிஜானநங், தஸ்ஸ விஸங்வாதோ³ பச்சா² அகரணங் படிஸ்ஸவவிஸங்வாதோ³, தஸ்மிங், நிமித்தத்தே² பு⁴ம்மங். ஸுத்³த⁴சித்தஸ்ஸாதி கத²னஸமயே ‘‘கரிஸ்ஸாமீ’’தி ஏவங் பவத்தசித்தஸ்ஸ. இதரஸ்ஸாதி அஞ்ஞஸ்ஸ அஸுத்³த⁴சித்தஸ்ஸ.
346.Paṭissavo nāma ‘‘ubhopi mayaṃ idha vassaṃ vasissāma, ekato uddisāpemā’’tiādipaṭijānanaṃ, tassa visaṃvādo pacchā akaraṇaṃ paṭissavavisaṃvādo, tasmiṃ, nimittatthe bhummaṃ. Suddhacittassāti kathanasamaye ‘‘karissāmī’’ti evaṃ pavattacittassa. Itarassāti aññassa asuddhacittassa.
347. கிச்சேதி ஸுக்க²கட்டா²தி³க்³க³ஹணகிச்சே ஸதி ஏவ போரிஸங் புரிஸப்பமாணங் அபி⁴ருஹெய்யாதி ஸம்ப³ந்தோ⁴. ஆபதா³ஸூதி வாளமிக³த³ஸ்ஸனாதீ³ஸு.
347.Kicceti sukkhakaṭṭhādiggahaṇakicce sati eva porisaṃ purisappamāṇaṃ abhiruheyyāti sambandho. Āpadāsūti vāḷamigadassanādīsu.
348. பரிஸ்ஸாவனங் வினாதி ஸம்ப³ந்தோ⁴. அத்³தா⁴னந்தி ஹெட்டி²மந்தேன அத்³த⁴யோஜனஸங்கா²தங் அத்³தா⁴னங். ஸசே ந ஹோதி பரிஸ்ஸாவனங் வா த⁴ம்மகரணோ வா, ஸங்கா⁴டிகண்ணோபி அதி⁴ட்டா²தப்³போ³. யாசமானஸ்ஸாதி பரிஸ்ஸாவனங் யாசந்தஸ்ஸ.
348. Parissāvanaṃ vināti sambandho. Addhānanti heṭṭhimantena addhayojanasaṅkhātaṃ addhānaṃ. Sace na hoti parissāvanaṃ vā dhammakaraṇo vā, saṅghāṭikaṇṇopi adhiṭṭhātabbo. Yācamānassāti parissāvanaṃ yācantassa.
349. ஆபா³த⁴ப்பச்சயா அஞ்ஞத்ர ஸேஸங்கே³ ச அத்தகா⁴தனே ச து³க்கடந்தி யோஜனா. ஸேஸங்கே³தி அங்க³ஜாததோ கண்ணனாஸாதி³அவஸேஸே அவயவச்சே²த³னே. அத்தகா⁴தனேதி ஆஹாருபச்சே²தா³தி³னா அத்தனோ மாரணே.
349. Ābādhappaccayā aññatra sesaṅge ca attaghātane ca dukkaṭanti yojanā. Sesaṅgeti aṅgajātato kaṇṇanāsādiavasese avayavacchedane. Attaghātaneti āhārupacchedādinā attano māraṇe.
350. தூலிகாய கயிரமானங் இத்தி²புரிஸாதி³கங் சித்தஞ்ச பொத்த²கஞ்ச கட்டா²தீ³ஸு கயிரமானங் சித்தபொத்த²கானி, தானியேவ ரூபானீதி ஸமாஸோ. ஜாதகாதீ³னி பன பரேஹி காராபேதுங் லப்³ப⁴ந்தி. மாலாகம்மாதீ³னி ஸயம்பி காதுங் லப்³ப⁴ந்தி. ஆராமாரஞ்ஞகே³ஹேஸு பு⁴ஞ்ஜந்தங் ந உட்டா²பெய்யாதி யோஜேதப்³ப³ங். விஹாரஸங்கா²தோ ஆராமோ ச அரஞ்ஞஞ்ச அந்தரக⁴ரஸங்கா²தங் கே³ஹஞ்சாதி த்³வந்தோ³. ‘‘ஆராம…பே॰… கே³ஹேஸூ’’தி வத்தப்³பே³ ஏ-காரஸ்ஸ அ-காரகரணேன கா³தா²ப³ந்த⁴வஸேன வுத்தங். ஓகாஸே கதே பன ‘‘பவிஸதா²’’தி வுத்தே ச பவிஸிதப்³ப³ங் உபனிஸீதி³தப்³ப³ஞ்ச.
350. Tūlikāya kayiramānaṃ itthipurisādikaṃ cittañca potthakañca kaṭṭhādīsu kayiramānaṃ cittapotthakāni, tāniyeva rūpānīti samāso. Jātakādīni pana parehi kārāpetuṃ labbhanti. Mālākammādīni sayampi kātuṃ labbhanti. Ārāmāraññagehesu bhuñjantaṃ na uṭṭhāpeyyāti yojetabbaṃ. Vihārasaṅkhāto ārāmo ca araññañca antaragharasaṅkhātaṃ gehañcāti dvando. ‘‘Ārāma…pe… gehesū’’ti vattabbe e-kārassa a-kārakaraṇena gāthābandhavasena vuttaṃ. Okāse kate pana ‘‘pavisathā’’ti vutte ca pavisitabbaṃ upanisīditabbañca.
351. புமயுத்தானி யானானி ச ஸிவிகஞ்ச ஹத்த²வட்டகஞ்ச பாடங்கிஞ்ச அபி⁴ருஹிதுங் கி³லானஸ்ஸ கப்பதேதி ஸம்ப³ந்தோ⁴. புமயுத்தானீதி அஸ்ஸக³வாதி³புரிஸயுத்தானி, ந தே⁴னுயுத்தானி, ஸாரதி² பன இத்தீ² வா ஹோது புரிஸோ வா, வட்டதி. ஹத்த²வட்டகேபி ஏஸேவ நயோ, யானானீதி ரத²ஸகடாதீ³னி, ஸிவிகந்தி பீட²கஸிவிகங், பீட²கயானந்தி அத்தோ². பாடங்கீதி அந்தோ³லிகா. கி³லானஸ்ஸாதி எத்த² கி³லானோ நாம ந அப்பகேனபி ஸீஸாபா³தா⁴தி³மத்தேன வேதி³தப்³போ³, யோ பன ந ஸக்கோதி வினா யானேன க³ந்துங், ஏவரூபோ வேதி³தப்³போ³. ததா² ஹி யானங் அனுஜானந்தேன ப⁴க³வதா கோஸலேஸு ஜனபதே³ஸு ப⁴க³வந்தங் த³ஸ்ஸனாய ஸாவத்தி²ங் க³ச்ச²ந்தங் அஞ்ஞதரங் கி³லானங் பி⁴க்கு²ங் க³ந்துமஸக்குணெய்யதாய அஞ்ஞதரஸ்மிங் ருக்க²மூலே நிஸின்னங் தி³ஸ்வா மனுஸ்ஸேஹி தங் பவத்திங் ஞத்வா ‘‘ஏஹி, ப⁴ந்தே, க³மிஸ்ஸாமா’’தி வுத்தே ‘‘நாஹங், ஆவுஸோ, க³மிஸ்ஸாமி, கி³லானொம்ஹீ’’தி வுத்தவத்து²ஸ்மிங் (மஹாவ॰ 253) அனுஞ்ஞாதங், ததா² வத³ந்தோ ச ஸோ பி⁴க்கு² க³மனுபச்சே²த³ஸாத⁴கமேவ கே³லஞ்ஞங் ஸந்தா⁴யாஹாதி விஞ்ஞாயதி அதி⁴ப்பேதத்த²னிப்ப²த்தியா உபச்சி²ன்னத்தா, அபிச யானேன ஏகபரிச்சே²தா³ய உபாஹனாய பரிச்சே²த³ங் ட²பெந்தேன அட்ட²கதா²சரியேன ‘‘கி³லானேன பி⁴க்கு²னா ஸஉபாஹனேனாதி எத்த² கி³லானோ நாம யோ ந ஸக்கோதி அனுபாஹனேன கா³மங் பவிஸிது’’ந்தி அட்ட²கதா²யங் (மஹாவ॰ அட்ட²॰ 256) வுத்தங், தஸ்மா யதா²வுத்தகி³லானோவ கி³லானோதி நிட்ட²மெத்த² க³ந்தப்³ப³ங்.
