| Library / Tipiṭaka / ਤਿਪਿਟਕ • Tipiṭaka / ਖੁਦ੍ਦਸਿਕ੍ਖਾ-ਮੂਲਸਿਕ੍ਖਾ • Khuddasikkhā-mūlasikkhā |
੪੧. ਪਕਿਣ੍ਣਕਨਿਦ੍ਦੇਸવਣ੍ਣਨਾ
41. Pakiṇṇakaniddesavaṇṇanā
੩੩੫. ਸਦ੍વਾਰਬਨ੍ਧਨੇ ਸੋਦੁਕ੍ਖਲਕਪਾਸਕੇ ਠਾਨੇ ਦਿવਾ ਸਯਨ੍ਤੇਨ ਪਰਿવਤ੍ਤਕਂ ਦ੍વਾਰਂ ਬਨ੍ਧੇਯ੍ਯਾਤਿ ਸਮ੍ਬਨ੍ਧੋ। ਦ੍વਾਰਞ੍ਚ ਦ੍વਾਰਬਨ੍ਧਨਞ੍ਚ ਦ੍વਾਰਬਨ੍ਧਨਾਨਿ ਮਜ੍ਝੇਪਦਲੋਪવਸੇਨ, ਬਨ੍ਧਨ-ਸਦ੍ਦੇਨੇવ વਾ ਦ੍વਾਰਬਾਹਾ વੁਚ੍ਚਨ੍ਤਿ, ਸਹ ਦ੍વਾਰਬਨ੍ਧਨੇਹੀਤਿ ਸਦ੍વਾਰਬਨ੍ਧਨਂ, ਠਾਨਂ। ਹੇਟ੍ਠਾ ਉਦੁਕ੍ਖਲਕਞ੍ਚ ਉਪਰਿ ਪਾਸਕੋ ਚ, ਸਹ ਉਦੁਕ੍ਖਲਪਾਸਕੇਹੀਤਿ ਸਮਾਸੋ। ਤਾਦਿਸੇ ਠਾਨੇ ਪਾਕਾਰਾਦਿਪਰਿਕ੍ਖੇਪੇਨ ਭવਿਤਬ੍ਬਨ੍ਤਿ ਪਰਿਕ੍ਖਿਤ੍ਤੇਤਿ વਿਞ੍ਞਾਯਤਿ। ਸੋ ਚ ਉਚ੍ਚਤੋ ਸਹਸੇਯ੍ਯਪ੍ਪਹੋਨਕੇ વੁਤ੍ਤਨਯੋਤਿ વਦਨ੍ਤਿ । ਸਯਨ੍ਤੇਨਾਤਿ ਪਾਦੇ ਭੂਮਿਤੋ ਮੋਚੇਤ੍વਾ ਨਿਪਜ੍ਜਨ੍ਤੇਨ। ਪਰਿવਤ੍ਤਕਨ੍ਤਿ ਸਂવਰਣવਿવਰਣવਸੇਨ ਇਤੋ ਚਿਤੋ ਚ ਪਰਿવਤ੍ਤਨਯੋਗ੍ਗਂ। ਦ੍વਾਰਨ੍ਤਿ ਅਨ੍ਤਮਸੋ ਦੁਸ੍ਸਸਾਣਿਦ੍વਾਰਮ੍ਪਿ। ਬਨ੍ਧੇਯ੍ਯਾਤਿ ਸਬ੍ਬਨ੍ਤਿਮੇਨ વਿਧਿਨਾ ਯਾવਤਾ ਸੀਸਂ ਨ ਪવਿਸਤਿ, ਤਾવਤਾਪਿ ਬਨ੍ਧੇਯ੍ਯ, ਸਂવਰੇਯ੍ਯਾਤਿ વੁਤ੍ਤਂ ਹੋਤਿ।
335. Sadvārabandhane sodukkhalakapāsake ṭhāne divā sayantena parivattakaṃ dvāraṃ bandheyyāti sambandho. Dvārañca dvārabandhanañca dvārabandhanāni majjhepadalopavasena, bandhana-saddeneva vā dvārabāhā vuccanti, saha dvārabandhanehīti sadvārabandhanaṃ, ṭhānaṃ. Heṭṭhā udukkhalakañca upari pāsako ca, saha udukkhalapāsakehīti samāso. Tādise ṭhāne pākārādiparikkhepena bhavitabbanti parikkhitteti viññāyati. So ca uccato sahaseyyappahonake vuttanayoti vadanti . Sayantenāti pāde bhūmito mocetvā nipajjantena. Parivattakanti saṃvaraṇavivaraṇavasena ito cito ca parivattanayoggaṃ. Dvāranti antamaso dussasāṇidvārampi. Bandheyyāti sabbantimena vidhinā yāvatā sīsaṃ na pavisati, tāvatāpi bandheyya, saṃvareyyāti vuttaṃ hoti.
੩੩੬. ਆਭੋਗੋ ਚਾਪੀਤਿ ‘‘ਏਸ ਜਗ੍ਗਿਸ੍ਸਤੀ’’ਤਿ ਆਭੋਗੋ ਚਾਪਿ। ਚ-ਸਦ੍ਦੇਨ ‘‘ਦ੍વਾਰਂ ਜਗ੍ਗਾਹੀ’’ਤਿ વਚਨਮ੍ਪਿ ਸਮੁਚ੍ਚਿਨੋਤਿ। ਸવਸੇ ਤਂ ਆਕਾਰਂ વਿਨਾਤਿ ਸਸ੍ਸ ਅਤ੍ਤਨੋ વਸੇ ਆਯਤ੍ਤੇ ਠਾਨੇ, ਯਤ੍ਥ ਪਨ ਬਹੂਨਂ ਸਞ੍ਚਰਣਤ੍ਤਾ ਦ੍વਾਰਂ ਸਂવੁਤਮ੍ਪਿ ਸਂવੁਤਟ੍ਠਾਨੇ ਨ ਤਿਟ੍ਠਤਿ, ਦ੍વਾਰਂ ਅਲਭਨ੍ਤਾ ਪਾਕਾਰਂ ਅਭਿਰੁਹਿਤ੍વਾਪਿ વਿਚਰਨ੍ਤਿ, ਤਾਦਿਸੇ ਪਰਿવੇਣੇ ਸਂવਰਣਕਿਚ੍ਚਂ ਨਤ੍ਥਿ। ਅਥ વਾ ਸਸ੍ਸ વਸੋ ਆਯਤ੍ਤੋ, ਨ ਯਕ੍ਖਾਦੀਨਂ ਤੇਹਿ ਗਹਿਤਕਤ੍ਤਸ੍ਸ, ਬਨ੍ਧਿਤ੍વਾ ਨਿਪਜ੍ਜਾਪਿਤਤ੍ਤਸ੍ਸ ਚ ਅਭਾવੇਨਾਤਿ ਸવਸੋ। ਤਸ੍ਮਿਂ ਸਤਿ ਪੁਬ੍ਬੇ વੁਤ੍ਤਦ੍વਾਰਂ ਸਂવਰਣਆਭੋਗਕਰਣવਚਨਸਙ੍ਖਾਤਂ ਆਕਾਰਨ੍ਤਿ ਅਤ੍ਥੋ।
336.Ābhogo cāpīti ‘‘esa jaggissatī’’ti ābhogo cāpi. Ca-saddena ‘‘dvāraṃ jaggāhī’’ti vacanampi samuccinoti. Savase taṃ ākāraṃ vināti sassa attano vase āyatte ṭhāne, yattha pana bahūnaṃ sañcaraṇattā dvāraṃ saṃvutampi saṃvutaṭṭhāne na tiṭṭhati, dvāraṃ alabhantā pākāraṃ abhiruhitvāpi vicaranti, tādise pariveṇe saṃvaraṇakiccaṃ natthi. Atha vā sassa vaso āyatto, na yakkhādīnaṃ tehi gahitakattassa, bandhitvā nipajjāpitattassa ca abhāvenāti savaso. Tasmiṃ sati pubbe vuttadvāraṃ saṃvaraṇaābhogakaraṇavacanasaṅkhātaṃ ākāranti attho.
੩੩੭. ਰਤਨਾਨੀਤਿ ਮੁਤ੍ਤਾਦੀਨਿ ਦਸવਿਧਾਨਿ। ਤਤ੍ਥ ਪਨ ਜਾਤਿਫਲਿਕਂ ਉਪਾਦਾਯ ਸਬ੍ਬੋਪਿ ਮਣਿ વੇਲ਼ੁਰਿਯੋਪਿ ਲੋਹਿਤਙ੍ਕੋ ਮਸਾਰਗਲ੍ਲੋ ਚ ਧੋਤਾਪਿ ਅਧੋਤવਿਦ੍ਧਾਪਿ ਅਨਾਮਾਸਾ, ਕਾਚਮਣਿ ਚ ਪਾਨੀਯਸਙ੍ਖੋ ਧੋਤੋ ਅਧੋਤੋਪਿ ਆਮਾਸਾ, ਸਿਲਾ ਧੋਤવਿਦ੍ਧਾ ਸੁવਣ੍ਣੇਨ ਸਦ੍ਧਿਂ ਪਚਿਤਾ ਮੁਗ੍ਗવਣ੍ਣਾ ਚ ਅਨਾਮਾਸਾ। ਚੇਤਿਯਘਰਗੋਪਕਾਨਂ ਸੁવਣ੍ਣਚੇਤਿਯੇ ਕਚવਰਮੇવ ਹਰਿਤੁਂ વਟ੍ਟਤਿ। ਆਰਕੂਟਲੋਹਮ੍ਪਿ ਜਾਤਰੂਪਗਤਿਕਮੇવ। ਇਤ੍ਥਿਰੂਪਾਨੀਤਿ ਅਨ੍ਤਮਸੋ ਪਿਟ੍ਠਮਯਇਤ੍ਥਿਰੂਪਾਨਿਪਿ। ਧਞ੍ਞਨ੍ਤਿ ਅਨ੍ਤਮਸੋ ਤਤ੍ਥਜਾਤਕਮ੍ਪਿ ਮਗ੍ਗੇ ਪਸਾਰਿਤਮ੍ਪਿ ਸਤ੍ਤવਿਧਂ ਧਞ੍ਞਂ। ਕੀਲ਼ਾવਸੇਨ ਅਪਰਣ੍ਣਾਨਿ ਤਾਲਫਲਾਦੀਨਿਪਿ ਅਨਾਮਾਸਾਨਿ, ਪਸਾਰਿਤਮ੍ਪਿ ਨ ਮਦ੍ਦਨ੍ਤੇਨ ਗਨ੍ਤਬ੍ਬਂ, ਅਸਤਿ ਮਗ੍ਗੇ ਮਗ੍ਗਂ ਅਧਿਟ੍ਠਾਯ ਗਨ੍ਤਬ੍ਬਂ। ਇਤ੍ਥਿਪਸਾਧਨਨ੍ਤਿ ਅਨ੍ਤਮਸੋ ਪਿਲ਼ਨ੍ਧਨਤ੍ਥਾਯ ਠਪਿਤਂ ਨਿવਾਸਨਤਾਲਪਣ੍ਣਮੁਦ੍ਦਿਕਮ੍ਪਿ।
337.Ratanānīti muttādīni dasavidhāni. Tattha pana jātiphalikaṃ upādāya sabbopi maṇi veḷuriyopi lohitaṅko masāragallo ca dhotāpi adhotaviddhāpi anāmāsā, kācamaṇi ca pānīyasaṅkho dhoto adhotopi āmāsā, silā dhotaviddhā suvaṇṇena saddhiṃ pacitā muggavaṇṇā ca anāmāsā. Cetiyagharagopakānaṃ suvaṇṇacetiye kacavarameva harituṃ vaṭṭati. Ārakūṭalohampi jātarūpagatikameva. Itthirūpānīti antamaso piṭṭhamayaitthirūpānipi. Dhaññanti antamaso tatthajātakampi magge pasāritampi sattavidhaṃ dhaññaṃ. Kīḷāvasena aparaṇṇāni tālaphalādīnipi anāmāsāni, pasāritampi na maddantena gantabbaṃ, asati magge maggaṃ adhiṭṭhāya gantabbaṃ. Itthipasādhananti antamaso piḷandhanatthāya ṭhapitaṃ nivāsanatālapaṇṇamuddikampi.
੩੩੮. ਸਿਤ੍ਥਤੇਲੋਦਤੇਲੇਹੀਤਿ ਮਧੁਸਿਤ੍ਥਕਨਿਯ੍ਯਾਸਾਦੀਸੁ ਯੇਨ ਕੇਨਚਿ ਤੇਲਮਿਸ੍ਸਕਸਿਲੇਸੇਨ ਚ ਉਦਕਮਿਸ੍ਸਕਤੇਲੇਨ ਚ। ਫਣਹਤ੍ਥਫਣੇਹੀਤਿ ਫਣਮਿવ ਫਣਂ, ਅਙ੍ਗੁਲੀਹਿ ਫਣਕਿਚ੍ਚਕਰਣੇਨ ਹਤ੍ਥੋਯੇવ ਫਣਂ ਹਤ੍ਥਫਣਂ, ਦਨ੍ਤਮਯਾਦਿ ਯਂ ਕਿਞ੍ਚਿ ਫਣਞ੍ਚੇવ ਹਤ੍ਥਫਣਞ੍ਚਾਤਿ ਦ੍વਨ੍ਦੋ। ਓਸਣ੍ਠੇਯ੍ਯਾਤਿ ਓਲਿਖਿਤ੍વਾ ਸਨ੍ਨਿਸੀਦਾਪੇਯ੍ਯ।
338.Sitthatelodatelehīti madhusitthakaniyyāsādīsu yena kenaci telamissakasilesena ca udakamissakatelena ca. Phaṇahatthaphaṇehīti phaṇamiva phaṇaṃ, aṅgulīhi phaṇakiccakaraṇena hatthoyeva phaṇaṃ hatthaphaṇaṃ, dantamayādi yaṃ kiñci phaṇañceva hatthaphaṇañcāti dvando. Osaṇṭheyyāti olikhitvā sannisīdāpeyya.
੩੩੯. ਏਕਪਾવੁਰਣਾ વਾ ਏਕਤ੍ਥਰਣਾ વਾ ਨ ਤੁવਟ੍ਟਯੁਂ, ਏਕਮਞ੍ਚੇ ਨ ਤੁવਟ੍ਟਯੁਨ੍ਤਿ ਯੋਜਨਾ। ਏਕਂ ਪਾવੁਰਣਂ ਏਕਂ ਅਤ੍ਥਰਣਂ ਏਤੇਸਨ੍ਤਿ વਿਗ੍ਗਹੋ। ਨ ਤੁવਟ੍ਟਯੁਨ੍ਤਿ ਨ ਨਿਪਜ੍ਜੇਯ੍ਯੁਂ। ਏਕਸ੍ਮਿਂ ਭਾਜਨੇ વਾਪਿ ਨ ਭੁਞ੍ਜੇਯ੍ਯੁਨ੍ਤਿ ਯੋਜੇਤਬ੍ਬਂ।
339. Ekapāvuraṇā vā ekattharaṇā vā na tuvaṭṭayuṃ, ekamañce na tuvaṭṭayunti yojanā. Ekaṃ pāvuraṇaṃ ekaṃ attharaṇaṃ etesanti viggaho. Na tuvaṭṭayunti na nipajjeyyuṃ. Ekasmiṃ bhājane vāpi na bhuñjeyyunti yojetabbaṃ.
੩੪੦. ਮਨੁਸ੍ਸਾਨਂ ਪਮਾਣਙ੍ਗੁਲੇਨ ਅਟ੍ਠ ਅਙ੍ਗੁਲਾਨਿ ਯਸ੍ਸ, ਅਧਿਕੇਨ ਸਹਿਤਂ ਅਟ੍ਠਙ੍ਗੁਲਨ੍ਤਿ ਸਮਾਸੋ। ਲਸੁਣਂ ਮਗਧੇਸੁ ਜਾਤਂ ਆਮਲਕਭਣ੍ਡਿਕਂ ਲਸੁਣਂ ਨ ਖਾਦੇਯ੍ਯਾਤਿ ਸਮ੍ਬਨ੍ਧੋ। ਨ ਅਕਲ੍ਲਕੋਤਿ ਅਗਿਲਾਨੋ।
340. Manussānaṃ pamāṇaṅgulena aṭṭha aṅgulāni yassa, adhikena sahitaṃ aṭṭhaṅgulanti samāso. Lasuṇaṃ magadhesu jātaṃ āmalakabhaṇḍikaṃ lasuṇaṃ na khādeyyāti sambandho. Na akallakoti agilāno.