351. Pumayuttāni yānāni ca sivikañca hatthavaṭṭakañca pāṭaṅkiñca abhiruhituṃ gilānassa kappateti sambandho. Pumayuttānīti assagavādipurisayuttāni, na dhenuyuttāni, sārathi pana itthī vā hotu puriso vā, vaṭṭati. Hatthavaṭṭakepi eseva nayo, yānānīti rathasakaṭādīni, sivikanti pīṭhakasivikaṃ, pīṭhakayānanti attho. Pāṭaṅkīti andolikā. Gilānassāti ettha gilāno nāma na appakenapi sīsābādhādimattena veditabbo, yo pana na sakkoti vinā yānena gantuṃ, evarūpo veditabbo. Tathā hi yānaṃ anujānantena bhagavatā kosalesu janapadesu bhagavantaṃ dassanāya sāvatthiṃ gacchantaṃ aññataraṃ gilānaṃ bhikkhuṃ gantumasakkuṇeyyatāya aññatarasmiṃ rukkhamūle nisinnaṃ disvā manussehi taṃ pavattiṃ ñatvā ‘‘ehi, bhante, gamissāmā’’ti vutte ‘‘nāhaṃ, āvuso, gamissāmi, gilānomhī’’ti vuttavatthusmiṃ (mahāva. 253) anuññātaṃ, tathā vadanto ca so bhikkhu gamanupacchedasādhakameva gelaññaṃ sandhāyāhāti viññāyati adhippetatthanipphattiyā upacchinnattā, apica yānena ekaparicchedāya upāhanāya paricchedaṃ ṭhapentena aṭṭhakathācariyena ‘‘gilānena bhikkhunā saupāhanenāti ettha gilāno nāma yo na sakkoti anupāhanena gāmaṃ pavisitu’’nti aṭṭhakathāyaṃ (mahāva. aṭṭha. 256) vuttaṃ, tasmā yathāvuttagilānova gilānoti niṭṭhamettha gantabbaṃ.
352. த³வங் கரணேதி கேளியா கரணே. அஞ்ஞஸ்ஸாதி அந்தமஸோ து³ஸ்ஸீலஸ்ஸாபி. உபலாளனேதி ‘‘பத்தங் த³ஸ்ஸாமி, சீவரங் த³ஸ்ஸாமீ’’திஆதி³னா.
352.Davaṃkaraṇeti keḷiyā karaṇe. Aññassāti antamaso dussīlassāpi. Upalāḷaneti ‘‘pattaṃ dassāmi, cīvaraṃ dassāmī’’tiādinā.
353. விவரித்வா ந த³ஸ்ஸயேதி ஸம்ப³ந்த⁴னீயங். தா பி⁴க்கு²னியோ.
353. Vivaritvā na dassayeti sambandhanīyaṃ. Tā bhikkhuniyo.
354. ஓவாத³ந்தி பி⁴க்கு²னீஹி தேரஸியங் வா சாதுத்³த³ஸியங் வா ஆக³ந்த்வா உபோஸத²ங் புச்சி²த்வா ‘‘சாதுத்³த³ஸோ’’திஆதி³னா பி⁴க்கு²னா ஆசிக்கி²தே புன தாஹி உபோஸத²தி³வஸே ஸமாக³ந்த்வா ஓவாதூ³பஸங்கமனயாசனங், தங் பாதிமொக்கு²த்³தே³ஸகஸ்ஸ ஆரோசெத்வா தேன கதஸன்னிட்டா²னங் க³ஹெத்வா பாடிபதே³ பச்சாஹரிதப்³ப³ந்தி அஜானநகங் பா³லஞ்ச ததா² காதுங் அஸமத்த²ங் கி³லானஞ்ச பாடிபதே³ க³ந்துகாமங் க³மியஞ்ச வஜ்ஜெத்வா அஞ்ஞஸ்ஸ க³ஹணபச்சாஹரணானி அகாதுங் ந வட்டதி. தேன வுத்தங் ‘‘ந க³ண்ஹதோ’’திஆதி³.
354.Ovādanti bhikkhunīhi terasiyaṃ vā cātuddasiyaṃ vā āgantvā uposathaṃ pucchitvā ‘‘cātuddaso’’tiādinā bhikkhunā ācikkhite puna tāhi uposathadivase samāgantvā ovādūpasaṅkamanayācanaṃ, taṃ pātimokkhuddesakassa ārocetvā tena katasanniṭṭhānaṃ gahetvā pāṭipade paccāharitabbanti ajānanakaṃ bālañca tathā kātuṃ asamatthaṃ gilānañca pāṭipade gantukāmaṃ gamiyañca vajjetvā aññassa gahaṇapaccāharaṇāni akātuṃ na vaṭṭati. Tena vuttaṃ ‘‘na gaṇhato’’tiādi.
355. லோகாயதந்தி நிரத்த²ககாரணப்படிஸங்யுத்தங் தித்தி²யஸத்த²ங். திரச்சா²னவிஜ்ஜா ச இமினாவ உபலக்கி²தா. ந வாசெய்யாதி பரேஸங் ந வாசெய்ய. இமினாவ அத்தனோ பரியாபுணனம்பி படிக்கி²த்தங் லோகாயததிரச்சா²னவிஜ்ஜாதி ச ராக³தோ³ஸமோஹவட்³டா⁴னி பு³த்³தா⁴தி³க³ரஹிதா ஸக்³க³மொக்கா²னங் திரோ திரியதோ அஞ்சிதா க³தா பவத்தா கப்³ப³னாடகாதி³கா ஸப்³பா³பி விஜ்ஜா அனுலோமவஸேன வா வினயபரியாயங் பத்வா க³ருகே டா²தப்³ப³ந்தி வினயயுத்திதோபி ஸங்க³ஹிதாதி வேதி³தப்³பா³. ஏவஞ்ச நோ க³ரூனமுபதே³ஸோ. பேளாயபீதி யத்த² பாதிங் ட²பெத்வா ஸுகி²னோ பு⁴ஞ்ஜந்தி, தம்ப³லோஹேன ரஜதேன வா கதாய தாய ஆஸித்தகூபதா⁴னஸங்கா²தாய பேளாய ட²பெத்வா.
355.Lokāyatanti niratthakakāraṇappaṭisaṃyuttaṃ titthiyasatthaṃ. Tiracchānavijjā ca imināva upalakkhitā. Na vāceyyāti paresaṃ na vāceyya. Imināva attano pariyāpuṇanampi paṭikkhittaṃ lokāyatatiracchānavijjāti ca rāgadosamohavaḍḍhāni buddhādigarahitā saggamokkhānaṃ tiro tiriyato añcitā gatā pavattā kabbanāṭakādikā sabbāpi vijjā anulomavasena vā vinayapariyāyaṃ patvā garuke ṭhātabbanti vinayayuttitopi saṅgahitāti veditabbā. Evañca no garūnamupadeso. Peḷāyapīti yattha pātiṃ ṭhapetvā sukhino bhuñjanti, tambalohena rajatena vā katāya tāya āsittakūpadhānasaṅkhātāya peḷāya ṭhapetvā.
356. பாருதஞ்ச நிவாஸனஞ்ச, கி³ஹீனங் ஹத்தி²ஸொண்டா³தி³வஸேன பாருதனிவாஸனங் யஸ்ஸ பாருபனஸ்ஸ நிவாஸனஸ்ஸாதி கிரியாவிஸேஸனஸமாஸோ . கி³ஹிபாருதனிவாஸனங் ந பாருபே ந நிவாஸெய்யாதி ஸம்ப³ந்தோ⁴. ஸங்வேல்லியங் ந நிவாஸெய்யாதி மல்லகம்மகராத³யோ விய கச்ச²ங் கத்வா ந நிவாஸெய்ய. ஏவங் நிவாஸேதுங் கி³லானஸ்ஸாபி மக்³க³ப்படிபன்னஸ்ஸாபி ந வட்டதி. யம்பி மக்³க³ங் க³ச்ச²ந்தா ஏகங் வா த்³வே வா கோணே உக்கி²பித்வா அந்தரவாஸகஸ்ஸ உபரி லக்³க³ந்தி, ந வட்டதி. ஏவங் அபாருபித்வா அனிவாஸெத்வா ச நிப்³பி³காரங் பரிமண்ட³லங் பாருபிதப்³ப³ங் திமண்ட³லங் படிச்சா²தெ³ந்தேன பரிமண்ட³லங் நிவாஸேதப்³ப³ஞ்ச, ததா² அபாருபித்வா அனிவாஸெத்வா ச ஆராமே வா அந்தரக⁴ரே வா அனாத³ரேன யங் கிஞ்சி விகாரங் கரொந்தஸ்ஸ து³க்கடங். தா³யந்தி வனங். நாலிம்பயெய்யாதி ‘‘ஸப்³பூ³பகாரானி வினஸ்ஸந்தூ’’தி வா கி²ட்³டா³தி⁴ப்பாயேன வா நாலிம்பயெய்ய.