੩੪੧. ਹੀਨੁਕ੍ਕਟ੍ਠੇਹਿ ਜਾਤਿਆਦੀਹਿ ਉਕ੍ਕਟ੍ਠਂ વਾ ਹੀਨਂ વਾ ਉਜੁਂ વਾ ਅਞ੍ਞਾਪਦੇਸੇਨ વਾ ਦવਾ વਦੇ, ਦੁਬ੍ਭਾਸਿਤਨ੍ਤਿ ਸਮ੍ਬਨ੍ਧੋ। ਜਾਤਿਆਦੀਹੀਤਿ ਜਾਤਿਨਾਮਗੋਤ੍ਤਕਮ੍ਮਸਿਪ੍ਪਆਬਾਧਲਿਙ੍ਗਕਿਲੇਸਆਪਤ੍ਤਿਅਕ੍ਕੋਸੇਹਿ । ਉਕ੍ਕਟ੍ਠਨ੍ਤਿ ਜਾਤ੍ਯਾਦੀਹਿਯੇવ ਉਕ੍ਕਟ੍ਠਂ ਉਪਸਮ੍ਪਨ੍ਨਂ ਅਨੁਪਸਮ੍ਪਨ੍ਨਂ વਾ। ਦવਾਤਿ ਕੇਲ਼ਿਹਸਾਧਿਪ੍ਪਾਯਤਾਯ। ਉਜੁਂ વਾਤਿ ‘‘ਚਣ੍ਡਾਲੋਸੀ’’ਤਿਆਦਿਨਾ ਨਯੇਨ। ਅਞ੍ਞਾਪਦੇਸੇਨ વਾਤਿ ‘‘ਸਨ੍ਤਿ ਇਧੇਕਚ੍ਚੇ ਚਣ੍ਡਾਲਾ’’ਤਿਆਦਿਨਾ ਨਯੇਨ।
341. Hīnukkaṭṭhehi jātiādīhi ukkaṭṭhaṃ vā hīnaṃ vā ujuṃ vā aññāpadesena vā davā vade, dubbhāsitanti sambandho. Jātiādīhīti jātināmagottakammasippaābādhaliṅgakilesaāpattiakkosehi . Ukkaṭṭhanti jātyādīhiyeva ukkaṭṭhaṃ upasampannaṃ anupasampannaṃ vā. Davāti keḷihasādhippāyatāya. Ujuṃ vāti ‘‘caṇḍālosī’’tiādinā nayena. Aññāpadesena vāti ‘‘santi idhekacce caṇḍālā’’tiādinā nayena.
੩੪੨. ਦੀਘੇ ਨਖੇਤਿ ਮਂਸਪ੍ਪਮਾਣਤੋ। ਦੀਘੇ ਕੇਸੇਤਿ ਦ੍વਙ੍ਗੁਲਤੋ। ਸਚੇਪਿ ਨ ਦੀਘਾ, ਦੁਮਾਸਤੋ ਏਕਦਿવਸਮ੍ਪਿ ਅਤਿਕ੍ਕਾਮੇਤੁਂ ਨ ਲਭਤਿ। ਦੀਘੇ ਨਾਸਲੋਮੇਤਿ ਨਾਸਤੋ ਬਹਿ ਨਿਕ੍ਖਨ੍ਤੇ। વੀਸਤਿਮਟ੍ਠਨ੍ਤਿ વੀਸਤਿਯਾ ਨਖਾਨਂ ਮਟ੍ਠਞ੍ਚ। ਸਮ੍ਬਾਧੇਤਿ ਉਭੋਸੁ ਉਪਕਚ੍ਛਕੇਸੁ, ਮੁਤ੍ਤਕਰਣੇ ਚ ਲੋਮਹਾਰਣਞ੍ਚ ਨ ਲਬ੍ਭਾਤਿ ਸਮ੍ਬਨ੍ਧਨੀਯਂ। ਨ ਲਬ੍ਭਾਤਿ ਏਤੇ ਮਟ੍ਠਾਦਯੋ ਨ ਲਬ੍ਭਨ੍ਤੀਤਿ ਅਤ੍ਥੋ, ਨਿਪਾਤੋ વਾ ਲਬ੍ਭਾਤਿ। ਆਬਾਧਪ੍ਪਚ੍ਚਯਾ ਪਨ ਸਮ੍ਬਾਧੇ ਲੋਮਂ ਸਂਹਰਿਤੁਂ વਟ੍ਟਤਿ।
342.Dīghe nakheti maṃsappamāṇato. Dīghe keseti dvaṅgulato. Sacepi na dīghā, dumāsato ekadivasampi atikkāmetuṃ na labhati. Dīghe nāsalometi nāsato bahi nikkhante. Vīsatimaṭṭhanti vīsatiyā nakhānaṃ maṭṭhañca. Sambādheti ubhosu upakacchakesu, muttakaraṇe ca lomahāraṇañca na labbhāti sambandhanīyaṃ. Na labbhāti ete maṭṭhādayo na labbhantīti attho, nipāto vā labbhāti. Ābādhappaccayā pana sambādhe lomaṃ saṃharituṃ vaṭṭati.
੩੪੩. ਸਙ੍ਘੁਦ੍ਦਿਟ੍ਠਂ વਾ ਸਙ੍ਘਿਕਂ વਾ ਸਯਨਾਸਨਂ ਯਥਾવੁਡ੍ਢਂ ਨ ਬਾਧੇਯ੍ਯਾਤਿ ਯੋਜਨਾ। ਸਙ੍ਘਸ੍ਸ ਉਦ੍ਦਿਟ੍ਠਂ ਸਙ੍ਘੁਦ੍ਦਿਟ੍ਠਂ, ਸਙ੍ਘਂ ਉਦ੍ਦਿਸ੍ਸ ਕਤਨ੍ਤਿ ਅਧਿਪ੍ਪਾਯੋ। ਯੋ ਯੋ વੁਡ੍ਢੋ ਯਥਾવੁਡ੍ਢਂ, વੁਡ੍ਢਪ੍ਪਟਿਪਾਟਿਯਾਤਿ ਅਤ੍ਥੋ। ਨ ਬਾਧੇਯ੍ਯਾਤਿ ਨ ਪਟਿਬਾਹੇਯ੍ਯ। ਅਲ੍ਲਪਾਦਾ ਨਾਮ ਯੇਹਿ ਅਕ੍ਕਨ੍ਤਟ੍ਠਾਨੇ ਉਦਕਂ ਪਞ੍ਞਾਯਤਿ। ਸਯਨਾਸਨਨ੍ਤਿ ਮਞ੍ਚਪੀਠਾਦਿ, ਇਮਿਨਾ ਪਰਿਭਣ੍ਡਕਤਾ ਭੂਮੀਤਿਪਿ ਉਪਲਕ੍ਖਿਤਾ। ਸੁਧੋਤਪਾਦਕਂ વਾਪਿ ਸਉਪਾਹਨੋ ਤਥੇવਾਤਿ ਸਮ੍ਬਨ੍ਧੋ। ਸੁਧੋਤਪਾਦਕਨ੍ਤਿ ਧੋਤਪਾਦੇਹੇવ ਅਕ੍ਕਮਿਤਬ੍ਬਟ੍ਠਾਨਂ। ਧੋਤਾ ਪਾਦਾ ਯਸ੍ਸ ਅਕ੍ਕਮਨਸ੍ਸਾਤਿ ਕਿਰਿਯਾવਿਸੇਸਨਸਮਾਸੋ। ਯਦਿ ਪਨ ਤਤ੍ਥ ਨੇવਾਸਿਕਾ ਅਧੋਤਪਾਦੇਹਿਪਿ વਲ਼ਞ੍ਜੇਨ੍ਤਿ, ਤਥੇવ વਲ਼ਞ੍ਜੇਤੁਂ વਟ੍ਟਤਿ। ਤਥੇવਾਤਿ ਪਰਿਭਣ੍ਡਕਤਂ ਭੂਮਿਂ ਸੇਨਾਸਨਂ વਾ ਨਕ੍ਕਮੇਤਿ ਅਤ੍ਥੋ।
343. Saṅghuddiṭṭhaṃ vā saṅghikaṃ vā sayanāsanaṃ yathāvuḍḍhaṃ na bādheyyāti yojanā. Saṅghassa uddiṭṭhaṃ saṅghuddiṭṭhaṃ, saṅghaṃ uddissa katanti adhippāyo. Yo yo vuḍḍho yathāvuḍḍhaṃ, vuḍḍhappaṭipāṭiyāti attho. Na bādheyyāti na paṭibāheyya. Allapādā nāma yehi akkantaṭṭhāne udakaṃ paññāyati. Sayanāsananti mañcapīṭhādi, iminā paribhaṇḍakatā bhūmītipi upalakkhitā. Sudhotapādakaṃ vāpi saupāhano tathevāti sambandho. Sudhotapādakanti dhotapādeheva akkamitabbaṭṭhānaṃ. Dhotā pādā yassa akkamanassāti kiriyāvisesanasamāso. Yadi pana tattha nevāsikā adhotapādehipi vaḷañjenti, tatheva vaḷañjetuṃ vaṭṭati. Tathevāti paribhaṇḍakataṃ bhūmiṃ senāsanaṃ vā nakkameti attho.
੩੪੪. ਸਙ੍ਘਾਟਿਯਾਤਿ ਅਧਿਟ੍ਠਿਤਸਙ੍ਘਾਟਿਯਾ। ਪਾਦੇ ਪਰਿਗ੍ਗਹੇਤ੍વਾ ਆਸਨਂ ਪਲ੍ਲਤ੍ਥੋ, ਪਲ੍ਲਤ੍ਥਂ ਕਰੋਤੀਤਿ ਪਲ੍ਲਤ੍ਥਾਤਿਧਾਤੁਸ੍ਸ ਪਲ੍ਲਤ੍ਥੇਤਿ ਰੂਪਂ। વਿਹਾਰੇਪਿ ਅਨ੍ਤਰਘਰੇਪਿ ਪਲ੍ਲਤ੍ਥਿਕਾਯ ਨ ਨਿਸੀਦੇਯ੍ਯਾਤਿ ਅਧਿਪ੍ਪਾਯੋ, ਪਰਿਕਮ੍ਮਕਤਂ ਭਿਤ੍ਤਾਦਿਨ੍ਤਿ ਯੋਜਨਾ। ਪਰਿਕਮ੍ਮਕਤਨ੍ਤਿ ਸੇਤવਣ੍ਣੇਨ વਾ ਚਿਤ੍ਤਕਮ੍ਮੇਨ વਾ ਕਤਪਰਿਕਮ੍ਮਂ। ਆਦਿ-ਸਦ੍ਦੋ ਦ੍વਾਰવਾਤਪਾਨਾਦਿਂ ਸਙ੍ਗਣ੍ਹਾਤਿ। ਨ ਅਪਸ੍ਸਯੇਤਿ ਚੀવਰਾਦਿਨਾ ਅਪ੍ਪਟਿਚ੍ਛਾਦੇਤ੍વਾ ਅਪਸ੍ਸਯਨਂ ਨ ਕਰੇਯ੍ਯ। ਨੋ ਨ ਆਚਮੇਤਿ ਨੇવ ਨ ਆਚਮੇ, ਆਚਮੇਯ੍ਯਾਤਿ ਅਤ੍ਥੋ। ਦ੍વੇ ਪਟਿਸੇਧਾ ਪਕਤਿਯਤ੍ਥਂ ਗਮੇਨ੍ਤੀਤਿ। ਸਨ੍ਤੇਤਿ ਇਮਿਨਾ ਉਦਕੇ ਅਸਨ੍ਤੇ ਅਨਾਪਤ੍ਤੀਤਿ ਦੀਪੇਤਿ।
344.Saṅghāṭiyāti adhiṭṭhitasaṅghāṭiyā. Pāde pariggahetvā āsanaṃ pallattho, pallatthaṃ karotīti pallatthātidhātussa pallattheti rūpaṃ. Vihārepi antaragharepi pallatthikāya na nisīdeyyāti adhippāyo, parikammakataṃ bhittādinti yojanā. Parikammakatanti setavaṇṇena vā cittakammena vā kataparikammaṃ. Ādi-saddo dvāravātapānādiṃ saṅgaṇhāti. Na apassayeti cīvarādinā appaṭicchādetvā apassayanaṃ na kareyya. No na ācameti neva na ācame, ācameyyāti attho. Dve paṭisedhā pakatiyatthaṃ gamentīti. Santeti iminā udake asante anāpattīti dīpeti.
੩੪੫. ਅਕਪ੍ਪਿਯਸਮਾਦਾਨੇਤਿ ਭਿਕ੍ਖੂਨਂ ਸਾਮਣੇਰਾਨਂ ਅਕਪ੍ਪਿਯੇ ਸਮਾਦਾਨੇ। ਦવਾਤਿ ਨਿਪਾਤੋ , ਕੀਲ਼ਾਧਿਪ੍ਪਾਯੇਨਾਤਿ ਅਤ੍ਥੋ। ਸਿਲਾਪવਿਜ੍ਝਨੇਤਿ ਅਨ੍ਤਮਸੋ ਹਤ੍ਥਯਨ੍ਤੇਨਪਿ ਸਕ੍ਖਰਿਕਾਯਪਿ ਖਿਪਨੇ। ਸਭਾਗਾਯ ਦੇਸਨਾਯ ਆવਿਕਮ੍ਮੇ ਚ ਦੁਕ੍ਕਟਨ੍ਤਿ ਯੋਜੇਤਬ੍ਬਂ। ਸਭਾਗਾਯਾਤਿ વਤ੍ਥੁવਸੇਨ ਸਮਾਨੋ ਭਾਗੋ ਏਤਿਸ੍ਸਾ ਆਪਤ੍ਤਿਯਾਤਿ વਿਗ੍ਗਹੋ। ਚ-ਸਦ੍ਦੋ ਤਾਦਿਸਿਯਾ ਪਟਿਗ੍ਗਹਣਮਤ੍ਤਂ ਸਮੁਚ੍ਚਿਨੋਤਿ।
345.Akappiyasamādāneti bhikkhūnaṃ sāmaṇerānaṃ akappiye samādāne. Davāti nipāto , kīḷādhippāyenāti attho. Silāpavijjhaneti antamaso hatthayantenapi sakkharikāyapi khipane. Sabhāgāya desanāya āvikamme ca dukkaṭanti yojetabbaṃ. Sabhāgāyāti vatthuvasena samāno bhāgo etissā āpattiyāti viggaho. Ca-saddo tādisiyā paṭiggahaṇamattaṃ samuccinoti.
੩੪੬. ਪਟਿਸ੍ਸવੋ ਨਾਮ ‘‘ਉਭੋਪਿ ਮਯਂ ਇਧ વਸ੍ਸਂ વਸਿਸ੍ਸਾਮ, ਏਕਤੋ ਉਦ੍ਦਿਸਾਪੇਮਾ’’ਤਿਆਦਿਪਟਿਜਾਨਨਂ, ਤਸ੍ਸ વਿਸਂવਾਦੋ ਪਚ੍ਛਾ ਅਕਰਣਂ ਪਟਿਸ੍ਸવવਿਸਂવਾਦੋ, ਤਸ੍ਮਿਂ, ਨਿਮਿਤ੍ਤਤ੍ਥੇ ਭੁਮ੍ਮਂ। ਸੁਦ੍ਧਚਿਤ੍ਤਸ੍ਸਾਤਿ ਕਥਨਸਮਯੇ ‘‘ਕਰਿਸ੍ਸਾਮੀ’’ਤਿ ਏવਂ ਪવਤ੍ਤਚਿਤ੍ਤਸ੍ਸ। ਇਤਰਸ੍ਸਾਤਿ ਅਞ੍ਞਸ੍ਸ ਅਸੁਦ੍ਧਚਿਤ੍ਤਸ੍ਸ।
346.Paṭissavo nāma ‘‘ubhopi mayaṃ idha vassaṃ vasissāma, ekato uddisāpemā’’tiādipaṭijānanaṃ, tassa visaṃvādo pacchā akaraṇaṃ paṭissavavisaṃvādo, tasmiṃ, nimittatthe bhummaṃ. Suddhacittassāti kathanasamaye ‘‘karissāmī’’ti evaṃ pavattacittassa. Itarassāti aññassa asuddhacittassa.
੩੪੭. ਕਿਚ੍ਚੇਤਿ ਸੁਕ੍ਖਕਟ੍ਠਾਦਿਗ੍ਗਹਣਕਿਚ੍ਚੇ ਸਤਿ ਏવ ਪੋਰਿਸਂ ਪੁਰਿਸਪ੍ਪਮਾਣਂ ਅਭਿਰੁਹੇਯ੍ਯਾਤਿ ਸਮ੍ਬਨ੍ਧੋ। ਆਪਦਾਸੂਤਿ વਾਲ਼ਮਿਗਦਸ੍ਸਨਾਦੀਸੁ।
347.Kicceti sukkhakaṭṭhādiggahaṇakicce sati eva porisaṃ purisappamāṇaṃ abhiruheyyāti sambandho. Āpadāsūti vāḷamigadassanādīsu.
੩੪੮. ਪਰਿਸ੍ਸਾવਨਂ વਿਨਾਤਿ ਸਮ੍ਬਨ੍ਧੋ। ਅਦ੍ਧਾਨਨ੍ਤਿ ਹੇਟ੍ਠਿਮਨ੍ਤੇਨ ਅਦ੍ਧਯੋਜਨਸਙ੍ਖਾਤਂ ਅਦ੍ਧਾਨਂ। ਸਚੇ ਨ ਹੋਤਿ ਪਰਿਸ੍ਸਾવਨਂ વਾ ਧਮ੍ਮਕਰਣੋ વਾ, ਸਙ੍ਘਾਟਿਕਣ੍ਣੋਪਿ ਅਧਿਟ੍ਠਾਤਬ੍ਬੋ। ਯਾਚਮਾਨਸ੍ਸਾਤਿ ਪਰਿਸ੍ਸਾવਨਂ ਯਾਚਨ੍ਤਸ੍ਸ।
348. Parissāvanaṃ vināti sambandho. Addhānanti heṭṭhimantena addhayojanasaṅkhātaṃ addhānaṃ. Sace na hoti parissāvanaṃ vā dhammakaraṇo vā, saṅghāṭikaṇṇopi adhiṭṭhātabbo. Yācamānassāti parissāvanaṃ yācantassa.
੩੪੯. ਆਬਾਧਪ੍ਪਚ੍ਚਯਾ ਅਞ੍ਞਤ੍ਰ ਸੇਸਙ੍ਗੇ ਚ ਅਤ੍ਤਘਾਤਨੇ ਚ ਦੁਕ੍ਕਟਨ੍ਤਿ ਯੋਜਨਾ। ਸੇਸਙ੍ਗੇਤਿ ਅਙ੍ਗਜਾਤਤੋ ਕਣ੍ਣਨਾਸਾਦਿਅવਸੇਸੇ ਅવਯવਚ੍ਛੇਦਨੇ। ਅਤ੍ਤਘਾਤਨੇਤਿ ਆਹਾਰੁਪਚ੍ਛੇਦਾਦਿਨਾ ਅਤ੍ਤਨੋ ਮਾਰਣੇ।
349. Ābādhappaccayā aññatra sesaṅge ca attaghātane ca dukkaṭanti yojanā. Sesaṅgeti aṅgajātato kaṇṇanāsādiavasese avayavacchedane. Attaghātaneti āhārupacchedādinā attano māraṇe.
੩੫੦. ਤੂਲਿਕਾਯ ਕਯਿਰਮਾਨਂ ਇਤ੍ਥਿਪੁਰਿਸਾਦਿਕਂ ਚਿਤ੍ਤਞ੍ਚ ਪੋਤ੍ਥਕਞ੍ਚ ਕਟ੍ਠਾਦੀਸੁ ਕਯਿਰਮਾਨਂ ਚਿਤ੍ਤਪੋਤ੍ਥਕਾਨਿ, ਤਾਨਿਯੇવ ਰੂਪਾਨੀਤਿ ਸਮਾਸੋ। ਜਾਤਕਾਦੀਨਿ ਪਨ ਪਰੇਹਿ ਕਾਰਾਪੇਤੁਂ ਲਬ੍ਭਨ੍ਤਿ। ਮਾਲਾਕਮ੍ਮਾਦੀਨਿ ਸਯਮ੍ਪਿ ਕਾਤੁਂ ਲਬ੍ਭਨ੍ਤਿ। ਆਰਾਮਾਰਞ੍ਞਗੇਹੇਸੁ ਭੁਞ੍ਜਨ੍ਤਂ ਨ ਉਟ੍ਠਾਪੇਯ੍ਯਾਤਿ ਯੋਜੇਤਬ੍ਬਂ। વਿਹਾਰਸਙ੍ਖਾਤੋ ਆਰਾਮੋ ਚ ਅਰਞ੍ਞਞ੍ਚ ਅਨ੍ਤਰਘਰਸਙ੍ਖਾਤਂ ਗੇਹਞ੍ਚਾਤਿ ਦ੍વਨ੍ਦੋ। ‘‘ਆਰਾਮ…ਪੇ॰… ਗੇਹੇਸੂ’’ਤਿ વਤ੍ਤਬ੍ਬੇ ਏ-ਕਾਰਸ੍ਸ ਅ-ਕਾਰਕਰਣੇਨ ਗਾਥਾਬਨ੍ਧવਸੇਨ વੁਤ੍ਤਂ। ਓਕਾਸੇ ਕਤੇ ਪਨ ‘‘ਪવਿਸਥਾ’’ਤਿ વੁਤ੍ਤੇ ਚ ਪવਿਸਿਤਬ੍ਬਂ ਉਪਨਿਸੀਦਿਤਬ੍ਬਞ੍ਚ।
350. Tūlikāya kayiramānaṃ itthipurisādikaṃ cittañca potthakañca kaṭṭhādīsu kayiramānaṃ cittapotthakāni, tāniyeva rūpānīti samāso. Jātakādīni pana parehi kārāpetuṃ labbhanti. Mālākammādīni sayampi kātuṃ labbhanti. Ārāmāraññagehesu bhuñjantaṃ na uṭṭhāpeyyāti yojetabbaṃ. Vihārasaṅkhāto ārāmo ca araññañca antaragharasaṅkhātaṃ gehañcāti dvando. ‘‘Ārāma…pe… gehesū’’ti vattabbe e-kārassa a-kārakaraṇena gāthābandhavasena vuttaṃ. Okāse kate pana ‘‘pavisathā’’ti vutte ca pavisitabbaṃ upanisīditabbañca.
੩੫੧. ਪੁਮਯੁਤ੍ਤਾਨਿ ਯਾਨਾਨਿ ਚ ਸਿવਿਕਞ੍ਚ ਹਤ੍ਥવਟ੍ਟਕਞ੍ਚ ਪਾਟਙ੍ਕਿਞ੍ਚ ਅਭਿਰੁਹਿਤੁਂ ਗਿਲਾਨਸ੍ਸ ਕਪ੍ਪਤੇਤਿ ਸਮ੍ਬਨ੍ਧੋ। ਪੁਮਯੁਤ੍ਤਾਨੀਤਿ ਅਸ੍ਸਗવਾਦਿਪੁਰਿਸਯੁਤ੍ਤਾਨਿ, ਨ ਧੇਨੁਯੁਤ੍ਤਾਨਿ, ਸਾਰਥਿ ਪਨ ਇਤ੍ਥੀ વਾ ਹੋਤੁ ਪੁਰਿਸੋ વਾ, વਟ੍ਟਤਿ। ਹਤ੍ਥવਟ੍ਟਕੇਪਿ ਏਸੇવ ਨਯੋ, ਯਾਨਾਨੀਤਿ ਰਥਸਕਟਾਦੀਨਿ, ਸਿવਿਕਨ੍ਤਿ ਪੀਠਕਸਿવਿਕਂ, ਪੀਠਕਯਾਨਨ੍ਤਿ ਅਤ੍ਥੋ। ਪਾਟਙ੍ਕੀਤਿ ਅਨ੍ਦੋਲਿਕਾ। ਗਿਲਾਨਸ੍ਸਾਤਿ ਏਤ੍ਥ ਗਿਲਾਨੋ ਨਾਮ ਨ ਅਪ੍ਪਕੇਨਪਿ ਸੀਸਾਬਾਧਾਦਿਮਤ੍ਤੇਨ વੇਦਿਤਬ੍ਬੋ, ਯੋ ਪਨ ਨ ਸਕ੍ਕੋਤਿ વਿਨਾ ਯਾਨੇਨ ਗਨ੍ਤੁਂ, ਏવਰੂਪੋ વੇਦਿਤਬ੍ਬੋ। ਤਥਾ ਹਿ ਯਾਨਂ ਅਨੁਜਾਨਨ੍ਤੇਨ ਭਗવਤਾ ਕੋਸਲੇਸੁ ਜਨਪਦੇਸੁ ਭਗવਨ੍ਤਂ ਦਸ੍ਸਨਾਯ ਸਾવਤ੍ਥਿਂ ਗਚ੍ਛਨ੍ਤਂ ਅਞ੍ਞਤਰਂ ਗਿਲਾਨਂ ਭਿਕ੍ਖੁਂ ਗਨ੍ਤੁਮਸਕ੍ਕੁਣੇਯ੍ਯਤਾਯ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਨਿਸਿਨ੍ਨਂ ਦਿਸ੍વਾ ਮਨੁਸ੍ਸੇਹਿ ਤਂ ਪવਤ੍ਤਿਂ ਞਤ੍વਾ ‘‘ਏਹਿ, ਭਨ੍ਤੇ, ਗਮਿਸ੍ਸਾਮਾ’’ਤਿ વੁਤ੍ਤੇ ‘‘ਨਾਹਂ, ਆવੁਸੋ, ਗਮਿਸ੍ਸਾਮਿ, ਗਿਲਾਨੋਮ੍ਹੀ’’ਤਿ વੁਤ੍ਤવਤ੍ਥੁਸ੍ਮਿਂ (ਮਹਾવ॰ ੨੫੩) ਅਨੁਞ੍ਞਾਤਂ, ਤਥਾ વਦਨ੍ਤੋ ਚ ਸੋ ਭਿਕ੍ਖੁ ਗਮਨੁਪਚ੍ਛੇਦਸਾਧਕਮੇવ ਗੇਲਞ੍ਞਂ ਸਨ੍ਧਾਯਾਹਾਤਿ વਿਞ੍ਞਾਯਤਿ ਅਧਿਪ੍ਪੇਤਤ੍ਥਨਿਪ੍ਫਤ੍ਤਿਯਾ ਉਪਚ੍ਛਿਨ੍ਨਤ੍ਤਾ, ਅਪਿਚ ਯਾਨੇਨ ਏਕਪਰਿਚ੍ਛੇਦਾਯ ਉਪਾਹਨਾਯ ਪਰਿਚ੍ਛੇਦਂ ਠਪੇਨ੍ਤੇਨ ਅਟ੍ਠਕਥਾਚਰਿਯੇਨ ‘‘ਗਿਲਾਨੇਨ ਭਿਕ੍ਖੁਨਾ ਸਉਪਾਹਨੇਨਾਤਿ ਏਤ੍ਥ ਗਿਲਾਨੋ ਨਾਮ ਯੋ ਨ ਸਕ੍ਕੋਤਿ ਅਨੁਪਾਹਨੇਨ ਗਾਮਂ ਪવਿਸਿਤੁ’’ਨ੍ਤਿ ਅਟ੍ਠਕਥਾਯਂ (ਮਹਾવ॰ ਅਟ੍ਠ॰ ੨੫੬) વੁਤ੍ਤਂ, ਤਸ੍ਮਾ ਯਥਾવੁਤ੍ਤਗਿਲਾਨੋવ ਗਿਲਾਨੋਤਿ ਨਿਟ੍ਠਮੇਤ੍ਥ ਗਨ੍ਤਬ੍ਬਂ।
351. Pumayuttāni yānāni ca sivikañca hatthavaṭṭakañca pāṭaṅkiñca abhiruhituṃ gilānassa kappateti sambandho. Pumayuttānīti assagavādipurisayuttāni, na dhenuyuttāni, sārathi pana itthī vā hotu puriso vā, vaṭṭati. Hatthavaṭṭakepi eseva nayo, yānānīti rathasakaṭādīni, sivikanti pīṭhakasivikaṃ, pīṭhakayānanti attho. Pāṭaṅkīti andolikā. Gilānassāti ettha gilāno nāma na appakenapi sīsābādhādimattena veditabbo, yo pana na sakkoti vinā yānena gantuṃ, evarūpo veditabbo. Tathā hi yānaṃ anujānantena bhagavatā kosalesu janapadesu bhagavantaṃ dassanāya sāvatthiṃ gacchantaṃ aññataraṃ gilānaṃ bhikkhuṃ gantumasakkuṇeyyatāya aññatarasmiṃ rukkhamūle nisinnaṃ disvā manussehi taṃ pavattiṃ ñatvā ‘‘ehi, bhante, gamissāmā’’ti vutte ‘‘nāhaṃ, āvuso, gamissāmi, gilānomhī’’ti vuttavatthusmiṃ (mahāva. 253) anuññātaṃ, tathā vadanto ca so bhikkhu gamanupacchedasādhakameva gelaññaṃ sandhāyāhāti viññāyati adhippetatthanipphattiyā upacchinnattā, apica yānena ekaparicchedāya upāhanāya paricchedaṃ ṭhapentena aṭṭhakathācariyena ‘‘gilānena bhikkhunā saupāhanenāti ettha gilāno nāma yo na sakkoti anupāhanena gāmaṃ pavisitu’’nti aṭṭhakathāyaṃ (mahāva. aṭṭha. 256) vuttaṃ, tasmā yathāvuttagilānova gilānoti niṭṭhamettha gantabbaṃ.
੩੫੨. ਦવਂ ਕਰਣੇਤਿ ਕੇਲ਼ਿਯਾ ਕਰਣੇ। ਅਞ੍ਞਸ੍ਸਾਤਿ ਅਨ੍ਤਮਸੋ ਦੁਸ੍ਸੀਲਸ੍ਸਾਪਿ। ਉਪਲਾਲ਼ਨੇਤਿ ‘‘ਪਤ੍ਤਂ ਦਸ੍ਸਾਮਿ, ਚੀવਰਂ ਦਸ੍ਸਾਮੀ’’ਤਿਆਦਿਨਾ।
352.Davaṃkaraṇeti keḷiyā karaṇe. Aññassāti antamaso dussīlassāpi. Upalāḷaneti ‘‘pattaṃ dassāmi, cīvaraṃ dassāmī’’tiādinā.
੩੫੩. વਿવਰਿਤ੍વਾ ਨ ਦਸ੍ਸਯੇਤਿ ਸਮ੍ਬਨ੍ਧਨੀਯਂ। ਤਾ ਭਿਕ੍ਖੁਨਿਯੋ।
353. Vivaritvā na dassayeti sambandhanīyaṃ. Tā bhikkhuniyo.
੩੫੪. ਓવਾਦਨ੍ਤਿ ਭਿਕ੍ਖੁਨੀਹਿ ਤੇਰਸਿਯਂ વਾ ਚਾਤੁਦ੍ਦਸਿਯਂ વਾ ਆਗਨ੍ਤ੍વਾ ਉਪੋਸਥਂ ਪੁਚ੍ਛਿਤ੍વਾ ‘‘ਚਾਤੁਦ੍ਦਸੋ’’ਤਿਆਦਿਨਾ ਭਿਕ੍ਖੁਨਾ ਆਚਿਕ੍ਖਿਤੇ ਪੁਨ ਤਾਹਿ ਉਪੋਸਥਦਿવਸੇ ਸਮਾਗਨ੍ਤ੍વਾ ਓવਾਦੂਪਸਙ੍ਕਮਨਯਾਚਨਂ, ਤਂ ਪਾਤਿਮੋਕ੍ਖੁਦ੍ਦੇਸਕਸ੍ਸ ਆਰੋਚੇਤ੍વਾ ਤੇਨ ਕਤਸਨ੍ਨਿਟ੍ਠਾਨਂ ਗਹੇਤ੍વਾ ਪਾਟਿਪਦੇ ਪਚ੍ਚਾਹਰਿਤਬ੍ਬਨ੍ਤਿ ਅਜਾਨਨਕਂ ਬਾਲਞ੍ਚ ਤਥਾ ਕਾਤੁਂ ਅਸਮਤ੍ਥਂ ਗਿਲਾਨਞ੍ਚ ਪਾਟਿਪਦੇ ਗਨ੍ਤੁਕਾਮਂ ਗਮਿਯਞ੍ਚ વਜ੍ਜੇਤ੍વਾ ਅਞ੍ਞਸ੍ਸ ਗਹਣਪਚ੍ਚਾਹਰਣਾਨਿ ਅਕਾਤੁਂ ਨ વਟ੍ਟਤਿ। ਤੇਨ વੁਤ੍ਤਂ ‘‘ਨ ਗਣ੍ਹਤੋ’’ਤਿਆਦਿ।
354.Ovādanti bhikkhunīhi terasiyaṃ vā cātuddasiyaṃ vā āgantvā uposathaṃ pucchitvā ‘‘cātuddaso’’tiādinā bhikkhunā ācikkhite puna tāhi uposathadivase samāgantvā ovādūpasaṅkamanayācanaṃ, taṃ pātimokkhuddesakassa ārocetvā tena katasanniṭṭhānaṃ gahetvā pāṭipade paccāharitabbanti ajānanakaṃ bālañca tathā kātuṃ asamatthaṃ gilānañca pāṭipade gantukāmaṃ gamiyañca vajjetvā aññassa gahaṇapaccāharaṇāni akātuṃ na vaṭṭati. Tena vuttaṃ ‘‘na gaṇhato’’tiādi.