356. Pārutañca nivāsanañca, gihīnaṃ hatthisoṇḍādivasena pārutanivāsanaṃ yassa pārupanassa nivāsanassāti kiriyāvisesanasamāso . Gihipārutanivāsanaṃ na pārupe na nivāseyyāti sambandho. Saṃvelliyaṃ na nivāseyyāti mallakammakarādayo viya kacchaṃ katvā na nivāseyya. Evaṃ nivāsetuṃ gilānassāpi maggappaṭipannassāpi na vaṭṭati. Yampi maggaṃ gacchantā ekaṃ vā dve vā koṇe ukkhipitvā antaravāsakassa upari lagganti, na vaṭṭati. Evaṃ apārupitvā anivāsetvā ca nibbikāraṃ parimaṇḍalaṃ pārupitabbaṃ timaṇḍalaṃ paṭicchādentena parimaṇḍalaṃ nivāsetabbañca, tathā apārupitvā anivāsetvā ca ārāme vā antaraghare vā anādarena yaṃ kiñci vikāraṃ karontassa dukkaṭaṃ. Dāyanti vanaṃ. Nālimpayeyyāti ‘‘sabbūpakārāni vinassantū’’ti vā khiḍḍādhippāyena vā nālimpayeyya.
357. வட்³டி⁴ங் நோ பயோஜயே அஞ்ஞாதகப்பவாரிதே நோ யாசேதி யோஜனா. அஞ்ஞஸ்ஸாதி ஸஹத⁴ம்மிகஸ்ஸாபி. கதிபாஹங் பு⁴த்வா வாதி யோஜனீயங். புனோதி நிபாதோ.
357. Vaḍḍhiṃ no payojaye aññātakappavārite no yāceti yojanā. Aññassāti sahadhammikassāpi. Katipāhaṃ bhutvā vāti yojanīyaṃ. Punoti nipāto.
358. த³ண்டி³னங் ஞத்வா வா அஞத்வா வா உத்³தி³ஸ்ஸ ரக்க²ங் யாசனே த³ண்டி³தே த³ண்டோ³ அஸ்ஸ கீ³வாதி யோஜனா. த³ண்ட³ங் க³ண்ஹதீதி பச்சயந்தஸ்ஸ த³ண்டி³னங் த³ண்ட³க்³க³ஹணந்தி அத்தோ². உத்³தி³ஸ்ஸாதி ‘‘அம்ஹாகங் விஹாரே அஸுகேன ச அஸுகேன ச இத³ங் நாம கத’’ந்தி, ‘‘கரிஸ்ஸ’’ந்தி வா ஏவங் அதீதங் வா அனாக³தங் வா ஆரப்³ப⁴. யாசனேதி வோஹாரிகேஸு யாசனே ஸதி. த³ண்டி³தேதி தேஹி த³ண்டே³ க³ஹிதே ஸோ த³ண்டோ³ அஸ்ஸ யாசகஸ்ஸ பி⁴க்கு²னோ கீ³வா, இணங் ஹோதீதி அத்தோ². வோஹாரிகேஹி பன ‘‘கேனா’’தி வுத்தே ‘‘அஸுகேனாதி வத்துங் அம்ஹாகங் ந வட்டதி, தும்ஹேயேவ ஜானிஸ்ஸத², கேவலஞ்ஹி மயங் ரக்க²ங் யாசாம, தங் நோ தே³த², அவஹடப⁴ண்ட³ஞ்ச மங் ஆஹராபேதா²’’தி வத்தப்³ப³ங் . ஏவங் அனோதி³ஸ்ஸ ஆசிக்க²ணா ஹோதி, ஸா வட்டதி. பாராஜிகாதி³காதி பாராஜிகது²ல்லச்சயது³க்கடானி.
358. Daṇḍinaṃ ñatvā vā añatvā vā uddissa rakkhaṃ yācane daṇḍite daṇḍo assa gīvāti yojanā. Daṇḍaṃ gaṇhatīti paccayantassa daṇḍinaṃ daṇḍaggahaṇanti attho. Uddissāti ‘‘amhākaṃ vihāre asukena ca asukena ca idaṃ nāma kata’’nti, ‘‘karissa’’nti vā evaṃ atītaṃ vā anāgataṃ vā ārabbha. Yācaneti vohārikesu yācane sati. Daṇḍiteti tehi daṇḍe gahite so daṇḍo assa yācakassa bhikkhuno gīvā, iṇaṃ hotīti attho. Vohārikehi pana ‘‘kenā’’ti vutte ‘‘asukenāti vattuṃ amhākaṃ na vaṭṭati, tumheyeva jānissatha, kevalañhi mayaṃ rakkhaṃ yācāma, taṃ no detha, avahaṭabhaṇḍañca maṃ āharāpethā’’ti vattabbaṃ . Evaṃ anodissa ācikkhaṇā hoti, sā vaṭṭati. Pārājikādikāti pārājikathullaccayadukkaṭāni.
359.
359.
‘‘ஹரந்தேஸு பரிக்கா²ரங்,
‘‘Harantesu parikkhāraṃ,
சோரோ சோரோதி பா⁴ஸிதே;
Coro coroti bhāsite;
அனத்தா²யேஸங் க³ண்ஹந்தே’’தி. –
Anatthāyesaṃ gaṇhante’’ti. –
பாடே²ஹி ப⁴விதப்³ப³ங். ஏவஞ்ஹி ஸதி ‘‘ஹரந்தேஸூ’’தி ப³ஹுவசனேன ஸஹ க⁴டதே. பரிக்கா²ரங் ஹரந்தேஸு ஏஸங் அனத்தா²ய ‘‘சோரோ சோரோ’’தி பா⁴ஸிதே த³ண்ட³ங் க³ண்ஹந்தே தத்தகங் அஸ்ஸ கீ³வாதி யோஜேதப்³ப³ங். ஹரந்தேஸூதி சோரேஸு க³ஹெத்வா க³ச்ச²ந்தேஸு. ஏஸந்தி சோரானங். க³ண்ஹந்தேதி வோஹாரிகஜனே க³ண்ஹந்தே. யத்தகங் க³ஹிதங், தத்தகங் அஸ்ஸ பி⁴க்கு²னோ கீ³வா, ப⁴ண்ட³தெ³ய்யங் ஹோதீதி அத்தோ².
Pāṭhehi bhavitabbaṃ. Evañhi sati ‘‘harantesū’’ti bahuvacanena saha ghaṭate. Parikkhāraṃ harantesu esaṃ anatthāya ‘‘coro coro’’ti bhāsite daṇḍaṃ gaṇhante tattakaṃ assa gīvāti yojetabbaṃ. Harantesūti coresu gahetvā gacchantesu. Esanti corānaṃ. Gaṇhanteti vohārikajane gaṇhante. Yattakaṃ gahitaṃ, tattakaṃ assa bhikkhuno gīvā, bhaṇḍadeyyaṃ hotīti attho.
360. பாகாரகுட்டானங் ப³ஹி வளஞ்ஜே வாபி வீஹாதி³னாளிகேராதி³ரோபிமே ஹரிதே வாபி விகா⁴ஸுச்சாரஸங்காரமுத்தங் நாவலோகிய ச²ட்³டெ³ய்ய, து³க்கடந்தி ஸம்ப³ந்தோ⁴. வளஞ்ஜே நாவலோகியாதி ச இமினா ஓலோகெத்வா வா அவளஞ்ஜே வா விகா⁴ஸாதீ³னி ச²ட்³டெ³ந்தஸ்ஸ அனாபத்தீதி தீ³பேதி. வீஹி ஆதி³ யேஸங் ஸாலிஆதீ³னங் தே வீஹாத³யோ, நாளிகேரோ ஆதி³ யேஸங் அம்ப³பனஸாதீ³னங் தே நாளிகேராத³யோ, வீஹாத³யோ ச நாளிகேராத³யோ சாதி த்³வந்தோ³, தேஸங் ரோபோ, தேன நிப்³ப³த்தங் வீஹாதி³…பே॰… ரோபிமங். ஹரிதேதி ஹரிதட்டா²னே. விகா⁴ஸோ நாம உச்சி²ட்டோ²த³கசலகாதி³.
360. Pākārakuṭṭānaṃ bahi vaḷañje vāpi vīhādināḷikerādiropime harite vāpi vighāsuccārasaṅkāramuttaṃ nāvalokiya chaḍḍeyya, dukkaṭanti sambandho. Vaḷañje nāvalokiyāti ca iminā oloketvā vā avaḷañje vā vighāsādīni chaḍḍentassa anāpattīti dīpeti. Vīhi ādi yesaṃ sāliādīnaṃ te vīhādayo, nāḷikero ādi yesaṃ ambapanasādīnaṃ te nāḷikerādayo, vīhādayo ca nāḷikerādayo cāti dvando, tesaṃ ropo, tena nibbattaṃ vīhādi…pe… ropimaṃ. Hariteti haritaṭṭhāne. Vighāso nāma ucchiṭṭhodakacalakādi.