੩੫੫. ਲੋਕਾਯਤਨ੍ਤਿ ਨਿਰਤ੍ਥਕਕਾਰਣਪ੍ਪਟਿਸਂਯੁਤ੍ਤਂ ਤਿਤ੍ਥਿਯਸਤ੍ਥਂ। ਤਿਰਚ੍ਛਾਨવਿਜ੍ਜਾ ਚ ਇਮਿਨਾવ ਉਪਲਕ੍ਖਿਤਾ। ਨ વਾਚੇਯ੍ਯਾਤਿ ਪਰੇਸਂ ਨ વਾਚੇਯ੍ਯ। ਇਮਿਨਾવ ਅਤ੍ਤਨੋ ਪਰਿਯਾਪੁਣਨਮ੍ਪਿ ਪਟਿਕ੍ਖਿਤ੍ਤਂ ਲੋਕਾਯਤਤਿਰਚ੍ਛਾਨવਿਜ੍ਜਾਤਿ ਚ ਰਾਗਦੋਸਮੋਹવਡ੍ਢਾਨਿ ਬੁਦ੍ਧਾਦਿਗਰਹਿਤਾ ਸਗ੍ਗਮੋਕ੍ਖਾਨਂ ਤਿਰੋ ਤਿਰਿਯਤੋ ਅਞ੍ਚਿਤਾ ਗਤਾ ਪવਤ੍ਤਾ ਕਬ੍ਬਨਾਟਕਾਦਿਕਾ ਸਬ੍ਬਾਪਿ વਿਜ੍ਜਾ ਅਨੁਲੋਮવਸੇਨ વਾ વਿਨਯਪਰਿਯਾਯਂ ਪਤ੍વਾ ਗਰੁਕੇ ਠਾਤਬ੍ਬਨ੍ਤਿ વਿਨਯਯੁਤ੍ਤਿਤੋਪਿ ਸਙ੍ਗਹਿਤਾਤਿ વੇਦਿਤਬ੍ਬਾ। ਏવਞ੍ਚ ਨੋ ਗਰੂਨਮੁਪਦੇਸੋ। ਪੇਲ਼ਾਯਪੀਤਿ ਯਤ੍ਥ ਪਾਤਿਂ ਠਪੇਤ੍વਾ ਸੁਖਿਨੋ ਭੁਞ੍ਜਨ੍ਤਿ, ਤਮ੍ਬਲੋਹੇਨ ਰਜਤੇਨ વਾ ਕਤਾਯ ਤਾਯ ਆਸਿਤ੍ਤਕੂਪਧਾਨਸਙ੍ਖਾਤਾਯ ਪੇਲ਼ਾਯ ਠਪੇਤ੍વਾ।
355.Lokāyatanti niratthakakāraṇappaṭisaṃyuttaṃ titthiyasatthaṃ. Tiracchānavijjā ca imināva upalakkhitā. Na vāceyyāti paresaṃ na vāceyya. Imināva attano pariyāpuṇanampi paṭikkhittaṃ lokāyatatiracchānavijjāti ca rāgadosamohavaḍḍhāni buddhādigarahitā saggamokkhānaṃ tiro tiriyato añcitā gatā pavattā kabbanāṭakādikā sabbāpi vijjā anulomavasena vā vinayapariyāyaṃ patvā garuke ṭhātabbanti vinayayuttitopi saṅgahitāti veditabbā. Evañca no garūnamupadeso. Peḷāyapīti yattha pātiṃ ṭhapetvā sukhino bhuñjanti, tambalohena rajatena vā katāya tāya āsittakūpadhānasaṅkhātāya peḷāya ṭhapetvā.
੩੫੬. ਪਾਰੁਤਞ੍ਚ ਨਿવਾਸਨਞ੍ਚ, ਗਿਹੀਨਂ ਹਤ੍ਥਿਸੋਣ੍ਡਾਦਿવਸੇਨ ਪਾਰੁਤਨਿવਾਸਨਂ ਯਸ੍ਸ ਪਾਰੁਪਨਸ੍ਸ ਨਿવਾਸਨਸ੍ਸਾਤਿ ਕਿਰਿਯਾવਿਸੇਸਨਸਮਾਸੋ । ਗਿਹਿਪਾਰੁਤਨਿવਾਸਨਂ ਨ ਪਾਰੁਪੇ ਨ ਨਿવਾਸੇਯ੍ਯਾਤਿ ਸਮ੍ਬਨ੍ਧੋ। ਸਂવੇਲ੍ਲਿਯਂ ਨ ਨਿવਾਸੇਯ੍ਯਾਤਿ ਮਲ੍ਲਕਮ੍ਮਕਰਾਦਯੋ વਿਯ ਕਚ੍ਛਂ ਕਤ੍વਾ ਨ ਨਿવਾਸੇਯ੍ਯ। ਏવਂ ਨਿવਾਸੇਤੁਂ ਗਿਲਾਨਸ੍ਸਾਪਿ ਮਗ੍ਗਪ੍ਪਟਿਪਨ੍ਨਸ੍ਸਾਪਿ ਨ વਟ੍ਟਤਿ। ਯਮ੍ਪਿ ਮਗ੍ਗਂ ਗਚ੍ਛਨ੍ਤਾ ਏਕਂ વਾ ਦ੍વੇ વਾ ਕੋਣੇ ਉਕ੍ਖਿਪਿਤ੍વਾ ਅਨ੍ਤਰવਾਸਕਸ੍ਸ ਉਪਰਿ ਲਗ੍ਗਨ੍ਤਿ, ਨ વਟ੍ਟਤਿ। ਏવਂ ਅਪਾਰੁਪਿਤ੍વਾ ਅਨਿવਾਸੇਤ੍વਾ ਚ ਨਿਬ੍ਬਿਕਾਰਂ ਪਰਿਮਣ੍ਡਲਂ ਪਾਰੁਪਿਤਬ੍ਬਂ ਤਿਮਣ੍ਡਲਂ ਪਟਿਚ੍ਛਾਦੇਨ੍ਤੇਨ ਪਰਿਮਣ੍ਡਲਂ ਨਿવਾਸੇਤਬ੍ਬਞ੍ਚ, ਤਥਾ ਅਪਾਰੁਪਿਤ੍વਾ ਅਨਿવਾਸੇਤ੍વਾ ਚ ਆਰਾਮੇ વਾ ਅਨ੍ਤਰਘਰੇ વਾ ਅਨਾਦਰੇਨ ਯਂ ਕਿਞ੍ਚਿ વਿਕਾਰਂ ਕਰੋਨ੍ਤਸ੍ਸ ਦੁਕ੍ਕਟਂ। ਦਾਯਨ੍ਤਿ વਨਂ। ਨਾਲਿਮ੍ਪਯੇਯ੍ਯਾਤਿ ‘‘ਸਬ੍ਬੂਪਕਾਰਾਨਿ વਿਨਸ੍ਸਨ੍ਤੂ’’ਤਿ વਾ ਖਿਡ੍ਡਾਧਿਪ੍ਪਾਯੇਨ વਾ ਨਾਲਿਮ੍ਪਯੇਯ੍ਯ।
356. Pārutañca nivāsanañca, gihīnaṃ hatthisoṇḍādivasena pārutanivāsanaṃ yassa pārupanassa nivāsanassāti kiriyāvisesanasamāso . Gihipārutanivāsanaṃ na pārupe na nivāseyyāti sambandho. Saṃvelliyaṃ na nivāseyyāti mallakammakarādayo viya kacchaṃ katvā na nivāseyya. Evaṃ nivāsetuṃ gilānassāpi maggappaṭipannassāpi na vaṭṭati. Yampi maggaṃ gacchantā ekaṃ vā dve vā koṇe ukkhipitvā antaravāsakassa upari lagganti, na vaṭṭati. Evaṃ apārupitvā anivāsetvā ca nibbikāraṃ parimaṇḍalaṃ pārupitabbaṃ timaṇḍalaṃ paṭicchādentena parimaṇḍalaṃ nivāsetabbañca, tathā apārupitvā anivāsetvā ca ārāme vā antaraghare vā anādarena yaṃ kiñci vikāraṃ karontassa dukkaṭaṃ. Dāyanti vanaṃ. Nālimpayeyyāti ‘‘sabbūpakārāni vinassantū’’ti vā khiḍḍādhippāyena vā nālimpayeyya.
੩੫੭. વਡ੍ਢਿਂ ਨੋ ਪਯੋਜਯੇ ਅਞ੍ਞਾਤਕਪ੍ਪવਾਰਿਤੇ ਨੋ ਯਾਚੇਤਿ ਯੋਜਨਾ। ਅਞ੍ਞਸ੍ਸਾਤਿ ਸਹਧਮ੍ਮਿਕਸ੍ਸਾਪਿ। ਕਤਿਪਾਹਂ ਭੁਤ੍વਾ વਾਤਿ ਯੋਜਨੀਯਂ। ਪੁਨੋਤਿ ਨਿਪਾਤੋ।
357. Vaḍḍhiṃ no payojaye aññātakappavārite no yāceti yojanā. Aññassāti sahadhammikassāpi. Katipāhaṃ bhutvā vāti yojanīyaṃ. Punoti nipāto.
੩੫੮. ਦਣ੍ਡਿਨਂ ਞਤ੍વਾ વਾ ਅਞਤ੍વਾ વਾ ਉਦ੍ਦਿਸ੍ਸ ਰਕ੍ਖਂ ਯਾਚਨੇ ਦਣ੍ਡਿਤੇ ਦਣ੍ਡੋ ਅਸ੍ਸ ਗੀવਾਤਿ ਯੋਜਨਾ। ਦਣ੍ਡਂ ਗਣ੍ਹਤੀਤਿ ਪਚ੍ਚਯਨ੍ਤਸ੍ਸ ਦਣ੍ਡਿਨਂ ਦਣ੍ਡਗ੍ਗਹਣਨ੍ਤਿ ਅਤ੍ਥੋ। ਉਦ੍ਦਿਸ੍ਸਾਤਿ ‘‘ਅਮ੍ਹਾਕਂ વਿਹਾਰੇ ਅਸੁਕੇਨ ਚ ਅਸੁਕੇਨ ਚ ਇਦਂ ਨਾਮ ਕਤ’’ਨ੍ਤਿ, ‘‘ਕਰਿਸ੍ਸ’’ਨ੍ਤਿ વਾ ਏવਂ ਅਤੀਤਂ વਾ ਅਨਾਗਤਂ વਾ ਆਰਬ੍ਭ। ਯਾਚਨੇਤਿ વੋਹਾਰਿਕੇਸੁ ਯਾਚਨੇ ਸਤਿ। ਦਣ੍ਡਿਤੇਤਿ ਤੇਹਿ ਦਣ੍ਡੇ ਗਹਿਤੇ ਸੋ ਦਣ੍ਡੋ ਅਸ੍ਸ ਯਾਚਕਸ੍ਸ ਭਿਕ੍ਖੁਨੋ ਗੀવਾ, ਇਣਂ ਹੋਤੀਤਿ ਅਤ੍ਥੋ। વੋਹਾਰਿਕੇਹਿ ਪਨ ‘‘ਕੇਨਾ’’ਤਿ વੁਤ੍ਤੇ ‘‘ਅਸੁਕੇਨਾਤਿ વਤ੍ਤੁਂ ਅਮ੍ਹਾਕਂ ਨ વਟ੍ਟਤਿ, ਤੁਮ੍ਹੇਯੇવ ਜਾਨਿਸ੍ਸਥ, ਕੇવਲਞ੍ਹਿ ਮਯਂ ਰਕ੍ਖਂ ਯਾਚਾਮ, ਤਂ ਨੋ ਦੇਥ, ਅવਹਟਭਣ੍ਡਞ੍ਚ ਮਂ ਆਹਰਾਪੇਥਾ’’ਤਿ વਤ੍ਤਬ੍ਬਂ । ਏવਂ ਅਨੋਦਿਸ੍ਸ ਆਚਿਕ੍ਖਣਾ ਹੋਤਿ, ਸਾ વਟ੍ਟਤਿ। ਪਾਰਾਜਿਕਾਦਿਕਾਤਿ ਪਾਰਾਜਿਕਥੁਲ੍ਲਚ੍ਚਯਦੁਕ੍ਕਟਾਨਿ।
358. Daṇḍinaṃ ñatvā vā añatvā vā uddissa rakkhaṃ yācane daṇḍite daṇḍo assa gīvāti yojanā. Daṇḍaṃ gaṇhatīti paccayantassa daṇḍinaṃ daṇḍaggahaṇanti attho. Uddissāti ‘‘amhākaṃ vihāre asukena ca asukena ca idaṃ nāma kata’’nti, ‘‘karissa’’nti vā evaṃ atītaṃ vā anāgataṃ vā ārabbha. Yācaneti vohārikesu yācane sati. Daṇḍiteti tehi daṇḍe gahite so daṇḍo assa yācakassa bhikkhuno gīvā, iṇaṃ hotīti attho. Vohārikehi pana ‘‘kenā’’ti vutte ‘‘asukenāti vattuṃ amhākaṃ na vaṭṭati, tumheyeva jānissatha, kevalañhi mayaṃ rakkhaṃ yācāma, taṃ no detha, avahaṭabhaṇḍañca maṃ āharāpethā’’ti vattabbaṃ . Evaṃ anodissa ācikkhaṇā hoti, sā vaṭṭati. Pārājikādikāti pārājikathullaccayadukkaṭāni.
੩੫੯.
359.
‘‘ਹਰਨ੍ਤੇਸੁ ਪਰਿਕ੍ਖਾਰਂ,
‘‘Harantesu parikkhāraṃ,
ਚੋਰੋ ਚੋਰੋਤਿ ਭਾਸਿਤੇ।
Coro coroti bhāsite;
ਅਨਤ੍ਥਾਯੇਸਂ ਗਣ੍ਹਨ੍ਤੇ’’ਤਿ॥ –
Anatthāyesaṃ gaṇhante’’ti. –
ਪਾਠੇਹਿ ਭવਿਤਬ੍ਬਂ। ਏવਞ੍ਹਿ ਸਤਿ ‘‘ਹਰਨ੍ਤੇਸੂ’’ਤਿ ਬਹੁવਚਨੇਨ ਸਹ ਘਟਤੇ। ਪਰਿਕ੍ਖਾਰਂ ਹਰਨ੍ਤੇਸੁ ਏਸਂ ਅਨਤ੍ਥਾਯ ‘‘ਚੋਰੋ ਚੋਰੋ’’ਤਿ ਭਾਸਿਤੇ ਦਣ੍ਡਂ ਗਣ੍ਹਨ੍ਤੇ ਤਤ੍ਤਕਂ ਅਸ੍ਸ ਗੀવਾਤਿ ਯੋਜੇਤਬ੍ਬਂ। ਹਰਨ੍ਤੇਸੂਤਿ ਚੋਰੇਸੁ ਗਹੇਤ੍વਾ ਗਚ੍ਛਨ੍ਤੇਸੁ। ਏਸਨ੍ਤਿ ਚੋਰਾਨਂ। ਗਣ੍ਹਨ੍ਤੇਤਿ વੋਹਾਰਿਕਜਨੇ ਗਣ੍ਹਨ੍ਤੇ। ਯਤ੍ਤਕਂ ਗਹਿਤਂ, ਤਤ੍ਤਕਂ ਅਸ੍ਸ ਭਿਕ੍ਖੁਨੋ ਗੀવਾ, ਭਣ੍ਡਦੇਯ੍ਯਂ ਹੋਤੀਤਿ ਅਤ੍ਥੋ।
Pāṭhehi bhavitabbaṃ. Evañhi sati ‘‘harantesū’’ti bahuvacanena saha ghaṭate. Parikkhāraṃ harantesu esaṃ anatthāya ‘‘coro coro’’ti bhāsite daṇḍaṃ gaṇhante tattakaṃ assa gīvāti yojetabbaṃ. Harantesūti coresu gahetvā gacchantesu. Esanti corānaṃ. Gaṇhanteti vohārikajane gaṇhante. Yattakaṃ gahitaṃ, tattakaṃ assa bhikkhuno gīvā, bhaṇḍadeyyaṃ hotīti attho.