361. த⁴ம்மயுத்தம்பி நச்சஞ்ச கீ³தஞ்ச வாதி³தஞ்ச யோஜாபேதுஞ்ச பயோஜேதுஞ்ச பயுத்தானி பஸ்ஸிதுஞ்ச ‘‘உபஹாரங் கரோமா’’தி வுத்தே ஸம்படிச்சி²துங் வா ந லப்³ப⁴ந்தி ஸம்ப³ந்தோ⁴. த⁴ம்மயுத்தம்பீதி ரதனத்தயகு³ணூபஸங்ஹிததாய அந்தமஸோ த⁴ம்மேன புஞ்ஞேன ஸங்யுத்தம்பி. நச்சந்தி அந்தமஸோ மோரஸுகமக்கடாதீ³னங் நச்சம்பி. கீ³தந்தி அந்தமஸோ கீ³தஸ்ஸ புப்³ப³பா⁴கே³ கயிரமானங் த³ந்தகீ³தம்பி. வாதி³தந்தி அந்தமஸோ உத³கபே⁴ரிவாதி³தம்பி. யோஜாபேதுந்தி அஞ்ஞேஹி காராபேதுங். பயோஜேதுந்தி அத்தனா காதுங். ஆயதகேன கீ³தஸ்ஸரேன த⁴ம்மம்பி பா⁴ஸிதுங் ந வட்டதி. பயுத்தானீதி பரேஹி யேஹி கேஹிசி கதானி. பஸ்ஸிதுந்தி இமினா அனோலோசனத³ஸ்ஸனம்பி க³ஹிதந்தி ஸோதுந்திபி அத்தோ² விஞ்ஞாயதி. அந்தராராமே டி²தஸ்ஸ பஸ்ஸதோ அனாபத்தி. வீதி²யங் ட²த்வா கீ³வங் பரிவத்தெத்வா பஸ்ஸதோபி ஆபத்தியேவ. யேன கேனசி கரணீயேன க³தட்டா²னே பஸ்ஸதி, ஸுணாதி வா, அனாபத்தி. ஸம்படிச்சி²துந்தி ‘‘ஸாதூ⁴’’தி ஸம்படிச்சி²துங். ‘‘உபஹாரகரணங் நாம ஸுந்த³ர’’ந்தி வத்துங் வட்டதி. வா-ஸத்³தோ³ ஸமுச்சயே.
361. Dhammayuttampi naccañca gītañca vāditañca yojāpetuñca payojetuñca payuttāni passituñca ‘‘upahāraṃ karomā’’ti vutte sampaṭicchituṃ vā na labbhanti sambandho. Dhammayuttampīti ratanattayaguṇūpasaṃhitatāya antamaso dhammena puññena saṃyuttampi. Naccanti antamaso morasukamakkaṭādīnaṃ naccampi. Gītanti antamaso gītassa pubbabhāge kayiramānaṃ dantagītampi. Vāditanti antamaso udakabherivāditampi. Yojāpetunti aññehi kārāpetuṃ. Payojetunti attanā kātuṃ. Āyatakena gītassarena dhammampi bhāsituṃ na vaṭṭati. Payuttānīti parehi yehi kehici katāni. Passitunti iminā anolocanadassanampi gahitanti sotuntipi attho viññāyati. Antarārāme ṭhitassa passato anāpatti. Vīthiyaṃ ṭhatvā gīvaṃ parivattetvā passatopi āpattiyeva. Yena kenaci karaṇīyena gataṭṭhāne passati, suṇāti vā, anāpatti. Sampaṭicchitunti ‘‘sādhū’’ti sampaṭicchituṃ. ‘‘Upahārakaraṇaṃ nāma sundara’’nti vattuṃ vaṭṭati. Vā-saddo samuccaye.
362. ‘‘கீளத்த²ங் கதங் ராஜாகா³ர’’ந்திஆதி³னா ஸம்ப³ந்தி⁴தப்³ப³ங். சித்தேன விசித்தகங் ஆகா³ரங் சித்தாகா³ரகங்.
362. ‘‘Kīḷatthaṃ kataṃ rājāgāra’’ntiādinā sambandhitabbaṃ. Cittena vicittakaṃ āgāraṃ cittāgārakaṃ.
363. ஆஸனேன நவே ந படிபா³ஹெய்யாதி யோஜனா. ஆஸனேனாதி ஆஸனதோ. ந படிபா³ஹெய்யாதி ந உட்டா²பெய்ய. உண்ஹே சீவரங் ந நித³ஹெய்யாதி யோஜனீயங். ந நித³ஹெய்யாதி அதி⁴கங் ந நித³ஹெய்ய. க³ருனாதி ஆசரியுபஜ்ஜா²யேன. பணாமிதோதி ‘‘மா இத⁴ பவிஸா’’திஆதி³னா நிக்கட்³டி⁴தோ.
363. Āsanena nave na paṭibāheyyāti yojanā. Āsanenāti āsanato. Na paṭibāheyyāti na uṭṭhāpeyya. Uṇhe cīvaraṃ na nidaheyyāti yojanīyaṃ. Na nidaheyyāti adhikaṃ na nidaheyya. Garunāti ācariyupajjhāyena. Paṇāmitoti ‘‘mā idha pavisā’’tiādinā nikkaḍḍhito.
364. ஸத்தஹி ஆபத்தீஹி ச பி⁴க்கு²ங் வாபி அஞ்ஞேனேவ ச உபாஸகங் வாபி பரம்முகா² அக்கோஸனே து³க்கடந்தி யோஜேதப்³ப³ங். ஆபத்தீஹி சாதி ச-ஸத்³தோ³ அவதா⁴ரணே. அஞ்ஞேனேவ சாதி எத்த² ஏவ சாதி நிபாதஸமுதா³யோ, ஏகோ ஏவ வா அவதா⁴ரணே, வுத்ததோ அஞ்ஞேனேவ ‘‘அஸத்³தோ⁴’’திஆதி³னாதி அத்தோ². பரம்முகா²தி நிபாதோ, தஸ்ஸ அஸம்முகே²தி அத்தோ². ஸம்முகா² வத³ந்தஸ்ஸ பாசித்தியங். பாபக³ரஹணவஸேன பன வத³தோ அனாபத்தி.
364. Sattahi āpattīhi ca bhikkhuṃ vāpi aññeneva ca upāsakaṃ vāpi parammukhā akkosane dukkaṭanti yojetabbaṃ. Āpattīhi cāti ca-saddo avadhāraṇe. Aññeneva cāti ettha eva cāti nipātasamudāyo, eko eva vā avadhāraṇe, vuttato aññeneva ‘‘asaddho’’tiādināti attho. Parammukhāti nipāto, tassa asammukheti attho. Sammukhā vadantassa pācittiyaṃ. Pāpagarahaṇavasena pana vadato anāpatti.
365. ஸத்³தா⁴தெ³ய்யங் ஸத்³தா⁴ய தா³தப்³ப³ங் சீவரஞ்ச ச-ஸத்³தே³ன அவஸேஸம்பி வினிபாதேதுங் நாஸேதுங் ந லப்³ப⁴ங், பிதூனங் லப்³ப⁴ந்தி ஸம்ப³ந்தோ⁴. ஞாதீனம்பீதி பி-ஸத்³தோ³ ஸம்பா⁴வனே.
365.Saddhādeyyaṃ saddhāya dātabbaṃ cīvarañca ca-saddena avasesampi vinipātetuṃ nāsetuṃ na labbhaṃ, pitūnaṃ labbhanti sambandho. Ñātīnampīti pi-saddo sambhāvane.
366. அஞ்ஞத்ர வஸ்ஸங்வுத்தோ² அஞ்ஞதோ பா⁴க³ங் க³ண்ஹெய்ய, து³க்கடந்தி ஸம்ப³ந்தோ⁴. அஞ்ஞத்ராதி அஞ்ஞஸ்மிங் விஹாரே. அஞ்ஞதோதி அஞ்ஞவிஹாரதோ. படிதெ³ய்யாதி க³ஹிதட்டா²னே த³தெ³ய்ய. க³ஹிதே தஸ்மிங் வத்து²ஸ்மிங் நட்டே² வா ஜிண்ணே வா தஸ்ஸ கீ³வாஹோ தீதி ஸம்ப³ந்தோ⁴. சோதி³தோ நோ த³தெ³ய்ய, தேஸங் து⁴ரனிக்கே²பதோ ப⁴ண்ட³க்³க⁴காரியோ ஹோதீதி யோஜனா. சோதி³தோதி வத்து²ஸாமிகேஹி ‘‘தே³ஹீ’’தி வுத்தோ. தேஸந்தி தஸ்மிங் விஹாரே லாபீ⁴னங் பி⁴க்கூ²னங்.
366. Aññatra vassaṃvuttho aññato bhāgaṃ gaṇheyya, dukkaṭanti sambandho. Aññatrāti aññasmiṃ vihāre. Aññatoti aññavihārato. Paṭideyyāti gahitaṭṭhāne dadeyya. Gahite tasmiṃ vatthusmiṃ naṭṭhe vā jiṇṇe vā tassa gīvāho tīti sambandho. Codito no dadeyya, tesaṃ dhuranikkhepato bhaṇḍagghakāriyo hotīti yojanā. Coditoti vatthusāmikehi ‘‘dehī’’ti vutto. Tesanti tasmiṃ vihāre lābhīnaṃ bhikkhūnaṃ.