੩੬੦. ਪਾਕਾਰਕੁਟ੍ਟਾਨਂ ਬਹਿ વਲ਼ਞ੍ਜੇ વਾਪਿ વੀਹਾਦਿਨਾਲ਼ਿਕੇਰਾਦਿਰੋਪਿਮੇ ਹਰਿਤੇ વਾਪਿ વਿਘਾਸੁਚ੍ਚਾਰਸਙ੍ਕਾਰਮੁਤ੍ਤਂ ਨਾવਲੋਕਿਯ ਛਡ੍ਡੇਯ੍ਯ, ਦੁਕ੍ਕਟਨ੍ਤਿ ਸਮ੍ਬਨ੍ਧੋ। વਲ਼ਞ੍ਜੇ ਨਾવਲੋਕਿਯਾਤਿ ਚ ਇਮਿਨਾ ਓਲੋਕੇਤ੍વਾ વਾ ਅવਲ਼ਞ੍ਜੇ વਾ વਿਘਾਸਾਦੀਨਿ ਛਡ੍ਡੇਨ੍ਤਸ੍ਸ ਅਨਾਪਤ੍ਤੀਤਿ ਦੀਪੇਤਿ। વੀਹਿ ਆਦਿ ਯੇਸਂ ਸਾਲਿਆਦੀਨਂ ਤੇ વੀਹਾਦਯੋ, ਨਾਲ਼ਿਕੇਰੋ ਆਦਿ ਯੇਸਂ ਅਮ੍ਬਪਨਸਾਦੀਨਂ ਤੇ ਨਾਲ਼ਿਕੇਰਾਦਯੋ, વੀਹਾਦਯੋ ਚ ਨਾਲ਼ਿਕੇਰਾਦਯੋ ਚਾਤਿ ਦ੍વਨ੍ਦੋ, ਤੇਸਂ ਰੋਪੋ, ਤੇਨ ਨਿਬ੍ਬਤ੍ਤਂ વੀਹਾਦਿ…ਪੇ॰… ਰੋਪਿਮਂ। ਹਰਿਤੇਤਿ ਹਰਿਤਟ੍ਠਾਨੇ। વਿਘਾਸੋ ਨਾਮ ਉਚ੍ਛਿਟ੍ਠੋਦਕਚਲਕਾਦਿ।
360. Pākārakuṭṭānaṃ bahi vaḷañje vāpi vīhādināḷikerādiropime harite vāpi vighāsuccārasaṅkāramuttaṃ nāvalokiya chaḍḍeyya, dukkaṭanti sambandho. Vaḷañje nāvalokiyāti ca iminā oloketvā vā avaḷañje vā vighāsādīni chaḍḍentassa anāpattīti dīpeti. Vīhi ādi yesaṃ sāliādīnaṃ te vīhādayo, nāḷikero ādi yesaṃ ambapanasādīnaṃ te nāḷikerādayo, vīhādayo ca nāḷikerādayo cāti dvando, tesaṃ ropo, tena nibbattaṃ vīhādi…pe… ropimaṃ. Hariteti haritaṭṭhāne. Vighāso nāma ucchiṭṭhodakacalakādi.
੩੬੧. ਧਮ੍ਮਯੁਤ੍ਤਮ੍ਪਿ ਨਚ੍ਚਞ੍ਚ ਗੀਤਞ੍ਚ વਾਦਿਤਞ੍ਚ ਯੋਜਾਪੇਤੁਞ੍ਚ ਪਯੋਜੇਤੁਞ੍ਚ ਪਯੁਤ੍ਤਾਨਿ ਪਸ੍ਸਿਤੁਞ੍ਚ ‘‘ਉਪਹਾਰਂ ਕਰੋਮਾ’’ਤਿ વੁਤ੍ਤੇ ਸਮ੍ਪਟਿਚ੍ਛਿਤੁਂ વਾ ਨ ਲਬ੍ਭਨ੍ਤਿ ਸਮ੍ਬਨ੍ਧੋ। ਧਮ੍ਮਯੁਤ੍ਤਮ੍ਪੀਤਿ ਰਤਨਤ੍ਤਯਗੁਣੂਪਸਂਹਿਤਤਾਯ ਅਨ੍ਤਮਸੋ ਧਮ੍ਮੇਨ ਪੁਞ੍ਞੇਨ ਸਂਯੁਤ੍ਤਮ੍ਪਿ। ਨਚ੍ਚਨ੍ਤਿ ਅਨ੍ਤਮਸੋ ਮੋਰਸੁਕਮਕ੍ਕਟਾਦੀਨਂ ਨਚ੍ਚਮ੍ਪਿ। ਗੀਤਨ੍ਤਿ ਅਨ੍ਤਮਸੋ ਗੀਤਸ੍ਸ ਪੁਬ੍ਬਭਾਗੇ ਕਯਿਰਮਾਨਂ ਦਨ੍ਤਗੀਤਮ੍ਪਿ। વਾਦਿਤਨ੍ਤਿ ਅਨ੍ਤਮਸੋ ਉਦਕਭੇਰਿવਾਦਿਤਮ੍ਪਿ। ਯੋਜਾਪੇਤੁਨ੍ਤਿ ਅਞ੍ਞੇਹਿ ਕਾਰਾਪੇਤੁਂ। ਪਯੋਜੇਤੁਨ੍ਤਿ ਅਤ੍ਤਨਾ ਕਾਤੁਂ। ਆਯਤਕੇਨ ਗੀਤਸ੍ਸਰੇਨ ਧਮ੍ਮਮ੍ਪਿ ਭਾਸਿਤੁਂ ਨ વਟ੍ਟਤਿ। ਪਯੁਤ੍ਤਾਨੀਤਿ ਪਰੇਹਿ ਯੇਹਿ ਕੇਹਿਚਿ ਕਤਾਨਿ। ਪਸ੍ਸਿਤੁਨ੍ਤਿ ਇਮਿਨਾ ਅਨੋਲੋਚਨਦਸ੍ਸਨਮ੍ਪਿ ਗਹਿਤਨ੍ਤਿ ਸੋਤੁਨ੍ਤਿਪਿ ਅਤ੍ਥੋ વਿਞ੍ਞਾਯਤਿ। ਅਨ੍ਤਰਾਰਾਮੇ ਠਿਤਸ੍ਸ ਪਸ੍ਸਤੋ ਅਨਾਪਤ੍ਤਿ। વੀਥਿਯਂ ਠਤ੍વਾ ਗੀવਂ ਪਰਿવਤ੍ਤੇਤ੍વਾ ਪਸ੍ਸਤੋਪਿ ਆਪਤ੍ਤਿਯੇવ। ਯੇਨ ਕੇਨਚਿ ਕਰਣੀਯੇਨ ਗਤਟ੍ਠਾਨੇ ਪਸ੍ਸਤਿ, ਸੁਣਾਤਿ વਾ, ਅਨਾਪਤ੍ਤਿ। ਸਮ੍ਪਟਿਚ੍ਛਿਤੁਨ੍ਤਿ ‘‘ਸਾਧੂ’’ਤਿ ਸਮ੍ਪਟਿਚ੍ਛਿਤੁਂ। ‘‘ਉਪਹਾਰਕਰਣਂ ਨਾਮ ਸੁਨ੍ਦਰ’’ਨ੍ਤਿ વਤ੍ਤੁਂ વਟ੍ਟਤਿ। વਾ-ਸਦ੍ਦੋ ਸਮੁਚ੍ਚਯੇ।
361. Dhammayuttampi naccañca gītañca vāditañca yojāpetuñca payojetuñca payuttāni passituñca ‘‘upahāraṃ karomā’’ti vutte sampaṭicchituṃ vā na labbhanti sambandho. Dhammayuttampīti ratanattayaguṇūpasaṃhitatāya antamaso dhammena puññena saṃyuttampi. Naccanti antamaso morasukamakkaṭādīnaṃ naccampi. Gītanti antamaso gītassa pubbabhāge kayiramānaṃ dantagītampi. Vāditanti antamaso udakabherivāditampi. Yojāpetunti aññehi kārāpetuṃ. Payojetunti attanā kātuṃ. Āyatakena gītassarena dhammampi bhāsituṃ na vaṭṭati. Payuttānīti parehi yehi kehici katāni. Passitunti iminā anolocanadassanampi gahitanti sotuntipi attho viññāyati. Antarārāme ṭhitassa passato anāpatti. Vīthiyaṃ ṭhatvā gīvaṃ parivattetvā passatopi āpattiyeva. Yena kenaci karaṇīyena gataṭṭhāne passati, suṇāti vā, anāpatti. Sampaṭicchitunti ‘‘sādhū’’ti sampaṭicchituṃ. ‘‘Upahārakaraṇaṃ nāma sundara’’nti vattuṃ vaṭṭati. Vā-saddo samuccaye.
੩੬੨. ‘‘ਕੀਲ਼ਤ੍ਥਂ ਕਤਂ ਰਾਜਾਗਾਰ’’ਨ੍ਤਿਆਦਿਨਾ ਸਮ੍ਬਨ੍ਧਿਤਬ੍ਬਂ। ਚਿਤ੍ਤੇਨ વਿਚਿਤ੍ਤਕਂ ਆਗਾਰਂ ਚਿਤ੍ਤਾਗਾਰਕਂ।
362. ‘‘Kīḷatthaṃ kataṃ rājāgāra’’ntiādinā sambandhitabbaṃ. Cittena vicittakaṃ āgāraṃ cittāgārakaṃ.
੩੬੩. ਆਸਨੇਨ ਨવੇ ਨ ਪਟਿਬਾਹੇਯ੍ਯਾਤਿ ਯੋਜਨਾ। ਆਸਨੇਨਾਤਿ ਆਸਨਤੋ। ਨ ਪਟਿਬਾਹੇਯ੍ਯਾਤਿ ਨ ਉਟ੍ਠਾਪੇਯ੍ਯ। ਉਣ੍ਹੇ ਚੀવਰਂ ਨ ਨਿਦਹੇਯ੍ਯਾਤਿ ਯੋਜਨੀਯਂ। ਨ ਨਿਦਹੇਯ੍ਯਾਤਿ ਅਧਿਕਂ ਨ ਨਿਦਹੇਯ੍ਯ। ਗਰੁਨਾਤਿ ਆਚਰਿਯੁਪਜ੍ਝਾਯੇਨ। ਪਣਾਮਿਤੋਤਿ ‘‘ਮਾ ਇਧ ਪવਿਸਾ’’ਤਿਆਦਿਨਾ ਨਿਕ੍ਕਡ੍ਢਿਤੋ।
363. Āsanena nave na paṭibāheyyāti yojanā. Āsanenāti āsanato. Na paṭibāheyyāti na uṭṭhāpeyya. Uṇhe cīvaraṃ na nidaheyyāti yojanīyaṃ. Na nidaheyyāti adhikaṃ na nidaheyya. Garunāti ācariyupajjhāyena. Paṇāmitoti ‘‘mā idha pavisā’’tiādinā nikkaḍḍhito.
੩੬੪. ਸਤ੍ਤਹਿ ਆਪਤ੍ਤੀਹਿ ਚ ਭਿਕ੍ਖੁਂ વਾਪਿ ਅਞ੍ਞੇਨੇવ ਚ ਉਪਾਸਕਂ વਾਪਿ ਪਰਮ੍ਮੁਖਾ ਅਕ੍ਕੋਸਨੇ ਦੁਕ੍ਕਟਨ੍ਤਿ ਯੋਜੇਤਬ੍ਬਂ। ਆਪਤ੍ਤੀਹਿ ਚਾਤਿ ਚ-ਸਦ੍ਦੋ ਅવਧਾਰਣੇ। ਅਞ੍ਞੇਨੇવ ਚਾਤਿ ਏਤ੍ਥ ਏવ ਚਾਤਿ ਨਿਪਾਤਸਮੁਦਾਯੋ, ਏਕੋ ਏવ વਾ ਅવਧਾਰਣੇ, વੁਤ੍ਤਤੋ ਅਞ੍ਞੇਨੇવ ‘‘ਅਸਦ੍ਧੋ’’ਤਿਆਦਿਨਾਤਿ ਅਤ੍ਥੋ। ਪਰਮ੍ਮੁਖਾਤਿ ਨਿਪਾਤੋ, ਤਸ੍ਸ ਅਸਮ੍ਮੁਖੇਤਿ ਅਤ੍ਥੋ। ਸਮ੍ਮੁਖਾ વਦਨ੍ਤਸ੍ਸ ਪਾਚਿਤ੍ਤਿਯਂ। ਪਾਪਗਰਹਣવਸੇਨ ਪਨ વਦਤੋ ਅਨਾਪਤ੍ਤਿ।
364. Sattahi āpattīhi ca bhikkhuṃ vāpi aññeneva ca upāsakaṃ vāpi parammukhā akkosane dukkaṭanti yojetabbaṃ. Āpattīhi cāti ca-saddo avadhāraṇe. Aññeneva cāti ettha eva cāti nipātasamudāyo, eko eva vā avadhāraṇe, vuttato aññeneva ‘‘asaddho’’tiādināti attho. Parammukhāti nipāto, tassa asammukheti attho. Sammukhā vadantassa pācittiyaṃ. Pāpagarahaṇavasena pana vadato anāpatti.
੩੬੫. ਸਦ੍ਧਾਦੇਯ੍ਯਂ ਸਦ੍ਧਾਯ ਦਾਤਬ੍ਬਂ ਚੀવਰਞ੍ਚ ਚ-ਸਦ੍ਦੇਨ ਅવਸੇਸਮ੍ਪਿ વਿਨਿਪਾਤੇਤੁਂ ਨਾਸੇਤੁਂ ਨ ਲਬ੍ਭਂ, ਪਿਤੂਨਂ ਲਬ੍ਭਨ੍ਤਿ ਸਮ੍ਬਨ੍ਧੋ। ਞਾਤੀਨਮ੍ਪੀਤਿ ਪਿ-ਸਦ੍ਦੋ ਸਮ੍ਭਾવਨੇ।
365.Saddhādeyyaṃ saddhāya dātabbaṃ cīvarañca ca-saddena avasesampi vinipātetuṃ nāsetuṃ na labbhaṃ, pitūnaṃ labbhanti sambandho. Ñātīnampīti pi-saddo sambhāvane.
੩੬੬. ਅਞ੍ਞਤ੍ਰ વਸ੍ਸਂવੁਤ੍ਥੋ ਅਞ੍ਞਤੋ ਭਾਗਂ ਗਣ੍ਹੇਯ੍ਯ, ਦੁਕ੍ਕਟਨ੍ਤਿ ਸਮ੍ਬਨ੍ਧੋ। ਅਞ੍ਞਤ੍ਰਾਤਿ ਅਞ੍ਞਸ੍ਮਿਂ વਿਹਾਰੇ। ਅਞ੍ਞਤੋਤਿ ਅਞ੍ਞવਿਹਾਰਤੋ। ਪਟਿਦੇਯ੍ਯਾਤਿ ਗਹਿਤਟ੍ਠਾਨੇ ਦਦੇਯ੍ਯ। ਗਹਿਤੇ ਤਸ੍ਮਿਂ વਤ੍ਥੁਸ੍ਮਿਂ ਨਟ੍ਠੇ વਾ ਜਿਣ੍ਣੇ વਾ ਤਸ੍ਸ ਗੀવਾਹੋ ਤੀਤਿ ਸਮ੍ਬਨ੍ਧੋ। ਚੋਦਿਤੋ ਨੋ ਦਦੇਯ੍ਯ, ਤੇਸਂ ਧੁਰਨਿਕ੍ਖੇਪਤੋ ਭਣ੍ਡਗ੍ਘਕਾਰਿਯੋ ਹੋਤੀਤਿ ਯੋਜਨਾ। ਚੋਦਿਤੋਤਿ વਤ੍ਥੁਸਾਮਿਕੇਹਿ ‘‘ਦੇਹੀ’’ਤਿ વੁਤ੍ਤੋ। ਤੇਸਨ੍ਤਿ ਤਸ੍ਮਿਂ વਿਹਾਰੇ ਲਾਭੀਨਂ ਭਿਕ੍ਖੂਨਂ।
366. Aññatra vassaṃvuttho aññato bhāgaṃ gaṇheyya, dukkaṭanti sambandho. Aññatrāti aññasmiṃ vihāre. Aññatoti aññavihārato. Paṭideyyāti gahitaṭṭhāne dadeyya. Gahite tasmiṃ vatthusmiṃ naṭṭhe vā jiṇṇe vā tassa gīvāho tīti sambandho. Codito no dadeyya, tesaṃ dhuranikkhepato bhaṇḍagghakāriyo hotīti yojanā. Coditoti vatthusāmikehi ‘‘dehī’’ti vutto. Tesanti tasmiṃ vihāre lābhīnaṃ bhikkhūnaṃ.
੩੬੭. ਸਨ੍ਤਰੁਤ੍ਤਰੋ વਾ ਕਲ੍ਲੋ ਸਉਪਾਹਨੋ વਾ ਗਾਮਂ ਨ ਪવਿਸੇਯ੍ਯ, ਚਾਮਰੀਮਕਸਬੀਜਨਿਂ ਨ ਧਾਰੇਯ੍ਯਾਤਿ ਯੋਜਨੀਯਂ। ਅਨ੍ਤਰਞ੍ਚ ਉਤ੍ਤਰਞ੍ਚ, ਸਹ ਅਨ੍ਤਰੁਤ੍ਤਰੇਨ ਸਨ੍ਤਰੁਤ੍ਤਰੋ। ਅਗ੍ਗਲ਼ਗੁਤ੍ਤੇ વਿਹਾਰੇ ਸਙ੍ਘਾਟਿਂ ਨਿਕ੍ਖਿਪਿਤ੍વਾ ਗਨ੍ਤੁਂ વਟ੍ਟਤਿ। ਆਰਞ੍ਞਕੇਨ ਪਨ ਭਣ੍ਡੁਕ੍ਖਲਿਕਾਯ ਪਕ੍ਖਿਪਿਤ੍વਾ ਪਾਸਾਣਰੁਕ੍ਖਸੁਸਿਰਾਦੀਸੁ ਪਟਿਚ੍ਛਨ੍ਨੇਸੁ ਠਪੇਤ੍વਾ ਗਨ੍ਤਬ੍ਬਂ। ਅਨ੍ਤਰੁਤ੍ਤਰਾਨਂ ਨਿਕ੍ਖੇਪੇ ਅਯਮੇવ ਨਯੋ। ਕਲ੍ਲੋਤਿ ਅਗਿਲਾਨੋ। ਮਕਸਾਨਂ ਬੀਜਨੀ ਮਕਸਬੀਜਨੀ, ਚਮਰੀਨਂ વਾਲ਼ੇਹਿ ਕਤਾ ਮਕਸਬੀਜਨੀਤਿ ਸਮਾਸੋ।
367. Santaruttaro vā kallo saupāhano vā gāmaṃ na paviseyya, cāmarīmakasabījaniṃ na dhāreyyāti yojanīyaṃ. Antarañca uttarañca, saha antaruttarena santaruttaro. Aggaḷagutte vihāre saṅghāṭiṃ nikkhipitvā gantuṃ vaṭṭati. Āraññakena pana bhaṇḍukkhalikāya pakkhipitvā pāsāṇarukkhasusirādīsu paṭicchannesu ṭhapetvā gantabbaṃ. Antaruttarānaṃ nikkhepe ayameva nayo. Kalloti agilāno. Makasānaṃ bījanī makasabījanī, camarīnaṃ vāḷehi katā makasabījanīti samāso.
੩੬੮. ਆਰਾਮਤੋ ਬਹੀਤਿ ਸਮ੍ਬਨ੍ਧਨੀਯਂ। ਆਰਾਮਤੋਤਿ ਆਰਾਮੂਪਚਾਰਤੋ। ਨ ਧਾਰੇਯ੍ਯਾਤਿ ਅਗਿਲਾਨੋ ਨ ਧਾਰੇਯ੍ਯ। ਯਸ੍ਸ ਪਨ ਕਾਯਦਾਹੋ વਾ ਪਿਤ੍ਤਕੋਪੋ વਾ ਹੋਤਿ, ਚਕ੍ਖੁ વਾ ਦੁਬ੍ਬਲਂ, ਅਞ੍ਞੋ વਾ ਕੋਚਿ ਆਬਾਧੋ વਿਨਾ ਛਤ੍ਤੇਨ ਉਪ੍ਪਜ੍ਜਤਿ, ਤਸ੍ਸ ਗਾਮੇ વਾ ਅਰਞ੍ਞੇ વਾ ਛਤ੍ਤਂ વਟ੍ਟਤਿ। ਗੁਤ੍ਤਿਯਾ ਲਬ੍ਭਤੀਤਿ વਸ੍ਸੇ ਚੀવਰਗੁਤ੍ਤਤ੍ਥਂ, વਾਲ਼ਮਿਗਚੋਰਭਯੇਸੁ ਅਤ੍ਤਗੁਤ੍ਤਤ੍ਥਮ੍ਪਿ ਲਬ੍ਭਤੀਤਿ ਅਤ੍ਥੋ। ਏਕਪਣ੍ਣਛਤ੍ਤਂ ਪਨ ਸਬ੍ਬਤ੍ਥੇવ વਟ੍ਟਤਿ।
368. Ārāmato bahīti sambandhanīyaṃ. Ārāmatoti ārāmūpacārato. Na dhāreyyāti agilāno na dhāreyya. Yassa pana kāyadāho vā pittakopo vā hoti, cakkhu vā dubbalaṃ, añño vā koci ābādho vinā chattena uppajjati, tassa gāme vā araññe vā chattaṃ vaṭṭati. Guttiyā labbhatīti vasse cīvaraguttatthaṃ, vāḷamigacorabhayesu attaguttatthampi labbhatīti attho. Ekapaṇṇachattaṃ pana sabbattheva vaṭṭati.
੩੬੯. ਉਭਤੋਕਾਜਂ ਨ ਗਾਹੇਯ੍ਯਾਤਿ ਸਮ੍ਬਨ੍ਧੋ। ਉਭਤੋ ਦਣ੍ਡਸ੍ਸ ਉਭਯਕੋਟਿਯਂ ਭਾਰਬਨ੍ਧਕਾਜਂ ਉਭਤੋਕਾਜਂ, ਅਲੋਪਤਪ੍ਪੁਰਿਸੋ। ਏਕਨ੍ਤਰਿਕਕਾਜਕਨ੍ਤਿ ਅਨ੍ਤਰਮੇવ ਅਨ੍ਤਰਿਕਂ, ਏਕਞ੍ਚ ਅਨ੍ਤਰਿਕਞ੍ਚਾਤਿ ਦ੍વਨ੍ਦੋ, ਏਕਨ੍ਤਰਿਕੇ ਭਾਰਬਨ੍ਧਕਾਜਨ੍ਤਿ ਤਪ੍ਪੁਰਿਸੋ ਏਕਤੋਕਾਜਕਂ, ਅਨ੍ਤਰਿਕਕਾਜਕਨ੍ਤਿ વੁਤ੍ਤਂ ਹੋਤਿ। ਹਤ੍ਥੇ ਓਲਮ੍ਬੋ ਅਸ੍ਸ ਭਾਰਸ੍ਸਾਤਿ ਸਮਾਸੋ।
369. Ubhatokājaṃ na gāheyyāti sambandho. Ubhato daṇḍassa ubhayakoṭiyaṃ bhārabandhakājaṃ ubhatokājaṃ, alopatappuriso. Ekantarikakājakanti antarameva antarikaṃ, ekañca antarikañcāti dvando, ekantarike bhārabandhakājanti tappuriso ekatokājakaṃ, antarikakājakanti vuttaṃ hoti. Hatthe olambo assa bhārassāti samāso.
੩੭੦. ਅਨੋਕਾਸਕਤਨ੍ਤਿ ‘‘ਕਰੋਤੁ ਮੇ ਆਯਸ੍ਮਾ ਓਕਾਸਂ, ਅਹਂ ਤਂ વਤ੍ਤੁਕਾਮੋ’’ਤਿ ਏવਂ ਚੋਦਕੇਨ ਓਕਾਸੇ ਕਾਰਾਪਿਤੇ ਨਤ੍ਥਿ ਓਕਾਸੋ ਕਤੋ ਅਨੇਨ ਚੁਦਿਤਕੇਨਾਤਿ ਬਹੁਬ੍ਬੀਹਿ। ਚੋਦੇਯ੍ਯਾਤਿ ਚਾવਨਅਕ੍ਕੋਸਕਮ੍ਮવੁਟ੍ਠਾਨਾਧਿਪ੍ਪਾਯੇਨ ਚੋਦੇਯ੍ਯ। ਉਪੋਸਥਪ੍ਪવਾਰਣਟ੍ਠਪਨਅਨੁવਿਜ੍ਜਧਮ੍ਮਕਥਾਧਿਪ੍ਪਾਯੇਸੁ ਓਕਾਸਕਮ੍ਮਂ ਨਤ੍ਥਿ। ਸੁਦ੍ਧਸ੍ਸਾਤਿ ਅਨਾਪਤ੍ਤਿਕਤਾਯ ਸੁਦ੍ਧਸ੍ਸ। ਅવਤ੍ਥੁਸ੍ਮਿਨ੍ਤਿ ਅਕਾਰਣੇ। ਤਥਾਤਿ ਦੁਕ੍ਕਟਂ ਅਤਿਦਿਸਤਿ। ਕਰੋਨ੍ਤੇਨਾਪਿ ‘‘ਭੂਤਮੇવ ਨੁ ਖੋ ਆਪਤ੍ਤਿਂ વਦਤਿ, ਅਭੂਤ’’ਨ੍ਤਿ ਏવਂ ਉਪਪਰਿਕ੍ਖਿਤ੍વਾ ਕਾਤਬ੍ਬਾ। ‘‘ਅਨੁਜਾਨਾਮਿ, ਭਿਕ੍ਖવੇ, ਪੁਗ੍ਗਲਂ ਤੁਲਯਿਤ੍વਾ ਓਕਾਸਂ ਕਾਤੁ’’ਨ੍ਤਿ (ਮਹਾવ॰ ੧੫੩) ਹਿ વੁਤ੍ਤਂ।
370.Anokāsakatanti ‘‘karotu me āyasmā okāsaṃ, ahaṃ taṃ vattukāmo’’ti evaṃ codakena okāse kārāpite natthi okāso kato anena cuditakenāti bahubbīhi. Codeyyāti cāvanaakkosakammavuṭṭhānādhippāyena codeyya. Uposathappavāraṇaṭṭhapanaanuvijjadhammakathādhippāyesu okāsakammaṃ natthi. Suddhassāti anāpattikatāya suddhassa. Avatthusminti akāraṇe. Tathāti dukkaṭaṃ atidisati. Karontenāpi ‘‘bhūtameva nu kho āpattiṃ vadati, abhūta’’nti evaṃ upaparikkhitvā kātabbā. ‘‘Anujānāmi, bhikkhave, puggalaṃ tulayitvā okāsaṃ kātu’’nti (mahāva. 153) hi vuttaṃ.
੩੭੧. ਸਤ੍ਤਾਨਂ ਪਕਤਙ੍ਗੁਲੇਨ ਅਟ੍ਠਙ੍ਗੁਲਾਧਿਕਂ ਮਞ੍ਚਪ੍ਪਟਿਪਾਦਂ વਾ ਉਚ੍ਚਪਾਦਕਂ ਮਞ੍ਚਂ વਾ ਨ ਧਾਰਯੇਤਿ ਯੋਜਨਾ। ਪਕਤਿਯਾ ਅਙ੍ਗੁਲਂ ਪਕਤਙ੍ਗੁਲਂ। ਤਞ੍ਚ વਡ੍ਢਕਿਅਙ੍ਗੁਲਂ વੇਦਿਤਬ੍ਬਂ। ਅਟ੍ਠ ਚ ਤਾਨਿ ਅਙ੍ਗੁਲਾਨਿ ਚ, ਤੇਹਿ ਤਮਧਿਕਂ ਯਸ੍ਸਾਤਿ ਸਮਾਸੋ। ਮਞ੍ਚਾਨਂ ਪਟਿਪਾਦੋ, ਯਤ੍ਥ ਮਞ੍ਚਪਾਦੇ ਨਿਕ੍ਖਿਪਨ੍ਤਿ। ਅਟ੍ਠਙ੍ਗੁਲਤੋ ਉਚ੍ਚਾ ਪਾਦਾ ਯਸ੍ਸਾਤਿ ਬਹੁਬ੍ਬੀਹਿ।
371. Sattānaṃ pakataṅgulena aṭṭhaṅgulādhikaṃ mañcappaṭipādaṃ vā uccapādakaṃ mañcaṃ vā na dhārayeti yojanā. Pakatiyā aṅgulaṃ pakataṅgulaṃ. Tañca vaḍḍhakiaṅgulaṃ veditabbaṃ. Aṭṭha ca tāni aṅgulāni ca, tehi tamadhikaṃ yassāti samāso. Mañcānaṃ paṭipādo, yattha mañcapāde nikkhipanti. Aṭṭhaṅgulato uccā pādā yassāti bahubbīhi.
੩੭੨. ਮੂਗਬ੍ਬਤਾਦਿਨ੍ਤਿ ਮੂਗਾਨਮਿવ ਤੁਣ੍ਹੀਭਾવਸਙ੍ਖਾਤਂ વਤਂ ਆਦਿ ਯਸ੍ਸ ਗੋવਤਾਦਿਨੋ ਤਿਤ੍ਥਿਯવਤਸ੍ਸਾਤਿ ਸਮਾਸੋ। ਖੁਰਮੇવ ਭਣ੍ਡਂ ਖੁਰਭਣ੍ਡਂ। ਪੁਬ੍ਬੇ ਨ੍ਹਾਪਿਤੋ ਨ੍ਹਾਪਿਤਪੁਬ੍ਬਕੋ, વਿਸੇਸਨਸ੍ਸ ਪਰਨਿਪਾਤੋ।
372.Mūgabbatādinti mūgānamiva tuṇhībhāvasaṅkhātaṃ vataṃ ādi yassa govatādino titthiyavatassāti samāso. Khurameva bhaṇḍaṃ khurabhaṇḍaṃ. Pubbe nhāpito nhāpitapubbako, visesanassa paranipāto.
੩੭੩. ਹਤ੍ਥਕਮ੍ਮਨ੍ਤਿ ਹਤ੍ਥੇਨ ਕਾਤਬ੍ਬਂ વਡ੍ਢਕਿਆਦੀਨਂ ਕਮ੍ਮਂ। ਅਨੁਸ੍ਸਰਣਂ ‘‘ਕਪ੍ਪਿਯਤ੍ਤਂ ਮੇ ਯੇਨ ਯਾਚਿਤਂ, ਅਮ੍ਹੇਹਿ ਇਮਸ੍ਸ ਦਾਤਬ੍ਬ’’ਨ੍ਤਿ ਏવਂ ਚਿਤ੍ਤਪ੍ਪવਤ੍ਤਿਅਨੁਸਾਰੋ, ਤਸ੍ਸਾ ਯਾਚਨਾਯ ਅਨੁਸਾਰੋ ਤਦਨੁਸਾਰੋ, ਤਤੋ ਲਦ੍ਧਂ ਯਂ ਕਿਞ੍ਚਿ ਗਹੇਤੁਨ੍ਤਿ ਯੋਜਨਾ। ਕਮ੍ਮਤੋ ਨਿਗ੍ਗਤੋ ਨਿਕ੍ਕਮ੍ਮੋ, વਿਘਾਸਾਦਾਦਿ। ਤਂ ਅਯਾਚਿਤ੍વਾਪਿ ਕਾਰੇਤੁਨ੍ਤਿ ਸਮ੍ਬਨ੍ਧੋ। ਆਹਰਾਪੇਤੁਨ੍ਤਿ ਅਰਞ੍ਞਤੋ ਆਨੇਤੁਂ। ਅਪਰਸਨ੍ਤਕਨ੍ਤਿ ਦਾਰੁਤਿਣਪਲਾਲਾਦਿਕਂ ਅਪਰਪਰਿਗ੍ਗਹਿਤਂ।
373.Hatthakammanti hatthena kātabbaṃ vaḍḍhakiādīnaṃ kammaṃ. Anussaraṇaṃ ‘‘kappiyattaṃ me yena yācitaṃ, amhehi imassa dātabba’’nti evaṃ cittappavattianusāro, tassā yācanāya anusāro tadanusāro, tato laddhaṃ yaṃ kiñci gahetunti yojanā. Kammato niggato nikkammo, vighāsādādi. Taṃ ayācitvāpi kāretunti sambandho. Āharāpetunti araññato ānetuṃ. Aparasantakanti dārutiṇapalālādikaṃ aparapariggahitaṃ.
੩੭੪. ਗਿਹੀਨਂ ਯਤ੍ਤਕਂ ਦੇਤਿ, ਗੋਪਕੇ ਦੇਨ੍ਤੇ ਗਹੇਤੁਂ ਲਬ੍ਭਂ, ਸਙ੍ਘਚੇਤਿਯਸਨ੍ਤਕੇ ਯਥਾਪਰਿਚ੍ਛੇਦਂ ਗਹੇਤੁਂ ਲਬ੍ਭਨ੍ਤਿ ਯੋਜਨਾ। ਦੇਤੀਤਿ ਗੋਪਕੋ ਭਿਕ੍ਖੂਨਂ ਦੇਤਿ। ਗਹੇਤੁਨ੍ਤਿ ਤਤ੍ਤਕਂ ਗਹੇਤੁਂ। ਸਙ੍ਘਚੇਤਿਯਸਨ੍ਤਕੇਤਿ વੇਤਨਗੋਪਕੇਹਿ ਦੀਯਮਾਨੇ ਸਙ੍ਘਸ੍ਸ ਚੇਤਿਯਸ੍ਸ ਚ ਸਨ੍ਤਕੇ। ਯਥਾਪਰਿਚ੍ਛੇਦਨ੍ਤਿ ਯਂ ਤੇਸਂ ਸਙ੍ਘੇਨ ਅਨੁਞ੍ਞਾਤਂ ਹੋਤਿ ‘‘ਦਿવਸੇ ਦਿવਸੇ ਏਤ੍ਤਕਂ ਨਾਮ ਖਾਦਥਾ’’ਤਿ, ਤਂ ਪਰਿਚ੍ਛੇਦਂ ਅਨਤਿਕ੍ਕਮ੍ਮ। ਸਙ੍ਘਿਕੇ ਚ ਚੇਤਿਯਸਨ੍ਤਕੇ ਚ ਕੇਣਿਯਾ ਗਹੇਤ੍વਾ ਆਰਕ੍ਖਨ੍ਤਸ੍ਸੇવ ਹਿ ਦਾਨੇ ਪਰਿਚ੍ਛੇਦੋ ਨਤ੍ਥਿ।
374. Gihīnaṃ yattakaṃ deti, gopake dente gahetuṃ labbhaṃ, saṅghacetiyasantake yathāparicchedaṃ gahetuṃ labbhanti yojanā. Detīti gopako bhikkhūnaṃ deti. Gahetunti tattakaṃ gahetuṃ. Saṅghacetiyasantaketi vetanagopakehi dīyamāne saṅghassa cetiyassa ca santake. Yathāparicchedanti yaṃ tesaṃ saṅghena anuññātaṃ hoti ‘‘divase divase ettakaṃ nāma khādathā’’ti, taṃ paricchedaṃ anatikkamma. Saṅghike ca cetiyasantake ca keṇiyā gahetvā ārakkhantasseva hi dāne paricchedo natthi.