367. ஸந்தருத்தரோ வா கல்லோ ஸஉபாஹனோ வா கா³மங் ந பவிஸெய்ய, சாமரீமகஸபீ³ஜனிங் ந தா⁴ரெய்யாதி யோஜனீயங். அந்தரஞ்ச உத்தரஞ்ச, ஸஹ அந்தருத்தரேன ஸந்தருத்தரோ. அக்³க³ளகு³த்தே விஹாரே ஸங்கா⁴டிங் நிக்கி²பித்வா க³ந்துங் வட்டதி. ஆரஞ்ஞகேன பன ப⁴ண்டு³க்க²லிகாய பக்கி²பித்வா பாஸாணருக்க²ஸுஸிராதீ³ஸு படிச்ச²ன்னேஸு ட²பெத்வா க³ந்தப்³ப³ங். அந்தருத்தரானங் நிக்கே²பே அயமேவ நயோ. கல்லோதி அகி³லானோ. மகஸானங் பீ³ஜனீ மகஸபீ³ஜனீ, சமரீனங் வாளேஹி கதா மகஸபீ³ஜனீதி ஸமாஸோ.
367. Santaruttaro vā kallo saupāhano vā gāmaṃ na paviseyya, cāmarīmakasabījaniṃ na dhāreyyāti yojanīyaṃ. Antarañca uttarañca, saha antaruttarena santaruttaro. Aggaḷagutte vihāre saṅghāṭiṃ nikkhipitvā gantuṃ vaṭṭati. Āraññakena pana bhaṇḍukkhalikāya pakkhipitvā pāsāṇarukkhasusirādīsu paṭicchannesu ṭhapetvā gantabbaṃ. Antaruttarānaṃ nikkhepe ayameva nayo. Kalloti agilāno. Makasānaṃ bījanī makasabījanī, camarīnaṃ vāḷehi katā makasabījanīti samāso.
368. ஆராமதோ ப³ஹீதி ஸம்ப³ந்த⁴னீயங். ஆராமதோதி ஆராமூபசாரதோ. ந தா⁴ரெய்யாதி அகி³லானோ ந தா⁴ரெய்ய. யஸ்ஸ பன காயதா³ஹோ வா பித்தகோபோ வா ஹோதி, சக்கு² வா து³ப்³ப³லங், அஞ்ஞோ வா கோசி ஆபா³தோ⁴ வினா ச²த்தேன உப்பஜ்ஜதி, தஸ்ஸ கா³மே வா அரஞ்ஞே வா ச²த்தங் வட்டதி. கு³த்தியா லப்³ப⁴தீதி வஸ்ஸே சீவரகு³த்தத்த²ங், வாளமிக³சோரப⁴யேஸு அத்தகு³த்தத்த²ம்பி லப்³ப⁴தீதி அத்தோ². ஏகபண்ணச²த்தங் பன ஸப்³ப³த்தே²வ வட்டதி.
368. Ārāmato bahīti sambandhanīyaṃ. Ārāmatoti ārāmūpacārato. Na dhāreyyāti agilāno na dhāreyya. Yassa pana kāyadāho vā pittakopo vā hoti, cakkhu vā dubbalaṃ, añño vā koci ābādho vinā chattena uppajjati, tassa gāme vā araññe vā chattaṃ vaṭṭati. Guttiyā labbhatīti vasse cīvaraguttatthaṃ, vāḷamigacorabhayesu attaguttatthampi labbhatīti attho. Ekapaṇṇachattaṃ pana sabbattheva vaṭṭati.
369. உப⁴தோகாஜங் ந கா³ஹெய்யாதி ஸம்ப³ந்தோ⁴. உப⁴தோ த³ண்ட³ஸ்ஸ உப⁴யகோடியங் பா⁴ரப³ந்த⁴காஜங் உப⁴தோகாஜங், அலோபதப்புரிஸோ. ஏகந்தரிககாஜகந்தி அந்தரமேவ அந்தரிகங், ஏகஞ்ச அந்தரிகஞ்சாதி த்³வந்தோ³, ஏகந்தரிகே பா⁴ரப³ந்த⁴காஜந்தி தப்புரிஸோ ஏகதோகாஜகங், அந்தரிககாஜகந்தி வுத்தங் ஹோதி. ஹத்தே² ஓலம்போ³ அஸ்ஸ பா⁴ரஸ்ஸாதி ஸமாஸோ.
369. Ubhatokājaṃ na gāheyyāti sambandho. Ubhato daṇḍassa ubhayakoṭiyaṃ bhārabandhakājaṃ ubhatokājaṃ, alopatappuriso. Ekantarikakājakanti antarameva antarikaṃ, ekañca antarikañcāti dvando, ekantarike bhārabandhakājanti tappuriso ekatokājakaṃ, antarikakājakanti vuttaṃ hoti. Hatthe olambo assa bhārassāti samāso.
370. அனோகாஸகதந்தி ‘‘கரோது மே ஆயஸ்மா ஓகாஸங், அஹங் தங் வத்துகாமோ’’தி ஏவங் சோத³கேன ஓகாஸே காராபிதே நத்தி² ஓகாஸோ கதோ அனேன சுதி³தகேனாதி ப³ஹுப்³பீ³ஹி. சோதெ³ய்யாதி சாவனஅக்கோஸகம்மவுட்டா²னாதி⁴ப்பாயேன சோதெ³ய்ய. உபோஸத²ப்பவாரணட்ட²பனஅனுவிஜ்ஜத⁴ம்மகதா²தி⁴ப்பாயேஸு ஓகாஸகம்மங் நத்தி². ஸுத்³த⁴ஸ்ஸாதி அனாபத்திகதாய ஸுத்³த⁴ஸ்ஸ. அவத்து²ஸ்மிந்தி அகாரணே. ததா²தி து³க்கடங் அதிதி³ஸதி. கரொந்தேனாபி ‘‘பூ⁴தமேவ நு கோ² ஆபத்திங் வத³தி, அபூ⁴த’’ந்தி ஏவங் உபபரிக்கி²த்வா காதப்³பா³. ‘‘அனுஜானாமி, பி⁴க்க²வே, புக்³க³லங் துலயித்வா ஓகாஸங் காது’’ந்தி (மஹாவ॰ 153) ஹி வுத்தங்.
370.Anokāsakatanti ‘‘karotu me āyasmā okāsaṃ, ahaṃ taṃ vattukāmo’’ti evaṃ codakena okāse kārāpite natthi okāso kato anena cuditakenāti bahubbīhi. Codeyyāti cāvanaakkosakammavuṭṭhānādhippāyena codeyya. Uposathappavāraṇaṭṭhapanaanuvijjadhammakathādhippāyesu okāsakammaṃ natthi. Suddhassāti anāpattikatāya suddhassa. Avatthusminti akāraṇe. Tathāti dukkaṭaṃ atidisati. Karontenāpi ‘‘bhūtameva nu kho āpattiṃ vadati, abhūta’’nti evaṃ upaparikkhitvā kātabbā. ‘‘Anujānāmi, bhikkhave, puggalaṃ tulayitvā okāsaṃ kātu’’nti (mahāva. 153) hi vuttaṃ.
371. ஸத்தானங் பகதங்கு³லேன அட்ட²ங்கு³லாதி⁴கங் மஞ்சப்படிபாத³ங் வா உச்சபாத³கங் மஞ்சங் வா ந தா⁴ரயேதி யோஜனா. பகதியா அங்கு³லங் பகதங்கு³லங். தஞ்ச வட்³ட⁴கிஅங்கு³லங் வேதி³தப்³ப³ங். அட்ட² ச தானி அங்கு³லானி ச, தேஹி தமதி⁴கங் யஸ்ஸாதி ஸமாஸோ. மஞ்சானங் படிபாதோ³, யத்த² மஞ்சபாதே³ நிக்கி²பந்தி. அட்ட²ங்கு³லதோ உச்சா பாதா³ யஸ்ஸாதி ப³ஹுப்³பீ³ஹி.
371. Sattānaṃ pakataṅgulena aṭṭhaṅgulādhikaṃ mañcappaṭipādaṃ vā uccapādakaṃ mañcaṃ vā na dhārayeti yojanā. Pakatiyā aṅgulaṃ pakataṅgulaṃ. Tañca vaḍḍhakiaṅgulaṃ veditabbaṃ. Aṭṭha ca tāni aṅgulāni ca, tehi tamadhikaṃ yassāti samāso. Mañcānaṃ paṭipādo, yattha mañcapāde nikkhipanti. Aṭṭhaṅgulato uccā pādā yassāti bahubbīhi.
372. மூக³ப்³ப³தாதி³ந்தி மூகா³னமிவ துண்ஹீபா⁴வஸங்கா²தங் வதங் ஆதி³ யஸ்ஸ கோ³வதாதி³னோ தித்தி²யவதஸ்ஸாதி ஸமாஸோ. கு²ரமேவ ப⁴ண்ட³ங் கு²ரப⁴ண்ட³ங். புப்³பே³ ந்ஹாபிதோ ந்ஹாபிதபுப்³ப³கோ, விஸேஸனஸ்ஸ பரனிபாதோ.