੩੭੫. ‘‘ਕਾਯવਾਚਾਹਿ ਦ੍વੀਹਿ ਆਪਤ੍ਤਿਂ ਆਪਜ੍ਜੇਯ੍ਯਾ’’ਤਿ ਯੇਭੁਯ੍ਯવਸੇਨ વੁਤ੍ਤਂ, ਮੇਥੁਨਧਮ੍ਮੇ ਪਰੂਪਕ੍ਕਮੇ ਸਤਿ ਸਾਦਿਯਨ੍ਤਸ੍ਸ ਅਕਿਰਿਯਸਮੁਟ੍ਠਾਨਭਾવਸਮ੍ਭવਤੋ। ਛਹਿ વਾਤਿ ਆਪਤ੍ਤੁਪ੍ਪਤ੍ਤਿਕਾਰਣਸਙ੍ਖਾਤੇਹਿ ਛਹਿ ਸਮੁਟ੍ਠਾਨੇਹਿ વਾ ਆਪਤ੍ਤਿਂ ਆਪਜ੍ਜੇਯ੍ਯਾਤਿ ਸਮ੍ਬਨ੍ਧੋ। ਸਬ੍ਬਾਪਤ੍ਤੀਨਞ੍ਹਿ ਕਾਯੋ વਾਚਾ ਕਾਯવਾਚਾ ਕਾਯਚਿਤ੍ਤਂ વਾਚਾਚਿਤ੍ਤਂ ਕਾਯવਾਚਾਚਿਤ੍ਤਨ੍ਤਿ ਛ ਸਮੁਟ੍ਠਾਨਾਨਿ। ਤਤ੍ਥ ਪੁਰਿਮਾਨਿ ਤੀਣਿ ਅਚਿਤ੍ਤਕਾਨਿ, ਪਚ੍ਛਿਮਾਨਿ ਸਚਿਤ੍ਤਕਾਨਿ।
375.‘‘Kāyavācāhi dvīhi āpattiṃ āpajjeyyā’’ti yebhuyyavasena vuttaṃ, methunadhamme parūpakkame sati sādiyantassa akiriyasamuṭṭhānabhāvasambhavato. Chahi vāti āpattuppattikāraṇasaṅkhātehi chahi samuṭṭhānehi vā āpattiṃ āpajjeyyāti sambandho. Sabbāpattīnañhi kāyo vācā kāyavācā kāyacittaṃ vācācittaṃ kāyavācācittanti cha samuṭṭhānāni. Tattha purimāni tīṇi acittakāni, pacchimāni sacittakāni.
ਤਿਧਾ ਏਕਸਮੁਟ੍ਠਾਨਾ, ਪਞ੍ਚਧਾ ਦ੍વਿਸਮੁਟ੍ਠਿਤਾ।
Tidhā ekasamuṭṭhānā, pañcadhā dvisamuṭṭhitā;
ਦ੍વਿਧਾ ਤਿਚਤੁਰੋ ਠਾਨਾ, ਏਕਧਾ ਛਸਮੁਟ੍ਠਿਤਾ॥
Dvidhā ticaturo ṭhānā, ekadhā chasamuṭṭhitā.
ਤਤ੍ਥ ਚਤੁਤ੍ਥੇਨ ਪਞ੍ਚਮੇਨ ਛਟ੍ਠੇਨ ਚ ਸਮੁਟ੍ਠਾਨਤੋ ਏਕਸਮੁਟ੍ਠਾਨਾ ਤਿਧਾ। ਪਠਮਚਤੁਤ੍ਥੇਹਿ ਚ ਦੁਤਿਯਪਞ੍ਚਮੇਹਿ ਚ ਤਤਿਯਛਟ੍ਠੇਹਿ ਚ ਚਤੁਤ੍ਥਛਟ੍ਠੇਹਿ ਚ ਪਞ੍ਚਮਛਟ੍ਠੇਹਿ ਚ ਸਮੁਟ੍ਠਾਨਤੋ ਦ੍વਿਸਮੁਟ੍ਠਿਤਾ ਪਞ੍ਚਧਾ । ਪਠਮੇਹਿ ਚ ਤੀਹਿ ਪਚ੍ਛਿਮੇਹਿ ਚ ਤੀਹਿ ਸਮੁਟ੍ਠਾਨਤੋ ਤਿਸਮੁਟ੍ਠਾਨਾ ਦ੍વਿਧਾ। ਪਠਮਤਤਿਯਚਤੁਤ੍ਥਛਟ੍ਠੇਹਿ ਚ ਦੁਤਿਯਤਤਿਯਪਞ੍ਚਮਛਟ੍ਠੇਹਿ ਚ ਸਮੁਟ੍ਠਾਨਤੋ ਚਤੁਸਮੁਟ੍ਠਾਨਾ ਦ੍વਿਧਾ। ਛਹਿਪਿ ਸਮੁਟ੍ਠਿਤੋ ਛਸਮੁਟ੍ਠਾਨਾ ਏਕਧਾ। ਅਲਜ੍ਜਿ…ਪੇ॰… ਸਞ੍ਞਿਤਾਯ ਚਾਤਿ ਇਮੇਹਿ ਛਹਿ વਾ ਆਪਤ੍ਤਿਂ ਆਪਜ੍ਜੇਯ੍ਯਾਤਿ ਸਮ੍ਬਨ੍ਧੋ। ਯੋ ਸਞ੍ਚਿਚ੍ਚ ਆਪਤ੍ਤਿਂ ਆਪਜ੍ਜਤਿ, ਆਪਤ੍ਤਿਂ ਪਰਿਗੂਹਤਿ, ਅਗਤਿਗਮਨਞ੍ਚ ਗਚ੍ਛਤਿ, ਏਦਿਸੋ વੁਚ੍ਚਤਿ ਅਲਜ੍ਜੀ ਪੁਗ੍ਗਲੋ। ਅਲਜ੍ਜੀ ਚ ਅਞ੍ਞਾਣੋ ਚ ਕੁਕ੍ਕੁਚ੍ਚਪਕਤੋ ਚ ਕੁਕ੍ਕੁਚ੍ਚੇਨ ਅਭਿਭੂਤੋਤਿ ਦ੍વਨ੍ਦੋ। ਭਾવੇ ਤ੍ਤਪ੍ਪਚ੍ਚਯੋ।
Tattha catutthena pañcamena chaṭṭhena ca samuṭṭhānato ekasamuṭṭhānā tidhā. Paṭhamacatutthehi ca dutiyapañcamehi ca tatiyachaṭṭhehi ca catutthachaṭṭhehi ca pañcamachaṭṭhehi ca samuṭṭhānato dvisamuṭṭhitā pañcadhā. Paṭhamehi ca tīhi pacchimehi ca tīhi samuṭṭhānato tisamuṭṭhānā dvidhā. Paṭhamatatiyacatutthachaṭṭhehi ca dutiyatatiyapañcamachaṭṭhehi ca samuṭṭhānato catusamuṭṭhānā dvidhā. Chahipi samuṭṭhito chasamuṭṭhānā ekadhā. Alajji…pe… saññitāya cāti imehi chahi vā āpattiṃ āpajjeyyāti sambandho. Yo sañcicca āpattiṃ āpajjati, āpattiṃ parigūhati, agatigamanañca gacchati, ediso vuccati alajjī puggalo. Alajjī ca aññāṇo ca kukkuccapakato ca kukkuccena abhibhūtoti dvando. Bhāve ttappaccayo.
ਤਤ੍ਥ ਯੋ ਅਕਪ੍ਪਿਯਭਾવਂ ਜਾਨਨ੍ਤੋਯੇવ ਮਦ੍ਦਿਤ੍વਾ વੀਤਿਕ੍ਕਮਂ ਕਰੋਤਿ, ਅਯਂ ਅਲਜ੍ਜਿਤਾ ਆਪਜ੍ਜਤਿ। ਮਨ੍ਦੋ ਮੋਮੂਹੋ ਕਤ੍ਤਬ੍ਬਾਕਤ੍ਤਬ੍ਬਂ ਅਜਾਨਨ੍ਤੋ ਅਕਤ੍ਤਬ੍ਬਂ ਕਰੋਤਿ, ਕਤ੍ਤਬ੍ਬਂ વਿਰਾਧੇਤਿ, ਅਯਂ ਅਞ੍ਞਾਣਤ੍ਤਾ ਆਪਜ੍ਜਤਿ। ਕਪ੍ਪਿਯਾਕਪ੍ਪਿਯਂ ਨਿਸ੍ਸਾਯ ਕੁਕ੍ਕੁਚ੍ਚੇ ਉਪ੍ਪਨ੍ਨੇ વਿਨਯਧਰਂ ਅਪੁਚ੍ਛਿਤ੍વਾ ਮਦ੍ਦਿਤ੍વਾ વੀਤਿਕ੍ਕਮਤਿ, ਅਯਂ ਕੁਕ੍ਕੁਚ੍ਚਪਕਤਤ੍ਤਾ ਆਪਜ੍ਜਤਿ। ਸਤਿਯਾ ਪ੍ਲવੋ ਸਮ੍ਮੋਹੋ ਸਤਿਪ੍ਲવੋ, ਸਹਸੇਯ੍ਯਤਿਚੀવਰવਿਪ੍ਪવਾਸਾਦੀਨਿ ਸਤਿਪ੍ਲવਾ ਆਪਜ੍ਜਤਿ। ਕਪ੍ਪਞ੍ਚ ਅਕਪ੍ਪਿਯਞ੍ਚ ਕਪ੍ਪਾਕਪ੍ਪਿਯਂ, ਕਪ੍ਪਾਕਪ੍ਪਿਯੇ ਸਞ੍ਞਾ, ਸਾ ਅਸ੍ਸ ਅਤ੍ਥੀਤਿ ਕਪ੍ਪਾ…ਪੇ॰… ਸਞ੍ਞੀ, ਤਸ੍ਸ ਭਾવੋਤਿ ਤਾ-ਪਚ੍ਚਯੋ। ਯ-ਲੋਪੇਨ ਪਨ ‘‘ਸਞ੍ਞਿਤਾ’’ਤਿ વੁਤ੍ਤਂ, ਕਰਣਤ੍ਥੇ વਾ ਪਚ੍ਚਤ੍ਤવਚਨਂ। ਤੇ ਚ ‘‘ਅਕਪ੍ਪਿਯੇ’’ਤਿਆਦੀਨਂ ਯਥਾਕ੍ਕਮੇਨ ਯੁਜ੍ਜਨ੍ਤਿ। ਤਤ੍ਥ ਯੋ ਅਚ੍ਛਮਂਸਂ ‘‘ਸੂਕਰਮਂਸ’’ਨ੍ਤਿ ਖਾਦਤਿ, વਿਕਾਲੇ ਕਾਲਸਞ੍ਞਿਤਾਯ ਭੁਞ੍ਜਤਿ, ਅਯਂ ਅਕਪ੍ਪਿਯੇ ਕਪ੍ਪਿਯਸਞ੍ਞਿਤਾਯ ਆਪਜ੍ਜਤਿ। ਯੋ ਪਨ ਸੂਕਰਮਂਸਂ ‘‘ਅਚ੍ਛਮਂਸ’’ਨ੍ਤਿ ਖਾਦਤਿ, ਕਾਲੇ વਿਕਾਲਸਞ੍ਞਾਯ ਭੁਞ੍ਜਤਿ, ਅਯਂ ਕਪ੍ਪਿਯੇ ਅਕਪ੍ਪਿਯਸਞ੍ਞਿਤਾਯ ਆਪਜ੍ਜਤਿ।
Tattha yo akappiyabhāvaṃ jānantoyeva madditvā vītikkamaṃ karoti, ayaṃ alajjitā āpajjati. Mando momūho kattabbākattabbaṃ ajānanto akattabbaṃ karoti, kattabbaṃ virādheti, ayaṃ aññāṇattā āpajjati. Kappiyākappiyaṃ nissāya kukkucce uppanne vinayadharaṃ apucchitvā madditvā vītikkamati, ayaṃ kukkuccapakatattā āpajjati. Satiyā plavo sammoho satiplavo, sahaseyyaticīvaravippavāsādīni satiplavā āpajjati. Kappañca akappiyañca kappākappiyaṃ, kappākappiye saññā, sā assa atthīti kappā…pe… saññī, tassa bhāvoti tā-paccayo. Ya-lopena pana ‘‘saññitā’’ti vuttaṃ, karaṇatthe vā paccattavacanaṃ. Te ca ‘‘akappiye’’tiādīnaṃ yathākkamena yujjanti. Tattha yo acchamaṃsaṃ ‘‘sūkaramaṃsa’’nti khādati, vikāle kālasaññitāya bhuñjati, ayaṃ akappiye kappiyasaññitāya āpajjati. Yo pana sūkaramaṃsaṃ ‘‘acchamaṃsa’’nti khādati, kāle vikālasaññāya bhuñjati, ayaṃ kappiye akappiyasaññitāya āpajjati.
੩੭੬. ਅਲਜ੍ਜਿਅਞ੍ਞਾਣਤਾਯ ਕਾਯવਾਚਾਹਿ ਆਪਤ੍ਤਿਂ ਛਾਦਯੇਤਿ ਯੋਜਨਾ। ਲਿਙ੍ਗੇਤਿ ਲਿਙ੍ਗਪਰਿવਤ੍ਤਨਨਿਮਿਤ੍ਤਂ। ਲਿਙ੍ਗੇ ਸਙ੍ਘੇ ਚ ਗਣੇ ਚ ਏਕਸ੍ਮਿਂ ਚਾਤਿ ਆਪਤ੍ਤਿવੁਟ੍ਠਿਤਿ ਚਤੁਧਾ ਹੋਤੀਤਿ ਸੇਸੋ।
376. Alajjiaññāṇatāya kāyavācāhi āpattiṃ chādayeti yojanā. Liṅgeti liṅgaparivattananimittaṃ. Liṅge saṅghe ca gaṇe ca ekasmiṃ cāti āpattivuṭṭhiti catudhā hotīti seso.
੩੭੭. ਪਚ੍ਚਯਦ੍વਯੇਤਿ ਚੀવਰੇ ਪਿਣ੍ਡਪਾਤੇ ਚ। ਪਰਿਕਥੋਭਾਸવਿਞ੍ਞਤ੍ਤੀਤਿ ਅਭਿਲਾਪਮਤ੍ਤਮੇਤਂ। ਸਹਚਰਿਤਸ੍ਸ ਪਨ ਨਿਮਿਤ੍ਤਕਮ੍ਮਸ੍ਸਾਪਿ ਏਤ੍ਥੇવ ਸਙ੍ਗਹੋ વੇਦਿਤਬ੍ਬੋ। ਤਤ੍ਥ ਪਰਿਯਾਯੇਨ ਕਥਨਂ ਪਰਿਕਥਾ। ਉਜੁਕਮੇવ ਅવਤ੍વਾ ਯਥਾ ਅਧਿਪ੍ਪਾਯੋ વਿਭੂਤੋ ਹੋਤਿ, ਏવਂ ਓਭਾਸਨਂ ਓਭਾਸੋ। ਪਚ੍ਚਯੇ ਉਦ੍ਦਿਸ੍ਸ ਯਥਾ ਅਧਿਪ੍ਪਾਯੋ ਞਾਯਤਿ, ਏવਂ વਿਞ੍ਞਾਪਨਂ વਿਞ੍ਞਤ੍ਤਿ। ਨਿਮਿਤ੍ਤਕਰਣਂ ਨਿਮਿਤ੍ਤਕਮ੍ਮਂ। ਤਤਿਯੇਤਿ ਸੇਨਾਸਨੇ। ਸੇਸੇਤਿ ਗਿਲਾਨਪਚ੍ਚਯੇ।
377.Paccayadvayeti cīvare piṇḍapāte ca. Parikathobhāsaviññattīti abhilāpamattametaṃ. Sahacaritassa pana nimittakammassāpi ettheva saṅgaho veditabbo. Tattha pariyāyena kathanaṃ parikathā. Ujukameva avatvā yathā adhippāyo vibhūto hoti, evaṃ obhāsanaṃ obhāso. Paccaye uddissa yathā adhippāyo ñāyati, evaṃ viññāpanaṃ viññatti. Nimittakaraṇaṃ nimittakammaṃ. Tatiyeti senāsane. Seseti gilānapaccaye.