372.Mūgabbatādinti mūgānamiva tuṇhībhāvasaṅkhātaṃ vataṃ ādi yassa govatādino titthiyavatassāti samāso. Khurameva bhaṇḍaṃ khurabhaṇḍaṃ. Pubbe nhāpito nhāpitapubbako, visesanassa paranipāto.
373. ஹத்த²கம்மந்தி ஹத்தே²ன காதப்³ப³ங் வட்³ட⁴கிஆதீ³னங் கம்மங். அனுஸ்ஸரணங் ‘‘கப்பியத்தங் மே யேன யாசிதங், அம்ஹேஹி இமஸ்ஸ தா³தப்³ப³’’ந்தி ஏவங் சித்தப்பவத்திஅனுஸாரோ, தஸ்ஸா யாசனாய அனுஸாரோ தத³னுஸாரோ, ததோ லத்³த⁴ங் யங் கிஞ்சி க³ஹேதுந்தி யோஜனா. கம்மதோ நிக்³க³தோ நிக்கம்மோ, விகா⁴ஸாதா³தி³. தங் அயாசித்வாபி காரேதுந்தி ஸம்ப³ந்தோ⁴. ஆஹராபேதுந்தி அரஞ்ஞதோ ஆனேதுங். அபரஸந்தகந்தி தா³ருதிணபலாலாதி³கங் அபரபரிக்³க³ஹிதங்.
373.Hatthakammanti hatthena kātabbaṃ vaḍḍhakiādīnaṃ kammaṃ. Anussaraṇaṃ ‘‘kappiyattaṃ me yena yācitaṃ, amhehi imassa dātabba’’nti evaṃ cittappavattianusāro, tassā yācanāya anusāro tadanusāro, tato laddhaṃ yaṃ kiñci gahetunti yojanā. Kammato niggato nikkammo, vighāsādādi. Taṃ ayācitvāpi kāretunti sambandho. Āharāpetunti araññato ānetuṃ. Aparasantakanti dārutiṇapalālādikaṃ aparapariggahitaṃ.
374. கி³ஹீனங் யத்தகங் தே³தி, கோ³பகே தெ³ந்தே க³ஹேதுங் லப்³ப⁴ங், ஸங்க⁴சேதியஸந்தகே யதா²பரிச்சே²த³ங் க³ஹேதுங் லப்³ப⁴ந்தி யோஜனா. தே³தீதி கோ³பகோ பி⁴க்கூ²னங் தே³தி. க³ஹேதுந்தி தத்தகங் க³ஹேதுங். ஸங்க⁴சேதியஸந்தகேதி வேதனகோ³பகேஹி தீ³யமானே ஸங்க⁴ஸ்ஸ சேதியஸ்ஸ ச ஸந்தகே. யதா²பரிச்சே²த³ந்தி யங் தேஸங் ஸங்கே⁴ன அனுஞ்ஞாதங் ஹோதி ‘‘தி³வஸே தி³வஸே எத்தகங் நாம கா²த³தா²’’தி, தங் பரிச்சே²த³ங் அனதிக்கம்ம. ஸங்கி⁴கே ச சேதியஸந்தகே ச கேணியா க³ஹெத்வா ஆரக்க²ந்தஸ்ஸேவ ஹி தா³னே பரிச்சே²தோ³ நத்தி².
374. Gihīnaṃ yattakaṃ deti, gopake dente gahetuṃ labbhaṃ, saṅghacetiyasantake yathāparicchedaṃ gahetuṃ labbhanti yojanā. Detīti gopako bhikkhūnaṃ deti. Gahetunti tattakaṃ gahetuṃ. Saṅghacetiyasantaketi vetanagopakehi dīyamāne saṅghassa cetiyassa ca santake. Yathāparicchedanti yaṃ tesaṃ saṅghena anuññātaṃ hoti ‘‘divase divase ettakaṃ nāma khādathā’’ti, taṃ paricchedaṃ anatikkamma. Saṅghike ca cetiyasantake ca keṇiyā gahetvā ārakkhantasseva hi dāne paricchedo natthi.
375. ‘‘காயவாசாஹி த்³வீஹி ஆபத்திங் ஆபஜ்ஜெய்யா’’தி யேபு⁴ய்யவஸேன வுத்தங், மேது²னத⁴ம்மே பரூபக்கமே ஸதி ஸாதி³யந்தஸ்ஸ அகிரியஸமுட்டா²னபா⁴வஸம்ப⁴வதோ. ச²ஹி வாதி ஆபத்துப்பத்திகாரணஸங்கா²தேஹி ச²ஹி ஸமுட்டா²னேஹி வா ஆபத்திங் ஆபஜ்ஜெய்யாதி ஸம்ப³ந்தோ⁴. ஸப்³பா³பத்தீனஞ்ஹி காயோ வாசா காயவாசா காயசித்தங் வாசாசித்தங் காயவாசாசித்தந்தி ச² ஸமுட்டா²னானி. தத்த² புரிமானி தீணி அசித்தகானி, பச்சி²மானி ஸசித்தகானி.
375.‘‘Kāyavācāhi dvīhi āpattiṃ āpajjeyyā’’ti yebhuyyavasena vuttaṃ, methunadhamme parūpakkame sati sādiyantassa akiriyasamuṭṭhānabhāvasambhavato. Chahi vāti āpattuppattikāraṇasaṅkhātehi chahi samuṭṭhānehi vā āpattiṃ āpajjeyyāti sambandho. Sabbāpattīnañhi kāyo vācā kāyavācā kāyacittaṃ vācācittaṃ kāyavācācittanti cha samuṭṭhānāni. Tattha purimāni tīṇi acittakāni, pacchimāni sacittakāni.
திதா⁴ ஏகஸமுட்டா²னா, பஞ்சதா⁴ த்³விஸமுட்டி²தா;
Tidhā ekasamuṭṭhānā, pañcadhā dvisamuṭṭhitā;
த்³விதா⁴ திசதுரோ டா²னா, ஏகதா⁴ ச²ஸமுட்டி²தா.
Dvidhā ticaturo ṭhānā, ekadhā chasamuṭṭhitā.
தத்த² சதுத்தே²ன பஞ்சமேன ச²ட்டே²ன ச ஸமுட்டா²னதோ ஏகஸமுட்டா²னா திதா⁴. பட²மசதுத்தே²ஹி ச து³தியபஞ்சமேஹி ச ததியச²ட்டே²ஹி ச சதுத்த²ச²ட்டே²ஹி ச பஞ்சமச²ட்டே²ஹி ச ஸமுட்டா²னதோ த்³விஸமுட்டி²தா பஞ்சதா⁴ . பட²மேஹி ச தீஹி பச்சி²மேஹி ச தீஹி ஸமுட்டா²னதோ திஸமுட்டா²னா த்³விதா⁴. பட²மததியசதுத்த²ச²ட்டே²ஹி ச து³தியததியபஞ்சமச²ட்டே²ஹி ச ஸமுட்டா²னதோ சதுஸமுட்டா²னா த்³விதா⁴. ச²ஹிபி ஸமுட்டி²தோ ச²ஸமுட்டா²னா ஏகதா⁴. அலஜ்ஜி…பே॰… ஸஞ்ஞிதாய சாதி இமேஹி ச²ஹி வா ஆபத்திங் ஆபஜ்ஜெய்யாதி ஸம்ப³ந்தோ⁴. யோ ஸஞ்சிச்ச ஆபத்திங் ஆபஜ்ஜதி, ஆபத்திங் பரிகூ³ஹதி, அக³திக³மனஞ்ச க³ச்ச²தி, ஏதி³ஸோ வுச்சதி அலஜ்ஜீ புக்³க³லோ. அலஜ்ஜீ ச அஞ்ஞாணோ ச குக்குச்சபகதோ ச குக்குச்சேன அபி⁴பூ⁴தோதி த்³வந்தோ³. பா⁴வே த்தப்பச்சயோ.
Tattha catutthena pañcamena chaṭṭhena ca samuṭṭhānato ekasamuṭṭhānā tidhā. Paṭhamacatutthehi ca dutiyapañcamehi ca tatiyachaṭṭhehi ca catutthachaṭṭhehi ca pañcamachaṭṭhehi ca samuṭṭhānato dvisamuṭṭhitā pañcadhā. Paṭhamehi ca tīhi pacchimehi ca tīhi samuṭṭhānato tisamuṭṭhānā dvidhā. Paṭhamatatiyacatutthachaṭṭhehi ca dutiyatatiyapañcamachaṭṭhehi ca samuṭṭhānato catusamuṭṭhānā dvidhā. Chahipi samuṭṭhito chasamuṭṭhānā ekadhā. Alajji…pe… saññitāya cāti imehi chahi vā āpattiṃ āpajjeyyāti sambandho. Yo sañcicca āpattiṃ āpajjati, āpattiṃ parigūhati, agatigamanañca gacchati, ediso vuccati alajjī puggalo. Alajjī ca aññāṇo ca kukkuccapakato ca kukkuccena abhibhūtoti dvando. Bhāve ttappaccayo.
தத்த² யோ அகப்பியபா⁴வங் ஜானந்தோயேவ மத்³தி³த்வா வீதிக்கமங் கரோதி, அயங் அலஜ்ஜிதா ஆபஜ்ஜதி. மந்தோ³ மோமூஹோ கத்தப்³பா³கத்தப்³ப³ங் அஜானந்தோ அகத்தப்³ப³ங் கரோதி, கத்தப்³ப³ங் விராதே⁴தி, அயங் அஞ்ஞாணத்தா ஆபஜ்ஜதி. கப்பியாகப்பியங் நிஸ்ஸாய குக்குச்சே உப்பன்னே வினயத⁴ரங் அபுச்சி²த்வா மத்³தி³த்வா வீதிக்கமதி, அயங் குக்குச்சபகதத்தா ஆபஜ்ஜதி. ஸதியா ப்லவோ ஸம்மோஹோ ஸதிப்லவோ, ஸஹஸெய்யதிசீவரவிப்பவாஸாதீ³னி ஸதிப்லவா ஆபஜ்ஜதி. கப்பஞ்ச அகப்பியஞ்ச கப்பாகப்பியங், கப்பாகப்பியே ஸஞ்ஞா, ஸா அஸ்ஸ அத்தீ²தி கப்பா…பே॰… ஸஞ்ஞீ, தஸ்ஸ பா⁴வோதி தா-பச்சயோ. ய-லோபேன பன ‘‘ஸஞ்ஞிதா’’தி வுத்தங், கரணத்தே² வா பச்சத்தவசனங். தே ச ‘‘அகப்பியே’’திஆதீ³னங் யதா²க்கமேன யுஜ்ஜந்தி. தத்த² யோ அச்ச²மங்ஸங் ‘‘ஸூகரமங்ஸ’’ந்தி கா²த³தி, விகாலே காலஸஞ்ஞிதாய பு⁴ஞ்ஜதி, அயங் அகப்பியே கப்பியஸஞ்ஞிதாய ஆபஜ்ஜதி. யோ பன ஸூகரமங்ஸங் ‘‘அச்ச²மங்ஸ’’ந்தி கா²த³தி, காலே விகாலஸஞ்ஞாய பு⁴ஞ்ஜதி, அயங் கப்பியே அகப்பியஸஞ்ஞிதாய ஆபஜ்ஜதி.
Tattha yo akappiyabhāvaṃ jānantoyeva madditvā vītikkamaṃ karoti, ayaṃ alajjitā āpajjati. Mando momūho kattabbākattabbaṃ ajānanto akattabbaṃ karoti, kattabbaṃ virādheti, ayaṃ aññāṇattā āpajjati. Kappiyākappiyaṃ nissāya kukkucce uppanne vinayadharaṃ apucchitvā madditvā vītikkamati, ayaṃ kukkuccapakatattā āpajjati. Satiyā plavo sammoho satiplavo, sahaseyyaticīvaravippavāsādīni satiplavā āpajjati. Kappañca akappiyañca kappākappiyaṃ, kappākappiye saññā, sā assa atthīti kappā…pe… saññī, tassa bhāvoti tā-paccayo. Ya-lopena pana ‘‘saññitā’’ti vuttaṃ, karaṇatthe vā paccattavacanaṃ. Te ca ‘‘akappiye’’tiādīnaṃ yathākkamena yujjanti. Tattha yo acchamaṃsaṃ ‘‘sūkaramaṃsa’’nti khādati, vikāle kālasaññitāya bhuñjati, ayaṃ akappiye kappiyasaññitāya āpajjati. Yo pana sūkaramaṃsaṃ ‘‘acchamaṃsa’’nti khādati, kāle vikālasaññāya bhuñjati, ayaṃ kappiye akappiyasaññitāya āpajjati.
376. அலஜ்ஜிஅஞ்ஞாணதாய காயவாசாஹி ஆபத்திங் சா²த³யேதி யோஜனா. லிங்கே³தி லிங்க³பரிவத்தனநிமித்தங். லிங்கே³ ஸங்கே⁴ ச க³ணே ச ஏகஸ்மிங் சாதி ஆபத்திவுட்டி²தி சதுதா⁴ ஹோதீதி ஸேஸோ.
376. Alajjiaññāṇatāya kāyavācāhi āpattiṃ chādayeti yojanā. Liṅgeti liṅgaparivattananimittaṃ. Liṅge saṅghe ca gaṇe ca ekasmiṃ cāti āpattivuṭṭhiti catudhā hotīti seso.
377. பச்சயத்³வயேதி சீவரே பிண்ட³பாதே ச. பரிகதோ²பா⁴ஸவிஞ்ஞத்தீதி அபி⁴லாபமத்தமேதங். ஸஹசரிதஸ்ஸ பன நிமித்தகம்மஸ்ஸாபி எத்தே²வ ஸங்க³ஹோ வேதி³தப்³போ³. தத்த² பரியாயேன கத²னங் பரிகதா². உஜுகமேவ அவத்வா யதா² அதி⁴ப்பாயோ விபூ⁴தோ ஹோதி, ஏவங் ஓபா⁴ஸனங் ஓபா⁴ஸோ. பச்சயே உத்³தி³ஸ்ஸ யதா² அதி⁴ப்பாயோ ஞாயதி, ஏவங் விஞ்ஞாபனங் விஞ்ஞத்தி. நிமித்தகரணங் நிமித்தகம்மங். ததியேதி ஸேனாஸனே. ஸேஸேதி கி³லானபச்சயே.
377.Paccayadvayeti cīvare piṇḍapāte ca. Parikathobhāsaviññattīti abhilāpamattametaṃ. Sahacaritassa pana nimittakammassāpi ettheva saṅgaho veditabbo. Tattha pariyāyena kathanaṃ parikathā. Ujukameva avatvā yathā adhippāyo vibhūto hoti, evaṃ obhāsanaṃ obhāso. Paccaye uddissa yathā adhippāyo ñāyati, evaṃ viññāpanaṃ viññatti. Nimittakaraṇaṃ nimittakammaṃ. Tatiyeti senāsane. Seseti gilānapaccaye.
378. பஞ்சன்னங் ஸஹத⁴ம்மிகானங் அச்சயே தா³னங் ந ரூஹதீதி ஸம்ப³ந்தோ⁴. அச்சயே தா³னந்தி ‘‘மமச்சயேன மய்ஹங் ஸந்தகங் உபஜ்ஜா²யஸ்ஸ ஹோதூ’’திஆதி³னா ஏவங் அத்தனோ அபக³மே தா³னங். தந்தி அச்சயேன தி³ன்னங் சீவராதி³கங் ஸங்க⁴ஸ்ஸேவ ச ஹோதி, ந பி⁴க்கு²னோதி அதி⁴ப்பாயோ. கி³ஹீனங் பனாதி கி³ஹீனங் அச்சயே தா³னங் பன. இத³மெத்த² தா³னக்³க³ஹணலக்க²ணங் – ‘‘இத³ங் துய்ஹங் த³ம்மீ’’திஆதி³னா ஸம்முகா² வா ‘‘இத்த²ன்னாமஸ்ஸ தே³மீ’’திஆதி³னா பரம்முகா²பி தி³ன்னங்யேவ ஹோதி. ‘‘துய்ஹங் க³ண்ஹாஹீ’’தி வுத்தே ‘‘மய்ஹங் க³ண்ஹாமீ’’தி வத³தி, ஸுதி³ன்னங் ஸுக்³க³ஹிதஞ்ச. ‘‘தவ ஸந்தகங் கரோஹி, தவ ஸந்தகங் ஹோது, தவ ஸந்தகங் காராபேஹீ’’தி வுத்தே ‘‘மம ஸந்தகங் கரோமி, மம ஸந்தகங் ஹோது, மம ஸந்தகங் கரிஸ்ஸாமீ’’தி வத³தி. து³த்³தி³ன்னங் து³க்³க³ஹிதஞ்ச. ஸசே பன ‘‘தவ ஸந்தகங் கரோஹீ’’தி வுத்தே ‘‘ஸாது⁴, ப⁴ந்தே, மய்ஹங் க³ண்ஹாமீ’’தி க³ண்ஹாதி, ஸுக்³க³ஹிதந்தி.