੩੭੮. ਪਞ੍ਚਨ੍ਨਂ ਸਹਧਮ੍ਮਿਕਾਨਂ ਅਚ੍ਚਯੇ ਦਾਨਂ ਨ ਰੂਹਤੀਤਿ ਸਮ੍ਬਨ੍ਧੋ। ਅਚ੍ਚਯੇ ਦਾਨਨ੍ਤਿ ‘‘ਮਮਚ੍ਚਯੇਨ ਮਯ੍ਹਂ ਸਨ੍ਤਕਂ ਉਪਜ੍ਝਾਯਸ੍ਸ ਹੋਤੂ’’ਤਿਆਦਿਨਾ ਏવਂ ਅਤ੍ਤਨੋ ਅਪਗਮੇ ਦਾਨਂ। ਤਨ੍ਤਿ ਅਚ੍ਚਯੇਨ ਦਿਨ੍ਨਂ ਚੀવਰਾਦਿਕਂ ਸਙ੍ਘਸ੍ਸੇવ ਚ ਹੋਤਿ, ਨ ਭਿਕ੍ਖੁਨੋਤਿ ਅਧਿਪ੍ਪਾਯੋ। ਗਿਹੀਨਂ ਪਨਾਤਿ ਗਿਹੀਨਂ ਅਚ੍ਚਯੇ ਦਾਨਂ ਪਨ। ਇਦਮੇਤ੍ਥ ਦਾਨਗ੍ਗਹਣਲਕ੍ਖਣਂ – ‘‘ਇਦਂ ਤੁਯ੍ਹਂ ਦਮ੍ਮੀ’’ਤਿਆਦਿਨਾ ਸਮ੍ਮੁਖਾ વਾ ‘‘ਇਤ੍ਥਨ੍ਨਾਮਸ੍ਸ ਦੇਮੀ’’ਤਿਆਦਿਨਾ ਪਰਮ੍ਮੁਖਾਪਿ ਦਿਨ੍ਨਂਯੇવ ਹੋਤਿ। ‘‘ਤੁਯ੍ਹਂ ਗਣ੍ਹਾਹੀ’’ਤਿ વੁਤ੍ਤੇ ‘‘ਮਯ੍ਹਂ ਗਣ੍ਹਾਮੀ’’ਤਿ વਦਤਿ, ਸੁਦਿਨ੍ਨਂ ਸੁਗ੍ਗਹਿਤਞ੍ਚ। ‘‘ਤવ ਸਨ੍ਤਕਂ ਕਰੋਹਿ, ਤવ ਸਨ੍ਤਕਂ ਹੋਤੁ, ਤવ ਸਨ੍ਤਕਂ ਕਾਰਾਪੇਹੀ’’ਤਿ વੁਤ੍ਤੇ ‘‘ਮਮ ਸਨ੍ਤਕਂ ਕਰੋਮਿ, ਮਮ ਸਨ੍ਤਕਂ ਹੋਤੁ, ਮਮ ਸਨ੍ਤਕਂ ਕਰਿਸ੍ਸਾਮੀ’’ਤਿ વਦਤਿ। ਦੁਦ੍ਦਿਨ੍ਨਂ ਦੁਗ੍ਗਹਿਤਞ੍ਚ। ਸਚੇ ਪਨ ‘‘ਤવ ਸਨ੍ਤਕਂ ਕਰੋਹੀ’’ਤਿ વੁਤ੍ਤੇ ‘‘ਸਾਧੁ, ਭਨ੍ਤੇ, ਮਯ੍ਹਂ ਗਣ੍ਹਾਮੀ’’ਤਿ ਗਣ੍ਹਾਤਿ, ਸੁਗ੍ਗਹਿਤਨ੍ਤਿ।
378. Pañcannaṃ sahadhammikānaṃ accaye dānaṃ na rūhatīti sambandho. Accaye dānanti ‘‘mamaccayena mayhaṃ santakaṃ upajjhāyassa hotū’’tiādinā evaṃ attano apagame dānaṃ. Tanti accayena dinnaṃ cīvarādikaṃ saṅghasseva ca hoti, na bhikkhunoti adhippāyo. Gihīnaṃ panāti gihīnaṃ accaye dānaṃ pana. Idamettha dānaggahaṇalakkhaṇaṃ – ‘‘idaṃ tuyhaṃ dammī’’tiādinā sammukhā vā ‘‘itthannāmassa demī’’tiādinā parammukhāpi dinnaṃyeva hoti. ‘‘Tuyhaṃ gaṇhāhī’’ti vutte ‘‘mayhaṃ gaṇhāmī’’ti vadati, sudinnaṃ suggahitañca. ‘‘Tava santakaṃ karohi, tava santakaṃ hotu, tava santakaṃ kārāpehī’’ti vutte ‘‘mama santakaṃ karomi, mama santakaṃ hotu, mama santakaṃ karissāmī’’ti vadati. Duddinnaṃ duggahitañca. Sace pana ‘‘tava santakaṃ karohī’’ti vutte ‘‘sādhu, bhante, mayhaṃ gaṇhāmī’’ti gaṇhāti, suggahitanti.
੩੭੯. ਭਿਕ੍ਖੁ વਾ ਸਾਮਣੇਰੋ વਾ ਉਪਸ੍ਸਯੇ ਭਿਕ੍ਖੁਨੀਨਂ વਿਹਾਰੇ ਕਾਲਂ ਕਯਿਰਾਥ ਯਦਿ ਕਾਲਙ੍ਕਰੇਯ੍ਯ, ਤਤ੍ਥ ਤਸ੍ਮਿਂ ਉਭਿਨ੍ਨਂ ਸਨ੍ਤਕੇ ਭਿਕ੍ਖੁਸਙ੍ਘੋ ਏવ ਦਾਯਜ੍ਜੋ ਸਾਮੀ ਹੋਤੀਤਿ ਸੇਸੋ। ਸੇਸੇਪੀਤਿ ਅવਸੇਸੇ ਭਿਕ੍ਖੁਨਿਸਿਕ੍ਖਮਾਨਸਾਮਣੇਰਿਸਨ੍ਤਕੇਪਿ। ਅਯਂ ਨਯੋਤਿ ਯਦਿ ਤੇ ਭਿਕ੍ਖੂਨਂ વਿਹਾਰੇ ਕਾਲਂ ਕਰੇਯ੍ਯੁਂ, ਤੇਸਂ ਸਨ੍ਤਕੇ ਭਿਕ੍ਖੁਨਿਸਙ੍ਘੋ ਏવ ਦਾਯਜ੍ਜੋਤਿ ਅਯਮੇવ ਨਯੋਤਿ ਅਤ੍ਥੋ।
379. Bhikkhu vā sāmaṇero vā upassaye bhikkhunīnaṃ vihāre kālaṃ kayirātha yadi kālaṅkareyya, tattha tasmiṃ ubhinnaṃ santake bhikkhusaṅgho eva dāyajjo sāmī hotīti seso. Sesepīti avasese bhikkhunisikkhamānasāmaṇerisantakepi. Ayaṃ nayoti yadi te bhikkhūnaṃ vihāre kālaṃ kareyyuṃ, tesaṃ santake bhikkhunisaṅgho eva dāyajjoti ayameva nayoti attho.
੩੮੦. ‘‘ਇਮਂ ਨੇਤ੍વਾ ਅਸੁਕਸ੍ਸ ਦੇਹੀ’’ਤਿ ਦਿਨ੍ਨਂ ਯਾવ ਪਰਸ੍ਸ ਹਤ੍ਥਂ ਨ ਪਾਪੁਣਾਤਿ, ਤਾવ ਪੁਰਿਮਸ੍ਸੇવ, ਯੋ ਪਹਿਣਤਿ, ਤਸ੍ਸੇવਾਤਿ ਅਤ੍ਥੋ। ਦਮ੍ਮੀਤਿ ‘‘ਇਤ੍ਥਨ੍ਨਾਮਸ੍ਸ ਦੇਮੀ’’ਤਿ ਦਿਨ੍ਨਂ ਪਨ ਪਚ੍ਛਿਮਸ੍ਸੇવ, ਯਸ੍ਸ ਪਹਿਣਤਿ, ਤਸ੍ਸੇવ ਸਨ੍ਤਕਨ੍ਤਿ ਅਤ੍ਥੋ। ਇਮਂ વਿਧਿਂ ‘‘વੁਤ੍ਤਨਯੇਨ ਇਮੇ ਸਾਮਿਨੋ ਹੋਨ੍ਤੀ’’ਤਿ ਏਤਂ ਪਕਾਰਂ ਞਤ੍વਾ વਿਸ੍ਸਾਸਗ੍ਗਾਹਂ વਾ ਗਣ੍ਹੇ, ਮਤਕਚੀવਰਂ વਾ ਅਧਿਟ੍ਠੇਤਿ ਯੋਜਨਾ। વਿਸ੍ਸਾਸਗਾਹਨ੍ਤਿ ਸਾਮੀਸੁ ਜੀવਨ੍ਤੇਸੁ વਿਸ੍ਸਾਸੇਨ ਗਾਹਂ ਗਹੇਤ੍વਾ। ਮਤਕਚੀવਰਂ ਅਧਿਟ੍ਠੇਤਿ ਤੇਸੁ ਮਤੇਸੁ ਅਞ੍ਞੇ ਚੇ ਭਿਕ੍ਖੂ ਨ ਸਨ੍ਤਿ, ‘‘ਮਯ੍ਹਂ ਤਂ ਪਾਪੁਣਾਤੀ’’ਤਿ ਮਤਕਚੀવਰਂ ਅਧਿਟ੍ਠੇਯ੍ਯ। ਅਞ੍ਞੇਸਂ ਅਦਤ੍વਾ ਦੂਰੇ ਠਪਿਤਮਤਕਪਰਿਕ੍ਖਾਰਾ ਪਨ ਤਤ੍ਥ ਤਤ੍ਥ ਸਙ੍ਘਸ੍ਸੇવ ਹੋਨ੍ਤਿ। ਭਿਕ੍ਖੁਮ੍ਹਿ ਕਾਲਕਤੇ ਸਙ੍ਘੋ ਸਾਮੀ ਪਤ੍ਤਚੀવਰੇ, ਅਪਿਚ ਗਿਲਾਨੁਪਟ੍ਠਾਕਾ ਬਹੂਪਕਾਰਾ, ਸਙ੍ਘੇਨ ਤਿਚੀવਰਞ੍ਚ ਪਤ੍ਤਞ੍ਚ ਗਿਲਾਨੁਪਟ੍ਠਾਕਾਨਂ ਦਾਤਬ੍ਬਂ। ਯਂ ਤਤ੍ਥ ਲਹੁਭਣ੍ਡਂ ਲਹੁਪਰਿਕ੍ਖਾਰਂ, ਤਂ ਸਮ੍ਮੁਖੀਭੂਤੇਨ ਸਙ੍ਘੇਨ ਭਾਜੇਤਬ੍ਬਂ। ਯਂ ਤਤ੍ਥ ਗਰੁਭਣ੍ਡਂ ਗਰੁਪਰਿਕ੍ਖਾਰਂ, ਤਂ ਆਗਤਾਨਾਗਤਸ੍ਸ ਚਾਤੁਦ੍ਦਿਸਸ੍ਸ ਸਙ੍ਘਸ੍ਸ ਅવਿਸ੍ਸਜ੍ਜਿਯਂ ਅવੇਭਙ੍ਗਿਯਂ। ਗਿਲਾਨੁਪਟ੍ਠਾਕੋ ਨਾਮ ਗਿਹੀ વਾ ਹੋਤੁ ਪਬ੍ਬਜਿਤੋ વਾ, ਅਨ੍ਤਮਸੋ ਮਾਤੁਗਾਮੋਪਿ, ਸਬ੍ਬੇ ਭਾਗਂ ਲਭਨ੍ਤਿ। ਬਹੂ ਚੇ ਸਬ੍ਬੇ ਸਮਗ੍ਗਾ ਹੁਤ੍વਾ ਉਪਟ੍ਠਹਨ੍ਤਿ, ਸਬ੍ਬੇਸਂ ਸਮਭਾਗੋ ਦਾਤਬ੍ਬੋ। ਯੋ ਪਨੇਤ੍ਥ વਿਸੇਸੇਨ ਉਪਟ੍ਠਹਤਿ, ਤਸ੍ਸ વਿਸੇਸੋ ਕਾਤਬ੍ਬੋ।
380. ‘‘Imaṃ netvā asukassa dehī’’ti dinnaṃ yāva parassa hatthaṃ na pāpuṇāti, tāva purimasseva, yo pahiṇati, tassevāti attho. Dammīti ‘‘itthannāmassa demī’’ti dinnaṃ pana pacchimasseva, yassa pahiṇati, tasseva santakanti attho. Imaṃ vidhiṃ ‘‘vuttanayena ime sāmino hontī’’ti etaṃ pakāraṃ ñatvā vissāsaggāhaṃ vā gaṇhe, matakacīvaraṃ vā adhiṭṭheti yojanā. Vissāsagāhanti sāmīsu jīvantesu vissāsena gāhaṃ gahetvā. Matakacīvaraṃ adhiṭṭheti tesu matesu aññe ce bhikkhū na santi, ‘‘mayhaṃ taṃ pāpuṇātī’’ti matakacīvaraṃ adhiṭṭheyya. Aññesaṃ adatvā dūre ṭhapitamatakaparikkhārā pana tattha tattha saṅghasseva honti. Bhikkhumhi kālakate saṅgho sāmī pattacīvare, apica gilānupaṭṭhākā bahūpakārā, saṅghena ticīvarañca pattañca gilānupaṭṭhākānaṃ dātabbaṃ. Yaṃ tattha lahubhaṇḍaṃ lahuparikkhāraṃ, taṃ sammukhībhūtena saṅghena bhājetabbaṃ. Yaṃ tattha garubhaṇḍaṃ garuparikkhāraṃ, taṃ āgatānāgatassa cātuddisassa saṅghassa avissajjiyaṃ avebhaṅgiyaṃ. Gilānupaṭṭhāko nāma gihī vā hotu pabbajito vā, antamaso mātugāmopi, sabbe bhāgaṃ labhanti. Bahū ce sabbe samaggā hutvā upaṭṭhahanti, sabbesaṃ samabhāgo dātabbo. Yo panettha visesena upaṭṭhahati, tassa viseso kātabbo.
੩੮੧. ‘‘ਲੋਹਭਣ੍ਡੇ ਪਹਰਣਿਂ ਠਪੇਤ੍વਾ ਸਬ੍ਬਂ ਕਪ੍ਪਤੀ’’ਤਿਆਦਿਨਾ ਯੋਜੇਤਬ੍ਬਂ। ਪਹਰਣਿਨ੍ਤਿ ਆવੁਧਂ। ਪਾਦੁਕਾ ਚ ਸਙ੍ਕਮਨੀਯੋ ਪਲ੍ਲਙ੍ਕੋ ਚਾਤਿ ਦ੍વਨ੍ਦੋ। ਮਤ੍ਤਿਕਾਮਯੇ ਕਤਕਂ ਕੁਮ੍ਭਕਾਰਿਕਞ੍ਚ ਠਪੇਤ੍વਾ ਸਬ੍ਬਂ ਕਪ੍ਪਤੀਤਿ ਯੋਜਨੀਯਂ, ਧਨਿਯਸ੍ਸੇવ ਸਬ੍ਬਮਤ੍ਤਿਕਾਮਯਕੁਟਿ ਕੁਮ੍ਭਕਾਰਿਕਾਤਿ।
381. ‘‘Lohabhaṇḍe paharaṇiṃ ṭhapetvā sabbaṃ kappatī’’tiādinā yojetabbaṃ. Paharaṇinti āvudhaṃ. Pādukā ca saṅkamanīyo pallaṅko cāti dvando. Mattikāmaye katakaṃ kumbhakārikañca ṭhapetvā sabbaṃ kappatīti yojanīyaṃ, dhaniyasseva sabbamattikāmayakuṭi kumbhakārikāti.
ਪਕਿਣ੍ਣਕਨਿਦ੍ਦੇਸવਣ੍ਣਨਾ ਨਿਟ੍ਠਿਤਾ।
Pakiṇṇakaniddesavaṇṇanā niṭṭhitā.