378. Pañcannaṃ sahadhammikānaṃ accaye dānaṃ na rūhatīti sambandho. Accaye dānanti ‘‘mamaccayena mayhaṃ santakaṃ upajjhāyassa hotū’’tiādinā evaṃ attano apagame dānaṃ. Tanti accayena dinnaṃ cīvarādikaṃ saṅghasseva ca hoti, na bhikkhunoti adhippāyo. Gihīnaṃ panāti gihīnaṃ accaye dānaṃ pana. Idamettha dānaggahaṇalakkhaṇaṃ – ‘‘idaṃ tuyhaṃ dammī’’tiādinā sammukhā vā ‘‘itthannāmassa demī’’tiādinā parammukhāpi dinnaṃyeva hoti. ‘‘Tuyhaṃ gaṇhāhī’’ti vutte ‘‘mayhaṃ gaṇhāmī’’ti vadati, sudinnaṃ suggahitañca. ‘‘Tava santakaṃ karohi, tava santakaṃ hotu, tava santakaṃ kārāpehī’’ti vutte ‘‘mama santakaṃ karomi, mama santakaṃ hotu, mama santakaṃ karissāmī’’ti vadati. Duddinnaṃ duggahitañca. Sace pana ‘‘tava santakaṃ karohī’’ti vutte ‘‘sādhu, bhante, mayhaṃ gaṇhāmī’’ti gaṇhāti, suggahitanti.
379. பி⁴க்கு² வா ஸாமணேரோ வா உபஸ்ஸயே பி⁴க்கு²னீனங் விஹாரே காலங் கயிராத² யதி³ காலங்கரெய்ய, தத்த² தஸ்மிங் உபி⁴ன்னங் ஸந்தகே பி⁴க்கு²ஸங்கோ⁴ ஏவ தா³யஜ்ஜோ ஸாமீ ஹோதீதி ஸேஸோ. ஸேஸேபீதி அவஸேஸே பி⁴க்கு²னிஸிக்க²மானஸாமணேரிஸந்தகேபி. அயங் நயோதி யதி³ தே பி⁴க்கூ²னங் விஹாரே காலங் கரெய்யுங், தேஸங் ஸந்தகே பி⁴க்கு²னிஸங்கோ⁴ ஏவ தா³யஜ்ஜோதி அயமேவ நயோதி அத்தோ².
379. Bhikkhu vā sāmaṇero vā upassaye bhikkhunīnaṃ vihāre kālaṃ kayirātha yadi kālaṅkareyya, tattha tasmiṃ ubhinnaṃ santake bhikkhusaṅgho eva dāyajjo sāmī hotīti seso. Sesepīti avasese bhikkhunisikkhamānasāmaṇerisantakepi. Ayaṃ nayoti yadi te bhikkhūnaṃ vihāre kālaṃ kareyyuṃ, tesaṃ santake bhikkhunisaṅgho eva dāyajjoti ayameva nayoti attho.
380. ‘‘இமங் நெத்வா அஸுகஸ்ஸ தே³ஹீ’’தி தி³ன்னங் யாவ பரஸ்ஸ ஹத்த²ங் ந பாபுணாதி, தாவ புரிமஸ்ஸேவ, யோ பஹிணதி, தஸ்ஸேவாதி அத்தோ². த³ம்மீதி ‘‘இத்த²ன்னாமஸ்ஸ தே³மீ’’தி தி³ன்னங் பன பச்சி²மஸ்ஸேவ, யஸ்ஸ பஹிணதி, தஸ்ஸேவ ஸந்தகந்தி அத்தோ². இமங் விதி⁴ங் ‘‘வுத்தனயேன இமே ஸாமினோ ஹொந்தீ’’தி ஏதங் பகாரங் ஞத்வா விஸ்ஸாஸக்³கா³ஹங் வா க³ண்ஹே, மதகசீவரங் வா அதி⁴ட்டே²தி யோஜனா. விஸ்ஸாஸகா³ஹந்தி ஸாமீஸு ஜீவந்தேஸு விஸ்ஸாஸேன கா³ஹங் க³ஹெத்வா. மதகசீவரங் அதி⁴ட்டே²தி தேஸு மதேஸு அஞ்ஞே சே பி⁴க்கூ² ந ஸந்தி, ‘‘மய்ஹங் தங் பாபுணாதீ’’தி மதகசீவரங் அதி⁴ட்டெ²ய்ய. அஞ்ஞேஸங் அத³த்வா தூ³ரே ட²பிதமதகபரிக்கா²ரா பன தத்த² தத்த² ஸங்க⁴ஸ்ஸேவ ஹொந்தி. பி⁴க்கு²ம்ஹி காலகதே ஸங்கோ⁴ ஸாமீ பத்தசீவரே, அபிச கி³லானுபட்டா²கா ப³ஹூபகாரா, ஸங்கே⁴ன திசீவரஞ்ச பத்தஞ்ச கி³லானுபட்டா²கானங் தா³தப்³ப³ங். யங் தத்த² லஹுப⁴ண்ட³ங் லஹுபரிக்கா²ரங், தங் ஸம்முகீ²பூ⁴தேன ஸங்கே⁴ன பா⁴ஜேதப்³ப³ங். யங் தத்த² க³ருப⁴ண்ட³ங் க³ருபரிக்கா²ரங், தங் ஆக³தானாக³தஸ்ஸ சாதுத்³தி³ஸஸ்ஸ ஸங்க⁴ஸ்ஸ அவிஸ்ஸஜ்ஜியங் அவேப⁴ங்கி³யங். கி³லானுபட்டா²கோ நாம கி³ஹீ வா ஹோது பப்³ப³ஜிதோ வா, அந்தமஸோ மாதுகா³மோபி, ஸப்³பே³ பா⁴க³ங் லப⁴ந்தி. ப³ஹூ சே ஸப்³பே³ ஸமக்³கா³ ஹுத்வா உபட்ட²ஹந்தி, ஸப்³பே³ஸங் ஸமபா⁴கோ³ தா³தப்³போ³. யோ பனெத்த² விஸேஸேன உபட்ட²ஹதி, தஸ்ஸ விஸேஸோ காதப்³போ³.
380. ‘‘Imaṃ netvā asukassa dehī’’ti dinnaṃ yāva parassa hatthaṃ na pāpuṇāti, tāva purimasseva, yo pahiṇati, tassevāti attho. Dammīti ‘‘itthannāmassa demī’’ti dinnaṃ pana pacchimasseva, yassa pahiṇati, tasseva santakanti attho. Imaṃ vidhiṃ ‘‘vuttanayena ime sāmino hontī’’ti etaṃ pakāraṃ ñatvā vissāsaggāhaṃ vā gaṇhe, matakacīvaraṃ vā adhiṭṭheti yojanā. Vissāsagāhanti sāmīsu jīvantesu vissāsena gāhaṃ gahetvā. Matakacīvaraṃ adhiṭṭheti tesu matesu aññe ce bhikkhū na santi, ‘‘mayhaṃ taṃ pāpuṇātī’’ti matakacīvaraṃ adhiṭṭheyya. Aññesaṃ adatvā dūre ṭhapitamatakaparikkhārā pana tattha tattha saṅghasseva honti. Bhikkhumhi kālakate saṅgho sāmī pattacīvare, apica gilānupaṭṭhākā bahūpakārā, saṅghena ticīvarañca pattañca gilānupaṭṭhākānaṃ dātabbaṃ. Yaṃ tattha lahubhaṇḍaṃ lahuparikkhāraṃ, taṃ sammukhībhūtena saṅghena bhājetabbaṃ. Yaṃ tattha garubhaṇḍaṃ garuparikkhāraṃ, taṃ āgatānāgatassa cātuddisassa saṅghassa avissajjiyaṃ avebhaṅgiyaṃ. Gilānupaṭṭhāko nāma gihī vā hotu pabbajito vā, antamaso mātugāmopi, sabbe bhāgaṃ labhanti. Bahū ce sabbe samaggā hutvā upaṭṭhahanti, sabbesaṃ samabhāgo dātabbo. Yo panettha visesena upaṭṭhahati, tassa viseso kātabbo.
381. ‘‘லோஹப⁴ண்டே³ பஹரணிங் ட²பெத்வா ஸப்³ப³ங் கப்பதீ’’திஆதி³னா யோஜேதப்³ப³ங். பஹரணிந்தி ஆவுத⁴ங். பாது³கா ச ஸங்கமனீயோ பல்லங்கோ சாதி த்³வந்தோ³. மத்திகாமயே கதகங் கும்ப⁴காரிகஞ்ச ட²பெத்வா ஸப்³ப³ங் கப்பதீதி யோஜனீயங், த⁴னியஸ்ஸேவ ஸப்³ப³மத்திகாமயகுடி கும்ப⁴காரிகாதி.
381. ‘‘Lohabhaṇḍe paharaṇiṃ ṭhapetvā sabbaṃ kappatī’’tiādinā yojetabbaṃ. Paharaṇinti āvudhaṃ. Pādukā ca saṅkamanīyo pallaṅko cāti dvando. Mattikāmaye katakaṃ kumbhakārikañca ṭhapetvā sabbaṃ kappatīti yojanīyaṃ, dhaniyasseva sabbamattikāmayakuṭi kumbhakārikāti.
பகிண்ணகனித்³தே³ஸவண்ணனா நிட்டி²தா.
Pakiṇṇakaniddesavaṇṇanā niṭṭhitā.
